JKW-KABAB-22-ZA-005

🚧 This website is under continued development. We appreciate your patience!

Previous Text Back to Volume PageNext Text

སྡོམ་པ་གསུམ་གྱི་སྨོན་ལམ་དོན་གཉིས་ངལ་བསོ།

Wylie title	sdom pa gsum gyi smon lam don gnyis ngal bso
Location	mkhyen brtse'i bka' babs Volume 22, Text 5, Pages 735-737 (Folios 1a1 to 2a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sdom pa gsum gyi smon lam don gnyis ngal bso. In Rdzong sar 'jam dbyangs mkhyen brtse'i dbang po'i bka' babs, Vol. 22: 735-737. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Prayers - smon lam
Karchag page	JKW-KABAB-Volume-22-ZA-Karchag
Colophon	།ཅེས་པའང་སྲིད་ལས་ངེས་པར་གྲོལ་བའི་བློས་བསླབ་པ་རིན་པོ་ཆེ་དམ་དུ་འཆང་བ་ནི་བསྟན་ལ་སྨོན་པ་ཡོངས་ཀྱི་ངེས་བརྗོད་དུ་སྣང་བའི་ཕྱིར། དེའི་རྗེས་སུ་སྨོན་པ་ཙམ་དུ་རྨོངས་བརྟུལ་ཨ་བྷཱ་ཡའི་མིང་གིས་སོ།།
	ces pa'ang srid las nges par grol ba'i blos bslab pa rin po che dam du 'chang ba ni bstan la smon pa yongs kyi nges brjod du snang ba'i phyir/__de'i rjes su smon pa tsam du rmongs brtul a b+hA ya'i ming gis so

Tibetan Text

Wylie

[edit]

སྡོམ་པ་གསུམ་གྱི་སྨོན་ལམ་དོན་གཉིས་ངལ་བསོ་བཞུགས། །ན་མོ། རྒྱལ་བ་ཀུན་གྱི་ཐུགས་བསྐྱེད་མཁའ་ཀློང་ལས། །ཕན་བདེའི་སྤྲིན་གྱི་བླ་བྲེ་མཛེས་པའི་དབུས། །སྡོམ་གསུམ་བདུད་རྩིའི་ཆར་རྒྱུན་འཇོ་བ་ཡིས། །ཐར་པ་མཆོག་གི་མྱུ་གུ་བཞད་པར་ཤོག ༡ །མཐོན་མཐིང་ལྕང་ལོའི་ཟུར་ཕུད་བྲེགས་པ་ཡིས། །སྲིད་པའི་འཆིང་བ་མ་ལུས་བརྒལ་བྱས་ཏེ། །ངུར་སྨྲིག་བླ་གོས་གསར་པའི་གཟི་འོད་ཀྱིས། །ས་གསུམ་ཕན་བདེའི་སྣང་བས་ཁྱབ་གྱུར་ཅིག ༢ །གཞི་གསུམ་ཆོ་གའི་རྩ་བ་ལེགས་བརྟན་ཅིང༌། །སྤངས་དང་འཇུག་པའི་ཚུལ་ཁྲིམས་ཡལ་ག་རྒྱས། །སྲིད་པའི་དགྲ་བཅོམ་གེ་སར་མཛེས་གྱུར་པའི། །དམ་ཆོས་འདུལ་བའི་ཚལ་བརྒྱ་འཕེལ་བར་ཤོག ༣ །གཞན་ཕན་ག་བུར་བརྩེགས་པའི་མཛའ་བཤེས་གྱིས། །འགྲོ་ཀུན་དགའ་བའི་ཀུནྡ་རྒྱས་པ་དང༌། །ལྷན་ཅིག་འཁོར་བའི་མུན་སྟུག་རབ་བཅོམ་སྟེ། །ཟག་མེད་བདུད་རྩིའི་དཔལ་གྱིས་འཚོ་བར་ཤོག ༤ །སྤྱིན་དང་ཚུལ་ཁྲིམས་བཟོད་པ་བརྩོན་འགྲུས་དང༌། །བསམ་གཏན་ཤེས་རབ་ནོར་བུའི་འཁྲི་ཤིང་ཆེར། །ཕ་རོལ་ཕྱིན་པའི་ལམ་ལ་བརྟེན་པ་ཡིས། །བྱང་ཆུབ་མཆོག་གི་འབྱོར་པས་ཕྱུག་པར་ཤོག ༥ །ལུང་དང་རྟོགས་པའི་ཆོས་ཚུལ་རྒྱ་མཚོ་ཆེ། །ཤེས་རབ་གསུམ་གྱི་གྲུ་གཟིང་གཡོ་བ་ཡིས། །རྒྱལ་གསུང་ལམ་བདེན་ཕ་མཐར་བརྒལ་བྱས་ནས། །ཐམས་ཅད་མཁྱེན་པའི་གླིང་དུ་ཕྱིན་པར་ཤོག ༦ །ལེགས་བཤད་ཉིན་བྱེད་གསར་པའི་འོད་ཟེར་གྱིས། །སྐལ་བཟང་བློ་གྲོས་པདྨོ་བཞད་པ་དང༌། །ལྷན་ཅིག་ལམ་མིན་མུན་པ་བསལ་བྱས་ཏེ། །རྒྱལ་བསྟན་སྣང་བས་ཡོངས་སུ་ཁྱབ་པར་ཤོག ༧ །ཆོས་བརྒྱད་འཆིང་བ་རབ་གྲོལ་དབེན་གནས་སུ། །འདུ་འཛིའི་སྤྱོད་པ་མ་ལུས་རིང་དོར་ཏེ། །རྩེ་གཅིག་ཏིང་འཛིན་མཆོག་ལ་གཡོ་མེད་པས། །དོན་གཉིས་མ་ལུས་ལྷུན་གྱིས་གྲུབ་པར་ཤོག ༨ །རྡོ་རྗེ་ཐེག་པའི་བརྒྱུད་འཛིན་བུམ་བཟང་ནས། །སྨིན་བྱེད་བདུད་རྩིའི་ཐིགས་པས་བྲན་པ་ལས། །ཐར་པའི་ཞིང་ས་རབ་ཏུ་བརླན་བྱས་ཏེ། །གཡེལ་མེད་དམ་ཚིགས་བོན་ཆགས་པར་ཤོག ༩ །སྐུ་གསུང་ཐུགས་ཀྱི་རྡོ་རྗེ་རབ་བཟུང་ཞིང༌། །ཕྲ་རགས་རྣམ་པར་དབྱེ་བ་རྒྱུད་ལ་འཆང༌། །སྲུང་མཚམས་ལས་འདས་དབྱིངས་སུ་གྲོལ་བ་ཡིས། །གསང་སྔགས་ལམ་གྱི་དེ་ཉིད་མངོན་གྱུར་ཤོག ༡༠ །བསྐྱེད་རྫོགས་མཛེས་པའི་ཁ་ཕྲུས་བྲན་པ་ལས། །རྩ་རླུང་ཐིག་ལེའི་གདུང་བ་རབ་བཅིལ་ཏེ། །སྐུ་བཞིའི་པད་དཀར་རྒྱས་པའི་བསིལ་གཡབ་ཏུ། །མ་ལུས་འགྲོ་བའི་བསྟི་གནས་འབྱུང་བར་ཤོག ༡༡ །དོན་དམ་གང་དུའང་མི་གནས་ཡེ་ཤེས་སེམས། །ལྷན་ཅིག་དགའ་བའི་རྩེ་དགས་རོལ་པར་ཤོག །ཚུར་མཐོང་རྣམ་པར་གྲོལ་བའི་འཁོར་ལོ་ཆེ། །སྒྱུ་འཕྲུལ་དྲྭ་བའི་ངོ་བོར་རྟག་བརྟན་ཤོག ༡༢ །བསླབ་གསུམ་ཁྲིམས་ཀྱི་བདུད་རྩི་རྟག་རོལ་ཞིང༌། །ཟུང་འཇུག་བདེ་དང་སྟོང་པས་རབ་མྱོས་པའི། །རིག་གྲོལ་གཉིས་མེད་དགེ་འདུན་འདུས་པའི་སྡེས། །སྲིད་པའི་ཁམས་ཀུན་དོག་པོར་བགྱིད་པར་ཤོག ༡༣ །དེ་མཐུས་ཚོགས་གཉིས་དཔྱིད་ཀྱིས་ཉེར་དྲངས་པའི། །རྫོགས་ལྡན་དབྱར་གྱི་འབྱོར་པར་སྤྱོད་པ་ཡིས། །འགྲོ་ཀུན་ཉོན་མོངས་ཚོགས་རྣམས་རབ་ཞི་སྟེ། །ཆོས་མཐུན་དགེ་བའི་དཔལ་གྱིས་འཚོ་བར་ཤོག ༡༤ །འདིས་མཚོན་རྣམ་དག་སྨོན་པའི་དྲི་བཞོན་གྱིས། །བསླབ་གསུམ་སྤྲིན་གྱི་བླ་བྲེས་བསྐུལ་བ་ལས། །མངོན་མཐོ་ངེས་ལེགས་བདུད་རྩིའི་དཔལ་འཇོ་བས། །འགྲོ་ཀུན་སྲིད་པའི་ཚ་གདུང་བཅིལ་བར་ཤོག ༡༥ །ཅེས་པའང་སྲིད་ལས་ངེས་པར་གྲོལ་བའི་བློས་བསླབ་པ་རིན་པོ་ཆེ་དམ་དུ་འཆང་བ་ནི་བསྟན་ལ་སྨོན་པ་ཡོངས་ཀྱི་ངེས་བརྗོད་དུ་སྣང་བའི་ཕྱིར། དེའི་རྗེས་སུ་སྨོན་པ་ཙམ་དུ་རྨོངས་བརྟུལ་ཨ་བྷཱ་ཡའི་མིང་གིས་སོ།། །།

[edit]

_sdom pa gsum gyi smon lam don gnyis ngal bso bzhugs/__/na mo/__rgyal ba kun gyi thugs bskyed mkha' klong las/__/phan bde'i sprin gyi bla bre mdzes pa'i dbus/__/sdom gsum bdud rtsi'i char rgyun 'jo ba yis/__/thar pa mchog gi myu gu bzhad par shog__1__/mthon mthing lcang lo'i zur phud bregs pa yis/__/srid pa'i 'ching ba ma lus brgal byas te/__/ngur smrig bla gos gsar pa'i gzi 'od kyis/__/sa gsum phan bde'i snang bas khyab gyur cig__2__/gzhi gsum cho ga'i rtsa ba legs brtan cing*/__/spangs dang 'jug pa'i tshul khrims yal ga rgyas/__/srid pa'i dgra bcom ge sar mdzes gyur pa'i/__/dam chos 'dul ba'i tshal brgya 'phel bar shog__3__/gzhan phan ga bur brtsegs pa'i mdza' bshes gyis/__/'gro kun dga' ba'i kun+da rgyas pa dang*/__/lhan cig 'khor ba'i mun stug rab bcom ste/__/zag med bdud rtsi'i dpal gyis 'tsho bar shog__4__/spyin dang tshul khrims bzod pa brtson 'grus dang*/__/bsam gtan shes rab nor bu'i 'khri shing cher/__/pha rol phyin pa'i lam la brten pa yis/__/byang chub mchog gi 'byor pas phyug par shog__5__/lung dang rtogs pa'i chos tshul rgya mtsho che/__/shes rab gsum gyi gru gzing g.yo ba yis/__/rgyal gsung lam bden pha mthar brgal byas nas/__/thams cad mkhyen pa'i gling du phyin par shog__6__/legs bshad nyin byed gsar pa'i 'od zer gyis/__/skal bzang blo gros pad+mo bzhad pa dang*/__/lhan cig lam min mun pa bsal byas te/__/rgyal bstan snang bas yongs su khyab par shog__7__/chos brgyad 'ching ba rab grol dben gnas su/__/'du 'dzi'i spyod pa ma lus ring dor te/__/rtse gcig ting 'dzin mchog la g.yo med pas/__/don gnyis ma lus lhun gyis grub par shog__8__/rdo rje theg pa'i brgyud 'dzin bum bzang nas/__/smin byed bdud rtsi'i thigs pas bran pa las/__/thar pa'i zhing sa rab tu brlan byas te/__/g.yel med dam tshigs bon chags par shog__9__/sku gsung thugs kyi rdo rje rab bzung zhing*/__/phra rags rnam par dbye ba rgyud la 'chang*/__/srung mtshams las 'das dbyings su grol ba yis/__/gsang sngags lam gyi de nyid mngon gyur shog__10__/bskyed rdzogs mdzes pa'i kha phrus bran pa las/__/rtsa rlung thig le'i gdung ba rab bcil te/__/sku bzhi'i pad dkar rgyas pa'i bsil g.yab tu/__/ma lus 'gro ba'i bsti gnas 'byung bar shog__11__/don dam gang du'ang mi gnas ye shes sems/__/lhan cig dga' ba'i rtse dgas rol par shog__/tshur mthong rnam par grol ba'i 'khor lo che/__/sgyu 'phrul drwa ba'i ngo bor rtag brtan shog__12__/bslab gsum khrims kyi bdud rtsi rtag rol zhing*/__/zung 'jug bde dang stong pas rab myos pa'i/__/rig grol gnyis med dge 'dun 'dus pa'i sdes/__/srid pa'i khams kun dog por bgyid par shog__13__/de mthus tshogs gnyis dpyid kyis nyer drangs pa'i/__/rdzogs ldan dbyar gyi 'byor par spyod pa yis/__/'gro kun nyon mongs tshogs rnams rab zhi ste/__/chos mthun dge ba'i dpal gyis 'tsho bar shog__14__/'dis mtshon rnam dag smon pa'i dri bzhon gyis/__/bslab gsum sprin gyi bla bres bskul ba las/__/mngon mtho nges legs bdud rtsi'i dpal 'jo bas/__/'gro kun srid pa'i tsha gdung bcil bar shog__15__/ces pa'ang srid las nges par grol ba'i blos bslab pa rin po che dam du 'chang ba ni bstan la smon pa yongs kyi nges brjod du snang ba'i phyir/__de'i rjes su smon pa tsam du rmongs brtul a b+hA ya'i ming gis so//__//