JKW-KABUM-01-KA-002-040-wylie

🚧 This website is under continued development. We appreciate your patience!

rngog lo tsA ba blo ldan shes rab la bsngags pa mos gus kyi rol mo/__ rig par smra ba rnams kyi gtsug gi nor bu rngog lo tsA ba chen po blo ldan shes rab la bsngags pa mos gus kyi rol mo zhes bya ba bzhugs so/__/na maHsarba dz+nyA d+hI mAM pra dz+nyA pA dA ya/__gzod nas rnam pa thams cad mkhyen pa'i go 'phang la/__/mngon sum gshegs kyang blo ldan bye ba'i ngal 'tsho'i slad/__/shes rab gsum gyi mtshar sdug rdzogs pa'i lang tsho can/__/grub pa'i rigs kyi thig ler mdzes gang rgyal gyur cig__1__/e ma skyes thob mkhyen pa'i sa bon ni/__/bshes gnyen dam pa'i gsung gis bskyed bsrings pas/__/sde snod rgya mtshor mkhyen rab rgyas pa dang /__/lhan cig grags snyan ut+pal 'dzum rlabs dgod/__2_/dngos kun rdul la za ba'i 'jug pa ni/__/tshad ma'i chu gtsang kho na'i khyad chos te/__/de yang rtog ge'i tshig don 'khrul med pa/__/brgyad gnyis kha bas reg pa'i 'jug ngogs bsten/__3__/nges 'byung tshul khrims kho na'i dbang byas te/__/yang dag blangs dang mi nyams bsrung ba dang /__/phyir shing 'chos pa'i bcu bdun gzhi yi don/__/'chad dang bslab la srid na mtshungs pa med/__4__/ji snyed shes bya'i nyams 'gyur mtha' klas pa/__/zag bcas zag med gnyis su gtan phab nas/__/blang dor lam gyis 'gog pa'i 'bras ster ba/__/chos mngon rgya mtsho smra la dbyig gnyen dngos/__5__/theg mchog sde snod bye ba'i ngo mtshar gtam/__/rgya chen spyod pa'i ring lugs zla med pa/__/tshul bzhin 'chad la rgyal sras ma pham mgon/__/gangs can ri bo'i sul du rgyu ba bzhin/__6__/zab don nor bu'i chu gter bsrubs pa'i phul/_/chos kun dbu mar lta ba'i bdud rtsi yis/__/skal bzang yid kyi pad+mo rgyas mdzad phyir/__/klu sgrub zhabs dang gnyis su dbye ba bral/__7_/mdor na phyi nang rig pa'i gzhung lugs kun/__/ji bzhin gzigs la 'jam dpal gzhon nu dang /__/brtse bas srid na sman mdzad snying rje'i gter/__/ngur smrig gar gyis rol pa'i sgyu 'phrul 'chang /__8__/de slad gangs kyi ri bo'i sman ljongs 'dir/__/yongs rdzogs bstan pa'i mnga' bdag thams cad kyi/__/gtsug tor rtse mor zhabs sen ut+pa la/__/btab pa'i ngo mtshar dpal gyi spring yig 'god/__9_/khyad par grub dbang Dom+b+hi he ru kas/__/rdo rje'i zhing du mngon sum 'khrid mdzad kyang /__/thugs rjes bod yul mun gling btang min pa'i/__/gtam tsam gyis kyang mi phyed gus pa 'phel/__10__/gang yang gzhung mang 'chad cing rtsod pa dang /__/zab mo'i don la rnam dpyod 'khrul med pa/__/byon dang 'byon 'gyur ji snyed mchis kun kyang /__/mgon po khyod kyi byin rlabs mthu kho na/__11__/thugs ni zhi ba'i nags su nyer gzims kyang /__/rnam pa srid na srid pa bzhin 'jug pas/__/mtha' klas yid can rgya mtsho dbugs 'byin pa/__/e ma gang tshul su yis mtshon bar nus/__12__/'on kyang dad pa'i gzhan dbang kho nas grub pa'i sman ljongs 'dir bgrod nas/__/zhabs sen bkra shis re khAs btab pa'i chos kyi mdun sar phyag byas te/__/mos gus sor mos cung zad bsngags pa'i tshig gi rol mo 'khrol 'di yis/__/khyod kyi rnam thar rgya mtsho'i dge mtshan yid can kun la rdzogs gyur cig__13__/ces bsil ldan ljongs kyi rigs par smra ba thams cad kyi gtsug gi nor bu rngog lo chen po blo ldan shes rab la bsngags pa'i tshigs su bcad pa 'di'ang /__gangs ri'i khrod kyi rig pa'i 'byung gnas dpal gsang phu ne'u thog gi chos grwa chen po'i gtsug lag khang gi yang steng du sa ga zla ba'i shar phyogs kyi rgyal ba gnyis par bya bral ba gtsug lag smra ba'i nyi mas skad cig la gsol ba btab pa shub+haM//___//__!_