JKW-KABUM-21-ZHA-001-013

🚧 This website is under continued development. We appreciate your patience!

First text in section.Some use of "" in your query was not closed by a matching "".Some use of "" in your query was not closed by a matching "".Last text in section.Some use of "" in your query was not closed by a matching "".

Wylie title
Location	[[ ]] Volume 21, sde tshan 1, Text 13, Pages (Folios to )
Author	[[ | ]]
Less details More details
Citation
Genre	Some use of "" in your query was not closed by a matching "".

Tibetan Text

Wylie

[edit]

ཁྱིམ་ལྷ་བསྟོད་པ་བཞུགས་སོ། །བླ་མ་ཡི་དམ་མཁའ་འགྲོའི་ཚོགས་ལ་ཕྱག་འཚལ་ལོ། །ཁྱིམ་ལྷའམ་ཕུག་ལྷ་བསྟོད་པ་ནི། ཁྱིམ་ཕུག་གི་ཀ་བ་ལ་མར་དཀར་ཐིག་ལེ་དང་། ཤིང་རྩི་བཟང་པོ་གསར་པ་སྣ་ཚོགས་བལ་ཚོན་གྱིས་བརྒྱན་པ་བཅིང་། དེའི་མདུན་དུ་བདུད་རྩི་ཅན་གྱི་ཤིང་སྣ་ལ་མེ་སྦར། ཕྱེ་མར་འོ་བསྐོལ་འབྲུ་སྣ་སོགས་བསང་རྫས་སྣ་ཚོགས་སྦྱར་བ་ལ་ཆབ་བྲན། ཐོག་མར་ཁྲུས་གསོལ་བ་ནི། ཆུ་གཙང་ལ་རྣམ་འཇོམས་སྨེ་བརྩེགས་སོགས་ཀྱི་གཟུངས་རིང་ཐུང་གང་ཤེས་བཟླས་པས་བྱིན་གྱིས་བརླབས་པ་ཤུག་གུ་རྟིང་དཀར་གྱིས་འཐོར་ལ། ཀྱཻ། ཤར་ལྷོ་ནུབ་བྱང་ཕྱོགས་བཞི་ནས། །སྟག་སྐྱ་འབྲུག་སྔོན་བྱ་དམར་པོ། །རུ་སྦལ་རྒྱ་པོའི་ཞལ་གྱི་ཆབ། །ཡེ་ཤེས་བདུད་རྩིར་བྱིན་བརླབས་པས། །ཕུག་གི་ལྷ་ལ་སྐུ་ཁྲུས་གསོལ། །མི་གཙང་དྲི་མ་དག་གྱུར་ཅིག །འགོ་བའི་ལྷ་ལ་སྐུ་ཁྲུས་གསོལ། །མི་གཙང་དྲི་མ་དག་གྱུར་ཅིག །ཕ་ཚན་ལྷ་ལ་སྐུ་ཁྲུས་གསོལ། །མི་གཙང་དྲི་མ་དག༴ དགྲ་ལྷ་རྣམས་ལ༴ མི་གཙང་དྲི་མ༴ ཁྱིམ་ལྷ་རྣམས་ལ༴ མི་གཙང་དྲི་མ༴ ཐབ་ལྷ་རྣམས་ལ༴ མི་གཙང་དྲི་མ༴ སྟེང་གི་ལྷ་དང་འོག་གི་ཀླུ། །བར་གྱི་གཉན་ལ་སྐུ་ཁྲུས་གསོལ། །མི་གཙང་དྲི་མ་དག་གྱུར་ཅིག །ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡཱ་ཤྲཱི་ཡེ་ཧཱུྃ། ཞེས་དང་། གཞན་ཡང་རྣམ་འཇོམས་སྨེ་བརྩེགས་སོགས་ཁྲུས་སྔགས་གང་ཤེས་བརྗོད། དེ་ནས་དངོས་གཞི་ནི། རྃ་ཡྃ་ཁྃ། སྟོང་པའི་ངང་ལས་བྷྲཱུྃ་ཡིག་ལས། །བྱུང་བའི་རིན་ཆེན་སྣོད་ཡངས་སུ། །ཡི་གེ་དྲུག་གིས་བྱིན་བརླབས་པས། །བསང་མཆོད་འདོད་ཡོན་གཏེར་དུ་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ ཀྱཻ། །བཀྲ་ཤིས་དགེ་བའི་ལྷ་ཁྱིམ་འདིར། །བདུད་རྩི་ཅན་གྱི་ཤིང་སྣ་ལ། །དག་ཅིང་གཙང་བའི་མེ་སྦར་ཏེ། །བཟའ་བཏུང་རིན་ཆེན་འབྲུ་སྨན་བྲན། །ཏིང་འཛིན་སྔགས་ཀྱིས་བྱིན་བརླབས་པའི། །བསང་མཆོད་འདོད་ཡོན་རྒྱ་མཚོ་འདིས། །མཆོད་སྦྱིན་མགྲོན་དུ་གྱུར་པ་ཀུན། །ཐུགས་དམ་བསྐང་ཞིང་ཉམས་ཆགས་བཤགས། །དཀོན་མཆོག་སྲིད་ཞུའི་མགྲོན་རྣམས་ལ། །བདུད་རྩི་བསང་གི་མཆོད་པ་འབུལ། །གུས་པས་བསྟོད་ཅིང་ཕྱག་ཀྱང་འཚལ། །ལྷ་ཁྱིམ་འདི་ལ་བྱིན་གྱིས་རློབས། །དཔལ་མགོན་ཡོན་ཏན་མགྲོན་རྣམས་ལ། །བདུད་རྩི་བསང་གི༴ གུས་པས་བསྟོད་ཅིང་༴ ལྷ་ཁྱིམ་འདི་ལ་ཁ་འཛིན་མཛོད། །བགེགས་རིགས་ལན་ཆགས་མགྲོན་རྣམས་ལ། །བདུད་རྩི་བསང་གིས་འདོད་ཡོན་སྦྱིན། །ལྷ་ཁྱིམ་འདི་ལ་གནོད་འཚེ་སྤོངས། །ཞི་དང་བཀྲ་ཤིས་བདེ་ལེགས་མཛོད། །རིགས་དྲུག་སྙིང་རྗེའི་མགྲོན་རྣམས་ལ། །བདུད་རྩི་བསང་གི་དགའ་སྟོན་སྤེལ། །ལྷ་ཁྱིམ་འདི་ལ་དགའ་བར་མཛོད། །ཕན་བདེ་བྱང་ཆུབ་སེམས་མཆོག་བསྐྱེད། ཀྱཻ། ཁྱད་པར་ལྷ་ཁྱིམ་འདི་ཡི་བདག །ཁྱིམ་ལྷ་གེལ་ཐུང་བྱ་བ་ནི། །སྐུ་མདོག་གསེར་གྱི་མདངས་དང་ལྡན། །གཡུ་ཡི་རྒྱན་ཆ་སི་ལི་ལི། །དར་གྱི་ན་བཟའ་ལྷུབས་སེ་ལྷུབ། །ཕྱག་ན་དུང་གི་ཀ་བ་འཛིན། །དེ་རིང་དགྱེས་པས་གནས་འདིར་གཤེགས། །བདུད་རྩི་བསང་གི་མཆོད་པ་བཞེས། །གུས་པས་བསྟོད་དེ་ཕྱག་ཀྱང་འཚལ། །བདག་དང་རྒྱུ་སྦྱོར་ཡོན་བདག་གིས། །ལྷ་ཁྱིམ་འདི་ལ་བསྲུང་བར་མཛོད། །གསེར་གྱི་ཀ་བ་མ་འགྱེལ་མཛོད། །གཡུ་ཡི་གདུང་མ་མ་ཆག་མཛོད། །གནས་ཁང་མེ་ཡི་གནོད་པ་སྲུངས། །ཡོན་བདག་འདི་ཡི་གྲོགས་མཛོད་ལ། །ཉིན་མོ་ཉིན་གྱི་བྱ་ར་མཛོད། །མཚན་མོ་མཚན་གྱི་མེལ་ཚེ་མཛོད། །བསམ་པ་སྒྲུབ་ལ་རེ་བ་སྐོང་། །བར་དུ་གཅོད་པའི་རྐྱེན་རྣམས་ཟློག །བུ་སྡུག་ཚ་བོ་བཞིན་དུ་སྐྱོངས། །བཀྲ་ཤིས་བདེ་ལེགས་ཕུན་ཚོགས་མཛོད། །ཀྱཻ། གཞན་ཡང་ལྷ་ཁྱིམ་འདི་ཉིད་ལ། །རྟག་ཅིང་ཆགས་པའི་ལྷ་དང་ཀླུ། །ས་བདག་རྒྱལ་བཙན་མ་མོ་སོགས། །དགེ་བསྙེན་ཡ་མའི་ཚོགས་རྣམས་ཀུན། །བདུད་རྩི་བསང་གི་དུད་པས་མཆོད། །འདོད་པའི་ཡོན་ཏན་རྒྱ་མཚོ་བསྔོ། །རེ་བ་གང་ཞིང་བསམ་པ་ཚིམ། །གློ་བུར་བགེགས་རིགས་ཚར་ཆོད་ཅིག །རུ་ང་ཕྲག་དོག་མ་མཛད་པར། །ཞི་དང་ཕན་པའི་སེམས་ཀྱིས་སུ། །ཡོན་བདག་འདི་ལ་སྡོང་གྲོགས་མཛོད། །ཁ་འཛིན་མེལ་ཚེ་མ་གཡེལ་ཅིག །ཞི་དང་བཀྲ་ཤིས་མཛད་དུ་གསོལ། །ཀྱཻ། །དཀོན་མཆོག་རིན་ཆེན་དཔང་བསྟོད་དོ། །དཔལ་མགོན་ཡོན་ཏན་དཔང་བསྟོད་དོ། །ཁྱིམ་ལྷ་གཉན་པོ་དཔང་བསྟོད་དོ། །འགོ་བའི་ལྷ་རྣམས་དཔང་བསྟོད་དོ། །ཕན་མཛད་ཐམས་ཅད་དཔང་བསྟོད་དོ། །ལྷ་དང་སྲུང་མ་ཡར་ལ་བསྟོད། །བགེགས་དང་འབྱུང་པོ་མར་ལ་བསྐྲད། །ལྷ་སྲུང་དཀར་ཕྱོགས་ཐམས་ཅད་ཀུན། །ཉི་ཟླ་བཞིན་དུ་འོད་རེ་གསལ། །རི་བོ་བཞིན་དུ་བརྗིད་རེ་ཆེ། །ནོར་བུ་བཞིན་དུ་དཔལ་རེ་འདུས། །གཡུ་འབྲུག་བཞིན་དུ་སྐད་རེ་ཆེ། །ཐམས་ཅད་ཐུགས་ཀྱི་དགྱེས་པ་བསྐྱེད། །ཡོན་བདག་ཚེ་རིང་ནད་མེད་ཅིང་། །ཅི་བསམ་འགྲུབ་པའི་བཀྲ་ཤིས་ཤོག །ཀྱཻ། བླ་མ་རྣམས་ཀྱི་བྱིན་གྱིས་རློབས། །ཡི་དམ་ལྷ་ཡིས་དངོས་གྲུབ་སྩོལ། །ཆོས་སྐྱོང་སྲུང་མས་ཕྲིན་ལས་སྒྲུབས། །ཁྱིམ་ལྷ་གཉེན་པོས་རྟག་ཏུ་སྐྱོངས། །འགོ་བའི་ལྷ་ཀླུས་ལེགས་ཚོགས་སྤེལ། །ནག་ཕྱོགས་བགེགས་རིགས་གཡུལ་ལས་རྒྱལ། །དཀར་ཕྱོགས་དགེ་བའི་རུ་མཚོན་སྒྲེངས། །འབྱུང་པོ་རྣམས་ཀྱང་བུ་བཞིན་བྱམས། །ཚེ་དང་དབང་ཐང་བསོད་ནམས་སྤེལ། །ཕྱྭ་གཡང་ལོངས་སྤྱོད་སྤྲིན་ལྟར་གཏིབས། །ཉིན་མོ་བཀྲ་ཤིས་མཚན་བཀྲ་ཤིས། །ཉིན་མཚན་ཀུན་ཏུ་བདེ་སྐྱིད་ལྡན། །བཀྲ་ཤིས་བདེ་ལེགས་ཕུན་སུམ་ཚོགས། །ཀི་བསྭོ་ཆའོ་ལྷ་རྒྱལ་ལོ། །སྭཱ་སྟི་སྭཱ་སྟི་བྷྲཱུྃ་བྷྲཱུྃ་སྭཱ་ཧཱ། ཞེས་དང་། ཁྱིམ་བདག་རྣམས་ཀྱིས་ལྷ་འབོད་ཅིང་འབྲུ་སྣ་འཐོར། །སྔགས་པས་མེ་ཏོག་འཐོར་ཞིང་བཀྲ་ཤིས་གང་ཤེས་བརྗོད། དགའ་སྟོན་བཀྲ་ཤིས་སྐྱིད་པའི་ལྷ་བྲོ་སོགས་རྩེ་བར་བྱའོ། །མངྒ་ལཾ། ། ༈

[edit]

khyim lha bstod pa/ khyim lha bstod pa bzhugs so/__/bla ma yi dam mkha' 'gro'i tshogs la phyag 'tshal lo/_/khyim lha'am phug lha bstod pa ni/__khyim phug gi ka ba la mar dkar thig le dang /_shing rtsi bzang po gsar pa sna tshogs bal tshon gyis brgyan pa bcing /__de'i mdun du bdud rtsi can gyi shing sna la me sbar/__phye mar 'o bskol 'bru sna sogs bsang rdzas sna tshogs sbyar ba la chab bran/__thog mar khrus gsol ba ni/__chu gtsang la rnam 'joms sme brtsegs sogs kyi gzungs ring thung gang shes bzlas pas byin gyis brlabs pa shug gu rting dkar gyis 'thor la/__kyai/__shar lho nub byang phyogs bzhi nas/__/stag skya 'brug sngon bya dmar po/__/ru sbal rgya po'i zhal gyi chab/__/ye shes bdud rtsir byin brlabs pas/__/phug gi lha la sku khrus gsol/__/mi gtsang dri ma dag gyur cig__/'go ba'i lha la sku khrus gsol/__/mi gtsang dri ma dag gyur cig__/pha tshan lha la sku khrus gsol/__/mi gtsang dri ma dag=__dgra lha rnams la=__mi gtsang dri ma=__khyim lha rnams la=__mi gtsang dri ma=__thab lha rnams la=__mi gtsang dri ma=__steng gi lha dang 'og gi klu/__/bar gyi gnyan la sku khrus gsol/__/mi gtsang dri ma dag gyur cig__/ji ltar bltams pa tsam gyi ni/__/lha rnams kyis ni khrus gsol ltar/__/lha yi chu ni dag pa yis/__/de bzhin bdag gis khrus gsol lo/__/oM sarba ta thA ga ta a b+hi She ka te sa ma yA shrI ye hU~M/__zhes dang /__gzhan yang rnam 'joms sme brtsegs sogs khrus sngags gang shes brjod/__de nas dngos gzhi ni/__ra~M ya~M kha~M/__stong pa'i ngang las b+h+rU~M yig las/__/byung ba'i rin chen snod yangs su/__/yi ge drug gis byin brlabs pas/__/bsang mchod 'dod yon gter du gyur/__/oM AHhU~M ha ho hrIH__kyai/__/bkra shis dge ba'i lha khyim 'dir/__/bdud rtsi can gyi shing sna la/__/dag cing gtsang ba'i me sbar te/__/bza' btung rin chen 'bru sman bran/__/ting 'dzin sngags kyis byin brlabs pa'i/__/bsang mchod 'dod yon rgya mtsho 'dis/__/mchod sbyin mgron du gyur pa kun/__/thugs dam bskang zhing nyams chags bshags/__/dkon mchog srid zhu'i mgron rnams la/__/bdud rtsi bsang gi mchod pa 'bul/__/gus pas bstod cing phyag kyang 'tshal/__/lha khyim 'di la byin gyis rlobs/__/dpal mgon yon tan mgron rnams la/__/bdud rtsi bsang gi=__gus pas bstod cing =__lha khyim 'di la kha 'dzin mdzod/__/bgegs rigs lan chags mgron rnams la/__/bdud rtsi bsang gis 'dod yon sbyin/__/lha khyim 'di la gnod 'tshe spongs/__/zhi dang bkra shis bde legs mdzod/__/rigs drug snying rje'i mgron rnams la/__/bdud rtsi bsang gi dga' ston spel/__/lha khyim 'di la dga' bar mdzod/__/phan bde byang chub sems mchog bskyed/__kyai/__khyad par lha khyim 'di yi bdag__/khyim lha gel thung bya ba ni/__/sku mdog gser gyi mdangs dang ldan/__/g.yu yi rgyan cha si li li/__/dar gyi na bza' lhubs se lhub/__/phyag na dung gi ka ba 'dzin/__/de ring dgyes pas gnas 'dir gshegs/__/bdud rtsi bsang gi mchod pa bzhes/__/gus pas bstod de phyag kyang 'tshal/__/bdag dang rgyu sbyor yon bdag gis/__/lha khyim 'di la bsrung bar mdzod/__/gser gyi ka ba ma 'gyel mdzod/__/g.yu yi gdung ma ma chag mdzod/__/gnas khang me yi gnod pa srungs/__/yon bdag 'di yi grogs mdzod la/__/nyin mo nyin gyi bya ra mdzod/__/mtshan mo mtshan gyi mel tshe mdzod/__/bsam pa sgrub la re ba skong /__/bar du gcod pa'i rkyen rnams zlog__/bu sdug tsha bo bzhin du skyongs/__/bkra shis bde legs phun tshogs mdzod/__/kyai/__gzhan yang lha khyim 'di nyid la/__/rtag cing chags pa'i lha dang klu/__/sa bdag rgyal btsan ma mo sogs/__/dge bsnyen ya ma'i tshogs rnams kun/__/bdud rtsi bsang gi dud pas mchod/__/'dod pa'i yon tan rgya mtsho bsngo/__/re ba gang zhing bsam pa tshim/__/glo bur bgegs rigs tshar chod cig__/ru nga phrag dog ma mdzad par/__/zhi dang phan pa'i sems kyis su/__/yon bdag 'di la sdong grogs mdzod/__/kha 'dzin mel tshe ma g.yel cig__/zhi dang bkra shis mdzad du gsol/__/kyai/__/dkon mchog rin chen dpang bstod do/__/dpal mgon yon tan dpang bstod do/__/khyim lha gnyan po dpang bstod do/__/'go ba'i lha rnams dpang bstod do/__/phan mdzad thams cad dpang bstod do/__/lha dang srung ma yar la bstod/__/bgegs dang 'byung po mar la bskrad/__/lha srung dkar phyogs thams cad kun/__/nyi zla bzhin du 'od re gsal/__/ri bo bzhin du brjid re che/__/nor bu bzhin du dpal re 'dus/__/g.yu 'brug bzhin du skad re che/__/thams cad thugs kyi dgyes pa bskyed/__/yon bdag tshe ring nad med cing /__/ci bsam 'grub pa'i bkra shis shog__/kyai/__bla ma rnams kyi byin gyis rlobs/__/yi dam lha yis dngos grub stsol/__/chos skyong srung mas phrin las sgrubs/__/khyim lha gnyen pos rtag tu skyongs/__/'go ba'i lha klus legs tshogs spel/__/nag phyogs bgegs rigs g.yul las rgyal/__/dkar phyogs dge ba'i ru mtshon sgrengs/__/'byung po rnams kyang bu bzhin byams/__/tshe dang dbang thang bsod nams spel/__/phywa g.yang longs spyod sprin ltar gtibs/__/nyin mo bkra shis mtshan bkra shis/__/nyin mtshan kun tu bde skyid ldan/__/bkra shis bde legs phun sum tshogs/__/ki bswo cha'o lha rgyal lo/__/swA sti swA sti b+h+rU~M b+h+rU~M swA hA/__zhes dang /__khyim bdag rnams kyis lha 'bod cing 'bru sna 'thor/__/sngags pas me tog 'thor zhing bkra shis gang shes brjod/__dga' ston bkra shis skyid pa'i lha bro sogs rtse bar bya'o/__/mang+ga laM/___/___!