JKW-KABUM-03-GA-001-024

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 23, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

མཆོད་རྟེན་བཞེངས་པའི་ཕན་ཡོན་སོགས་ཚོགས་བསགས་པའི་ཕན་ཡོན་སྐོར།

མཆོད་རྟེན་བཞེངས་པའི་ཕན་ཡོན་ནི། མྱང་འདས་ལས། ལྷ་དང་མི་དང་འཁོར་རྣམ་པ་བཞིས་རིན་ཆེན་སྣ་བདུན་གྱིས་མཆོད་རྟེན་བྱས་ཏེ་རིང་བསྲེལ་ལ་མཆོད་ན་བསོད་ནམས་དཔག་ཏུ་མེད་པ་ཐོབ་ཅིང་། སེམས་ཅན་མཐའ་དག་སྲིད་པ་གསུམ་གྱི་སྡུག་བསྔལ་སྤངས་ཏེ་མྱ་ངན་ལས་འདས་པའི་བདེ་བ་ཐོབ་པར་འགྱུར་རོ། །ཞེས་དང་། དེ་བཞིན་པད་དཀར། སྒྲ་ཆེན་པོའི་མདོ། དགེ་བའི་རྩ་བ་ཡོངས་སུ་འཛིན་པའི་མདོ། ཟ་མ་ཏོག་བཀོད་པ། ཆོ་འཕྲུལ་རྣམ་པར་བསྟན་པའི་མདོ། ཆོས་བསམ་གྱིས་མི་ཁྱབ་པར་བསྟན་པ། ལས་ཀྱི་རྣམ་པར་སྨིན་པ་བསྟན་པའི་མདོ། ཁང་བུ་བརྩེགས་པའི་མདོ། ལས་དང་ཕན་ཡོན་བསྟན་པའི་ཆོས་ཀྱི་རྣམ་གྲངས། རྨད་དུ་བྱུང་བའི་ཆོས་ཀྱི་རྣམ་གྲངས་སོགས་ལས་རྒྱ་ཆེར་བསྟན་ལ། དེ་སྐད་དུ་བྱ་རྒྱུད་གཙུག་ཏོར་དྲི་མེད་སྣང་བར། མཆོད་རྟེན་གྱི་ལས་བྱས་ན་ཚེ་ཟད་པ་ཡང་སླར་ནུར་ཏེ་ཚེ་རིང་བར་བྱེད་དོ། །གལ་ཏེ་ཤི་བོར་ན་ཡང་སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །འཆི་བའི་སྡུག་བསྔལ་མྱོང་བར་མི་འགྱུར་རོ། །ཕྱིན་ཆད་ནམ་ཡང་འཆི་བའི་ཚོར་བ་མཐོང་བར་མི་འགྱུར་རོ། །ཕྱིན་ཆད་སེམས་ཅན་དམྱལ་བ་དང་། དུད་འགྲོ་དང་། གཤིན་རྗེའི་འཇིག་རྟེན་དང་། ངན་འགྲོར་འགྲོ་ཞིང་སྐྱེ་བར་མི་འགྱུར་རོ། །ཕྱིན་ཆད་སེམས་ཅན་དམྱལ་བའི་སྒྲ་རྣ་ལམ་དུ་གྲགས་པར་མི་འགྱུར་ན། འབྲས་བུ་རྣམ་པར་སྨིན་པར་འགྱུར་བ་ལྟ་ཅི་སྨོས་ཏེ། དེ་ནི་གནས་མེད་དོ། །ཞེས་སོ། །དེ་བཞིན་དུ་སློབ་དཔོན་དཔའ་བོས། བདེ་བར་གཤེགས་པའི་མཆོད་རྟེན་ལ། །དགའ་བས་སྲོག་ཤིང་འཛུགས་བྱེད་ཅིང་། །གདུགས་དང་དྲིལ་བུ་རྣམས་དང་ནི། །གདུགས་ཀྱི་ཕྲེང་བ་འབུལ་བྱེད་པ། །དེ་དག་མིར་ནི་རྒྱ་ཆེ་ཞིང་། །དཔལ་ནི་ཕུན་སུམ་ཚོགས་པ་ཐོབ། །ཅེས་སོགས་རྒྱ་ཆེར་བསྟན་ཏོ། །ཏིང་འཛིན་རྒྱལ་པོ་ལས། དེ་བཞིན་གསེར་དག་དང་ནི་དངུལ་དག་དང་། །ཙནྡན་གྱི་ནི་སྐུ་གཟུགས་བཟོ་བ་དག །མཛེས་ཤིང་ཤིན་ཏུ་ལྟ་ན་སྡུག་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་དང་། པདྨ་དཀར་པོར། རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །བལྟ་ན་སྡུག་པ་འཇིམ་པ་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་སོགས་དང་། གཞན་ཡང་ཀླུའི་རྒྱལ་པོ་རྒྱ་མཚོས་ཞུས་པ། སྤྱན་རས་གཟིགས་ཀྱི་མདོ། །དད་པའི་སྟོབས་བསྐྱེད་པའི་མདོ། །སངས་རྒྱས་ཀྱི་སྟོབས་བསྐྱེད་པའི་མདོ། དེ་བཞིན་གཤེགས་པའི་གཟུགས་བརྙན་བཞག་པའི་ཕན་ཡོན་བརྗོད་པ་སོགས་ལས་རྒྱ་ཆེར་བསྟན་ཅིང་། གསལ་རྒྱལ་གྱིས་ཞུས་པའི་ཚིགས་སུ་བཅད་པར། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། སྐུ་གཟུགས་རྣམས་ལ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་ངེས་པར་རྒྱལ་སྲིད་ཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་གོ་འཕང་ཐོབ། །ཅེས་དང་། དཔའ་བོས། བདེ་གཤེགས་སྐུ་གཟུགས་བཞེངས་གསོལ་བ། །མཚན་བཟང་གིས་མཚན་འཁོར་ལོས་སྒྱུར། །སུམ་ཅུ་རྩ་གཉིས་ལུས་མཛེས་ཐོབ། །ཉེས་པའི་དགྲ་ཚོགས་རྒྱལ་བར་འགྱུར། །ཞེས་སོགས་མཐའ་ཡས་སོ། །སྒོ་མཐའ་ཡས་པའི་གཟུངས་ལས། མདོ་སྡེ་ཐོས་ནས་རྗེས་སུ་ཡི་རངས་དང་། །ཡི་གེར་བྲིས་དང་གཟུངས་དང་བཀླག་པ་ཡིས། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པ་ཡོང་མི་ནུས། །དེས་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལ་ཡང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་རྫོགས་འཚང་རྒྱ། །ཞེས་སོགས་དམ་ཆོས་པད་དཀར། བརྒྱད་སྟོང་པ། སྙིང་རྗེ་པད་དཀར་སོགས་སུ་བསམ་གྱིས་མི་ཁྱབ་པར་བསྟན་ཏོ། ། ༈ གཙུག་ལག་ཁང་བཞེངས་པའི་ཕན་ཡོན་ནི། །གསལ་རྒྱལ་གྱི་ཚིགས་སུ་བཅད་པའི་མདོ་ལས། སུ་ཞིག་སངས་རྒྱས་སྐུ་གཟུགས་མཆོད་རྟེན་སྐུ་གཟུགས་ཁང་། །ཚོན་རྩི་སྣ་ཚོགས་རྣམས་ཀྱིས་མཛེས་བྱེད་པ། །དེ་ནི་བདེ་གཤེགས་མངའ་བའི་ཡོན་ཏན་རྣམས། །སྣ་ཚོགས་ལྡན་པ་ཀུན་གྱིས་བརྩེགས་པར་འགྱུར། །ཞེས་དང་། སྤྱན་རས་གཟིགས་ཀྱི་མདོ་སོགས་ལས་རྒྱ་ཆེར་བསྟན་ཏོ། ། ༈ སངས་རྒྱས་དངོས་སུ་བཞུགས་པ་དང་། སྐུ་གཟུགས་མཆོད་པ་གཉིས་ཁྱད་པར་མེད་པར། མྱང་འདས་བམ་པོ་ཞེ་གཉིས་པར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྐྱེས་བུ་དེ་གཉིས་ཀྱིས་དེ་ལྟར་དད་པའི་སེམས་ཀྱིས་མཆོད་ན་བསོད་ནམས་ཐོབ་པའི་ཁྱད་པར་མེད་དོ། །དེ་ཅིའི་ཕྱིར་ཞེ་ན། སངས་རྒྱས་མྱ་ངན་ལས་འདས་ཀྱང་ཆོས་ཀྱི་སྐུ་ནི་རྟག་པ་ཡིན་པས་དད་པའི་སེམས་ཀྱིས་མཆོད་པ་བསོད་ནམས་འདྲ་སྟེ་ཁྱད་པར་མེད་དོ། །ཞེས་སོ། །བྱང་ཆུབ་སེམས་དཔའི་སྡེ་སྣོད་ལས། སུ་དག་དཀོན་མཆོག་གསུམ་ལ་མེ་ཏོག་དང་། །འབྲས་བུ་གསར་ཐོབ་བྱུང་བ་འབུལ་བྱེད་པ། །དེ་དག་འགྲོ་བ་རྣམས་སུ་འཁོར་བ་ན། །རོ་མཆོག་ཀུན་ཐོབ་མི་བརྫིའི་སྟོབས་དང་ལྡན། །ཅེས་དང་། དཔའ་བོའི་ཟ་མ་ཏོག་ལྟ་བུའི་གཏམ་ལས། མེ་ཏོག་བཟང་པོས་དགེ་འདུན་ལ། །རབ་ཏུ་འཐོར་ཞིང་མཆོད་བྱེད་པ། །བརྒྱ་བྱིན་ལས་ལྷག་ལོངས་སྤྱོད་ལྡན། །པདྨའི་དབང་པོ་ལྟ་བུར་མཛེས། །མཆོག་ཏུ་གྲགས་པ་དང་ལྡན་ཅིང་། །རྟག་ཏུ་དེ་ནི་སྐད་ཅིག་གིས། །དགྲ་ལས་རྣམ་པར་རྒྱལ་བར་འགྱུར། །ཞེས་སོགས་དཔག་ཏུ་མེད་པར་བསྟན་ཏོ། །སྤྱན་རས་གཟིགས་ཀྱི་མདོ་ལས། མཆོད་རྟེན་ཕྲེང་བ་འདིར་ཕུལ་ན། །ཁང་བཟང་དག་དང་ཁང་བརྩེགས་དང་། །ལྷ་ཡི་བུ་མོའི་བསྟེན་པ་རྣམས། །སུམ་ཅུ་རྩ་གསུམ་ལོངས་སྤྱོད་འགྱུར། །ཞེས་རིན་པོ་ཆེའི་ཕྲེང་བ་ལ་སོགས་པ་ཕུལ་བ་ལ་ཕན་ཡོན་མང་དུ་བཤད་དོ། ། ༈ བ་དན་ཕུལ་བས་ན། གསལ་རྒྱལ་གྱི་ཚིགས་བཅད་ལས། མི་རྣམས་སུ་དག་སྐུ་གདུང་སྙིང་པོ་ཅན། །དྲི་མེད་བསོད་ནམས་འབྱུང་གནས་གྱུར་པ་ལ། །བ་དན་མཛེས་པ་སྣ་ཚོགས་འདོགས་པ་དག །མཐུ་དང་ལྡན་ཅིང་སྲིད་གསུམ་མཆོད་གནས་འགྱུར། །ཞེས་སོགས་རྒྱ་ཆེར་བསྟན། ། ༈ རོལ་མོ་ཕུལ་བས་ནི། སྔ་མར། རྒྱལ་བའི་མཆོད་རྟེན་དག་ལ་དྲིལ་བུ་དཔྱོངས། །ཚིག་བཙན་གྲགས་པ་ཆེན་པོ་དག་དང་ལྡན། །ཚངས་པའི་སྒྲ་དབྱངས་ཡིད་འོད་སྐྱེ་བ་དྲན། །དེ་དག་གིས་ནི་རྒྱན་རྣམས་སྣ་ཚོགས་འཐོབ། །ཅེས་དང་། རྒྱལ་བའི་མཆོད་རྟེན་རོལ་མོའི་སྒྲ་ཕུལ་བ། །ཟབ་ཅིང་རིག་པའི་སྤོབས་པ་ཕུན་སུམ་ཚོགས། །ཡན་ལག་ལྔ་རྫོགས་ཡིད་འོང་ཚིག་དང་ལྡན། །སྒྲ་སྐད་དག་གིས་འཇིག་རྟེན་འགེངས་པར་བྱེད། །སུ་དག་རྒྱལ་བའི་གདུང་རྟེན་སྟོད་བྱེད་པ། །དེ་དག་གླིང་བུའི་སྒྲ་དང་གླུ་སྙན་དང་། །སྒྲ་སྙན་ཡིད་དུ་འོང་བ་འཐོབ་པ་དང་། །སོ་སོ་ཡང་དག་རིག་པའང་ཐོབ་པར་འགྱུར། །ཞེས་དང་། དཔའ་བོས། རྫ་རྔ་པི་ཝཾ་པ་ཏྲ་ཧས། །བདེ་བར་གཤེགས་མཆོག་མཆོད་བྱེད་པ། །མིར་འགྱུར་ནས་ནི་དབྱངས་ལྡན་ལ། །སྒྲ་ནི་ཤིན་ཏུ་སྙན་པར་འོས། །ཡིད་དུ་འོང་བའི་གཟུགས་དང་ལྡན། །ཞེས་སོ། ། ༈ སྤོས་དང་བྱུག་པ་ཕུལ་བ་ནི། སྔ་མར། སངས་རྒྱས་མཆོད་རྟེན་དག་ལ་དྲི་ཞིམ་ཕུལ། །བདུག་སྤོས་རྒྱ་ཆེར་མང་པོ་ལྡན་སྦྱར་དང་། །ཨ་ག་རུ་ཡི་བདུག་སྤོས་ཕུལ་བ་ཡིས། །དེ་ཡི་ལུས་ཀུན་སྤོས་དང་ལྡན་པར་འགྱུར། །ཞེས་དང་། མི་རྣམས་གང་དག་ཐུབ་དབང་མཆོད་རྟེན་ལ། །སྤོས་ཆུ་གཙང་ཞིང་དྭང་པས་ཁྲུས་གསོལ་བ། །དེ་དག་ལུས་ལ་དྲི་མ་མེད་པ་དང་། །གདུང་བ་མེད་ཅིང་མདོག་འཇམ་མྱ་ངན་མེད། །ཅེས་དང་། དཔའ་བོས། འཛམ་བུའི་གསེར་འདྲའི་པདྨའི་གེ་སར་གྱིས། །རྡུལ་རྣམས་གཏོར་བ་ཡིས་ནི་དྲི་ཞིམ་ལ། །དལ་གྱིས་འབབ་པའི་ནང་དུ་ལྷ་ཡི་ཚོགས། །རྒྱུན་དུ་ཆུ་རྣམས་ལ་ནི་རྩེ་བྱེད་པ། །གང་ཞིག་དགའ་བ་སྣ་ཚོགས་དྲི་ཞིམ་ཆུས། །རྗེ་བཙུན་ཁྲུས་གསོལ་བ་ཡི་འབྲས་དེ་ཡིན། །གླ་རྩི་ག་བུར་ཙནྡན་གུར་གུམ་བགོས། །དྲི་ཞིམ་ཆུ་ནི་ཡིད་འོང་བ། །ཁ་དོག་དཀར་པོར་བྱེ་བྲག་གིས། །ཡིད་འོང་ཐུབ་པ་ཁྲུས་གསོལ་འདིར། །སེམས་ཀྱི་དྲི་མ་སྤངས་ནས་ནི། །དེ་ནི་འགྲོ་བའི་བླ་མར་འགྱུར། །ཞེས་སོ། ། ༈ མར་མེ་ཕུལ་བ་ནི། སྤྱན་རས་གཟིགས་ཀྱི་མདོར། གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། །ཡུངས་འབྲུ་དག་གིས་ཕྱུར་བུར་གང་གྱུར་པ། །བགྲང་བ་དང་ནི་གཞལ་ཞིང་བརྗོད་པར་ནུས། །བདེར་གཤེགས་མར་མེ་གཅིག་ཕུལ་དེ་ལྟར་མིན། །ཞེས་དང་། བཅོམ་ལྡན་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ཀྱི་མདོག་ནི་ཡོངས་མི་འགྱུར། །གཟུགས་མཆོག་སྲ་ཞིང་ལག་པ་གཟུ་བ་འདྲ། །སྣང་བ་ཐོབ་ནས་འཇིག་རྟེན་ཀུན་ཏུ་རྒྱུ། །གལ་ཏེ་རྒྱལ་བ་དམ་པ་བྱུང་གྱུར་ན། །དེ་བཞིན་གཤེགས་པ་རྣམས་དང་ཉེ་བར་འགྱུར། །ཉེ་དུར་འགྱུར་རམ་ཡང་ན་བུར་ཡང་འགྱུར། །དེ་ནི་ཡེ་ཤེས་ཕུང་པོ་མྱུར་དུ་ཐོབ། །ཅེས་དང་། དཔའ་བོས། རི་རྣམས་ཀྱིས་ནི་བསྒྲིབས་པ་དང་། །མཆོག་ཏུ་རིང་ན་གནས་པ་དང་། །ཤིན་ཏུ་ཕྲ་བའི་དངོས་པོ་དང་། །མཚན་མོ་སྨག་གིས་སྒྲིབ་པ་དག །གང་ཚེ་ལག་མཐིལ་གནས་པ་ལྟར། །དགེ་སློང་མ་འགགས་པ་ཡིས་མཐོང་། །དེ་ནི་བདེ་བར་གཤེགས་པ་ལ། །ཞུན་མར་ཕུལ་བའི་འབྲས་བུ་ཡིན། །ཞེས་སོགས་དང་། གཞན་ཡང་མར་མེ་ཕུལ་བའི་མདོ། ལས་རྣམ་འབྱེད་སོགས་ལས་རྒྱ་ཆེར་བསྟན་ཏོ། ། ༈ གདུགས་ཕུལ་བས་ནི། གསལ་རྒྱལ་ལས། བདེ་གཤེགས་མཆོད་རྟེན་དག་ལ་དགའ་བཞིན་དུ། །རྣམ་མང་རྒྱ་ཆེན་གདུགས་ནི་བཏགས་པ་ཡིས། །ལྷ་མིའི་འཇིག་རྟེན་དག་ན་གདུགས་འདྲ་བར། །ལྷ་དང་མི་ཡི་དབང་པོ་ལྟ་བུར་འགྱུར། །ཞེས་དང་། དཔའ་བོས། བུང་བ་ཡིད་འོང་སྒྲ་ཡིས་བསྐྱོད། །མེ་ཏོག་གཡོ་བ་འཁོར་བར་བཀོད། །ཁ་དོག་སྣ་ཚོགས་དྲི་ཞིམ་པའི། །མེ་ཏོག་ཚོགས་ཀྱི་རི་མོར་བྲིས། །གདུགས་མཛེས་སྣ་ཚོགས་དར་གྱིས་མཛེས། །མཆོད་རྟེན་རྣམས་ལ་ཕུལ་བ་ཡིས། །འཁོར་ལོས་སྒྱུར་བ་ས་སྐྱོང་བ། །གླིང་བཞིའི་དབང་ཕྱུག་དེ་ཡིས་ཐོབ། །ཅེས་སོ། ། ༈ གོས་ཕུལ་བས་ནི། སྔ་མར། རྒྱལ་བའི་མཆོད་རྟེན་ལ་ནི་གོས་ཕུལ་བས། །བསོད་ནམས་བྱམས་པ་ངོ་ཚའི་གོས་གྱོན་ཏེ། །དགའ་ཞིང་ཡོན་ཏན་ཀུན་ལྡན་སེར་སྣ་མེད། །མདོག་ཀྱང་འཇམ་ཞིང་ཁ་དོག་གསེར་འདྲར་འགྱུར། །ཞེས་སོ། །སློབ་དཔོན་དཔའ་བོས། གང་ཞིག་སྔོ་སེར་ལྗང་དམར་དཀར། །སྣ་ཚོགས་ཁ་དོག་འོད་བཟང་པས། །མཛེས་གསལ་གོས་ཀྱི་ཕྲེང་བ་ནི། །ཡོན་ཏན་མཆོག་དང་ལྡན་པ་ཡི། །འཇིག་རྟེན་བླ་མ་ལ་ཕུལ་བས། །བསྔགས་པའི་གོས་མཆོག་ཐོབ་པར་འགྱུར། །ཞེས་སོ། ། ༈ སྙན་ཤལ་ཕུལ་བས་ནི། སྤྱན་གཟིགས་མདོར། འཇིག་རྟེན་མགོན་པོ་སྐྱོབ་པ་ལ། །དར་གྱི་དབུལ་བ་ཕུལ་བྱས་ན། །ལྷ་ཡི་དག་དང་མི་རྣམས་ཀྱིས། དོན་རྣམས་ཐམས་ཅད་འགྲུབ་པར་འགྱུར། །ཞེས་པ་ལ་སོགས་པ་དཔག་ཏུ་མེད་པ་གསུངས་སོ། ། ༈ རྒྱལ་མཚན་ཕུལ་བས། སྤྱན་གཟིགས་མདོར། རྡུལ་བསལ་སེམས་ཅན་མཆོག་ལ་རྒྱལ་མཚན་ཕུལ། །རིང་པོར་མི་ཐོགས་ནོར་མང་རྙེད་འགྱུར་ཞིང་། །ཤེས་རབ་མཐའ་ཡས་མཛོད་ནི་མང་ལྡན་འོང་། །ཞེས་སོགས་དཔག་ཏུ་མེད་པ་བསྟན་ཏོ། །མཆོད་རྟེན་བསྐོར་མདོ་ལས། མཁས་པ་གང་ཞིག་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་རྒྱལ་མཚན་འཕན་གདུགས་ཐོགས། །གསེར་གྱི་རི་བོ་ལྷུན་པོ་ཚད་འབུམ་ཡང་། །དེ་ནི་དེ་དང་མཚུངས་པ་ཡོད་མ་ཡིན། །ཞེས་སོ། ། ༈ མཎྜལ་འབུལ་བས་ནི། དཔའ་བོས། སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་ལས་གྲོལ། །གང་ཡིན་དེ་ཡིས་སྐད་ཅིག་འཐོབ། །བདེ་གཤེགས་མཎྜལ་བྱེད་དེ་དག །ཕ་རོལ་ཕྱིན་དྲུག་ཐོབ་གྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེད་པ་བཟོད་པ་ཡིན། །འབད་པར་བྱེད་པ་བརྩོན་འགྲུས་ཏེ། །སྐད་ཅིག་དེ་ལ་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོས་པ་ཤེས་རབ་བོ། །སྣ་ཚོགས་བསོད་ནམས་རྣམས་ཀྱིས་བརྒྱན། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་གྱུར་ཅིང་། །མིར་སྐྱེས་གསེར་ལས་ལྷག་པ་ཡི། །ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །མིག་གི་དཀྱུས་ནི་མཛེས་པར་གསུངས། །ཞེས་སོ། ། ༈ ཞལ་ཟས་ཕུལ་བས་ནི། དེ་ཉིད་ལས། རྡོ་རྗེ་གདན་ལ་བཞུགས་ནས་ནི། །འདོད་པའི་དགྲ་དང་བཅས་པ་ཡི། །ཚོགས་ནི་བྱམས་པ་ངེས་ཕམ་མཛད། །གང་ཞིག་མཐར་ཐུག་དཔའ་བའི་ཡུལ། །མཐའ་མེད་པར་ནི་སྤྱོད་འགྱུར་བའི། །ཉོན་མོངས་དཀའ་བའི་དགྲ་ལས་རྒྱལ། །ཕུང་པོའི་བདུད་ཀྱང་རབ་བཅོམ་ནས། །འཆི་བདག་བདུད་ལ་མངའ་བརྙེས་པ། །ཞལ་ཟས་ཕུལ་བར་གྱུར་པ་ཡིན། །ཞེས་མཆོག་དང་། ཐུན་མོང་དུ། ཡང་དག་དཔལ་ཐོབ་མི་དབང་གིས། །རོ་ལྡན་ཁ་ཟས་ལོངས་སྤྱོད་པ། །རྟག་ཏུ་ཟས་མཆོག་སྦྱིན་དེ་ཡིས། །ཞེས་སོགས་གསུངས་སོ། ། ༈ ཡོན་ཆབ་སོགས་བཏུང་བ་ཕུལ་བས། སྔ་མར། གཡོ་ཞིང་ཨུཏྤལ་གྱིས་བསྒོས་པ། །དྲི་མེད་པདྨ་རཱ་ག་བཞིན། །ཡིད་འོང་གསེར་གྱི་སྣོད་དུ་བླུགས། །དྲི་ཞིམ་ཙནྡན་གྱིས་བསྒོས་མངར། །ཡིད་དུ་འོང་དང་འབའ་ཞིག་འཐུང་། །ཅུང་ཟད་མིག་ནི་ཟངས་མདོག་འདྲ། །གླུ་ལེན་སྒྲ་དང་ངེས་ལྡན་པའི། །མི་མཆོག་དེ་དག་སྙོམས་རྣམས་ནི། །མངོན་པར་ཕུལ་བའི་འབྲས་བུ་ཡིན། །ཞེས་དང་། དགེ་འདུན་ལ་ནི་བཏུང་བ་མཆོག །དུས་ལ་བབས་པར་དྲངས་པ་ཡིས། །འཁོར་བའི་རི་ཁྲོད་གནས་པ་ན། །རྟག་ཏུ་བཏུང་བ་ཞིམ་བཟང་ཐོབ། །ཅེས་པ་སོགས་སོ། ། ༈ ཕྱག་འཚལ་བས་ནི། དམ་ཆོས་པདྨ་དཀར་པོར། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལན་གཅིག་ལུས་ཀྱང་བཏུད་པ་དང་། །གང་གི་རིང་བསྲེལ་གཉིས་པ་དེ་དག་ལ། །གཡེང་པའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་ཐོབ། །ཅེས་དང་། དཔའ་བོས། དེ་ལྟར་ཡོན་ཏན་ཚོགས་ཤེས་པས། །ལུས་འདི་འཇིག་པར་ཤེས་ནས་ནི། །མཁས་པས་སངས་རྒྱས་ཕྱག་བྱ་ཞིང་། །ལུས་ཀྱི་ལས་ནི་ལེགས་པར་སྤྱད། །ཕྱག་གཅིག་འཚལ་བར་གྱུར་པས་ཀྱང་། །འཁོར་བ་སྤོང་པའི་རྒྱུ་ཐོབ་ཅིང་། །འཁོར་བའི་འཇིགས་ཐར་གུས་པ་ཡིས། །དེ་ལྟར་སུ་ཞིག་ཕྱག་མི་བྱེད། །ཅེས་དང་། སྤྱན་གཟིགས་མདོར། བཅོམ་ལྡན་མཆོད་རྟེན་རྣམས་ལ་པུས་བཙུགས་ཕྱག་བཙལ་ནི། །དེ་ལ་དེ་ཡི་དབང་པོ་ཀུན་ཀྱང་འདུད་པར་འགྱུར། །གནོད་སྦྱིན་དབང་དང་ལྷ་དང་ཀླུ་ཡི་རྒྱལ་པོ་དང་། །ཚངས་པའི་དབང་པོ་ཐམས་ཅད་རྐང་པས་གཏུག་པར་བྱེད། །ཅེས་སོ། །བསྐོར་བའི་ཕན་ཡོན་ནི། གསལ་རྒྱལ་གྱིས་ཚིགས་སུ་བཅད་པར། སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་སྐོར་བ་བྱེད་པ་དེ། །ཕྱི་མའི་ཚེ་ན་དགྲ་ཆེན་རྣམས་ཀྱིས་བཏུད། །བཟོ་ཡི་སྣོད་གྱུར་ཡོན་ཏན་རྣམས་དང་ལྡན། །མི་རྣམས་སུ་དག་དགའ་བཞིའི་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་ནི། །སྲིད་པ་ཀུན་ཏུ་མཛོད་རྣམས་ཤིན་ཏུ་རྒྱས། །ཞེས་སོ། །སྙིང་རྗེ་པད་དཀར་ལས། སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །འཇིག་རྟེན་མགོན་གྱི་མཆོད་རྟེན་ལ། །སུ་ཞིག་སྐོར་བ་བྱེད་པ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཅིང་བློ་གྲོས་ལྡན། །བསོད་ནམས་ལྡན་ཅིང་འཇིགས་མེད་འགྱུར། །ཞེས་སོགས་རྒྱ་ཆེར་བསྟན་ཏོ། ། ༈ མེ་ཏོག་རྙིང་པ་འཕྱགས་པའི་ཕན་ཡོན་ནི། སྤྱན་གཟིགས་མདོར། དད་པའི་ཤུགས་བསྐྱེད་བཅོམ་ལྡན་མཆོད་རྟེན་ལ། །མེ་ཏོག་སྐམ་པོ་ཉལ་ཉིལ་འཕྱགས་བྱས་ན། །འདོད་པ་སྨད་པ་སྡུག་བསྔལ་བྱེད་པ་སྤོང་། །སྟོབས་བཅུ་མངའ་བའི་དེད་དཔོན་མཉེས་པར་བྱེད། །ཅེས་སོགས་དཔག་ཏུ་མེད་པ་དང་། གསལ་རྒྱལ་ལས། རྒྱལ་བའི་མཆོད་རྟེན་མེ་ཏོག་རྙིང་བསལ་བས། །འདོད་ཆགས་ཆགས་མེད་ཞེ་སྡང་ལྡང་མི་འགྱུར། །གཏི་མུག་རྨོངས་མེད་ལྟ་ངན་ཆགས་མི་འགྱུར། །མི་རྣམས་རབ་ཏུ་དགའ་ཞིང་སྐྱིད་པར་འགྱུར། །ཞེས་དང་། ཐུབ་དབང་མཆོད་རྟེན་བྱི་དོར་བྱས་པ་ཡིས། །ཤིན་ཏུ་ལྟ་ན་སྡུག་ཅིང་མིག་ཏུ་མཛེས། །བྱད་བཞིན་བཟང་ཞིང་པདྨོའི་མདོག་དང་ལྡན། །སྲེད་པའི་སྐྱོན་རྣམས་དང་ཡང་བྲལ་བར་འགྱུར། །ཞེས་སོ། ། ༈ རྙིང་པ་ཞིག་གསོ་སོགས་ཀྱི་ཕན་ཡོན་ནི། སྔ་མར། མི་རྣམས་སུ་དག་མཆོད་རྟེན་རྙིང་པ་རྣམས། །གཞན་གྱི་ངོར་བྱེད་མ་ཡིན་རང་གི་བློས། །རལ་ཚེམ་བྱེད་པའི་སྐྱེ་བོ་དེ་དག་ནི། །ལུས་བཟང་ཡོན་ཏན་དམ་པས་བརྒྱན་པར་འགྱུར། །ཞེས་དང་། སྤྱན་གཟིགས་མདོར། བཅོམ་ལྡན་མཆོད་རྟེན་བ་རྒྱ་སུས་སེལ་བ། །བག་ཡོད་གྱུར་ནས་དེ་ནི་བདུད་རྒྱ་འདྲལ། །དུས་ཀུན་རྣམས་སུ་ངན་སོང་ས་ཡང་སྤོང་། །རྟག་ཏུ་སངས་རྒྱས་རྡུལ་བྲལ་བསྟི་སྟང་བྱེད། །རྟག་ཏུ་སྟོབས་ལྡན་འཁོར་ལོས་སྒྱུར་བར་འགྱུར། །ཞེས་སོགས་མཐའ་ཡས་སོ། ། ༈

བླ་བྲེ་ཅོད་པན་དོ་ཤལ་སོགས་ཕུལ་བས་ནི།  གསལ་རྒྱལ་མདོར།  སུ་དག་ལ་ལ་མཆོད་རྟེན་སྐུ་གཟུགས་ལ།  །དད་པའི་སེམས་ཀྱིས་བླ་བྲེ་འབུལ་བྱེད་པ།  །དེ་དག་ས་སྟེང་རྒྱ་མཚོའི་མཐའ་ཀླས་པ།  །མ་ལུས་གནས་མེད་རྒྱལ་གཅིག་དབང་ཕྱུག་འགྱུར།  །ཞེས་དང་།  བདེ་གཤེགས་མཆོད་རྟེན་ཅོད་པན་བཏགས་པ་ཡིས།  །མི་དབང་དཔལ་དང་ལྷ་དབང་དཔལ་ཐོབ་ཅིང་།  །བདེ་བའི་མཆོག་ཀྱང་ཉམས་སུ་མྱོང་གྱུར་ནས།  །རྣམ་པར་གྲོལ་བའི་ཅོད་པན་ཁྱད་པར་འཐོབ།  །ཅེས་དང་།  སྟོན་པའི་མཆོད་རྟེན་དག་ལ་རྒྱན་འཕྱང་འདོགས།  །དེ་དག་དོ་ཤལ་རྒྱན་ཕྲེང་ནོར་བུ་དང་།  །གདུ་བུ་དག་དང་དཔུང་རྒྱན་མཆོག་རྣམས་ཀྱིས།  །ལུས་རྒྱན་འཇིག་རྟེན་དག་ན་རྒྱུ་བར་འགྱུར།  །ཞེས་དང་།  སུ་དག་བདེ་བར་གཤེགས་པའི་མཆོད་རྟེན་ལ།  །དགའ་ཞིང་རྔ་ཡབ་རྣམས་ནི་འབུལ་བྱེད་པ།  །ཐུགས་དགའ་རྒྱལ་བ་རྣམས་ནི་རྔ་ཡབ་ཐོགས།  །ཆེད་དུ་དེ་ལ་ཆེར་ཡང་གཡོབ་བར་བྱེད།  །ཅེས་དང་།  སྐྱེ་བོ་སུ་དག་འཇིག་རྟེན་མགོན་པོ་ལ།  །རིན་ཆེན་འབར་བ་ཡིད་དང་འཐད་པ་རྣམས།  །འབུལ་བ་དེ་དག་རིན་ཆེན་བདུན་པོ་དང་།  །བྱང་ཆུབ་ཡན་ལག་རིན་ཆེན་དྲི་མེད་ཐོབ།  །ཅེས་དང་།  སུ་དག་གླང་ཆེན་འདུལ་སྦྱངས་དཔའ་བས་བརྒྱན།  །དུལ་བའི་རྟ་དང་སྦྱར་བའི་ཤིང་རྟ་དག  །སྟོན་པ་དང་ནི་འཕགས་པའི་ཚོགས་ལ་འབུལ།  །དེ་དག་བླ་མེད་ཐེག་ཆེན་ཐོབ་པར་འགྱུར།  །ཞེས་སོ།   །  ༈ 

ཁྲི་དང་སྟན་སོགས་ཕུལ་བས། དཔའ་བོས། ག་བུར་ཙནྡན་ཨ་ག་རུ། །ལུས་བྱུགས་ས་ཡི་ལྷ་མོ་ནི། །ནུ་མ་ཟུང་ལྡན་ལུས་བརྟེན་ནས། །གོས་མཆོག་འབོལ་སྟན་ལ་རྟག་ཉལ། །དེ་དག་མཆོད་རྟེན་རྣམས་ལ་ནི། །གདུགས་དང་གོས་ཁྲི་ཕུལ་བ་ཡིན། །ཞེས་སོ། ། ༈ ནོར་བུ་ཟ་འོག་དྲྭ་བ་དྲྭ་ཕྱེད་སོགས་ཕུལ་བས། སྤྱན་གཟིགས་མདོར། དགའ་བའི་སེམས་ཀྱིས་མགུ་བའི་ཤུགས་བསྐྱེད་དེ། །བཅོམ་ལྡན་མཆོད་རྟེན་ནོར་བུའི་དྲྭ་བ་ཕུལ། །དེ་ནི་རྒྱལ་པོ་མཚན་གྱི་གོ་ཆ་ཅན། །མཐུ་ཆེན་བླ་མ་འཁོར་ལོས་སྒྱུར་བར་འགྱུར། །ཞེས་སོ། ། ༈ དེ་དག་ལ་སྨོན་ལམ་གྱིས་མཚམས་སྦྱོར་དགོས་ཏེ། ཕལ་པོ་ཆེར། ཇི་ལྟར་ནོར་བུ་རིན་ཆེན་བསམ་པ་ཀུན་བཀང་བ། །གང་རྣམས་ཅི་འདོད་དེ་ལ་དེ་དག་ཐམས་ཅད་འབྱིན། །དེ་ནི་བསོད་ནམས་གང་གིས་བྱས་པ་དེས་མཐོང་སྟེ། །རིན་ཆེན་དམ་པ་དེ་ལ་རྣམ་རྟོག་གང་ཡང་མེད། །དེ་བཞིན་བདེ་གཤེགས་སྐུ་མཆོག་བསམ་པ་ཀུན་བཀང་བ། །མཐོང་ན་སྨོན་ལམ་སུ་འདེབས་དེ་དག་འགྲུབ་པར་འགྱུར། །སྙིང་རིང་དམའ་བའི་སེམས་ལྡན་འགྲོ་བ་ཐུབ་མི་མཐོང་། །བདེ་གཤེགས་རྣམ་རྟོག་མི་མངའ་སེར་སྣ་མི་མངའོ། །ཞེས་སོ། །སློབ་དཔོན་དཔའ་བོས། །ཡོན་ཏན་རིན་ཆེན་ཐམས་ཅད་ཀྱི། །གཏེར་དུ་གྱུར་པའི་དད་པ་ནི། །རྟག་ཏུ་དེ་ཡིས་བསྐྱེད་པར་བྱ། །དད་པ་ཡིས་ནི་མ་བཞིན་དུ། །དགེ་བ་རྣམས་ནི་སྐྱེད་པར་བྱེད། །ཅེས་སོ། །འཇམ་དཔལ་རྩ་རྒྱུད་ལས། །དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་ཚྭ་སྒོར་བཏབ་པ་ལ། །མྱུ་གུ་སྐྱེ་བ་མེད་པ་བཞིན། །ཞེས་དང་། དཀོན་མཆོག་ཏ་ལར། དད་པ་གཏེར་དང་ནོར་དང་རྐང་པ་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་པ་སོགས་དཔག་ཏུ་མེད་པ་བསྟན། ། ༈

མཆོད་རྟེན་བསྐོར་བ་ལས། །བཞུགས་པའི་ཚེ་ནི་གང་གིས་མཆོད། །མྱ་ངན་འདས་འོག་གང་གིས་མཆོད། །སེམས་དགེ་བ་ནི་མཚུངས་གྱུར་ན། །བསོད་ནམས་ལ་ནི་ཁྱད་པར་མེད། །ཅེས་སོ། །རྡོ་རྗེ་ཨ་རལླིའི་རྒྱུད་ལས། གང་གིས་གླུ་ཡིས་མཆོད་བྱེད་ན། །དེ་ནི་རྟག་ཏུ་སྒྲ་སྙན་འགྱུར། །གང་ཕྱིར་གང་ཞིག་མར་མེ་ཕུལ། །དེ་ནི་མིག་དང་ལྡན་པར་འགྱུར། །གང་ཞིག་གར་གྱིས་མཆོད་བྱེད་པ། །དེ་ནི་རིག་འཛིན་ཆེན་པོར་འགྱུར། །གང་ཞིག་ཕྱག་འཚལ་བྱེད་པ་ནི། །དེ་ནི་སྐྱེ་བོས་ཕྱག་འཚལ་འགྱུར། །གང་ཞིག་དྲི་ཞིམ་འབུལ་བ་ནི། །ལུས་ནི་དྲི་དང་ལྡན་པར་འགྱུར། །གང་ཞིག་ཕྲེང་བ་བཟང་འབུལ་བ། །དེ་ནི་གསེར་གྱི་ཕྲེང་ལྡན་འགྱུར། །གང་ཞིག་གོས་ནི་འབུལ་བ་ན། །དེས་ནི་ལྷ་ཡི་གོས་རྙེད་འགྱུར། །གང་ཞིག་མཚན་ཙམ་འདོན་པ་དང་། །དད་པ་ཙམ་ཡང་རབ་བྱེད་པ། །ལྷག་པར་མོས་པ་རབ་ཏུ་བྱེད། །དེ་དག་ཐམས་ཅད་རྣམ་དག་པའི། །སྲིད་པའི་ལོངས་སྤྱོད་རབ་ཏུ་བཟང་། །ཞེས་སོ། །བྱ་རྒྱུད་གཙུག་ཏོར་དྲི་མེད་ལས། ཐ་ན་དུད་འགྲོའི་སྐྱེ་གནས་སུ་གཏོགས་པ་དང་། གཞན་ཡང་སྲོག་ཆགས་ཀྱི་རིགས་གང་དག་མཆོད་རྟེན་གྱི་གམ་དུ་འདོད་པ་དེ་དག་ཕྱིར་མི་ལྡོག་པར་འགྱུར་རོ། །ཐ་ན་གྲིབ་མས་ཕོག་ན་ཡང་གྲོལ་བར་འགྱུར་ན་བྱ་བ་མང་དུ་བྱེད་པ་དག་ལྟ་སྨོས་ཀྱང་ཅི་དགོས། ཞེས་དང་། འོད་ཟེར་དྲི་མེད་ལས། ཐ་ན་བྱ་དང་སྦྲང་བུ་ལ་སོགས་པ་མཆོད་རྟེན་དེ་ཡི་གྲིབ་མས་ཕོག་ན་ཡང་དེ་བཞིན་གཤེགས་པས་མཁྱེན་ཅིང་དགོངས་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཕྱིར་མི་ལྡོག་པའི་སར་གནས་པར་འགྱུར་རོ། །གང་ལ་ལ་ཞིག་གིས་མཆོད་རྟེན་འདི་ལྟ་བུ་རྨི་ལམ་དུ་རྨིས་སམ། །རྒྱང་ནས་མཐོང་ངམ། དྲིལ་བུའི་སྒྲ་ཐོས་སམ། །མཆོད་རྟེན་བཞེངས་པའི་གཏམ་རྣ་བར་ཐོས་པ་དེ་དག་ཀྱང་མཚམས་མེད་པ་ལྔ་ལ་སོགས་ཏེ་སྡིག་པ་དང་སྒྲིབ་པ་ཐམས་ཅད་བྱང་སྟེ་རྟག་ཏུ་དེ་བཞིན་གཤེགས་པ་རྣམས་ཀྱིས་སྲུང་བ་དང་རྗེས་སུ་དགོངས་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ཡོངས་སུ་དག་པ་འཐོབ་པར་འགྱུར་རོ། །ཞེས་སོ། །དེ་ལྟ་བུའི་ཡོན་ཏན་དང་མཆོད་པ་ལ་སོགས་པའི་ཕན་ཡོན་རྒྱས་པར། ཤིན་ཏུ་རྒྱས་པའི་སྡེ། དཀོན་མཆོག་ཏ་ལ། དམ་པའི་ཆོས་པདྨ་དཀར་པོ། སྙིང་རྗེ་པད་དཀར། སྤྱན་རས་གཟིགས་ཀྱི་མདོ། མཆོད་རྟེན་བསྐོར་བའི་མདོ། རྣམ་པར་སྨིན་པ་བསྟན་པ་གསལ་རྒྱལ་གྱིས་ཞུས་པའི་ཚིགས་སུ་བཅད་པ། ལས་རྣམ་འབྱེད། དགེ་སྡིག་རྣམ་འབྱེད། མར་མེ་ཕུལ་བའི་མདོ། ཆོས་བསམ་གྱིས་མི་ཁྱབ་པ་བསྟན་པའི་མདོ། ཆོ་འཕྲུལ་རྣམ་པར་བསྟན་པའི་མདོ། བྱང་ཆུབ་སེམས་དཔའི་སྡེ་སྣོད། དྲི་མེད་རྣམ་གཉིས་སོགས་མདོ་རྒྱུད་དང་། དཔའ་བོའི་ཟ་མ་ཏོག་སོགས་བསྟན་བཅོས་དག་ལ་རྒྱ་ཆེར་བཤད་ཅིང་། ཁྱད་པར་དཀོན་མཆོག་ཏ་ལ། །ལས་རྣམ་འབྱེད། གསལ་རྒྱལ་མདོ། །སྤྱན་གཟིགས་མདོ་སོགས་ལས་གསལ་ལོ། །དེ་ལྟར་ཡང་ཇི་བཞིན་པའི་འབྲས་བུ་ཐོབ་པ་ལས་རྫུན་གཏམ་སོགས་སྲིད་པ་ལྟ་ག་ལ་སྟེ། ཟླ་བ་སྒྲོན་མེའི་མདོར། ཟླ་བ་སྐར་མར་བཅས་པ་སར་ལྷུང་ཞིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱོད་ནི་མི་བདེན་པ་ཡི་ཚིག་མི་གསུངས། །ཞེས་སོ། །སྨན་གྱི་མདོ་ལས། གདུགས་དང་། དགུང་ཟླ་འདི་ལྟར་རྫུ་འཕྲུལ་ཆེ་བ་འདི་གཉིས་ནི་དོག་ས་ལ་ལྷུང་ཡང་གདའ། རི་ཡི་རྒྱལ་པོ་རི་རབ་ནི་གནས་ནས་འཕོ་ཡང་གདའི། སངས་རྒྱས་ཐམས་ཅད་ཀྱི་བཀའ་ནི་གཞན་དུ་མི་འགྱུར་བ་ལགས་སོ། །ཞེས་སོ། །འདི་རྣམས་སྡེ་སྲིད་རིན་པོ་ཆེའི་གསེར་གདུང་འཛམ་གླིང་རྒྱན་གཅིག་དཀར་ཆག་ལས་སོ།། །། ༈

[edit]

mchod rten bzhengs pa'i phan yon sogs tshogs bsags pa'i phan yon skor/ mchod rten bzhengs pa'i phan yon ni/__myang 'das las/__lha dang mi dang 'khor rnam pa bzhis rin chen sna bdun gyis mchod rten byas te ring bsrel la mchod na bsod nams dpag tu med pa thob cing /__sems can mtha' dag srid pa gsum gyi sdug bsngal spangs te mya ngan las 'das pa'i bde ba thob par 'gyur ro/__/zhes dang /__de bzhin pad dkar/__sgra chen po'i mdo/__dge ba'i rtsa ba yongs su 'dzin pa'i mdo/__za ma tog bkod pa/__cho 'phrul rnam par bstan pa'i mdo/__chos bsam gyis mi khyab par bstan pa/__las kyi rnam par smin pa bstan pa'i mdo/__khang bu brtsegs pa'i mdo/__las dang phan yon bstan pa'i chos kyi rnam grangs/__rmad du byung ba'i chos kyi rnam grangs sogs las rgya cher bstan la/__de skad du bya rgyud gtsug tor dri med snang bar/__mchod rten gyi las byas na tshe zad pa yang slar nur te tshe ring bar byed do/__/gal te shi bor na yang sbrul gyi pags pa brjes pa bzhin du lus bor nas 'jig rten gyi khams bde ba can du 'gro bar 'gyur ro/__/'chi ba'i sdug bsngal myong bar mi 'gyur ro/__/phyin chad nam yang 'chi ba'i tshor ba mthong bar mi 'gyur ro/__/phyin chad sems can dmyal ba dang /__dud 'gro dang /__gshin rje'i 'jig rten dang /__ngan 'gror 'gro zhing skye bar mi 'gyur ro/__/phyin chad sems can dmyal ba'i sgra rna lam du grags par mi 'gyur na/__'bras bu rnam par smin par 'gyur ba lta ci smos te/__de ni gnas med do/__/zhes so/__/de bzhin du slob dpon dpa' bos/__bde bar gshegs pa'i mchod rten la/__/dga' bas srog shing 'dzugs byed cing /__/gdugs dang dril bu rnams dang ni/__/gdugs kyi phreng ba 'bul byed pa/__/de dag mir ni rgya che zhing /__/dpal ni phun sum tshogs pa thob/__/ces sogs rgya cher bstan to/__/ting 'dzin rgyal po las/__de bzhin gser dag dang ni dngul dag dang /__/tsan+dan gyi ni sku gzugs bzo ba dag__/mdzes shing shin tu lta na sdug pa gyis/__/ring por mi thogs ting 'dzin mchog 'di thob/__/ces dang /__pad+ma dkar por/__ro nye dang ni lcags sam sa yang rung /__/bde bar gshegs pa rnams kyi gzugs byas te/__/blta na sdug pa 'jim pa las byed bcug__/de dag thams cad byang chub thob par 'gyur/__/zhes sogs dang /__gzhan yang klu'i rgyal po rgya mtshos zhus pa/__spyan ras gzigs kyi mdo/__/dad pa'i stobs bskyed pa'i mdo/__/sangs rgyas kyi stobs bskyed pa'i mdo/__de bzhin gshegs pa'i gzugs brnyan bzhag pa'i phan yon brjod pa sogs las rgya cher bstan cing /__gsal rgyal gyis zhus pa'i tshigs su bcad par/__bcom ldan 'das kyi mchod rten rnams dang ni/__sku gzugs rnams la rdul phran ci song ba/__/de yi grangs snyed de byed mi rnams kyis/__/lha yul sa steng nges par rgyal srid thob/__/gzugs dang gzugs med khams kyi ting nge 'dzin/__/phun sum tshogs pa'i sa mchog kun myong nas/__/tha mar skye dang rga la sogs pa yi/__/sdug bsngal med pa'i sangs rgyas go 'phang thob/__/ces dang /__dpa' bos/__bde gshegs sku gzugs bzhengs gsol ba/__/mtshan bzang gis mtshan 'khor los sgyur/__/sum cu rtsa gnyis lus mdzes thob/__/nyes pa'i dgra tshogs rgyal bar 'gyur/__/zhes sogs mtha' yas so/__/sgo mtha' yas pa'i gzungs las/__mdo sde thos nas rjes su yi rangs dang /__/yi ger bris dang gzungs dang bklag pa yis/__/bsod nams chu bo ji tsam bskyed pa ni/__/sems can kun gyis shes pa yong mi nus/__/des ni tshe rabs kun tu rgyal ba mthong /__/de dag la yang dad pa bsam yas rnyed/__/mdo sde zab mo'i tshul yang shes par 'gyur/__/de ni myur du byang chub rdzogs 'tshang rgya/__/zhes sogs dam chos pad dkar/__brgyad stong pa/__snying rje pad dkar sogs su bsam gyis mi khyab par bstan to/___/_! gtsug lag khang bzhengs pa'i phan yon ni/__/gsal rgyal gyi tshigs su bcad pa'i mdo las/__su zhig sangs rgyas sku gzugs mchod rten sku gzugs khang /__/tshon rtsi sna tshogs rnams kyis mdzes byed pa/__/de ni bde gshegs mnga' ba'i yon tan rnams/__/sna tshogs ldan pa kun gyis brtsegs par 'gyur/__/zhes dang /__spyan ras gzigs kyi mdo sogs las rgya cher bstan to/___/__!_ sangs rgyas dngos su bzhugs pa dang /__sku gzugs mchod pa gnyis khyad par med par/__myang 'das bam po zhe gnyis par/__bcom ldan 'das kyis kun dga' bo la bka' stsal pa/__skyes bu de gnyis kyis de ltar dad pa'i sems kyis mchod na bsod nams thob pa'i khyad par med do/__/de ci'i phyir zhe na/__sangs rgyas mya ngan las 'das kyang chos kyi sku ni rtag pa yin pas dad pa'i sems kyis mchod pa bsod nams 'dra ste khyad par med do/__/zhes so/__/byang chub sems dpa'i sde snod las/__su dag dkon mchog gsum la me tog dang /__/'bras bu gsar thob byung ba 'bul byed pa/__/de dag 'gro ba rnams su 'khor ba na/__/ro mchog kun thob mi brdzi'i stobs dang ldan/__/ces dang /__dpa' bo'i za ma tog lta bu'i gtam las/__me tog bzang pos dge 'dun la/__/rab tu 'thor zhing mchod byed pa/__/brgya byin las lhag longs spyod ldan/__/pad+ma'i dbang po lta bur mdzes/__/mchog tu grags pa dang ldan cing /__/rtag tu de ni skad cig gis/__/dgra las rnam par rgyal bar 'gyur/__/zhes sogs dpag tu med par bstan to/__/spyan ras gzigs kyi mdo las/__mchod rten phreng ba 'dir phul na/__/khang bzang dag dang khang brtsegs dang /__/lha yi bu mo'i bsten pa rnams/__/sum cu rtsa gsum longs spyod 'gyur/__/zhes rin po che'i phreng ba la sogs pa phul ba la phan yon mang du bshad do/___/__!_ ba dan phul bas na/__gsal rgyal gyi tshigs bcad las/__mi rnams su dag sku gdung snying po can/__/dri med bsod nams 'byung gnas gyur pa la/__/ba dan mdzes pa sna tshogs 'dogs pa dag__/mthu dang ldan cing srid gsum mchod gnas 'gyur/__/zhes sogs rgya cher bstan/___/__!_ rol mo phul bas ni/__snga mar/__rgyal ba'i mchod rten dag la dril bu dpyongs/__/tshig btsan grags pa chen po dag dang ldan/__/tshangs pa'i sgra dbyangs yid 'od skye ba dran/__/de dag gis ni rgyan rnams sna tshogs 'thob/__/ces dang /__rgyal ba'i mchod rten rol mo'i sgra phul ba/__/zab cing rig pa'i spobs pa phun sum tshogs/__/yan lag lnga rdzogs yid 'ong tshig dang ldan/__/sgra skad dag gis 'jig rten 'gengs par byed/__/su dag rgyal ba'i gdung rten stod byed pa/__/de dag gling bu'i sgra dang glu snyan dang /__/sgra snyan yid du 'ong ba 'thob pa dang /__/so so yang dag rig pa'ang thob par 'gyur/__/zhes dang /__dpa' bos/__rdza rnga pi waM pa tra has/__/bde bar gshegs mchog mchod byed pa/__/mir 'gyur nas ni dbyangs ldan la/__/sgra ni shin tu snyan par 'os/__/yid du 'ong ba'i gzugs dang ldan/__/zhes so/___/__!_ spos dang byug pa phul ba ni/__snga mar/__sangs rgyas mchod rten dag la dri zhim phul/__/bdug spos rgya cher mang po ldan sbyar dang /__/a ga ru yi bdug spos phul ba yis/__/de yi lus kun spos dang ldan par 'gyur/__/zhes dang /__mi rnams gang dag thub dbang mchod rten la/__/spos chu gtsang zhing dwang pas khrus gsol ba/__/de dag lus la dri ma med pa dang /__/gdung ba med cing mdog 'jam mya ngan med/__/ces dang /__dpa' bos/__'dzam bu'i gser 'dra'i pad+ma'i ge sar gyis/__/rdul rnams gtor ba yis ni dri zhim la/__/dal gyis 'bab pa'i nang du lha yi tshogs/__/rgyun du chu rnams la ni rtse byed pa/__/gang zhig dga' ba sna tshogs dri zhim chus/__/rje btsun khrus gsol ba yi 'bras de yin/__/gla rtsi ga bur tsan+dan gur gum bgos/__/dri zhim chu ni yid 'ong ba/__/kha dog dkar por bye brag gis/__/yid 'ong thub pa khrus gsol 'dir/__/sems kyi dri ma spangs nas ni/__/de ni 'gro ba'i bla mar 'gyur/__/zhes so/___/__!_ mar me phul ba ni/__spyan ras gzigs kyi mdor/__gal te khrag khrig brgya stong sangs rgyas zhing /__/yungs 'bru dag gis phyur bur gang gyur pa/__/bgrang ba dang ni gzhal zhing brjod par nus/__/bder gshegs mar me gcig phul de ltar min/__/zhes dang /__bcom ldan mchod rten mar me phul byas na/__/de yi lus kyi mdog ni yongs mi 'gyur/__/gzugs mchog sra zhing lag pa gzu ba 'dra/__/snang ba thob nas 'jig rten kun tu rgyu/__/gal te rgyal ba dam pa byung gyur na/__/de bzhin gshegs pa rnams dang nye bar 'gyur/__/nye dur 'gyur ram yang na bur yang 'gyur/__/de ni ye shes phung po myur du thob/__/ces dang /__dpa' bos/__ri rnams kyis ni bsgribs pa dang /_/mchog tu ring na gnas pa dang /__/shin tu phra ba'i dngos po dang /__/mtshan mo smag gis sgrib pa dag__/gang tshe lag mthil gnas pa ltar/__/dge slong ma 'gags pa yis mthong /__/de ni bde bar gshegs pa la/__/zhun mar phul ba'i 'bras bu yin/__/zhes sogs dang /__gzhan yang mar me phul ba'i mdo/__las rnam 'byed sogs las rgya cher bstan to/___/__!_ gdugs phul bas ni/__gsal rgyal las/__bde gshegs mchod rten dag la dga' bzhin du/__/rnam mang rgya chen gdugs ni btags pa yis/__/lha mi'i 'jig rten dag na gdugs 'dra bar/__/lha dang mi yi dbang po lta bur 'gyur/__/zhes dang /__dpa' bos/__bung ba yid 'ong sgra yis bskyod/__/me tog g.yo ba 'khor bar bkod/__/kha dog sna tshogs dri zhim pa'i/__/me tog tshogs kyi ri mor bris/__/gdugs mdzes sna tshogs dar gyis mdzes/__/mchod rten rnams la phul ba yis/__/'khor los sgyur ba sa skyong ba/__/gling bzhi'i dbang phyug de yis thob/__/ces so/___/__!_ gos phul bas ni/__snga mar/__rgyal ba'i mchod rten la ni gos phul bas/__/bsod nams byams pa ngo tsha'i gos gyon te/__/dga' zhing yon tan kun ldan ser sna med/__/mdog kyang 'jam zhing kha dog gser 'drar 'gyur/__/zhes so/__/slob dpon dpa' bos/__gang zhig sngo ser ljang dmar dkar/__/sna tshogs kha dog 'od bzang pas/__/mdzes gsal gos kyi phreng ba ni/__/yon tan mchog dang ldan pa yi/__/'jig rten bla ma la phul bas/__/bsngags pa'i gos mchog thob par 'gyur/__/zhes so/___/__!_ snyan shal phul bas ni/__spyan gzigs mdor/__'jig rten mgon po skyob pa la/__/dar gyi dbul ba phul byas na/__/lha yi dag dang mi rnams kyis/__don rnams thams cad 'grub par 'gyur/__/zhes pa la sogs pa dpag tu med pa gsungs so/___/__!_ rgyal mtshan phul bas/__spyan gzigs mdor/__rdul bsal sems can mchog la rgyal mtshan phul/__/ring por mi thogs nor mang rnyed 'gyur zhing /____/shes rab mtha' yas mdzod ni mang ldan 'ong /__/zhes sogs dpag tu med pa bstan to/__/mchod rten bskor mdo las/__mkhas pa gang zhig sangs rgyas mchod rten la/__/dga' ba'i sems kyis rgyal mtshan 'phan gdugs thogs/__/gser gyi ri bo lhun po tshad 'bum yang /__/de ni de dang mtshungs pa yod ma yin/__/zhes so/___/__!_ maN+Dal 'bul bas ni/__dpa' bos/__sangs rgyas la ni gang zhig 'dir/__/maN+Dal me tog bcas byed pa/__/'gro ba'i bdag po tshe ring zhing /__/sna tshogs nad kyi 'jigs las grol/__/gang yin de yis skad cig 'thob/__/bde gshegs maN+Dal byed de dag__/pha rol phyin drug thob gyur te/__/chu dang sa bsres btang sbyin pa/__/grog ma sogs sel tshul khrims te/__/bsres nas nyed pa bzod pa yin/__/'bad par byed pa brtson 'grus te/__/skad cig de la rtse gcig tu/__/sems 'dzin byed pa bsam gtan yin/__/legs par gzos pa shes rab bo/__/sna tshogs bsod nams rnams kyis brgyan/__/sa gzhi bris pa 'bul byed pa/__/lha yi bde ba thams cad dang /__/longs spyod mchog dang ldan gyur cing /__/mir skyes gser las lhag pa yi/__/kha dog dang ldan mdzes pa dang /__/pad+ma'i mdog ltar yan lag tshang /__/mig gi dkyus ni mdzes par gsungs/__/zhes so/___/__!_ zhal zas phul bas ni/__de nyid las/__rdo rje gdan la bzhugs nas ni/__/'dod pa'i dgra dang bcas pa yi/__/tshogs ni byams pa nges pham mdzad/__/gang zhig mthar thug dpa' ba'i yul/__/mtha' med par ni spyod 'gyur ba'i/__/nyon mongs dka' ba'i dgra las rgyal/__/phung po'i bdud kyang rab bcom nas/__/'chi bdag bdud la mnga' brnyes pa/__/zhal zas phul bar gyur pa yin/__/zhes mchog dang /__thun mong du/__yang dag dpal thob mi dbang gis/__/ro ldan kha zas longs spyod pa/__/rtag tu zas mchog sbyin de yis/__/zhes sogs gsungs so/___/__!_ yon chab sogs btung ba phul bas/__snga mar/__g.yo zhing ut+pal gyis bsgos pa/__/dri med pad+ma rA ga bzhin/__/yid 'ong gser gyi snod du blugs/__/dri zhim tsan+dan gyis bsgos mngar/__/yid du 'ong dang 'ba' zhig 'thung /__/cung zad mig ni zangs mdog 'dra/__/glu len sgra dang nges ldan pa'i/__/mi mchog de dag snyoms rnams ni/__/mngon par phul ba'i 'bras bu yin/__/zhes dang /__dge 'dun la ni btung ba mchog__/dus la babs par drangs pa yis/__/'khor ba'i ri khrod gnas pa na/__/rtag tu btung ba zhim bzang thob/__/ces pa sogs so/___/__!_ phyag 'tshal bas ni/__dam chos pad+ma dkar por/__mchod rten de la gang gis thal mo sbyar/__/yongs su tshang ba'am thal mo ya gcig gam/__/yang na mgo bo skad cig btud pa dang /__/de bzhin lan gcig lus kyang btud pa dang /__/gang gi ring bsrel gnyis pa de dag la/__/g.yeng pa'i sems kyis phyag 'tshal sangs rgyas zhes/__/tshig gcig lan 'ga' brjod par byas pa yang /__/de dag kun gyis byang chub mchog 'di thob/__/ces dang /__dpa' bos/__de ltar yon tan tshogs shes pas/__/lus 'di 'jig par shes nas ni/__/mkhas pas sangs rgyas phyag bya zhing /__/lus kyi las ni legs par spyad/__/phyag gcig 'tshal bar gyur pas kyang /__/'khor ba spong pa'i rgyu thob cing /__/'khor ba'i 'jigs thar gus pa yis/__/de ltar su zhig phyag mi byed/__/ces dang /__spyan gzigs mdor/__bcom ldan mchod rten rnams la pus btsugs phyag btsal ni/__/de la de yi dbang po kun kyang 'dud par 'gyur/__/gnod sbyin dbang dang lha dang klu yi rgyal po dang /__/tshangs pa'i dbang po thams cad rkang pas gtug par byed/__/ces so/__/bskor ba'i phan yon ni/__gsal rgyal gyis tshigs su bcad par/__su zhig dad pas thub pa'i mchod rten nam/__/sku gzugs dag la skor ba byed pa de/__/phyi ma'i tshe na dgra chen rnams kyis btud/__/bzo yi snod gyur yon tan rnams dang ldan/__/mi rnams su dag dga' bzhi'i gus pa yis/__/bla med mchod rten rnams dang sku gzugs la/__/lus kyi las rnams byed pa de dag ni/__/srid pa kun tu mdzod rnams shin tu rgyas/__/zhes so/__/snying rje pad dkar las/__srog chags kun la phan pa'i phyir/__/byang chub tu ni sems bskyed nas/__/'jig rten mgon gyi mchod rten la/__/su zhig skor ba byed pa ni/__/tshe rabs dag ni thams cad du/__/byang chub spyad pa spyod pa'i tshe/__/dran dang ldan cing blo gros ldan/__/bsod nams ldan cing 'jigs med 'gyur/__/zhes sogs rgya cher bstan to/___/__!_ me tog rnying pa 'phyags pa'i phan yon ni/__spyan gzigs mdor/__dad pa'i shugs bskyed bcom ldan mchod rten la/__/me tog skam po nyal nyil 'phyags byas na/__/'dod pa smad pa sdug bsngal byed pa spong /__/stobs bcu mnga' ba'i ded dpon mnyes par byed/__/ces sogs dpag tu med pa dang /__gsal rgyal las/__rgyal ba'i mchod rten me tog rnying bsal bas/__/'dod chags chags med zhe sdang ldang mi 'gyur/__/gti mug rmongs med lta ngan chags mi 'gyur/_/mi rnams rab tu dga' zhing skyid par 'gyur/__/zhes dang /__thub dbang mchod rten byi dor byas pa yis/__/shin tu lta na sdug cing mig tu mdzes/__/byad bzhin bzang zhing pad+mo'i mdog dang ldan/__/sred pa'i skyon rnams dang yang bral bar 'gyur/__/zhes so/___/__! rnying pa zhig gso sogs kyi phan yon ni/__snga mar/__mi rnams su dag mchod rten rnying pa rnams/__/gzhan gyi ngor byed ma yin rang gi blos/__/ral tshem byed pa'i skye bo de dag ni/__/lus bzang yon tan dam pas brgyan par 'gyur/__/zhes dang /__spyan gzigs mdor/__bcom ldan mchod rten ba rgya sus sel ba/__/bag yod gyur nas de ni bdud rgya 'dral/__/dus kun rnams su ngan song sa yang spong /__/rtag tu sangs rgyas rdul bral bsti stang byed/__/rtag tu stobs ldan 'khor los sgyur bar 'gyur/__/zhes sogs mtha' yas so/___/__!_ _bla bre cod pan do shal sogs phul bas ni/__gsal rgyal mdor/__su dag la la mchod rten sku gzugs la/__/dad pa'i sems kyis bla bre 'bul byed pa/__/de dag sa steng rgya mtsho'i mtha' klas pa/__/ma lus gnas med rgyal gcig dbang phyug 'gyur/__/zhes dang /__bde gshegs mchod rten cod pan btags pa yis/__/mi dbang dpal dang lha dbang dpal thob cing /__/bde ba'i mchog kyang nyams su myong gyur nas/__/rnam par grol ba'i cod pan khyad par 'thob/__/ces dang /__ston pa'i mchod rten dag la rgyan 'phyang 'dogs/__/de dag do shal rgyan phreng nor bu dang /__/gdu bu dag dang dpung rgyan mchog rnams kyis/__/lus rgyan 'jig rten dag na rgyu bar 'gyur/__/zhes dang /__su dag bde bar gshegs pa'i mchod rten la/__/dga' zhing rnga yab rnams ni 'bul byed pa/__/thugs dga' rgyal ba rnams ni rnga yab thogs/__/ched du de la cher yang g.yob bar byed/__/ces dang /__skye bo su dag 'jig rten mgon po la/__/rin chen 'bar ba yid dang 'thad pa rnams/__/'bul ba de dag rin chen bdun po dang /__/byang chub yan lag rin chen dri med thob/__/ces dang /__su dag glang chen 'dul sbyangs dpa' bas brgyan/__/dul ba'i rta dang sbyar ba'i shing rta dag__/ston pa dang ni 'phags pa'i tshogs la 'bul/__/de dag bla med theg chen thob par 'gyur/__/zhes so/___/__!_ khri dang stan sogs phul bas/__dpa' bos/__ga bur tsan+dan a ga ru/__/lus byugs sa yi lha mo ni/__/nu ma zung ldan lus brten nas/__/gos mchog 'bol stan la rtag nyal/__/de dag mchod rten rnams la ni/__/gdugs dang gos khri phul ba yin/__/zhes so/___/__!_ nor bu za 'og drwa ba drwa phyed sogs phul bas/__spyan gzigs mdor/__dga' ba'i sems kyis mgu ba'i shugs bskyed de/__/bcom ldan mchod rten nor bu'i drwa ba phul/__/de ni rgyal po mtshan gyi go cha can/__/mthu chen bla ma 'khor los sgyur bar 'gyur/__/zhes so/___/__!_ de dag la smon lam gyis mtshams sbyor dgos te/__phal po cher/__ji ltar nor bu rin chen bsam pa kun bkang ba/__/gang rnams ci 'dod de la de dag thams cad 'byin/__/de ni bsod nams gang gis byas pa des mthong ste/__/rin chen dam pa de la rnam rtog gang yang med/_/de bzhin bde gshegs sku mchog bsam pa kun bkang ba/__/mthong na smon lam su 'debs de dag 'grub par 'gyur/__/snying ring dma' ba'i sems ldan 'gro ba thub mi mthong /__/bde gshegs rnam rtog mi mnga' ser sna mi mnga'o/__/zhes so/__/slob dpon dpa' bos/__/yon tan rin chen thams cad kyi/__/gter du gyur pa'i dad pa ni/__/rtag tu de yis bskyed par bya/__/dad pa yis ni ma bzhin du/__/dge ba rnams ni skyed par byed/___/ces so/__/'jam dpal rtsa rgyud las/__/dad pa med pa'i mi rnams la/__/dkar po'i chos rnams mi skye ste/__/sa bon tshwa sgor btab pa la/__/myu gu skye ba med pa bzhin/__/zhes dang /__dkon mchog ta lar/__dad pa gter dang nor dang rkang pa mchog__/lag pa bzhin du dge sdud rtsa ba yin/__/zhes pa sogs dpag tu med pa bstan/___/__!_ mchod rten bskor ba las/__/bzhugs pa'i tshe ni gang gis mchod/__/mya ngan 'das 'og gang gis mchod/__/sems dge ba ni mtshungs gyur na/__/bsod nams la ni khyad par med/__/ces so/__/rdo rje a ral+li'i rgyud las/__gang gis glu yis mchod byed na/__/de ni rtag tu sgra snyan 'gyur/__/gang phyir gang zhig mar me phul/__/de ni mig dang ldan par 'gyur/__/gang zhig gar gyis mchod byed pa/__/de ni rig 'dzin chen por 'gyur/___/gang zhig phyag 'tshal byed pa ni/__/de ni skye bos phyag 'tshal 'gyur/__/gang zhig dri zhim 'bul ba ni/_/lus ni dri dang ldan par 'gyur/__/gang zhig phreng ba bzang 'bul ba/__/de ni gser gyi phreng ldan 'gyur/__/gang zhig gos ni 'bul ba na/__/des ni lha yi gos rnyed 'gyur/__/gang zhig mtshan tsam 'don pa dang /__/dad pa tsam yang rab byed pa/__/lhag par mos pa rab tu byed/__/de dag thams cad rnam dag pa'i/__/srid pa'i longs spyod rab tu bzang /__/zhes so/__/bya rgyud gtsug tor dri med las/__tha na dud 'gro'i skye gnas su gtogs pa dang /__gzhan yang srog chags kyi rigs gang dag mchod rten gyi gam du 'dod pa de dag phyir mi ldog par 'gyur ro/__/tha na grib mas phog na yang grol bar 'gyur na bya ba mang du byed pa dag lta smos kyang ci dgos/__zhes dang /__'od zer dri med las/__tha na bya dang sbrang bu la sogs pa mchod rten de yi grib mas phog na yang de bzhin gshegs pas mkhyen cing dgongs par mdzad de/__bla na med pa yang dag par rdzogs pa'i byang chub phyir mi ldog pa'i sar gnas par 'gyur ro/_/gang la la zhig gis mchod rten 'di lta bu rmi lam du rmis sam/__/rgyang nas mthong ngam/__dril bu'i sgra thos sam/__/mchod rten bzhengs pa'i gtam rna bar thos pa de dag kyang mtshams med pa lnga la sogs te sdig pa dang sgrib pa thams cad byang ste rtag tu de bzhin gshegs pa rnams kyis srung ba dang rjes su dgongs par mdzad de/__bla na med pa yang dag par rdzogs pa'i byang chub kyi lam yongs su dag pa 'thob par 'gyur ro/__/zhes so/__/de lta bu'i yon tan dang mchod pa la sogs pa'i phan yon rgyas par/__shin tu rgyas pa'i sde/__dkon mchog ta la/__dam pa'i chos pad+ma dkar po/__snying rje pad dkar/__spyan ras gzigs kyi mdo/__mchod rten bskor ba'i mdo/__rnam par smin pa bstan pa gsal rgyal gyis zhus pa'i tshigs su bcad pa/__las rnam 'byed/__dge sdig rnam 'byed/__mar me phul ba'i mdo/__chos bsam gyis mi khyab pa bstan pa'i mdo/__cho 'phrul rnam par bstan pa'i mdo/__byang chub sems dpa'i sde snod/__dri med rnam gnyis sogs mdo rgyud dang /__dpa' bo'i za ma tog sogs bstan bcos dag la rgya cher bshad cing /__khyad par dkon mchog ta la/__/las rnam 'byed/__gsal rgyal mdo/__/spyan gzigs mdo sogs las gsal lo/__/de ltar yang ji bzhin pa'i 'bras bu thob pa las rdzun gtam sogs srid pa lta ga la ste/__zla ba sgron me'i mdor/__zla ba skar mar bcas pa sar lhung zhing /__/ri dang grong du bcas pa'i sa zhig la/__/nam mkha'i khams ni rnam pa gzhan gyur kyang /__/khyod ni mi bden pa yi tshig mi gsungs/__/zhes so/__/sman gyi mdo las/__gdugs dang /__dgung zla 'di ltar rdzu 'phrul che ba 'di gnyis ni dog sa la lhung yang gda'/__ri yi rgyal po ri rab ni gnas nas 'pho yang gda'i/__sangs rgyas thams cad kyi bka' ni gzhan du mi 'gyur ba lags so/__/zhes so/__/'di rnams sde srid rin po che'i gser gdung 'dzam gling rgyan gcig dkar chag las so//___//__!