JKW-KABUM-12-NA-001-009

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 12, sde tshan 1, Text 9, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 12: 1-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

9 101-104	ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་རྗེས་སུ་གནང་བའི་ཚུལ་བྱིན་རླབས་སྣང་བ། shes rab kyi pha rol tu phyin ma dkar mo'i rjes su gnang ba'i tshul byin rlabs snang ba Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་རྗེས་སུ་གནང་བའི་ཚུལ་བྱིན་རླབས་སྣང་བ། ༄༅། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་རྗེས་སུ་གནང་བའི་ཚུལ་བྱིན་རླབས་སྣང་བ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། སྲས་བཅས་རྒྱལ་ཀུན་སྐྱེད་པའི་ཡུམ། །ཤེས་རབ་ཕ་རོལ་ཕྱིན་མ་ལ། །བཏུད་ནས་དེ་ཡི་རྗེས་གནང་ཚུལ། །བྱིན་རླབས་སྣང་བའི་དགའ་སྟོན་སྦྱིན། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་ཁར་མེ་ཏོག་སིལ་མ་དགྲམ། དེའི་དབུས་སུ་མཉྫིའི་སྟེང་དུ་མཎྜ་ལར་དྲིའི་ཐིག་ལེ་དང་མེ་ཏོག་གི་ཚོམ་བུ་གཅིག་དགོད། མདུན་དུ་འབུལ་གཏོར། མཆོད་ཡོན་སྔོན་དུ་འགྲོ་བའི་ཉེར་སྤྱོད། ཉེ་ལོགས་ཅི་བདེ་བར་སློབ་མ་ལ་དགོས་པའི་མཎྜལ་དང་མེ་ཏོག །རང་གི་མདུན་དུ་རྡོ་རྗེ་དྲིལ་བུ་མེ་ཏོག་གི་སྣོད་སོགས་བཤམ། གཉིས་པ་དངོས་གཞི་ལ་གསུམ། བདག་གི་རྣལ་འབྱོར། མདུན་བསྐྱེད་བསྒྲུབ་པ། སློབ་མ་རྗེས་སུ་གཟུང་བའོ། །དང་པོ་ནི། མཆོད་པ་རྣམས་བསང་སྦྱངས་བྱིན་བརླབ། བདག་དང་འགྲོ་བ་སོགས་སྐྱབས་འགྲོ་གསོལ་གདབ་བཅས་སྤྱི་ལྟར་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཤེས་རབ་ཀྱི་ཕ་རོལ་ཏུ་ཕྱིན་མའི་བསྒོམ་བཟླས་ཉམས་སུ་བླང་བར་བགྱིའོ་ཞེས་ལན་གསུམ་གྱིས་སེམས་བསྐྱེད། རང་སྐད་ཅིག་གིས་ཞེས་སོགས་ནས་བཟླས་པའི་བར་རྡོ་རྗེ་འཆང་ཀུན་དགའ་བཟང་པོའི་གསུང་རབ་ལྟར་བྱ། བཟླས་པ་ཅི་ནུས་རྗེས་སུ་ཐལ་མོ་སྦྱར་ཏེ། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་བདག་མེད་རྟོགས་པའི་ཤེས་རབ་ཀྱི་མཐུ་ཕུན་སུམ་ཚོགས་པ་སྩལ་དུ་གསོལ། ཞེས་གསོལ་བ་གདབ། རང་གི་ཐུགས་ཀ་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་པར་བསམ། གཉིས་པ་ནི། ཚོམ་བུ་བསང་སྦྱངས། སྟོང་པའི་ངང་ལས་པྃ་ལས་པདྨ་དཀར་པོའི་སྡོང་བུ་སོགས་ནས། འོད་དཔག་ཏུ་མེད་པས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ། བདག་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་ཞེས་པར་འདི་ལ་ཞེས་བསྒྱུར། མཆོད་པ་བསང་སྦྱངས་བྱིན་བརླབ། ཨོཾ་ཤྲཱི་པྲཛྙཱ་པཱ་ར་མི་ཏཱ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པུཥྤཾ་ནས་ཤཔྡའི་བར་སྦྱར་བ་དང་། གྷཎྜེར་ཎི་ཏས་མཆོད། བསྟོད་པ་རྒྱས་པར་རྡོ་རྗེ་འཆང་གིས་མཛད་པའམ་བསྡུ་ན། སྨྲ་བསམ་བརྗོད་མེད་སོགས་ཀྱིས་བསྟོད། གཏོར་མ་བསང་སྦྱངས་བྱིན་རླབས་འབུལ་བ་རྣམས་སྒྲུབ་ཐབས་ལྟར་དང་། གོང་ལྟར་མཆོད་ཅིང་བསྟོད། བཅོམ་ལྡན་འདས་མས་བདག་དང་སོགས་འདོད་དོན་གསོལ། མདུན་བསྐྱེད་ཀྱི་ཐུགས་རྒྱུད་བསྐུལ་བར་མོས་ཏེ་བཟླས་པ་ཅུང་ཟད་བྱའོ། །གསུམ་པ་ནི། སློབ་མ་རྣམས་ཕྱི་རོལ་ཏུ་ཁྲུས་བྱ། ནང་དུ་འོངས་ཏེ་དུལ་བར་འཁོད་པ་ལ་མེ་ཏོག་བཀྲམ་བསྡུ་གྲུབ་རྗེས་སློབ་དཔོན་གྱིས་སེམས་བསྐྱེད་གསོལ་འདེབས་སོགས་ཆོས་བཤད་ཇི་ལྟར་རིགས་པས་ཐོག་དྲངས་ཏེ། དེ་ལ་འདིར་གང་གསན་པར་བྱ་བའི་ཆོས་ནི། གནས་སྐབས་དང་མཐར་ཐུག་གི་ཡོན་ཏན་རིན་པོ་ཆེ་ཀུན་གྱི་རྩ་བ་དྲི་མ་མེད་པའི་ཤེས་རབ་ཕུན་སུམ་ཚོགས་པར་བྱེད་པ་ལ། གསང་སྔགས་རྡོ་རྗེ་ཐེག་པ་ལས་གཟུངས་ཀྱི་སྒོ་བསྒྲུབ་ཚུལ་བསམ་གྱིས་མི་ཁྱབ་པ་ཞིག་གསུངས་པ་རྣམས་ཀྱི་ནང་ནས་ཁྱད་པར་དུ་གྱུར་པ། གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་ཀྱཻ་རྡོ་རྗེའི་བཤད་པའི་རྒྱུད་འཕགས་པ་མཁའ་འགྲོ་མ་རྡོ་རྗེ་གུར་གྱི་ལེའུ་བརྒྱད་པ་ལས་གསུངས་ཤིང་ལས་རྒྱས་པའི་ལྷ་གསུམ་དུ་གྲགས་པའི་ཡ་གྱལ་ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་མན་ངག་དང་བཅས་པ་བླ་མ་རྡོ་རྗེ་གདན་པ་དང་། མཐུ་སྟོབས་ཀྱི་དབང་ཕྱུག་དཔལ་བིཪྺ་པ་སོགས་ནས་ལེགས་པར་བརྒྱུད་ཅིང་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པ་སྟེ། ཤར་ཆེན་ཐམས་ཅད་མཁྱེན་པ་ཡེ་ཤེས་རྒྱལ་མཚན་ཀྱང་ལམ་འདི་ལ་བརྟེན་ནས་སྤོབས་པའི་གཏེར་མཛོད་ཆེན་པོ་ལ་དབང་བསྒྱུར་བ་སོགས་བྱིན་རླབས་ཀྱི་ཚན་ཁ་རྨད་དུ་བྱུང་བའི་རྗེས་སུ་གནང་བ་ཟབ་མོ་འབུལ་བ་ལ་སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་སྐུའི་ངོ་སྐལ་དུ་གྱུར་པ་ཐོག་མར་རྗེས་སུ་གནང་བ་ཞུ་བའི་ཡོན་དུ་མཎྜལ་ཞིག་འབུལ་བར་ཞུ། ཞེས་མཚམས་སྦྱར་ལ། མཎྜལ་གསོལ་གདབ་ནས་བཟུང་དགེ་བསྔོ་བར་སྒྲུབ་ཐབས་བརྒྱ་རྩའི་རྗེས་གནང་གི་ཆིངས་ཇི་ལྟ་བ་བཞིན་བྱའོ། །གསུམ་པ་རྗེས་ནི། མཆོད་པ་བསང་སྦྱངས་བྱིན་བརླབ། མཆོད་བསྟོད། ནོངས་བཤགས། ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། གནས་གསུམ་བསྲུང་། བསྔོ་སྨོན་བཀྲ་ཤིས་རྣམས་སྤྱི་ལྟར་བྱའོ། །འཕགས་མ་ཤེས་རབ་ཕ་རོལ་ཕྱིན། །རབ་དཀར་སྟོན་ཟླའི་མདངས་འཕྲོག་མའི། །བྱིན་རླབས་སྣང་བས་ས་གསུམ་གྱི། །བློ་གྲོས་ཆུ་གཏེར་རྒྱས་གྱུར་ཅིག །ཅེས་ཐར་རྩེ་མཧཱ་པཎྜི་ཏ་ནམ་མཁའ་དཔལ་བཟང་པོའི་གསུང་རབ་ལས་ཅུང་ཟད་གསལ་བར་ཕྱེ་བ་འདིའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ། །། ༈

[edit]

shes rab kyi pha rol tu phyin ma dkar mo'i rjes su gnang ba'i tshul byin rlabs snang ba/_ @#/_/shes rab kyi pha rol tu phyin ma dkar mo'i rjes su gnang ba'i tshul byin rlabs snang ba zhes bya ba bzhugs so/__/oM swa sti sid+d+haM/__sras bcas rgyal kun skyed pa'i yum/__/shes rab pha rol phyin ma la/__/btud nas de yi rjes gnang tshul/__/byin rlabs snang ba'i dga' ston sbyin/__/'di la gsum/__sbyor ba/__dngos gzhi/__rjes so/__/dang po ni/__gnas dben par stegs bu'i khar me tog sil ma dgram/__de'i dbus su many+dzi'i steng du maN+Da lar dri'i thig le dang me tog gi tshom bu gcig dgod/__mdun du 'bul gtor/__mchod yon sngon du 'gro ba'i nyer spyod/__nye logs ci bde bar slob ma la dgos pa'i maN+Dal dang me tog__/rang gi mdun du rdo rje dril bu me tog gi snod sogs bsham/__gnyis pa dngos gzhi la gsum/__bdag gi rnal 'byor/__mdun bskyed bsgrub pa/__slob ma rjes su gzung ba'o/__/dang po ni/__mchod pa rnams bsang sbyangs byin brlab/__bdag dang 'gro ba sogs skyabs 'gro gsol gdab bcas spyi ltar dang /__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du shes rab kyi pha rol tu phyin ma'i bsgom bzlas nyams su blang bar bgyi'o zhes lan gsum gyis sems bskyed/__rang skad cig gis zhes sogs nas bzlas pa'i bar rdo rje 'chang kun dga' bzang po'i gsung rab ltar bya/__bzlas pa ci nus rjes su thal mo sbyar te/__bcom ldan 'das mas bdag dang sems can thams cad la bdag med rtogs pa'i shes rab kyi mthu phun sum tshogs pa stsal du gsol/__zhes gsol ba gdab/__rang gi thugs ka nas 'od zer 'phros pas gdan 'od zer gyi rnam par gyur te rang la thim par bsam/__gnyis pa ni/__tshom bu bsang sbyangs/__stong pa'i ngang las pa~M las pad+ma dkar po'i sdong bu sogs nas/__'od dpag tu med pas dbur brgyan zhes pa'i bar bdag bskyed ltar la/__bdag nyid ces pa'i tshig dor/__bdag la mngon par dbang bskur zhes par 'di la zhes bsgyur/__mchod pa bsang sbyangs byin brlab/__oM shrI pradz+nyA pA ra mi tA sa pa ri wA ra ar+g+haM pra tIts+tsha swA hA/__de bzhin du puSh+paM nas shap+da'i bar sbyar ba dang /__g+haN+Der Ni tas mchod/__bstod pa rgyas par rdo rje 'chang gis mdzad pa'am bsdu na/__smra bsam brjod med sogs kyis bstod/__gtor ma bsang sbyangs byin rlabs 'bul ba rnams sgrub thabs ltar dang /__gong ltar mchod cing bstod/__bcom ldan 'das mas bdag dang sogs 'dod don gsol/__mdun bskyed kyi thugs rgyud bskul bar mos te bzlas pa cung zad bya'o/__/gsum pa ni/__slob ma rnams phyi rol tu khrus bya/__nang du 'ongs te dul bar 'khod pa la me tog bkram bsdu grub rjes slob dpon gyis sems bskyed gsol 'debs sogs chos bshad ji ltar rigs pas thog drangs te/__de la 'dir gang gsan par bya ba'i chos ni/__gnas skabs dang mthar thug gi yon tan rin po che kun gyi rtsa ba dri ma med pa'i shes rab phun sum tshogs par byed pa la/__gsang sngags rdo rje theg pa las gzungs kyi sgo bsgrub tshul bsam gyis mi khyab pa zhig gsungs pa rnams kyi nang nas khyad par du gyur pa/__gnyis su med pa'i rgyud kyi rgyal po dpal kyai rdo rje'i bshad pa'i rgyud 'phags pa mkha' 'gro ma rdo rje gur gyi le'u brgyad pa las gsungs shing las rgyas pa'i lha gsum du grags pa'i ya gyal shes rab kyi pha rol tu phyin ma dkar mo'i sgrub thabs man ngag dang bcas pa bla ma rdo rje gdan pa dang /__mthu stobs kyi dbang phyug dpal biR+Wa pa sogs nas legs par brgyud cing rje btsun sa skya pa yab sras la bka' babs pa ste/__shar chen thams cad mkhyen pa ye shes rgyal mtshan kyang lam 'di la brten nas spobs pa'i gter mdzod chen po la dbang bsgyur ba sogs byin rlabs kyi tshan kha rmad du byung ba'i rjes su gnang ba zab mo 'bul ba la slob dpon gyi bya ba rnams grub nas/__khyed rang rnams kyi sku'i ngo skal du gyur pa thog mar rjes su gnang ba zhu ba'i yon du maN+Dal zhig 'bul bar zhu/__zhes mtshams sbyar la/__maN+Dal gsol gdab nas bzung dge bsngo bar sgrub thabs brgya rtsa'i rjes gnang gi chings ji lta ba bzhin bya'o/__/gsum pa rjes ni/__mchod pa bsang sbyangs byin brlab/__mchod bstod/__nongs bshags/__tshom bu'i ye shes pa gshegs/__dam tshig pa rang la bstim/__gnas gsum bsrung /__bsngo smon bkra shis rnams spyi ltar bya'o/___/'phags ma shes rab pha rol phyin/__/rab dkar ston zla'i mdangs 'phrog ma'i/__/byin rlabs snang bas sa gsum gyi/__/blo gros chu gter rgyas gyur cig__/ces thar rtse mahA paN+Di ta nam mkha' dpal bzang po'i gsung rab las cung zad gsal bar phye ba 'di'ang bya bral ba 'jam dbyangs mkhyen brtse'i dbang pos bris pa dge/___//__!_