JKW-KABUM-02-KHA-001-038

🚧 This website is under continued development. We appreciate your patience!

Previous Text Back to Volume PageNext Text

ཡུལ་དམ་པ་རྣམས་ཁྲིར་ཕེབས། ཞབས་བརྟན། དབང་ཆོས་ལེགས་འབུལ་གྱི་སྐབས་དོན་རྣམ་པར་བཞག་པ།

Wylie title	yul dam pa rnams khrir phebs/ zhabs brtan/ dbang chos legs 'bul gyi skabs don rnam par bzhag pa
Location	mkhyen brtse'i bka' 'bum Volume 2, sde tshan 1, Text 38, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yul dam pa rnams khrir phebs zhabs brtan dbang chos legs 'bul gyi skabs don rnam par bzhag pa. In 'jam dbyangs mkhyen brtse'i dbang po'i bka' 'bum, Vol. 2: . Khams sde dge rdzong sar dgon: Rdzong sar blo gros phun tshogs, 2020.
Genre	Detailed Classification - rnam bzhag; Discourses - gtam

1 Texts in this Section (sde tshan or chos tshan)

38 192-197	ཡུལ་དམ་པ་རྣམས་ཁྲིར་ཕེབས། ཞབས་བརྟན། དབང་ཆོས་ལེགས་འབུལ་གྱི་སྐབས་དོན་རྣམ་པར་བཞག་པ། yul dam pa rnams khrir phebs/ zhabs brtan/ dbang chos legs 'bul gyi skabs don rnam par bzhag pa Detailed Classification - rnam bzhag   ·   Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཨོཾ་སྭ་སྟི་སིདྡྷཾ། ཡུལ་དམ་པ་རྣམས་ཁྲི་ཕེབས། ཞབས་བརྟན། དབང་ཆོས་ལེགས་འབུལ་སྐབས་བརྗོད་བྱ་དོན་གྱི་རྣམ་པར་བཞག་པ་ལ་ནང་གསེས་ཅུང་ཟད་མི་འདྲ་བ་མང་དུ་མཆིས་ཀྱང་སྤྱི་ཙམ་དུ། དཔལ་ལྡན་པཎྜི་ཏས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་དང་། མདོ་རྒྱུད་བསྟན་བཅོས་རྣམས་ནས་ཀྱང་རྒྱལ་བར་འགྱུར་པའི་ཚིག་སྔོན་དུ་འགྲོ་བར་གསུངས་པ་ལྟར་ཤིས་བརྗོད་ཀྱི་ཚིགས་བཅད་ཇི་ལྟར་རིགས་པས་མདུན་བདར་ཏེ། ཡུལ་དེ་ཉིད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལས་བརྩམས་པའི་བསྔགས་པ་བརྗོད་པའི་མཐར་ཕྱག་བྱ་བའི་ཚིག་གིས་མཚམས་སྦྱར་བ་ནི་ཡན་ལག་བདུན་གྱི་ནང་ནས་ཕྱག་འཚལ་བའི་ཡན་ལག་དང་། དེ་ནས་མཆོད་གནས་དང་སྦྱིན་བདག་གི་ལོ་རྒྱུས་རིགས་རུས་ཡོན་ཏན་སོགས་ཀྱི་ཆེ་བརྗོད་གང་འོས། ཁྱད་པར་ཆོས་དང་དམ་ཚིག་གི་འབྲེལ་ཟབ་ཐོག་མཐའ་བར་གསུམ་དགེ་བར་བྱུང་ཚུལ། དེ་ལས་ཀྱང་སྐབས་སུ་བབས་པའི་གནས་དུས་ཆོས་ཀྱི་འཁོར་ལོ་སོགས་བྱ་བ་གང་ཡིན་གྱི་བརྗོད་བྱ་ཞུ་བ་པོས་བརྗོད་བདེ་ཞིང་། གསན་པ་པོས་དགོངས་སླ་བ། འདུས་ཚོགས་ཐམས་ཅད་ཀྱི་སྙན་ལམ་དུ་བབས་པའི་ཚིག་ལྷུག་རྒྱས་བསྡུས་འཚམས་པ་ཞིག་དགོད་པ་ནི་དངོས་པོ་ངེས་བསྟན་གྱི་དོན་ཏེ། དེ་ལྟ་བུས་ལམ་ཡངས་པར་བྱས་ནས། འབུལ་མཚོན་རྣམས་རིམ་པར་བཀོད་པ་མཆོད་པའི་ཡན་ལག་དངོས་འབྱོར་གྱི་མཆོད་པ་དང་། དེའི་མཇུག་སྡུད་དུ་གནས་སྐབས་དང་མཐར་ཐུག་གི་འདོད་དོན་སྐྱབས་འཇུག་ཞུ་བ་སོགས་གང་འོས་བཀོད་མཐར། སླར་ཡང་ཡན་ལག་བདུན་གྱི་ཚིགས་སུ་བཅད་པ་རེ་འགོད་སྲོལ་གྱི། ཕྱག་ནི། སྐབས་འདིར་མཆོད་པའི་ནང་གསེས་ཕྱག་གི་མཆོད་པ་དང་། མཆོད་པ་ནི་གཙོ་བོར་ཡིད་སྤྲུལ་གྱི་མཆོད་པ། ལྷག་མ་སྡིག་པ་བཤགས་པ་ནས་བརྩམས་ཏེ། ཡོངས་སུ་བསྔོ་བའི་བར་སྤྱི་ལྟར་དང་། མཐར་དཔལ་ལྡན་པཎྜི་ཏས། མངོན་པར་འདོད་པའི་དངོས་པོ་ལ། །སྨོན་པ་ཤིས་བརྗོད་བྱ་སྟེ་དཔེར། །ཞེས་སོགས་གསུངས་པ་ལྟར་འཕྲལ་དང་ཡུན་དུ་དགེ་བའི་སྨོན་ལམ་ཤིས་བརྗོད་ཀྱི་ཚིག་གིས་མཐའ་བརྒྱན་པ་དང་བཅས་པ་སྟེ། མདོར་དབུ་ཞབས་ཀྱི་དོན་ཐམས་ཅད་དྲིལ་ན་བསགས་སྦྱངས་སྤེལ་གསུམ་གྱི་བསོད་ནམས་བྱ་བའི་དངོས་པོ་ཐམས་ཅད་ཡོངས་སུ་བསྡུས་པ་ཡན་ལག་བདུན་གྱི་ཁོངས་སུ་འདུ་བ་ཞིག་དང་། རྗོད་བྱེད་ཀྱི་ཚིག་ཀྱང་། སྐྱེས་བུ་ཆེན་པོའི་བསོད་ནམས་ཀྱི་མཚན་བཀྲ་ཤིས་རྟགས་བརྒྱད་དང་། སྟོན་པས་བྱིན་གྱིས་བརླབས་ཤིང་རང་རང་གི་མིང་དང་བྱེད་ལས་ཀྱི་སྒོ་ནས་ཀྱང་བཀྲ་ཤིས་པའི་རྫས་སུ་གྲུབ་པ་རྣམ་པ་བརྒྱད་དང་། བྱང་ཆུབ་སེམས་དཔའ་འཁོར་ལོས་སྒྱུར་བ་ཆེན་པོ་ལ་འོས་པའི་རིན་པོ་ཆེ་སྣ་བདུན་དང་ཡིད་བཞིན་གྱི་ནོར་བུ། འདོད་འཇོའི་བ། དཔག་བསམ་གྱི་ཤིང་། བུམ་པ་བཟང་པོ། བྱང་ཆུབ་ཀྱི་ཤིང་སྟེ་ཕུན་སུམ་ཚོགས་པའི་མཚན་མ་ལྔ་སོགས། མདོར་ན་བཀྲ་ཤིས་ཤིང་བརྗིད་ཆགས་པའི་དཔེ་དང་དོན་ལ་སྦྱར་ནས་ཐོག་མཐའ་བར་གསུམ་དུ་དགེ་ཞིང་ཤིས་པའི་ཚིག་སྦྱོར་གང་ལེགས་དང་བཅས་ཏེ་འགོད་པར་བྱ་བ་ཡིན་ནོ། །གཉིས་པ་ནི། འབེལ་བའི་གཏམ་དང་འབུལ་ཐོ་ཟུང་དུ་འབྲེལ་བར་སྙན་དུ་གསོལ་ན། ཤིས་པའི་ཚིགས་སུ་བཅད་པའམ། ཇི་ལྟར་རིགས་པའི་ཚིག་སྦྱོར་ལེགས་པས་ཐོག་དྲངས་ཏེ། འོག་ཏུ་འབུལ་ཡིག་གི་དངོས་གཞིར་བརྗོད་བྱ་གང་ཡོད་པའི་དོན་མདོར་བསྟན་གྱིས་མདུན་བསུ། དེ་ཉིད་རྒྱས་པར་སྙན་དུ་འབུལ་བས་གཞུང་བསྲངས། དེ་ལྟར་རྒྱས་པར་ཇི་སྐད་གསོལ་བའི་དོན་མདོར་བསྡུས་ཏེ་ཚིགས་སུ་བཅད་པ་དང་ལྷུག་པ་མཚོ་བྱུང་དགྱེས་པའི་སྒྲ་དབྱངས་ཀྱི་ཏམ་བུ་ར་ལས་དྲངས་ནས་སྙན་དུ་གསོལ་བ་ནི་འདི་ཡིན་ཏེ་ཞེས་པ་ལྟ་བུས་མཚམས་སྦྱར་ཏེ། འབུལ་ཡིག་དངོས་ཀློག་པ་ལ་འཇུག་གོ། །གསུམ་པ་ནི། ཇི་ལྟར་དཔྱིད་ཀྱི་དཔལ་མོས་ཡོངས་སུ་བཟུང་བ་ན། རི་གླིང་ཐ་གྲུར་བཅས་པའི་ཁྱོན་ཐམས་ཅད་ནེའུ་གསིང་དང་། མེ་ཏོག་དང་། ནགས་ཚལ་འདབ་མ་དང་བཅས་པས་མཛེས་པའི་དཔལ་ངང་གིས་འབྱུང་བ་བཞིན་དུ་འཕགས་པ་རྣམས་ཀྱི་ཡེ་ཤེས་གཟིགས་པ་དག་པའི་མཐུ་དང་། གདུལ་བྱའི་བསོད་ནམས་ཀྱི་འབྲས་བུ་དུས་སུ་སྨིན་པ་ལས། སྔར་ཉིན། ༴༴ བདག་ཅག་རིག་པ་འཛིན་པའི་དགེ་འདུན་འདུས་པ་སུམ་ཅུ་ལྷག་པས་འཆི་མེད་གྲུབ་པའི་སློབ་དཔོན་ཛེ་ཏཱ་རིའི་བཞེད་གཞུང་དྲི་མ་མེད་པ་བཅོམ་ལྡན་འདས་ཚེ་མཐའ་ཡས་པ་ལྷ་དགུའི་བདག་བསྐྱེད། མདུན་བསྐྱེད། བུམ་བཟླས། ཡེ་ཤེས་དང་འཇིག་རྟེན་པའི་གཏོར་མ་འབུལ་བ་བཅས་སྔོན་དུ་བཏང་ནས། དེ་འཕྲལ་ཉི་མ་འཆར་ནས་ཅུང་ཟད་སོང་པའི་དུས་དགེ་བར། འཇམ་མགོན་ཆོས་ཀྱི་རྒྱལ་པོ་དང་། དཔལ་སའི་ཚངས་པ་ཆེན་པོ་མཆོད་ཡོན་ཉི་ཟླ་ཟུང་འབྲེལ་སྤྱན་དྲངས་ཏེ་སོ་སོའི་བཞུགས་ཁྲིར་འཁོད་གྲུབ་པ་དང་བསྟུན། བྱང་འདྲེན་པས་བསྐུལ་ཏེ་བླ་མ་ཚེ་དཔག་མེད་དུ་བསྐྱེད་ཅིང་བཟླས་པ་བྱ་བ་གྲུབ་མཚམས། མཆོད་པ་བྱིན་རླབས། བདག་གིས་གུས་པའི་ཕྱག་འདུས་པའི་དབུས་སུ་འགྲེངས་ཏེ་འདུད་པ་དང་བཅས། འདི་སྐད་དུ། ཨོཾ་སྭ་སྟི་སིདྡྷཾ། ༴༴ ཞེས་དཀོན་མཆོག་གསུམ་གྱི་བཀྲ་ཤིས་པའི་ཚིགས་སུ་བཅད་པས་མདུན་བསུས་ཏེ། དེའི་དོན་དང་རྗེས་སུ་འབྲེལ་པ་ཡུལ་ཕུན་སུམ་ཚོགས་པ་མངའ་བ་ལ་སོགས་ཀྱི་འབྲུ་འགྲེལ་དང་། དོན་གྱི་ཆར་མགོན་པོ་བྱམས་པའི་རྒྱུད་བླ་མའི་ལུང་གིས་རྒྱབ་སྐྱོར་དང་བཅས་པའི་མཐར། དེ་ལྟ་བུའི་དཀོན་མཆོག་རིན་པོ་ཆེ་རྣམ་པ་གསུམ་གྱི་ཐུགས་རྗེའི་གདུགས་དཀར་བླ་ན་ཡངས་པར་འཁོད་པའི་སྟོན་འཁོར་ཕུན་སུམ་ཚོགས་པ་ལྔ་ལྡན་གྱི་སྙན་ལམ་དུ། ཐོག་མར་དགེ་བ་ཕུན་སུམ་ཚོགས་པ་རྣམ་པ་ལྔའི་གླེང་བས་མདུན་བསུས། བར་དུ་དགེ་བ་པཱུ་ཛ་མཎྜལ་གྱི་རྣམ་པར་བཞག་པ། ཐ་མར་དགེ་བ་ཞབས་པད་བསྐལ་བརྒྱར་འཚོ་གཞེས་བརྟན་པའི་ཆོ་ག་གྲུབ་ཚུལ། དེའི་དང་པོ་ལའང་། སྤྱིའི་རྣམ་པར་བཞག་པ་དང་། བྱེ་བྲག་གི་རྣམ་པར་བཞག་པ་གཉིས་ལས། དང་པོ་ལ། ཁུངས་གང་ལས་བརྩམས་ཏེ་བྱུང་བ། སྤྱིའི་མཚན་ཉིད། སྒྲ་དོན། དབྱེ་བ། དེ་ལྟ་བུའི་བརྗོད་བྱ་མདོར་བསྡུ་བའོ། །གཉིས་པ་ལ་ལྔ། གནས། སྟོན་པ། འཁོར། ཆོས། དུས་ཕུན་སུམ་ཚོགས་པའོ། །དེ་རེ་རེ་ལའང་། མཚན་ཉིད། སྒྲ་དོན། དབྱེ་བ། སྐབས་སུ་བབས་པའི་གནས་སོགས་ངོས་བཟུང་བ། དེ་ལྟར་བཟུང་བའི་བརྗོད་བྱ་མདོར་བསྡུས་ཏེ་སྙན་ལམ་དུ་གསོལ་བའོ། །གཉིས་པ་བར་དུ་དགེ་བ་ལ་དྲུག །ཁུངས། མཚན་ཉིད། སྒྲ་དོན། དབྱེ་བ། ཇི་ལྟར་འབུལ་ཚུལ། དེ་ལྟར་ཕུལ་བའི་དགོས་པ། གསུམ་པ་ཐ་མར་དགེ་བ་ལ་གཉིས། ཞབས་པད་བརྟན་པར་གསོལ་བ་འདེབས་དགོས་པའི་རྒྱུ་མཚན་དང་། ཇི་ལྟར་གསོལ་བ་བཏབ་པའི་ཚུལ་ལོ། །ཕྱི་མ་ལ་གསུམ། སྦྱོར་བ། དངོས་གཞི། རྗེས་ཏེ་ཆོ་ག་ལས་ཇི་ལྟར་འབྱུང་བ་བཞིན་ནོ། །དེ་ལྟ་བུའི་ཆོ་ག་ལས་བླ་མ་ལྷར་བསྐྱེད་པ་དང་། སྔགས་བཟླ་བ་སྔོན་དུ་སོང་ནས། མཆོད་པའི་ཐོག་མར་མཎྜལ་འབུལ་བ་ལ་ཇི་སྐད་བཤད་པའི་རྣམ་པར་བཞག་པ་དེ་རྣམས་ཐུགས་ལ་བཞག་ནས། ཞེས་མཚམས་སྦྱར་བ་དང་ལྷན་ཅིག་ཏུ་བྱང་འདྲེན་པས་མཎྜལ་ཚོམ་བུ་སོ་བདུན་མ་བསྐུལ་ཏེ་ཕུལ། བདག་གིས་རི་གླིང་གི་བཀོད་པའི་མཎྜལ་འཇམ་མགོན་བླ་མའི་ཕྱག་ཏུ་ཕུལ་ཞིང་ཕྱག་བྱ་བ་དང་བཅས་གྲལ་ལ་འཁོད། རབ་འབྱམས་རྒྱ་མཚོ་ལ་སོགས་པའི་མཆོད་པ་ནས་བརྩམས།། །། ༈

[edit]

yul dam pa rnams khrir phebs/__zhabs brtan/__dbang chos legs 'bul gyi skabs don rnam par bzhag pa/__ oM swa sti sid+d+haM/_yul dam pa rnams khri phebs/_zhabs brtan/_dbang chos legs 'bul skabs brjod bya don gyi rnam par bzhag pa la nang gses cung zad mi 'dra ba mang du mchis kyang spyi tsam du/_dpal ldan paN+Di tas/_shis brjod phyag bya dngos po ni/_/nges par bstan pa'ang de yi sgo/_/zhes dang /_mdo rgyud bstan bcos rnams nas kyang rgyal bar 'gyur pa'i tshig sngon du 'gro bar gsungs pa ltar shis brjod kyi tshigs bcad ji ltar rigs pas mdun bdar te/_yul de nyid kyi sku gsung thugs yon tan phrin las las brtsams pa'i bsngags pa brjod pa'i mthar phyag bya ba'i tshig gis mtshams sbyar ba ni yan lag bdun gyi nang nas phyag 'tshal ba'i yan lag dang /_de nas mchod gnas dang sbyin bdag gi lo rgyus rigs rus yon tan sogs kyi che brjod gang 'os/_khyad par chos dang dam tshig gi 'brel zab thog mtha' bar gsum dge bar byung tshul/_de las kyang skabs su babs pa'i gnas dus chos kyi 'khor lo sogs bya ba gang yin gyi brjod bya zhu ba pos brjod bde zhing /_gsan pa pos dgongs sla ba/_'dus tshogs thams cad kyi snyan lam du babs pa'i tshig lhug rgyas bsdus 'tshams pa zhig dgod pa ni dngos po nges bstan gyi don te/_de lta bus lam yangs par byas nas/_'bul mtshon rnams rim par bkod pa mchod pa'i yan lag dngos 'byor gyi mchod pa dang /_de'i mjug sdud du gnas skabs dang mthar thug gi 'dod don skyabs 'jug zhu ba sogs gang 'os bkod mthar/_slar yang yan lag bdun gyi tshigs su bcad pa re 'god srol gyi/_phyag ni/_skabs 'dir mchod pa'i nang gses phyag gi mchod pa dang /_mchod pa ni gtso bor yid sprul gyi mchod pa/_lhag ma sdig pa bshags pa nas brtsams te/_yongs su bsngo ba'i bar spyi ltar dang /_mthar dpal ldan paN+Di tas/_mngon par 'dod pa'i dngos po la/_/smon pa shis brjod bya ste dper/_/zhes sogs gsungs pa ltar 'phral dang yun du dge ba'i smon lam shis brjod kyi tshig gis mtha' brgyan pa dang bcas pa ste/_mdor dbu zhabs kyi don thams cad dril na bsags sbyangs spel gsum gyi bsod nams bya ba'i dngos po thams cad yongs su bsdus pa yan lag bdun gyi khongs su 'du ba zhig dang /_rjod byed kyi tshig kyang /_skyes bu chen po'i bsod nams kyi mtshan bkra shis rtags brgyad dang /_ston pas byin gyis brlabs shing rang rang gi ming dang byed las kyi sgo nas kyang bkra shis pa'i rdzas su grub pa rnam pa brgyad dang /_byang chub sems dpa' 'khor los sgyur ba chen po la 'os pa'i rin po che sna bdun dang yid bzhin gyi nor bu/_'dod 'jo'i ba/_dpag bsam gyi shing /_bum pa bzang po/_byang chub kyi shing ste phun sum tshogs pa'i mtshan ma lnga sogs/_mdor na bkra shis shing brjid chags pa'i dpe dang don la sbyar nas thog mtha' bar gsum du dge zhing shis pa'i tshig sbyor gang legs dang bcas te 'god par bya ba yin no/_/gnyis pa ni/_'bel ba'i gtam dang 'bul tho zung du 'brel bar snyan du gsol na/_shis pa'i tshigs su bcad pa'am/_ji ltar rigs pa'i tshig sbyor legs pas thog drangs te/_'og tu 'bul yig gi dngos gzhir brjod bya gang yod pa'i don mdor bstan gyis mdun bsu/_de nyid rgyas par snyan du 'bul bas gzhung bsrangs/_de ltar rgyas par ji skad gsol ba'i don mdor bsdus te tshigs su bcad pa dang lhug pa mtsho byung dgyes pa'i sgra dbyangs kyi tam bu ra las drangs nas snyan du gsol ba ni 'di yin te zhes pa lta bus mtshams sbyar te/_'bul yig dngos klog pa la 'jug go/_/gsum pa ni/_ji ltar dpyid kyi dpal mos yongs su bzung ba na/_ri gling tha grur bcas pa'i khyon thams cad ne'u gsing dang /_me tog dang /_nags tshal 'dab ma dang bcas pas mdzes pa'i dpal ngang gis 'byung ba bzhin du 'phags pa rnams kyi ye shes gzigs pa dag pa'i mthu dang /_gdul bya'i bsod nams kyi 'bras bu dus su smin pa las/_sngar nyin/_==__bdag cag rig pa 'dzin pa'i dge 'dun 'dus pa sum cu lhag pas 'chi med grub pa'i slob dpon dze tA ri'i bzhed gzhung dri ma med pa bcom ldan 'das tshe mtha' yas pa lha dgu'i bdag bskyed/_mdun bskyed/_bum bzlas/_ye shes dang 'jig rten pa'i gtor ma 'bul ba bcas sngon du btang nas/_de 'phral nyi ma 'char nas cung zad song pa'i dus dge bar/_'jam mgon chos kyi rgyal po dang /_dpal sa'i tshangs pa chen po mchod yon nyi zla zung 'brel spyan drangs te so so'i bzhugs khrir 'khod grub pa dang bstun/_byang 'dren pas bskul te bla ma tshe dpag med du bskyed cing bzlas pa bya ba grub mtshams/_mchod pa byin rlabs/_bdag gis gus pa'i phyag 'dus pa'i dbus su 'grengs te 'dud pa dang bcas/_'di skad du/_oM swa sti sid+d+haM/_==_zhes dkon mchog gsum gyi bkra shis pa'i tshigs su bcad pas mdun bsus te/_de'i don dang rjes su 'brel pa yul phun sum tshogs pa mnga' ba la sogs kyi 'bru 'grel dang /_don gyi char mgon po byams pa'i rgyud bla ma'i lung gis rgyab skyor dang bcas pa'i mthar/_de lta bu'i dkon mchog rin po che rnam pa gsum gyi thugs rje'i gdugs dkar bla na yangs par 'khod pa'i ston 'khor phun sum tshogs pa lnga ldan gyi snyan lam du/_thog mar dge ba phun sum tshogs pa rnam pa lnga'i gleng bas mdun bsus/_bar du dge ba pU dza maN+Dal gyi rnam par bzhag pa/_tha mar dge ba zhabs pad bskal brgyar 'tsho gzhes brtan pa'i cho ga grub tshul/_de'i dang po la'ang /_spyi'i rnam par bzhag pa dang /_bye brag gi rnam par bzhag pa gnyis las/_dang po la/_khungs gang las brtsams te byung ba/_spyi'i mtshan nyid/_sgra don/_dbye ba/_de lta bu'i brjod bya mdor bsdu ba'o/_/gnyis pa la lnga/_gnas/_ston pa/_'khor/_chos/_dus phun sum tshogs pa'o/_/de re re la'ang /_mtshan nyid/_sgra don/_dbye ba/_skabs su babs pa'i gnas sogs ngos bzung ba/_de ltar bzung ba'i brjod bya mdor bsdus te snyan lam du gsol ba'o/_/gnyis pa bar du dge ba la drug__/khungs/_mtshan nyid/_sgra don/_dbye ba/_ji ltar 'bul tshul/_de ltar phul ba'i dgos pa/_gsum pa tha mar dge ba la gnyis/_zhabs pad brtan par gsol ba 'debs dgos pa'i rgyu mtshan dang /_ji ltar gsol ba btab pa'i tshul lo/_/phyi ma la gsum/_sbyor ba/_dngos gzhi/_rjes te cho ga las ji ltar 'byung ba bzhin no/_/de lta bu'i cho ga las bla ma lhar bskyed pa dang /_sngags bzla ba sngon du song nas/_mchod pa'i thog mar maN+Dal 'bul ba la ji skad bshad pa'i rnam par bzhag pa de rnams thugs la bzhag nas/_zhes mtshams sbyar ba dang lhan cig tu byang 'dren pas maN+Dal tshom bu so bdun ma bskul te phul/_bdag gis ri gling gi bkod pa'i maN+Dal 'jam mgon bla ma'i phyag tu phul zhing phyag bya ba dang bcas gral la 'khod/_rab 'byams rgya mtsho la sogs pa'i mchod pa nas brtsams//___//_!_