SPCD-KABUM-02-KHA-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	'phags mchog bka' 'bum Volume 2, Text 6, Pages (Folios to )
Author	འཕགས་མཆོག་རྡོ་རྗེ་
Less details More details
Citation	'phags mchog rdo rje. '. In Mtshungs med grub sras 'phags mchog rdo rje mchog gi gsung 'bum rin po che , Vol. : . Kathmandu: Khenpo Shedup Tenzin & Lama Thinley Namgyal, 2004.
Genre

Tibetan Text

[edit]

༄༅། །དཔལ་ཆེན་རྡོ་རྗེ་ཕུར་པའི་རྣམ་བཤད་དང་ལས་བྱང་གི་སྒོམ་དོན་ཉུང་དྲིལ་བཞུགས་སོ།།

རིགས་ལྔ་ཁྲག་འཐུང་འདུས་པའི་སྤྱི་དཔལ་ཆེ། །ཉོན་མོངས་དགྲ་བགེགས་འཇོམས་མཛད་ཕྲིན་ལས་རིགས། །གང་འདུལ་ཁྲོ་བོའི་རྣམ་རོལ་ཉམས་བརྒྱས་སྒེག །རྡོ་རྗེ་གཞོན་ནུ་ཁྲོ་བཅུ་སྲས་འཁོར་བཅས། །མི་ཕྱེད་དད་པས་ལྷག་པའི་ལྷ་རུ་བཟུང་། །མཆོག་ཐུན་གྲུབ་པ་བརྙེས་པའི་དགེ་ལེགས་སྩོལ། དེའང་དང་པོ་སྒྲུབ་དགོས་པའི་དོན་སྤྱི་ནི། ལྷ་གཞན་འཕྲུལ་དབང་བྱེད་ཀྱི་གནས་ན་བདུད་དགའ་རབ་དབང་ཕྱུག་དང་བཙུན་མོ་པདྨའི་ཕྲེང་བ་ཅན་གཉིས་ཀྱིས་ཕྱག་རྒྱ་ཆེན་པོའི་དངོས་གྲུབ་ཐོབ་པ་དེ་ཡིས་སེམས་ཅན་མང་པོ་བྱང་ཆུབ་ལམ་ལ་བཀོད་ནས་འཁོར་འབངས་ཟད་ཀྱིས་དོགས་ནས་མཆོག་ཐུན་གྱི་གྲུབ་པ་བརྙེས་པ་ལ་བར་ཆད་རྩོམ་པར་བྱེད་དེ་རྣལ་འབྱོར་པ་ལམ་གྱི་རྟགས་ཐོན་པ་རྣམས་ལའང་དངོས་སུ་བར་ཆད་རྩོམ། དེ་མན་ཆད་ལ་བདུད་ཀྱིས་བྱིན་གྱིས་བརླབས་ཤིང་བློ་བསྒྱུར་བར་བྱེད་དེ་བླ་མ་མཆེད་དང་། དད་པ་དམ་ཚིག་ཆོས་དང་ལྟ་སྒོམ་སྤྱོད་པ་སོགས་ལ་བློ་ལྡོག་པར་བྱེད་ནས་སྡིག་གྲོགས་དང་འདུ་འཛི་རྣམ་གཡེང་ལ་དགའ། རྒྱུ་འབྲས་འཆོལ་བར་སྤྱོད་དེ་ལས་ཀྱི་མཐའ་ལོག་འོང་། གཞན་བརླབས་ཏེ་གཉེན་འདུན་དང་འཁོར་སློབ། ཡོན་བདག་ཏུ་བརྫུས་ཏེ་ཆོས་ལས་ལྡོག་པ་དང་། དགྲ་ཀུན་དང་མི་མ་ཡིན་རྣམས་ལ་གནོད་འཚེ་བྱེད་དུ་འཇུག་པ་སོགས་ཆོས་སྒྲུབ་པ་ལ་བར་དུ་གཅོད་པ་སྒོ་དུ་མ་ནས་འབྱུང་སྟེ། དེ་བཟློག་པ་ལ་དང་པོ་བྱམས་སྙིང་རྗེ་བྱང་ཆུབ་ཀྱི་སེམས་སྒོམ་ལ་ཞི་དུལ་སྤྱོད་པས་གྲོལ་ལོ། །དེས་མ་གྲོལ་ན་བདུད་དུ་བལྟས་ཏེ་འདུལ་བ་ལ་རྡོ་རྗེ་ཕུར་པ་ལས་ལྷག་པ་གཞན་མེད་པས་ཡི་དམ་མམ་སྲུང་མའི་ཚུལ་དུ་སྒྲུབ་དགོས་ཤིང་། དེ་ལྟར་བསྒྲུབ་བྱ་ལྷ་ཡི་ངོ་བོ་སོགས་ནི། སངས་རྒྱས་ཐམས་ཅད་ཀྱི་ཐུགས་རྡོ་རྗེ་ཆོས་ཀྱི་དབྱིངས་སུ་མི་དམིགས་པ་ཡིན་ལ། ངེས་ཚིག་ནི་རྡོ་རྗེ་ཅེས་པ་རྡོ་རྗེའི་ཆོས་བདུན་དང་ལྡན་པ་སྟེ། གཞན་གྱིས་ཚུར་མི་ཆོད་པ། མི་ཤིགས་པ། རྐྱེན་གྱིས་མི་འགྱུར་བས་བདེན་པ། སྲ་བ། བརྟན་པ། མཚན་འཛིན་རྟོག་པ་ཐམས་ཅད་ཕར་འཇོམས་པ་ལ་ཐོགས་པ་མེད་པ་ཐམས་ཅད་ཀྱིས་ཕམ་པར་མི་ནུས་པའི་མཐུ་དང་ལྡན་པའོ། །གཞོན་ནུ་ནི་གཞི་ལམ་འབྲས་བུ་གང་གི་སྐབས་སུའང་ངོ་བོ་ལ་འཕོ་འགྱུར་བགྲེས་རྒུད་མེད་པ། སྤྲོས་བྲལ་ཐིག་ལེ་ཉག་གཅིག་གི་རང་བཞིན་དུ་གནས་པའི་དོན་ནོ། །དེའི་ཡབ་ནི་སངས་རྒྱས་ཐམས་ཅད་འདུས་པའི་ཀུན་བཟང་ཆེ་མཆོག་ཧེ་རུ་ཀ །ཡུམ་ནི་ཀུན་བཟང་རྣམ་ཞལ་དབྱིངས་ཕྱུག་མ་ཡིན། རིགས་ནི་སྤྱིར་རིགས་ལྔ་ཁྲག་འཐུང་ཐམས་ཅད་འདུས་པའི་སྤྱི་དཔལ་ཡིན་ཞིང་བདག་འཛིན་ཉོན་མོངས་དང་རུ་ཏྲ་བདུད་སོགས་འཇོམས་པའི་ཕྱིར་ཁྲོ་བོ་ཀརྨ་ཧེ་རུ་ཀ་སྟེ་ཕྲིན་ལས་ཀྱི་རིགས་སུ་གཏོགས། སྐུ་ཡང་ཞི་བའི་དུས་རྡོ་རྗེ་སེམས་དཔའ། ཕྱི་ཀྲི་ཡོག་དུས་རྣམ་འཇོམས། བྱང་སེམས་དུས་ཕྱག་རྡོར་ཡིན་ལ། བྱེ་བྲག་ཏུ་སྐུ་ཡི་འདུལ་བར་གཤིན་རྗེ། གསུང་གི་པདྨ་དབང་ཆེན། ཐུགས་ཀྱི་བཛྲ་ཧེ་རུ་ཀ །ཡོན་ཏན་ཆེ་མཆོག །ཕྲིན་ལས་ཀཱི་ལ་ཡ། གཟི་བརྗིད་བླ་མེད་མངོན་རྫོགས། དྲག་པོ་དྲེགས་པ་ཀུན་འདུལ། སྟོབས་ཀྱི་སྟོབས་ལྡན་ནག་པོ། བྱིན་རླབས་བླ་མ་རིག་འཛིན། འདོད་ཡོན་ཨ་པ་ར་ཛི་ཏ། སྲུང་བ་མི་གཡོ་དཀར་པོ། བཟློག་པ་གཙུག་ཏོར་རྣམ་རྒྱལ་མ་སོགས་གང་ལ་གང་འདུལ་དུ་སྣང་བར་མཛད་ཅིང་། སྐུ་མདོག་ཕྱག་མཚན་རྒྱན་ཆ་ལུགས་ཀྱང་། གསང་རྒྱུད་ལས། དབུ་སྟོང་ཕྱག་སྟོང་སྤྱན་བྱེ་བ་མངའ་བ། མྱང་འདས་ལས་དབུ་དགུ་ཕྱག་བཅོ་བརྒྱད། རྩ་རྒྱུད་རྡོ་རྗེ་ཁྲོས་པ་སོགས་ལས་ཞལ་གསུམ་ཕྱག་དྲུག་གམ། ཞལ་བཞིའམ། ཞལ་གཅིག་ཕྱག་གཉིས་སོགས་ངེས་མེད་གདུལ་བྱའི་དབང་གིས་སོ་སོར་སྣང་བའོ། །དེ་ལྟར་སྒྲུབ་པ་ལ་དང་པོ་དགོས་དོན་རྣམ་པ་དྲུག་གི་ཁོག་དབུབ་པ་ལ། དང་པོ་ནི་ད་ལྟར་གྱི་སྣང་བ་སྣ་ཚོགས་འདི་ཡེ་ཤེས་རིག་པའི་རང་རྩལ་ཡིན་པའི་ཕྱིར་རྟགས་ལྷ་ཡི་ཕྱག་རྒྱར་རྫོགས། སྣང་བའི་དུས་ཉིད་ངོ་བོ་སྟོང་པ་སྤྲོས་བྲལ་ལས་མ་གཡོས་པའི་དབྱིངས་ཏེ་དོན་ཆོས་ཉིད་དུ་རྫོགས། སྣང་སྟོང་ཐ་མི་དད་པ་ངོ་བོ་དབྱེར་མེད་བརྗོད་བྲལ་མཉམ་ཉིད་དུ་གནས་པ་སྲས་བདེ་བ་ཆེན་པོ་བྱང་ཆུབ་སེམས་སུ་རྫོགས་ཏེ་དེ་ནི་དབྱིངས་ཡེ་དབྱེར་མེད་ཨ་ཏི་ཡོ་གའི་ལྟ་བ་མཐར་ཐུག་ཡིན་ནོ། །གཉིས་པ་སྒོམ་པའི་དྲོད་བཙལ་བ་ནི། ཏིང་འཛིན་གསུམ་གྱི་འོད་འཕྲོས། ཕྱི་ཡུལ་འབྱུང་ལྔ་ཡུལ་ལྔའི་རང་བཞིན་གཞལ་ཡས་ཁང་དང་། བྱེ་བྲག་ཕྱི་ཕུར་པ་ལ་ནང་གཞལ་ཡས་ཁང་སྟེ། དབལ་ངན་སོང་གསུམ། རྒྱ་མདུད་གོང་མར་འདོད་ཁམས་གནས་རིགས། ལྕུམ་གཞོག་སྨད་གཟུགས་ཁམས། སྟོད་གཟུགས་མེད་ཁམས། རྒྱ་མདུད་འོག་མར་ཆེ་མཆོག་ཁྲོ་བོའི་བཞུགས་གནས་དང་། ནང་བཅུད་སེམས་ཅན་ཐམས་ཅད་ཀྱང་རྡོ་རྗེ་གཞོན་ནུ་རྩ་བའི་དཀྱིལ་འཁོར། ཕྱོགས་བཅུ་ཁྲོ་བོ། ཕུར་པ་སྲས་ཀྱི་དཀྱིལ་འཁོར་ཏེ། དེ་དག་གི་སྲོག་སྙིང་གི་དཀྱིལ་དུ་ཡེ་ཤེས་སེམས་དཔའ་ཐུགས་སྲོག་ས་བོན་ཙིཏྟའི་སྒོ་སྲུང་དང་བཅས་པ་བསྒོམ། གསུམ་པ་སྤྱོད་པའི་བོགས་དབྱུང་བ་ནི། ཕྱི་ནང་འབྱུང་བ་བསྡུས་པའི་སྣང་བ་ཐམས་ཅད་ཆེ་མཆོག་སྐུ་ཡི་དཀྱིལ་འཁོར་ཡིན་པར་ཤེས་པས། ཆགས་སྡང་གཟུང་འཛིན་གྱི་ཡུལ་མེད། སྒྲ་སྐད་ཀཱི་ལ་ཡ་ཆོས་ཉིད་ཀྱི་རང་སྒྲ་ཤེས་པས་སྙན་མི་སྙན་གྱི་འཛིན་པ་ལས་གྲོལ། དྲན་རྟོག་ཐམས་ཅད་ཡེ་ཤེས་ཀྱི་རང་རྩལ་ཤེས་པས་རྣམ་ཤེས་ཚོགས་བརྒྱད་ཀྱི་རྟོག་པ་མི་འཁྲུགས་ཤིང་། དེ་ལྟར་མ་རྟོགས་པའི་སེམས་ཅན་རྣམས་ལ་བྱམས་དང་སྙིང་རྗེས་གང་ལ་གང་འདུལ་ཕྲིན་ལས་ཐབས་ལ་མཁས་པའི་སྤྱོད་པ་ལ་བསླབ་པར་བྱའོ། །བཞི་པ་དབང་གི་གདེང་བཙལ་བ་ནི། གོང་སྨོས་ལྟ་སྒོམ་སྤྱོད་གསུམ་རྒྱུད་ཐོག་ཏུ་ཁེལ་བས་སངས་རྒྱས་ཐམས་ཅད་ཀྱི་ཕྲིན་ལས་དུས་གཅིག་ཏུ་རྫོགས་ཏེ་དབང་དང་བྱིན་རླབས་ཐམས་ཅད་ཀྱི་མཆོག་ཡིན་ཞིང་གཞན་དག་ཕྱི་ནས་བསྐུས་པ་དང་འདྲ་བར་གསུངས་སོ། །ལྔ་པ་དམ་ཚིག་གི་དོན་ལས་མི་འདའ་བ་ནི། རྟོགས་གོམས་གདེང་དུ་གྱུར་པའི་ཀུན་ཁྱབ་སྙིང་རྗེ་ཆེན་པོས་མཚམས་སྦྱར་ཏེ་གདུལ་དཀའི་སེམས་ཅན་རྣམས་དྲག་པོ་མངོན་སྤྱོད་ཀྱིས་བསྒྲལ་ཏེ་ཕུང་པོ་ལྷར་བསྐྱེད། རྣམ་ཤེས་ཆོས་ཀྱི་དབྱིངས་སུ་བསྲེ་ཞིང་སྟོང་ཉིད་སྙིང་རྗེ་འབྲེལ་བའི་ལས་གང་རྩོམ་དོན་ཆེན་པོ་དང་ལྡན་ཞིང་ཕར་ཐེབ་ལ་ཚུར་མི་ལྡོག་པའི་མན་ངག་དམ་ཚིག་ཐམས་ཅད་ཀྱི་མཆོག་ཡིན་ནོ། །དྲུག་པ་འབྲས་བུ་ལ་བཟླ་བ་ནི། ཆོས་ཐམས་ཅད་རང་བྱུང་ཡེ་ཤེས་སུ་རང་གསལ་བས་སྤྲུལ་སྐུ། གསལ་དུས་ཉིད་ནས་སྤྲོས་དང་བྲལ་བས་ཆོས་སྐུ། དབྱེར་མེད་བདེ་བ་ཆེན་པོ་ལོངས་སྐུ། ཡེ་ནས་མ་བཅོས་རང་བཞིན་དུ་བཞུགས་པ་ངོ་བོ་ཉིད་སྐུ། དེ་སེམས་ཅན་ཐམས་ཅད་ཀྱི་རྒྱུད་ལ་འཕོ་འགྱུར་མེད་པར་གནས་པས་མི་འགྱུར་རྡོ་རྗེའི་སྐུ་སྟེ་རྟོགས་གོམས་མཐར་ཕྱིན་པའི་འབྲས་བུའོ། །དེས་ནི་དཔེ་ཡིད་བཞིན་གྱི་ནོར་བུ་ལག་ཏུ་ལོན་པ་ལྟར་གནས་སྐབས་དང་མཐར་ཐུག་གི་དོན་ཐམས་ཅད་ཡིད་བཞིན་དུ་འགྲུབ་པར་འགྱུར་རོ། །གཉིས་པ་ཐལ་འབྱིན་རྣམ་བཞིའི་སྤྱི་དོན། གདབ་པར་བྱ་བའི་རྫས་བཞི། འདེབས་བྱེད་གང་ཟག་བཞི། གདབ་པར་བྱ་བའི་ཐབས་བཞི། གདབ་བྱའི་ཡུལ་བཞི། ཐེབས་པའི་རྟགས་དང་ཕན་ཡོན་བཞི། མ་ཐེབས་པའི་སྐྱོན་བཞི་བཤད་པ་ནི། ཕུར་ནི་སྐྱེ་བ་མེད་པ། པ་ནི་འགག་པ་མེད་པ། ཕར་ཐེབ་ལ་ཚུར་མི་ལྡོག་པས་ཕུར་པ་ཅེས་བྱ་སྟེ། དེ་འདེབས་མཁན་གྱི་གང་ཟག་བློ་ཡངས་ཤིང་ཤེས་རབ་ཆེ་བས། རྒྱུ་ནི་རང་རིག་ཡེ་ཤེས་ཀྱི་ཕུར་པ། གདབ་པའི་ཡུལ་ཆོས་ཀྱི་དབྱིངས། ཐེབས་པའི་ཚད་འཁྲུལ་སྣང་ཐལ་འབྱིན་དུ་ཕུག་ཅིང་དབྱིངས་ཡེ་དབྱེར་མེད་ཆོས་སྐུ་ཐོབ་བོ། །མ་ཐེབས་པའི་སྐྱོན་འཁོར་བར་འཁྱམ་མོ། །འདོད་ཆགས་ཆེ་ཞིང་བརྩོན་འགྲུས་ལྡན་པས། རྒྱུ་ནི་ཡབ་ཀྱི་བྱང་སེམས་ཀྱི་ཕུར་པ། གདབ་ཡུལ་ཡུམ་གྱི་མཁའ་གསང་། ཐེབས་པའི་ཚད་སྣང་སེམས་མ་དག་དབྱིངས་སུ་ནུབ་ཅིང་སྤྲུལ་པའི་སྲས་མཆོག་འབྱིན་ནས་བདེ་སྟོང་དབྱེར་མེད་ལོངས་སྐུ་ཐོབ། མ་ཐེབས་འཁོར་བའི་རྨང་རྡོ་བྱེད་དོ། །དད་པ་དང་སྙིང་རྗེ་ཆེ་བས་རྒྱུ་ནི་སྙིང་རྗེ་བྱང་ཆུབ་སེམས་ཀྱི་ཕུར་པ། གདབ་ཡུལ་རིགས་དྲུག་གི་སེམས་ཅན། ཐེབས་པའི་ཚད་རང་འདོད་ཀྱི་འཁྲི་བ་ཆོད་ཅིང་སྲིད་པར་མི་གནས་ཞི་བར་མི་གོལ་བའི་འགྲོ་དོན་ནུས་པའི་སྤྲུལ་སྐུ་ཐོབ། མ་ཐེབས་པའི་སྐྱོན་ལས་ཀྱི་སྲིན་པོར་གོལ་བའོ། །ཞེ་སྡང་དང་གནག་པ་ཆེ་བས། རྒྱུ་ནི་གསེར་དངུལ་ཟངས་ལྕགས་ཀྱི་ཕུར་པ། གདབ་ཡུལ་ནད་གདོན་དབུལ་ཕོངས་དགྲ་བགེགས་དང་ཉམས་པ་བདུན་ལྡན་ཞིང་བཅུ་ཚང་བའི་ཚོགས་ལ། ཐེབས་པའི་ཚད་རྣམ་སྨིན་ལས་ངན་གྱི་སྐྱེ་རྒྱུན་ཆད་ཅིང་སྒྲོལ་བར་ནུས་པ་དང་། སྣང་སྲིད་ཕུར་པའི་དཀྱིལ་འཁོར་མངོན་དུ་གྱུར། མ་ཐེབས་པའི་སྐྱོན་བསྟན་པ་སྲུང་བར་མི་ནུས་པའོ། །དེ་ལྟར་སྒྲུབ་ཅིང་གདབ་པའི་དགོས་ཆེད་དང་ཕན་ཡོན་ནི་བར་ཆད་ཐམས་ཅད་ཞི་ཞིང་ཕྲིན་ལས་བཞི་ལྷུན་གྱིས་གྲུབ་པ་དང་འབྲས་བུ་སྐུ་བཞི་སོགས་ཐོབ་པར་བྱེད་དོ།། ༈ །།སྒྲུབ་ཐབས་ལས་ཀྱི་རིམ་པའི་སྒོམ་དོན་སྙིང་པོ་མདོར་བསྡུས་བརྗོད་པ་ལ། སྔོན་འགྲོ། དངོས་གཞི། རྗེས་དང་གསུམ་སྟེ། དང་པོ་སྔོན་འགྲོ་ལ་བདུན་ལས། ཕྱི་མཚམས་རྒྱལ་ཆེན་གྱི་ཐོ་བཙུགས་པས་རྣམ་གཡེང་ཞི། ནང་མཚམས་སྐྱབས་སེམས་ནས་རང་སེམས་ཆོས་སྐུའི་ངང་ལས་སྐད་ཅིག་རྡོ་རྗེ་གཞོན་ནུ་ཡབ་ཡུམ་གསལ་བའི་ཐུགས་ཀ་ནས་སྤྲུལ་པའི་ཁྲོ་ཚོགས་འཕྲོས་པས་བདུད་བགེགས་ལོག་འདྲེན་ཚར་བཅད། སླར་འདུས་སྟེང་འོག་ཕྱོགས་མཚམས་ཐམས་ཅད་དུ་གཏམས་པས་བསྐལ་པའི་རླུང་ཡང་མི་ཐར་བར་བསམ་པས་བར་ཆད་ཞི། གསང་མཚམས་བར་དུ་བཅད་བྱ་གཅོད་བྱེད་གཅོད་པ་པོ་ཐམས་ཅད་རང་སེམས་འཁྲུལ་བའི་རྣམ་རྟོག་ཏུ་ཐག་ཆོད་དེ་སེམས་ཉིད་སྟོང་གསལ་ཆོས་སྐུའི་ངང་དུ་བཞག་པས་མི་ཤིགས་རྡོ་རྗེའི་མཚམས་ཏེ་རང་སེམས་ཆོས་སྐུར་གནས་པའི་དགོས་པ་ཡོད་དོ། །གཉིས་པ་ལྷ་དང་འཁོན་གཅུགས་སྦྱང་བའི་བཤགས་པ་ནི། བླ་མ་རིག་འཛིན་རྡོ་རྗེ་ཕུར་པའི་དཀྱིལ་འཁོར་མདུན་མཁར་གསལ་ལ་ཐོག་མེད་ནས་བདག་འཛིན་དབང་གིས་རྩ་བ་ཡན་ལག་གི་དམ་ཚིག་འགལ་ཉམས་སོགས་གནོང་འགྱོད་དྲག་པོས་བཤགས་པས་བྱང་ཞིང་དག་ནས་ཐུགས་ཀྱིས་དགོངས་ནས་བྱིན་གྱིས་རློབ་པའི་གནས་སུ་རུང་བར་མོས། གསུམ་པ་གནས་ངན་གྱི་རྟོག་པ་བསལ་ཕྱིར་བརྡ་སྒོ་དབྱེ་བ་ནི། སྔགས་བརྗོད་པའི་རྐྱེན་གྱིས་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་དབྱིངས་སུ་སྦྱངས་ནས་ལྷུན་གྱིས་གྲུབ་པའི་དཀྱིལ་འཁོར་ཆེན་པོའི་སྒོ་བཞི་ཤག་གིས་བྱེ་ནས་ཞུགས་པས་རང་བྱུང་གདོད་མའི་ལྷ་དང་མཇལ་བར་མོས། བཞི་པ་ཆེ་ཆུང་བཟང་ངན་གྱི་རྟོག་པ་བསལ་ཕྱིར་བརྡའ་ཕྱག་ནི། ཀུན་རྫོབ་ཏུ་ལྷ་དང་སློབ་དཔོན་རྡོ་རྗེའི་མཆེད་དཀྱིལ་འཁོར་སོགས་ལ་ལུས་ངག་ཡིད་གསུམ་གུས་པས་ཕྱག་འཚལ་ཞིང་། དོན་དམ་པར་ཕྱག་འཚལ་ཡུལ་འཚལ་མཁན་གཉིས་སུ་མེད་པར་མོས། ལྔ་པ་རྒྱལ་བའི་གདུང་འཚོབ་པའི་ཕྱིར་དམ་བཅའ་བ་ནི། ལྷག་པའི་ལྷ་ཡི་སྤྱན་སྔར་དུས་འཁོར་བ་ཇི་སྲིད་མ་སྟོངས་ཀྱི་བར་དུ་གཟུགས་ཀྱི་སྐུ་གཉིས་ཀྱིས་འགྲོ་དོན་རྩོམ་པའི་དམ་བཅའ་བཟུང་བར་མོས། དྲུག་པ་བྱིན་དབབ་པ་ནི། གཟུང་འཛིན་གཉིས་སྣང་གི་ཆོས་ཐམས་ཅད་ཐིག་ལེ་ཉག་གཅིག་རྡོ་རྗེ་ཕུར་པའི་དཀྱིལ་འཁོར་དུ་སྒྲུབ་པ་དང་། དབྱིངས་ཡེ་དབྱེར་མེད་ཆོས་སྐུ་མཉམ་པ་ཆེན་པོའི་ངང་ལས། གང་འདུལ་ལྷ་ཡི་ཚོགས་ཀྱི་ཐུགས་དམ་གནད་ནས་བསྐུལ་ཏེ་སྦྱོར་མཚམས་རྣམས་ནས་བྱང་ཆུབ་སེམས་ཀྱི་ཆུ་རྒྱུན་དཔག་ཏུ་མེད་པ་བབས་པས་སྒོ་གསུམ་གྱི་དྲི་མ་དག །དབང་དང་བྱིན་རླབས་དངོས་གྲུབ་ཐོབ། དབང་ཆེན་རྣམས་ཀྱིས༴ བྱིན་ཆེན་རྣམས་ཀྱིས༴ མཐུ་ཆེན་རྣམས་ཀྱིས་སྒྲུབ་པ་པོའི་རྟགས་དང་མཚན་མ་ཐམས་ཅད་མྱུར་དུ་བསྟན་ནས་མཐར་བདག་གནས་ཡོ་བྱད་ཐམས་ཅད་ལ་ཐིམ་པ་མོས། བདུན་པ་མཆོད་རྫས་བྱིན་རླབས་ནི། བདག་ལྷར་གསལ་བའི་ཐུགས་ཀ་ནས་རྃ་ཡྃ་ཁྃ་གསུམ་འཕྲོས་མཆོད་རྫས་ཀྱི་དངོས་འཛིན་བག་ཆགས་ཐམས་ཅད་བསྲེགས་གཏོར་བཀྲུས་ནས་དག་པར་བྱས། སླར་ཡང་ཨོཾ་དཀར་པོ་འཕྲོས་རྫས་རང་ག་མའི་རྟོག་པ་སྦྱངས། ཨཱཿདམར་པོ་འཕྲོས་གཟུང་འཛིན་གྱི་བག་ཆགས་ངན་རྟོག་བསྲེགས། ཧཱུྃ་མཐིང་ག་འཕྲོས་མཆོད་རྫས་ཐམས་ཅད་ཟག་མེད་བདུད་རྩིའི་རང་བཞིན་དུ་བྱིན་བརླབས། བྱེ་བྲག་ཏུ་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡེ་ཤེས་ལྔ་ཡི་རང་བཞིན་ཟག་མེད་བདུད་རྩིའི་རྒྱ་མཚོ་དང་། རྒྱུ་དྲུག་འཁོར་བ་དབྱིངས་སུ་བསྒྲལ་བའི་ཆགས་མེད་རཀྟའི་རྒྱ་མཚོ་ཤ་ཆེན་གྱི་ལྷུ་དུམ་གྱིས་བརྒྱན་པ། ཕྱི་འདོད་ཡོན་ལྔ་ལྡན་གྱི་གཏོར་མ། ནང་གཞལ་ཡས་ཁང་དང་ལྷར་གསལ་བ། གསང་བ་ཆོས་ཀྱི་དབྱིངས་ཀྱི་གཏོར་གཞོང་དུ་ཉོན་མོངས་རྣམ་རྟོག་གི་གཏོར་མ། རིག་པ་ཡེ་ཤེས་ཀྱི་རྒྱན་གྱིས་བརྒྱན་པ། སྒྲུབ་དུས་ལྷར་ཤེས་པ། མཆོད་དུས་འདོད་ཡོན། ཟོར་དུས་མཚོན་ཆར་ཤེས་པས་སོ་སོའི་སྔགས་བརྗོད་ནས་བྱིན་གྱིས་བརླབས་ཤིང་ཕྱི་མཆོད་རྣམས་ཀྱང་འབྲུ་གསུམ་གྱིས་འདོད་ཡོན་གྱི་ལྷ་མོ་མཆོད་རྫས་ཐོགས་པ་དཔག་ཏུ་མེད་པར་སྤྲུལ་ནས་བརླབ་བོ།། ༈ །།གཉིས་པ་དངོས་གཞི་ལ། ཆོས་ཐམས་ཅད་རང་སེམས་ཀྱི་སྣང་བ་ཙམ་མོ། །དེའང་སྟོང་པ་རང་རིག་པས་ཉོན་མོངས་རྣམ་རྟོག་གནས་སུ་གཅོད་པ་དེ་བཞིན་ཉིད་ཀྱི་ཏིང་ངེ་འཛིན་དང་། གནས་ལུགས་ཟབ་མོ་དེ་ལྟར་མ་རྟོགས་པའི་འགྲོ་བ་རིགས་དྲུག་གི་སྡུག་བསྔལ་རྩ་བ་ནས་བཅད་པར་བྱའོ་སྙམ་པ་ནི་སྙིང་རྗེ་ཡོངས་ཁྱབ་ཀུན་སྣང་གི་ཏིང་ངེ་འཛིན་དང་། སྟོང་པ་ཉིད་དང་སྙིང་རྗེ་དབྱེར་མེད་པའི་ནམ་མཁའི་དབྱིངས་སུ་སེམས་ཀྱི་རྟེན་དྭངས་མའི་སྲོག་ཧཱུྃ་སྔོན་པོ་བསྐྱེད་པ་རྒྱུ་ཡི་ཏིང་ངེ་འཛིན་ཏེ། དེ་ལས་ཨེ་ཡྃ་སོགས་འཕྲོ་འདུས་གྱུར་པ་ལས་འབྱུང་ལྔ་རིམ་བརྩེགས་གསལ་བའི་སྟེང་། གསུམ་པ་གཞལ་ཡས་ཁང་བསྐྱེད་པ་ནི། ཧཱུྃ་དེ་ལས་བྷྲཱུྃ་ཁ་དོག་ལྔ་ལྡན་འཕྲོས། དེ་ཡོངས་སུ་གྱུར་པ་ལས་ཡེ་ཤེས་ལྔ་ཡི་རང་བཞིན་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི། སྒོ་བཞི། སྒོ་ཁྱུད་གློ་འབུར་ཚུར་ཅན། ཕོ་བྲང་ནང་མར་ཐོད་པ་སྐམ་རློན་རྙིད་པའི་རྩིག་པ་སུམ་རིམ་གནམ་ལྕགས་ཀྱི་གཟེར་གྱིས་བཏབ་པ། སྒོ་ཁྱུད་སྤངས་པ་སྒོ་བཞི། གཞལ་ཡས་ཁང་ཕྱི་མ་ལ་ཐོད་པས་དཀྲིག་པ་སོགས་དང་། བཞི་པ་གདན་བསྐྱེད་པ་ནི། བཛྲ་ཏ་ཏཾ་སོགས་བརྗོད་པས་ལྷ་གནས་ཐམས་ཅད་དུ་རྡོ་རྗེ་བྲག་ཆེན་གཏམ་པའི་ས་གཞི། ཧཱུྃ་ལས་འོད་འཕྲོས་ཕྱོགས་སྐྱོང་བཅུ་ཆུང་མ་དང་བཅས་པ་བཀུག །དེ་སྟེང་མ་སཱུརྻ་སོགས་བརྗོད་པས་པད་ཉི་ཟླ་བའི་གདན་རེ་རེའི་སྟེང་དུ། ལྔ་པ་རྩ་བའི་དཀྱིལ་འཁོར་བསྐྱེད་པ་ནི། སྤྱིར་སྐྱེ་གནས་བཞིའི་བག་ཆགས་སྦྱང་བའི་ཕྱིར་བསྐྱེད་ལུགས་མང་རུང་འདིར་བསྡུས་པ་རྡོ་རྗེའི་ཆོ་ག་གསུམ་བསྐྱེད་ནི། ཧཱུྃ་དེ་དབུས་ཀྱི་གདན་ལ་བབ་འོད་ཟེར་འཕྲོ་འདུས་དོན་གཉིས་བྱས་སླར་རྡོ་རྗེ་རྩེ་དགུ་གྱུར། དེ་ལས་འཕྲོ་འདུས་ཚོགས་གཉིས་ཡོངས་རྫོགས་དཔལ་ཆེན་པོའི་སྐུར་གྱུར། དེའང་སྐུ་གསུམ་མམ་རྣམ་ཐར་གསུམ་མཚོན་པའི་དབུ་གསུམ། ཡེ་ཤེས་དྲུག་གི་མཚོན་ཕྱག་དྲུག །རྫུ་འཕྲུལ་བཞི་མཚོན་ཞབས་བཞི་བརྐྱང་བསྐུམ་གྱིས་བཞུགས་པ། ཉེས་སྐྱོན་མ་གོས་པའི་གཡས་ཞལ་དཀར་བཞད། འགྲོ་ལ་རྗེས་ཆགས་གཡོན་ཞལ་དམར་གཤེ། ཆོས་ཉིད་འགྱུར་མེད་དབུས་མཐིང་དྲག་ཏུ་རྔམ་ཞིང་འབར་བ། ཁམས་གསུམ་ས་དགུ་དབྱེར་མེད་གཟིགས་རྟགས་སྤྱན་དགུ་སྡང་མིག་བསྒྲད་ཅིང་ཁྲོ་གཉེར་གློག་སྟོང་འཁྱུག་པ། ཤངས་ནས་ཧཱུྃ་འབྱིན་ཞལ་ནས་ཕཊ་སྒྲ་སྒྲོགས། སྐྱེ་བཞི་རྩད་གཅོད་རྣོ་དབལ་མཆེ་བ་ཟུར་གསུམ་པོ་བཞི་གཙིགས་པ། དབུ་སྐྲ་ཉི་ཁྲི་ཆིག་སྟོང་ཁམ་ནག་ཟུར་གསུམ་གྱེན་དུ་འཁྱིལ། བ་སྤུ་བྱེ་བ་ཐེར་འབུམ་རྡོ་རྗེའི་བ་སྤུས་གཏམས་པ། ཕྱག་གཡས་ཐེག་པ་རིམ་དགུ་རྫོགས་བརྡར་རྡོ་རྗེ་རྩེ་དགུ་གདེངས། ཡེ་ཤེས་ལྔ་མཚོན་རྡོ་རྗེ་རྩེ་ལྔ་འཕྱར་སྟབས་འཛིན། གཡོན་གྱིས་ཉོན་མོངས་བསྲེགས་པའི་ཡེ་ཤེས་མེ་དཔུང་འབར་བ་བསྣམས། དུག་གསུམ་རྩད་གཅོད་ཁ་ཊྭཱཾ་འཁྲོལ། ཐ་མའི་ཕྱག་གཉིས་རི་རབ་ལྟ་བུའི་ཕུར་པ་འདྲིལ། དུག་ལྔ་ཡེ་ཤེས་ལྔ་དག་རྟགས་སུ་རིགས་ལྔའི་རྩེ་ཕྲན་ཐོད་སྐམ་དང་ཐོད་ཚལ་གྱི་དབུ་རྒྱན། སྐུ་གསུམ་མཚོན་བྱེད་ཐོད་པ་ཚར་གསུམ་གྱི་ག་ཤལ་ཅན། ཞེ་སྡང་འཇོམས་བྱེད་ཀླུ་ཆེན་རིགས་བཞིས་བརྒྱན་པ་སྟེ་འདོག་པའི་རྒྱན་གཉིས་དང་། ཐལ་ཆེན་ཚོམ་བུ། རཀྟའི་ཐིག་ལེ། ཞག་གི་ཟོ་རིས་སྟེ་བྱུག་པའི་རྩི་གསུམ་གྱིས་བརྗིད་པ་དང་། ཐེག་ཆེན་དོན་རྟོགས་གླང་ཆེན་ཀོ་རློན་གྱི་ཕྱི་གོས། མཐའ་གཉིས་སྤང་ཕྱིར་མི་ལྤགས་ཀྱི་གཡང་གཞི་ནང་གོས། ཕྲིན་ལས་ཡོངས་རྫོགས་སྟག་ལྤགས་གྱི་ཤམ་ཐབས་ཏེ་བསྒོ་བའི་གོས་གསུམ་མནབས་པ། སྲིད་གསུམ་ཟིལ་གནོན་རྡོ་རྗེའི་ཁྱུང་གཤོག་བར་སྣང་ཁྱབ་པར་གདེངས། མཐིང་ནག་ཅོད་པན་དང་རྡོ་རྗེའི་གོ་ཁྲབ་གསོལ་བ་སྟེ་དཔལ་གྱི་ཆས་བཅུ་དང་གར་གྱི་ཉམས་དགུ་སོགས་དང་ལྡན་པའོ། །ཐབས་ཤེས་དབྱེར་མེད་པའི་ཡུམ་འཁོར་ལོ་རྒྱས་འདེབས་མའི་ཕྱག་གཡས་འཁོར་བའི་ཉེས་སྐྱོན་གྱིས་མ་གོས་པའི་བརྡར་ཨུཏྤལ་འཛིན་ནས་ཡབ་ལ་འཁྱུད་པ། གཡོན་སྲིད་རྩ་ཉོན་མོངས་བསྒྲལ་ཞིང་དབྱིངས་སུ་སྦྱོར་བའི་བརྡར་བྷནྡྷ་དམར་གྱིས་བཀང་བ་སྟོབ་པ། རིགས་ལྔ་དང་རུས་པའི་རྒྱན་དྲུག་གཟིག་གི་ཤམ་ཐབས་ཅན། ཡབ་ཡུམ་བདེ་སྟོང་མཉམ་སྦྱོར་བ་ཡེ་ཤེས་ཀྱི་མེ་དཔུང་འབར་བའི་ཀློང་ན་བཞུགས་པའོ། །དེ་ལྟར་སྐུ་འབར་ཁྲོ་རྔམ་པའི་ཚུལ་དུ་བཞུགས་ཀྱང་ཐུགས་ཞི་བ་ལས་མ་གཡོས་པའི་རྟགས་སུ་ཡབ་ཀྱི་ཐུགས་རིན་ཆེན་ཟུར་བརྒྱད་གུར་ཕུབ་པ་ལྟ་བུའི་ནང་སྲོག་གི་སྒོར་པད་དཀར་འདབ་བརྒྱད་ཀྱི་སྟེང་དུ་ཡེ་ཤེས་སེམས་དཔའ་རྡོར་སེམས་ཚོན་གང་བ་ཞབས་ཅུང་ཟད་བརྐྱང་བསྐུམ་དུ་བཞུགས་པའི་ཐུགས་ཀར་རིན་ཆེན་ཆ་བརྒྱད་ཁ་དོག་སྨུག་པོ་མཆོང་གུར་ཕུབ་པ་ལྟ་བུའི་དབུས་སུ་སྲན་མ་བཀས་པ་ཙམ་གྱི་ཉི་མ་ལ་གསེར་གྱི་རྡོ་རྗེ་ནས་འབྲས་ཙམ་གྱི་ལྟེ་བར་ཏིང་འཛིན་སེམས་དཔའ་ཧཱུྃ་མཐིང་ག་ཡུངས་འབྲུ་ཙམ་ཤིན་ཏུ་ཕྲ་བ་འོད་འབར་བའི་མཐའ་སྐོར་སྲོག་ཡིག་འབྲུ་དགུས་བསྐོར་བ། རྟ་མགྲིན་དམར་པོ་པདྨ་བྷནྡྷ་འཛིན་པ་རང་འོད་ཀྱི་ཡུམ་ཕག་མོ་དང་གཉིས་མེད་དུ་འཁྲིལ་བས་སྲུང་བ་བཅས་བསྒོམ་ཞིང་། དྲུག་པ་ཁྲོ་བཅུ་བསྐྱེད་པ་ནི། དེའང་ངང་ཁྲོ་ཤུགས་ཁྲོ་འབར་ཁྲོ་སོགས་གསུངས་ཏེ། སྔགས་རྣམས་བརྗོད་པས། གཙོ་བོ་ཡབ་ཡུམ་སྦྱོར་བས་བརྡའ་བཞིས་བསྐུལ་ཞིང་སྙོམས་པར་ཞུགས་པའི་མཁའ་གསང་ནས་ཧཱུྃ་བཅུ་འཕྲོས་སྔར་བསྐྱེད་པའི་ཕྱོགས་སྐྱོང་བཅུ་སོགས་རང་རང་གི་གདན་དུ་བབས། འཕྲོ་འདུ་ཡོངས་སུ་གྱུར་པ་ལས་ཁྲོ་བཅུ་བསྐྱེད་དེ་ཡབ་རྣམས་ཞལ་གསུམ་ཕྱག་དྲུག་སྐུ་མདོག་ཆ་ལུགས་གཙོ་བོ་དང་མཚུངས་ཤིང་། ཕྱག་མཚན་ཡང་ཕྱག་དང་པོས་རྡོ་རྗེ་བྷན་དམར་དང་། བར་པས་ཕྱོགས་སྐྱོང་བཅུའི་ཕྱག་མཚན་རྣམས་དང་། ཐ་མས་རི་རབ་ཕུར་པ་འདྲིལ། རྡོ་རྗེའི་གཤོག་པ་སོགས་དཔལ་གྱི་ཆས་བརྒྱད། ཞབས་བཞི་བརྐྱང་བསྐུམ་དགྲ་བགེགས་ཀྱི་སྟེང་དུ་འགྱིང་། ཡུམ་རྣམས་ཆ་ལུགས་གཙོ་མོ་དང་མཚུངས་ཤིང་གཡས་དྲིལ་བུ་གཡོན་དུང་དམར་སྟོབ་པ། སྐུ་མདོག་རང་རང་གི་ཡབ་དང་མཚུངས་ཤིང་། ཕྲ་ཕྱག་ཉི་ཤུ་ནི་དཔེ་དོན་རྟགས་ཀྱི་ཕྲ་མེན་སོགས་ཏེ། མདོར་ན་གཡས་མཆེ་བ་ཅན་བཅུ་ལ་ཡབ་ཀྱི་ཕྱག་བརྙན། གཡོན་གཤོག་པ་ཅན་བཅུ་ལ་ཡུམ་གྱི་ཕྲ་མེན་དང་། ཟ་བྱེད་གསོད་བྱེད་གཏུམ་རྔམས་ཀྱི་ཚོགས་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་བཞུགས་པ་དང་། བདུན་པ་ཕུར་པ་སྲས་ཀྱི་དཀྱིལ་འཁོར་ནི། སྲས་ཡིན་ལ་མཆོག་མ་ཡིན་པ། མཆོག་ཡིན་ལ་སྲས་མ་ཡིན་པ། དེ་གཉིས་ཀ་ཡིན་པ་དང་མ་ཡིན་པ་མུ་བཞི་ལས། འདི་ནི་སྲས་ཀྱང་ཡིན་ལ་མཆོག་ཀྱང་ཡིན་པ་སྟེ། སླར་གཙོ་བོ་ཡབ་ཡུམ་མཉམ་པར་སྦྱོར་བ་ལས། མདུན་དང་གཡས་གཡོན་གྱི་གདན་བདུན་གྱི་སྟེང་དུ། ཧཱུྃ་བདུན་རེ་འཕྲོས་པའི་རྩེ་ལས་ཧཱུྃ་ཡིག་དང་ཕུར་བུ་ཕྲ་མོ་དཔག་མེད་འཕྲོ་འདུས་ཀྱིས་མདུན་དུ་ཐུགས་ཀྱི་སྲས་བདུན་སྐུ་མདོག་མཐིང་ནག་མཐིང་དཀར་དམར་བའི་ཞལ། གཡས་སུ་སྐུ་ཡི་སྲས་བདུན་ལྗང་དཀར་དམར་བའི་ཞལ། གཡོན་དུ་གསུང་གི་སྲས་བདུན་དམར་ནག །དམར་དཀར་ལྗང་བའི་ཞལ། ཕྱག་དང་པོ་རྡོ་རྗེ་རྩེ་དགུ་པ་དང་མེ་དཔུང་། བར་པས་རྒྱ་གྲམ་དང་ཁ་ཊྭཱྃ། ཐ་མས་ཕུར་པ་སོགས་དཀྱིལ་འཁོར་གསུམ་དང་མཚུངས་ཤིང་། སྐུ་སྨད་ཆུ་སྲིན་གྱི་ཁ་ནས་ཐོན་པའི་གནམ་ལྕགས་ཕུར་པ་མེ་སྟག་ཚྭ་ཚྭ་འཕྲོ་བ་དང་ལོག་འདྲེན་བགེགས་ཀྱི་སྙིང་དཀར་ནག་མཚམས་སུ་ཟུག་པའོ། །བརྒྱད་པ་སྒོ་སྐྱོང་སྲུང་མ་ནི། གཙོ་བོ་ཡབ་ཡུམ་སྙོམས་པར་ཞུགས་པ་ལས། ཛཿལས་རྟ་གདོང་དཀར་མོ་གཡས་ཕུར་པ་དང་གཡོན་ལྕགས་ཀྱུ་འཛིན། ལྷོ་སྒོར་ཕག་གདོང་སེར་མོ་གཡས་ཕུར་པ་དང་གཡོན་ཞགས་པ་འཛིན། ནུབ་སྒོར་ཉི་ཟླ་དམར་མོ་དྲེད་ཀྱི་གདོང་ཅན་གཡས་ཕུར་བུ་དང་གཡོན་ལྕགས་སྒྲོག་འཛིན། བྱང་སྒོར་སྤྱང་གདོང་ལྗང་གུ་གཡས་ཕུར་པ་དང་གཡོན་དྲིལ་བུ་འཁྲོལ་བ། དྲག་མོ་དུར་ཁྲོད་ཀྱི་ཆས་ཅན། དེ་དག་གི་བར་ཁྱམས་རྣམས་སུ་ཕུར་སྲུང་བཅུ་གཉིས་སྲིང་མོ་དང་བཅས་པ་ཕྱིའི་དུར་ཁྲོད་དང་ལྕགས་རི་རྣམས་སུ་མ་མོ་བདུན། སྲིང་མོ་བཞི། དབང་ཕྱུག་ཉེར་བརྒྱད་སོགས་རྗེ་འབངས། ཉི་མ་ལས་ཟེར་གྱི་ཚུལ་དུ་མ་འདྲེས་ཡོངས་རྫོགས་བསྐྱེད་པར་བྱའོ། །རྩ་བའི་གཉིས་པ་ལས། དང་པོ་དགོངས་གསོལ་ནི། རྡོ་རྗེ་གཞོན་ནུ་དང་རིག་པ་འཛིན་པ་རྣམས་ཀྱིས་ཕྱི་ནང་གི་སྲིད་པ་ཐམས་ཅད་དོན་དམ་རྡོ་རྗེ་གྲུབ་མཛོད་ཅིག །གནས་ཚུལ་རྡོ་རྗེ་གཞོན་ནུའི་ལྷ་ཚོགས་བཞིན། སྣང་ཚུལ་དུ་ཡེ་ཤེས་ཁྲོ་བོའི་དཀྱིལ་འཁོར་དུ་མངོན་སུམ་གྲུབ་པར་མཛོད། གཉིས་པ་དེ་ལྟར་སྤྱན་འདྲེན་པ་ནི། དམ་ཡེ་དབྱེར་མེད་དབང་དང་བྱིན་རླབས་དངོས་གྲུབ་མ་ལུས་པ་སྩོལ་ཕྱིར་གཤེགས་སུ་གསོལ་བརྗོད་ཅིང་ཡེ་ཤེས་ཀྱི་དཀྱིལ་འཁོར་ཏིང་ངེ་འཛིན་གྱི་དཀྱིལ་འཁོར་ལ་མེ་རི་འདབ་འབྱར་གྱི་ཚུལ་དུ་བཞུགས་པར་མོས་ལ། གསུམ་པ་ཕྱག་འཚལ་བ་ནི། ཞི་བས་མི་ཐུལ་གདུག་པས་འདུལ་བ་དང་། ཡེ་ཤེས་ལྷའི་ཕྱག་རྒྱ་བརྟེན་པའི་ཕྱིར་རྩེ་གཅིག་ཡིད་ཀྱིས་ཕྱག་འཚལ་བའི་མོས་པ་བྱའོ། །བཞི་པ་དབང་ཞུ་བའི་ཕྱིར། ཐབས་སྤྱོད་པ་དང་བྱམས་སྙིང་རྗེས་གང་ལ་གང་འདུལ་གྱིས་སངས་རྒྱས་ཕྲིན་ལས་རྫོགས་པར་མཛད་ནས། བདག་དམ་ཚིག་པ་ལ་ཡེ་ཤེས་པས་ཕྱི་དབང་སྣང་བ་ལྷར་ཤེས། ནང་དབང་སྣང་སྲིད་སེམས་སུ་ཤེས་པ། གསང་དབང་སེམས་ཉིད་སྟོང་པར་རྟོགས་པའི་ཕྱིར་དབང་དང་བྱིན་རླབས་མ་ལུས་སྩོལ་ཅིག་བརྗོད་པས། གནས་གསུམ་འབྲུ་གསུམ་གྱིས་བྱིན་རླབས། ཡེ་ཤེས་ལྔའི་ས་བོན་ལས་རིགས་ལྔས་དབུ་བརྒྱན་པར་མོས། ལྔ་པ་བསྟིམ་པ་ནི། དཀྱིལ་འཁོར་གསུམ་གྱི་ལྷ་ཚོགས་ཡེ་ཤེས་པ་རྣམས་དམ་ཚིག་པར་དབྱེར་མེད་ཐིམ་ནས་ཇི་སྲིད་བར་བཞུགས་པར་མོས། དྲུག་པ་སྨན་མཆོད་ནི། ངོ་བོ་རྩ་བརྒྱད་ཡན་ལག་སྟོང་སྦྱར་བདེ་བཤེགས་རིགས་ལྔ་སྒྲུབ་པའི་དམ་ཚིག་གི་རྫས་བྱེད་ལས་རྒྱུ་དྲུག་འཁོར་བའི་སྡུག་བསྔལ་སེལ་བའི་སྨན། དཔའ་བོ་ཡབ་ཡུམ་ཐབས་ཤེས་རོལ་པའི་བྱང་སེམས་གྱི་རྣམ་པ་རང་བྱུང་བྷནྡྷའི་སྣོད་དུ་བསྐུལ་ཏེ། མཐེབ་སྲིན་ཉི་ཟླའི་གའུས་བཅུས་ལ་རྩ་བརྒྱུད་བླ་མ་ཡི་དམ་རྡོ་རྗེ་གཞོན་ནུ་སོགས་ལ་ཕུལ་བས་ཐམས་ཅད་མཉེས་ནས་འབྲུ་གསུམ་འཕྲོས། བདུད་རྩི་མྱང་བས་གསང་བ་གསུམ་གྱི་དངོས་གྲུབ་ཐོབ་པར་མོས། བདུན་པ་གཏོར་མ་ནི་ཆོས་ཉིད་སྐྱེ་མེད་ཀྱི་ཀློང་ལས་སྤྲུལ་པ་དམ་རྫས་རྨད་བྱུང་འདོད་ཡོན་ལྔ་ལྡན་གྱི་ཕུང་པོ་ལོངས་སྤྱོད་ཟད་མི་ཤེས་པ་ཕུལ་བས་ལྷ་རྣམས་ཀྱིས་ཐུགས་དམ་བསྐང་བར་བསམ། བརྒྱད་པ་དུང་ཆེན་གྱི་སྣོད་དུ་རཀྟ་དམར་གྱི་རྒྱ་མཚོ་བསྐྱིལ་བ། བྱེད་ལས་དཀྱིལ་འཁོར་ལྷ་ལ་ཕུལ་བས་སྲིད་རྩ་ཉོན་མོངས་དག་ནས་འཁོར་བ་སྟོང་པར་མོས་པའོ། །དགུ་པ་དུག་གསུམ་གྱི་མཆོད་པ་ནི། གཏི་མུག་ཤ་ཡི་ཕུང་པོ། འདོད་ཆགས་ཁྲག་གི་རྒྱ་མཚོ། ཞེ་སྡང་རུས་པའི་གྲམ་ཁྲོད་དུ་དམིགས་ནས་འབུལ་བས་དུག་གསུམ་རང་དག་ཏུ་གྱུར་པར་མོས། བཅུ་པ་སྦྱོར་སྒྲོལ་ནི། ངོ་བོ་ཆོས་དབྱིངས་སྐྱེ་མེད་གཏུན་ཁུང་དུ། རིག་པ་ཡེ་ཤེས་རྡོ་རྗེའི་ཐོ་བས། གཟུང་འཛིན་མཚན་རྟོག་རྡུལ་ཕྲན་དུ་བརླག་ཅིང་རིག་སྟོང་མཉམ་ཉིད་ཀྱི་ཀློང་དུ་སྦྱོར་བ་སྟེ། རྣམ་པ་ཡབ་ཡུམ་ཐབས་ཤེས་རོལ་བའི་མཁའ་གསང་ནས་བདེ་སྟོང་ཟག་མེད་ཀྱི་མཆོད་སྤྲིན་དཔག་ཏུ་མེད་པ་སྤྲོས་ཏེ་ཕུལ་བའམ། ཡང་ན་མཁའ་གསང་དུ་དགྲ་བགེགས་བཀུག་སྟེ་རོལ་བའི་སྟབས་ཀྱིས་བརྡུང་། བྱང་སེམས་ཀྱི་མེ་ལྕེས་བསྲེགས། དུག་གསུམ་གྱི་ངོ་བོ་ཤ་ཁྲག་རུས་གསུམ་ཕུལ་བས། ལོག་ལྟའི་དགྲ་བགེགས་བསྒྲལ་ཞིང་རྟོག་ཚོགས་དབྱིངས་སུ་ཞི་བར་མོས་པའོ། །བཅུ་གཅིག་པ་བསྟོད་པ་ནི། དུས་གསུམ་རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་མ་ལུས་གཅིག་ཏུ་འདུས་པའི་སྤྱི་དཔལ་རྡོ་རྗེ་གཞོན་ནུ། སྐྱེ་མེད་རྣམ་དག་ཡུམ་འཁོར་ལོ་རྒྱས་འདེབས། ས་བཅུའི་མངའ་བདག་ཁྲོ་བཅུ། ཕ་རོལ་ཕྱིན་བཅུའི་རང་བཞིན་ཁྲོ་མོ་བཅུ། ཉོན་མོངས་ཉི་ཤུ་སྒྲོལ་མཛད་ཁྲ་ཐབས་ཉི་ཤུ། ཐུགས་རྗེའི་ཤུགས་ཀྱིས་གནོད་གདུག་སྒྲོལ་མཛད་སྲས་མཆོག་ཉེར་གཅིག །ཕྱི་ནང་བར་ཆད་སྲུང་མཛད་སྒོ་མ་བཞི། རྒྱལ་བའི་སྤྱན་སྔར་ཁས་བླངས་ཕུར་སྐྱོང་སྲུང་མའི་ཚོགས་བཅས་ཆེ་བའི་ཡོན་ཏན་རྗེས་སུ་དྲན་པས་བསྟོད་པར་བྱའོ། །བཅུ་གཉིས་པ་བཟླས་པ་ནི། ངོ་བོ་བདེ་བར་གཤེགས་པའི་ཐུགས་ཡིག་འབྲུར་སྣང་བ། ངེས་ཚིག་བྱིན་རླབས་མངོན་དུ་འབྱིན་པའི་སྔགས། དབྱེ་ན་རྒྱུ་མ་ནོར་རྩ་བའི་སྔགས། བསྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་གསུམ་ལས་ཕྱི་མ་སྟེ། དོན་ནི་ཨོཾ་ཁྲག་འཐུང་རིགས་ལྔའམ་ཡེ་ཤེས་སམ་ཆོས་སྐུའོ། །བཛྲ་རྡོ་རྗེ་ཡབ་ཡུམ་མཉམ་སྦྱོར་དབྱིངས་ཡེ་དབྱེར་མེད་ལོངས་སྤྱོད་རྫོགས་སྐུའོ། །ཀཱི་ནི་སྤྲུལ་པ་ཁྲོ་ཆེན་ཡབ་བཅུ། ལི་ནི་ཁྲོ་མོ་བཅུ། དེ་གཉིས་ཐབས་ཤེས་དབྱེར་མེད་ཟུང་དུ་འབྲེལ་བས་འགྲོ་བའི་མི་དགེ་བ་བཅུ་ཚར་གཅོད། དགེ་བཅུ་མཐར་ཕྱིན་དབྱིངས་རིག་དབྱེར་མེད་སྦྱོར་བས་སྤྲུལ་སྐུའོ། །ཀཱི་ནི་ཡང་སྤྲུལ་ཟ་བྱེད་དེ་འཁོར་བའི་ཉོན་མོངས་ཟ་ཞིང་སྟོང་པར་བྱེད། ལ་ནི་སྤྲུལ་པ་གསོ་བྱེད་དེ་སྲིད་གསུམ་དབྱིངས་སུ་སྦྱོར་བའི་དོན་མཛད་པའོ། །ཡ་ནི་སྲས་མཆོག་ཉེར་གཅིག །སརྦ་ནི་ཁྲོ་བོ་བཅུ་གསུམ་སྦྲུལ་སྒོ་མ་དང་བཅས་པ། བིགྷཱ་ནི་བཀའ་སྡོད་ཤྭ་ན་མཆེད་བཞི་དང་མིང་པོ་སྲོག་བདག །ནན་ནི་རེ་ཏི་མཆེད་བཞི་དང་རེ་ལྡེ་མགོ་ཉག །བཾ་ནི་ས་བདག་མཆེད་བཞི་དང་བསེ་ཡི་སྐྱེས་བུ་སྟེ་དམ་ཅན་སྲུང་མའི་ཚོགས། ཧཱུྃ་ནི་ཁྲོ་འདུས་རིག་འཛིན། ཕཊ་ནི་དགྲ་བགེགས་དམ་སྲི་ཚར་གཅོད་པའི་གསུང་། ཛཿནི་བསྒྲུབ་བྱ་གང་ཡོད་ཐམས་ཅད་ཚུར་བཀུག་པར་བྱེད་པ། ཧཱུྃ་ནི་བསྒྲུབ་བྱ་ཐམས་ཅད་དབང་དུ་སྡུད་ཅིང་ཟིལ་གྱིས་གནོན་པ། ཨ་ནི་དངོས་གྲུབ་ཐམས་ཅད་མྱུར་དུ་འགུགས་ཤིང་བསྟིམ་པར་བྱེད་པའི་སྔགས་སུ་ངེས་པར་བྱས་ནས། བསྙེན་དམིགས་དངོས་ལ་ལྔ་ལས། དང་པོ་སྐུ་ཕྱག་རྒྱ་ལ་དམིགས་པའི་འཛབ་དགོངས་ནི། བདག་རྩ་བ་ཕྱོགས་བཅུའི་ཁྲོ་བོ། ཕུར་པ་སྲས་ཀྱི་དཀྱིལ་འཁོར་གསུམ་སྤྱི་དང་། ཁྱད་པར་བདག་རྩ་བའི་དཀྱིལ་འཁོར་རྡོ་རྗེ་གཞོན་ནུའི་རྣམ་པ་ཆུ་ཟླ་ལྟར་མ་འདྲེས་པ་སྤྱན་དཀར་ནག་ཚུན་ཆད་གསལ་ལ་རང་གི་སེམས་ཉིད་ཐུགས་ཀྱི་ངོ་བོ་དཔལ་རྡོ་རྗེ་གཞོན་ནུ་ཡིན་པར་ཤེས་པའི་ངེས་ཤེས་རྐྱེན་གཞན་གྱིས་མི་འཕྲོག་པའི་ང་རྒྱལ་བརྟན། གོང་དུ་ཤེས་པ་ལྟར་སངས་རྒྱས་ཀྱི་ཡེ་ཤེས་རྣམ་པ་ཐམས་ཅད་པ་དྲན་པར་བྱས་ཏེ། འདི་ནི་བསྐྱེད་པ་ལྷ་ཡི་གཟེར་རོ། །གཉིས་པ་གསུང་ཡིག་འབྲུའི་དམིགས་པ་ནི། ཐུགས་ཡེ་ཤེས་སེམས་དཔའ་སྐུ། ཡིག་འབྲུ་གསུང་རྡོ་རྗེ་ཐུགས། འོད་ཡོན་ཏན། ཟེར་ཕྲིན་ལས་སུ་ངེས་པར་བྱས་ནས་ཐུགས་སྲོག་ཧཱུྃ་དང་མཐར་སྔགས་འཁོར་སྤུས་བྲིས་པ་ཙམ་གསལ། ཧཱུྃ་ལས་འོད་ཉི་ཟེར་ལྟར་འཕྲོས། ཕྱོགས་བཅུའི་རྒྱལ་བ་སོགས་ལ་ཕོག །མཉེས་མཆོད་འབུལ་ཐུགས་རྒྱུད་བསྐུལ། རིགས་དྲུག་ལ་ཕོག་ལས་ཉོན་སོགས་སྦྱངས་ཤིང་དག་ཞིང་ལ་བཀོད། དམ་ཅན་ཚོགས་ལ་ཕོག་ལས་ལ་བཙུད། བླ་མ་མཆེད་ལ་ཕོག་ཐུགས་དམ་བསྐང་། དགྲ་བགེགས་ལ་ཕོག་གནོད་འཚེ་གདུག་རྩུབ་ཚར་བཅད། སླར་འདུས་དཀྱིལ་འཁོར་གསུམ་ལ་ཐིམ་པས་བདག་གི་སྒྲིབ་པ་སྦྱངས། མཐུ་བསྐྱེད། དབང་ཐོབ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་ཐམས་ཅད་ཐོབ་པར་མོས་ནས་གྲགས་སྟོང་རྡོ་རྗེ་སྲིན་པོའི་ངར་སྒྲས་བཟླ་བར་བྱ་སྟེ་བཟླས་པ་སྔགས་ཀྱི་གཟེར་རོ། །གསུམ་པ་ཐུགས་ཆོས་ཉིད་ལ་དམིགས་པ་ནི། ཐུགས་དམིགས་མེད་ནམ་མཁའི་དཀྱིལ་ལྟར་དག་པའི་ངང་ནས་རིག་རྩལ་འགག་མེད་དཀྱིལ་འཁོར་གསུམ་སོགས་རྟོག་མེད་དུ་ཤར། ཤར་དུས་ཉིད་ནས་རང་བཞིན་མེད་པར་དག །སྐྱེ་མེད་ཀྱི་ངང་ནས་འཛིན་མེད་དུ་ལ་བཟླ་བ་ནི་དགོངས་པ་མི་འགྱུར་བའི་གཟེར་རོ། །བཞི་པ་ཡོན་ཏན་ལ་དམིགས་པའི་འཛབ་དགོངས་ནི། འཛབ་ཁང་ཕྱེས་ཏེ་ཐུགས་སྲོག་ས་བོན་སྔགས་ཕྲེང་དང་བཅས་པ་ལས་འོད་ཟེར་དང་། སྔགས་ཕྲེང་མང་པོ་རང་གི་ཐུགས་ལས་འཕྲོས། ཕྱོགས་བཅུའི་བདེ་གཤེགས་རྩ་གསུམ་སྲུང་མ་དང་བཅས་པའི་ཐུགས་ཀར་ཐིམ། མཉེས་མཆོད་ཕུལ། ཐུགས་རྒྱུད་བསྐུལ། སྐུ་སོགས་བྱིན་རླབས་དངོས་གྲུབ་ཐམས་ཅད་སྔགས་ཕྲེང་དམར་པོའི་རྣམ་པ་ལྟེ་བ་ནས་བྱུང་། ལྟེ་བ་ནས་ཐུགས་ཀའི་སྔགས་ལ་ཐིམ། གཉིས་སུ་མེད་པའི་དངོས་གྲུབ་ཐོབ། ཡང་འཕྲོས་ཕྱི་སྣོད་འཇིག་རྟེན་ལ་ཁྱབ། འབྱུང་བཞི་དང་རིན་ཆེན་སྨན་རྫས་ཚེ་རིང་བ་དང་ནད་གདོན་ཞི་བྱེད་ཀྱི་བཅུད་ཐམས་ཅད་བསྡུས་ཏེ་ཐིམ། གཟི་བརྗིད་བཀྲག་མདངས་ཆེར་རྒྱས། ཡང་སྤྲོས་བཅུད་ལ་ཕོག །ལས་ཉོན་རྣམ་སྨིན་སྦྱངས། རྡོ་རྗེ་གཞོན་ནུའི་རང་བཞིན་དུ་གྱུར། ཡང་འཕྲོས་ཕྱོགས་བཅུའི་རྒྱལ་བ་སྲས་དང་བཅས་པའི་སྐུ་སོགས་འབྲུ་གསུམ་རྣམ་པར་བསྡུས་སྐུ་སོགས་ཀྱི་དབང་དང་བྱིན་རླབས་མ་ལུས་པར་ཐོབ་པར་བསམ། ལྔ་པ་དྲག་པོའི་ཕྲིན་ལས་དགྲ་བགེགས་སྒྲོལ་བའི་འཛབ་དགོངས་ནི། སྔགས་ཀྱི་འོད་ཟེར་ལྗང་ནག་འཕྲོས། བདེ་གཤེགས་རྒྱལ་བ་ཞི་ཁྲོའི་ཐུགས་རྒྱུད་བསྐུལ། མཐུ་སྟོབས་བྱིན་རླབས་ནུས་པ་ཐམས་ཅད་བསྡུས་ཏེ་བདག་ནུས་ལྡན་བྱས། དམ་ཅན་སྲུང་མའི་ཚོགས་ལ་ཕོག་ལས་ལ་བསྐུལ། གཟས་པོ་རང་དབང་མེད་པར་བཀུག་ནས་ལིངྒ་ལ་ཐིམ། ཚེ་ནུས་བདག་ལ་ཐིམ། སྲུང་མ་དམ་ཅན་གྱི་ཚོགས་བྱ་གཅན་ཤ་ལ་རུབ་པ་བཞིན་བསྒྲལ་བར་བསམ་སྟེ་སྤུ་གྲིའི་སྔགས་དྲུག་བཟླས། འདི་གཉིས་ནི་འཕྲོ་འདུ་ཕྲིན་ལས་ཀྱི་གཟེར་རོ། །དཔེར་ན་གསེར་ཞུན་བཟོ་ཉན་པ་ལྟར་བསྙེན་སྒྲུབ་ཀྱི་མཚན་མ་ཐོན་ཕན་ཆོད་ཤམ་བུ་ཅི་འདོད་བསྒྱུར་བས་འགྲུབ། བཟླ་བྱའི་སྔགས་ནི་སྲོག་སྔགས་འབྲུ་དགུ། ལས་སྔགས་འབྲུ་ལྔ། འཕྱོང་སྔགས་འབྲུ་གསུམ་སྟེ་བཅུ་བཞི་ཡིན་ལ། བསྙེན་སྒྲུབ་ཆིག་ཆོད་དྲག་སྔགས་འདུས་པ་ཡི་གེ་དྲུག་བསྙེན་སྔགས་བསྒྲིལ་ནས་བཟླ་བར་བྱའོ། །དེ་ལྟར་བཟླ་དུས་སྐྱོན་དྲུག་སྤང་སྟེ། མ་འདྲེས་པ་མ་བྱེ་བ་གསལ་བར་བཟླ། ཆད་ལྷག་མེད་པར་དག་པར་བཟླ། རྒྱུན་མི་ཆད་པར་རྩོལ་བས་བཟླའོ། །ཡིག་འབྲུ་བཅོ་ལྔ་མན་འབྲུ་འབུམ་དང་སུམ་ཅུ་ཚུན་ཆད་གསུམ་འབུམ། ཕར་བཅད་ལ་ཁྲི་ཕྲག་གིས་རྫོགས་ཤིང་དབང་པོ་དང་སྦྱར་ན། རབ་བདུན་འབུམ་ཉི་ཁྲི། འབྲིང་བྱེ་བ་ཆིག་འབུམ། ཐ་མ་བྱེ་བ་ལྔ་དང་འབུམ། དུས་ལ་སྦྱར་ན་རྩོད་དུས་འདིར་བྱེ་བ་ཕྲག་གསུམ་འབུམ་ཕྲག་བཞིས་བསྙེན་པ་རྫོགས། མཚན་བསྙེན་ནི་དུས་གྲངས་ཚད་མ་འཁྱོལ་ཡང་མཚན་མ་ནམ་ཐོན་བསྙེན་པ་རྫོགས་པའོ། །སྐུའི་མཚན་རྟགས་ཀྱང་ཕུར་པ་འགུལ། འཕར། ལྡིང་། མེ་སྟག །འོད། དུ་བ། བཞད་པ་སོགས་འབྱུང་། གསུང་ལ་ཕུར་པ་ལས་སྒྲ་སྙན་པ། སྔགས་དང་། གནམ་ལྕགས། འབྲུག །རྔ། ཅེ་སྤྱང་། སྲིན་པོའི་ངུར་སྒྲ་དང་བདུན་འབྱུང་། ཐུགས་ཀྱི་ཏིང་ངེ་འཛིན་ལས་སུ་རུང་། ལས་བཞི་དང་ཚེ་ལ་དབང་། རིགས་ལྔ་མངོན་གྱུར་ལྷ་རྣམས་གསལ། སྲུང་མ་བྲན་བཞིན་ལས་བྱེད། ཡང་དག་རྟོགས་པ་འཆར་རོ། །དེ་ལྟར་མ་གྲུབ་ན་སྤོག་པའི་ཆོ་ག་ནི། སྔོན་དུ་དམ་ཚིག་ཉམས་ཆགས་བཤགས། བསྐང་བ་དང་ཚོགས་བསགས་རྟེན་རྫས་ལ་ཁྲུས་དང་རབ་གནས་བྱ། བརྩོན་འགྲུས་དྲག་པོས་ལན་གསུམ་མམ་བདུན་གྱིས་འགྲུབ། བསྙེན་སྒྲུབ་ཀྱི་མཚན་རྟགས་དེ་ལྟར་ཐོན་ཀྱང་ལས་སྦྱོར་ཕྲ་མོ་རྟགས་མ་ཐོན་ན་དམ་བཅས་དགོས་སྒྲུབ་མངོན་མཚན་ཐུང་གིས་སྤོག་པར་བྱའོ།། ༈ །།གསུམ་པ་རྗེས་ཀྱི་བྱ་བ་ལ། དང་པོ་ཚོགས་མཆོད་ནི། སྤྱིར་ཚོགས་པ་གསུམ། གསགས་པ་གསུམ། གསང་བ་གསུམ། སྦྱང་བ་གསུམ། བསླབ་པ་གསུམ། བསྐྱེད་པ་གསུམ། ཡུལ་གསུམ། དམ་ཚིག་གསུམ་བཅས་ཕུར་པ་བཀའ་མའི་འགྲེལ་ཆེན་དུ་གསུངས་པ་ལྟར། དགའ་ལྡན་ལྷ་ཡི་ཚོགས་གསང་སྔགས་ནང་གི་ལྷ་མཐུན་པ། དགྱེས་ལྡན་མིའི་ཚོགས་དམ་ཚིག་རྩ་བ་གཅིག་པ། འབྱོར་ལྡན་ཡོ་བྱད་ཀྱི་ཚོགས་བཟང་ལ་གྱ་ནོམ་པའོ། །གནས་དུར་ཁྲོད་ལྷ་ཡི་ཚོགས་ཁང་དུ། གྲུབ་པ་ཐོབ་པའི་བླ་མ། ལྷ་གྲངས་མཉམ་པའི་རྣལ་འབྱོར་ཕོ་མོ། འདོད་ཡོན་ལྷ་ཡི་ལོངས་སྤྱོད་ཚང་བར་གསོག་པ་གསུམ་མོ། །བདག་ཉིད་ཀྱི་ཉེས་སྐྱོན། མཆེད་ལྕམ་གྱི་ཉམས་གྲིབ། ཚོགས་ཀྱི་མ་དག་པའོ། །སྦྱང་པ་གསུམ་ནི་རྃ་ཡྃ་ཁྃ་ལས་མེ་རླུང་ཆུ་བྱུང་སྟེ་དམེ་བཙོག་སྦྱང་བའོ། །འབྲུ་གསུམ་གྱིས་བདུད་རྩིའི་རང་བཞིན་དུ་བརླབ་པའོ། །མཆོད་པའི་དུས་འདོད་ཡོན་ལྔ། བཤགས་དུས་ཡེ་ཤེས་ལྔ། བསྟབ་པའི་དུས་དགྲ་བགེགས་ཀྱི་ཤ་ཁྲག་ཏུ་བསྐྱེད། ཡུལ་གསུམ་ནི་བླ་མ་ཡི་དམ་མཁའ་འགྲོ་གསུམ་ལ་འབུལ་ལོ། །དམ་ཚིག་གསུམ་ལ་ཚན་བཞི་ལས། མི་བྱ་བ་གསུམ་ནི། རང་སེམས་འཁྲུགས་པའི་རྩོད་པ། གཟུང་འཛིན་སྐྱེ་བའི་འཁྲུལ་གཏམ། ཐེག་པ་འོག་མའི་འབག་བཙོག་གི་རྟོག་པ་མི་བྱའོ། །མི་སྨྲ་བ་གསུམ་ནི། ཚོགས་རྫས་གཞན་ལ་ཆེ་སྟེ་བདག་ལ་ཆུང་། ན་ནིང་བཟང་སྟེ་ད་ལོ་ངན། ཁ་སང་མང་སྟེ་དེ་རིང་ཉུང་ཞེས་མི་སྨྲའོ། །མི་བསམ་པ་གསུམ་ནི། ཚོགས་རྫས་མཐོང་བའི་ཚེ་བཟའ་སྙམ་བཏུང་སྙམ་ཞིམ་སྙམ་མི་བསམ་པའོ། །མི་འབྲལ་བ་གསུམ་ནི། ལུས་ལྷ། ངག་སྔགས། སེམས་ཏིང་འཛིན་དང་མི་འབྲལ་བར་བྱའོ། །དེ་ལྟར་སྔོན་དུ་ངེས་པར་བྱས་ནས། ལག་ལེན་དངོས་ལ་གསུམ་ལས། དང་པོ་བྱིན་རླབས་ནི། དམ་རྫས་སུ་འོས་པའི་ཡོ་བྱད་ཅི་འབྱོར་བ་བཤམས་ལ་སྔགས་ཀྱིས་སྤྱིར་སྦྱངས། བྱེ་བྲག་བྷྲཱུཾ་ལས་ཚོགས་གཞོང་རིན་པོ་ཆེ་མཆོད་སྡོང་འདབ་མ་སྟོང་ལྡན་གྱི་སྙིང་པོ་ཚོགས་རྫས་རྣམས་མ་ལས་ཉི་མ། ཨཱཿལས་ཟླ་བ་པྃ་ལས་པདྨའི་དཀྱིལ་འཁོར་ལ་གནས་པའི་སྒྱུ་མ་ལྟ་བུའི་ཏིང་ངེ་འཛིན་ངོ་བོ་ཧཱུྃ་མཐིང་ནག །དེ་ལས་རྃ་ཡྃ་ཁྃ་བྱུང་ཡེ་ཤེས་ཀྱི་མེ་རླུང་ཆུས་མ་དག་པའི་དངོས་པོ་ཐམས་ཅད་བསྲེགས་གཏོར་བཀྲུས། སླར་ཡང་ས་བོན་ལྔ་འཕྲོས་པས་རིགས་ལྔ་ཡབ་ཡུམ་གྱི་དམ་ཚིག་ཆེན་པོའི་རང་བཞིན་འདོད་ཡོན་གྱི་རྣམ་པ་ཅི་ཡང་འཆར་བར་མོས་སོ། །གཉིས་པ་ཚོགས་ཞིང་སྤྱན་འདྲེན་པ་ནི། དགོས་པ་གང་ཕྱིར་སྲིད་གསུམ་གྱི་སེམས་ཅན་ཐམས་ཅད་རྡོ་རྗེ་ཕུར་པ་སྒྲུབ་པ་དང་། རིག་པ་རྩལ་གྱི་དབང་། ཁམས་གསུམ་སྒྲོལ་བའི་དབང་། དྲག་པོ་ལས་ཀྱི་དབང་རྣམས་དང་། རབ་སངས་རྒྱས། འབྲིང་ཏིང་འཛིན། ཐ་མ་མིག་སྨན་སོགས་ཏེ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐོབ་པའི་ཕྱིར། གང་དུ་འདྲེན་ན་ཞལ་ཟས་ཚོགས་ཀྱི་དགའ་སྟོན་ལ། གང་སྤྱན་འདྲེན་ན་སྤྱིར་ཁྲོ་བོ་ལ་མུ་བཞི་ཡོད་པ་ལས་འདིར་ཡེ་ཤེས་ཀྱང་ཡིན་ལ། ཁྲོ་བོ་ཡང་ཡིན་པའི་དཔལ་ཆེན་རྡོ་རྗེ་གཞོན་ནུའི་ཚོགས། དེ་ལྟར་སྤྱན་དྲངས་པའི་རྩ་བ་གསུམ་གྱི་ལྷ་ཚོགས་ཀྱང་ནམ་མཁར་བྱོན་པར་དམིགས་སོ། །གསུམ་པ་མཆོད་པ་ནི། ཏིང་འཛིན་ནམ་མཁའི་མཛོད་ལས་འདོད་ཡོན་ལོངས་སྤྱོད་འཛད་མེད་སྤྲོ་བ་སྟེ། གཟུགས་རྡོ་རྗེ་མ་མེ་ལོང་འཛིན་པ་སོགས་དཔག་ཏུ་མེད་པར་སྤྲོས་ཏེ་འབུལ་ལམ། ཚོགས་རྫས་ཐུན་མོང་དུ་བཏེག་སྟེ། བླ་ན་མེད་པ་དམ་རྫས་ཡེ་ཤེས་ལྔ་ཡི་དངོས་པོ། འདོད་ཡོན་ལྔ་དང་ལྡན་པར་སྤྲུལ་ཏེ་རྩ་བ་གསུམ་གྱི་ལྷ་ཚོགས་ལ་འབུལ་ཞིང་། སྤྲོ་ན་བསྐང་བའི་ལས་རིམ་གསུམ་ཡང་བྱ་སྟེ། མཆེད་ལྕམ་རྣམས་ཀྱི་བདུད་རྩི། གཏོར་མ། རཀྟ། མར་མེ། ཛ་གད། མཾ་ས། ཚེ་རྫས། ཟླ་རྒྱས། བཾ་གཙང་མའི་རྫས། གསུར་ཆེན། བཟའ་བཅའ་སྣ་ཚོགས་པ་ཐོགས་ནས་རོལ་མོ་དང་སྙན་པའི་དབྱངས་ཀྱིས་མཚན་དོན་ནས་བསྐང་བ་དང་བསྐང་རྫས་བསྔོ་བ་དང་བཟློག་པའི་ཕྲིན་ལས་གསོལ་བ་རྣམས་གཞུང་བཞིན་དུ་བྱའོ། །བྱེ་བྲག་མཆོད་པ་ལ་མཆོད་བཤགས་བསྒྲལ་བསྟབ་གསུམ་སྟེ། ཚོགས་ཕུད་རིམ་པ་གསུམ་སྤྲོས་ལ་དང་པོ་མཆོད་པ་ནི། དམ་ཚིག་ཆེན་པོ་སོགས་བརྗོད་ཅིང་ཚོགས་རྫས་འདོད་ཡོན་ལྔའི་རང་བཞིན་དུ་དམིགས་ནས་ཕུལ་བས་ཐུགས་མཉེས་པར་བསམ་མོ། །བར་པ་བཤགས་པ་ནི། ཡེ་ཤེས་ལྷ་ལ་བཟང་ངན་མཚན་རྟོག་མི་མངའ་ཡང་བཀའ་འཁོར་ན་གནས་པའི་ལྷ་སྲིན་སྡེ་བརྒྱད་དང་། མཁའ་འགྲོའི་ཚོགས་ཀྱིས་བཀའ་ཡི་གཉེར་འཛིན་ལེགས་ཉེས་རྗེས་གཅོད་པས། སྒྲུབ་པ་པོའི་གསང་མཚམས་འདྲལ་བ་དང་། ཀུན་རྟོག་ཕྲ་མོའི་སྐྱོན་གཟིགས་ཤིང་བཀའ་ཆད་དང་དངོས་གྲུབ་ཀྱི་བར་གཅོད་པས་ན། བདག་ཅག་མ་རིག་མ་གུས་བག་མེད་གྱུར་པ་དང་འདོད་ཆགས་ཉོན་མོངས་དབང་ཆེ་བའི་སྐྱོན་གྱིས་རྩ་བ་དང་ཡན་ལག་གི་དམ་ཚིག་འགལ་བའི་ནོངས་པ་མ་ལུས་པ་སྙིང་ནས་འགྱོད་པས་བཤགས་ཤིང་། ཚོགས་རྫས་མཆོད་པས་ཐུགས་དམ་གཉེན་པོ་བསྐང་བ་ལགས་ན། ཉེས་ལྟུང་སྒྲིབ་པའི་ཚོགས་བྱང་ཞིང་དག་ནས་དབང་དང་དངོས་གྲུབ་མ་ལུས་པ་སྩོལ་བར་མཛོད་ཅིག་བརྗོད་དོ། །ཐ་མ་བསྒྲལ་བ་ནི། སྤྱིར་སྒྲོལ་བ་ལ་གང་བསྒྲལ་བའི་ཡུལ། སྒྲོལ་བྱེད་ཀྱི་སློབ་དཔོན། ཇི་ལྟར་སྒྲོལ་ཚུལ། མ་བསྒྲལ་བའི་ཉེས་དམིགས། བསྒྲལ་བའི་ཕན་ཡོན། འབྲས་བུ་བཅས་ཞིབ་ཀྱིས་ཤེས་པ་གལ་ཆེ་ཞིང་བྲུབ་ཁུང་དུ་ལིངྒ་བཅས་ལ། སྔགས་བརྗོད་པའི་རྐྱེན་གྱིས། རང་ཉིད་དཔལ་ཆེན་དངོས་གསལ་བའི་ཐུགས་སྲོག་ཧཱུྃ་ལས་འོད་ལྗང་ནག་བ་ཐག་ལྟ་བུ་ཕྱོགས་བཅུར་འཕྲོས་པའི་རྩེ་ལས། སྲས་མཆོག་ལྟ་བུ་ཁྲོ་བོས་སྟོང་གསུམ་གང་། དངོས་སྣང་སྐུ། སྒྲ་གྲགས་གསུང་། རྟོག་ཚོགས་ཐུགས་སྒྲོལ་བྱེད་དུ་གསལ་བས་བདེ་གཤེགས་རྣམས་ཀྱི་ཐུགས་དམ་བསྐུལ་བ་སོགས། ཁྱད་པར་བསྒྲལ་བྱའི་གནས་སུ་འཕྲོས། དབང་མེད་བཀུག་སྟེ་ལིངྒ་ལ་བསྟིམ། འོད་ཟེར་ཚུར་འདུས་རང་དང་གདབ་ཕུར་ལ་ཐིམ་པས། སྟོད་ནས་བྱིན་རླབས་ཀྱི་འབྲུག་ལྡིར། སྐེད་ནས་ཡེ་ཤེས་ཀྱི་གློག་འཁྱུག །དབལ་རྩེ་ནས་ནུས་མཐུའི་ཐོག་ཆེན་འཕྲོ་བས་ནུས་སྟོབས་དཔག་མེད་གྱུར་པར་བསམ་ལ། བདེན་འགུག་སྤྱི་ལྟར་བྱས་ནས། ཕོ་ཉ་བསྐུལ། གཙོ་བོ་གཞོན་ནུ། ཁྲོ་བཅུ། ཟ་གསོད། སྲས་མཆོག་སོགས་ཐུགས་དམ་གནད་ནས་བསྐུལ་བས་སྒྲོལ་བའི་ལས་མཛད་པར་མོས་ནས། བྱང་ཆུབ་ཏུ་སེམས་བསྐྱེད་ཅིང་དུས་གསུམ་རྒྱལ་བའི་གདུང་འཚོབ་ལ་དངོས་སུ་བར་དུ་གཅོད་པ་དང་། ཉམས་པ་བདུན་དང་། ཞིང་བཅུ་ཚང་བ་མདོར་ན་བསྟན་དང་སེམས་ཅན་ཡོངས་ལ་གནོད་པའི་གཟུགས་ཅན་དགྲ་དང་གཟུགས་མེད་བགེགས་བདུད་དང་དམ་སྲི་བར་གཅོད་འབྱུང་པོའི་ཚོགས། ཁྲོ་ཚོགས་རྡོ་རྗེ་གཞོན་ནུ་དང་། སྲས་འཁོར་སྤྲུལ་པའི་བྱིན་རླབས་བདེན་མཐུའི་སྟོབས་ཀྱིས་ལས་བྱེད་ཕོ་ཉའི་ཚོགས་ཀྱིས་དེ་དག་དབང་མེད་ཤ་ཁྱིས་རི་དྭགས་དེད་པ་བཞིན་སྐད་ཅིག་བཀུག་སྟེ་ལིངྒ་ལ་བསྟིམ། མངོན་སྤྱོད་དྲག་པོས་བསྒྲལ། རྣམ་ཤེས་དབྱིངས་སུ་སྤར་ལུས་ངག་རྡུལ་ཕྲན་དུ་བརླག་པར་མཛོད་ཅིག །དེའང་གནས་ལུགས་ཀྱི་ལྟ་བ་རྟོགས་ཤིང་ཡེངས་མེད་བསྒོམས་པས་བདག་རྒྱུད་གྲོལ་ཞིང་ཐུགས་རྗེས་གཞན་སྒྲོལ་ནུས་པའི་གདེང་དང་། རང་འདོད་ཀྱི་འཁྲི་བ་བྲལ། བསྟན་འགྲོར་ཕན་པའི་ལྷག་བསམ་དང་། བུ་གཅིག་པོའི་མ་ལྟར་སྙིང་རྗེ་ཆེན་པོས་བསྒྲལ་བར་བྱེད་པ་ནི་ཐེག་པ་ཆེན་པོའི་ལམ་སྲོལ་རྨད་དུ་བྱུང་བ་ཡིན་པས་ངེས་པར་བྱས་ནས་བསྒྲལ་བ་དངོས་ཀྱི་སྐབས། ཐོག་མར་ལོག་རྡུགས་འབྱམས་གསུམ་གྱི་ཉེས་པ་མི་འབྱུང་བའི་ཕྱིར། བདག་དཔལ་ཆེན་པོ། སྲས་མཆོག་ཡཀྴ་ཀྲོ་དྷ། ལིངྒ་གནོད་བྱེད་ཀུན་འདུས་ཏེ་གསལ་བ་གསུམ་གྱི་ངང་ནས་ལུང་གསུམ་གྱི་དགོངས་པས་བསྒྲལ་བར་བྱ་དགོས། ཨོཾ་ལྃ་སོགས་བརྗོད་པས། བསྒྲལ་བྱའི་ཡིད་དང་རྣམ་ཤེས་ཀྱི་སྒོ་བཀག །ཉོན་ཡིད་བག་ཆགས་གཅོད། ཀུན་གཞིའི་བག་ཆགས་རྩད་ནས་གཅོད་དེ། ཉོན་ཡིད་ལུས་བཅས་རྡུལ་ཕྲན་དུ་བཤིག་པས་འཁོར་བ་རྩད་ནས་གཅོད་དེ་ཆོས་དབྱིངས་ལ་འགོད་པའི་མོས་པ་བསྐྱེད། བྷ་ག་ཝན་སོགས་བརྗོད་པས་བཅོམ་ལྡན་འདས་བདུད་ལས་རྒྱལ་བ། ཐབས་དང་ཤེས་རབ་རྡོ་རྗེ་གཞོན་ནུ་སྟེང་གི་ཁྲོ་བོས་ཐོག་དྲངས་ཟ་གསོད་བཅས་བསྐུལ། ཧཱུྃ་ཧཱུྃ་ཞེས་བརྗོད་པས་དགྲ་བགེགས་དབང་དུ་བསྡུས། སྒྲོལ་ཞིག །ཕུར་པ་གསོ་ཞིང་གཟི་བྱིན་བསྐྱེད། ཛཿསོགས་བརྗོད་པས་ལྕགས་ཀྱུས་བཟུང་། ཞགས་པས་བཅིང་། ལྕགས་སྒྲོག་གིས་བསྡམ། དྲིལ་བུས་རྡུལ་དུ་བརླག །བག་ཆགས་ཡོངས་སུ་སྦྱངས། ཕུར་པས་སྲིད་པ་ཐམས་ཅད་སྒྲོལ་ཞིང་ཚར་གཅོད་དབང་དུ་བསྡུས། རྡུལ་དུ་རློག་ཅིག་ཅེས་དང་། བཛྲ་ཧཱུྃ་ཀ་ར་སོགས་བརྗོད་ནས་དང་པོ་དག་བྱེད་ཁྲུས་ལུང་ནི། དཀྱིལ་འཁོར་གསུམ་གྱི་གནས་གསུམ་ཨཱཿདཀར་དེ་ལས་འོད་འཕྲོས་ཕྱོགས་བཅུའི་སངས་རྒྱས་སྤྱན་དྲངས་ཐམས་ཅད་ཨཱཿདཀར་དུ་གྱུར། དཀྱིལ་འཁོར་གསུམ་ལ་ཐིམ་པས། སྒོ་གསུམ་དང་ཤེས་བྱའི་སྒྲིབ་པ་སྦྱངས། གཟུང་འཛིན་ལས་གྲོལ། བདེ་ཆེན་བྱང་ཆུབ་སེམས་ཀྱི་ངང་ལས་སྐུ་གསུང་ཐུགས་གསལ་བར་བྱ་བ་ནི་བདག་གི་ཁྲུས་ལུང་ངོ་། །ཡང་སྔར་བཞིན་ཨཱཿལས་འོད་འཕྲོས་དོན་གཉིས་བྱས་སྒྲིབ་པ་སྦྱངས། གཟས་པོའི་གནས་གསུམ་ལ་ཐིམ་སྒྲིབ་པ་སྦྱངས་བསྒྲལ་བའི་སྐལ་པ་དང་ལྡན། སྙིང་ནང་ཀུན་གཞི་ཨཱཿདཀར་དུ་གནས་འགྱུར་བ་གཟས་པོའི་ཁྲུས་ལུང་སྟེ། དེ་ལྟར་བདག་གཟས་ཕུར་གསུམ་དགོངས་དང་དམ་ཚིག་ཆོས་ཉིད་གཅིག་གིས་འབྲེལ་བ་ནི་ཐུགས་རྗེ་འབྲེལ་ཐག་གི་དགོངས་པའོ། །སྤྱིར་སེམས་ཅན་སྒོས་གཟས་པོ་འཁོར་བ་མི་གཏོང་བའི་སྙིང་རྗེ་བསྐྱེད་པ་ནི་གདུང་བ་ལུག་རྒྱུད་ཀྱི་དགོངས་པ་སྟེ་དེ་གསུམ་ཁྲུས་ལུང་ངོ་། །ཚེ་ལུང་ནི་བསྒྲལ་བྱའི་སྙིང་དཀར་ནག་གི་མཚམས་སྲོག་གི་ངོ་བོ་ཁྲག་གི་ཐིག་ལེ་མཐེ་བོང་ཙམ་གྱི་དབུས་སུ་ཚེ་རྟེན་ཨཱཿའོད་ཀྱི་དབུས་སུ། ཀུན་གཞི་ནྲྀ་དུད་ཁའི་གཟུགས་སུ་གནས་པར་ཕུར་རྩེ་གཟིར་བས་ཧཱུྃ་གིས་སྒོ་ལྔའི་རྣམ་ཤེས་སྙིང་ནང་དུ་འུབས་ཀྱིས་བསྡུས་པས་བྱུང་ཚོར་གྱི་སྒོ་འགག །ཡང་འོད་ཚོན་གང་བ་ཐལ་གྱིས་བྱུང་ཉོན་མོངས་རྡོ་ཚན་ལ་ཁ་བ་བབས་པ་བཞིན་སངས་ཤིང་། མ་རིག་པའི་སྒྲིབ་པ་ཐམས་ཅད་མ་བྱུང་མ་སྐྱེས་ཆོས་ཉིད་སྟོང་པར་གྱུར་པས་ཀུན་གཞི་རྩད་ཆོད་དེ་སྙིང་དཀར་ནག་འབྲེལ་མཚམས་ཕྲལ་ནས་ནྲྀ་ཐིག་ཨཱཿབཅས་ཧཱུྃ་ལ་བསྡུས་པས་སེམས་དབྱིངས་སུ་ཕྱུང་བའོ། །ཕུར་སྲོག་ཨཱཿདཀར་དེ་བདག་ཡེ་ཤེས་སེམས་དཔའི་ཐུགས་སྲོག་ལ་ཐིམ་གཉིས་མེད་བྱང་ཆུབ་སེམས་སུ་གྱུར་ཏེ་བདག་བཀྲག་དང་གཟི་མདངས་སྔར་བས་རྒྱས་པས་བདག་མི་ཕམ་སྟེ་འཚེང་། གསུམ་པ་གནས་སྤར་བའི་ལུང་ལ་གསོ་བ་གསུམ་ལས། ཕྱག་རྒྱའི་ལྷ་རྣམས་གཟིར་མནན་གྱིས་མེ་བའི་ལས་ལ་སྦྱར་བའི་ཕྱིར་ཕུར་པ་གསོ་བ་ནི། ཀཱི་ལ་ཡ་བཟླ་ཞིང་ཕུར་པའི་དབལ་ནས་བཟུང་ཀླད་ལ་བསྐོར་བས་ཁམས་གསུམ་ཕུར་པས་གང་། དེ་ལས་འཕྲོ་འདུས་གཟི་བྱིན་ལྡན་པར་བསྒོམ། དྲག་ལས་ཀྱི་རྣམ་སྨིན་གྱིས་མི་གོས་པའི་ཕྱིར་བདག་གསོ་བ་ནི། ཧཱུྃ་གསུམ་བརྗོད་རྩ་བརྒྱད་བཟླས་བདག་ཐུགས་ཧཱུྃ་ལས་འོད་འཕྲོས་ཁམས་གསུམ་ཕུར་བུས་གང་། མཉེས་མཆོད་ཕུལ་སྐུ་གསུང་ཐུགས་ཀྱི་བྱིན་རླབས་འོད་ཟེར་གྱི་རྣམ་པ་བདག་ལ་ཐིམ་པར་དམིགས། སྙིང་རྗེ་བྱང་ཆུབ་སེམས་ཀྱིས་ཟིན་པས་བསྒྲལ་བྱ་ལ་ཕན་གདགས་ཕྱིར་གཟས་པོ་གསོ་བ་ནི། ཧཱུྃ་གསུམ་བརྗོད་པས། བདག་ཐུགས་ཧཱུྃ་ལས་འཕྲོས་པའི་འོད་ཟེར་གྱི་རྩེ་ལས་དམིགས་བྱའི་རྣམ་ཤེས་ཨཱཿགཟུགས་འོག་མིན་དུ་སྤར། ཕཊ་གསུམ་གྱིས་རྡོར་སེམས་ཡབ་ཡུམ་གྱི་སྦྱོར་མཚམས་སུ་བསྟིམས་པས་རྒྱལ་བའི་སྲས་སུ་སངས་རྒྱས་པར་དམིགས་ལ། དེ་ལྟ་བུའི་དགོངས་པ་ལྡན་ན་ནུབ་གཅིག་ལ་གཟས་པོ་བརྒྱ་བསྒྲལ་ཡང་རྣམ་སྨིན་གྱིས་མི་གོས་ཤིང་ཚོགས་ཆེན་རྫོགས། ལུང་གསུམ་གྱི་དགོངས་པ་མ་ལྡན་ན་ཤན་པ་དང་ཁྱད་པར་མེད་པ་ཨོ་རྒྱན་དུས་གསུམ་མཁྱེན་པའི་ཞལ་སྔ་ནས་འདོམ་པ་ཡིན་པས་གལ་ཆེན་ལག་ལེན་དུ་མཛོད། དེ་ལྟར་ཕྱིར་མི་ལྡོག་པའི་བག་ཆགས་ཀྱི་རྟེན་གཞི་བསྒྲལ་ལ། དཔའ་རྟགས་ཀྱི་ཚུལ་དུ་བསྐུལ་བ་ནི། དངོས་གྲུབ་ལ་བར་ཆད་བྱེད་པ་རྣམས་ཟུངས་ཤིག །རྒྱོབ་ཅིག །རྣམ་པར་ཆིངས་ཤིག །གཏོར་ཞིག །གྲོགས་དང་བྲལ་བར་གྱིས་ཤིག་སོགས་བརྗོད་དེ། གདབ་པ་དངོས་ནི། གཙོ་ཕུར་བླངས་ནས་ཡི་གེ་གསུམ་གྱིས་བྱིན་རླབས་མཆོད་བསྟོད་བཞུགས་གསོལ་གྱིས་གཙོ་ཕུར་ལས་ལ་བསྐུལ་མི་རུང་། གདབ་ཕུར་དངོས་ནི་ཁྲོ་བཅུའི་ཕུར་པ་སོགས་གནས་བཅུ་ལ་རིམ་པར་གདབ་པའི་གཞུག་ཏུ་བྲན་བཀའ་ཉན་ཕོ་ཉའི་ཚོགས་བསྐུལ་འདོན་ཅིང་རལ་གྲིས་གཏུབ། ཕུར་པས་སྤྱི་བོ་ནས་རྐང་མཐིལ་བར་ཐལ་བར་ཕུག་ནས་རྡུལ་དུ་བརླག །ཐོ་བས་བརྡུངས་ཤིང་སྙིགས་མའི་ལུས་དེ་ཉིད་བདུད་རྩིར་སྤར་བ་གཏོར་མར་བསྟབ་ལ་དཔལ་ཆེན་ཡབ་ཡུམ་ཁྲོ་བཅུ་སྲས་མཆོག་ཟ་གསོད་སྒོ་སྐྱོང་མཁའ་འགྲོ་གིང་ལང་དབང་ཕྱུག་སོགས་དཀྱིལ་འཁོར་གྱི་ལྷ་ཚོགས་རྣམས་ཞལ་གནམ་ས་ཙམ་གདངས་པའི་ནང་དུ་ཕུལ་ཞིང་བཞེས་པས་རྡུལ་ཕྲན་ཙམ་མེད་པར་རོལ་པའི་མོས་པ་མཛོད་ཅིག །ཅེས་པས་ལྷ་ཚོགས་དགྱེས་པས་རོལ་ཏེ་ཧ་ཧ་ཞེས་བཞད། ཧཱུཾ་ཧཱུཾ་ཧཱུཾ་གིས་དངོས་གྲུབ་སྩལ་ནས་འོད་གསལ་དུ་ཞུ། ཕཊ་གསུམ་གྱིས་དེ་ལས་སད་པའི་སྣང་ཆ་ཆོས་ཉིད་བདེན་པའི་ངང་བསྐྱང་རྟག་ཆད་ཀྱི་མཐའ་བསལ་ལོ། །དེ་ནས་ཐབས་ཤེས་ཀྱི་རྫས་རྣམས་བརྡ་དང་བརྡ་ཡི་འབུལ་ལེན་གྱི་བླངས་ནས་བདག་རྩ་བའི་དཀྱིལ་འཁོར་གསུམ་འདུས་གསལ་ནས། ཐ་མལ་ཞེན་འཛིན་བྲལ་བའི་བདེ་བ་ཆེན་པོར་རོལ་ཞིང་ནང་གི་སྦྱིན་སྲེག་གི་ཚུལ་དུ་ལོངས་སྤྱོད་པར་བྱའོ། །གསུམ་པ་ལྷག་མ་ནི། ལྷག་མ་གསོག་འཇོག་མེད་པ་ཕྱོགས་གཅིག་བསྡུས་ཏེ། ཕུད་ལྷག་མཆོད་པའི་རས་མ་བཅས་བཤམ་ལ་སྨན་རག་གིས་བྲན། སྤྱི་ལྟར་དམ་བསྒྲགས་ནས་གཅིག་ཏུ་བསྲེ་སློབ་དཔོན་གྱི་ལྕེ་རྟ་མགྲིན་ཡབ་ཡུམ་དུ་གསལ་བྱང་སེམས་བབ་པར་མོས་པས་ཁ་ཕྲུ་གདབ་སྟེ་དཀྱིལ་འཁོར་གྱི་བྱང་ཤར་དུ་བཤམ། དཔལ་ཆེན་པོའི་བྲན་དང་བཀའ་ཉན་མངག་གཞུག་ཕོ་ཉའི་ཚོགས་སུ་གྱུར་པ་དབང་ཕྱུག་ཉེར་བརྒྱད། མཁའ་འགྲོ་སུམ་ཅུ་རྩ་གཉིས་གིང་དང་ལང་ཀ་མ་སྲིང་འབར་མའི་ཚོགས་དང་གཞན་ཕྲ་མེན་ཤུགས་འགྲོ་གནོད་སྦྱིན་གྱི་རིགས་སུ་གྱུར་པ་རྣམས་སྔོན་དཔལ་ཆེན་པོའི་སྤྱན་སྔར་རྡོ་རྗེའི་བྲོ་བོར་ཞིང་། ཇི་ལྟར་དམ་བཅས་པའི་ཞི་རྒྱས་དབང་དང་མངོན་སྤྱོད་དྲག་པོའི་ཕྲིན་ལས་མ་ལུས་པ་འགྲུབ་པར་མཛོད་ཅིག །ཅེས་ཕྲིན་ལས་བཅོལ་ནས་ལྷག་གཏོར་གོམས་པ་བདུན་ཅུའི་སར་བསྐྱལ་ལོ། །བཞི་པ་སྨོན་ལམ་ནི། གཞི་ལམ་འབྲས་བུ་ཆོས་ཐམས་ཅད་ངོ་བོ་དབྱེར་མེད་མི་བསླུ་བའི་ཕྱིར་ཆོས་ཉིད་ཀྱི་བདེན་པ། དེ་ལྟར་རྟོགས་ལ་ཐེག་དམན་བློ་ཆུང་ལ་གསང་ཞིང་གསང་སྔགས་བླ་མེད་ལ་རག་ལས་པས་གསང་སྔགས་ཀྱི་བྱིན་བརླབ་བོ། །དེའང་བླ་མའི་བྱིན་རླབས་དང་མན་ངག་གིས་རྟོགས་པར་བྱེད་དགོས་པས་སངས་རྒྱས་ཀྱི་མཐུའོ། །ཉམས་ལེན་སྐབས་སྨིན་གྲོལ་གྱི་ལམ་ལ་ཞུགས་དགོས་པ་ཨ་བྷི་ཙརྻའི་དུས་ལ་བབས། དེ་ནི་འཁོར་བའི་སྡུག་བསྔལ་དང་ཐེག་དམན་གྱི་འབྲས་བུ་ལས་འབྱིན་པས་ན་བརྣག་པ་དེ་ཁོ་ན་ལའོ། །དེ་ལྟར་གསང་སྔགས་ཀྱི་སྤྱོད་པའི་མཐུས་བྱིན་གྱིས་བཅོམ་ལྡན་འདས་ཀྱི་སྐུ་གསུང་སོགས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་པའི་སྐལ་པ་དང་མཉམ་པར་གྱུར་ཅིག་ཅེས་པ་བརྗོད། ལྔ་པ་བཟོད་གསོལ་ནི། དཔལ་ཆེན་ལྷ་ཚོགས་བདག་ལ་དགོངས་སུ་གསོལ། བདག་ཉམ་ཆུང་དགོངས་སྤྱོད་གདེང་དུ་མ་གྱུར་པ་སོགས་རྩ་བའི་སྐུ་གསུང་ཐུགས་དང་ཡན་ལག་ཉེར་ལྔ་ཐུན་མོང་སྤྱིའི་དམ་ཚིག་དང་། སྒྲུབ་པ་ཁྱད་པར་གྱི་ཉི་ཤུ། སྤྱོད་པ་རྒྱུན་གྱི་བཞི། གལ་མདོ་ངེས་པའི་དམ་ཚིག་གསུམ་སོགས་བག་མེད་དང་ཉོན་མོངས་དབང་གིས་ཉམས་ཆག་ཏུ་གྱུར་པ་ཅི་མཆིས་ཐམས་ཅད་མི་གསང་མི་སྦེད་གནོང་འགྱོད་དྲག་པོས་བཤགས་ན་བཟོད་པ་དམ་པ་གསོལ། ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བར་དག་ཅིང་ཚངས་པ་ཆེན་པོས་དངོས་གྲུབ་སྩོལ་ཞེས་ཡིག་བརྒྱ་བརྗོད། དྲུག་པ་གཏོར་མ་ལ་གསུམ་ལས། དང་པོ་བརྟན་མ་བསྐྱང་བ་ནི། གཏོར་མ་ཕྱིར་བསྣུར་སྨན་རཀ་གིས་བྲན། བརྟན་ཞིང་ཆགས་པའི་བརྟན་མ་སྟེ་བོད་ཁམས་སྐྱོང་བའི་གཙོ་མོ་བཅུ་གཉིས་ནི། བདུད་མོ་བཞི། གནོད་སྦྱིན་མ་བཞི། སྨན་མོ་བཞི་སྟེ་རང་རང་གི་གཡོག་འཁོར་སྨན་ཕྲན་འབུམ་ཕྲག་དང་བཅས། ཕྱི་ལྟར་ཞིང་སྐྱོང་ཌཱ་ཀི། ནང་ལྟར་རྩ་རླུང་ཐིག་ལེ། གསང་ལྟར་རྟེན་འབྲེལ་བཅུ་གཉིས་གནས་སུ་དག་པའི་བདེན་དོན་བཅུ་གཉིས་ཀྱི་ངོ་བོ་སྟེ་ཁྱེད་ཅག་སྔོན་གྱི་ཐ་ཚིག་ལ་གནས་པའི་ཡལ་གམ་ཅན་ཏེ་སློབ་དཔོན་པདྨ་ཐོད་ཕྲེང་དང་། སློབ་མ་གླང་ཆེན་དཔལ་སེང་གིས་མོན་ཁ་ནེ་རིང་རྫོང་གསུམ་དུ་ཞིང་ཆེན་པགས་པའི་གདན་བཏིང་། དབང་བསྐུར་ནས་རྣལ་འབྱོར་གྱི་གྲལ་ལ་བཞག་ཐར་པ་ཐོབ་པའི་ལུང་བསྟན་གསང་མཚན་བཏགས། ཕྱི་རབས་སྒྲུབ་པ་པོ་རྣམས་ལ་ཕན་གདགས་ཕྱིར་བྲན་གཡོག་མངག་གཞུག་ཚུལ་དུ་ཁས་བླངས་པ་ཡིན་ན་སྔོན་གྱི་དམ་ལས་མ་འདའ་བར་འདིར་བྱོན་ཏེ། བཀའ་ཡི་གཏོར་མ་ལོངས་ལ། བོད་ཁམས་མཐའ་དམག་གདུག་པའི་རྒྱུ་འགྲུལ་གཅོད་པ་སོགས་ཇི་ལྟར་བཅོལ་བའི་ཕྲིན་ལས་སྒྲུབ་པར་མཛོད་ཅིག །ཅེས་གཏོར་མ་གཟའ་རྒྱུ་ཕྱོགས་དང་བསྟུན་ཏེ་བཏང་ངོ་། །གཉིས་པ་ཟོར་བསྐུལ་བ་ནི། དཔེར་ན་ཕ་རོལ་གྱི་གཡུལ་ལས་རྒྱལ་བའི་ཕྱིར། དམག་བསྡུས། གོ་བསགས། མཚོན་བརྡར་བའི་སྒོ་ནས་འཐབ་པའི་སྦྱོར་ཆོག་ཐམས་ཅད་ཟིན་པའི་འོག་ཏུ་གང་གཡུལ་བཀྱེ་བའི་སར་སོང་སྟེ་དགྲ་དང་གཡུལ་སྤྲད་པ་ལྟ་བུ་སྟེ། དགྲ་བགེགས་བྱད་མའི་མཐུ་སྟོབས་གཞོམ་ཕྱིར་དུ་རྫས་སྔགས་དམིགས་པའི་འཕྲུལ་འཁོར་ཐམས་ཅད་ཚོགས་པར་བྱས་ནས་ལས་ལ་སྦྱར་བ་ཡིན་ཀྱང་། དཀྱུས་ཙམ་དུ་གཏོར་མ་དེ་ཉིད་ནད་དུག་མཚོན་ཆའི་ཕུང་པོར་དམིགས་ཏེ་དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་སྤྲུལ་པའི་དམག་དཔུང་དང་བཅས་པས་བཏེག་སྟེ་གང་ལ་དམིགས་པའི་དགྲ་དང་བགེགས་ཀྱི་ཕྱོགས་སུ་འཕང་བར་མོས་ལ་ཟོར་བསྐུལ་དང་སྔགས་བཟླས། དགྲ་བགེགས་དམ་སྲི་རྒྱབ་རྟེན་ལྷ་སྲུང་དང་བཅས་པའི་ལྔ་ཕུང་རྡུལ་དུ་བརླགས་ནས་རྣམ་ཤེས་བདེ་བ་ཆེན་པོ་ལ་སྦྱོར་བར་མོས་པའོ། །གསུམ་པ་བྲོ་བརྡུང་བ་ནི། གཏོར་གཞོང་རི་རབ་གསལ་བའི་འོག་ཏུ་གནོད་བྱེད་དམ་སྲི་རྒབ་འདྲེ་ལོག་པར་འདྲེན་པའི་ཚོགས་ཐམས་ཅད་བཀུག་ནས། རྣལ་འབྱོར་པ་རྣམས་དཀྱིལ་འཁོར་གསུམ་དུ་གསལ་ཞིང་ལག་པ་ལུག་རྒྱུད་དུ་སྦྲེལ་ལ། རྡོ་རྗེ་རྒྱ་མདུད་ཀྱི་བྲོ་དངོས་སུ་འཁྲབ་བམ་ཡིད་ཀྱིས་མོས་པས། དཔལ་ཆེན་པོའི་ལྷ་ཚོགས་སྟོང་གསུམ་གང་བར་བྱོན་ནས་ཞལ་ནས་ཕུར་པའི་འཛབ་དབྱངས་བཅས་ཐབས་ཤེས་དབྱེར་མེད་ཀྱི་བྲོ་བརྡུངས་པས་དགྲ་བགེགས་དམ་སྲིའི་ཚོགས་རྣམས་ཕྱེ་མར་བརླགས་པས་བྱང་ཆུབ་ཀྱི་སེམས་མ་སྐྱེས་ཀྱི་བར་དུ་དེ་ཉིད་ནམ་ཡང་ལྡང་བ་མེད་པར་མོས་ལ་གནས་ལུགས་ལྟ་བའི་རྒྱས་གདབ་པས་སྣང་སྲིད་གཡོ་འགུལ་མེད་པར་བསམ་མོ། །བདུན་པ་དཀྱིལ་འཁོར་བསྡུ་བ་ནི། སྣང་སྲིད་ཐམས་ཅད་འོད་དུ་ཞུ། གཞལ་ཡས་ཁང་ལ་ཐིམ་པ་སོགས་མཐར་མི་དམིགས་པའི་ངང་ལ་བཞག་པས་རྟག་མཐའ་བསལ་ཏེ། ཕྱི་བཟུང་བའི་ཡུལ་གྱི་སྣང་གྲགས་སོགས་བདེན་འཛིན་མེད་པས་རང་བཞིན་གྱིས་སྟོང་པ། ནང་འཛིན་སེམས་ལ་བལྟས་པས་གཞི་མེད་རྩ་བྲལ། རྟོགས་མཁན་རིག་པ་ལ་བལྟས་ཀྱང་མཐོང་བྱ་མཐོང་བྱེད་གཉིས་མེད་སོ་སོར་རང་རིག་ལས་ཅུང་ཟད་ཙམ་ཡང་མེད་པ་འདི་ནི་ལྟ་བ་རང་བྱུང་གི་ཡེ་ཤེས་ཡིན་པར་ཐག་ཆོད་ལ༑ དེའི་ངང་ལ་གནས་པ་སྒོམ་པ། མི་འབྲལ་བ་སྤྱོད་པ། མངོན་གྱུར་འབྲས་བུ་སྟེ་དེ་བཞིན་དབྱེར་མེད་ཆོས་ཉིད་མཉམ་ཀློང་ཡངས་པའི་ངང་དུ་གཟུང་འཛིན་ཐམས་ཅད་རང་ཤར་རང་གྲོལ་བར་འགྱུར་རོ། །བརྒྱད་པ་རྒྱུན་གྱི་ཏིང་འཛིན་ནི། ཕཊ་གསུམ་བརྗོད་པས་སྟོང་གསལ་གྱི་ངང་ལས་ཆུ་ལས་ཉ་ལྡང་བའི་ཚུལ་དུ་དཔལ་རྡོ་རྗེ་གཞོན་ནུ་ཡབ་ཡུམ་ཐུགས་སྲོག་སེམས་དཔའ་ས་བོན་དང་བཅས་པ་ལམ་གྱིས་གསལ་བཏབ་པས་ཆད་མཐའ་བསལ་ཞིང་། ཕྱི་ནང་སྣོད་བཅུད་ཕུང་ཁམས་སྐྱེ་མཆེད་སོགས་དོན་དམ་པར་སྐྱེ་མེད་ཆོས་སྐུའི་རང་བཞིན་ལ། ཀུན་རྫོབ་ཏུ་གཞལ་ཡས་ཁང་ལྷ་དང་ལྷ་མོའི་རང་བཞིན་བདེན་གཉིས་དབྱེར་མེད་ཆོས་ཉིད་ལ་ཆོས་ཉིད་དམ། ལྷ་ལ་ལྷ་རོལ་པའི་ཚུལ་གྱིས་ཟ་ཉལ་འགྲོ་འདུག་སོགས་སྤྱོད་ལམ་རྒྱུན་གྱི་ཏིང་ངེ་འཛིན་ལམ་ཁྱེར་བྱའོ། །དེ་ལྟར་བརྩོན་པས་བྱང་ཆུབ་སྒྲུབ་པའི་བར་ཆད་ཞི་ཞིང་ལས་བཞི་གྲུབ་པ་བརྒྱད་སོགས་ཐུན་མོང་དང་མཆོག་གི་དངོས་གྲུབ་གཞི་འབྲས་དབྱེར་མེད་སྐུ་ལྔ་ཡེ་ཤེས་དགུ་ལྡན་དཔལ་རྡོ་རྗེ་གཞོན་ནུའི་དགོངས་པ་མངོན་དུ་བྱེད་པར་འགྱུར་རོ། །དེ་ལྟར་སྤྱི་དོན་གྱི་རྣམ་བཞག་དང་། ལས་བྱང་གི་བསྒོམ་དོན་ཅུང་ཟད་བཀོད་པ་འདི་ལ་ལས་དང་པོ་པ་རྣམས་ཀྱིས་ཐོག་མར་འདི་ཙམ་གོམས་འདྲིས་ཐོན་པར་བྱས་ནས་སླད་ནས་རྒྱུད་གཞུང་མན་ངག་རྣམས་ལ་ཡོངས་སུ་གོམས་འདྲིས་ཐོན་པར་བྱ་བ་གལ་ཆེའོ། །ཞེས་པ་འདིའང་ཐོས་བསམ་ཁོ་ནས་འཆད་རྩོད་རྩོམ་པ་མཛུབ་མོས་རི་སྟོན་ལྟ་བུ་མ་ཡིན་པར་སྒོམ་བྱུང་གི་ཤེས་རབ་ཟབ་མོ་གོམས་སྟོབས་ཀྱིས་ཉམས་མྱོང་སྒོམ་ཁྲིད་དང་གོ་བསྟུན་ཏེ་དེང་སང་མཁས་གྲུབ་ཡོངས་ཀྱི་དཔལ་དུ་གྱུར་པ། ༧ཟེ་ཆེན་རྒྱལ་ཚབ་རིན་པོ་ཆེས་མཛད་པའི་ཕུར་པ་ཡང་གསང་སྤུ་གྲིའི་རྣམ་བཤད་རིག་འཛིན་ཞལ་ལུང་ནང་གསལ་ལྟར་མཆེད་གྲོགས་རྣམས་ལ་ཅུང་ཟད་འཆད་ཁུལ་རློམ་པའི་སྐབས་མི་བརྗེད་དྲན་འཛིན་ཐོབ་ཕྱིར་འདི་ལྟར་བྲི་དགོས་ཞེས་རྣམ་རིག་མཆོག་ཏུ་བཀྲ་བ་ཉམས་རྟོགས་ཡོན་ཏན་གྱི་གེ་སར་གསར་དུ་བཞད་པ་སྒྲུབ་གྲྭ་སངས་རྒྱས་རྡོ་རྗེ་ལགས་ནས་ལྷ་རྫས་རབ་དཀར་རྡོར་དྲིལ་ཆུང་ངུ་བཅས་དུས་ཚེས་དགེ་བའི་ཉིན་བསྐུལ་ངོ་མ་ལྡོག་ཙམ་དུ། ༧གྲུབ་སྲས་ཨ་བུ་ཧྲལ་པོས་བྱ་རྫོགས་སྐད་ཅིག་གིས་ཟིན་བྲིས་སུ་བཏབ་པ་ཡིན་པས་ཁྱེད་རྣམས་ཀྱི་ཡིད་ལ་ངེས་ཤིང་། བདུད་བཞིའི་བར་ཆད་ཞི་ནས་བསྐྱེད་རྫོགས་ཀྱི་བརྟན་པ་ཐོབ་པའི་མཐུན་རྐྱེན་དུ་འགྱུར་བར་ཤོག་ཅིག། །།