JKCL-KABUM-08-NYA-010-014

🚧 This website is under continued development. We appreciate your patience!

Previous Text Back to Volume PageNext Text

ཞལ་གདམས་བསིལ་སྦྱིན་བདུད་རྩི་ཞེས་བྱ་བ་རྫོགས་ཆེན་དྲུག་པ་རིན་པོ་ཆེའི་གསོལ་དཔོན་པད་རབ་བུ་དགེ་ཆུང་རྒྱལ་ལ་གནང་བ།

Wylie title	zhal gdams bsil sbyin bdud rtsi zhes bya ba rdzogs chen drug pa rin po che'i gsol dpon pad rab bu dge chung rgyal la gnang ba
Location	chos kyi blo gros bka' 'bum Volume 8, sde tshan 10, Text 14, Pages 260-263 (Folios 12b4 to 14a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams bsil sbyin bdud rtsi zhes bya ba rdzogs chen drug pa rin po che'i gsol dpon pad rab bu dge chung rgyal la gnang ba. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 260-263. Bir, H.P.: Khyentse Labrang, 2012.
Genre	Advice - zhal gdams
Colophon	ཅེས་པའང་སྔ་འགྱུར་བསྟན་པའི་ཉི་མ་གྲུབ་དབང་རྫོགས་ཆེན་དྲུག་པ་རིན་པོ་ཆེའི་གསོལ་དཔོན་པད་རབ་བུ་དགེ་ཆུང་རྒྱལ་ནས་གསུང་བསྐུལ་ངོར་རྨོངས་རྒན་ཆོས་ཀྱི་བློ་གྲོས་པས་བྲིས་པའོ། །སརྦ་ཛ་ག་ཏཾ།།
	ces pa'ang snga 'gyur bstan pa'i nyi ma grub dbang rdzogs chen drug pa rin po che'i gsol dpon pad rab bu dge chung rgyal nas gsung bskul ngor rmongs rgan chos kyi blo gros pas bris pa'o/__/sarba dza ga taM//

1 Texts in this Section (sde tshan or chos tshan)

14 260-263	ཞལ་གདམས་བསིལ་སྦྱིན་བདུད་རྩི་ཞེས་བྱ་བ་རྫོགས་ཆེན་དྲུག་པ་རིན་པོ་ཆེའི་གསོལ་དཔོན་པད་རབ་བུ་དགེ་ཆུང་རྒྱལ་ལ་གནང་བ། zhal gdams bsil sbyin bdud rtsi zhes bya ba rdzogs chen drug pa rin po che'i gsol dpon pad rab bu dge chung rgyal la gnang ba Advice - zhal gdams	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ ཞལ་གདམས་བསིལ་སྦྱིན་བདུད་རྩི་ཞེས་བྱ་བ་བཞུགས་སོ། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །ལྷར་བཅས་འཇིག་རྟེན་གསུམ་ན་མངོན་མཐོ་བ། །སྟོན་པ་མཉམ་མེད་ཤཱཀྱའི་རྒྱལ་པོ་དང་། །དེ་སྲས་བྱང་སེམས་ཉན་རང་འཕགས་པའི་ཚོགས། །ཁྱད་པར་རྩ་གསུམ་ཀུན་འདུས་མཚོ་སྐྱེས་རྗེའི། །ཞབས་པད་བདེ་ཆེན་འཁོར་ལོར་མཆོད་བྱས་ནས། །གང་ཞིག་ཐར་པ་དོན་དུ་གཉེར་བ་ལ། །ཕན་པའི་གདམས་ངག་བསིལ་སྦྱིན་བདུད་རྩི་ནི། །ལུང་བཞིན་མདོར་བསྡུས་ངག་གིས་བསྙད་པར་བྱ། །ཤིན་ཏུ་རྙེད་དཀའི་རྟེན་བཟང་དལ་འབྱོར་འདི། །ཐོབ་པར་དཀའ་བའི་ཚུལ་ལ་ལེགས་བསམ་ཏེ། །དོན་ལྡན་སྙིང་པོ་བླང་བའི་ཐབས་བཟང་པོ། །ཡང་ཡང་རྒྱུད་ལ་བསྟེན་ཅིང་གོམས་པར་བྱ། །ཚེ་འདི་མི་རྟག་ཆུ་ཡི་ཆུ་བུར་འདྲ། །ལུས་སྲོག་འདི་ནི་མྱུར་དུ་འཇིག་ཅིང་ཟད། །མི་རྟག་མི་བརྟན་སྒྱུ་མའི་ངང་ཚུལ་ལ། །ལེགས་པར་བསམ་ནས་མྱུར་དུ་དམ་ཆོས་མཛོད། །བསགས་པའི་ལས་ནི་ནམ་ཡང་ཆུད་མི་ཟ། །རང་གི་སྟེང་དུ་མྱོང་བར་ངེས་པས་ན། །རྒྱུ་འབྲས་བླང་དོར་ཕྲ་ཞིབ་བསྲུང་བ་འདི། །ཆོས་སྒོར་ཞུགས་པ་རྣམས་ཀྱི་ཉམས་ལེན་མཐིལ། །འཁོར་བ་ཐམས་ཅད་སྡུག་བསྔལ་རང་བཞིན་ཡིན། །བདེ་བའི་གོ་སྐབས་ཅུང་ཟད་ཙམ་ཡང་མེད། །མཐོ་རིས་རྒྱལ་སྲིད་བདེ་བ་ཆེ་ཐོབ་ཀྱང་། །ཡིད་སྨོན་དང་བྲལ་ངེས་འབྱུང་བསྐྱེད་པར་མཛོད། །ཀུན་འབྱུང་བདེན་པའི་ཚུལ་ལ་རབ་བསམ་ནས། །དེ་ཡི་འབྲས་བུ་སྡུག་བསྔལ་སྤང་བའི་ཐབས། །ལམ་གྱི་བདེན་པ་རྒྱུད་ལ་བསྟེན་པ་ཡིས། །ཉེ་བར་ཞི་བའི་འགོག་པ་མངོན་དུ་བྱ། །དེ་ཡང་སྐྱབས་གསུམ་བསླུ་མེད་ཡིད་ཆེས་ཀྱི། །དད་པས་ཉེར་དྲངས་གཞན་ཕན་ལྷག་བསམ་ནི། །རང་འདོད་གཡོ་སྒྱུ་མེད་པར་བསྐྱེད་པ་འདི། །རྒྱལ་སྲས་རྣམས་ཀྱི་སྙིང་ནོར་གཅིག་པུ་ཡིན། །བདེ་གཤེགས་ཆོས་ཁམས་ཡོན་ཏན་རྒྱ་མཚོའི་གཏེར། །རང་ལ་ཡོད་ཀྱང་སྒྲིབ་པའི་སྤྲིན་གྱིས་གཡོགས། །དེ་བསལ་ཚོགས་གཉིས་རྒྱ་ཆེན་བསགས་པ་ལས། །བྲལ་དང་སྨིན་པའི་འབྲས་བུ་མངོན་དུ་འགྱུར། །བདག་དང་ཕུང་པོ་རྣམ་རིག་སྒྲོ་བཏགས་ཆོས། །རིག་པའི་ལམ་ནས་ཡང་དག་དཔྱད་པ་ལས། །མཐར་འཛིན་བདག་ལྟ་དྲུང་ནས་འབྱིན་པ་ཡི། །བདག་མེད་སྤྲོས་བྲལ་ལྟ་བ་གཏན་འབེབས་མཛོད། །དེ་ནས་རྡོ་རྗེ་ཐེག་པའི་ལམ་ཞུགས་ནས། །དབང་གིས་རྒྱུད་སྨིན་དམ་ཚིག་རྣམ་དག་གི །བསྐྱེད་དང་རྫོགས་པའི་རིམ་པར་བརྩོན་པ་ལས། །སྒོ་གསུམ་རྡོ་རྗེ་བཞི་རུ་སྒྲུབ་པར་བྱ། །ཁྱད་པར་དྲན་པས་སྲིད་ཞིའི་འཇིགས་འཕྲོག་པ། །ཀུན་བཟང་བླ་མ་སྙིང་གི་པདྨོ་རུ། །གུས་པས་མཆོད་ན་རྡོ་རྗེའི་བྱིན་འབེབས་ཏེ། །ཡེ་ཤེས་འོད་གསལ་ཉི་མ་སྙིང་དབུས་འཆར། །སྤྲོས་བྲལ་ཀ་ནས་དག་པའི་དབྱིངས་ཆེན་པོར། །ལྷུན་གྲུབ་འོད་གསལ་སྣང་བ་རྟག་འཆར་བས། །ཆོས་ཟད་བློ་འདས་གདོད་མའི་གྲོལ་གཞི་ཆེར། །མངོན་བྱང་ཆུབ་ནས་འཁོར་བ་དོང་སྤྲུགས་བྱེད། །མདོར་ན་སྒོ་གསུམ་བྱ་བ་ཅི་བྱེད་ཀུན། །དམ་པའི་ཆོས་དང་མཐུན་པར་རབ་སྒྲུབ་ནས། །དྲན་དང་ཤེས་བཞིན་བག་ཡོད་བརྟུལ་ཞུགས་ལས། །ནམ་ཡང་ཉམས་མེད་བརྩོན་པར་ཤིན་ཏུ་གཅེས། །སྦྱོར་བ་སེམས་བསྐྱེད་དངོས་གཞི་དམིགས་མེད་དང་། །རྗེས་ལ་ཡང་དག་བསྔོ་བས་རྒྱས་བཏབ་འདི། །ཐེག་ཆེན་ལམ་གྱི་གཞུང་ཤིང་ཡིན་པས་ན། །དེ་གསུམ་སྒོམ་ནས་དགེ་ཚོགས་མཐར་ཕྱིན་མཛོད། །དེ་སྐད་གདམས་བཞིན་རང་གིས་མི་བྱེད་ཀྱང་། །གཞན་ལ་ཕན་པའི་ཤུགས་ཀྱིས་ཉེར་དྲངས་པས། །དམ་པ་རྣམས་ཀྱི་གསུང་གི་རྗེས་འབྲངས་ནས། །ལེགས་པར་འདོམས་པས་ཁྱོད་ཐུགས་གྲོལ་གྱུར་ཅིག །ཅེས་པའང་སྔ་འགྱུར་བསྟན་པའི་ཉི་མ་གྲུབ་དབང་རྫོགས་ཆེན་དྲུག་པ་རིན་པོ་ཆེའི་གསོལ་དཔོན་པད་རབ་བུ་དགེ་ཆུང་རྒྱལ་ནས་གསུང་བསྐུལ་ངོར་རྨོངས་རྒན་ཆོས་ཀྱི་བློ་གྲོས་པས་བྲིས་པའོ། །སརྦ་ཛ་ག་ཏཾ།། །།

[edit]

!_zhal gdams bsil sbyin bdud rtsi zhes bya ba bzhugs so/__/dpal ldan bla ma'i zhabs la phyag 'tshal lo/__/lhar bcas 'jig rten gsum na mngon mtho ba/__/ston pa mnyam med shAkya'i rgyal po dang /__/de sras byang sems nyan rang 'phags pa'i tshogs/__/khyad par rtsa gsum kun 'dus mtsho skyes rje'i/__/zhabs pad bde chen 'khor lor mchod byas nas/__/gang zhig thar pa don du gnyer ba la/__/phan pa'i gdams ngag bsil sbyin bdud rtsi ni/__/lung bzhin mdor bsdus ngag gis bsnyad par bya/__/shin tu rnyed dka'i rten bzang dal 'byor 'di/__/thob par dka' ba'i tshul la legs bsam te/__/don ldan snying po blang ba'i thabs bzang po/__/yang yang rgyud la bsten cing goms par bya/__/tshe 'di mi rtag chu yi chu bur 'dra/__/lus srog 'di ni myur du 'jig cing zad/__/mi rtag mi brtan sgyu ma'i ngang tshul la/__/legs par bsam nas myur du dam chos mdzod/__/bsags pa'i las ni nam yang chud mi za/__/rang gi steng du myong bar nges pas na/__/rgyu 'bras blang dor phra zhib bsrung ba 'di/__/chos sgor zhugs pa rnams kyi nyams len mthil/__/'khor ba thams cad sdug bsngal rang bzhin yin/__/bde ba'i go skabs cung zad tsam yang med/__/mtho ris rgyal srid bde ba che thob kyang /__/yid smon dang bral nges 'byung bskyed par mdzod/__/kun 'byung bden pa'i tshul la rab bsam nas/__/de yi 'bras bu sdug bsngal spang ba'i thabs/__/lam gyi bden pa rgyud la bsten pa yis/__/nye bar zhi ba'i 'gog pa mngon du bya/__/de yang skyabs gsum bslu med yid ches kyi/__/dad pas nyer drangs gzhan phan lhag bsam ni/__/rang 'dod g.yo sgyu med par bskyed pa 'di/__/rgyal sras rnams kyi snying nor gcig pu yin/__/bde gshegs chos khams yon tan rgya mtsho'i gter/__/rang la yod kyang sgrib pa'i sprin gyis g.yogs/__/de bsal tshogs gnyis rgya chen bsags pa las/__/bral dang smin pa'i 'bras bu mngon du 'gyur/__/bdag dang phung po rnam rig sgro btags chos/__/rig pa'i lam nas yang dag dpyad pa las/__/mthar 'dzin bdag lta drung nas 'byin pa yi/__/bdag med spros bral lta ba gtan 'bebs mdzod/__/de nas rdo rje theg pa'i lam zhugs nas/__/dbang gis rgyud smin dam tshig rnam dag gi__/bskyed dang rdzogs pa'i rim par brtson pa las/__/sgo gsum rdo rje bzhi ru sgrub par bya/__/khyad par dran pas srid zhi'i 'jigs 'phrog pa/__/kun bzang bla ma snying gi pad+mo ru/__/gus pas mchod na rdo rje'i byin 'bebs te/__/ye shes 'od gsal nyi ma snying dbus 'char/__/spros bral ka nas dag pa'i dbyings chen por/__/lhun grub 'od gsal snang ba rtag 'char bas/__/chos zad blo 'das gdod ma'i grol gzhi cher/__/mngon byang chub nas 'khor ba dong sprugs byed/__/mdor na sgo gsum bya ba ci byed kun/__/dam pa'i chos dang mthun par rab sgrub nas/__/dran dang shes bzhin bag yod brtul zhugs las/__/nam yang nyams med brtson par shin tu gces/__/sbyor ba sems bskyed dngos gzhi dmigs med dang /__/rjes la yang dag bsngo bas rgyas btab 'di/__/theg chen lam gyi gzhung shing yin pas na/__/de gsum sgom nas dge tshogs mthar phyin mdzod/__/de skad gdams bzhin rang gis mi byed kyang /__/gzhan la phan pa'i shugs kyis nyer drangs pas/__/dam pa rnams kyi gsung gi rjes 'brangs nas/__/legs par 'doms pas khyod thugs grol gyur cig/__ces pa'ang snga 'gyur bstan pa'i nyi ma grub dbang rdzogs chen drug pa rin po che'i gsol dpon pad rab bu dge chung rgyal nas gsung bskul ngor rmongs rgan chos kyi blo gros pas bris pa'o/__/sarba dza ga taM//___//