JKW-KABUM-02-KHA-001-031

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 2, sde tshan 1, Text 31, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 2: . Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

31 118-126	སངས་རྒྱས་ཀྱི་སྤྱོད་པ་ཞེས་པའི་སྙན་ངག་ཆེན་པོ་སློབ་དཔོན་རྟ་དབྱངས་ཀྱིས་མཛད་པ་ལེའུ་ཉི་ཤུ་རྩ་བརྒྱད་པ། sangs rgyas kyi spyod pa zhes pa'i snyan ngag chen po slob dpon rta dbyangs kyis mdzad pa le'u nyi shu rtsa brgyad pa Discourses - gtam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སངས་རྒྱས་ཀྱི་སྤྱོད་པ་ཞེས་པའི་སྙན་ངག་ཆེན་པོ་སློབ་དཔོན་རྟ་དབྱངས་ཀྱིས་མཛད་པ་ལེའུ་ཉི་ཤུ་རྩ་བརྒྱད་པ།

སངས་རྒྱས་ཀྱི་སྤྱོད་པ་ཞེས་པའི་སྙན་ངག་ཆེན་པོ་སློབ་དཔོན་རྟ་དབྱངས་ཀྱིས་མཛད་པ་ལེའུ་ཉི་ཤུ་རྩ་བརྒྱད་པ་ལས། ཡུལ་གྱི་བུད་ཤིང་ཅན་ནི་འདོད་ཆགས་མེ་ཡིས་ནི། །འཇིག་རྟེན་སྐྱེ་བོ་རྣམ་པར་བསྲེགས་པར་གྱུར་པ་ལ། །སོས་ཀའི་ཐ་མ་སྤྲིན་ཆེན་གྱི་ནི་ཆར་བཞིན་དུ། །འདི་ཡི་ཆོས་ཀྱི་ཆར་གྱིས་རབ་ཏུ་ཚིམ་བྱེད་འགྱུར། །ཞེས་དང་། ཇི་ལྟར་སྨན་ནི་བསྙེན་པར་མི་བྱེད་སྐྱེས་བུ་ཡིས། །སྨན་པ་མཐོང་བ་ལས་ཀྱང་ནད་ནི་འཇོམས་མིན་ཏེ། །དེ་བཞིན་བདག་གི་ཡེ་ཤེས་འདི་ནི་མ་བསྒོམས་ན། །བདག་ནི་མཐོང་བ་ལས་ཀྱང་སྡུག་བསྔལ་འཇོམས་མ་ཡིན། །ཇི་ལྟར་འཇིག་རྟེན་དག་ན་སྐྱེ་བ་རྟོགས་ནས་སུ། །དེས་ནི་ཆད་པའི་ལྟ་བ་རྣམ་པར་སྤངས་པ་སྟེ། །འཇིག་རྟེན་དག་ན་ནུབ་པར་འགྲོ་བ་ཤེས་ནས་སུ། །རྟག་པའི་ལྟ་བ་བརྟན་པོར་སྐྱེན་པར་སྤངས་པའོ། །ཞེས་དང་། དགེ་སློང་རྣམས་ལ་ཐུགས་རྗེ་ཆེན་པོ་མངའ་བས་བསྟན། །སློབ་དཔོན་བཞིན་དུ་སྒྲོན་མ་བཞིན་དུ་དོན་བཞིན་དུ། །བདག་འདས་ཚེ་ན་སོ་སོར་ཐར་པ་བསྟེན་བྱ་སྟེ། །ཁྱོད་ཀྱི་སྟོན་པ་དེ་ཡིན་དེ་དབང་གིས་འགྱུར་བྱ། །ཁོ་བོ་གནས་པ་ན་ཡང་དེ་ཙམ་ཉིད་སྨྲའོ། །ལུས་དང་ངག་གི་ལས་ནི་རྣམ་པར་དག་འདོད་པས། །དེ་བཞིན་འཇིག་རྟེན་ཐ་སྙད་ཐམས་ཅད་འདོར་བ་དང་། །ས་དང་སྲོག་ཆག་ས་བོན་རྫས་ལ་སོགས་རྣམས་ཀྱིས། །བདག་ཏུ་འཛིན་པ་ལས་ནི་མེ་བཞིན་ལྡོག་པའོ། །ཞེས་དང་། སྐྱེ་ན་འཆི་དང་རྒ་བ་དང་མཉམ་འཇིགས་པ་དང་། །མཐོ་རིས་དག་ན་འཕོ་བ་དང་མཉམ་ཡོད་མིན་ཏེ། །ཞེས་དང་། མཆོག་ཏུ་མི་འགྱུར་འཕོ་བ་མེད་པ་བརྙེས་ལྡན་པ། །བརྩེ་བ་དང་བཅས་ཐུབ་པ་བློ་གྲོས་ཆེན་པོ་ནི། །མཆོད་འོས་མཆོད་ལ་མཆོག་ལ་དམ་པ་འོངས་པའོ། །ཞེས་སོགས་གསུངས་ཤིང་འདི་ཉིད་སྙན་ངག་ཚིག་སྦྱོར་ཕུན་སུམ་ཚོགས་པ་ཡོད་དོ། ། ༈ བྱང་ཆུབ་སེམས་དཔའི་སྐྱེས་རབས་ཆོས་ཀྱི་གཎྜཱི་དཔའ་བོས་མཛད་པ་ལས། གང་ཞིག་འདབ་གཤོག་རྒྱས་པ་ཡོན་ཏན་བརྒྱ་ཕྲག་རབ་མཆོག་ཡང་དག་ལྡན་པའི་བདག་ཉིད་ཀྱི། །བྱ་ཞིག་བྱུང་གྱུར་རི་དྭགས་དགྲ་ཡིས་མགྲིན་པར་རུས་པའི་དུམ་བུ་རིང་པོ་ཟུག་པ་ཕྱུང་བྱས་ཏེ། །རི་དྭགས་དེས་སླད་བསད་ཅིང་ཟ་ཕྱིར་བརྙས་ཐོབ་གྱུར་མོད་དེ་ནི་ནུས་ནའང་ཁྲོ་མ་གྱུར། །བཟོད་པའི་ཞིང་དེའི་འཆི་མེད་རང་བཞིན་འབྲས་བུ་བཅས་གྱུར་ཆོས་ཀྱི་གཎྜིའི་སྒྲ་བསྒྲགས་སོ། །ཞེས་སོགས་འབྱུང་། ། ༈ རྒྱལ་པོར་གཏམ་བྱ་རིན་པོ་ཆེའི་ཕྲེང་བ་ལས། དེ་ལ་མངོན་མཐོ་བདེ་བ་སྟེ། །ངེས་པར་ལེགས་པ་ཐར་པར་འདོད། །དེ་ནི་སྒྲུབ་པ་མདོར་བསྡུ་ན། །མདོར་ན་དད་དང་ཤེས་རབ་བོ། །ཞེས་དང་། དད་ཅན་ཉིད་ཕྱིར་ཆོས་ལ་བརྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །འདི་སྔོན་འགྲོ་བ་དད་པ་ཡིན། །འདུན་དང་ཞེ་སྡང་འཇིགས་པ་དང་། །རྨོངས་པ་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ངེས་པར་ལེགས་པའི་སྣོད་མཆོག་ཡིན། །ཞེས་དང་། མི་གསོད་པ་དང་རྐུ་སྤོང་དང་། །གཞན་གྱི་ཆུང་མ་སྤོང་བ་དང་། །ལོག་དང་ཕྲ་མ་རྩུབ་ཉིད་དང་། །མི་འབྲེལ་སྨྲ་བ་ཡང་དག་སྡོམ། །ཆགས་དང་གནོད་སེམས་མེད་པ་ལ། །ཉིད་ཕྱིར་ལྟ་བ་ཡོངས་སྤོང་བ། །འདི་དག་ལས་ལམ་དཀར་བཅུ་སྟེ། །བཟློག་པ་དག་ནི་ནག་པོ་ཡིན། །ཆང་མི་འཐུང་དང་འཚོ་བ་བཟང་། །རྣམ་པར་མི་འཚེ་གུས་སྦྱིན་དང་། །མཆོད་འོས་མཆོད་དང་བྱམས་པ་སྟེ། །མདོར་ན་ཆོས་ནི་དེ་བཞིན་ནོ། །ཞེས་དང་། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཞེས་དང་། ཆགས་དང་ཞེ་སྡང་གཏི་མུག་དག །ཉེས་པར་མཁྱེན་ནས་ཡོངས་སུ་སྤང་། །མ་ཆགས་དང་ནི་གཏི་མུག་མེད། །ཡོན་ཏན་མཁྱེན་ནས་གུས་པས་བསྟེན། །ཞེས་དང་། ལྷ་ཡི་ཕུན་སུམ་ཚོགས་པས་ཀྱང་། །ཁེངས་པ་ཉིད་དུ་མི་བྱ་ཞིང་། །ཡི་དྭགས་བས་ཀྱང་དབུལ་བ་ཡི། །རྒུད་པས་ཀྱང་ནི་ཞུམ་མི་བྱ། །ཞེས་དང་། དེ་ལ་བྱང་ཆུབ་སེམས་དཔའ་ཡི། །ཡོན་ཏན་མདོར་བསྟན་བྱ་བ་ནི། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་སྙིང་བརྩེ་སོགས། །སྦྱིན་པ་རང་ནོར་ཡོངས་བཏང་བ། །ཚུལ་ཁྲིམས་གཞན་ཕན་བྱ་བའོ། །བཟོད་པ་ཁྲོ་བ་སྤོང་པ་སྟེ། །བརྩོན་འགྲུས་དགེ་ལ་སྤྲོ་བ་ཉིད། །བསམ་གཏན་རྩེ་གཅིག་ཉོན་མོངས་མེད། །ཤེས་རབ་ངེས་དོན་གཏན་ལ་འབེབས། །སྙིང་བརྩེའི་སེམས་ཅན་ཐམས་ཅད་ལ། །སྙིང་རྗེ་རོ་གཅིག་བློ་གྲོས་སོ། །སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་གཞན་དོན་འགྲུབ། །བདུན་པོ་འདི་དག་མ་ལུས་པར། །གཅིག་ཅར་ཕ་རོལ་ཕྱིན་པ་ཡིས། །ཡེ་ཤེས་བསམ་གྱིས་མི་ཁྱབ་ཡུལ། །འཇིག་རྟེན་མགོན་པོ་ཉིད་ཐོབ་འགྱུར། །ཇི་ལྟར་ཉན་ཐོས་ཐེག་པ་ལ། །ཉན་ཐོས་ས་ནི་བརྒྱད་བཤད་པ། །དེ་བཞིན་ཐེག་པ་ཆེན་པོ་ལ། །བྱང་ཆུབ་སེམས་དཔའི་ས་བཅུའོ། །དེ་དག་དང་པོར་རབ་དགའ་བ། །ཞེས་སོགས་ས་བཅུ་སོ་སོར་༡༠༧མཚན་ཉིད་རྒྱས་པར་གསུངས་སོ། །ཡང་དེའི་འགྲེལ་པ་མི་ཕམ་བཤེས་གཉེན་གྱིས་མཛད་པ་ལས་ལུང་དྲངས་པ། ལྗོན་ཤིང་རྣམས་ནི་མེ་ཏོག་དག་གིས་བརྒྱན། །ཆར་སྤྲིན་རྣམས་ནི་གློག་གི་ཕྲེང་བ་ཡིས། །མཚོ་རྣམས་བུང་བ་རྒྱགས་ལྡིང་པདྨ་ཡིས། །ལུས་ཅན་ཁྱད་པར་ཐོབ་པའི་ཡོན་ཏན་གྱིས། །ཞེས་བཤད་དོ། །འཕགས་པ་ཀླུ་སྒྲུབ་ཀྱིས་མཛད་པའི་རྨི་ལམ་ཡིད་བཞིན་ནོར་བུའི་གཏམ་ལས། གང་ཞིག་རྟོགས་པའི་ཕྱིར་ན་རྨི་ལམ་མཐར། །བྱང་ཆུབ་སེམས་དཔའ་རྣམས་ནི་རིགས་རྙེད་དེ། །ཕན་ཕྱིར་སེམས་ཅན་དགའ་བ་འགའ་ཞིག་ནི། །སྐྱེ་རྒུ་རྣམས་ལ་འདོམས་པར་བྱེད་པ་ཡིན། །བདག་དང་སེམས་ཅན་ཐམས་ཅད་བདེ་སྡུག་མཚུངས། །བདེ་སྡུག་མཚུངས་པ་ཅན་ནི་གཉེན་ཡིན་ན། །བདག་གིས་དེ་དག་རབ་ཏུ་སྤངས་ནས་ཀྱང་། །མྱ་ངན་འདས་པར་འཇུག་པར་མི་རིགས་སོ། །ཞེས་སོགས་གསུངས་སོ། །དེས་མཛད་པའི་སྦྱིན་པའི་གཏམ་ལས། སྦྱིན་པ་གཏེར་ཆེན་ཕྱི་བཞིན་འབྲང་པ་མིན་ཏེ་ཆོམ་རྐུན་ལ་སོགས་འཕྲོག་མི་ནུས། །སྦྱིན་པ་སེམས་ཀྱི་སེར་སྣ་དང་ནི་ཆགས་པའི་སྐྱོན་གྱི་རྡུལ་རྣམས་འཁྲུ་བར་བྱེད། །སྦྱིན་པ་འཁོར་བའི་ལམ་དང་ངལ་བ་སེལ་བ་ཡིན་ཏེ་བཞོན་པ་བདེ་བླག་ཅན། །སྦྱིན་པ་བདེ་དགུར་སྦྱོར་བ་དུ་མ་དག་གི་སྒོ་བཟང་གཏན་གྱི་མཛའ་བོ་མཆོག །འབྱོར་ཅིང་དག་པ་ཕུན་སུམ་ཚོགས་དང་ཀུན་ཏུ་བཀའ་ཉན་ཡོན་ཏན་རྣམས་དང་ནི། །སུམ་ཅུ་རྩ་གསུམ་ལྷ་ཡུལ་གྲོང་ཁྱེར་ལ་གནས་བྱད་གཟུགས་མཛེས་པའི་ཡོན་ཏན་རྣམས། །ཅི་འདོད་དེ་དག་ཐམས་ཅད་སྦྱིན་པ་དག་གིས་ངེས་པར་ཐོབ་འགྱུར་ཏེ། །དེ་ལྟར་དོན་ནི་ཡོངས་སུ་བརྟགས་པར་གྱུར་ནས་སུ་དག་སྦྱིན་པ་སྦྱིན་མི་བྱེད། །སྦྱིན་པ་མེ་དང་ཆུ་དང་ཆོམ་རྐུན་འཇིགས་པའི་འཁྲུགས་པ་རྣམས་ཀྱིས་བསྐྱོད་མི་ནུས། །སྦྱིན་པ་སྒྲིབ་པ་ཟད་བྱེད་སྲིད་པའི་འགྲོ་བ་ཕྱི་བཞིན་འབྲང་པའི་མཛའ་ཆེན་ཡིན། །སྦྱིན་པ་འགྲོ་བའི་རྒྱུན་གྱིས་ཡུལ་རྣམས་ཀུན་ཏུ་སྲོག་ཆགས་རྣམས་ཀྱི་འཇུག་པ་ཡིན། །སྦྱིན་པ་ཚེ་རབས་བགྲང་བ་དག་ཏུ་ཕྱི་བཞིན་འབྲངས་ཏེ་བ་ཕྱིར་བེའུ་བཞིན། །ནོར་རྣམས་ཀུན་གྱི་སྙིང་པོ་བླང་བ་དབང་ཕྱུག་རྣམས་ཀྱི་གཞི་ནི་སྦྱིན་པ་ཡིན། །ཞེས་སོ། །བློ་ཅན་ལེགས་པར་འདོད་པ་ཡིས། །ལེགས་པར་བསྒྲིམས་ཏེ་སྦྱིན་པ་སྦྱིན། །འཁོར་བར་ཡོངས་སུ་འཁྱམས་པ་ན། །སྦྱིན་པ་མ་གཏོགས་གཉེན་མེད་དོ། །ཞེས་དང་། ཕྲད་པར་གྱུར་པའི་མཐའ་ནི་འབྲལ་བར་འགྱུར། །ཕུན་སུམ་ཚོགས་པའི་མཐའ་ནི་ངན་ཅིང་རྒུད། །ཚེ་འདི་གློག་ལྟར་འགྱུར་ཞིང་འཇིག་ལ་གཡོ། །དེ་ཡི་ཕྱིར་ན་བག་ཡོད་བརྟན་པོར་གྱིས། །འཇིག་རྟེན་འདི་ཀུན་བདེ་བ་མངོན་པར་འདོད། །སྐྱེས་བུ་བདེ་ལ་ལོངས་སྤྱོད་མེད་པར་མིན། །ལོངས་སྤྱོད་སྦྱིན་ལས་བྱུང་བར་མཁྱེན་ནས་ནི། །ཐུབ་པས་དང་པོ་སྦྱིན་པའི་གཏམ་དག་མཛད། །ཅེས་སོ། །ཡང་དེ་ཉིད་ཀྱིས་མཛད་པའི་སྲིད་པ་ལས་འདས་པའི་གཏམ་ལས། །

རྒྱ་གར་སྐད་དུ། བྷཱ་བ་སཾ་ཀྲཱནྟ་པ་རི་ཀ་ཐཱ། བོད་སྐད་དུ། སྲིད་པ་ལས་འདས་པའི་གཏམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དངོས་མེད་དངོས་ལས་མི་སྐྱེ་སྟེ། །དངོས་མེད་ལས་ཀྱང་སྐྱེ་མ་ཡིན། །དངོས་པོ་རྟག་ཏུ་སྐྱེ་བ་སྟེ། །དངོས་འཁྲུལ་ནམ་མཁའི་མེ་ཏོག་བཞིན། །མཁའ་དང་འདྲ་བའི་ཆོས་ཡོད་ན། །གཞན་ནི་མཁའ་དང་འདྲ་བ་སྐྱེ། །བརྟེན་ནས་ཐམས་ཅད་མཁའ་དང་འདྲ། །དེ་ནས་སྲིད་པ་མེད་པ་ཅན། །ངོ་བོ་ཉིད་ཀྱིས་ལས་མེད་ཅིང་། །རྒྱུ་མེད་འབྲས་བུ་ཡོད་མ་ཡིན། །འདི་དག་ཐམས་ཅད་མེད་པ་སྟེ། །འཇིག་རྟེན་པ་མེད་འཇིག་པ་མེད། །མ་སྐྱེས་པ་ཡི་དངོས་པོ་གང་། །ཇི་ལྟར་གཞན་ཞིག་བསྐྱེད་པར་འགྱུར། །འཇིག་རྟེན་དང་པོར་མ་བྱུང་སྟེ། །འགའ་ཞིག་གིས་ཀྱང་སྤྲུལ་པ་མིན། །ཟླ་བ་སེང་གེའི་གྲོང་ཁྱེར་བཞིན། །འཇིག་རྟེན་དོན་མེད་གྱི་ནར་འཁྱམས། །འཇིག་རྟེན་རྣམ་པར་རྟོག་ལས་འབྱུང་། །རྣམ་རྟོག་སེམས་ལས་ཡང་དག་འབྱུང་། །སེམས་ནི་ལུས་ལ་བརྟེན་པ་སྟེ། །དེ་ཕྱིར་ལུས་ནི་རྣམ་དཔྱད་དོ། །གཟུགས་ནི་སྟོང་པ་ཚོར་བ་རང་བཞིན་མེད། །འདུ་ཤེས་མེད་དེ་འདུ་བྱེད་ཡོད་མ་ཡིན། །འབྱུང་བ་སྤངས་ནས་སེམས་དང་སེམས་བྱུང་མེད། །དེ་ཕྱིར་ལུས་ནི་རྟོག་བྲལ་ངོ་བོ་ཡིན། །སེམས་མེད་ཆོས་རྣམས་དེ་དག་མེད། །ལུས་མེད་ཁམས་རྣམས་ཡོད་མ་ཡིན། །གཉིས་སུ་མེད་པའི་ལས་འདི་ནི། །དེ་ཉིད་རིག་པ་རྣམས་ཀྱིས་བསྟན། །འདི་དག་ཐམས་ཅད་དམིགས་མེད་པར། །གཉིས་སུ་མེད་པར་བསྟན་པ་ཡིན། །བློ་ནི་དམིགས་པ་མེད་བྱས་ནས། །དམིགས་པ་མེད་པར་འབྱུང་བར་འགྱུར། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ལ་སོགས་བསྟེན་བྱས་ནས། །ཡུན་མི་རིང་པའི་དུས་ཀྱིས་ནི། །བྱང་ཆུབ་དམ་པ་ཐོབ་པར་འགྱུར། །ཐབས་དང་ཤེས་རབ་ལ་གནས་ཏེ། །སེམས་ཅན་རྣམས་ལ་བརྩེ་བར་བྱ། །མྱུར་བར་ཁོ་ནར་ཐམས་ཅད་མཁྱེན། །ཐོབ་པར་འགྱུར་བ་ཐེ་ཚོམ་མེད། །འདི་དག་ཐམས་ཅད་མིང་ཙམ་སྟེ། །འདུ་ཤེས་ཙམ་ལ་རབ་ཏུ་གནས། །རྗོད་པར་བྱེད་ལས་ཐ་དད་པའི། །བརྗོད་པར་བྱ་བ་ཡོད་མ་ཡིན། །ཆོས་རྣམས་ཐམས་ཅད་མིང་མེད་དེ། །བདག་མེད་པར་ཡང་ཡོངས་སུ་གསལ། །ཡང་དག་མིན་པའི་ཆོས་འདི་དག །རྣམ་པར་རྟོག་པས་ཀུན་ནས་བསླངས། །གང་གིས་སྟོང་པ་ཞེས་བཏགས་པའི། །རྟོག་པ་དེ་ཡང་འདིས་སྟོང་ངོ་། །མིག་གིས་གཟུགས་རྣམས་མཐོང་བར་ནི། །དེ་ཉིད་གསུངས་པས་གང་བཤད་པ། །ལོག་པར་ཞེན་པའི་འཇིག་རྟེན་ལ། །ཀུན་རྫོབ་བདེན་པར་བརྗོད་པ་ཡིན། །གང་དུ་ཚོགས་པར་མཐོང་བ་ནི། །འདྲེན་པས་སྟོན་པར་བྱེད་པ་ཡིན། །བློ་དང་ལྡན་པས་དོན་དམ་གྱི། །ཉེ་བར་བརྟག་པའི་ས་དེ་གསུངས། །མིག་གིས་གཟུགས་ནི་མི་མཐོང་སྟེ། །ཡིད་ཀྱིས་ཆོས་རྣམས་མི་རིག་གོ །འཇིག་རྟེན་པ་ཡི་ཡུལ་མིན་གང་། །འདི་ནི་མཆོག་ཏུ་བདེན་པའོ། །མིག་མེད་གཟུགས་ཀྱང་ཡོད་མིན་ཞིང་། །སྣང་བ་ཡིད་ལ་བྱེད་པ་མེད། །སེམས་ནི་རྨི་ལམ་བཞིན་དུ་འཁྲུལ། །ཐམས་ཅད་ཡོད་མིན་མེད་པའང་མིན། །སྲིད་པ་ལས་འདས་པའི་གཏམ་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།ཁ་ཆེའི་པཎྜི་ཏ་ཤྲཱི་ར་ཐ་དང་། ལོ་ཙཱ་བ་དགེ་སློང་གྲགས་འབྱོར་ཤེས་རབ་ཀྱིས་བསྒྱུར་བའོ།། །། ༈

[edit]

sangs rgyas kyi spyod pa zhes pa'i snyan ngag chen po slob dpon rta dbyangs kyis mdzad pa le'u nyi shu rtsa brgyad pa/ sangs rgyas kyi spyod pa zhes pa'i snyan ngag chen po slob dpon rta dbyangs kyis mdzad pa le'u nyi shu rtsa brgyad pa las/_yul gyi bud shing can ni 'dod chags me yis ni/_/'jig rten skye bo rnam par bsregs par gyur pa la/_/sos ka'i tha ma sprin chen gyi ni char bzhin du/_/'di yi chos kyi char gyis rab tu tshim byed 'gyur/_/zhes dang /_ji ltar sman ni bsnyen par mi byed skyes bu yis/_/sman pa mthong ba las kyang nad ni 'joms min te/_/de bzhin bdag gi ye shes 'di ni ma bsgoms na/_/bdag ni mthong ba las kyang sdug bsngal 'joms ma yin/_/ji ltar 'jig rten dag na skye ba rtogs nas su/_/des ni chad pa'i lta ba rnam par spangs pa ste/_/'jig rten dag na nub par 'gro ba shes nas su/_/rtag pa'i lta ba brtan por skyen par spangs pa'o/_/zhes dang /_dge slong rnams la thugs rje chen po mnga' bas bstan/_/slob dpon bzhin du sgron ma bzhin du don bzhin du/_/bdag 'das tshe na so sor thar pa bsten bya ste/_/khyod kyi ston pa de yin de dbang gis 'gyur bya/_/kho bo gnas pa na yang de tsam nyid smra'o/_/lus dang ngag gi las ni rnam par dag 'dod pas/_/de bzhin 'jig rten tha snyad thams cad 'dor ba dang /_/sa dang srog chag sa bon rdzas la sogs rnams kyis/_/bdag tu 'dzin pa las ni me bzhin ldog pa'o/_/zhes dang /_skye na 'chi dang rga ba dang mnyam 'jigs pa dang /_/mtho ris dag na 'pho ba dang mnyam yod min te/_/zhes dang /_mchog tu mi 'gyur 'pho ba med pa brnyes ldan pa/_/brtse ba dang bcas thub pa blo gros chen po ni/_/mchod 'os mchod la mchog la dam pa 'ongs pa'o/_/zhes sogs gsungs shing 'di nyid snyan ngag tshig sbyor phun sum tshogs pa yod do/__/_!_byang chub sems dpa'i skyes rabs chos kyi gaN+DI dpa' bos mdzad pa las/_gang zhig 'dab gshog rgyas pa yon tan brgya phrag rab mchog yang dag ldan pa'i bdag nyid kyi/_/bya zhig byung gyur ri dwags dgra yis mgrin par rus pa'i dum bu ring po zug pa phyung byas te/_/ri dwags des slad bsad cing za phyir brnyas thob gyur mod de ni nus na'ang khro ma gyur/_/bzod pa'i zhing de'i 'chi med rang bzhin 'bras bu bcas gyur chos kyi gaN+Di'i sgra bsgrags so/_/zhes sogs 'byung /__/_!_ rgyal por gtam bya rin po che'i phreng ba las/_de la mngon mtho bde ba ste/_/nges par legs pa thar par 'dod/_/de ni sgrub pa mdor bsdu na/_/mdor na dad dang shes rab bo/_/zhes dang /_dad can nyid phyir chos la brten/_/shes rab ldan phyir yang dag rig__/'di gnyis gtso bo shes rab ste/_/'di sngon 'gro ba dad pa yin/_/'dun dang zhe sdang 'jigs pa dang /_/rmongs pa gang zhig chos mi 'da'/_/de ni dad pa can zhes bya/_/nges par legs pa'i snod mchog yin/_/zhes dang /_mi gsod pa dang rku spong dang /_/gzhan gyi chung ma spong ba dang /_/log dang phra ma rtsub nyid dang /_/mi 'brel smra ba yang dag sdom/_/chags dang gnod sems med pa la/_/nyid phyir lta ba yongs spong ba/_/'di dag las lam dkar bcu ste/_/bzlog pa dag ni nag po yin/_/chang mi 'thung dang 'tsho ba bzang /_/rnam par mi 'tshe gus sbyin dang /_/mchod 'os mchod dang byams pa ste/_/mdor na chos ni de bzhin no/_/zhes dang /_ji srid phung por 'dzin yod pa/_/de srid de la ngar 'dzin yod/_/ngar 'dzin yod na yang las te/_/de las yang ni skye ba yin/_/zhes dang /_chags dang zhe sdang gti mug dag__/nyes par mkhyen nas yongs su spang /_/ma chags dang ni gti mug med/_/yon tan mkhyen nas gus pas bsten/_/zhes dang /_lha yi phun sum tshogs pas kyang /_/khengs pa nyid du mi bya zhing /_/yi dwags bas kyang dbul ba yi/_/rgud pas kyang ni zhum mi bya/_/zhes dang /_de la byang chub sems dpa' yi/_/yon tan mdor bstan bya ba ni/_/sbyin dang tshul khrims bzod brtson 'grus/_/bsam gtan shes rab snying brtse sogs/_/sbyin pa rang nor yongs btang ba/_/tshul khrims gzhan phan bya ba'o/_/bzod pa khro ba spong pa ste/_/brtson 'grus dge la spro ba nyid/_/bsam gtan rtse gcig nyon mongs med/_/shes rab nges don gtan la 'bebs/_/snying brtse'i sems can thams cad la/_/snying rje ro gcig blo gros so/_/sbyin pas longs spyod khrims kyis bde/_/bzod pas mdangs ldan brtson pas brjid/_/bsam gtan gyis zhi blo yis grol/_/snying brtse bas ni gzhan don 'grub/_/bdun po 'di dag ma lus par/_/gcig car pha rol phyin pa yis/_/ye shes bsam gyis mi khyab yul/_/'jig rten mgon po nyid thob 'gyur/_/ji ltar nyan thos theg pa la/_/nyan thos sa ni brgyad bshad pa/_/de bzhin theg pa chen po la/_/byang chub sems dpa'i sa bcu'o/_/de dag dang por rab dga' ba/_/zhes sogs sa bcu so sor 107mtshan nyid rgyas par gsungs so/_/yang de'i 'grel pa mi pham bshes gnyen gyis mdzad pa las lung drangs pa/_ljon shing rnams ni me tog dag gis brgyan/_/char sprin rnams ni glog gi phreng ba yis/_/mtsho rnams bung ba rgyags lding pad+ma yis/_/lus can khyad par thob pa'i yon tan gyis/_/zhes bshad do/_/'phags pa klu sgrub kyis mdzad pa'i rmi lam yid bzhin nor bu'i gtam las/_gang zhig rtogs pa'i phyir na rmi lam mthar/_/byang chub sems dpa' rnams ni rigs rnyed de/_/phan phyir sems can dga' ba 'ga' zhig ni/_/skye rgu rnams la 'doms par byed pa yin/_/bdag dang sems can thams cad bde sdug mtshungs/_/bde sdug mtshungs pa can ni gnyen yin na/_/bdag gis de dag rab tu spangs nas kyang /_/mya ngan 'das par 'jug par mi rigs so/_/zhes sogs gsungs so/_/des mdzad pa'i sbyin pa'i gtam las/_sbyin pa gter chen phyi bzhin 'brang pa min te chom rkun la sogs 'phrog mi nus/_/sbyin pa sems kyi ser sna dang ni chags pa'i skyon gyi rdul rnams 'khru bar byed/_/sbyin pa 'khor ba'i lam dang ngal ba sel ba yin te bzhon pa bde blag can/_/sbyin pa bde dgur sbyor ba du ma dag gi sgo bzang gtan gyi mdza' bo mchog__/'byor cing dag pa phun sum tshogs dang kun tu bka' nyan yon tan rnams dang ni/_/sum cu rtsa gsum lha yul grong khyer la gnas byad gzugs mdzes pa'i yon tan rnams/_/ci 'dod de dag thams cad sbyin pa dag gis nges par thob 'gyur te/_/de ltar don ni yongs su brtags par gyur nas su dag sbyin pa sbyin mi byed/_/sbyin pa me dang chu dang chom rkun 'jigs pa'i 'khrugs pa rnams kyis bskyod mi nus/_/sbyin pa sgrib pa zad byed srid pa'i 'gro ba phyi bzhin 'brang pa'i mdza' chen yin/_/sbyin pa 'gro ba'i rgyun gyis yul rnams kun tu srog chags rnams kyi 'jug pa yin/_/sbyin pa tshe rabs bgrang ba dag tu phyi bzhin 'brangs te ba phyir be'u bzhin/_/nor rnams kun gyi snying po blang ba dbang phyug rnams kyi gzhi ni sbyin pa yin/_/zhes so/_/blo can legs par 'dod pa yis/_/legs par bsgrims te sbyin pa sbyin/_/'khor bar yongs su 'khyams pa na/_/sbyin pa ma gtogs gnyen med do/_/zhes dang /_phrad par gyur pa'i mtha' ni 'bral bar 'gyur/_/phun sum tshogs pa'i mtha' ni ngan cing rgud/_/tshe 'di glog ltar 'gyur zhing 'jig la g.yo/_/de yi phyir na bag yod brtan por gyis/_/'jig rten 'di kun bde ba mngon par 'dod/_/skyes bu bde la longs spyod med par min/_/longs spyod sbyin las byung bar mkhyen nas ni/_/thub pas dang po sbyin pa'i gtam dag mdzad/_/ces so/_/yang de nyid kyis mdzad pa'i srid pa las 'das pa'i gtam las/_/ rgya gar skad du/_b+hA ba saM krAn+ta pa ri ka thA/_bod skad du/_srid pa las 'das pa'i gtam/_'jam dpal gzhon nur gyur pa la phyag 'tshal lo/_/dngos med dngos las mi skye ste/_/dngos med las kyang skye ma yin/_/dngos po rtag tu skye ba ste/_/dngos 'khrul nam mkha'i me tog bzhin/_/mkha' dang 'dra ba'i chos yod na/_/gzhan ni mkha' dang 'dra ba skye/_/brten nas thams cad mkha' dang 'dra/_/de nas srid pa med pa can/_/ngo bo nyid kyis las med cing /_/rgyu med 'bras bu yod ma yin/_/'di dag thams cad med pa ste/_/'jig rten pa med 'jig pa med/_/ma skyes pa yi dngos po gang /_/ji ltar gzhan zhig bskyed par 'gyur/_/'jig rten dang por ma byung ste/_/'ga' zhig gis kyang sprul pa min/_/zla ba seng ge'i grong khyer bzhin/_/'jig rten don med gyi nar 'khyams/_/'jig rten rnam par rtog las 'byung /_/rnam rtog sems las yang dag 'byung /_/sems ni lus la brten pa ste/_/de phyir lus ni rnam dpyad do/_/gzugs ni stong pa tshor ba rang bzhin med/_/'du shes med de 'du byed yod ma yin/_/'byung ba spangs nas sems dang sems byung med/_/de phyir lus ni rtog bral ngo bo yin/_/sems med chos rnams de dag med/_/lus med khams rnams yod ma yin/_/gnyis su med pa'i las 'di ni/_/de nyid rig pa rnams kyis bstan/_/'di dag thams cad dmigs med par/_/gnyis su med par bstan pa yin/_/blo ni dmigs pa med byas nas/_/dmigs pa med par 'byung bar 'gyur/_/sbyin dang tshul khrims bzod brtson 'grus/_/bsam gtan la sogs bsten byas nas/_/yun mi ring pa'i dus kyis ni/_/byang chub dam pa thob par 'gyur/_/thabs dang shes rab la gnas te/_/sems can rnams la brtse bar bya/_/myur bar kho nar thams cad mkhyen/_/thob par 'gyur ba the tshom med/_/'di dag thams cad ming tsam ste/_/'du shes tsam la rab tu gnas/_/rjod par byed las tha dad pa'i/_/brjod par bya ba yod ma yin/_/chos rnams thams cad ming med de/_/bdag med par yang yongs su gsal/_/yang dag min pa'i chos 'di dag__/rnam par rtog pas kun nas bslangs/_/gang gis stong pa zhes btags pa'i/_/rtog pa de yang 'dis stong ngo /_/mig gis gzugs rnams mthong bar ni/_/de nyid gsungs pas gang bshad pa/_/log par zhen pa'i 'jig rten la/_/kun rdzob bden par brjod pa yin/_/gang du tshogs par mthong ba ni/_/'dren pas ston par byed pa yin/_/blo dang ldan pas don dam gyi/_/nye bar brtag pa'i sa de gsungs/_/mig gis gzugs ni mi mthong ste/_/yid kyis chos rnams mi rig go__/'jig rten pa yi yul min gang /_/'di ni mchog tu bden pa'o/_/mig med gzugs kyang yod min zhing /_/snang ba yid la byed pa med/_/sems ni rmi lam bzhin du 'khrul/_/thams cad yod min med pa'ang min/_/srid pa las 'das pa'i gtam 'phags pa klu sgrub kyis mdzad pa rdzogs so//_//kha che'i paN+Di ta shrI ra tha dang /_lo tsA ba dge slong grags 'byor shes rab kyis bsgyur ba'o//___//_!_