JKW-KABUM-01-KA-002-010

🚧 This website is under continued development. We appreciate your patience!

Previous Text Back to Volume PageNext Text

རྗེ་བཙུན་སྒྲོལ་མ་ཉེར་གཅིག་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ།

Wylie title	rje btsun sgrol ma nyer gcig la bstod pa phan bde'i ut+pal gsar pa'i do shal
Location	mkhyen brtse'i bka' 'bum Volume 1, sde tshan 2, Text 10, Pages 91-96 (Folios 17a3 to 19b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun sgrol ma nyer gcig la bstod pa phan bde'i ut+pal gsar pa'i do shal. In 'jam dbyangs mkhyen brtse'i dbang po'i bka' 'bum, Vol. 1: 91-96. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Deity	sgrol ma nyer gcig
Colophon	།དེ་ལྟར་རྗེ་བཙུན་འཕགས་མ་ཉེར་གཅིག་གི་སྒྱུ་འཕྲུལ་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ་ཅེས་བྱ་བ་འདི་ཡང་དད་པ་དང་མོས་གུས་ཁོ་ནས་མཚམས་སྦྱར་ཏེ་གཞོན་ནུ་ཨ་བྷཱ་ཡས་མྱུར་དུ་བཀོད་པའོ། །གོང་གི་མཆན་བུ་རྣམས་ཕྱག་མཚན་གྱི་མངོན་རྟོགས་སོ།།
	de ltar rje btsun 'phags ma nyer gcig gi sgyu 'phrul la bstod pa phan bde'i ut+pal gsar pa'i do shal ces bya ba 'di yang dad pa dang mos gus kho nas mtshams sbyar te gzhon nu a b+hA yas myur du bkod pa'o/__/gong gi mchan bu rnams phyag mtshan gyi mngon rtogs so

1 Texts in this Section (sde tshan or chos tshan)

10 91-96	རྗེ་བཙུན་སྒྲོལ་མ་ཉེར་གཅིག་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ། rje btsun sgrol ma nyer gcig la bstod pa phan bde'i ut+pal gsar pa'i do shal Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་བཙུན་སྒྲོལ་མ་ཉེར་གཅིག་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ་ཞེས་བྱ་བ། ན་མོ་ཨཱཪྻཱ་ཏཱ་ར་ཡེ། སྲས་བཅས་རྒྱལ་བའི་སྤངས་རྟོགས་ནོར་བུའི་མཛོད། །གང་གི་གསང་གསུམ་ཆུ་གཏེར་ལ་ཆགས་པས། །ཕན་བདེའི་འདོད་པ་ཡོངས་སུ་འཇོ་བའི་གཉེན། །རྗེ་བཙུན་སྒྲོལ་མར་བསྟོད་པའི་མེ་ཏོག་འབུལ། ༡ །བྱང་ཆུབ་སྤྱོད་པའི་རིན་ཆེན་གྲུ་བོ་མཆོག །ཚད་མེད་སྙིང་རྗེའི་ཟུར་ཕུད་དང་འགྲོགས་པས། །འགྲོ་རྣམས་སྡུག་བསྔལ་གསུམ་གྱི་འཁོར་མཚོ་ལས། །བསྒྲལ༷་བར་མཛད་པའི་དེད་དཔོན་སྤྱི་བོར་བསྟེན། ༢ །བཻ་ཌཱུར་ལྷུན་པོར་འཁུ་བའི་མཚན་དཔེའི་དཔལ། །གང་གི་དྲན་པ་ཙམ་ནས་བརྒྱད་གཉིས་ཀྱི། །འཇིགས་པའི་མུན་པ་འཕྲོག་བྱས་ངེས་ལེགས་ཀྱི། །ཐེམ་ཨུཏྤལ། སྐས་དམ་པར་དབུགས་འབྱིན་སྩལ་ལ་འདུད། ༣ །བྱེ་རུ་ཞུན་མའི་རྡུལ་ལྟར་དམར་བའི་སྐུའི། །རབ་གཡོའི་སྤྱན་གྱིས་སྙན་གྲགས་སྤྲིང་ཡིག་གིས། །ས་གསུམ་ཁམས་ཀུན་མཛེས་པར་སྒྲོག་པའི་དཔལ། །སྦྱིན་མཛད་རབ་གཡས་འཁྱིལ་དུང་། ཞི་མྱུར༷་མ༷་དཔའ༷་མོར༷་འདུད། ༤ །གང་ན་རྨོངས་པའི་མུན་པ་བཟའ་བ་ལ། །ཀུན་ནས་ཆས་པའི་མཚན་དཔེའི་ཟླ་སྣང་གིས། །བློ་མཆོག་ཨུཏྤལ་དཀར་པོའི་འདབ་མའི་ཁ། །གཅིག་ཅར་འབྱེད་མཁས་མེ་ལོང་ཧྲཱིཾ་མཚན། སྒྲ་དབྱང༷ས་ལྷ༷་མོར༷་འདུད། ༥ །འཛམ་བུའི་སྙེ་མ་སྨིན་པའི་མདོག་ལྡན་སྐུར། །སྟོང་ཕྲག་ཉི་གཞོན་འཆར་ཀས་འཁྱུད་པའི་འོད། །རབ་གུས་ཆུ་སྐྱེས་གཞོན་ནུར་ངལ་བསོས་པས། །བསོད་ནམས་མཆོག་གི་འཛུམ་ཕྲེང་སྟེར་ལ་འདུད། རིན་ཆེན། ༦ །མདོག་བཟང་ལྷུན་པོའི་དཔལ་འཛིན་པདྨོའི་ཕྱག །འཆི་མེད་བཅུད་ཀྱིས་གཏམས་པའི་ཀ་ལ་ཤས། །མཚན་པས་བརྟན་གཡོའི་ཚེ་དཔལ་མྱུར་སྡུད་ནས། །སྒྲུབ་ལ་སྦྱིན་མཛ༷ད་རྣམ་པར༷་རྒྱལ༷་མར༷་འདུད། ༧ །དམར་སེར་མཚར་སྡུག་སྤྱན་གྱི་ཉི་གཞོན་གྱིས། །དྲེགས་ལྡན་ཨུཏྤལ་གདེངས་ཀར་དམ་འཁྱུད་པས། །ཁམས་གསུམ་ཡིད་དབང་འགུགས་པའི་འཛུམ་ཕྲེང་གིས། །འདོད་དགུའི་དཔལ་སྟེར་རིག་བྱེད་སྒྲོལ་མར་འདུད། ༨ །ཁྲོས་པའི་ཉམས་བརྒྱས་རབ་སྒེག་དམར་ནག་ཞལ། །ཡེ་ཤེས་མེ་དང་མཉམ་པར་སྦྱོར་བའི་གཟིས། །སྨྱོ་བརྗེད་ཤ་ཟ་གྲིབ་གནོན་འབྱུང་པོའི་གདོན། །ཀུན་ནས་བསྲེག་མཛད་འཇིགས༷་བྱེད༷་ཕུར་བུ། ཆེན༷་མོར༷་འདུད། ༩ །ཆར་སྤྲིན་ལྟར་གནག་ཆེས་ཆེར་ཁྲོས་པའི་ཕྱག །འབར་བའི་རལ་གྲིས་མཚན་པའི་གཡུལ་ངོ་རུ། །ཆུ་འཁྲིག་གནམ་ལྕགས་མཚོན་ཆའི་འཁྲུལ་འཁོར་དཔུང་། །ཡོངས་སུ་ཕམ་མཛད་གཏུམ༷་མོ༷་ཆེན༷་མོར༷་འདུད། ༡༠ །རབ་དམར་མིག་སྨན་མདོག་གིས་མདངས་པའི་ཞལ། །ཚ་ཞིང་རྩུབ་པའི་རྡོ་རྗེའི་འོད་ཕྲེང་དང་། །འགྲོགས་པས་ཉོན་མོངས་བདུད་དགྲའི་ཚང་ཚིང་ཀུན། །མྱུར་དུ་བསྲེག་མཛད་གཞན༷་མི༷་རྒྱལ༷་མར༷་འདུད། ༡༡ །མ་རྒད་རི་བོའི་མདངས་འཛིན་མཛེས་ཞལ་དང་། །རབ་འགྲོགས་རིན་ཆེན་འཁོར་ལོ་གཡོ་བའི་དཔུང་། །ཁྲག་ཁྲིག་འོད་ཟེར་སྣང་བས་འཇིགས་པའི་ཚོགས། །བསལ་མཛད་སེང་ལྡེང་ནགས༷་ཀྱི༷་སྒྲོལ༷་མར༷་འདུད། ༡༢ །པདྨ་རཱ་གའི་རྡུལ་གྱིས་བྱུག་པའི་སྐུ། །རྒྱལ་མཚན་འཛུམ་ཕྲེང་གཡོ་བས་མཚན་པ་དང་། །ལྷན་ཅིག་བཞད་པ་བརྒྱད་ལྡན་སྔགས་ཀྱི་སྒྲས། །འཇིག་རྟེན་གསུམ་ལས་རྣམ་པར་རྒྱལ་ལ་འདུད། ༡༣ །དམར་སེར་ཞལ་ཅན་གཏེར་གྱི་བུམ་མཚན་ཕྱག །འདོད་དོན་ཅི་དགར་འཇོ་བའི་ཕྲིན་ལས་མཐའ། །ནོར་བུའི་འཁྲི་ཤིང་ལས་ལྷག་སྩོལ་མཛད་པས། །དབུལ་བ་སེལ་མཛད་ནོར༷་གཏེར༷་སྒྲོལ༷་མར༷་འདུད། ༡༤ །འཛམ་བུ་ནཱ་ད་ཞུན་མའི་མཚན་དཔེའི་འོད། །གང་ལ་རེག་ན་རྒུད་པའི་མུན་བཅོམ་ནས། །དགེ་མཚན་རྫོགས་ལྡན་གསར་པའི་དཔལ་བེའུའི། །སྣོད་བཅུད་ཕྱུག་མཛད་བཀྲ༷་ཤིས༷་སྒྲོལ༷་མར༷་འདུད། ༡༥ །དུས་མཐའི་མེ་ལྟར་འབར་ཞིང་རྡོ་རྗེའི་མཚོན། །གདེངས་པ་ཙམ་ནས་ཕས་རྒོལ་རི་བོའི་རྐང་། །མྱུར་བཅོམ་འཆི་མེད་གྲུབ་པའི་ཁང་བཟང་དབུས། །རང་སྡེ་སྲུང་མཛད་མེ༷་འབར༷་ཁྲོས༷་མར་འདུད། ༡༦ །སྲོད་མུན་འཁྲིགས་པའི་མདངས་ལྟར་གནག་པའི་ཞལ། །མེ་འབར་ལོག་འདྲེན་ཚོགས་ལ་དཔའ་བའི་ཁུར། །རྡོ་རྗེའི་གཏུན་ཤིང་གཡོ་བས་སླར་འཇོམས་པའི། །དྲག་ཤུལ་མཆོག་ལྡན་ཁྲོ༷་གཉེར༷་ཅན༷་ལ་འདུད། ༡༧ །ཆུ་གཏེར་རླབས་ཕྲེང་འཕྱུར་བའི་སིམ་པ་འབུམ། །གཅིག་བསྡུས་ཟླ་ཤེལ་གསར་པའི་འཛུམ་རླབས་ཅན། །རབ་ཏུ་ཞི་བའི་ཀུཎྜཱིའི་སྤྱི་བླུགས་ཆུ་གཏེར་གྱིས། །སྒྲིབ་གཉིས་དྲི་མ་འཁྲུད་མཛད་དེ་ལ་འདུད། ༡༨ །དུས་མཐའི་མེ་ལྟར་རབ་ཏུ་འབར་བའི་སྐུ། །སྣ་ཚོགས་རྡོ་རྗེས་མཚན་པའི་འོད་ཟེར་གྱིས། །ཕས་རྒོལ་རིག་སྔགས་ནུས་པའི་སྟོབས་འཆིངས་ནས། །གཞོམ་མེད་སྲུང་མཛད་འབར༷་བའི༷་འོད༷་ལ་འདུད། ༡༩ །གུར་གུམ་གེ་སར་རྒྱས་པའི་འཇོ་སྒེག་ལ། །ངོ་མཚར་མཆོད་རྟེན་དཔལ་གྱིས་མཚན་པའི་ཞབས། །གཡོ་བས་བདུད་དགྲ་འབྱུང་པོའི་དཔུང་ཚོགས་ཀུན། །རྣམ་པར་འཆིང་མཛད་དཔག་མེད་རྣོན་མར་འདུད། ༢༠ །བརྟན་གཡོའི་འབིགས་བྱེད་གཡོ་བའི་དུཿཁ་ནི། །རབ་དཀར་ཐུགས་རྗེའི་སྨན་གྱིས་ཞི་མཛད་ཕྱིར། །རང་ཏོགས་བདུད་རྩི་སྤྲོ་བའི་རི་དྭགས་ཅན། །ནམ་ཡང་འབྲལ་མེད་རྨ་བྱ་ཆེན་མོར་འདུད། ༢༡ །ཀུནྡཱའི་དཔལ་འཛིན་གཟུགས་སྐུའི་འཁྲི་ཤིང་ལ། །མཁྱེན་བརྩེའི་གདུགས་དཀར་གཡོ་དང་ལྷན་ཅིག་པར། །སྣ་ཚོགས་རྡོ་རྗེའི་ཏོག་གི་ཚྭ་ཚྭ་ཡིས། །འགལ་རྐྱེན་བཅོམ་མཛད་མི༷་ཕམ༷་རྒྱལ༷་མོར༷་འདུད། ༢༢ །དམར་སེར་ཟ་མ་ཏོག་གིས་མཚན་པའི་ཕྱག །ཧ་རིའི་ཙནྡན་ཚལ་དུ་གཡོ་བའི་འོད། །ཐུགས་རྗེའི་ག་བུར་གཞོན་ནུའི་བསིལ་ཡབ་ཀྱིས། །མི་ངལ་གདུང་འཕྲོག་རི༷་ཁྲོད༷་ལྷ་མོར༷་འདུད། ༢༣ །ཟླ་བ་ཞུན་མའི་ལང་ཚོའི་མཛེས་པའི་ཕྱག །གསེར་མདོག་གོ་ཆ་ལྡན་པས་མཚན་པའི་འོད། །གང་ལ་རེག་ན་འབྱུང་པོའི་བླ་དང་ཚེ། །འཕྲོགས་པའི་དཔལ་བཅོམ་འོད༷་ཟེར༷་ཅན༷་ལ་འདུད། ༢༤ །གཞན་ཡང་གང་འདུལ་གཟུགས་སྐུའི་གཉིས་སྐྱེས་དབང་། །གྲངས་མེད་མོས་པའི་ཆུ་གཏེར་ལ་འཆར་བས། །འགྲོ་ཀུན་དགའ་དང་གཏན་བདེའི་འཛུམ་ཟེར་གྱིས། །སིམ་པ་སྟེར་མཛད་ཀུན་ལ་དྭང་པས་འདུད། ༢༥ །དེ་ལྟར་རབ་ཏུ་བསྔགས་པའི་ཆུ་གཏེར་རླབས་ཕྲེང་སྲིད་རྩེར་འཕྱུར་བ་ལས། །འཕགས་མ་དགྱེས་པའི་ཤར་གྱི་ཐིག་ལེ་གཙུག་ཏོར་རྩེ་མོར་ངལ་བསོའི་མཐུས། །ཐུགས་རྗེའི་ག་བུར་འོད་རྡུལ་ལྷུང་བ་བརྒྱད་གཉིས་འཇིགས་པའི་ཚ་གདུང་ཀུན། །ཡོངས་སུ་བཅོམ་ནས་རྣམ་མཁྱེན་ཀུནྡཱའི་འཛུམ་དཀར་གྲོལ་བའི་དཔལ་ཐོབ་ཤོག ༢༦ །དེ་ལྟར་རྗེ་བཙུན་འཕགས་མ་ཉེར་གཅིག་གི་སྒྱུ་འཕྲུལ་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ་ཅེས་བྱ་བ་འདི་ཡང་དད་པ་དང་མོས་གུས་ཁོ་ནས་མཚམས་སྦྱར་ཏེ་གཞོན་ནུ་ཨ་བྷཱ་ཡས་མྱུར་དུ་བཀོད་པའོ། །གོང་གི་མཆན་བུ་རྣམས་ཕྱག་མཚན་གྱི་མངོན་རྟོགས་སོ།། །། ༈

[edit]

rje btsun sgrol ma nyer gcig la bstod pa phan bde'i ut+pal gsar pa'i do shal/ rje btsun sgrol ma nyer gcig la bstod pa phan bde'i ut+pal gsar pa'i do shal zhes bya ba/__na mo AR+YA tA ra ye/__sras bcas rgyal ba'i spangs rtogs nor bu'i mdzod/__/gang gi gsang gsum chu gter la chags pas/__/phan bde'i 'dod pa yongs su 'jo ba'i gnyen/__/rje btsun sgrol mar bstod pa'i me tog 'bul/__1__/byang chub spyod pa'i rin chen gru bo mchog__/tshad med snying rje'i zur phud dang 'grogs pas/__/'gro rnams sdug bsngal gsum gyi 'khor mtsho las/__/bsgralaX bar mdzad pa'i ded dpon spyi bor bsten/__2__/bai DUr lhun por 'khu ba'i mtshan dpe'i dpal/__/gang gi dran pa tsam nas brgyad gnyis kyi/__/'jigs pa'i mun pa 'phrog byas nges legs kyi/__/them ut+pal/__skas dam par dbugs 'byin stsal la 'dud/__3_/bye ru zhun ma'i rdul ltar dmar ba'i sku'i/__/rab g.yo'i spyan gyis snyan grags spring yig gis/__/sa gsum khams kun mdzes par sgrog pa'i dpal/__/sbyin mdzad rab g.yas 'khyil dung /__zhi myuraX maX dpa'aX moraX 'dud/__4__/gang na rmongs pa'i mun pa bza' ba la/__/kun nas chas pa'i mtshan dpe'i zla snang gis/__/blo mchog ut+pal dkar po'i 'dab ma'i kha/__/gcig car 'byed mkhas me long hrIM mtshan/__sgra dbyangaXs lhaX moraX 'dud/__5_/'dzam bu'i snye ma smin pa'i mdog ldan skur/__/stong phrag nyi gzhon 'char kas 'khyud pa'i 'od/__/rab gus chu skyes gzhon nur ngal bsos pas/__/bsod nams mchog gi 'dzum phreng ster la 'dud/__rin chen/__6__/mdog bzang lhun po'i dpal 'dzin pad+mo'i phyag__/'chi med bcud kyis gtams pa'i ka la shas/__/mtshan pas brtan g.yo'i tshe dpal myur sdud nas/__/sgrub la sbyin mdzaXd rnam paraX rgyalaX maraX 'dud/__7_/dmar ser mtshar sdug spyan gyi nyi gzhon gyis/__/dregs ldan ut+pal gdengs kar dam 'khyud pas/__/khams gsum yid dbang 'gugs pa'i 'dzum phreng gis/__/'dod dgu'i dpal ster rig byed sgrol mar 'dud/__8_/khros pa'i nyams brgyas rab sgeg dmar nag zhal/__/ye shes me dang mnyam par sbyor ba'i gzis/__/smyo brjed sha za grib gnon 'byung po'i gdon/__/kun nas bsreg mdzad 'jigasaX byedaX phur bu/__chenaX moraX 'dud/__9__/char sprin ltar gnag ches cher khros pa'i phyag__/'bar ba'i ral gris mtshan pa'i g.yul ngo ru/__/chu 'khrig gnam lcags mtshon cha'i 'khrul 'khor dpung /__/yongs su pham mdzad gtumaX moX chenaX moraX 'dud/__10__/rab dmar mig sman mdog gis mdangs pa'i zhal/__/tsha zhing rtsub pa'i rdo rje'i 'od phreng dang /__/'grogs pas nyon mongs bdud dgra'i tshang tshing kun/__/myur du bsreg mdzad gzhanaX miX rgyalaX maraX 'dud/__11__/ma rgad ri bo'i mdangs 'dzin mdzes zhal dang /__/rab 'grogs rin chen 'khor lo g.yo ba'i dpung /__/khrag khrig 'od zer snang bas 'jigs pa'i tshogs/__/bsal mdzad seng ldeng nagasaX kyiX sgrolaX maraX 'dud/__12__/pad+ma rA ga'i rdul gyis byug pa'i sku/__/rgyal mtshan 'dzum phreng g.yo bas mtshan pa dang /__/lhan cig bzhad pa brgyad ldan sngags kyi sgras/__/'jig rten gsum las rnam par rgyal la 'dud/__13__/dmar ser zhal can gter gyi bum mtshan phyag__/'dod don ci dgar 'jo ba'i phrin las mtha'/__/nor bu'i 'khri shing las lhag stsol mdzad pas/__/dbul ba sel mdzad noraX gteraX sgrolaX maraX 'dud/__14_/'dzam bu nA da zhun ma'i mtshan dpe'i 'od/__/gang la reg na rgud pa'i mun bcom nas/__/dge mtshan rdzogs ldan gsar pa'i dpal be'u'i/__/snod bcud phyug mdzad bkraX shisaX sgrolaX maraX 'dud/__15__/dus mtha'i me ltar 'bar zhing rdo rje'i mtshon/__/gdengs pa tsam nas phas rgol ri bo'i rkang /__/myur bcom 'chi med grub pa'i khang bzang dbus/__/rang sde srung mdzad meX 'baraX khrosaX mar 'dud/__16__/srod mun 'khrigs pa'i mdangs ltar gnag pa'i zhal/__/me 'bar log 'dren tshogs la dpa' ba'i khur/__/rdo rje'i gtun shing g.yo bas slar 'joms pa'i/__/drag shul mchog ldan khroX gnyeraX canaX la 'dud/__17__/chu gter rlabs phreng 'phyur ba'i sim pa 'bum/__/gcig bsdus zla shel gsar pa'i 'dzum rlabs can/__/rab tu zhi ba'i kuN+DI'i spyi blugs chu gter gyis/__/sgrib gnyis dri ma 'khrud mdzad de la 'dud/__18__/dus mtha'i me ltar rab tu 'bar ba'i sku/__/sna tshogs rdo rjes mtshan pa'i 'od zer gyis/__/phas rgol rig sngags nus pa'i stobs 'chings nas/__/gzhom med srung mdzad 'baraX ba'iX 'odaX la 'dud/__19_/gur gum ge sar rgyas pa'i 'jo sgeg la/__/ngo mtshar mchod rten dpal gyis mtshan pa'i zhabs/__/g.yo bas bdud dgra 'byung po'i dpung tshogs kun/__/rnam par 'ching mdzad dpag med rnon mar 'dud/__20__/brtan g.yo'i 'bigs byed g.yo ba'i duHkha ni/__/rab dkar thugs rje'i sman gyis zhi mdzad phyir/__/rang togs bdud rtsi spro ba'i ri dwags can/__/nam yang 'bral med rma bya chen mor 'dud/__21__/kun+dA'i dpal 'dzin gzugs sku'i 'khri shing la/__/mkhyen brtse'i gdugs dkar g.yo dang lhan cig par/_/sna tshogs rdo rje'i tog gi tshwa tshwa yis/__/'gal rkyen bcom mdzad miX phamaX rgyalaX moraX 'dud/__22__/dmar ser za ma tog gis mtshan pa'i phyag__/ha ri'i tsan+dan tshal du g.yo ba'i 'od/__/thugs rje'i ga bur gzhon nu'i bsil yab kyis/__/mi ngal gdung 'phrog riX khrodaX lha moraX 'dud/__23_/zla ba zhun ma'i lang tsho'i mdzes pa'i phyag__/gser mdog go cha ldan pas mtshan pa'i 'od/__/gang la reg na 'byung po'i bla dang tshe/__/'phrogs pa'i dpal bcom 'odaX zeraX canaX la 'dud/__24_/gzhan yang gang 'dul gzugs sku'i gnyis skyes dbang /__/grangs med mos pa'i chu gter la 'char bas/__/'gro kun dga' dang gtan bde'i 'dzum zer gyis/__/sim pa ster mdzad kun la dwang pas 'dud/__25_/de ltar rab tu bsngags pa'i chu gter rlabs phreng srid rtser 'phyur ba las/__/'phags ma dgyes pa'i shar gyi thig le gtsug tor rtse mor ngal bso'i mthus/__/thugs rje'i ga bur 'od rdul lhung ba brgyad gnyis 'jigs pa'i tsha gdung kun/__/yongs su bcom nas rnam mkhyen kun+dA'i 'dzum dkar grol ba'i dpal thob shog__26__/de ltar rje btsun 'phags ma nyer gcig gi sgyu 'phrul la bstod pa phan bde'i ut+pal gsar pa'i do shal ces bya ba 'di yang dad pa dang mos gus kho nas mtshams sbyar te gzhon nu a b+hA yas myur du bkod pa'o/__/gong gi mchan bu rnams phyag mtshan gyi mngon rtogs so//___//__!_