JKW-KABUM-21-ZHA-001-036

🚧 This website is under continued development. We appreciate your patience!

Previous Text Back to Volume PageNext Text

རྡོ་རྗེའི་ཆོས་སྐྱོང་རྣམས་ཀྱི་སྐོང་གསོ་ཉུང་ངུར་བསྡུས་པ་འདོད་རྒུའི་ཆར་འབེབས།

Wylie title	rdo rje'i chos skyong rnams kyi skong gso nyung ngur bsdus pa 'dod rgu'i char 'bebs
Location	mkhyen brtse'i bka' 'bum Volume 21, sde tshan 1, Text 35, Pages 94-100 (Folios 47b6 to 50b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	རིན་ཆེན་རྣམ་རྒྱལ་ (rin chen rnam rgyal)
Citation	'jam dbyangs mkhyen brtse'i dbang po. rdo rje'i chos skyong rnams kyi skong gso nyung ngur bsdus pa 'dod rgu'i char 'bebs. In 'jam dbyangs mkhyen brtse'i dbang po'i bka' 'bum, Vol. 21: 94-100. Khams sde dge rdzong sar dgon: Rdzong sar blo gros phun tshogs, 2020.
Genre	Regular Propitiation Texts - bskang gso
Colophon	།ཞེས་པ་འདིའང་དད་ལྡན་དཀོན་མཆོག་རྒྱ་མཚོས་བསྐུལ་ངོར་འགྱུར་མེད་རིན་ཆེན་རྣམ་རྒྱལ་གྱིས་བྲིས་པའོ། །སླར་ཡང་གོང་འོག་གི་མཛེས་རྒྱན་དང་བཅས་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བསྡེབས་པ་དགེ་ལེགས་འཕེལ།
	zhes pa 'di'ang dad ldan dkon mchog rgya mtshos bskul ngor 'gyur med rin chen rnam rgyal gyis bris pa'o/__/slar yang gong 'og gi mdzes rgyan dang bcas bklags pas grub par mtsho skyes bla ma dgyes pa'i 'bangs mkhyen brtse'i dbang pos bsdebs pa dge legs 'phel/

1 Texts in this Section (sde tshan or chos tshan)

36 94-100	རྡོ་རྗེའི་ཆོས་སྐྱོང་རྣམས་ཀྱི་སྐོང་གསོ་ཉུང་ངུར་བསྡུས་པ་འདོད་རྒུའི་ཆར་འབེབས། rdo rje'i chos skyong rnams kyi skong gso nyung ngur bsdus pa 'dod rgu'i char 'bebs Regular Propitiation Texts - bskang gso	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །རྡོ་རྗེའི་ཆོས་སྐྱོང་རྣམས་ཀྱི་སྐོང་གསོ་ཉུང་ངུར་བསྡུས་པ་འདོད་རྒུའི་ཆར་འབེབས་ཞེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། །བསྟན་པ་སྲུང་བའི་རྡོ་རྗེའི་ཆོས་སྐྱོང་རྣམས་ལ་སྐོང་བཤགས་ཀྱི་ཆོ་ག་མདོར་བསྡུས་སུ་བྱ་བའི་ཚུལ་ནི། ཡིད་དང་མཐུན་པའི་གནས་སུ་མཆོད་གཏོར་དང་། སྐོང་གཏོར་སོགས་རྒྱས་པར་འདུ་བྱ་བའམ། དེ་ཙམ་མ་ལྕོགས་ན་མཆོད་གཏོར་དམ་ཅན་སྤྱིའི་གཏོར་ཆོག་གི་སྐབས་ལྟར་དང་། དེའི་མདུན་དུ་སྐོང་གཏོར་རིན་ཆེན་འབར་བ་སྨན་རཀ་འབུལ་གཏོར་བཅས་ཕྱག་ལེན་བཞིན་བཤམ། བདག་གི་རྣལ་འབྱོར་གང་རིགས་སྔོན་དུ་འགྲོ་བས་གཏོར་མ་བྱིན་རླབས་ནས་བཟུང་བསྟོད་པའི་བར་དམ་ཅན་སྤྱི་གཏོར་གྱི་ཆོ་ག་ཇི་ལྟ་བ་བཞིན་ལ། རྗེས་འབྲང་བྱེ་བྲག་པ་གཏོང་ན་སྐབས་འདིར་བྱ། དེ་ནས་གཏོར་བདག་དང་། གཞི་བདག་ལ་གཏོར་མ་ཕུལ། བཟླས་པ་བྱེད་ན། མགོན་པོ་ལྕམ་དྲལ་འཁོར་བཅས་ཀྱི་ཐུགས་ཀར་ཉི་མ་ལ་གནས་པའི་ཧཱུྃ་ཡིག་ལ་སོགས་པའི་མཐར་རང་རང་གི་སྲོག་སྔགས་རིགས་ཀྱི་ཁ་དོག་ཅན་གྱིས་བསྐོར་བ་ལ་བདག་བསྐྱེད་ཀྱི་ཐུགས་ཀའི་ས་བོན་ལས་བྱུང་བའི་འོད་ཟེར་འཕོག་པས་ཐུགས་ཀྱི་རྒྱུད་རབ་ཏུ་བསྐུལ་བས་ཅི་འདོད་པའི་ཕྲིན་ལས་རབ་འབྱམས་ཐོགས་མེད་དུ་སྒྲུབ་པར་མོས་ལ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། བཛྲ་ཧེ་རུ་ཀ་ཏྭ་ནོ་པ་སོགས་ནས། ཧེ་རུ་ཀ་མཱ་མེ་མུཉྩ། ཧེ་རུ་ཀོ་བྷ་ཝ་མ་ཧཱ་ས་མ་ཡ་སཏྭ་ཨཱཿཧཱུྃ་ཕཊ། །ཅེས་ཧེ་རུ་ཀའི་ཡིག་བརྒྱ་དང་། བདག་བསྐྱེད་ཀྱི་བསྙེན་པ་ཅི་རིགས་གོང་གནོན་གྱི་ཚུལ་དུ་བཟླས་པ་སྔོན་དུ་འགྲོ་བས། ཨོཾ་བྷཱུ་རུ་ཀུ་རུ་ཨི་ཙི་ཀི་བི་ཨུ་ཙུཥྨ་ཀྲོ་དྷ་ཧཱུྃ་ཕཊ། ཅེས་སོགས་སོ་སོའི་སྔགས་གཏོར་གྱི་སྐབས་ནས་འབྱུང་བ་བཞིན་དང་ཐུན་མོང་དུ་ཤཱ་ས་ན་ཅི་ནུས་བཟླ། སྤྲོ་ན་མཆོད་བསྟོད་ཀྱང་བྱ། ཚོགས་ཡོད་ན་སྐབས་འདིར་ཡི་དམ་གྱི་ལས་གཞུང་ལྟར་བྱིན་རླབས་ནས་བསྒྲལ་བསྟབ་བར་དང་རྩ་གསུམ་སྐོང་གསོ་སོགས་ཀྱང་གཏོང་ན་འདིར་བྱ། དེ་ནས་སྐོང་རྫས་རྣམས་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲཱུྃ་ལས་གནས་ཁང་དུར་ཁྲོད་དྲག་པོའི་ཞིང་ཁམས་བསམ་གྱིས་མི་ཁྱབ་པར་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་སྐོང་རྫས་ལ་སོགས་པ་ཐམས་ཅད་སྲིད་ཞིའི་འདོད་ཡོན་གྱི་རྣམ་པ་མཁོ་རྒུ་ཚང་བ། བཟང་རྒུས་འབྱོར་པ། མཛེས་རྒུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་བདེ་བའི་རྣམ་པ་ཐམས་ཅད་པར་འཆར་བས་ནམ་མཁའི་ཁམས་གང་བར་གྱུར། ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ལན་གསུམ་དང་། བཛྲ་སྥ་ར་ཎ་ཁཾ་ཞེས་པས་བྱིན་གྱིས་བརླབས་ཤིང་ཟད་མི་ཤེས་པར་སྤེལ་ལ། ཧཱུྃ། རྒྱལ་བ་ཡོངས་ཀྱི་བཀའ་སྡོད་དཔའ་བོ་ཆེ། །མ་ལུས་བདུད་སྡེའི་ངོ་ན་རབ་ཁྲོས་པ། །རྒྱུད་གསུམ་དམ་ཅན་རྒྱ་མཚོའི་ཚོགས་རྣམས་ཀུན། །ཐུགས་དམ་གཉེན་པོ་བསྐང་ཕྱིར་འདིར་གཤེགས་ཤིག །རབ་འབྱམས་ནམ་མཁའི་ཁྱོན་རྣམས་ཡོངས་གང་བའི། །རྣམ་རོལ་འགག་མེད་ཕྱི་ནང་མཆོད་པའི་སྤྲིན། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །བཞེད་རྒུའི་འབྱོར་པ་རྒྱ་མཚོས་ཐུགས་དམ་བསྐང་། །ཁྲག་ཞག་ཨརྒྷཾ་དབང་པོའི་མེ་ཏོག་བཞད། །གསུར་ཆེན་བདུག་སྤོས་ཞུན་ཆེན་སྣང་གསལ་སྤར། །མཁྲིས་པའི་དྲི་ཆབ་ཤ་སྣའི་ཞལ་ཟས་མཛེས། །སྙན་བརྗིད་རོལ་མོའི་སྒྲ་ཡིས་ཐུགས་དམ་བསྐང་། །རྩ་བརྒྱད་སྟོང་ལ་སྦྱར་བའི་ཨ་མྲྀ་ཏ། །དགྲ་བགེགས་སྙིང་ཁྲག་ལྦུ་ཕྲེང་རཀྟའི་མཚོ། །འདོད་ཡོན་བཟའ་བཅའ་གཏོར་མ་དམ་རྫས་ཚོགས། །དཔག་ཡས་ནམ་མཁའ་གང་བས་ཐུགས་དམ་བསྐང་། །མིག་སྨན་མདངས་ལྡན་རྟ་མཆོག་སྒ་སྲབ་ཅན། །བརྗིད་པའི་གཡག་རྒོད་ལུག་ནག་རོག་པོའི་ར། །དཔའ་གཏུམ་ཁྱི་སོགས་ཕྱི་ཡི་རྟེན་རྣམས་ཀུན། །སྣ་ཚོགས་རྒྱན་གྱིས་སྤྲས་པས་ཐུགས་དམ་བསྐང་། །རྔམས་བརྗིད་ཐོད་མཁར་དྲག་པོའི་གཞལ་མེད་ཁང་། །འབོད་པའི་གཡབ་དར་དུར་ཁྲོད་དྲག་པོའི་ཆས། །རྣམ་བཀྲའི་དར་སྣས་མཚོན་པའི་བྱ་རྒོད་མདའ། །མཐུན་པའི་དམ་རྫས་ཚོགས་ཀྱིས་ཐུགས་དམ་བསྐང་། །སྐུ་གཟུགས་གླེགས་བམ་བིང་སོགས་ཕྱག་མཚན་དང་། །སྣ་ཚོགས་དཀོར་ནོར་གཟུགས་རྟེན་བླ་རྡོའི་ཆས། །རི་རབ་གླིང་བཞི་གླིང་ཕྲན་རྟགས་རྫས་བདུན། །སྲ་བརྟན་དཔའ་བོའི་ཆས་ཀྱིས་ཐུགས་དམ་བསྐང་། །སྐུ་ཡི་ཕྱག་རྒྱ་གཡོ་མེད་གསལ་ཞིང་བརྟན། །རླུང་སྔགས་བཟླས་པས་ཐུགས་དམ་རྒྱུད་བསྐུལ་ཞིང་། །སེམས་ཉིད་རང་ངོ་ཤེས་པའི་རྣལ་འབྱོར་སོགས། །བསྐྱེད་དང་རྫོགས་པའི་ལམ་གྱིས་ཐུགས་དམ་བསྐང་། །དེ་ལྟར་ཐུགས་དམ་གཉེན་པོ་བསྐངས་པའི་མཐུས། །མཆོག་ཐུན་དངོས་གྲུབ་མ་ལུས་སྩོལ་བ་དང་། །ཐུབ་བསྟན་སྤྱི་དང་བྱེ་བྲག་གསང་ཆེན་གྱི། །རིངས་ལུགས་འཕེལ་ཞིང་རྒྱས་པའི་ཕྲིན་ལས་མཛོད། །ཅེས་ཐུགས་དམ་བསྐང་། བཤགས་པ་ནི་ཐལ་མོ་སྦྱར་ཏེ། ཧོཿ རང་བཞིན་ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེའི་དབང་གིས་འབར་བའི་སྐུར་བཞེངས་པ། །རྒྱལ་བའི་བསྟན་སྲུང་དམ་ཅན་རྒྱ་མཚོའི་ཚོགས། །འཁོར་བཅས་བདག་ལ་གསན་ཅིང་དགོངས་སུ་གསོལ། །བདག་ཅག་བླུན་རྨོངས་མ་རིག་འཁྲུལ་པའི་ཡིད། །ལས་དང་ཉོན་མོངས་བག་ཆགས་ཀྱིས་དཀྲུགས་པས། །ལྷ་ཁྱོད་བསྙེན་ཅིང་བསྒྲུབ་པར་དམ་བཅས་ཀྱང་། །སྐུ་ཡི་ཕྱག་རྒྱ་མ་གསལ་དོན་མ་རྟོགས། །སྔགས་ཀྱི་བཟླས་བརྗོད་མ་དག་ལྷག་ཆད་འཁྲུགས། །ཐུགས་ཀྱི་ཏིང་འཛིན་བྱིང་རྒོད་རྟོགས་པས་བསླད། །དམ་རྫས་མ་ཚང་རྟེན་རྫས་མ་ཚོགས་དང་། །རྒྱུ་ཆུང་ཕུད་ཉམས་འབགས་བཙོག་དྲི་མས་གོས། །དུས་ཀྱི་མཆོད་གཏོར་འགྱངས་ཤིང་ཆགས་པ་དང་། །བསྙེན་སྒྲུབ་གཡེལ་ཞིང་ལས་སྦྱོར་ལོག་པ་སོགས། །རྩ་བ་ཡན་ལག་དམ་ཚིག་ཉམས་པ་ཀུན། །རབ་གནོང་འགྱོད་པའི་སེམས་ཀྱིས་མཐོལ་ལོ་བཤགས། །མཐོལ་བཤགས་བཟོད་པ་དང་དུ་བཞེས་ནས་ཀྱང་། །ཉམས་ཆག་སྒྲིབ་པའི་ཚོགས་རྣམས་ཀུན་བྱང་སྟེ། །འགྱུར་མེད་ཚངས་པ་མཆོག་གི་དངོས་གྲུབ་སྩོལ། །ཞེས་དང་། ཡི་གེ་བརྒྱ་པ་ལན་གསུམ་སོགས་ཀྱིས་ཐུགས་དམ་མ་བསྐང་པ་རྣམས་བཤགས་པར་བྱའོ། །སྐབས་འདིར་གཞན་ལས་འདོད་པའི་དོན་ལ་ཕྲིན་ལས་གསོལ་བ་གསུངས་ནའང་གོང་དུ་སྐོང་བའི་སྐབས་དོན་གྱིས་ཚང་ཞིང་། གཏོར་མ་སྟོབ་པའང་ཚང་བས། ཚོགས་ཡོད་ན་རོལ་ཞིང་སྨོན་ལམ་གདབ། ལྷག་མ་བཏང་། ཡི་དམ་གྱི་སྐུལ་པ་ཡོད་ནའང་བྱས་ནས་གཏོར་འབུལ་མན་དམ་ཅན་སྤྱི་གཏོར་བཞིན་བགྱིས་པས་དོན་གྲུབ་པ་ཡིན་ནོ། །ཞེས་པ་འདིའང་དད་ལྡན་དཀོན་མཆོག་རྒྱ་མཚོས་བསྐུལ་ངོར་འགྱུར་མེད་རིན་ཆེན་རྣམ་རྒྱལ་གྱིས་བྲིས་པའོ། །སླར་ཡང་གོང་འོག་གི་མཛེས་རྒྱན་དང་བཅས་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བསྡེབས་པ་དགེ་ལེགས་འཕེལ། ། ༈

[edit]

rdo rje'i chos skyong rnams kyi skong gso nyung ngur bsdus pa 'dod rgu'i char 'bebs/ @#/_/rdo rje'i chos skyong rnams kyi skong gso nyung ngur bsdus pa 'dod rgu'i char 'bebs zhes bya ba bzhugs so/__/oM swasti sid+d+haM/__/bstan pa srung ba'i rdo rje'i chos skyong rnams la skong bshags kyi cho ga mdor bsdus su bya ba'i tshul ni/__yid dang mthun pa'i gnas su mchod gtor dang /__skong gtor sogs rgyas par 'du bya ba'am/__de tsam ma lcogs na mchod gtor dam can spyi'i gtor chog gi skabs ltar dang /__de'i mdun du skong gtor rin chen 'bar ba sman raka 'bul gtor bcas phyag len bzhin bsham/__bdag gi rnal 'byor gang rigs sngon du 'gro bas gtor ma byin rlabs nas bzung bstod pa'i bar dam can spyi gtor gyi cho ga ji lta ba bzhin la/__rjes 'brang bye brag pa gtong na skabs 'dir bya/__de nas gtor bdag dang /__gzhi bdag la gtor ma phul/__bzlas pa byed na/__mgon po lcam dral 'khor bcas kyi thugs kar nyi ma la gnas pa'i hU~M yig la sogs pa'i mthar rang rang gi srog sngags rigs kyi kha dog can gyis bskor ba la bdag bskyed kyi thugs ka'i sa bon las byung ba'i 'od zer 'phog pas thugs kyi rgyud rab tu bskul bas ci 'dod pa'i phrin las rab 'byams thogs med du sgrub par mos la/__oM badz+ra he ru ka sa ma ya/__ma nu pA la ya/__badz+ra he ru ka twa no pa sogs nas/__he ru ka mA me muny+tsa/__he ru ko b+ha wa ma hA sa ma ya satwa AHhU~M phaT/__/ces he ru ka'i yig brgya dang /__bdag bskyed kyi bsnyen pa ci rigs gong gnon gyi tshul du bzlas pa sngon du 'gro bas/__oM b+hU ru ku ru i tsi ki bi u tsuSh+ma kro d+ha hU~M phaT/__ces sogs so so'i sngags gtor gyi skabs nas 'byung ba bzhin dang thun mong du shA sa na ci nus bzla/__spro na mchod bstod kyang bya/__tshogs yod na skabs 'dir yi dam gyi las gzhung ltar byin rlabs nas bsgral bstab bar dang rtsa gsum skong gso sogs kyang gtong na 'dir bya/__de nas skong rdzas rnams a mr-i tas bsang /__swa b+hA was sbyang /__stong pa'i ngang las b+h+rU~M las gnas khang dur khrod drag po'i zhing khams bsam gyis mi khyab par phyi nang gsang ba'i mchod pa spyan gzigs mthun rdzas rten rdzas skong rdzas la sogs pa thams cad srid zhi'i 'dod yon gyi rnam pa mkho rgu tshang ba/__bzang rgus 'byor pa/__mdzes rgus brgyan pa/__ngo bo ye shes sgyu ma'i rang bzhin bde ba'i rnam pa thams cad par 'char bas nam mkha'i khams gang bar gyur/__na mas+sarba ta thA ga te b+h+yo bi shwa mu khe b+h+yaHsarba thA khaM ut+ga te s+pha ra Na hi maM ga ga na khaM swA hA/__lan gsum dang /__badz+ra s+pha ra Na khaM zhes pas byin gyis brlabs shing zad mi shes par spel la/__hU~M/__rgyal ba yongs kyi bka' sdod dpa' bo che/__/ma lus bdud sde'i ngo na rab khros pa/__/rgyud gsum dam can rgya mtsho'i tshogs rnams kun/__/thugs dam gnyen po bskang phyir 'dir gshegs shig__/rab 'byams nam mkha'i khyon rnams yongs gang ba'i/__/rnam rol 'gag med phyi nang mchod pa'i sprin/__/dngos su 'byor dang yid kyis rnam sprul pa'i/__/bzhed rgu'i 'byor pa rgya mtshos thugs dam bskang /__/khrag zhag ar+g+haM dbang po'i me tog bzhad/__/gsur chen bdug spos zhun chen snang gsal spar/__/mkhris pa'i dri chab sha sna'i zhal zas mdzes/__/snyan brjid rol mo'i sgra yis thugs dam bskang /__/rtsa brgyad stong la sbyar ba'i a mr-i ta/__/dgra bgegs snying khrag lbu phreng rak+ta'i mtsho/__/'dod yon bza' bca' gtor ma dam rdzas tshogs/__/dpag yas nam mkha' gang bas thugs dam bskang /__/mig sman mdangs ldan rta mchog sga srab can/__/brjid pa'i g.yag rgod lug nag rog po'i ra/__/dpa' gtum khyi sogs phyi yi rten rnams kun/__/sna tshogs rgyan gyis spras pas thugs dam bskang /__/rngams brjid thod mkhar drag po'i gzhal med khang /__/'bod pa'i g.yab dar dur khrod drag po'i chas/__/rnam bkra'i dar snas mtshon pa'i bya rgod mda'/__/mthun pa'i dam rdzas tshogs kyis thugs dam bskang /__/sku gzugs glegs bam bing sogs phyag mtshan dang /__/sna tshogs dkor nor gzugs rten bla rdo'i chas/__/ri rab gling bzhi gling phran rtags rdzas bdun/__/sra brtan dpa' bo'i chas kyis thugs dam bskang /__/sku yi phyag rgya g.yo med gsal zhing brtan/__/rlung sngags bzlas pas thugs dam rgyud bskul zhing /__/sems nyid rang ngo shes pa'i rnal 'byor sogs/__/bskyed dang rdzogs pa'i lam gyis thugs dam bskang /__/de ltar thugs dam gnyen po bskangs pa'i mthus/___/mchog thun dngos grub ma lus stsol ba dang /__/thub bstan spyi dang bye brag gsang chen gyi/__/rings lugs 'phel zhing rgyas pa'i phrin las mdzod/__/ces thugs dam bskang /__bshags pa ni thal mo sbyar te/__hoH__rang bzhin chos kyi dbyings las ma g.yos kyang /__/thugs rje'i dbang gis 'bar ba'i skur bzhengs pa/__/rgyal ba'i bstan srung dam can rgya mtsho'i tshogs/__/'khor bcas bdag la gsan cing dgongs su gsol/__/bdag cag blun rmongs ma rig 'khrul pa'i yid/__/las dang nyon mongs bag chags kyis dkrugs pas/__/lha khyod bsnyen cing bsgrub par dam bcas kyang /__/sku yi phyag rgya ma gsal don ma rtogs/__/sngags kyi bzlas brjod ma dag lhag chad 'khrugs/__/thugs kyi ting 'dzin bying rgod rtogs pas bslad/__/dam rdzas ma tshang rten rdzas ma tshogs dang /__/rgyu chung phud nyams 'bags btsog dri mas gos/__/dus kyi mchod gtor 'gyangs shing chags pa dang /__/bsnyen sgrub g.yel zhing las sbyor log pa sogs/__/rtsa ba yan lag dam tshig nyams pa kun/__/rab gnong 'gyod pa'i sems kyis mthol lo bshags/__/mthol bshags bzod pa dang du bzhes nas kyang /__/nyams chag sgrib pa'i tshogs rnams kun byang ste/__/'gyur med tshangs pa mchog gi dngos grub stsol/__/zhes dang /__yi ge brgya pa lan gsum sogs kyis thugs dam ma bskang pa rnams bshags par bya'o/__/skabs 'dir gzhan las 'dod pa'i don la phrin las gsol ba gsungs na'ang gong du skong ba'i skabs don gyis tshang zhing /__gtor ma stob pa'ang tshang bas/__tshogs yod na rol zhing smon lam gdab/__lhag ma btang /__yi dam gyi skul pa yod na'ang byas nas gtor 'bul man dam can spyi gtor bzhin bgyis pas don grub pa yin no/__/zhes pa 'di'ang dad ldan dkon mchog rgya mtshos bskul ngor 'gyur med rin chen rnam rgyal gyis bris pa'o/__/slar yang gong 'og gi mdzes rgyan dang bcas bklags pas grub par mtsho skyes bla ma dgyes pa'i 'bangs mkhyen brtse'i dbang pos bsdebs pa dge legs 'phel/___/___!