JKW-KABUM-23-'A-006-001

🚧 This website is under continued development. We appreciate your patience!

First text in section. Back to Volume PageNext Text

ཟབ་པ་དང་རྒྱ་ཆེ་བའི་ཆོས་ཀྱི་ཐོབ་ཡིག་རིན་པོ་ཆེའི་དོ་ཤལ།

Wylie title	zab pa dang rgya che ba'i chos kyi thob yig rin po che'i do shal
Location	mkhyen brtse'i bka' 'bum Volume 23, sde tshan 6, Text 1, Pages 285-299 (Folios 1a to 8a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. zab pa dang rgya che ba'i chos kyi thob yig rin po che'i do shal. In 'jam dbyangs mkhyen brtse'i dbang po'i bka' 'bum, Vol. 23: 285-299. Khams sde dge rdzong sar dgon: Rdzong sar blo gros phun tshogs, 2020.
Genre	Records of Teachings Received - thob yig - gsan yig
Colophon	།དེ་ལྟར་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་གསན་ཡིག་རིན་པོ་ཆེའི་དོ་ཤལ་ཞེས་བྱ་བ་འདི་ཉིད་ཀྱི་གཞུང་རྣམས་དུས་གསུམ་སྲས་བཅས་རྒྱལ་བའི་ཡེ་ཤེས་ཀྱི་སྐུ་གཅིག་པུ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའི་གསན་ཐོ་སོགས་ལ་གཞི་མཛད་ནས་སྐྱབས་མཆོག་འཁོར་ལོའི་མགོན་པོ་ཁྲི་ཆེན་རྡོ་རྗེ་འཆང་འགྱུར་མེད་སངས་རྒྱས་ཀུན་དགའ་ཉིད་ཀྱི་ཞལ་སྔ་ནས་ལྗགས་བསྒྲིགས་གནང་འདུག་པར། སླར་གོང་འོག་གི་བརྗོད་པ་འདི་ལྟ་བུ་ཞིག་སྦྱོར་བར་གྱིས་ཤིག་ཅེས་བཀའ་སྩལ་ནོར་བུའི་ཅོན་པན་སྤྱི་བོར་བཅིངས་པ་ལ་བརྟེན་ནས། རིས་མེད་པའི་བསྟན་པ་ལ་མཆོག་ཏུ་དད་ཅིང་། མཁས་ཤིང་དངོས་གྲུབ་བརྙེས་པའི་ཡོངས་འཛིན་དམ་པ་རྒྱ་མཚོའི་ཞབས་རྡུལ་ལ་སྤྱི་བོས་རེག་པ་མང་དུ་ཐོས་པའི་ཤར་མདོ་ཁམས་ཀྱི་བཙུན་པ་ཆོས་སྨྲ་བའི་གཟུགས་བརྙན་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་ཞེས་བྱ་བའི་རྒྱལ་ཁམས་ཀྱི་དཱ་རི་དྲྭས་འོག་མིན་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་སྦྱར་བའི་དགེ་བས་སྐྱབས་མགོན་བླ་མ་མཆོག་ཉིད་ཞབས་པད་བསྐལ་བརྒྱར་བརྟན་ཅིང་ཆོས་ཀྱི་འཁོར་ལོ་རྟག་ཏུ་བསྐོར་བ་ལ་བརྟེན་ནས། ཐུབ་བསྟན་རིན་པོ་ཆེ་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་རིང་ལུགས་ཕྱོགས་དང་དུས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།།
	de ltar zab pa dang rgya che ba'i dam pa'i chos kyi gsan yig rin po che'i do shal zhes bya ba 'di nyid kyi gzhung rnams dus gsum sras bcas rgyal ba'i ye shes kyi sku gcig pu gter chen chos kyi rgyal po 'gro 'dul gter bdag gling pa'i gsan tho sogs la gzhi mdzad nas skyabs mchog 'khor lo'i mgon po khri chen rdo rje 'chang 'gyur med sangs rgyas kun dga' nyid kyi zhal snga nas ljags bsgrigs gnang 'dug par/__slar gong 'og gi brjod pa 'di lta bu zhig sbyor bar gyis shig ces bka' stsal nor bu'i con pan spyi bor bcings pa la brten nas/__ris med pa'i bstan pa la mchog tu dad cing /__mkhas shing dngos grub brnyes pa'i yongs 'dzin dam pa rgya mtsho'i zhabs rdul la spyi bos reg pa mang du thos pa'i shar mdo khams kyi btsun pa chos smra ba'i gzugs brnyan 'jam dbyangs mkhyen brtse'i dbang po kun dga' bstan pa'i rgyal mtshan zhes bya ba'i rgyal khams kyi dA ri drwas 'og min o rgyan smin grol gling nges pa don gyi dga' ba'i tshal chen por sbyar ba'i dge bas skyabs mgon bla ma mchog nyid zhabs pad bskal brgyar brtan cing chos kyi 'khor lo rtag tu bskor ba la brten nas/__thub bstan rin po che spyi dang /__khyad par snga 'gyur rdo rje theg pa'i ring lugs phyogs dang dus thams cad du dar zhing rgyas la yun ring du gnas par gyur cig__/sarba dA ka l+yA NaM b+ha ba tu//

Tibetan Text

Wylie

[edit]

༅། །རཏྣཱ བ ཧཱ ར ག མྦྷི རོ དཱ ར ས དྡྷ རྨཱ ཎཱཾ པྲཱཔྟ ཀྵ ར ནཱ མ བི ཧ ར ཏི སྨ།

༄༅། །ཟབ་པ་དང་རྒྱ་ཆེ་བའི་ཆོས་ཀྱི་ཐོབ་ཡིག་རིན་པོ་ཆེའི་དོ་ཤལ་ཞེས་བྱ་བ་བཞུགས་སོ། །

༈ སྡེབ་སྦྱོར་མཉམ་པའི་བྲྀཏྟ་ཡི་གེ་བཅོ་བརྒྱད་པ་བསྟན་འཛིན་གྱི་བྱེ་བྲག་མེ་ཏོག་གཡོ་བའི་འཁྲི་ཤིང་ཞེས་བྱ་བའི་པྲསྟཱ་རས་མཛེས་པར་བྱས་པ་དགེ། །

༄༅། །ཨཱདྱཀྴརྱཱཎཱཾསུཤམིཏམཧཱདཱིཔཀཾདྷརྨཀཱཡཿ སཔྟཱདྭཡྻཱདྒིབིལལིཏབརཾཛྙཱནསཾབྷོགཀཱཡཿ ༄༅། །གཟོད་ནས་མི་འགྱུར་ཤིན་ཏུ་ཞི་བ་འོད་གསལ་ཆེན་པོ་ཆོ༷ས་ཀྱི་སྐུ༷། །ཟུང་འཇུག་ཡེ་ཤེས་མཆོག་གི་རྣམ་རོལ་ཡན་ལག་བདུན་ལྡན་ལོ༷ངས་སྤྱོད༷་རྫོགས། །

༄། །བིཤྭཾདམྱཱནཱཾཙིཏནུགཔྲིཐུཾརཱུཾཔྱནིརྨཱཀཀཱཡཿ ཀཱལནྡུཤྲཱིམཱཾནབྷིདགུརུབྷིརྦོདྷིརནྟེཏྲིཀཱཡཿ ༄༅། །མཐའ་ཀླས་གདུལ་བྱའི་བསམ་པའི་རྗེས་འགྲོ་སྣ་ཚོགས་གཟུགས་ཅན་སྤྲུལ་པའི་སྐུ། །སྐུ་གསུམ་དབྱེར་མེད་དཔལ་ལྡན་བླ་མས་བྱངས་ཆུབ་བར་དུ་སྐྱོང་གྱུར་ཅིག

༡ །བྲལ་དང་སྨིན་པའི་ཡོན་ཏན་རྨད་བྱུང་དོན་གཉིས་མཐར་ཕྱིན་རྫོགས་ས༷ངས་རྒྱས༷། །འགོག་དང་ལམ་གྱི་བདེན་པས་བསྡུས་པ་ཞི་བསིལ་ཆགས་བྲལ་དམ་པའི་ཆོ༷ས། །རིག་གྲོལ་རྣམ་ཐར་བརྒྱད་ཀྱི་རང་གཟུགས་ཚོགས་ཀྱི་ཞིང་གྱུར་དགེ༷་འདུ༷ན་ཏེ། །དཀོན་མཆོག་རིན་ཆེན་རྣམ་པ་གསུམ་གྱིས་ཤིས་པའི་མེ་ཏོག་ཆར་དུ་བསྙིལ། ༢ །ལྷན་སྐྱེས་རྣམ་ཀུན་མཆོག་ལྡན་དབྱིངས་ལས་སྒྱུ་འཕྲུལ་དྲྭ་བའི་སྤྲིན་བཀོད་པ། །ཞི་ཆགས་ཁྲོ་བོའི་ཉམས་འགྱུར་མཐའ་ཀླས་གང་འདུལ་སྒྱུ་མའི་སྐུར་སྣང་བ། །རྒྱུད་སྡེ་དྲུག་གི་ཡི་དམ་ལྷ་དང་གནས་གསུམ་དཔའ་བོ་རྣལ་འབྱོར་མས། །མཆོག་ཐུན་དངོས་གྲུབ་རྒྱ་མཚོའི་གནས་ལ་གེགས་མེད་ཉིད་དུ་དབུགས་འབྱིན་མཛོད། ༣ །ཀུན་བཟང་རིགས་ལྔ་གསང་བདག་དཔའ་བོ་རིགས་ཅན་དྲ་མ་རྣམ་པ་ལྔ། །དགའ་རབ་ཤྲཱི་སེང་ཛྙཱ་ན་སཱུ་ཏྲ་དཔལ་ཆེན་གྲུབ་པའི་སློབ་དཔོན་བརྒྱད། །འཛམ་གླིང་མཛེས་པའི་རྒྱན་མཆོག་དྲུག་དང་རྣལ་འབྱོར་དབང་ཕྱུག་བརྒྱད་ཅུ་སོགས། །བརྒྱུད་གསུམ་རིག་འཛིན་པཎ་གྲུབ་རྒྱ་མཚོའི་ཞབས་སེན་ནོར་བུར་ཕྱག་བགྱིའོ། ༤ །ཁྱད་པར་ཀ་དག་ཆུ་གཏེར་ཀློང་ལས་ལྷུན་གྲུབ་སྣང་བཞིའི་ཆུ་སྐྱེས་སྦུབས། །ཟུང་འཇུག་འཇའ་ལུས་རྡོ་རྗེའི་སྐུར་སྣང་སྲས་བཅས་རྒྱལ་བའི་ཕྲིན་ལས་པ། །གངས་ཅན་འགྲོ་ལ་བཀའ་དྲིན་མཚུངས་མེད་སང༷ས་རྒྱས༷་གཉིས༷་པ༷་ཨོ༷་རྒྱན༷་རྗེའི། །རྣམ་པར་ཐར་པ་དྲན་པའི་མོད་ནས་རབ་གུས་པདྨོ་སྙིང་དབུས་འཛུམ། ༥ །བསྟན་པའི་རྩ་བ་ཆོས་འདུལ་སྲོལ་འབྱེད་བྱང་ཆུབ་སེམས་དཔའ་ཞི་བ་འཚོ། །འཇིག་རྟེན་མིག་གཅིག་བཻ་རོ་ཙ་ན་སྐ་ཅོག་ལ་སོགས་ལོ༷་པཎ༷་དང་། །རིགས་གསུམ་སྒྱུ་འཕྲུལ་ཆོ༷ས་རྒྱལ༷་མེས་དབོན་གཉགས་གནུབས་ཟུར་པ་རོང་ཟོམ་ཆེ། །ཉང་རལ་ཆོས་དབང་ཀུན་མཁྱེན་རྗེ་སོགས་བཀ༷འ་ག༷ཏེར་བསྟ༷ན་འཛི༷ན་རྒྱ་མཚོར་འདུད། ༦ །ཆེས་ཆེར་ཤིན་ཏུ་སྙིགས་མའི་དུས་འདིར་ནང་རྒྱུད་སྡེ་གསུམ་ཉིན་མོར་བྱེད། །སླར་ཡང་འདྲེན་པའི་ཤིང་རྟ་གཅིག་གྱུར་ཆོ༷ས་ཀྱི༷་རྒྱལ༷་པོ༷་གཏེ༷ར་བད༷ག་གླིང༷་། །ཡབ་སྲས་བརྒྱུད་པར་བཅས་པའི་རྣམ་ཐར་ཟླ་ཤེལ་བདུད་རྩིའི་འཛུམ་དཀར་ལ། །གུས་པ་ཆེན་པོའི་ཀུ་མུ་ད་དཔལ་སྙིང་གི་དབུས་སུ་ལྷག་པར་གྲོལ། ༧ །མི་འགྱུར༷་འཕོ་མེ༷ད་རྣམ་ཀུན་མཆོག་ལྡན་ཡེ་ཤེས་རྡོ༷་རྗེ༷འི་མཁའ་དབྱིངས་སུ། །ཐུགས་རྗེའི་རྣ༷མ་འཕྲུལ༷་སྣང་བའི་མུ་ཁྱུད་གཟུགས་ཅན་བཞིན་དུ་འཆར་བའི་མོད། །བསྟན་འགྲོའི་ཕན་བདེའི༷་པདྨོ༷་རྒྱས་མཛད་དབ༷ང་གི་རྒྱལ༷་པོར་གྲགས་འབར་བའི། །ཞབས་སེན་བཀྲ་ཤིས་རེ་ཁཱ་གསར་པས་བྱང་ཆུབ་བར་དུ་རྗེས་སུ་ཟུངས། ༨ །འཇམ་དཔལ་དབྱངས་དངོས་ཚུལ༷་གནས་ཁྲིམ༷ས་ལྡན་འདུལ་འཛིན་བྱེ་བའི་གཙུག་རྒྱན་དང་། །པ༷དྨའི༷་རིང་ལུགས་ཉིན་བཞིན་གསལ་མཛད་དབ༷ང་གི༷་རྒྱལ༷་པོ་རྡོ༷་རྗེ༷་འཛིན། །ཕྲི༷ན་ལ༷ས་ཆོ༷ས་ཀྱི་སྒྲོན༷་མའི་སྣང་བས་ཐར་པའི་ལམ་བཟང་སྟོན་མཁས་པའི། །དཀྱིལ་འཁོར་རྒྱ་མཚོའི་ཁྱབ་བདག་རྣམ་གསུམ་གུས་པའི་གཙུག་གིས་རྟག་ཏུ་མཆོད། ༩ །མཁས་ཤིང་ཤིན་ཏུ་གྲུབ་པའི་ཁྱུ་མཆོག་རྒྱལ་སྲས་གཞ༷ན་ཕ༷ན་མཐ༷འ་ཡས་དང་། །འཇ༷མ་དབྱང༷ས་སྙིང་རྗེའི་ཡེ་ཤེས་རྣམ་རོལ་ལུང་རྟོགས་ཆོ༷ས་ཀྱི༷་རྒྱལ༷་མཚ༷ན་ཞབས། །ཟབ་རྒྱས་གདམས་པའི་བསྟན༷་པ་འཛི༷ན་མཛད་མཁྱེན་བརྩེའི་ཡོན་ཏན་དཔ༷ལ་འབ༷ར་བའི། །བཀའ་དྲིན་ཟླ་བྲལ་འདྲེན་པ་གསུམ་ལ་གཅིག་ཏུ་བསྔགས་པའི་མེ་ཏོག་འཐོར། ༡༠ །བཅུ་ཕྲག་རིག་ལམ་སྨྲ་བའི་དབང་པོ་བསྟན༷་འཛི༷ན་སྐྱེས༷་མཆོ༷ག་པཎྜི་ཏ། །སུམ་ལྡན་རྡོ༷་རྗེ༷་འཛི༷ན་པ༷འི་དེད་དཔོན་རིག་འཛིན་འགྱུར༷་མེ༷ད་ཚེ༷་དབ༷ང་ཞབས། །གཙུག་ལག་གཞུང་མང་གཟིགས་པའི་སྤྱན་ཡངས་མ༷་ཎི༷འི་མཚ༷ན་གྱི་སྒེག་འཆང་བའི། །ཐུགས་རྗེའི་དབང་ཕྱུག་མཁས་གྲུབ་གསུམ་གྱིས་རྣམ་ཀུན་ཤིས་པའི་མེ་ཏོག་སྩོལ། ༡༡ །གཞན་ཡང་ལེགས་གསུངས་མཐའ་དག་སྩོལ་མཁས་ར༷བ་འབྱམ༷ས་སྨྲ་བ་མི༷་ཕ༷མ་སོགས། །བདག་རྒྱུད་དད་གསུམ་ཞིང་ས་གཤིན་པོར་སྨིན་གྲོལ་གདམས་པའི་ཟིལ་དངར་གྱིས། །དོན་གཉིས་ཨུཏྤལ་སྙེ་མ་རྒྱས་མཛད་རི༷ས་མེ༷ད་ཡོ༷ངས་འཛི༷ན་མཆོག་རྣམས་ལ། །ཚད་མེད་བཀའ་དྲིན་རྗེས་སུ་དྲན་པའི་གུས་པ་ཆེན་པོས་ཕྱག་འཚལ་ནས། ༡༢ །དེ་དག་ཐུགས་རྗེའི་འཇུག་པ་ལ་བརྟེན་ཟབ་ཅིང་རྒྱ་ཆེའི་ད༷མ་པ༷འི་ཆོ༷ས། །ཇི་ལྟར་ཐོ༷བ་པའི་ཚུལ༷་ལས་ཉེར་བརྩམས་བརྗོད་པ་ཉུང་ངུ་རྣམ་གསལ་བ། །ཡིད་འཕྲོག་རི༷ན་ཆེ༷ན་དོ༷་ཤ༷ལ་གསར་པ་རང་ཉིད་དད་པའི་ཟུར་ཕུད་དང་། །སྐལ་བཟང་རྣ་བའི་རྒྱན་དུ་བཀོད་འདིར་དོན་གཉེར་ཚོགས་རྣམས་དགའ་བས་ཉོན། ༡༣ །ཞེས་དགེ་ལེགས་སུ་བྱ་བ་དང་བརྩམ་པར་དམ་བཅའ་བའི་ཚིག་གི་ཕྲེང་བ་ཅུང་ཟད་ཀྱིས་མདུན་བསུས་ཏེ། གང་ལས་སུ་བགྱི་བ་ནི། འདི་ལྟར་གཟོད་མ་ནས་ཤིན་ཏུ་ཞི་བའི་དབྱིངས་སུ་རིག་པའི་ཡེ་ཤེས་རང་གྲོལ་བས་སྐུ༷་ད༷ང་ཡེ༷་ཤེ༷ས་འདུ་འབྲལ་མེད་པའི་ངང་ལས་མ་གཡོས་བཞིན་དུ། ཚད་མེད་པའི་སྙིང་རྗེ་དང་སྨོན་ལམ་ཆེན་པོའི་གཞན་དབང་ལ་བརྟེན་ནས། རང་སྣང་ཤིན་ཏུ་རྣམ་པར་དག་པ་རྡོ་རྗེའི་འོག་མིན་དང་། ས་དགུ་པ་ལ་སྣང་བའི་འོག་མིན་ཙམ་པོ་པ་དང་། ས་བརྒྱད་པ་ལ་སྣང་བའི་བཏགས་པའི་འོག་མིན་སོགས་སུ་རིགས་དྲུག་གི་ཁྱབ་བདག་སྟོན་པ་ཀུན་བཟ༷ང་རྡོ༷་རྗེ༷་འཆ༷ང་ཆེན་པོ་ཉིད། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་རྣམ་པར་འཕྲུལ་ཞིང་། རྡོ་རྗེ་མི་ཤིགས་པ་ནཱ་དའི་རང་གདངས་ལས་ཆོས་ཀྱི་འཁོར་ལོའི་ཚུལ་རྟག་ཏུ་བསྐོར་བ་དང་། དེ་དག་གི་ཐུགས་རྗེའི་གཟུགས་བརྙན་རང་བཞིན་དང་། འགྲོ་འདུལ་སྤྲུལ་པའི་ཞིང་ཁམས་རྒྱ་མཚོར་གདུལ་བྱ་སྣ་ཚོགས་པའི་རིགས་ཅན་རྣམས་ལ་འཁོར་ལོས་བསྒྱུར་བའམ། ཆགས་བྲལ་གྱི་རྣམ་པ་སོགས་གང་འདུལ་འདོད་དགུར་བསྒྱུར་བའི་མཚན་དང་སྐུ་ཡི་རྣམ་རོལ་བསམ་གྱིས་མི་ཁྱབ་པར་སྟོན་པ་ལས། རེ་ཞིག་རྩོད་ལྡན་ཚེ་ལོ་བརྒྱ་པའི་དུས་འདིར་འཛམ་བུའི་ལྗོན་པས་མཚན་པའི་ལྗོངས་སུ་ཚུ་རོལ་མཐོང་བའི་འགྲོ་བ་ཐུན་མོང་གི་སྣང་ངོར་ལྷ་དང་བཅས་པའི་འཇིག་རྟེན་གྱི་སྟོན་པ་གཅིག་པུར་གྱུར་པ་མཉ༷མ་མེ༷ད་ཤཱ༷ཀྱ༷་སེ༷ང་གེ༷་ཞེས་མཚན་གྱི་ཟླ་སྣང་དཀར་པོས་ས་གསུམ་དུ་ཁྱབ་པ་གང་དེས་ལེགས་པར་གསུངས་པའི་ཆོས་ཀྱི་ཕུང་པོ་དང་། ཐེག་པའི་བྱེ་བྲག་སོགས་བྱིས་པའི་བློ་གྲོས་ཀྱིས་བསམ་པར་མི་ནུས་ཀྱང་། མདོར་བསྡུ་བའི་དབང་དུ་བྱས་ན་བརྗོད་བྱའི་ངོས་ནས་བསླབ་པ་གསུམ་དང་། རྗོད་བྱེད་ཀྱི་ངོས་ནས་སྡེ་སྣོད་གསུམ་དུ་འདུ་ཞིང་། དེ་ཐམས་ཅད་ཉམས་སུ་བླང་བའི་ཚུལ་གྱི་མངོན་པར་རྟོགས་པའང་། དཔལ་མགོན་འཕགས་པ་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་རང་རང་གིས་ཇི་ལྟར་ཁས་བླངས་པའི་ཚུལ་ཁྲིམས་རྣམ་པར་དག་པས་གཞིར་བཟུང་སྟེ། ཐོ༷ས་བས༷མ་སྒོ༷མ་གསུ༷མ་ལ་རིམ་གྱིས་ཞུགས་པ་ཉིད་ཡིན་ལ། དེའི་རྒྱུ་མཚན་ཡང་། ཡིད་ཅན་ཐམས་ཅད་འཁོར་བར་འཆིང་བའི་རྩ་བ་ནི་འཇིག་ལྟ་དང་མཚུངས་པར་ལྡན་པའི་བདག་ཏུ་འཛིན་པ་ཁོ་ན་ལས་གཞན་མ་དམིགས་པའི་ཚུལ། དཔལ་ཆོས་ཀྱི་གྲགས་པས་ཚད་མ་རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། །བདག་གཞན་ཆ་ལས་འཛིན་དང་ལྡང་། །འདི་དག་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་སོ། །དེའི་དངོས་ཀྱི་གཉེན་པོ་ནི་བདག་མེད་རྟོགས་པའི་ཤེས་རབ་གཅིག་པུ་ལ་རག་ལས་པ་ཡིན་ཏེ། སྔ་མ་ལས། སྟོང་ཉིད་ལྟ་དང་དེ་འགལ་ཕྱིར། །སྒོམ་པ་ལྷག་མ་དེ་དོན་ཡིན། །དེ་ཡི་རང་བཞིན་དངོས་ཀུན་དང་། །འགལ་བར་རབ་ཏུ་གྲུབ་པ་ཡིན། །ཅེས་གསུངས། དེ་ལྟ་བུའི་བདག་མེད་རྟོགས་པའི་ཤེས་རབ་ཁྱད་པར་ཅན་བསྐྱེད་པ་ལའང་། ཐོག་མར་བསམ་བྱུང་གི་ཤེས་རབ་ཀྱིས་དོན་རང་གི་མཚན་ཉིད་ཚུལ་བཞིན་དུ་ཡིད་ལ་བྱེད་པ་དང་། ཐོས་བྱུང་གི་ཤེས་རབ་ཀྱིས་དོན་སྤྱིའི་མཚན་ཉིད་གཏན་ལ་འབེབས་པ་རྣམས་རིམ་བཞིན་སྔོན་དུ་འགྲོ་དགོས་པའི་ཚུལ། རྒྱལ་བ་གཉིས་པ་མ་ཕམ་པས། འདི་ན་དང་པོར་ཐོས་པ་ལ་བརྟེན་ཚུལ་བཞིན་ཡིད་ལ་བྱེད་པ་འབྱུང་། །ཚུལ་བཞིན་ཡིད་ལ་བྱེད་པ་ལ་བརྟེན་ཡང་དག་དོན་ཡུལ་ཡེ་ཤེས་འབྱུང་། །ཞེས་དང་། འཕགས་མཆོག་ཀླུ༷་སྒྲུབ༷་ཞབས་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་འབྱུང་། །ཞེས་དང་། ཤེས་རབ་མཆོག་ཡིན་དེའི་གཞི་ནི། །ཐོས་པ་ཡིན་ཕྱིར་ཐོས་པ་མཆོག །ཅེས་གསུངས་པའི་ཕྱིར་དང་། གཞན་ཡང་གནས་སྐབས་སུ་ཕྱི་ནང་གི་གྲུབ་མཐའ་ཐོས་པས་བླང་དོར་གྱི་གནས་ཤེས་པ་དང་། ཚུལ་ཁྲིམས་ཀྱི་བསླབ་པ་ཐོས་པས་ཉེས་སྤྱོད་ཆེན་པོའི་གནས་ལས་ལྡོག་པ་དང་། ཏིང་ངེ་འཛིན་གྱི་བསླབ་པ་ཐོས་པས་དོན་མེད་པའི་ཡུལ་ལ་རྣམ་པར་གཡེང་བ་སྤོང་བ་དང་། མཐར་ཐུག་ཤེས་རབ་ཀྱི་བསླབ་པ་ཐོས་པས་ཟག་ཟད་མངོན་དུ་བྱས་ཏེ་མྱ་ངན་ལས་འདས་པའི་གོ་འཕང་ཐོབ་པའི་བར་དུ་འགྱུར་བ་ལ་དགོངས་ནས། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མེད་སྤོང་བར་འགྱུར། །ཐོས་པས་མྱ་ངན་འདས་པའང་ཐོབ། །ཅེས་དང་། སྐྱེས་རབས་ལས། ཐོས་པའི་རྗེས་ཞུགས་སྒྲུབ་པ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །ཞེས་སོགས་འཕགས་དང་མཁས་པའི་ཚོགས་ཀྱིས་རྒྱུ་མཚན་དུ་མའི་སྒོ་ནས་ལན་གཅིག་མ་ཡིན་པར་བསྔགས་པས་ཡིད་དྲངས་ཏེ། ཚེ་རབས་སྔ་མ་རྣམས་སུ་ལེགས་པར་སྤྱད་པའི་འབྲས་བུ་ཅུང་ཟད་ཀྱིས་བསྔགས་འོས་དམ་པའི་རིགས་སུ་དལ་འབྱོར་གྱི་རྟེན་སྐྱོན་མེད་འཐོབ་པའི་སྐབས་འདིར་རང་གཞན་གྱི་དོན་དུ་སྙིང་པོ་ལེན་པར་འདོད་པའི་བསམ་པ་རྣམ་པར་དག་པས་ཀུན་ནས་བསླངས་ཏེ། དཔལ་ལྡན་བླ་མ་རྡོ་རྗེ་འཆང་དང་ཞལ་མི་གཉིས་པ་རྣམས་ཀྱི་ཞབས་པད་ལ་ཡན་ལག་མཆོག་གིས་གུས་པས་བཏུད་ནས། མཉེས་པ་གསུམ་གྱིས་བསྙེན་བཀུར་བ་དང་ཆབ་གཅིག་ཟབ་པ་དང་རྒྱ་ཆེ་བའི་དམ་པའི་ཆོས་ཆ་ཙམ་ཞིག་ཐོབ་པའི་ཚུལ་རྣམས་རང་ཉིད་ཀྱི་བརྗེད་ངས་སྤོང་བ་དང་། དོན་གཉེར་ཅན་གཞན་དག་ལའང་སྨན་པའི་བསམ་པས་ཉུང་ངུ་རྣམ་གསལ་གྱི་ཚུལ་དུ་འགོད་པ་ལ། ཐོག་མར་བསྟན་པ་རིན་པོ་ཆེའི་སྒོར་ཇི་ལྟར་ཞུགས་པའི་ཚུལ། རྒྱུ་མཚན་ཉིད་ཀྱི་ཐེག་པ་ཅུང་ཟད་ཐོབ་ཚུལ། འབྲས་བུའི་ཐེག་པ་གསང་སྔགས་བཀའ་མའི་ཐོབ་ཚུལ། གཏེར་མ་རྗེས་འབྲངས་དང་བཅས་པའི་ཐོབ་ཚུལ། གསང་སྔགས་གསར་མ་རྗེས་འབྲངས་དང་བཅས་པའི་ཐོབ་ཚུལ། དེ་དག་ཀུན་གྱི་རྩ་བ་རྒྱལ་བའི་བཀའ་འགྱུར་རོ་ཅོག་ཐོབ་པའི་ཚུལ་ཏེ་དྲུག་ལས། དང་པོ་ནི། ། ༈

འདིར་སྨྲས་པ། དཔལ་ལྡན་སྲིད་དང་ཞི་བའི་ཐིག་ལེར་བྱང་ཆུབ་སྙིང་པོ་མངོན་གྱུར་ཡང་། །དཔལ་ལྡན་འཇིག་རྟེན་དགེ་བའི་ཕྲིན་ལས་རྟག་པ་དམ་པར་འཆར་བའི་ཕུལ། །དཔལ་ལྡན་ཡོན་ཏན་བྱེ་བའི་འབྱུང་གནས་དཀོན་མཆོག་རིན་ཆེན་གསུམ་གྱི་དངོས། །དཔལ་ལྡན་བླ་མ་རྣམས་ཀྱི་བཀའ་དྲིན་སླར་ཡང་དྲན་པས་ཕྱག༷་བགྱིའོ༷། ༡ །ལྷག་བསམ་མཆོག་གི་ཆུ་གཏེར་ལས་བྱུང་བསོད་ནམས་དམ་པའི་མཚར་སྡུག་ཅན། །བླ་ན་ཡོད་མེད་མཆོ༷ད་པའི༷་སྤྲིན་ཕུང་ནམ་མཁའ་མཉམ་པས་མདུན་བདར་ཏེ། །ངེས་པར་འབྱུང་དང་བྱང་ཆུབ་སེམས་གཉིས་གསང་ཆེན་དམ་ཚིག་སྡོམ་པ་དང་། །ཚེ་རབས་ཀུན་ཏུ་ཆོས་ཚུལ་མཐའ་ཀླས་སྙིང་ནས་བཟུང་བའི་གཡར་དམ་ལེན། ༢ །ཐོག་མེད་དུས་ནས་ཉོན་མོངས་པ་དང་ལས་ཀྱི་ཀུན་འབྱུང་ལ་བརྟེན་ནས། །རང་བཞིན་ཉིད་དང་བཅས་པའི་སྡིག་ལྟུང་འདམ་རྫབ་སྟུག་པོའི་གཞན་དབང་གིས། །སེམས་ཀྱི་ཟླ་ཤེལ་ཁ་དོག་བསྒྱུར་བ་སྟོབས་བཞིའི་གངྒཱའི་རེག་པ་ཡིས། །སོ་སོར་བཤག༷ས་པའི༷་སྦྱོར་བ་ལ་བརྟེན་སླར་ལ་དག་པའི་མཛེས་པའང་འབར། ༣ །སློབ་དང་མི་སློབ་འཕགས་པ་རྣམས་དང་སོ་སོ་སྐྱེ་བོའི་ཚོགས་རྣམས་ཀྱིས། །ལེགས་བཤད་ཉིན་མོར་བྱེད་པའི་འོད་ཀྱིས་ཚུལ་མིན་མུན་པ་བསྙིལ་བ་དང་། །བསོད་ནམས་ལམ་དང་མྱ་ངན་འདའ་བའི་སྣང་བ་མཆོག་གི་དཔལ་སྟེར་བར། །རྗེས་སུ་ཡི༷་རང༷་པུཎྜ་རཱི་ཀ་སྙིང་གི་དབུས་སུ་གྲོལ་བར་བགྱི། ༤ །གང་དག་ཕྱོགས་བཅུའི་འཇིག་རྟེན་ཁམས་བཞུགས་སྟོབས་བཅུ་མངའ་བ་སྲས་བཅས་ལ། །འགོག་བདེན་རྟོགས་པའི་སྤྲིན་ཆེན་འཁྲིགས་ལས་ལམ་བདེན་ལུང་གི་ཆར་རྒྱུན་གྱིས། །རིགས་ཅན་གསུམ་གྱི་བློ་ཡི་ཆུ་སྐྱེས་ཐར་པའི་ཕྱོགས་སུ་གྲོལ་བའི་སླད། །ཟབ་ཅིང་རྒྱ་ཆེའི་ཆོ༷ས་ཀྱི་འཁོ༷ར་ལོ་རྟག་པ་རྒྱུན་དུ་བསྐོ༷ར་བར༷་བསྐུལ། ༥ །ཞི་བའི་དབྱིངས་སུ་དགྱེས་པའི་ཚུལ་གྱིས་མྱ་ངན་འདའ་བར་སྟོན་བཞེད་རྣམས། །ཐོག་མར་སྐྱེ་བའི་འཇུག་པ་ཟད་ན་མཐར་གྱིས་འགགས་པ་མ་མཆིས་ཕྱིར། །ཚུར་མཐོང་བྱིས་པའི་བློ་ཅན་ངོར་ཡང་འཕོ་འགྱུར་མཚན་མ་མི་གཞེས་པར། །ཡིད་ཅན་ཀུན་གྱི་སྒྲོན་མེ་གཅིག་པུར་བསྐལ་པ་རྒྱ་མཚོར་བཞུགས༷་གསོ༷ལ་འདེབས། ༦ །དེ་ལྟར་བསགས་ལས་བྱུང་བས་ཉེར་མཚོན་དུས་གསུམ་ལེགས་བྱས་ཆུ་ཀླུང་འབུམ། །སྤྲོས་པའི་རྡུལ་དང་མཛའ་བ་མ་ཡིན་འཇམ་དཔལ་མཁྱེན་པའི་ཡོང༷ས་བ༷སྔོ་དང་། །འཇུག་པ་གཅིག་པའི་ཤུལ་ལམ་ལ་ཞུགས་བྱང་ཆེན་རྒྱ་མཚོར་རོ་གཅིག་པས། །དོན་གཉིས་ཀུན་དགའི་དགའ་སྟོན་གསར་བས་ས་གསུམ་མཐའ་དག་མཛེས་གྱུར་ཅིག ༧ །ཁྱད་པར་གཞན་ཕན་ཕྲིན་ལས་མཐར་ཕྱིན་འོད་གསལ་ཆེན་པོར་སྙོམས་ཞུགས་པའི། །དཔལ་ལྡན་བླ་མ་མཆོག་རྣམས་ཟབ་དགོང༷ས་ཆོས་ཀྱི་དབྱིངས་སུ་རྫོ༷གས་པ་དང་། །ད་ལྟར་འཚོ་གཞེས་བཤད་དང་སྒྲུབ་པས་རིས་མེད་བསྟན་འཛིན་ཇི་སྙེད་ཀུན། །བསྐལ་པ་རྒྱ་མཚོར་ཞབ༷ས་པད་བརྟ༷ན་ཅིང་རྣམ་དཀར་མཛད་པ་ལྷུན་གྲུབ་ཤོག ༨ །ཡང་སྲིད་ཀུན་ཏུ་མཚན་ཙམ་ཐོབ་དཀའ་དྲི་མེད་ཐུབ༷་བསྟན༷་རིན་པོ་ཆེ། །སྤྱི་དང་བྱེ་བྲག་སྙིང་པོའི་རིང་ལུགས་ཉིན་བཞིན་གསལ་དང་ལྷན་ཅིག་པར། །དེར་འཛིན་རིག་གྲོལ་དགེ༷་འདུ༷ན་འདུས་པས་ཕྱོགས་ཀྱི་ཁམས་ཀུན་ཁྱབ་པ་དང་། །འཁོར་ལོ་གསུམ་གྱི་བགྱི་བ་རྨད་བྱུང་གོང་ནས་གོང་དུ་འཕེལ་གྱུར་ཅིག ༩ །དེ་མཐུས་ཕྱི༷་སྣོ༷ད་འཇི༷ག་རྟེན༷་ཁམས་ཀུན་རྫོགས་ལྡན་དུས་ཀྱི་འབྱོར་པ་དང་། །ནང༷་བཅུད༷་འགྲོ༷་རྣམས་དགེ་བཅུའི་སྤྱོད་ཚུལ་ནོར་བུའི་རྔ་ཡབ་གཡོབ་པ་ཡིས། །གནས་སྐབས་ཚེ་བསོད་དཔལ་འབྱོར་ལ་སོགས་མཐོ་རིས་ཡོན་ཏན་ཚོགས་རྣམས་དང་། །མཐར་ཐུག་རྣམ་པ་ཐམས་ཅད་མཁྱེན་པ་སྐུ་བཞིའི་ངལ་འཚོ་བསྟེན་པར་ཤོག ༡༠ །བདག་ཀྱང་དེང་ནས་བྱང་ཆུབ་བར་དུ་དལ་འབྱོར་མཆོག་ཐོབ་བསྟན་ལ་ཞུགས། །ངེས་པར་འབྱུང་བའི་ཚུལ་ཁྲིམས་རྣམ་དག་སྨོན་འཇུག་བྱང་སེམས་སྙིང་ལ་ཤར། །གསང་ཆེན་རིམ་གཉིས་ཟབ་མོའི་ལམ་གྱིས་ཟུང༷་འཇུག༷་གོ༷་འཕ༷ང་མྱུར་ཐོབ་ནས། །སྐུ་དང་ཡེ་ཤེས་ཕྲིན་ལས་རྨད་བྱུང་འགྲོ་ཁམས་རྒྱ་མཚོར་སྨིན་གྱུར་ཅིག ༡༡ །དེ་ལྟར་ཕན་བདེའི་གོ་འཕང་བསྒྲུབ་ལ་མི་མཐུན་བར་དུ་གཅོད་པའི་ཚོགས། །བརྒྱུད་གསུམ་རིག་འཛིན་བླ་མས་གཉེར་གཏད་ཞིང་སྐྱོང་མ་མོ་རཱ་ཧུ་ལ། །རྒྱལ་ཆེན་སྐུ་ལྔ་ཡང་ལེ་བེར་སོགས་བསྟན༷་སྲུང༷་རྒྱ༷་མཚོ༷ས་ཚར་བཅད་ནས། །བསམ་དགུའི་འདོད་པ་ཡིད་བཞིན་འཇོ་བའི་ཕྲིན་ལས་ལྷུན་གྱིས་གྲུབ་པར་མཛོད། ༡༢ །མདོར་ན་ལན་གཅིག་དྲན་པའི་མོད་ནས་སྲིད་ཞིའི་འཇིགས་པ་ཀུན་འཕྲོག་ཅིང་། །ཕུན་ཚོགས་ཤིས་དགུའི་དངོས་ཀུན་སྦྱིན་ལ་བསླུ་བ་སྤངས་པའི་གྲགས་དཀར་ཅན། །བླ་མ་མཆོག་གསུམ་ཐུགས་རྗེའི་འཇུག་པ་གཟུགས་ཅན་བཞིན་དུ་འདིར་སྣང་བས། །དགེ་ལེགས་རྟག་པ་དམ་པའི་དཔལ་གྱིས་འཇིག་རྟེན་གསུམ་ན་ཁྱབ་གྱུར་ཅིག ༡༣ །དེ་ལྟར་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་གསན་ཡིག་རིན་པོ་ཆེའི་དོ་ཤལ་ཞེས་བྱ་བ་འདི་ཉིད་ཀྱི་གཞུང་རྣམས་དུས་གསུམ་སྲས་བཅས་རྒྱལ་བའི་ཡེ་ཤེས་ཀྱི་སྐུ་གཅིག་པུ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའི་གསན་ཐོ་སོགས་ལ་གཞི་མཛད་ནས་སྐྱབས་མཆོག་འཁོར་ལོའི་མགོན་པོ་ཁྲི་ཆེན་རྡོ་རྗེ་འཆང་འགྱུར་མེད་སངས་རྒྱས་ཀུན་དགའ་ཉིད་ཀྱི་ཞལ་སྔ་ནས་ལྗགས་བསྒྲིགས་གནང་འདུག་པར། སླར་གོང་འོག་གི་བརྗོད་པ་འདི་ལྟ་བུ་ཞིག་སྦྱོར་བར་གྱིས་ཤིག་ཅེས་བཀའ་སྩལ་ནོར་བུའི་ཅོན་པན་སྤྱི་བོར་བཅིངས་པ་ལ་བརྟེན་ནས། རིས་མེད་པའི་བསྟན་པ་ལ་མཆོག་ཏུ་དད་ཅིང་། མཁས་ཤིང་དངོས་གྲུབ་བརྙེས་པའི་ཡོངས་འཛིན་དམ་པ་རྒྱ་མཚོའི་ཞབས་རྡུལ་ལ་སྤྱི་བོས་རེག་པ་མང་དུ་ཐོས་པའི་ཤར་མདོ་ཁམས་ཀྱི་བཙུན་པ་ཆོས་སྨྲ་བའི་གཟུགས་བརྙན་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་ཞེས་བྱ་བའི་རྒྱལ་ཁམས་ཀྱི་དཱ་རི་དྲྭས་འོག་མིན་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོར་སྦྱར་བའི་དགེ་བས་སྐྱབས་མགོན་བླ་མ་མཆོག་ཉིད་ཞབས་པད་བསྐལ་བརྒྱར་བརྟན་ཅིང་ཆོས་ཀྱི་འཁོར་ལོ་རྟག་ཏུ་བསྐོར་བ་ལ་བརྟེན་ནས། ཐུབ་བསྟན་རིན་པོ་ཆེ་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་རིང་ལུགས་ཕྱོགས་དང་དུས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

zab pa dang rgya che ba'i chos kyi thob yig rin po che'i do shal/

1. /__/rat+nA_ba_hA_ra_ga_m+b+hi_ro_dA_ra_sa_d+d+ha_rmA_NAM_prAp+ta_k+Sha_ra_nA_ma_bi_ha_ra_ti_sma/

@#/__/zab pa dang rgya che ba'i chos kyi thob yig rin po che'i do shal zhes bya ba bzhugs so/_/_ !_sdeb sbyor mnyam pa'i br-it+ta yi ge bco brgyad pa bstan 'dzin gyi bye brag me tog g.yo ba'i 'khri shing zhes bya ba'i prastA ras mdzes par byas pa dge/_/ @#/_/Ad+yak+shar+yANAMsushamitamahAdIpakaMd+harmakAyaH___________________________sap+tAdway+YAd+gibilalitabaraMdz+nyAnasaMb+hogakAyaH @#/_/gzod nas mi 'gyur shin tu zhi ba 'od gsal chen po choXs kyi skuX/___/zung 'jug ye shes mchog gi rnam rol yan lag bdun ldan loXngs spyodaX rdzogs/_/ @/__/bishwaMdamyAnAMtsitanugaprithuMrUMpyanirmAkakAyaH___________________________kAlan+dushrImAMnab+hidagurub+hirbod+hiran+tetrikAyaH @#/__/mtha' klas gdul bya'i bsam pa'i rjes 'gro sna tshogs gzugs can sprul pa'i sku/___/sku gsum dbyer med dpal ldan bla mas byangs chub bar du skyong gyur cig__1_/bral dang smin pa'i yon tan rmad byung don gnyis mthar phyin rdzogs saXngs rgyasaX/__/'gog dang lam gyi bden pas bsdus pa zhi bsil chags bral dam pa'i choXs/__/rig grol rnam thar brgyad kyi rang gzugs tshogs kyi zhing gyur dgeX 'duXn te/__/dkon mchog rin chen rnam pa gsum gyis shis pa'i me tog char du bsnyil/__2_/lhan skyes rnam kun mchog ldan dbyings las sgyu 'phrul drwa ba'i sprin bkod pa/__/zhi chags khro bo'i nyams 'gyur mtha' klas gang 'dul sgyu ma'i skur snang ba/__/rgyud sde drug gi yi dam lha dang gnas gsum dpa' bo rnal 'byor mas/__/mchog thun dngos grub rgya mtsho'i gnas la gegs med nyid du dbugs 'byin mdzod/__3__/kun bzang rigs lnga gsang bdag dpa' bo rigs can dra ma rnam pa lnga/__/dga' rab shrI seng dz+nyA na sU tra dpal chen grub pa'i slob dpon brgyad/__/'dzam gling mdzes pa'i rgyan mchog drug dang rnal 'byor dbang phyug brgyad cu sogs/__/brgyud gsum rig 'dzin paN grub rgya mtsho'i zhabs sen nor bur phyag bgyi'o/__4__/khyad par ka dag chu gter klong las lhun grub snang bzhi'i chu skyes sbubs/__/zung 'jug 'ja' lus rdo rje'i skur snang sras bcas rgyal ba'i phrin las pa/__/gangs can 'gro la bka' drin mtshungs med sangaXs rgyasaX gnyisaX paX oX rgyanaX rje'i/__/rnam par thar pa dran pa'i mod nas rab gus pad+mo snying dbus 'dzum/__5__/bstan pa'i rtsa ba chos 'dul srol 'byed byang chub sems dpa' zhi ba 'tsho/__/'jig rten mig gcig bai ro tsa na ska cog la sogs loX paNaX dang /__/rigs gsum sgyu 'phrul choXs rgyalaX mes dbon gnyags gnubs zur pa rong zom che/__/nyang ral chos dbang kun mkhyen rje sogs bkaX' gaXter bstaXn 'dziXn rgya mtshor 'dud/__6__/ches cher shin tu snyigs ma'i dus 'dir nang rgyud sde gsum nyin mor byed/__/slar yang 'dren pa'i shing rta gcig gyur choXs kyiX rgyalaX poX gteXr bdaXg glingaX /__/yab sras brgyud par bcas pa'i rnam thar zla shel bdud rtsi'i 'dzum dkar la/__/gus pa chen po'i ku mu da dpal snying gi dbus su lhag par grol/__7__/mi 'gyuraX 'pho meXd rnam kun mchog ldan ye shes rdoX rjeX'i mkha' dbyings su/__/thugs rje'i rnaXm 'phrulaX snang ba'i mu khyud gzugs can bzhin du 'char ba'i mod/__/bstan 'gro'i phan bde'iX pad+moX rgyas mdzad dbaXng gi rgyalaX por grags 'bar ba'i/__/zhabs sen bkra shis re khA gsar pas byang chub bar du rjes su zungs/__8__/'jam dpal dbyangs dngos tshulaX gnas khrimaXs ldan 'dul 'dzin bye ba'i gtsug rgyan dang /__/paXd+ma'iX ring lugs nyin bzhin gsal mdzad dbaXng giX rgyalaX po rdoX rjeX 'dzin/__/phriXn laXs choXs kyi sgronaX ma'i snang bas thar pa'i lam bzang ston mkhas pa'i/__/dkyil 'khor rgya mtsho'i khyab bdag rnam gsum gus pa'i gtsug gis rtag tu mchod/__9__/mkhas shing shin tu grub pa'i khyu mchog rgyal sras gzhaXn phaXn mthaX' yas dang /__/'jaXm dbyangaXs snying rje'i ye shes rnam rol lung rtogs choXs kyiX rgyalaX mtshaXn zhabs/__/zab rgyas gdams pa'i bstanaX pa 'dziXn mdzad mkhyen brtse'i yon tan dpaXl 'baXr ba'i/__/bka' drin zla bral 'dren pa gsum la gcig tu bsngags pa'i me tog 'thor/__10__/bcu phrag rig lam smra ba'i dbang po bstanaX 'dziXn skyesaX mchoXg paN+Di ta/__/sum ldan rdoX rjeX 'dziXn paX'i ded dpon rig 'dzin 'gyuraX meXd tsheX dbaXng zhabs/__/gtsug lag gzhung mang gzigs pa'i spyan yangs maX NiX'i mtshaXn gyi sgeg 'chang ba'i/__/thugs rje'i dbang phyug mkhas grub gsum gyis rnam kun shis pa'i me tog stsol/__11__/gzhan yang legs gsungs mtha' dag stsol mkhas raXb 'byamaXs smra ba miX phaXm sogs/__/bdag rgyud dad gsum zhing sa gshin por smin grol gdams pa'i zil dngar gyis/__/don gnyis ut+pal snye ma rgyas mdzad riXs meXd yoXngs 'dziXn mchog rnams la/__/tshad med bka' drin rjes su dran pa'i gus pa chen pos phyag 'tshal nas/__12__/de dag thugs rje'i 'jug pa la brten zab cing rgya che'i daXm paX'i choXs/__/ji ltar thoXb pa'i tshulaX las nyer brtsams brjod pa nyung ngu rnam gsal ba/__/yid 'phrog riXn cheXn doX shaXl gsar pa rang nyid dad pa'i zur phud dang /__/skal bzang rna ba'i rgyan du bkod 'dir don gnyer tshogs rnams dga' bas nyon/__13__/zhes dge legs su bya ba dang brtsam par dam bca' ba'i tshig gi phreng ba cung zad kyis mdun bsus te/__gang las su bgyi ba ni/__'di ltar gzod ma nas shin tu zhi ba'i dbyings su rig pa'i ye shes rang grol bas skuX daXng yeX sheXs 'du 'bral med pa'i ngang las ma g.yos bzhin du/__tshad med pa'i snying rje dang smon lam chen po'i gzhan dbang la brten nas/__rang snang shin tu rnam par dag pa rdo rje'i 'og min dang /__sa dgu pa la snang ba'i 'og min tsam po pa dang /__sa brgyad pa la snang ba'i btags pa'i 'og min sogs su rigs drug gi khyab bdag ston pa kun bzaXng rdoX rjeX 'chaXng chen po nyid/__de bzhin gshegs pa dang /__rdo rje dang /__rin po che dang /__pad+ma dang /__las kyi rigs su rnam par 'phrul zhing /__rdo rje mi shigs pa nA da'i rang gdangs las chos kyi 'khor lo'i tshul rtag tu bskor ba dang /__de dag gi thugs rje'i gzugs brnyan rang bzhin dang /__'gro 'dul sprul pa'i zhing khams rgya mtshor gdul bya sna tshogs pa'i rigs can rnams la 'khor los bsgyur ba'am/__chags bral gyi rnam pa sogs gang 'dul 'dod dgur bsgyur ba'i mtshan dang sku yi rnam rol bsam gyis mi khyab par ston pa las/__re zhig rtsod ldan tshe lo brgya pa'i dus 'dir 'dzam bu'i ljon pas mtshan pa'i ljongs su tshu rol mthong ba'i 'gro ba thun mong gi snang ngor lha dang bcas pa'i 'jig rten gyi ston pa gcig pur gyur pa mnyaXm meXd shAXkyaX seXng geX zhes mtshan gyi zla snang dkar pos sa gsum du khyab pa gang des legs par gsungs pa'i chos kyi phung po dang /__theg pa'i bye brag sogs byis pa'i blo gros kyis bsam par mi nus kyang /__mdor bsdu ba'i dbang du byas na brjod bya'i ngos nas bslab pa gsum dang /__rjod byed kyi ngos nas sde snod gsum du 'du zhing /__de thams cad nyams su blang ba'i tshul gyi mngon par rtogs pa'ang /__dpal mgon 'phags pa dbyig gnyen gyis/__tshul gnas thos dang bsam ldan pas/__/sgom pa la ni rab tu sbyor/__/zhes rang rang gis ji ltar khas blangs pa'i tshul khrims rnam par dag pas gzhir bzung ste/__thoXs bsaXm sgoXm gsuXm la rim gyis zhugs pa nyid yin la/__de'i rgyu mtshan yang /__yid can thams cad 'khor bar 'ching ba'i rtsa ba ni 'jig lta dang mtshungs par ldan pa'i bdag tu 'dzin pa kho na las gzhan ma dmigs pa'i tshul/__dpal chos kyi grags pas tshad ma rnam 'grel las/__bdag yod na ni gzhan du shes/__/bdag gzhan cha las 'dzin dang ldang /__/'di dag dang ni yongs 'brel las/__/nyes pa thams cad 'byung bar 'gyur/__/zhes so/__/de'i dngos kyi gnyen po ni bdag med rtogs pa'i shes rab gcig pu la rag las pa yin te/__snga ma las/__stong nyid lta dang de 'gal phyir/__/sgom pa lhag ma de don yin/__/de yi rang bzhin dngos kun dang /___/'gal bar rab tu grub pa yin/__/ces gsungs/__de lta bu'i bdag med rtogs pa'i shes rab khyad par can bskyed pa la'ang /__thog mar bsam byung gi shes rab kyis don rang gi mtshan nyid tshul bzhin du yid la byed pa dang /__thos byung gi shes rab kyis don spyi'i mtshan nyid gtan la 'bebs pa rnams rim bzhin sngon du 'gro dgos pa'i tshul/__rgyal ba gnyis pa ma pham pas/__'di na dang por thos pa la brten tshul bzhin yid la byed pa 'byung /__/tshul bzhin yid la byed pa la brten yang dag don yul ye shes 'byung /__/zhes dang /__'phags mchog kluX sgrubaX zhabs kyis/__shes rab rgyas byed pa ni thos pa ste/__/bsam pa dang ni gnyis po yod gyur na/__/de las sgom pa yang ni rab tu 'byung /__/zhes dang /__shes rab mchog yin de'i gzhi ni/__/thos pa yin phyir thos pa mchog__/ces gsungs pa'i phyir dang /__gzhan yang gnas skabs su phyi nang gi grub mtha' thos pas blang dor gyi gnas shes pa dang /__tshul khrims kyi bslab pa thos pas nyes spyod chen po'i gnas las ldog pa dang /__ting nge 'dzin gyi bslab pa thos pas don med pa'i yul la rnam par g.yeng ba spong ba dang /__mthar thug shes rab kyi bslab pa thos pas zag zad mngon du byas te mya ngan las 'das pa'i go 'phang thob pa'i bar du 'gyur ba la dgongs nas/__byang chub sems dpa'i sde snod las/__thos pas chos rnams shes par 'gyur/__/thos pas sdig las ldog par 'gyur/__/thos pas don med spong bar 'gyur/__/thos pas mya ngan 'das pa'ang thob/__/ces dang /__skyes rabs las/__thos pa'i rjes zhugs sgrub pa snying por byed/__/skye ba'i rdzong las tshegs chung thar bar 'gyur/__/zhes sogs 'phags dang mkhas pa'i tshogs kyis rgyu mtshan du ma'i sgo nas lan gcig ma yin par bsngags pas yid drangs te/__tshe rabs snga ma rnams su legs par spyad pa'i 'bras bu cung zad kyis bsngags 'os dam pa'i rigs su dal 'byor gyi rten skyon med 'thob pa'i skabs 'dir rang gzhan gyi don du snying po len par 'dod pa'i bsam pa rnam par dag pas kun nas bslangs te/__dpal ldan bla ma rdo rje 'chang dang zhal mi gnyis pa rnams kyi zhabs pad la yan lag mchog gis gus pas btud nas/__mnyes pa gsum gyis bsnyen bkur ba dang chab gcig zab pa dang rgya che ba'i dam pa'i chos cha tsam zhig thob pa'i tshul rnams rang nyid kyi brjed ngas spong ba dang /__don gnyer can gzhan dag la'ang sman pa'i bsam pas nyung ngu rnam gsal gyi tshul du 'god pa la/__thog mar bstan pa rin po che'i sgor ji ltar zhugs pa'i tshul/__rgyu mtshan nyid kyi theg pa cung zad thob tshul/__'bras bu'i theg pa gsang sngags bka' ma'i thob tshul/__gter ma rjes 'brangs dang bcas pa'i thob tshul/__gsang sngags gsar ma rjes 'brangs dang bcas pa'i thob tshul/__de dag kun gyi rtsa ba rgyal ba'i bka' 'gyur ro cog thob pa'i tshul te drug las/__dang po ni/___/__!_ 'dir smras pa/__dpal ldan srid dang zhi ba'i thig ler byang chub snying po mngon gyur yang /__/dpal ldan 'jig rten dge ba'i phrin las rtag pa dam par 'char ba'i phul/__/dpal ldan yon tan bye ba'i 'byung gnas dkon mchog rin chen gsum gyi dngos/__/dpal ldan bla ma rnams kyi bka' drin slar yang dran pas phyagaX bgyi'oX/__1__/lhag bsam mchog gi chu gter las byung bsod nams dam pa'i mtshar sdug can/__/bla na yod med mchoXd pa'iX sprin phung nam mkha' mnyam pas mdun bdar te/__/nges par 'byung dang byang chub sems gnyis gsang chen dam tshig sdom pa dang /__/tshe rabs kun tu chos tshul mtha' klas snying nas bzung ba'i g.yar dam len/__2__/thog med dus nas nyon mongs pa dang las kyi kun 'byung la brten nas/__/rang bzhin nyid dang bcas pa'i sdig ltung 'dam rdzab stug po'i gzhan dbang gis/__/sems kyi zla shel kha dog bsgyur ba stobs bzhi'i gang+gA'i reg pa yis/__/so sor bshagaXs pa'iX sbyor ba la brten slar la dag pa'i mdzes pa'ang 'bar/__3__/slob dang mi slob 'phags pa rnams dang so so skye bo'i tshogs rnams kyis/__/legs bshad nyin mor byed pa'i 'od kyis tshul min mun pa bsnyil ba dang /__/bsod nams lam dang mya ngan 'da' ba'i snang ba mchog gi dpal ster bar/__/rjes su yiX rangaX puN+Da rI ka snying gi dbus su grol bar bgyi/__4__/gang dag phyogs bcu'i 'jig rten khams bzhugs stobs bcu mnga' ba sras bcas la/__/'gog bden rtogs pa'i sprin chen 'khrigs las lam bden lung gi char rgyun gyis/__/rigs can gsum gyi blo yi chu skyes thar pa'i phyogs su grol ba'i slad/__/zab cing rgya che'i choXs kyi 'khoXr lo rtag pa rgyun du bskoXr b.raX bskul/__5__/zhi ba'i dbyings su dgyes pa'i tshul gyis mya ngan 'da' bar ston bzhed rnams/__/thog mar skye ba'i 'jug pa zad na mthar gyis 'gags pa ma mchis phyir/__/tshur mthong byis pa'i blo can ngor yang 'pho 'gyur mtshan ma mi gzhes par/__/yid can kun gyi sgron me gcig pur bskal pa rgya mtshor bzhugasaX gsoXl 'debs/__6__/de ltar bsags las byung bas nyer mtshon dus gsum legs byas chu klung 'bum/__/spros pa'i rdul dang mdza' ba ma yin 'jam dpal mkhyen pa'i yongaXs baXsngo dang /__/'jug pa gcig pa'i shul lam la zhugs byang chen rgya mtshor ro gcig pas/__/don gnyis kun dga'i dga' ston gsar bas sa gsum mtha' dag mdzes gyur cig__7__/khyad par gzhan phan phrin las mthar phyin 'od gsal chen por snyoms zhugs pa'i/__/dpal ldan bla ma mchog rnams zab dgongaXs chos kyi dbyings su rdzoXgs pa dang /__/da ltar 'tsho gzhes bshad dang sgrub pas ris med bstan 'dzin ji snyed kun/__/bskal pa rgya mtshor zhabaXs pad brtaXn cing rnam dkar mdzad pa lhun grub shog__8__/yang srid kun tu mtshan tsam thob dka' dri med thubaX bstanaX rin po che/__/spyi dang bye brag snying po'i ring lugs nyin bzhin gsal dang lhan cig par/__/der 'dzin rig grol dgeX 'duXn 'dus pas phyogs kyi khams kun khyab pa dang /__/'khor lo gsum gyi bgyi ba rmad byung gong nas gong du 'phel gyur cig__9__/de mthus phyiX snoXd 'jiXg rtenaX khams kun rdzogs ldan dus kyi 'byor pa dang /__/nangaX bcudaX 'groX rnams dge bcu'i spyod tshul nor bu'i rnga yab g.yob pa yis/__/gnas skabs tshe bsod dpal 'byor la sogs mtho ris yon tan tshogs rnams dang /__/mthar thug rnam pa thams cad mkhyen pa sku bzhi'i ngal 'tsho bsten par shog__10__/bdag kyang deng nas byang chub bar du dal 'byor mchog thob bstan la zhugs/__/nges par 'byung ba'i tshul khrims rnam dag smon 'jug byang sems snying la shar/__/gsang chen rim gnyis zab mo'i lam gyis zungaX 'jugaX goX 'phaXng myur thob nas/__/sku dang ye shes phrin las rmad byung 'gro khams rgya mtshor smin gyur cig__11__/de ltar phan bde'i go 'phang bsgrub la mi mthun bar du gcod pa'i tshogs/__/brgyud gsum rig 'dzin bla mas gnyer gtad zhing skyong ma mo rA hu la/__/rgyal chen sku lnga yang le ber sogs bstanaX srungaX rgyaX mtshoXs tshar bcad nas/__/bsam dgu'i 'dod pa yid bzhin 'jo ba'i phrin las lhun gyis grub par mdzod/__12__/mdor na lan gcig dran pa'i mod nas srid zhi'i 'jigs pa kun 'phrog cing /__/phun tshogs shis dgu'i dngos kun sbyin la bslu ba spangs pa'i grags dkar can/__/bla ma mchog gsum thugs rje'i 'jug pa gzugs can bzhin du 'dir snang bas/__/dge legs rtag pa dam pa'i dpal gyis 'jig rten gsum na khyab gyur cig__13__/de ltar zab pa dang rgya che ba'i dam pa'i chos kyi gsan yig rin po che'i do shal zhes bya ba 'di nyid kyi gzhung rnams dus gsum sras bcas rgyal ba'i ye shes kyi sku gcig pu gter chen chos kyi rgyal po 'gro 'dul gter bdag gling pa'i gsan tho sogs la gzhi mdzad nas skyabs mchog 'khor lo'i mgon po khri chen rdo rje 'chang 'gyur med sangs rgyas kun dga' nyid kyi zhal snga nas ljags bsgrigs gnang 'dug par/__slar gong 'og gi brjod pa 'di lta bu zhig sbyor bar gyis shig ces bka' stsal nor bu'i con pan spyi bor bcings pa la brten nas/__ris med pa'i bstan pa la mchog tu dad cing /__mkhas shing dngos grub brnyes pa'i yongs 'dzin dam pa rgya mtsho'i zhabs rdul la spyi bos reg pa mang du thos pa'i shar mdo khams kyi btsun pa chos smra ba'i gzugs brnyan 'jam dbyangs mkhyen brtse'i dbang po kun dga' bstan pa'i rgyal mtshan zhes bya ba'i rgyal khams kyi dA ri drwas 'og min o rgyan smin grol gling nges pa don gyi dga' ba'i tshal chen por sbyar ba'i dge bas skyabs mgon bla ma mchog nyid zhabs pad bskal brgyar brtan cing chos kyi 'khor lo rtag tu bskor ba la brten nas/__thub bstan rin po che spyi dang /__khyad par snga 'gyur rdo rje theg pa'i ring lugs phyogs dang dus thams cad du dar zhing rgyas la yun ring du gnas par gyur cig__/sarba dA ka l+yA NaM b+ha ba tu//___//___!_