JKCL-KABUM-08-NYA-011-011

🚧 This website is under continued development. We appreciate your patience!

Previous Text Back to Volume PageNext Text

ཞལ་གདམས་གནད་ཕྲེང་།

Wylie title	zhal gdams gnad phreng
Location	chos kyi blo gros bka' 'bum Volume 8, sde tshan 11, Text 11, Pages 325-333 (Folios 21a1 to 25a2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams gnad phreng. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 325-333. Bir, H.P.: Khyentse Labrang, 2012.
Genre	Advice - zhal gdams
Colophon	།དེ་སྐད་གདམས་པའི་རིམ་པ་ཉུང་ངུ་འདི། །ཁྱིམ་ན་གནས་ཀྱང་ཡང་དག་དགེ་བཅུའི་བློ། །དཀར་པོའི་ཚེས་ཀྱི་ཟླ་བའི་འཕེལ་ཆ་བཞིན། །དད་ལྡན་ཟླ་ནོར་ཞེས་བྱས་བསྐུལ་བའི་ངོར། །འཇམ་དབྱངས་ཆོས་ཀྱི་བློ་གྲོས་ཞེས་བྱ་བ། །ཆོས་མེད་དྲེད་པོ་དཀོར་རྐྱལ་དེ་ཉིད་ཀྱིས། །རང་གིས་མི་བྱེད་བཞིན་དུ་ཞལ་གདམས་ནི། །ཡིད་ལ་གང་དྲན་སྨིན་གྲོལ་གླིང་དུ་བྲིས། །དགེ་བས་ནམ་མཁའི་མཐའ་ཀླས་འགྲོ་བ་རྣམས། །རྒྱུད་ལ་བྱང་ཆུབ་སེམས་མཆོག་སྐྱེ་བ་དང་། །རང་གཞན་དོན་གཉིས་ལྷུན་གྲུབ་དཔལ་ལ་སྤྱོད། །ཀུན་བཟང་ཆོས་སྐུའི་ཀློང་དུ་གྲོལ་བར་ཤོག། སརྦ་དཱ་མངྒ་ལཾ།།
	/de skad gdams pa'i rim pa nyung ngu 'di/__/khyim na gnas kyang yang dag dge bcu'i blo/__/dkar po'i tshes kyi zla ba'i 'phel cha bzhin/__/dad ldan zla nor zhes byas bskul ba'i ngor/__/'jam dbyangs chos kyi blo gros zhes bya ba/__/chos med dred po dkor rkyal de nyid kyis/__/rang gis mi byed bzhin du zhal gdams ni/__/yid la gang dran smin grol gling du bris/__/dge bas nam mkha'i mtha' klas 'gro ba rnams/__/rgyud la byang chub sems mchog skye ba dang /__/rang gzhan don gnyis lhun grub dpal la spyod/__/kun bzang chos sku'i klong du grol bar shog/__sarba dA mang+ga laM//

1 Texts in this Section (sde tshan or chos tshan)

11 325-333	ཞལ་གདམས་གནད་ཕྲེང་། zhal gdams gnad phreng Advice - zhal gdams	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ ཞལ་གདམས་གནད་ཕྲེང་ཞེས་བྱ་བ། ཨོཾ་སྭསྟི། དུས་གསུམ་སངས་རྒྱས་ཐམས་ཅད་འདུས་པའི་དངོས། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །སྤང་བླང་གནད་ཀྱི་ཞལ་གདམས་ཉུང་ངུ་ཞིག། ཁྱེད་ཀྱི་སྙན་དུ་བསྲིངས་པས་ཤིས་གྱུར་ཅིག། ཀྱེ་མ་རྙེད་དཀའི་དལ་འབྱོར་སྐྱོན་མེད་འདི། །ལུས་རྟེན་འདི་འདྲ་ཕྱིས་ནས་རྙེད་པར་དཀའ། །ད་རེས་ཐོབ་པ་སྔོན་བསགས་དགེ་བ་དང་། །སངས་རྒྱས་བྱང་སེམས་ཐུགས་རྗེའི་མཐུ་ལས་བྱུང་། །དེ་བས་དོན་མེད་ཆུད་ཟོས་བཏང་གྱུར་ན། །འདི་དང་ཕྱི་མའི་དོན་ཆེན་གཏན་དུ་བརླག། དེ་ལས་གྱོང་ཆེན་བསྡབ་རྒྱུ་མ་མཆིས་པས། །དལ་བའི་རྟེན་ལ་སྙིང་པོ་བླང་བར་མཛོད། །མྱུར་དུ་འཆི་བ་ནམ་འོང་ཆ་མེད་ཅིང་། །བར་སྣང་གློག་དང་རླུང་གསེབ་མར་མེ་དང་། །རྩྭ་རྩེའི་ཟིལ་པ་ནམ་མཁའི་སྤྲིན་དང་འདྲ། །སྐད་ཅིག་སྐད་ཅིག་སྐྱེ་ཞིང་འཇིག་པས་ན། །འཕྲལ་དུ་དམ་པའི་ཆོས་ལ་བརྩོན་པར་རིགས། །འཆི་བདག་གཤིན་རྗེའི་མཆེ་བའི་ཕྲག་པ་རུ། །སྐྱེས་མ་ཐག་ནས་ཆུད་ཟིན་ནམ་ཞིག་བཏབ། །ངེས་པ་མེད་པས་མྱུར་བ་ཉིད་དུ་ནི། །སོས་དལ་མ་སྡོད་ལྷ་ཆོས་སྒྲུབ་ལ་རེམས། །འཆི་བའི་ཚེ་ན་ཕྱི་མའི་ལྟོ་བརྒྱག་ནི། །དགེ་བའི་བསགས་པ་མེད་ན་འཁོར་ལོངས་སྤྱོད། །མཛའ་བཤེས་གཉེན་འདུན་གང་ཡང་རྗེས་མི་འབྲང་། །ཁྱེར་དབང་མེད་ཅིང་གཅེར་བུ་ལག་སྟོང་འགྲོ། །སྔོན་བྱས་ལས་ནི་ཕྱི་བཞིན་རྗེས་འབྲང་བས། །མི་བཟད་སྡིག་པའི་ཁུར་ཆེན་བཏེག་གྱུར་ན། །འཇིགས་རུང་གཤིན་རྗེའི་ཞགས་པ་ནག་པོས་བཏབ། །ལས་ཀྱི་མུན་པ་ནག་པོས་མདུན་ནས་བསུ། །གཤིན་རྗེའི་སྐྱེས་བུ་རྣམས་ཀྱིས་རྒྱབ་ནས་དེད། །འཇིགས་པའི་གད་མོ་སྣ་ཚོགས་སྒྲོགས་པའི་དུས། །ཀྱེ་མ་ཀྱི་ཧུད་ཉམ་ཐག་སྡུག་བསྔལ་མྱོང་། །དེ་དུས་ཆོས་མ་བྱས་ལ་འགྱོད་གྱུར་ཀྱང་། །ཕྱི་ཐལ་སོང་བས་ཕན་པ་ཅུང་ཟད་མེད། །དེ་བས་ད་ལྟ་རང་དབང་ཡོད་པའི་དུས། །རང་མགོ་རང་བསྐོར་ལས་ལ་མི་འབད་པར། །གཏན་དུ་ཕན་པ་དམ་པའི་ལྷ་ཆོས་སྒྲུབས། །སང་བྱེད་གནང་བྱེད་དབང་དུ་མི་གཏོང་ཞིང་། །སྙོམ་ལས་བྱ་བ་ངན་པས་མི་གཡེང་པར། །ཉིན་མཚན་དལ་མེད་དམ་པའི་ཆོས་སྒྲུབས་ཤིག། བསགས་པའི་ནོར་ནི་ཕུང་ཀྲོལ་བསྐྱེད་པའི་རྒྱུ། །གང་ལ་ནོར་ཡོད་དེ་ལ་སེར་སྣ་ཡོད། །གསོག་སྲུང་སྤེལ་བའི་སྡུག་བསྔལ་ཕ་མཐའ་ཡས། །གཉེན་བཤེས་ལ་སོགས་སྐྱོང་དཀའ་ཕན་པ་ཆུང་། །ཇི་ཙམ་ཕན་བཏགས་མགུ་དུས་ཅུང་ཟད་མེད། །དྲིན་ལན་མི་འཇལ་ཕྱི་ཕྱིར་ལོག་སྒྲུབ་བྱེད། །ཁྱད་པར་དེང་སང་གཉེན་བཤེས་ཕལ་ཆེ་བ། །དགྲ་རུ་ལྡང་ཞིང་གནོད་པ་སྣ་ཚོགས་བསྐྱལ། །དེས་ན་དགྲ་འདུལ་གཉེན་སྐྱོང་ཁ་འཛིན་དང་། །ཚོང་དང་སོ་ནམ་ལ་སོགས་ཀུན་སྤོང་ལ། །དམ་པས་བསྔགས་པའི་དབེན་པའི་གནས་རྣམས་སུ། །གཅིག་པུར་སྡོད་ལ་སྒྲུབ་པ་སྙིང་པོར་མཛོད། །དེ་ཡང་དང་པོ་གདམས་ངག་སྟོན་པ་ཡི། །མཚན་ལྡན་བླ་མ་དགེ་བའི་བཤེས་གཉེན་བསྟེན། །དད་དང་མོས་གུས་དྲག་པོས་བཀའ་བཞིན་སྒྲུབས། །མ་དད་ལོག་པར་ལྟ་བ་ཀུན་སྤོང་ལ། །བསམ་སྦྱོར་རྣམ་པར་དག་པས་བསྟེན་པ་གཅེས། །ཆོས་ཀྱི་སྙིང་པོ་རྒྱུ་འབྲས་སྤང་བླང་དང་། །འགྲོ་ཀུན་རང་གི་ཕ་མར་ཤེས་པ་ཡི། །བྱམས་དང་སྙིང་རྗེ་བྱང་ཆུབ་སེམས་གཉིས་བསྒོམ། །བདག་གཞན་མཉམ་དང་བརྗེ་བའི་བློ་སྦྱོང་ལ། །ཡང་ཡང་བསམ་ལ་བདག་འཛིན་འདུལ་བར་མཛོད། །ང་དང་ང་ཡིར་འཛིན་པའི་བློ་ངན་ནི། །རང་ཕྱོགས་ལེགས་སུ་རེ་ཞིང་དགྲ་ལ་སྡང་། །མཉམ་ལ་ཕྲག་དོག་མཐོ་ལ་འགྲན་སེམས་དང་། །དམན་ལ་ང་རྒྱལ་ལ་སོགས་ཉོན་མོངས་ཀྱི། །རྩ་བ་ཐམས་ཅད་བདག་འཛིན་མ་རིག་ལས། །བྱུང་བ་ཤེས་ནས་གཅེས་འཛིན་འགོང་པོ་འདི། །ཡང་ཡང་འདུལ་ཞིང་ཡན་པར་མ་གཏོང་ཞིག། ཁོ་ཡི་དབང་གྱུར་ལས་དང་ཉོན་མོངས་འཕེལ། །སྡུག་བསྔལ་འཁོར་ལོ་དྲག་པོ་འདི་འབྱུང་བས། །དེ་ཉིད་རྒྱུར་བཅས་འགོག་པའི་ཐབས་མཆོག་ནི། །རྒྱལ་བས་གསུངས་པའི་བཀའ་དང་རྒྱ་བོད་ཀྱི། །བསྟན་བཅོས་དགོངས་དོན་རང་སེམས་འདུལ་བྱེད་ཀྱི། །ལམ་གྱི་བདེན་པ་རྒྱུད་ལ་བསྟེན་པར་བྱ། །ཇི་ལྟར་ནད་པས་སྨན་པ་བསྟེན་པ་ལྟར། །སྨན་དང་སྨན་པ་ནད་འཚོའི་འདུ་ཤེས་ཀྱིས། །ཡང་དག་དགེ་བའི་བཤེས་ཀྱི་གདམས་ངག་རྣམས། །ཆུད་ཟོས་མ་གཏོང་རང་གི་རྒྱུད་ལ་ལེན། །དེ་ཡང་ལྟ་བའི་ཁ་ཕོ་མ་མཐོ་བར། །སྔོན་འགྲོ་འཁོར་བར་ངེས་པར་འབྱུང་བ་དང་། །བྱང་ཆུབ་སེམས་ལ་བློ་སྦྱོང་སྙིང་པོར་བྱ། །ཐོག་མེད་དུས་ནས་བསགས་པའི་སྡིག་པ་རྣམས། །གནོང་འགྱོད་དྲག་པོས་སྟོབས་བཞིའི་བཤགས་པ་དང་། །ལུས་ཀྱི་ཕྱག་བསྐོར་ངག་གི་ལྟུང་བཤགས་དང་། །ཡིག་བརྒྱ་ཐར་མདོ་དྲི་མེད་བཤགས་རྒྱུད་སོགས། །སྡིག་སྦྱོང་རྣམས་ལ་ནན་ཏན་འབད་པ་དང་། །ཡན་ལག་བདུན་དང་མཎྜལ་ལ་སོགས་པ། །ཚོགས་བསགས་རྣམས་ལ་ཤིན་ཏུ་འབད་པར་བྱ། །སྒྲིབ་སྦྱོང་ཚོགས་བསགས་རྣམས་ལ་མ་འབད་ན། །དཔེར་ན་རྡུལ་གྱིས་གོས་པའི་མེ་ལོང་དུ། །གཟུགས་བརྙན་གསལ་བ་མི་མཐོང་དེ་བཞིན་དུ། །རང་སེམས་སྒྲིབ་པའི་དྲི་མས་གོས་པ་ལ། །ལུང་དང་རྟོགས་པའི་ཡོན་ཏན་འཆར་བ་མེད། །དེས་ན་བསགས་སྦྱངས་གལ་ཆུང་མི་བྱེད་པར། །ཤིན་ཏུ་བརྩོན་པས་འབད་ན་སངས་རྒྱས་ཀྱི། །ཟག་མེད་ཆོས་རྣམས་ངང་གིས་སྐྱེ་བར་འགྱུར། །དང་འདོད་ཡིད་ཆེས་དད་པ་དྲག་པོ་བསྐྱེད། །དད་པ་མེད་ན་དཀར་པོའི་ཆོས་མི་སྣང་། །དད་པས་ཡོན་ཏན་ཐམས་ཅད་སྡུད་པར་བྱེད། །དཀོན་མཆོག་གསུམ་ལས་ལྷག་པའི་སྐྱབས་གཞན་མེད། །འཇིགས་དད་སྙིང་རྗེ་གསུམ་གྱིས་ཀུན་ནས་སློང་། །ཐེག་ཆེན་སྐྱབས་འགྲོའི་སྡོམ་པ་ཁས་བླངས་ཀྱིས། །ཐོབ་པ་འཆི་བ་སྲོག་ལ་བབ་གྱུར་ཀྱང་། །ནམ་ཡང་མི་འདོར་དམ་བཅའ་བརྟན་པར་བྱ། །མཁའ་ཁྱབ་སེམས་ཅན་ཕ་མར་མ་གྱུར་མེད། །ད་ལྟ་སྡུག་བསྔལ་རྒྱ་མཚོར་བྱིང་བ་རྣམས། །བདག་གིས་ད་རེས་མ་རྣམས་དུཿཁ་ལས། །སྒྲོལ་བའི་སྙིང་སྟོབས་ཆེན་པོ་མ་བསྐྱེད་ན། །ཕ་མ་གཡུལ་ངོར་ལྷུང་ནས་རང་ཉིད་བྲོས། །དེ་ལས་ཁྲེལ་ཆེ་ཅི་ཡང་མེད་པས་ན། །རང་དོན་ཡིད་བྱེད་འཁྲི་བ་ཀུན་སྤངས་ནས། །བདག་གི་སྒོ་གསུམ་གཞན་གྱི་དོན་དུ་བཀོལ། །གཞན་ཕན་སྒྲུབ་ན་རང་དོན་ཞོར་ལ་འགྲུབ། །རང་དོན་གཙོར་བྱས་དམན་པའི་ས་རུ་ལྷུང་། །དེས་ན་རང་ཕྱོགས་ལ་ཆགས་གཞན་སྡང་གི །བསམ་ངན་ཐམས་ཅད་དྲུངས་ནས་འབྱིན་པ་དང་། །ཅི་བྱས་ཐམས་ཅད་གཞན་དོན་འགྱུར་བ་ལ། །དངོས་སུ་སྤྱོད་དང་སྨོན་ལམ་བཟང་པོ་ཐོབ། །དགེ་བའི་རྩ་བ་ཆེ་ཕྲ་ཅི་བྱས་ཀྱང་། །སྦྱོར་བ་སེམས་བསྐྱེད་དངོས་གཞི་དམིགས་མེད་དང་། །རྗེས་ལ་བསྔོ་བ་དམ་པས་རྒྱས་འདེབས་དགོས། །དེ་གསུམ་མ་བྲལ་བྱང་ཆུབ་ལམ་དུ་བསྒྱུར། །དེ་དང་བྲལ་ན་ཟག་བཅས་དགེ་བ་ཡིས། །མཐོ་རིས་ལྷ་མིའི་བདེ་འབྲས་ཙམ་བསྐྱེད་དོ། །སྔོན་བསགས་དགེ་བས་ཐོབ་པའི་ལོངས་སྤྱོད་ལ། །ཧ་ཅང་སྲེད་པ་མ་ཆེ་དཀོན་མཆོག་མཆོད། །དབུལ་ཕོངས་ཉམ་ཐག་རྣམས་ལ་སྦྱིན་པ་ཐོངས། །ཤ་ཆང་མཚོན་སོགས་མ་དག་སྦྱིན་པ་དང་། །རང་ཕྱོགས་ལ་ཆགས་སྦྱིན་གཏོང་བྱེད་པ་རྣམས། །ལྟར་སྣང་དགེ་བ་དོན་ལ་སྡིག་པར་འགྱུར། །དེ་ཡང་སྲོག་བཅད་ཤ་ཁྲག་ཆང་རག་སོགས། །དགེ་འདུན་བླ་མཆོད་རྣམས་ལ་འདྲེན་པ་ནི། །དེ་དག་མཆོད་ཡུལ་མཆོད་མཁན་གཉིས་ཀ་ལ། །དམྱལ་མེ་བཟོད་དཀས་མནར་བ་ཉིད་ཀྱི་རྒྱུ། །དེ་འདྲའི་མཆོད་སྦྱིན་ངན་པ་རྩད་ནས་བསྐྱུངས། །མདོར་ན་དྲན་དང་ཤེས་བཞིན་བག་ཡོད་ཀྱིས། །བསླབ་བྱ་རྣམས་ལ་སྲུང་སྡོམ་ལེགས་པར་བྱ། །ས་དགེ་བཀའ་རྙིང་ལ་སོགས་གྲུབ་མཐའ་རྣམས། །སངས་རྒྱས་པ་ཡི་ཆོས་ལུགས་ཡིན་པར་མཐུན། །མཐར་ཐུག་གནད་ཀྱི་དོན་ལ་དགོངས་པ་གཅིག། དེས་ན་གྲུབ་མཐའི་ཁ་འཛིན་སྤང་བར་བྱ། །གྲུབ་མཐའི་ཆགས་སྡང་ངན་པས་བསྟན་པ་དཀྲུགས། །རྒྱལ་བསྟན་ཐམས་ཅད་ནང་འགལ་བྱེད་པ་སོགས། །ཆོས་ལ་སྡང་བའི་ཉེས་པ་ཚད་མེད་པས། །དེ་རིགས་རྣམས་ཀྱི་རྗེས་སུ་མ་འབྲང་ཞིག། འདི་ཕྱིར་ཉམས་ཉེས་ཆེན་པོ་འབྱུང་ཏ་རེ། །ཡང་དག་རྒྱལ་བསྟན་རིས་སུ་མ་བཅད་པར། །དེར་འཛིན་བྱེད་དང་བཅས་པ་ཐམས་ཅད་ལ། །གུས་པ་བསྐྱེད་ཅིང་དད་པས་མཆོད་པར་བགྱི། །བྱིན་རླབས་མྱུར་དུ་ཐོབ་པར་འདོད་པ་ཡིས། །དཀོན་མཆོག་ཀུན་འདུས་དཔལ་ལྡན་བླ་མ་ལ། །དབང་དང་གདམས་ངག་ཐོབ་ནས་རྡོ་རྗེ་འཆང་། །དཀྱིལ་འཁོར་རྒྱ་མཚོ་སྤྲོ་བསྡུའི་བྱེད་པོ་རུ། །ཤེས་ནས་དད་དང་དམ་ཚིག་རྣམ་དག་པས། །སྤྱི་བོར་བསྒོམ་ལ་གསོལ་བཏབ་དབང་བླང་བྱ། །སྙིང་གི་ཟེ་འབྲུར་བཞུགས་ལ་ཐུགས་ཡིད་བསྲེ། །འདི་ཕྱི་བར་དོའི་གནས་སྐབས་ཐམས་ཅད་དུ། །སྐྱབས་གནས་བླ་མ་མཆོག་ལས་གཞན་མེད་པར། །ངེས་པའི་ཤེས་པ་ཡང་དག་བསྐྱེད་ནས་སུ། །ཐེ་ཚོམ་མེད་པར་གསོལ་བ་བཏབ་བྱས་ན། །མཆོག་ཐུན་དངོས་གྲུབ་ངང་གིས་ཐོབ་པ་ལ། །མི་བསླུ་ངེས་པ་རྒྱལ་གསུང་ཚད་མས་གྲུབ། །ཉམས་ལེན་སྙིང་པོ་བླ་མའི་རྣལ་འབྱོར་སྒྲུབ། །དེར་བརྩོན་བྱིན་རླབས་རྒྱུད་ལ་ཞུགས་པའི་དུས། །རྟོགས་པའི་ཡེ་ཤེས་ཁོང་ནས་འཆར་བར་འགྱུར། །འཁོར་འདས་ཆོས་ཀུན་རང་སེམས་འཁྲུལ་པ་ཡིས། །བསྐྱེད་པའི་སྣང་བ་ཙམ་ལས་གཞན་དུ་མེད། །སེམས་ནི་སྐྱེ་འགགས་གནས་གསུམ་ངོ་བོས་སྟོང་། །སྟོང་པའི་རང་བཞིན་རིག་པ་གསལ་སིང་ངེ་། །འཛིན་ཞེན་བྲལ་བའི་ངང་ནས་ལྟ་བ་དང་། །ཡེངས་མེད་སྒོམ་པ་འཛིན་བྲལ་སྤྱོད་པ་ཡི། །ཉམས་བླངས་གཞི་ཉིད་འབྲས་བུར་སྨིན་བྱེད་ཀྱི། །མྱུར་ལམ་ཕྱག་རྫོགས་གང་རུང་ཉམས་སུ་བླངས། །བྱིན་རླབས་རྩ་བ་བླ་མ་སྒྲུབ་པ་དང་། །དངོས་གྲུབ་རྩ་བ་ཡི་དམ་ཞི་དང་ཁྲོ། །ཕྲིན་ལས་རྩ་བ་མཁའ་འགྲོ་ཆོས་སྐྱོང་གི །བསྙེན་སྒྲུབ་དག་ཀྱང་ཅི་ནུས་འབད་པར་བྱ། །ཁྱད་པར་བོད་ཀྱི་བླ་མ་པདྨ་འབྱུང་། །ཡི་དམ་ཐུགས་རྗེ་ཆེན་པོ་ཉིད་ཡིན་པས། །བླ་སྒྲུབ་ཐུགས་ཆེན་གང་རུང་བསྐྱེད་རྫོགས་ལ། །ཆུ་བོའི་རྒྱུན་བཞིན་རྟག་ཏུ་བརྩོན་པར་བྱ། །ལུས་ལྷ་ངག་སྔགས་སེམས་རྟོག་ཆོས་ཉིད་ཤེས། །མཁའ་ཁྱབ་སྙིང་རྗེ་བསྒོམ་ལ་མ་ཎི་བགྲང་། །མཉམ་བཞག་ཐུན་སྐབས་ངག་བཅད་དམ་པོར་བྱ། །རྗེས་ཐོབ་རྣམས་སུའང་ཡིག་དྲུག་ཅི་ནུས་ཐོན། །དེ་ལྟར་འབད་ན་འདི་ཕྱི་ཐམས་ཅད་དུ། །བདེ་ནས་བདེ་བར་འགྱུར་ལ་སོམ་ཉི་བྲལ། །དེ་སྐད་གདམས་པའི་རིམ་པ་ཉུང་ངུ་འདི། །ཁྱིམ་ན་གནས་ཀྱང་ཡང་དག་དགེ་བཅུའི་བློ། །དཀར་པོའི་ཚེས་ཀྱི་ཟླ་བའི་འཕེལ་ཆ་བཞིན། །དད་ལྡན་ཟླ་ནོར་ཞེས་བྱས་བསྐུལ་བའི་ངོར། །འཇམ་དབྱངས་ཆོས་ཀྱི་བློ་གྲོས་ཞེས་བྱ་བ། །ཆོས་མེད་དྲེད་པོ་དཀོར་རྐྱལ་དེ་ཉིད་ཀྱིས། །རང་གིས་མི་བྱེད་བཞིན་དུ་ཞལ་གདམས་ནི། །ཡིད་ལ་གང་དྲན་སྨིན་གྲོལ་གླིང་དུ་བྲིས། །དགེ་བས་ནམ་མཁའི་མཐའ་ཀླས་འགྲོ་བ་རྣམས། །རྒྱུད་ལ་བྱང་ཆུབ་སེམས་མཆོག་སྐྱེ་བ་དང་། །རང་གཞན་དོན་གཉིས་ལྷུན་གྲུབ་དཔལ་ལ་སྤྱོད། །ཀུན་བཟང་ཆོས་སྐུའི་ཀློང་དུ་གྲོལ་བར་ཤོག། སརྦ་དཱ་མངྒ་ལཾ།། །།

[edit]

!_zhal gdams gnad phreng zhes bya ba/__oM swasti/__dus gsum sangs rgyas thams cad 'dus pa'i dngos/__/dpal ldan bla ma'i zhabs la phyag 'tshal nas/__/spang blang gnad kyi zhal gdams nyung ngu zhig/__khyed kyi snyan du bsrings pas shis gyur cig/__kye ma rnyed dka'i dal 'byor skyon med 'di/__/lus rten 'di 'dra phyis nas rnyed par dka'/__/da res thob pa sngon bsags dge ba dang /__/sangs rgyas byang sems thugs rje'i mthu las byung /__/de bas don med chud zos btang gyur na/__/'di dang phyi ma'i don chen gtan du brlag/__de las gyong chen bsdab rgyu ma mchis pas/__/dal ba'i rten la snying po blang bar mdzod/__/myur du 'chi ba nam 'ong cha med cing /__/bar snang glog dang rlung gseb mar me dang /__/rtswa rtse'i zil pa nam mkha'i sprin dang 'dra/__/skad cig skad cig skye zhing 'jig pas na/__/'phral du dam pa'i chos la brtson par rigs/__/'chi bdag gshin rje'i mche ba'i phrag pa ru/__/skyes ma thag nas chud zin nam zhig btab/__/nges pa med pas myur ba nyid du ni/__/sos dal ma sdod lha chos sgrub la rems/__/'chi ba'i tshe na phyi ma'i lto brgyag ni/__/dge ba'i bsags pa med na 'khor longs spyod/__/mdza' bshes gnyen 'dun gang yang rjes mi 'brang /__/khyer dbang med cing gcer bu lag stong 'gro/__/sngon byas las ni phyi bzhin rjes 'brang bas/__/mi bzad sdig pa'i khur chen bteg gyur na/__/'jigs rung gshin rje'i zhags pa nag pos btab/__/las kyi mun pa nag pos mdun nas bsu/__/gshin rje'i skyes bu rnams kyis rgyab nas ded/__/'jigs pa'i gad mo sna tshogs sgrogs pa'i dus/__/kye ma kyi hud nyam thag sdug bsngal myong /__/de dus chos ma byas la 'gyod gyur kyang /__/phyi thal song bas phan pa cung zad med/__/de bas da lta rang dbang yod pa'i dus/__/rang mgo rang bskor las la mi 'bad par/__/gtan du phan pa dam pa'i lha chos sgrubs/__/sang byed gnang byed dbang du mi gtong zhing /__/snyom las bya ba ngan pas mi g.yeng par/__/nyin mtshan dal med dam pa'i chos sgrubs shig/__bsags pa'i nor ni phung krol bskyed pa'i rgyu/__/gang la nor yod de la ser sna yod/__/gsog srung spel ba'i sdug bsngal pha mtha' yas/__/gnyen bshes la sogs skyong dka' phan pa chung /__/ji tsam phan btags mgu dus cung zad med/__/drin lan mi 'jal phyi phyir log sgrub byed/__/khyad par deng sang gnyen bshes phal che ba/__/dgra ru ldang zhing gnod pa sna tshogs bskyal/__/des na dgra 'dul gnyen skyong kha 'dzin dang /__/tshong dang so nam la sogs kun spong la/__/dam pas bsngags pa'i dben pa'i gnas rnams su/__/gcig pur sdod la sgrub pa snying por mdzod/__/de yang dang po gdams ngag ston pa yi/__/mtshan ldan bla ma dge ba'i bshes gnyen bsten/__/dad dang mos gus drag pos bka' bzhin sgrubs/__/ma dad log par lta ba kun spong la/__/bsam sbyor rnam par dag pas bsten pa gces/__/chos kyi snying po rgyu 'bras spang blang dang /__/'gro kun rang gi pha mar shes pa yi/__/byams dang snying rje byang chub sems gnyis bsgom/__/bdag gzhan mnyam dang brje ba'i blo sbyong la/__/yang yang bsam la bdag 'dzin 'dul bar mdzod/__/nga dang nga yir 'dzin pa'i blo ngan ni/__/rang phyogs legs su re zhing dgra la sdang /__/mnyam la phrag dog mtho la 'gran sems dang /__/dman la nga rgyal la sogs nyon mongs kyi/__/rtsa ba thams cad bdag 'dzin ma rig las/__/byung ba shes nas gces 'dzin 'gong po 'di/__/yang yang 'dul zhing yan par ma gtong zhig/__kho yi dbang gyur las dang nyon mongs 'phel/__/sdug bsngal 'khor lo drag po 'di 'byung bas/__/de nyid rgyur bcas 'gog pa'i thabs mchog ni/__/rgyal bas gsungs pa'i bka' dang rgya bod kyi/__/bstan bcos dgongs don rang sems 'dul byed kyi/__/lam gyi bden pa rgyud la bsten par bya/__/ji ltar nad pas sman pa bsten pa ltar/__/sman dang sman pa nad 'tsho'i 'du shes kyis/__/yang dag dge ba'i bshes kyi gdams ngag rnams/__/chud zos ma gtong rang gi rgyud la len/__/de yang lta ba'i kha pho ma mtho bar/__/sngon 'gro 'khor bar nges par 'byung ba dang /__/byang chub sems la blo sbyong snying por bya/__/thog med dus nas bsags pa'i sdig pa rnams/__/gnong 'gyod drag pos stobs bzhi'i bshags pa dang /__/lus kyi phyag bskor ngag gi ltung bshags dang /__/yig brgya thar mdo dri med bshags rgyud sogs/__/sdig sbyong rnams la nan tan 'bad pa dang /__/yan lag bdun dang maN+Dal la sogs pa/__/tshogs bsags rnams la shin tu 'bad par bya/__/sgrib sbyong tshogs bsags rnams la ma 'bad na/__/dper na rdul gyis gos pa'i me long du/__/gzugs brnyan gsal ba mi mthong de bzhin du/__/rang sems sgrib pa'i dri mas gos pa la/__/lung dang rtogs pa'i yon tan 'char ba med/__/des na bsags sbyangs gal chung mi byed par/__/shin tu brtson pas 'bad na sangs rgyas kyi/__/zag med chos rnams ngang gis skye bar 'gyur/__/dang 'dod yid ches dad pa drag po bskyed/__/dad pa med na dkar po'i chos mi snang /__/dad pas yon tan thams cad sdud par byed/__/dkon mchog gsum las lhag pa'i skyabs gzhan med/__/'jigs dad snying rje gsum gyis kun nas slong /__/theg chen skyabs 'gro'i sdom pa khas blangs kyis/__/thob pa 'chi ba srog la bab gyur kyang /__/nam yang mi 'dor dam bca' brtan par bya/__/mkha' khyab sems can pha mar ma gyur med/__/da lta sdug bsngal rgya mtshor bying ba rnams/__/bdag gis da res ma rnams duHkha las/__/sgrol ba'i snying stobs chen po ma bskyed na/__/pha ma g.yul ngor lhung nas rang nyid bros/__/de las khrel che ci yang med pas na/__/rang don yid byed 'khri ba kun spangs nas/__/bdag gi sgo gsum gzhan gyi don du bkol/__/gzhan phan sgrub na rang don zhor la 'grub/__/rang don gtsor byas dman pa'i sa ru lhung /__/des na rang phyogs la chags gzhan sdang gi__/bsam ngan thams cad drungs nas 'byin pa dang /__/ci byas thams cad gzhan don 'gyur ba la/__/dngos su spyod dang smon lam bzang po thob/__/dge ba'i rtsa ba che phra ci byas kyang /__/sbyor ba sems bskyed dngos gzhi dmigs med dang /__/rjes la bsngo ba dam pas rgyas 'debs dgos/__/de gsum ma bral byang chub lam du bsgyur/__/de dang bral na zag bcas dge ba yis/__/mtho ris lha mi'i bde 'bras tsam bskyed do/__/sngon bsags dge bas thob pa'i longs spyod la/__/ha cang sred pa ma che dkon mchog mchod/__/dbul phongs nyam thag rnams la sbyin pa thongs/__/sha chang mtshon sogs ma dag sbyin pa dang /__/rang phyogs la chags sbyin gtong byed pa rnams/__/ltar snang dge ba don la sdig par 'gyur/__/de yang srog bcad sha khrag chang rag sogs/__/dge 'dun bla mchod rnams la 'dren pa ni/__/de dag mchod yul mchod mkhan gnyis ka la/__/dmyal me bzod dkas mnar ba nyid kyi rgyu/__/de 'dra'i mchod sbyin ngan pa rtsad nas bskyungs/__/mdor na dran dang shes bzhin bag yod kyis/__/bslab bya rnams la srung sdom legs par bya/__/sa dge bka' rnying la sogs grub mtha' rnams/__/sangs rgyas pa yi chos lugs yin par mthun/__/mthar thug gnad kyi don la dgongs pa gcig/__des na grub mtha'i kha 'dzin spang bar bya/__/grub mtha'i chags sdang ngan pas bstan pa dkrugs/__/rgyal bstan thams cad nang 'gal byed pa sogs/__/chos la sdang ba'i nyes pa tshad med pas/__/de rigs rnams kyi rjes su ma 'brang zhig/__'di phyir nyams nyes chen po 'byung ta re/__/yang dag rgyal bstan ris su ma bcad par/__/der 'dzin byed dang bcas pa thams cad la/__/gus pa bskyed cing dad pas mchod par bgyi/__/byin rlabs myur du thob par 'dod pa yis/__/dkon mchog kun 'dus dpal ldan bla ma la/__/dbang dang gdams ngag thob nas rdo rje 'chang /__/dkyil 'khor rgya mtsho spro bsdu'i byed po ru/__/shes nas dad dang dam tshig rnam dag pas/__/spyi bor bsgom la gsol btab dbang blang bya/__/snying gi ze 'brur bzhugs la thugs yid bsre/__/'di phyi bar do'i gnas skabs thams cad du/__/skyabs gnas bla ma mchog las gzhan med par/__/nges pa'i shes pa yang dag bskyed nas su/__/the tshom med par gsol ba btab byas na/__/mchog thun dngos grub ngang gis thob pa la/__/mi bslu nges pa rgyal gsung tshad mas grub/__/nyams len snying po bla ma'i rnal 'byor sgrub/__/der brtson byin rlabs rgyud la zhugs pa'i dus/__/rtogs pa'i ye shes khong nas 'char bar 'gyur/__/'khor 'das chos kun rang sems 'khrul pa yis/__/bskyed pa'i snang ba tsam las gzhan du med/__/sems ni skye 'gags gnas gsum ngo bos stong /__/stong pa'i rang bzhin rig pa gsal sing nge /__/'dzin zhen bral ba'i ngang nas lta ba dang /__/yengs med sgom pa 'dzin bral spyod pa yi/__/nyams blangs gzhi nyid 'bras bur smin byed kyi/__/myur lam phyag rdzogs gang rung nyams su blangs/__/byin rlabs rtsa ba bla ma sgrub pa dang /__/dngos grub rtsa ba yi dam zhi dang khro/__/phrin las rtsa ba mkha' 'gro chos skyong gi__/bsnyen sgrub dag kyang ci nus 'bad par bya/__/khyad par bod kyi bla ma pad+ma 'byung /__/yi dam thugs rje chen po nyid yin pas/__/bla sgrub thugs chen gang rung bskyed rdzogs la/__/chu bo'i rgyun bzhin rtag tu brtson par bya/__/lus lha ngag sngags sems rtog chos nyid shes/__/mkha' khyab snying rje bsgom la ma Ni bgrang /__/mnyam bzhag thun skabs ngag bcad dam por bya/__/rjes thob rnams su'ang yig drug ci nus thon/__/de ltar 'bad na 'di phyi thams cad du/__/bde nas bde bar 'gyur la som nyi bral/__/de skad gdams pa'i rim pa nyung ngu 'di/__/khyim na gnas kyang yang dag dge bcu'i blo/__/dkar po'i tshes kyi zla ba'i 'phel cha bzhin/__/dad ldan zla nor zhes byas bskul ba'i ngor/__/'jam dbyangs chos kyi blo gros zhes bya ba/__/chos med dred po dkor rkyal de nyid kyis/__/rang gis mi byed bzhin du zhal gdams ni/__/yid la gang dran smin grol gling du bris/__/dge bas nam mkha'i mtha' klas 'gro ba rnams/__/rgyud la byang chub sems mchog skye ba dang /__/rang gzhan don gnyis lhun grub dpal la spyod/__/kun bzang chos sku'i klong du grol bar shog/__sarba dA mang+ga laM//___//