PJCW-KABUM-01-KA-021

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	dpal sprul bka' 'bum Volume 1, Text 21, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

Tibetan Text

[edit]

༄༅། །སྡེབ་སྦྱོར་གྱི་མན་ངག་རིན་ཆེན་ཕྲེང་བ་ཞེས་བྱ་བ་བཞུགས་སོ། །

རྒྱ་གར་སྐད་དུ། ཙྪིནྔྷོ་པ་དེ་ཤ །བོད་སྐད་དུ། སྡེབ་སྦྱོར་གྱི་མན་ངག །ཐུབ་པ་ཡེ་ཤེས་ཉི་མ་ནི། །དམ་ཆོས་སྣང་བ་འབར་མངའ་བས། །ནང་གི་མ་རིག་མུན་འཇོམས་པ། །ནང་གི་ཉིན་མོར་བྱེད་དེར་འདུད། །རྗོད་བྱེད་ཕུན་སུམ་ཚོགས་པའི་ངག །བརྗོད་བྱའི་དོན་དང་ལྡན་པ་གང་། །རྐང་པར་བཅད་པ་ཚིགས་བཅད་དེ། །དེ་ཡང་རྐང་བཞི་ཉིད་དུ་ངེས། །ཚིགས་བཅད་རྐང་བཞི་དེ་ཡང་ནི། །བྲྀཏྟ་ཛ་ཏཱི་རྣམ་གཉིས་དབྱེ། །ཡེ་གེ་བགྲང་བ་བྲྀཏྟ་ཡིན། །ཕྱི་མོར་བགྲང་བ་ཛ་ཏཱིར་འགྱུར། །ཚིགས་སུ་བཅད་པའི་སྡེབ་སྦྱོར་ལ། །བྲྀཏྟ་ཛ་ཏཱི་གཉིས་ལས། ཡི་གེ་བགྲང་བ་བྲྀཏྟའི་མཚན་ཉིད། ཕྱི་མོ་བགྲང་བ་ཛ་ཏཱིའི་མཚན་ཉིད། དབྱངས་ལྕི་ཡང་གང་ཡིན་ཡང་ཡི་གེ་རེ་རེར་བྱས་ནས་དབྱངས་ཀྱི་ཡི་གེ་བགྲང་བ་ཡི་གེ་བགྲང་བའི་མཚན་ཉིད། དབྱངས་ཡང་བ་ཕྱི་མོ་གཅིག་དང་། ལྕི་བ་ཕྱི་མོ་གཉིས་སུ་ཕྱེས་ན། ཕྱི་མོ་བགྲང་བ་ཛ་ཏཱིའི་མཚན་ཉིད། ཕ་རོལ་ན་དབྱངས་གསལ་བྱེད་བརྩེགས་མ་དང་ང་རོ་དང་རྣམ་བཅད་སོགས་མེད་པའི་དབྱངས་ཐུང་ངུ་ཡང་བའི་མཚན་ཉིད། ཕ་རོལ་ན་གསལ་བྱེད་བརྩེགས་མ་དང་ང་རོ་དང་རྣམ་བཅད་དང་ྈྐ་ ྉྤ་རྣམས་ཡོད་པའི་དབྱངས་ཐུང་ངུ་དང་རིང་པོ་རྣམས་ལྕི་བའི་མཚན་ཉིད། རྐང་པ་བཞི་པོ་དང་མཉམ་པ་མཉམ་པའི་བྲྀཏྟའི་མཚན་ཉིད། དང་པོ་དང་གསུམ་པ་མཚུངས་ཤིང་གཉིས་པ་དང་བཞི་པ་མཚུངས་པ་ཕྱེད་མཉམ་གྱི་བྲྀཏྟའི་མཚན་ཉིད། རྐང་པ་བཞི་པོ་མི་མཚུངས་པ་མི་མཉམ་པའི་བྲྀཏྟིའི་མཚན་ཉིད། བྲྀཏྟའི་སྐབས་སུ་ཡང་གསུམ་རེའམ་རེ་རེ་ལ་ཚོགས་སུ་བྱས་པ་རྣམས། བྷ་ཐོག་ལྕི་བ་ཛ་དབུས་ལྕི། །ས་མཐའ་ལྕི་བ་མ་ཀུན་ལྕི། ། ཡ་ཐོག་ཡང་བ་ར་དབུས་ཡང་། །ཏ་མཐའ་ཡང་བ་ན་ཀུན་ཡང་། ཡང་བ་ལ་སྟེ་ལྕི་བ་ག །ཡང་སྡོད་ཀ་སྟེ་ལྕི་སྡོད་ཝ། ཞེས་པ་རྣམས་ཡིན་ལ། གང་དུ་ངལ་གསོ་ས་དེར་སྐད་དོད་རེའི་མཚམས་རྫོགས་པ་ཞིག་ངེས་པར་བྱས་ནས་ངལ་བསོའི་རྟགས་བྱ་བ་ཡིན་ལ། དེ་ལ་བྷའི་མཐར་ངལ་གསོས་ན་བྷུ་དང་། ཛའི་མཐར་ངལ་གསོས་ན་ཛུ་སོགས་ཀྱིས་བསྟན་ཡོད་པའི་ཕྱིར། བྷ་སོགས་ཨུད་ལ་དེ་ལྡན་ནོ། །ཞེས་བཤད། མཉམ་པའི་བྲྀཏྟ་ལ་རིན་འབྱུང་གཞུང་ལས་ཡི་གེ་དྲུག་པ་ཡན་ཆད་ལས་མ་བཤད་ཀྱང་ཡི་གེ་གཅིག་པ་སོགས་ཀྱི་དཔེར་བརྗོད་ངོ་མཚར་རྟོགས་བྱེད་ཀྱི་སྐབས་སུ་འབྱུང་བས་མི་བཞེད་པ་ནི་མ་ཡིན་ལ། དེ་དག་གི་ནང་གསེས་རེ་ཟུང་གཞུང་གིས་དངོས་སུ་མ་བསྟན་པས་མཚོན་པས་སྤྱིར་རྣམ་གྲངས་དུ་ཡོད་སོགས་ནི་ངོ་མཚར་རྟོགས་བྱེད་ཀྱི་སྦྱོར་བས་ཤེས་པར་བྱའོ། །མི་མཉམ་དང་ཕྱེད་མཉམ་སོགས་ལ་ནང་གསེས་ཀྱི་དབྱེ་བ་གཞུང་གིས་བསྟན་པ་རྣམས་མ་ཡིན་པ་རེ་ཟུང་ཡོད་སྲིད་ཀྱང་ངོ་མཚར་རྟོགས་བྱེད་ཀྱི་སྦྱོར་བ་དང་པོ་ནས་མི་འཇུག་པས་པྲསྟཱ་ར་སྤེལ་མ་དང་ནཥྚ་བརྟགས་པ་སོགས་མེད་ལ་ཛ་ཏཱི་རྣམས་ཀྱང་དེ་དང་འདྲའོ། །ཛ་ཏཱིའི་སྐབས་སུ་ཡང་བ་ཕྱི་མོར་རེ་རེ་དང་། ལྕི་བ་ཕྱི་མོ་གཉིས་རེ་བྱས་ནས་ཚིགས་སུ་བཅད་པ་ལ་བྲྀཏྟའི་སྐབས་བྷ་ཞེས་བརྡའ་བྱས་པས་ཐོག་མ་ལྕི་བ་དང་། ཛ་ཞེས་བརྡའ་བྱས་པ་དབུས་ལྕི་བ་དང་། ས་ཞེས་བརྡའ་བྱས་པ་མཐའ་ལྕི་བ་སྟེ་ཡང་བ་གཉིས་དང་ལྕི་བ་གཅིག་ཚོགས་པ་དེ་བཞིན་དུ་ལྕི་བ་གཉིས་ཚོགས་པ། ཡང་བ་བཞི་ཚོགས་པ་དེ་རྣམས་གང་ཡིན་ཡང་ཕྱི་མོ་བཞི་རེར་འདྲ་བས། ཙ་ཏུར་གྱི་མིང་ཐོག་བཟུང་ནས་ཙ་ཞེས་བྱ་སྟེ་ཙ་ཚོགས་ལྔ་ལས་ཡང་བ་བཞི་ཚོགས་པ་ལ་ནི་ཙ་ཞེས་པར་མ་ཟད་རེས་འགའ་ཁ་ཞེས་ཀྱང་བརྗོད་དོ། །དེ་བཞིན་དུ་ཡང་བ་གཅིག་ནི། ཕྱི་མོ་གཅིག་པ་སྟེ་ཨེ་ཀའི་མིང་མཐའ་ནས་བཟུང་ཀ་ཞེས་བྱ། ཡང་བ་གཉིས་དང་ལྕི་བ་གཅིག་ནི་ཕྱི་མོ་གཉིས་པ་སྟེ་དྭིའི་མིང་ཐོག་བཟུང་ནས་ད་ཞེས་བྱ། དེ་ལྟར་ཚོགས་སུ་བཅད་ནས་གཞུང་དང་མཐུན་པར་བསྒྲིགས་ལ་ངལ་གསོ་ལ་སོགས་པའང་སྐབས་དང་སྦྱར། ངོ་མཚར་བའི་སྦྱོར་བ་རྣམ་གྲངས་བདུན་ཡོད་པ་ལས། དང་པོ་དྲུག་མཉམ་པའི་བྲྀཏྟ་རྣམས་ལ་རྟོགས་བྱེད་དང་། ཕྱི་མ་གཅིག་བྲྀཏྟ་ཛཱ་ཏི་ཐམས་ཅད་ལ་རྟོགས་བྱེད་དུ་འགྱུར་བ་ལས། དང་པོ་དྲུག་ལས་དང་པོའི་པྲསྟཱར་ནི། བྲྀཏྟའི་དང་པོ་ཐམས་ཅད་ལྕི། །ལྕི་གཙོའི་འོག་ཡང་ཕྱི་རྣམས་འདྲ། །སྔ་མར་ལྕི་འདི་པྲསྟཱ་ར། ། ཇི་སྲིད་ཐམས་ཅད་ཡང་དེ་སྲིད། །དམར་སེར་ཅན་གྱི་པྲ་སྟཱརའོ། །ཞེས་པ་འདི་གཞན་ལུགས་བཀོད་པ་སྟེ། དང་པོ་ཐམས་ཅད་ལྕི་བ་དང་། དེ་ནས་ལྕི་བ་གཙོ་བོ་སྟེ་དང་པོ་དེའི་འོག་ཏུ་ཡང་བ་དང་། ཕྱི་མ་རྣམས་སྔ་མ་འདྲ་བ་དང་། དེ་ནས་སྔ་མར་ལྕི་བས། དེ་ནས་ཡང་བ་དང་གཞན་རྣམས་འདྲ་བ་སོགས། རིམ་པར་འདྲ་བ་སོགས་ཇི་སྲིད་པྲསྟཱ་ར་ཐམས་ཅད་ཡང་བར་མ་གྱུར་པ་དེ་སྲིད་དུ་བྲི་བར་བྱ་སྟེ་ཤིན་ཏུ་རྟོགས་དཀའ་བཤད་ཅིང་དེང་སང་འདི་ལ་པྲསྟཱ་ར་འོག་མ་འགོད་ཚུལ་དང་འདྲ་བ་ཞིག་ལས་མ་བཤད་ཡང་། བརྟགས་ན་དམར་སེར་ཅན་གྱི་སྡེབ་སྦྱོར་ལ་ངོ་མཚར་བའི་སྦྱོར་བ་རྣམས་མ་བཤད་པར་ཁྱད་ཆོས་ཀྱི་སྐབས་སུ་བཤད་ཅིང་སྐབས་འདིར་ཡང་པྲསྟ་ར་དང་ཡང་བའི་བྱ་བ་གཉིས་ལ་དམར་སེར་ཅན་གྱི་ལུགས་བཤད་ནས་གཞན་མ་བསྟན་པས་ཡང་བའི་རྣམ་གྲངས་ཙམ་ལས་བརྟགས་ནས་པྲསྟཱ་ར་བཀོད་ན་ཡང་བའི་བྱ་བ་མ་གཏོགས་ངོ་མཚར་བའི་སྦྱོར་བ་གཞན་མི་འཇུག་ཅིང་རྟོགས་དཀའ་བ་ཞིག་ཡོད་འདུག་པ་འདི་ཡིན་ནམ་སྙམ་སྟེ་ད་དུང་བརྟགས་པར་བྱའོ། །སྟེང་ལྕི་འོག་ཡང་པྲསྟཱ་ར་ལ་འཕྲེང་། །ཉིས་འགྱུར་རིང་པོར་སྡེབ་སྦྱོར་སོ་སོ་སྟེ། །ལྕི་དང་ཡང་བའི་ཉིས་འགྱུར་ཚོགས་རྣམས་ཀྱིས། །རིམ་པ་བཞིན་དུ་རེ་རེ་སྤེལ་བར་བྱ། །ཞེས་པ་འདི་ཤཱནྟི་པའི་པྲསྟཱ་སྟེ། སྟེང་ལྕི་ཞིང་འོག་ཡང་བ་ནི་ཡི་གེ་གཅིག་པའི་སྡེབ་སྦྱོར་ཡིན་ལ། དེ་ནས་ཡི་གེ་གཉིས་པ་ལ་ལྕི་བ་གཉིས་དང་ཡང་བ་གཉིས། ཡི་གེ་གསུམ་པ་ལ་ལྕི་བ་བཞི་དང་ཡང་བ་བཞི་སོགས་ཉིས་འགྱུར་ཉིས་འགྱུར་གྱིས་རིང་པོར་བྱ་ཞིང་། མ་རྫོགས་པར་སྤེལ་བ་ཡིན། འདིའི་འགོད་ཚུལ་ཡི་གེ་དྲུག་པའི་སྡེབ་སྦྱོར་ལྟ་བུ་ལ་མཚོན་ནས་འདིར་བརྗོད་ན། གཅིག་གཉིས་བཞི་བརྒྱད་བཅུ་དྲུག་སོ་གཉིས་སོགས་ཡི་གེའི་གྲངས་བར་ཉིས་འགྱུར་ཨངྐི་བྲི། ཨདྐིའི་གྲངས་མཉམ་ལྕི་ཡང་ཐུར་དུ་སྤེལ། །ཐམས་ཅད་ཡང་གྱུར་པྲསྟཱ་རྫོགས་པའི་ཚད། །གཉིས་པ་ནཥྚ་བརྟགས་པ་ནི། འདི་འདྲ་འདི་ལྟ་ཞེས་བྱ་ཅི། །དེ་བཀོད་འབྲས་ལ་འདབ་མ་བྱ། །མི་མཉམ་གཅིག་བཅས་འདབ་མ་ལྕི། །འདིར་མཉམ་ཡང་འབྲས་ནཥྚའོ། །ཞེས་པ་སྟེ། དཔེར་ན་ཡི་གེ་དྲུག་པའི་ནང་གསེས་བཅུ་གསུམ་པའི་ལྕི་ཡང་འགོད་ཚུལ་ཇི་ལྟར་ཡིན་ཞེས་བརྟགས་པ་ལ། འདིར་མི་མཉམ་པའི་པྲསྟཱ་ཡིན་པས་འདི་འདྲ་བའི་གྲངས་བཅུ་གསུམ་འདི་ལྟ་བུ་མི་མཉམ་པ་ཡིན་པས་དང་པོར་ལྕི་བ་གཅིག །དེ་ལ་གཅིག་བསྣན་ནས་འདབ་མར་བྱ་བ་སྟེ་ཕྱེད་དུ་བཅད་པས་བདུན་བྱུང་བ་མི་མཉམ་པ་ཡིན་པས་ལྕི་བ་གཅིག་བྲི། དེ་ལ་གཅིག་བསྣན་པ་ཕྱེད་དུ་བཅད་པས་བཞི་བྱུང་བ་མཉམ་པར་འདུག་པས་ཡང་བ་གཅིག་བྲི། དེ་ལ་སྣོན་མི་དགོས་པར་ཕྱེད་དུ་བཅད་པས་མཉམ་པས་ཡང་བ་གཅིག་བྲི། གཉིས་ཕྱེད་དུ་བཅད་པ་གཅིག་ཡིན་པ་མི་མཉམ་པས་ལྕི་བ་གཅིག་བྲི། དེ་ལ་གཅིག་བསྣན་པས་གཉིས་ཡིན་ལ། དེ་ཕྱེད་དུ་བཅད་པས་གཅིག་བྱུང་བ་མི་མཉམ་པས་ལྕི་བ་བྲི་སྟེ། དེ་ལྟར་ན་འདི་ལྟ་བུའི་པྲསྟཱར་བྱུང་བ་ནི་འབྲས་བུ་ཡིན་ཏེ་ནཥྚཱའོ། །གང་བརྟག་འདོད་པའི་གྲངས་དེ་ཉིད་གཉིས་ཀྱིས་ཡི་གེའི་གྲངས་བར་བགོ །ལྷག་མ་བྱུང་ན་ནོར་ལ་བསྣན། །ལྷག་བཅས་ཡང་ལ་ལྷག་མེད་ལྕི། །གསུམ་པ་ཨུདྷུཥྛ་ནི། བྲྀཏྟ་འདི་ནི་དུ་བ་ཡིན་ཞེས་འདིར་སོགས་ཏེ། དང་པོ་ཡི་གེ་དྲུག་པའི་དབུས་ཕྲ་ལྟ་བུ་ལ་འདི་པྲསྟཱ་ར་དུ་པ་ཡིན་ཞེས་འདྲི་ན་ལྕི་ཡང་འདི་ལྟར་བཀོད་ནས་སྟེང་དུ་གཅིག་གཉིས་བཞི་བརྒྱད་སོགས་ཉིས་འགྱུར་གྱི་ཨངྐི་སྔར་ལྟར་བཀོད་ནས་ཡང་བ་དུ་ཡོད་ཀྱི་སྟེང་གི་ཨངྐི་རྣམས་བསྡོམས་པས་དེ་ལ་གཅིག་སྣོན་པ་སྟེ། འདིར་ཡང་བ་གཉིས་ཀྱི་སྟེང་གི་བཞི་དང་བརྒྱད་བསྡོམས་ནས་གཅིག་བསྣན་པས་བཅུ་གསུམ་བྱུང་བ་ལྟ་བུའོ། །ལྕི་ཡང་པྲསྟཱ་རིམ་པར་བཀོད། །སྟེང་དུ་གཅིག་གཉིས་བཞི་སོགས་བྲི། །ལྕི་སྟེང་ཀུན་དོར་ཡང་སྟེང་བསྡོམས། །དེ་ལ་གཅིག་བསྣན་དེ་ཡི་གྲངས། །བཞི་བ་ཡང་བའི་བྱ་བ་ལ་གཉིས་ལས་དང་པོ་དམར་སེར་ཅན་གྱི་ཡང་བའི་བྱ་བ་ནི། གཟུགས་བཀོད་ཡི་གེའི་གྲངས་ཀྱིས་བསླང་བ་སོགས་དེ་ཡི་གེ་བཞི་པ་ལྟ་བུ་ལ་མཚོན་ན། དང་པོ་གཟུགས་གཅིག་བཀོད་ནས་དེའི་འོག་ཏུ་ཡི་གེའི་གྲངས་ཀྱི་གཟུགས་བསླང་བ་སྟེ་སྟེང་ནས་སྟེང་དུ་བརྩེགས་མར་གཟུགས་བཞི་བྲིས་པས་གཅིག་ཡིག་ལྔ་བྱུང་། དེའི་གཅིག་ཡིག་སྟེང་མ་ལ་གཅིག་པོ་དོར་ཞེས་ལོངས་པའི་མཚན་མ་བྱ། དེ་ནས་རིམ་པས་མས་ནས་ཡར་རང་རང་མ་བསུབས་པར་གོང་མ་གོང་མར་བསྣན་པས་བཞི་ལོངས་པ་ལ་མཚན་མ་བྱས་པས་འདི་ལྟ་བུ་ཞིག་འབྱུང་། དེ་ནས་ཡང་མ་ལངས་པ་རྣམས་རང་གནས་མ་དོར་བར་གོང་མ་གོང་མར་བསྲེས་པས་དྲུག་ལངས་ཏེ་མཚན་མ་བྱ། དེ་ནས་འོག་གི་གཅིག་མ་བསུབས་པར་གཅིག་དང་གསུམ་བསྲེས་བཞི་བྱས་པས། བཞི་ལོང་བ་ལ་མཚན་མ་བྱས་པའི་ཡི་གེ་བཞི་པའི་སྡེབ་སྦྱོར་འདི་ལ་ཡང་བ་མེད་པ་གཅིག །གཅིག་ཡང་བ་བཞི། གཉིས་ཡང་བ་དྲུག །གསུམ་ཡང་བ་བཞི། བཞི་ཀ་ཡང་བ་གཅིག་ཡོད་པར་རྟོགས་སོ། །ཡི་གེའི་གྲངས་ཀྱི་གཟུགས་བརྩེགས་ལ། །སྟེང་དུ་གཅིག་བྲི་དོར་རྟགས་བྱ། །འོག་མ་ལ་གནས་མ་དོར་བར། །གོང་མ་གོང་མར་རིམ་བཞིན་བསྲེ། །ལོངས་རྣམས་རིམ་དོར་མ་ལོངས་བསྐྱེད། །ཡང་མེད་ལ་སོགས་སྟེང་ནས་རིམ། ། གཉིས་པ་ཤཱནྟི་པའི་ཡང་བའི་བྱ་བ་ནི། གཟུགས་ནི་དང་པོར་མ་བྱས་ཀྱང་། །སོགས་ཏེ་ཡི་གེའི་གྲངས་ཀྱི་གཟུགས་བསླང་བ་མ་བྱས་ཀྱང་རུང་ལ་གཅིག་ཡིག་གཅིག་བྲིས་པའི་འོག་ཏུ་གཅིག་གཉིས་གསུམ་བཞི་སོགས་སྟེང་ནས་སྟེང་དུ་བརྩེགས་མར་བྲིས་ལ་སྟེང་མ་ལོངས་པའི་མཚན་མ་བྱ། ལྷག་མ་རྣམས་བསྲེ་ཚུལ་སྔ་མ་ལྟར་བྱས་ཀྱང་འཐུས། ཡང་ན་གཅིག་ཡིག་གཉིས་བྲིས་པའི་ཡི་གེ་གཅིག་པའི་སྡེབ་སྦྱོར། དེ་གཉིས་ཀྱི་བར་དུ་གཉིས་ཡིག་བྲིས་པ་ཡི་གེ་གཉིས་པའི་སྡེབ་སྦྱོར། དེ་གཉིས་སྟེང་དུ་གསུམ་བྲིས་ནས་འོག་མ་གཅིག་དང་གཉིས་བསྲེས་གསུམ་བྱས་པ་ཡི་གེ་གསུམ་པའི་སྡེབ་སྦྱོར། ཡང་དེའི་སྟེང་དུ་བཞི་བྲིས་ནས་འོག་མ་རྣམས་གསུམ་དང་གསུམ་བསྲེས་དྲུག །གཅིག་དང་གསུམ་བསྲེས་བཞི་བྱས་པ་ཡི་གེ་བཞི་བའི་སྡེབ་སྦྱོར་སོགས་སོ། །ཡི་གེའི་གྲངས་བརྩེགས་སྟེང་དུ་གཟུགས། །གཟུགས་དང་གྲངས་ལོངས་ལྷག་མ་རྣམས། །རང་འོག་རིམ་བསྲེས་ལོངས་རྣམས་དོར། །ཡང་ན་ཡི་གེ་གཅིག་པ་ནས། ། རིམ་བྲི་རང་གྲངས་སྟེང་དུ་བྲི། །རང་འོག་རྣམས་བརྒྱན་ལོངས་ཚེ་དོར། །ལྔ་བ་གྲངས་བརྟགས་པ་ནི། བྲྀཏྟ་རྣམས་ཀྱི་གྲངས་ནི་གཟུགས། །ཟུང་གིས་ཡི་གེའི་གྲངས་སུ་བསྒྱུར། ། ཨུདྡྷིཥྛ་ཡི་ཨངྐའི་མཐའ། །ཉིས་འགྱུར་ཡང་བའི་བྱ་བ་བསྡུ། །ཞེས་པ་སྟེ། འདི་ལ་རྟོགས་བྱེད་གསུམ་ལས། དང་པོ་གཟུགས་ཡིག་ཞིག་བྲིས་ལ། དེ་གཉིས་ཀྱི་ལན་ཡི་གེའི་གྲངས་སུ་བསྒྱུར་བ་སྟེ། ཡི་གེ་གཅིག་པ་ལ་ལན་གཅིག །གཉིས་པ་ལ་གཉིས། གསུམ་པ་ལ་གསུམ་སོགས་བསྒྱུར་བ་སྟེ་རྟོགས་བྱེད་གཅིག །གཉིས་པ་ཨུདྷི་ཥྛ་སྐབས་སུ་གཅིག་གཉིས་བཞི་བརྒྱད་སོགས་རིམ་པར་བྲིས་པའི་ཨངྐི་རྗེས་མ་ཉིས་འགྱུར་དུ་བྱས་པ་སྟེ། དཔེར་ན་ཡི་གེ་བཞི་བ་ལ་མཐའི་ཨངྐི་བརྒྱད་ཉིས་འགྱུར་དུ་བྱས་པས་བཅུ་དྲུག་འབྱུང་བ་ལྟ་བུའོ། །གསུམ་པ་ཡང་བར་བྱ་བའི་སྐབས་ཀྱི་ཡང་མེད་ལ་སོགས་པའི་གྲངས་རྣམས་བསྡུས་པ་སྟེ་ཡི་གེ་བཞི་བ་ལ་གཅིག་བཞི་དྲུག་བཞི་གཅིག་རྣམས་བསྲེས་པས་བཅུ་དྲུག་འབྱུང་བ་ལྟ་བུའོ། །ཡི་གེ་ལྕི་ཡང་ཕྱི་མོ་རྣམས་ཀྱི་གྲངས་རྟོགས་བྱེད་ནི། །དང་པོ་སྤྱིར་རྣམ་གྲངས་དུ་ཡོད་པ་ཡི་གེའི་གྲངས་ཀྱིས་བསྒྱུར་བ་ཡི་གེ་སྟེ། དཔེར་ན་ཡི་གེ་བཞི་བཞི་བ་ལ་རྣམ་གྲངས་བཅུ་དྲུག་ཉིད་ཡི་གེ་བཞིས་བསྒྱུར་བས་དྲུག་ཅུ་རྩ་བཞི་འབྱུང་བ་ལྟ་བུ། གཉིས་པ་ཡི་གེའི་གྲངས་དེ་ཉིད་གཉིས་ཀྱིས་བགོས་པས་ལྕི་ཡང་རེ་རེའི་གྲངས་ཏེ་དཔེར་ན་ཡི་གེ་བཞི་པ་ལ་ཡིག་གྲངས་དྲུག་ཅུ་རྩ་བཞི། དེ་ཉིད་གཉིས་ཀྱིས་བགོས་པས་སུམ་ཅུ་རྩ་གཉིས་འབྱུང་བ། ཡང་བ་སོ་གཉིས་དང་ལྕི་བ་སོ་གཉིས་རེ་ཡོད་པ་ལྟ་བུའོ། །གསུམ་པ་ཡི་གེའི་རྣམ་གྲངས་དང་ལྕི་ཡང་གི་གྲངས་གཉིས་ཀ་བསྡོམས་པ་ཕྱི་མོའི་གྲངས་ཏེ་དཔེར་ན་དྲུག་ཅུ་རྩ་བཞི་དང་སུམ་ཅུ་རྩ་གཉིས་པ་བསྡོམས་པས་དགུ་བཅུ་རྩ་དྲུག་འབྱུང་བ་ལྟ་བུའོ། །དྲུག་པ་ཨ་ངྷྭ་ནི་པྲསྟཱར་བཀོད་པའི་ཕྲེད་དང་འོག་ཏུ་ཆུ་ཞེང་ཅི་ཙམ་ཡོད་བརྟག་པ་སྟེ་འཕྲེད་དུ་ཅི་ཙམ་ཡོད་བརྟག་ལ་ཡི་གེའི་གྲངས་གཉིས་ཀྱིས་བསྒྱུར་ཏེ་གཅིག་འཕྲི་བ་དཔེར་ན་ཡི་གེ་བཞི་བ་ལ་བཞི་གཉིས་ཀྱིས་བསྒྱུར་བས་བརྒྱད་བྱུང་བ་ལ་གཅིག་འཕྲི་བས་བདུན་བྱུང་བ་ལྟ་བུའོ། །འོག་ཏུ་བྲྀཏྟ་དུ་ཡོད་གཉིས་ཀྱིས་བསྒྱུར་ནས་གཅིག་ཕྲི་བ་དཔེར་ན་བྲྀཏྟ་བཅུ་དྲུག་ཉིད་གཉིས་ཀྱིས་བསྒྱུར་ནས་གཅིག་ཕྲི་བས་སོ་གཅིག་འབྱུང་བ་ལྟ་བུའོ། །དེ་ཡན་ཆད་དྲུག་ནི་བྲྀཏྟ་རྣམས་ལ་རྟོགས་བྱེད་ཡིན་ལ་ཕྱི་མ་བྲྀཏྟ་དང་ཛ་ཏཱི་ཐམས་ཅད་ལ་རྟོགས་བྱེད་དུ་འགྱུར་བ་ནི་གཅིག་སྟེ། འདི་ལ་ལྕི་བ་རྟོགས་བྱེད་ཡང་རྟོགས་བྱེད་ཡི་གེ་རྟོགས་བྱེད་ཕྱི་མོ་རྟོགས་བྱེད་དང་བཞིའི་རེ་རེ་ལ་ཡང་གསུམ་རེ་སྟེ། དང་པོ་ལྕི་བ་རྟོགས་བྱེད་གསུམ་ནི། དཔེར་ན་ཡི་གེ་དྲུག་པའི་དབུས་ཕྲ་ལྟ་བུ་ལ་ཤློ་ཀ་གཅིག་ལ་ཡི་གེ་ཉེར་བཞི། ཡང་བ་བརྒྱད། ཕྱི་མོ་བཞི་བཅུ་ཡོད་པ་ལས་ཡང་བ་བརྒྱད་ཀྱིས་ཡི་གེ་ལ་ཕྲི་བའི་ལྷག་མ་ལྕི་བ་དང་། ཡང་ན་ཕྱི་མོ་བཞི་བཅུའི་ནང་ནས་ཡང་བ་བརྒྱད་དོར་ལྷག་སོ་གཉིས་འབྱུང་བ་གཉིས་ཀྱིས་བགོས་པའི་ནོར་དང་། ཡང་ན་ཕྱི་མ་བཞི་བཅུའི་ནང་ནས་ཡི་གེ་ཉེར་བཞི་ཕྲི་ལྷག་གསུམ་ཀ་བཅུ་དྲུག་རེ་འབྱུང་བས་ན་ལྕི་བའི་གྲངས་ཡིན་ཏེ་ལྕི་བ་རྟོགས་བྱེད་གསུམ། ཡང་བ་རྟོགས་བྱེད་གསུམ་ནི། ལྕི་བ་ཉིས་འགྱུར་སོགས་སྟེ། ལྕི་བ་ཉིས་འགྱུར་དུ་བྱས་པ་སོ་གཉིས་ཀྱིས་ཕྱི་མོ་བཞི་བཅུ་ལ་ཕྲི་ལྷག་བརྒྱད། ཡི་གེ་ཉེར་བཞི་ཉིས་འགྱུར་ཞེ་བརྒྱད་ལ་ཕྱི་མོ་བཞི་བཅུ་ཕྲི་ལྷག་ཀྱང་བརྒྱད། ཡི་གེ་ཉེར་བཞི་ལ་ལྕི་བ་བཅུ་དྲུག་གིས་ཕྲི་ལྷག་ཀྱང་བརྒྱད་ཡིན་པ་སྟེ། ཡང་བ་རྟོགས་བྱེད་གསུམ། ལྕི་བ་དྲུག་དང་ཡང་བ་བརྒྱད་བསྡོམས་པ་ཉེར་བཞི་དང་། ཕྱི་མོ་བཞི་བཅུ་ལས་ལྕི་བ་བཅུ་དྲུག་ཕྲི་ལྷག་ཀྱང་ཉེར་བཞི། ཕྱི་མོ་བཞི་བཅུ་དང་ཡང་བ་བརྒྱད་བསྡོམས་ཏེ་ཕྱེད་དུ་བཅད་པ་ཡང་ཉེར་བཞི་སྟེ་ཡི་གེ་རྟོགས་བྱེད་གསུམ། ལྕི་བ་ཉིས་འགྱུར་སོ་གཉིས་ལ་ཡང་བ་བརྒྱད་བསྲེས་པས་བཞི་བཅུ་དང་ཡི་གེ་ཉིས་འགྱུར་ཞེ་བརྒྱད་ལས་ཡང་བ་བརྒྱད་དོར་ལྷག་ཀྱང་བཞི་བཅུ། ཡི་གེ་ཉེར་བཞི་ལ་ལྕི་བ་བཅུ་དྲུག་བསྲེས་པ་ཡང་བཞི་བཅུ་སྟེ་ཕྱི་མོ་རྟོགས་བྱེད་གསུམ་མོ། །དེ་ལྟར་ངོ་མཚར་བའི་སྦྱོར་བ་དག་གིས་ལེགས་པར་བརྟགས་ནས་སྡེབ་སྦྱོར་གྱི་ཁ་བྱང་རྒྱས་པར་འདེབས་པ་དཔེར་ན་དབུས་ཕྲ་ལྟ་བུ་ལ་མཚོན་ན། སྡེབ་སྦྱོར་མཉམ་པའི་བྲྀཏྟ་ཡི་གེ་དྲུག་པ་ལ་སྤྱིར་རྣམ་གྲངས་དྲུག་ཅུ་རྩ་བཞི། ཡི་གེ་སུམ་བརྒྱ་དང་བརྒྱད་ཅུ་རྩ་བཞི། ལྕི་ཡང་སོ་སོར་བརྒྱ་གོ་གཉིས་རེ། ཕྱི་མོ་ལྔ་བརྒྱ་དང་བདུན་ཅུ་རྩ་དྲུག །ཨ་དྷཱ་ཕྲེད་དུ་བཅུ་གཅིག །འོག་ཏུ་བརྒྱ་ཉེར་བདུན་འགྲོ་བས་ནང་གསེས་ཡང་བ་མེད་པ་གཅིག །གཅིག་ཡང་བ་དྲུག །གཉིས་ཡང་བ་བཅོ་ལྔ། གསུམ་ཡང་བ་ཉི་ཤུ། བཞི་ཡང་བ་བཅོ་ལྔ། ལྔ་ཡང་བ་དྲུག །ཐམས་ཅད་ཡང་བ་གཅིག་རྣམས་ཡོད་པ་ལས་བྱེ་བྲག་རྣམ་གྲངས་བཅུ་གསུམ་པ་གཉིས་ཡང་བའི་མཚམས་ནས་ཟིན་ཅིང་། ཤློ་ཀ་གཅིག་ལ་ལྕི་བ་བཅུ་དྲུག །

ཡང་བ་བརྒྱད། ཡི་གེ་ཉི་ཤུ་རྩ་བཞི། ཕྱི་མོ་བཞི་བཅུ་ཡོད་པ་དབུས་ཕྲ་ཞེས་བྱ་བའི་པྲསྟཱ་རས་མཛེས་པར་སྤྲས་པའམ། དེ་ལས་ཅུང་ཟད་བསྡུས་ན་ཡང་བའི་རྣམ་གྲངས་དོར་བ་དང་། དེ་ལས་ཀྱང་བསྡུས་ན། སྡེབ་སྦྱོར་རྐང་བཞི་མཉམ་པའི་བྲིཏྟ་ཡི་གེ་དྲུག་པ་དབྱངས་སྒྲོགས་ལ་སྤྱིར་རྣམ་གྲངས་དྲུག་ཅུ་རྩ་བཞི་ཡོད་པ་ལས་བྱེ་བྲག་བཅུ་གསུམ་པ་དབུས་ཕྲའི་པྲསྟྲ་རའོ་ཞེས་པ་ལྟ་བུ་ཅི་རིགས་འགོད་པར་བྱའོ། །ཡང་ཡི་གེ་བཅུ་གཅིག་པའི་སྐབས་སུ་ཉེར་བསྐྱེད་བརྟག་པའི་ཚིགས་སུ་བཅད་པ། ཉེར་བསྐྱེད་ཉེ་བར་བརྟག་པའི་ཕྱིར། །གཅིག་གཉིས་བཞི་བརྒྱད་ཨངྐིའི་འོག །ཨི་ཡིག་བཞི་བྲིས་དེ་འོག་ཏུ། །ཨང་གྲངས་དང་མཚུངས་ཨི་དང་ཨུ། །མཐའ་དག་ཨུ་ཡིག་གྱུར་བར་སྤེལ། །ཨི་ཡིག་ཨིནྡྲ་བཛྲ་སྟེ། །ཨུ་ཡིག་ཨུ་མིནྡྲ་བཛྲ། །བར་རྣམས་ཉེར་བསྐྱེད་བཅུ་བཞིའོ། །ཤུབྷཾ། དཔལ་སྤྲུལ་པས་སོ།། །།