JKW-KABUM-16-MA-015-wylie

🚧 This website is under continued development. We appreciate your patience!

yum bka' mkha' 'gro'i las tshogs bzhi pa rnam rgyal ma'i tshe dbang / @#/__/yum bka' mkha' 'gro'i las tshogs bzhi pa dang 'brel ba'i tshe dbang nyer bsdus bzhugs// na mo gu ru uSh+NI Sha bi dza yA yai/__yum bka' mkha' 'gro'i las tshogs bzhi pa gtsug tor rnam rgyal ma'i sgo nas tshe dbang bya bar 'dod pas/__dkyil 'khor ras bris dang tshom bu sogs skabs dang sbyar ba'i dbus su tshe bum/__g.yas g.yon du tshe chang dang tshe ril/__mdun du sman raka gtor tshogs sogs bsham/__yum bka'i las gzhung bsrang /__bzlas pa'i skabs su bab pa na/__b+h+rU~M bi shwa bi shud+d+he phaT dzaHsa dzapa? khang phyes te/__/mkha' 'gro'i thugs kar pad zla'i steng :__gtsug tor rnam rgyal gser mdog can:__zhabs gnyis rta babs skyil mo krung :__phyag g.yas mchog sbyin g.yon pa ni:__dkon mchog gsum mtshon skyabs sbyin rgyas:__ut+pal la gnas tshe bum 'dzin:__'od zer spro bsdus 'khor 'das kyi:__dwangs bcud bdag la thim par bsam/__/oM pad+mo yo gi nI tA re tut+tA re tu re A yur dA de b+h+rU~M swA hA:__zhes pa ci nus dang /__bum pa rang byung gi gzhal med khang du lha tshogs rnams lhag par gsal ba'i sku las 'chi med tshe'i bdud rtsi'i chu rgyun babs pas bum pa gang bar gyur par bsams la bzlas pa ci nus bya/__las bum bdud rtsi 'khyil pas bsgrub/__mthar mchod bstod yig brgya/__oM AHhU~M mchod yon phul bas lha tshogs rnams bde stong chen po'i ngo bor zhu ba bum chu dang ro gcig tu gyur/__/phyag 'tshal de bzhin gshegs pa'i gtsug tor/__/mtha' yas rnam par rgyal bar spyod ma/__/ma lus pha rol phyin pa thob pa'i/__/rgyal ba'i sras kyi shin tu bsten ma/__/zhes ci nus brjod pas gsol ba gdab/__tshe 'gugs bskul/__tshogs mchod bya/__slob ma la khrus bya/__bgegs phral/__srung 'khor bsgom/__mtshams sbyor ci rigs pa'i rjes/__mnga' bdag khri srong lde'u btsan gyi gsung gi sprul pa kun mkhyen rdzogs chen po rang byung rdo rje'am/__rig 'dzin 'jigs med gling pa nyid la g.yo ru sgrags kyi grong mo che dang nye ba mtsho rgyal bla mtsho nas dpal len pa med pa'i mkha' 'gro'i brda ris babs pa las byung ba'i chos sde mkha' 'gro'i nang sgrub bde chen snying po'i gter bum gyi las tshogs bzhi pa/__rje btsun sgrol ma gtsug tor rnam rgyal ma la brten nas tshe dbang bskur ba yin pas thog mar maN+Dal phul mdzod/__/gsol ba 'debs pa 'di'i rjes zlos mdzod/__/kun mkhyen ye shes phung po can/__/srid pa'i 'khor lo rnam sbyong ba/__/de ring bshad pa'i rin chen gter/__/gtso bos bdag la bka' drin stsol/__/skyabs su 'gro zhing sems bskyed pa'i slad du mdun gyi nam mkhar sangs rgyas dang byang chub sems dpa' thams cad mngon sum par dmigs la/__de dag gi yon tan la yid khyed shes kyi dad pa dang bcas/__mar gyur nam mkha'i mtha' dang mnyam pa'i sems can thams cad 'khor ba sdug bsngal gyi rgya mtsho las thar te rnam pa thams cad mkhyen pa'i go 'phang thob pa'i ched du dmigs nas skyabs su 'gro zhing /__de dang rjes su 'brel bar sems can thams cad pha mar shes pa'i byams pa dang /__byas pa shes pa'i snying rje dang /__drin du gzo ba'i dga' ba dang /__nye 'khon med pa'i phan sems bzhi'i lhag bsam ldan pas smon sems bskyed pa 'di'i rjes zlos mdzod/__sangs rgyas chos dang tshogs kyi sogs lan gsum/__yan lag bdun pas rgyud sbyang ba'i phyir nam mkha' gang ba'i sangs rgyas dang byang chub sems dpa'i tshogs kyi spyan sngar dad pa'i sems kyis phyag 'tshal ba dang /__mchod pa'i sprin rab 'byams spro ba dang /__sdig pa'i las rnams gnong 'gyod drag pos bshags pa dang /__rang gzhan gyi dge ba la rjes su yi rang ba bskyed pa dang /__rgyal dang de sras sprul pa'i gzugs brnyan dang bcas pa la chos kyi 'khor lo bskor bar bskul ba dang /__mya ngan las mi 'da' bar gsol ba gdab pa dang /__dge ba rdzogs byang du bsngo ba so so'i don la nges shes khyad par can yid la byed pas 'di'i rjes zlos mdzad par 'tshal/__phyag 'tshal ba dang mchod cing bshags sogs brjod/__de nas dbang gi don po tshe dang ye shes dbab pa'i phyir dmigs pa 'di bzhin du mdzod/__las bum chus bsang /__swa b+hA was sbyang /__stong pa'i ngang las slob ma rnams kun gzhi'i rnam par shes pa a dkar por gsal ba yongs su gyur pa las/__dus gsum sangs rgyas thams cad skyed pa'i yum 'phags ma tshe dang ye shes dpag tu med pa'i bdag nyid rje btsun sgrol ma gtsug tor rnam par rgyal ma sku mdog gser btso ma lta bu zhabs phyed skyil gyis bzhugs pa'i phyag g.yas mchog sbyin dang /__g.yon dkon mchog gsum mtshon gyi phyag rgyas me tog ut+pa la 'dzin pa'i steng na tshe bum bcud ldan gyis brgyan pa'i spyi bor oM/__mgrin par AH__thugs kar hU~M gis mtshan pa las 'od zer 'phros pas phyogs bcu'i rgyal ba sras dang bcas pa'i byin rlabs dang dngos grub/__snod bcud brtan g.yo kun gyi dwangs bcud bkrag mdangs dang bcas pa bsdus nas bsgrub bya rnams la thim pas 'chi med tshe dang rdo rje lta bu'i srog thob pa'i mos pa mdzod/__ces brjod la/__tshe 'gugs ni mda' dar g.yob cing /__hU~M/__ye shes dbyings nas tshe 'gugs ma:__bde gshegs sangs rgyas mkha' 'gro ma:__dkar mo tshe yi bum pa 'dzin:__chos kyi dbyings nas tshe khug cig:__hU~M/__nam mkha'i dbyings nas tshe 'gugs ma:__sangs rgyas mkha' 'gro gshin rje mo:__sngon mo tshe yi bum pa 'dzin:__nam mkha'i khams nas tshe khug cig:__hU~M/__rlung gi khams nas tshe 'gugs ma:__rdo rje mkha' 'gro skyong byed ma:__mthing nag tshe yi bum pa 'dzin:__rlung gi khams nas tshe khug cig:__hU~M/__me yi khams nas tshe 'gugs ma:__rin chen mkha' 'gro sreg byed ma:__ser mo tshe yi bum pa 'dzin:__me yi khams nas tshe khug cig:__hU~M/__chu yi khams nas tshe 'gugs ma:__pad+ma mkha' 'gro rmongs byed ma:__dmar mo tshe yi bum pa 'dzin:__chu yi khams nas tshe khug cig:__hU~M/__sa yi khams nas tshe 'gugs ma:__las kyi mkha' 'gro tsan ti ka:__ljang gu tshe yi bum pa 'dzin:__sa yi khams nas tshe khug cig:__oM pad+mo yo gi nI tA re tut+tA re tu re A yurdA de b+h+rU~M swA hA:__de nas dbang bskur ba'i sngon du rje btsun ma la phyag 'tshal ba 'di'i rjes zlos mdzod/__phyag 'tshal de bzhin gshegs pa'i gtsug tor/__/mtha' yas rnam par rgyal bar spyod ma/__/ma lus pha rol phyin pa thob pa'i/__/rgyal ba'i sras kyis shin tu bsten ma/__/zhes pa'i rjes chu dbang dngos dang rgyas gdab pa ni bdud rtsi bum bcud bzhin no/__/de nas tshogs la rol pa sogs rjes chog spyi ltar bya/__zhes pa'ang kun mkhyen chen po nyid kyis mdzad pa'i mtshams sbyor las mdor bsdus snying por dril te nag 'gros bklags pas grub par bsdebs pa sarba dA ka l+yA NaM b+ha ba tu//__//