JKW-KABUM-23-'A-001-003

🚧 This website is under continued development. We appreciate your patience!

Previous Text Back to Volume PageNext Text

རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་ལམ་གྱི་རིམ་པ་དང་འབྲེལ་བའི་རྡོ་རྗེའི་གླུ་ཟབ་དོན་གསོལ་འདེབས།

Wylie title	rje btsun rdo rje rnal 'byor ma nA ro mkha' spyod ma'i lam gyi rim pa dang 'brel ba'i rdo rje'i glu zab don gsol 'debs
Location	mkhyen brtse'i bka' 'bum Volume 23, sde tshan 1, Text 3, Pages 7-9 (Folios 4a3 to 5a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rje btsun rdo rje rnal 'byor ma nA ro mkha' spyod ma'i lam gyi rim pa dang 'brel ba'i rdo rje'i glu zab don gsol 'debs. In 'jam dbyangs mkhyen brtse'i dbang po'i bka' 'bum, Vol. 23: 7-9. Khams sde dge rdzong sar dgon: Rdzong sar blo gros phun tshogs, 2020.
Genre
Colophon	།ཞེས་འཕགས་ཡུལ་གྱི་པཎ་གྲུབ་རྒྱ་མཚོའི་གཙུག་གི་ནོར་བུ་ཇོ་བོ་ནཱ་རོ་ཏཱ་པ་ནས་བརྒྱུད་པའི་རྗེ་བཙུན་རྡོ་རྗེ་རྣལ་འབྱོར་མའི་རིམ་གཉིས་དང་འབྲེལ་བའི་རྡོ་རྗེའི་གླུ་འདི་ཡང་། དཔལ་ས་ལ་སྤྱོད་པའི་འོག་མིན་གཉིས་པ་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་དབྱུག་པ་ཟླ་བའི་དམར་ཕྱོགས་ཀྱི་ཚེས་བཅུར་ལམ་འདིའི་བྱིན་རླབས་ཟབ་མོས་རིག་པ་འཛིན་པའི་དགེ་འདུན་འདུས་པ་འགའ་ཞིག་སྨིན་པར་བགྱིས་པའི་སྐབས་འཇམ་དབྱངས་མཁྱེན་བརྩེའི་དབང་པོས་གང་ཤར་གླུར་བླངས་པའོ། །སརྦ་དཱ་མངྒ་ལཾ།།
	zhes 'phags yul gyi paN grub rgya mtsho'i gtsug gi nor bu jo bo nA ro tA pa nas brgyud pa'i rje btsun rdo rje rnal 'byor ma'i rim gnyis dang 'brel ba'i rdo rje'i glu 'di yang /__dpal sa la spyod pa'i 'og min gnyis pa o rgyan smin grol gling nges pa don gyi dga' ba'i tshal chen por dbyug pa zla ba'i dmar phyogs kyi tshes bcur lam 'di'i byin rlabs zab mos rig pa 'dzin pa'i dge 'dun 'dus pa 'ga' zhig smin par bgyis pa'i skabs 'jam dbyangs mkhyen brtse'i dbang pos gang shar glur blangs pa'o/__/sarba dA mang+ga laM

Tibetan Text

Wylie

[edit]

རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་ལམ་གྱི་རིམ་པ་དང་འབྲེལ་བའི་རྡོ་རྗེའི་གླུ་ཟབ་དོན་གསོལ་འདེབས་ཞེས་བྱ་བ། ཨ་ཧོ། བདེ་སྟོང་ཟུང་འཇུག་རྣམ་ཀུན་མཆོག་ལྡན་གྱི་ཡེ་ཤེས། །མཁའ་སྤྱོད་རྡོ་རྗེ་བཙུན་མོའི་རྣམ་རོལ་དུ་ཤར་བ། །གང་དང་དབྱེར་མེད་ཁྱབ་བདག་དཔལ་ལྡན་གྱི་བླ་མས། །བྱང་ཆུབ་སྙིང་པོའི་བར་དུ་དགེ་ལེགས་སུ་མཛོད་ཅིག །རྙེད་དཀའ་དོན་དང་ལྡན་པའི་དལ་འབྱོར་གྱི་ལུས་རྟེན། །དོ་ནུབ་ཙམ་ཡང་མི་འཆིའི་གདེངས་ཚད་ནི་མ་མཆིས། །དེ་བས་བྱ་བྱེད་མང་པོའི་སྤྲོས་པ་ཀུན་སྤངས་ཏེ། །ཉམས་ལེན་སྙིང་པོར་དྲིལ་བ་འདུན་མ་ཡི་ཡང་རྩེ། །ནུབ་མོ་རང་བཞིན་གཉིད་ཀྱི་འོད་གསལ་ལ་འཇུག་ཅིང་། །ཐོ་རེངས་ཟུང་འཇུག་སྒྱུ་མའི་ལྷ་སྐུ་རུ་ལྡང་སྟེ། །ཕུང་ཁམས་དྭངས་མར་སྒྲུབ་པའི་བདུད་རྩི་ལ་རོལ་པས། །དགའ་བ་གསུམ་གྱི་པདྨོ་སྙིང་དབུས་སུ་བཞད་དོ། །སྐྱབས་འགྲོ་སེམས་བསྐྱེད་ཚད་མེད་ལམ་རིམ་གྱི་གཞི་རྟེན། །འགལ་རྐྱེན་སྡིག་སྒྲིབ་སྦྱོང་བྱེད་རྡོར་སེམས་ཀྱི་བསྒོམ་བཟླས། །མཐུན་རྐྱེན་ཚོགས་བསགས་མཐར་ཐུག་བླ་མ་ཡི་རྣལ་འབྱོར། །ཐུན་བཞིར་འབྲལ་མེད་བསྐྱང་བ་ལམ་ཟབ་ཀྱི་སྙིང་པོ། །བདག་ཉིད་ལྷ་སྐུར་བསྐྱེད་པ་སྣང་སྟོང་གི་ཉམས་ལེན། །སྣོད་བཅུད་འགྲོ་བ་དག་པ་ཡེ་ཤེས་ཀྱི་རྩལ་སྦྱོང་། །དཔའ་བོ་དཔའ་མོས་བྱིན་རླབས་ཁྱད་པར་གྱི་མྱུར་ལམ། །ང་རྒྱལ་རྣམ་པའི་སེམས་འཛིན་བསྐྱེད་རིམ་གྱི་དངོས་གཞི། །རླུང་སྔགས་དབྱེར་མེད་ཤེས་པ་བཟླས་བརྗོད་ཀྱི་མཐར་ཐུག །སྐྱེ་འགག་གནས་གསུམ་བརྗོད་བྲལ་གསལ་སྟོང་གི་རིག་པ། །ཟུང་འཇུག་བསམ་མི་ཁྱབ་པ་གནས་ལུགས་ཀྱི་འཇོག་སོ། །ཅིར་སྣང་ལྷ་དང་ཡེ་ཤེས་སྤྱོད་ལམ་གྱི་འཇུག་པ། །ཨ་ཧོ། རྣལ་འབྱོར་བཅུ་གཅིག་རིམ་གཉིས་ཀྱི་ཡང་བཅུད། །ཁྱད་པར་ཟབ་པའི་རྫོགས་རིམ་འབར་འཛག་གི་ཐབས་དང་། །བདེ་དང་སྟོང་པ་སྒྲུབ་པའི་ཏིང་འཛིན་ལ་བརྟེན་ནས། །རྩ་རླུང་ཐིག་ལེའི་འདུ་བ་དབུ་མ་རུ་ཐིམ་པས། །དོན་གྱི་མཁའ་སྤྱོད་དགའ་མ་ཚེ་འདི་རུ་འགྲུབ་སྟེ། །སྒྱུ་ལུས་ཟག་པ་མེད་པ་འཇའ་ཚོན་གྱི་སྐུ་དང་། །རླུང་སེམས་རྟོག་པ་བྲལ་བ་ཆོས་ཉིད་ཀྱི་དབྱིངས་སུ། །མཆོག་གི་དངོས་གྲུབ་བརྙེས་པའི་སྨོན་ལམ་ཞིག་ཞུའོ། །ཞེས་འཕགས་ཡུལ་གྱི་པཎ་གྲུབ་རྒྱ་མཚོའི་གཙུག་གི་ནོར་བུ་ཇོ་བོ་ནཱ་རོ་ཏཱ་པ་ནས་བརྒྱུད་པའི་རྗེ་བཙུན་རྡོ་རྗེ་རྣལ་འབྱོར་མའི་རིམ་གཉིས་དང་འབྲེལ་བའི་རྡོ་རྗེའི་གླུ་འདི་ཡང་། དཔལ་ས་ལ་སྤྱོད་པའི་འོག་མིན་གཉིས་པ་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་དབྱུག་པ་ཟླ་བའི་དམར་ཕྱོགས་ཀྱི་ཚེས་བཅུར་ལམ་འདིའི་བྱིན་རླབས་ཟབ་མོས་རིག་པ་འཛིན་པའི་དགེ་འདུན་འདུས་པ་འགའ་ཞིག་སྨིན་པར་བགྱིས་པའི་སྐབས་འཇམ་དབྱངས་མཁྱེན་བརྩེའི་དབང་པོས་གང་ཤར་གླུར་བླངས་པའོ། །སརྦ་དཱ་མངྒ་ལཾ།། །། ༈

[edit]

mkha' spyod ma'i lam rim dang 'brel ba'i glu zab don gsol 'debs/__ rje btsun rdo rje rnal 'byor ma nA ro mkha' spyod ma'i lam gyi rim pa dang 'brel ba'i rdo rje'i glu zab don gsol 'debs zhes bya ba/__a ho/__bde stong zung 'jug rnam kun mchog ldan gyi ye shes/__/mkha' spyod rdo rje btsun mo'i rnam rol du shar ba/__/gang dang dbyer med khyab bdag dpal ldan gyi bla mas/__/byang chub snying po'i bar du dge legs su mdzod cig__/rnyed dka' don dang ldan pa'i dal 'byor gyi lus rten/__/do nub tsam yang mi 'chi'i gdengs tshad ni ma mchis/__/de bas bya byed mang po'i spros pa kun spangs te/__/nyams len snying por dril ba 'dun ma yi yang rtse/__/nub mo rang bzhin gnyid kyi 'od gsal la 'jug cing /__/tho rengs zung 'jug sgyu ma'i lha sku ru ldang ste/__/phung khams dwangs mar sgrub pa'i bdud rtsi la rol pas/__/dga' ba gsum gyi pad+mo snying dbus su bzhad do/__/skyabs 'gro sems bskyed tshad med lam rim gyi gzhi rten/__/'gal rkyen sdig sgrib sbyong byed rdor sems kyi bsgom bzlas/__/mthun rkyen tshogs bsags mthar thug bla ma yi rnal 'byor/__/thun bzhir 'bral med bskyang ba lam zab kyi snying po/__/bdag nyid lha skur bskyed pa snang stong gi nyams len/__/snod bcud 'gro ba dag pa ye shes kyi rtsal sbyong /__/dpa' bo dpa' mos byin rlabs khyad par gyi myur lam/__/nga rgyal rnam pa'i sems 'dzin bskyed rim gyi dngos gzhi/__/rlung sngags dbyer med shes pa bzlas brjod kyi mthar thug__/skye 'gag gnas gsum brjod bral gsal stong gi rig pa/__/zung 'jug bsam mi khyab pa gnas lugs kyi 'jog so/__/cir snang lha dang ye shes spyod lam gyi 'jug pa/__/a ho/__rnal 'byor bcu gcig rim gnyis kyi yang bcud/__/khyad par zab pa'i rdzogs rim 'bar 'dzag gi thabs dang /__/bde dang stong pa sgrub pa'i ting 'dzin la brten nas/__/rtsa rlung thig le'i 'du ba dbu ma ru thim pas/__/don gyi mkha' spyod dga' ma tshe 'di ru 'grub ste/__/sgyu lus zag pa med pa 'ja' tshon gyi sku dang /__/rlung sems rtog pa bral ba chos nyid kyi dbyings su/__/mchog gi dngos grub brnyes pa'i smon lam zhig zhu'o/__/zhes 'phags yul gyi paN grub rgya mtsho'i gtsug gi nor bu jo bo nA ro tA pa nas brgyud pa'i rje btsun rdo rje rnal 'byor ma'i rim gnyis dang 'brel ba'i rdo rje'i glu 'di yang /__dpal sa la spyod pa'i 'og min gnyis pa o rgyan smin grol gling nges pa don gyi dga' ba'i tshal chen por dbyug pa zla ba'i dmar phyogs kyi tshes bcur lam 'di'i byin rlabs zab mos rig pa 'dzin pa'i dge 'dun 'dus pa 'ga' zhig smin par bgyis pa'i skabs 'jam dbyangs mkhyen brtse'i dbang pos gang shar glur blangs pa'o/__/sarba dA mang+ga laM//___//___!