JKW-KABUM-17-TSA-002-029-wylie

🚧 This website is under continued development. We appreciate your patience!

gso dpyad rgyud bzhi'i bsdus don snying po/ gso dpyad rgyud bzhi'i bsdus don snying po bzhugs/__/oM a thA/__sman pa sngon med bcom ldan 'das/__/dpal ldan bla mar gus btud nas/__/gso dpyad rgyud bzhi'i bsdus pa'i don/__/sa bon tsam zhig brjod par bya/__yang dag par rdzogs pa'i sangs rgyas sman gyi bla ma'i sku gsung thugs yon tan phrin las mi zad pa rgyan gyi 'khor lo'i sgyu 'phrul drwa ba chen po'i rnam rol rig pa'i ye shes mched bzhi dang 'jigs med smra ba'i seng ge yid las skyes kyi rnam par shar bas legs par gsungs pa'i bka' phan bde bla na med pa'i gter chen po gso dpyad kun gyi yang snying dpal ldan rgyud bzhi zhes grags pa 'di nyid lo chen bai ro dang /__/chos rgyal khri srong mchod yon gyi thugs bskyed las gangs can bsod nams kyi mgron du snang ba/__re zhig dus la dgongs te dpal gyi bsam yas dbu rtser mi 'jig pa'i phyag rgyas btab pa/__phyis gter ston yul gra/__chos mngon pa la mkhas pas mngon shes/__mtshan dngos dbang phyug 'bar zhes yongs su grags pa'i dge ba'i bshes gnyen chen po des spyan drangs shing /__brgyud pa gsum du chig brgyud kyis gdams pa/__/sangs rgyas sman gyi bla ma'i sprul pa'i sku g.yu thog yon tan mgon pos thugs nyams su bzhes shing /__skabs su babs ba'i zhal skong ci rigs pa dang bcas rgya cher spel ba 'di 'chad pa la/__/gzhung 'di nyid snga 'gyur sgrub sde'i bdud rtsi yon tan gyi las rgyas pa'i rgyud du gtogs pas/__de dag gi bka' srol 'dzin pa rnams kyi bshad thabs ltar byas na rtsa gzhung dang mthun pa'i dgongs pa 'khrul med du nges pas/__dbang po rab la mtshan bstan pa/__/'bring la spyi don rnam par dbye ba/__/tha mal 'bru re gnyer re'i sgo nas bshad pa'o/__/dang po ni/__bdud rtsi snying pos dpe dang dgos pa/__yan lag brgyad pas brjod bya/__gsang ba man ngag gi rgyud ces pas rjod byed kyi mtshan bstan/__gnyis pa la lnga/__rgyud 'byung ba'i rgyu gleng gzhi/__rkyen gleng slong ba/__'bras bu yongs su shes par bya ba rgyud don/__rgyud kyi dgos 'brel/__'khor la gdams shing gdams pa gtad pa'o/__/dang po ni/__gnas phun sum tshogs pa sman gyi grong khyer lta na sdug__/ston pa phun sum tshogs pa sman gyi bla ma/__'khor phun sum tshogs pa lha drang srong phyi nang sde bzhi/__dus phun sum tshogs pa ston 'khor gdan 'dzoms pa'i tshe/__chos phun sum tshogs pa gso ba rig pa drang srong gi lugs su bstan zhes/__le'u dang por gsungs pa ltar ro/__/gnyis pa la gnyis/__gleng slong dngos dang /__mdor bstan pa'o/__/dang po ni/__thugs las rig pa'i ye shes dang /__/gsung las yid las skyes sprul te/__zhu ba dang gnang ba'i skabs dbye ba/__gnyis pa ni/__/rgyud bzhi'i skabs don mdor bstan pa ste le'u gnyis pa ltar ro/__/gsum pa la lnga/__bshad bya rtsa ba'i rgyud/__'chad byed bshad pa'i rgyud/__lag len man ngag gi rgyud/__dmar khrid phyi ma'i rgyud zhar byung don bsdu pa'i tshul du 'jug don bcas rim par gsungs pa ltar ro/__/bzhi pa ni/__le'u tha ma'i stod dang /__lnga pa ni tha ma'i mjug gis gsal ba ltar ro/__/gsum pa tha mal 'bru re gnyer re'i sgo nas bshad pa la bzhi/__mtshan gyi don/__'gyur gyi phyag__/gzhung gi don/__'jug gi don no/__/de lta bu'i spyi don dang gzhung don gnyis spyi gzhung spel te bshad pas blo gros kyi mig rab tu yangs par 'gyur ro/__/sa bon chung ngu drod gsher gyis/__bskyed pas ljon shing cher 'gyur ltar/__/'di tsam gyis kyang blo gsal rnams/__/blo gros pad+mo rgyas par smon/__/zhes pa'ang bcu phrag rig pa'i paN+Di ta badz+ra pra tiSh+Thas yang yang gsungs pa'i bzheng skong du gu Na nA tha dgyes pa'i 'bangs mkhyen brtse'i dbang pos bris pa su shre yas+sid+d+hI rastu//__/__/_!