JKW-KABUM-09-TA-001-008

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 8, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

སྒྲོལ་དཀར་ཡིད་བཞིན་འཁོར་ལོ་ཐུན་མོང་མ་ཡིན་པའི་སྒྲུབ་ཅིང་མཆོད་པའི་ཆོ་ག་འཆི་མེད་བདུད་རྩིའི་རོལ་མཚོ། ༄༅། །སྒྲོལ་དཀར་ཡིད་བཞིན་འཁོར་ལོ་ཐུན་མོང་མ་ཡིན་པའི་སྒྲུབ་ཅིང་མཆོད་པའི་ཆོ་ག་འཆི་མེད་བདུད་རྩིའི་རོལ་མཚོ་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ འཆི་མེད་རྟག་པ་དམ་པའི་སྣང་བ་ཡིས། །འཆི་མེད་ཚེ་དང་ཡེ་ཤེས་སྦྱིན་མཛད་པ། །འཆི་མེད་འཕགས་མ་ཡིད་བཞིན་འཁོར་ལོ་ཡིས། །འཆི་མེད་གྲུབ་པའི་དགའ་སྟོན་མཆོག་སྩོལ་ཅིག །གང་དེའི་ཐུན་མོང་མ་ཡིན་པའི། །སྒྲུབ་ཅིང་མཆོད་པའི་ཟླ་ཤེལ་ནི། །ཕུན་ཚོགས་ཚེ་དང་བློ་གྲོས་ཀྱི། །བདུད་རྩིའི་རོལ་མཚོ་རྒྱས་ཕྱིར་འཆར། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། ཐུན་མོང་མ་ཡིན་པའི་རྗེས་སུ་གནང་བ་དང་མན་ངག་གི་རྒྱུན་ལེགས་པར་ཐོབ་ཅིང་དམ་ཚིག་དང་སྡོམ་པར་ལྡན་པའི་གང་ཟག་གིས་རང་གཞན་གྱི་ཕན་བདེའི་དགའ་སྟོན་སྤེལ་བའི་སླད་དུ་གནས་གཙང་ཞིང་ཡིད་དང་མཐུན་པར་རྗེ་བཙུན་མའི་སྐུ་བརྙན་བྲིས་འབུར་གང་རིགས་ཀྱི་མདུན། སྟེགས་བུ་ཁེབས་ལྡན་གྱི་དབུས་སུ་མཎྜ་ལར་རྡུལ་ཚོན་གྱིས་པདྨ་དཀར་པོ་འདབ་མ་བརྒྱད་པ་བྲིས་པའི་ལྟེ་བ་ཟླ་གདན་ལ་ཚོམ་བུ་དཀར་པོ་གཅིག་བཀོད། དེའི་གཡས་སུ་རིན་པོ་ཆེའི་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པ། གཡོན་དུ་རྗེ་བཙུན་མར་འབུལ་གཏོར་དཀར་ཟླུམ། མདུན་དུ་བྱང་ཤར་ནས་བརྩམས་ཏེ་གཏོར་མ་ཆ་གསུམ་དང་། །ཆུ་གཉིས་སྔོན་འགྲོའི་ཉེར་སྤྱོད་གཡས་སྐོར། རང་གི་མདུན་དུ་རྡོར་དྲིལ་མེ་ཏོག་གི་སྣོད་སོགས་སྟ་གོན་བྱ། གཉིས་པ་ལ་གསུམ་ལས། དང་པོ་བདག་བསྐྱེད་ནི། ཁྲུས་དང་གཙང་སྦྲའི་ཀུན་སྤྱོད་ལ་གནས་པས་སྟན་བདེ་བ་ལ་འདུག་སྟེ། ཐོག་མར་མདུན་གྱི་ནམ་མཁར་རྩ་བརྒྱུད་ཀྱི་བླ་མ་རྣམས་ལམ་གྱིས་གསལ་བཏབ་ནས། །དེ་དག་གི་གསང་གསུམ་གྱི་ཡོན་ཏན་ཡིད་ལ་དྲན་བཞིན་དུ་བརྒྱུད་པའི་གསོལ་འདེབས་ལམ་རིམ་གྱི་སྨོན་ལམ་དང་བཅས་པ་བྱ། དེ་ནས་མཆོད་པ་རྣམས། ཨོཾ་བཛྲ་ཡཀྵ་ཧཱུྃ་གིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། །མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་སྦྱར་བས་བྱིན་གྱིས་བརླབ། དྷརྨཱ་ར་ཎི་ཏ་རོལ་མོ་དང་བཅས་པ་ལན་གསུམ་གྱིས་བྱིན་དབབ་པ་སྔོན་དུ་འགྲོ་བས། སྐྱབས་འགྲོ་ནས་བརྩམས་ཏེ་ཐུན་མཚམས་ཀྱི་ལྷར་ལྡང་བའི་བར་འཇམ་མགོན་ཀུན་དགའ་བློ་གྲོས་ཀྱི་སྒྲུབ་ཐབས་ཇི་ལྟ་བ་བཞིན་ལ། བླ་མ་དང་སྦྱིན་བདག་སོགས་ཀྱི་ཆེད་དུ་ཡིན་ན་དམིགས་པའི་ཁྱད་པར། ཐུགས་སྲོག་ཏཱྃ་ཡིག་གི་ཀླད་ཀོར་ནང་དུ་བླ་མ། ཁོག་པར་བསྒྲུབ་བྱའི་གཙོ་བོ་དང་། མདུན་རྒྱབ་གཡས་གཡོན་སོགས་སུ་བསྒྲུབ་བྱ་གཞན་རྣམས་ངོ་བོ་དེ་ཀ་ཡིན་པ་ལ། རྣམ་པ་གཞོན་ཚུལ་ལང་ཚོ་རྒྱས་ཤིང་གོས་རྒྱན་སོགས་ཕུན་སུམ་ཚོགས་པར་བསྒོམ། ཚེ་བཅུད་བསྡུ་བསྟིམ་གྱི་དམིགས་པ་གྲུབ་ནས། ངོ་བོ་བསྒྲུབ་བྱ་ལ་རྣམ་པ་རྡོ་རྗེ་སྔོན་པོ་རྩེ་ལྔ་གྱེན་འགྲེང་ལྟེ་བར་ཧཱུྃ་སྔོན་པོས་མཚན་པ་རེ་རེར་གསལ་བཏབ། རང་དང་བསྒྲུབ་བྱའི་སེམས་གཉིས་ཀའི་ངོ་བོ་བློ་འདས་བརྗོད་བྲལ་དུ་ཤེས་པར་བྱས་ལ་འཛིན་མེད་དུ་འཇོག་གོ། །གཉིས་པ་མདུན་བསྐྱེད་སྒྲུབ་ཅིང་མཆོད་པ་ལའང་གསུམ་ལས། དང་པོ་ཚོམ་བུ་ལྷར་བསྐྱེད་ཅིང་བཟླས་པ་བྱ་བ་ནི། སྔར་ལྟར་བསང་སྦྱང་། སྟོང་པའི་ངང་ལས་པྃ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ཡིག་དཀར་པོ་ཞེས་པ་ནས། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པའི་བར་བདག་བསྐྱེད་བཞིན་ལ། རང་ཉིད་ཅེས་པའི་ཚིག་རྣམས་དོར། དེ་ནས་རྡོ་རྗེ་དྲིལ་བུ་སྤོས་བཅས་འཛིན་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །སོགས་ཤློ་ཀ་གསུམ་གྱི་མཐར། ཨོཾ་ཨཱཪྻཱ་ཏཱ་རེ་ས་པ་རི་ཝཱ་ར་ཨེ་ཧྱེ་ཧི། ཞེས་པས་སྤྱན་དྲངས་ཏེ་ནམ་མཁར་བཞུགས་པ་ལ། བཅོམ་ལྡན་འདིར་ནི་བྱོན་པ་ལེགས། །སོགས་ནས། འདི་ཉིད་དུ་ནི་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་ག་ག་ན་ས་མ་ཡེ་ཧཱུྃ་སྭཱ་ཧཱས་མཆོད་ཡོན་ཕུལ། ཇི་ལྟར་བལྟམས་པ་སོགས་ཀྱིས་སྐུ་ཁྲུས་གསོལ། བདག་དང་འགྲོ་ལ་སོགས་ནས། པདྨ་ཀ་མ་ལཱ་ཡ་སྟཱཾ་གྱིས་གདན་འབུལ། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་ཝིདྱའི་བར་གྱིས་མཆོད། ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུྃ། ཨོཾ་བཛྲ་སྥོ་ཊ་བྃ། ཨོཾ་བཛྲ་ཨཱ་བེ་ཤ་ཨཱཿ ཕྱག་རྒྱ་དང་བཅས་པས་དགུག་གཞུག་བཅིང་ཞིང་མཉེས་པར་བསམ། སླར་ཡང་ཐུགས་ཀའི་ཧཱུྃ་ལས་ནས། འོད་དཔག་མེད་ཀྱིས་དབུར་བརྒྱན་པར་བདག་བསྐྱེད་བཞིན་ལ། བདག་ལ་མངོན་པར་དབང་བསྐུར་བ་ཞེས་པའི་ཚབ་ཏུ། འདི་ལ་ཞེས་བསྒྱུར་བ་ཙམ་ཁྱད་པར་རོ། །དེ་ནས། ཨོཾ་ཨཱཪྻཱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤབྡའི་བར་གྱིས་མཆོད། འཁོར་བ་ལས་སྒྲོལ་སོགས་ཤློ་ཀ་གཅིག་གིས་བསྟོད། མདུན་བསྐྱེད་ཀྱི་ཐུགས་ཀར་ཟླ་བའི་རང་བཞིན་གྱི་འཁོར་ལོ་ནས། འོད་ཟེར་སྣ་ལྔའི་ཕྲེང་བ་གཡས་སྐོར་དུ་ཡོད་པ་ཞེས་པའི་བར་བདག་བསྐྱེད་བཞིན་ལ། དེ་ལས་འོད་ཟེར་འཕྲོས་པས་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་ཞི་བར་བྱས། ཚེ་དང་བསོད་ནམས་ཡེ་ཤེས་ལ་སོགས་པ་གོང་ནས་གོང་དུ་འཕེལ་ཞིང་རྒྱས་པར་གྱུར། ཅེས་བརྗོད་ཅིང་བསམས་ལ། སྔགས་ཡི་གེ་བཅུ་པ་སྤེལ་ཚིག་དང་བཅས་པ་ཅི་ནུས་བཟླ། ཚེ་སྒྲུབ་དམིགས་བསལ་བྱེད་ན། །སླར་ཡང་མདུན་བསྐྱེད་ཀྱི་སྤྱི་བོའི་བླ་མ་འོད་དཔག་མེད་ཡོངས་སུ་གྱུར་པ་ལས། མགོན་པོ་ཚེ་དཔག་མེད་ནས། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་ཐུགས་ཀའི་ཧྲཱིཿལས་འོད་ཟེར་ཕྱོགས་བཅུར་འཕྲོས་པས་སྣོད་བཅུད་འཁོར་འདས་ཀྱིས་བསྡུས་པའི་ཚེ་དང་བསོད་ནམས་ཡེ་ཤེས་ཐམས་ཅད་འོད་ཟེར་གྱི་རྣམ་པར་བསྡུས་ཏེ་ཕྱག་གི་བུམ་པའི་ནང་དུ་སོང་བས་འཆི་མེད་བདུད་རྩིའི་ཆུ་རྒྱུན་དུ་གྱུར། དེ་ཉིད་གྱེན་དུ་འཕྱུར་ཞིང་ཁ་ནས་ལུད་པ་དང་། རྗེ་བཙུན་མའི་ཐུགས་ཀའི་འཁོར་ལོ་སྔགས་ཕྲེང་དང་བཅས་པ་ལས་ཀྱང་འཆི་མེད་བདུད་རྩིའི་ཟིལ་དངར་གྱི་རྒྱུན་དང་། འོད་ཟེར་དཀར་པོ་སྔགས་ཀྱི་སྒྲ་སྒྲོགས་པའི་ཚོགས་དཔག་ཏུ་མེད་པ་འཕྲོས། འདི་སྐབས་བསྒྲུབ་བྱ་གསལ་འདེབས་ཚུལ་མདུན་བསྐྱེད་ཀྱི་ཐུགས་ཀར་བསྒོམ་ནའང་རུང་མོད། རང་དང་བསྒྲུབ་བྱའི་སྤྱི་བོ་ཚངས་པའི་བུ་ག་ནས་ཞུགས། ལུས་ཀྱི་ནང་ཐམས་ཅད་གང་བས་ནད་གདོན་སྡིག་སྒྲིབ་དུས་མ་ཡིན་པར་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་སྦྱངས། ཡིག་ཆ་གཞན་ལས་བདག་མདུན་གཉིས་ཀྱི་བར་དུ་ཟླ་བའི་གདན་ལ་བསྒྲུབ་བྱ་ཉིད་གོས་རྒྱན་གཟབ་འབྱོར་ཕུན་སུམ་ཚོགས་པས་མདུན་བསྐྱེད་ལ་གདོང་ཕྱོགས་ཏེ་གུས་པའི་ཚུལ་གྱིས་འཁོད་པར་བསམ་ཞེས་འབྱུང་བ་ལྟར་དམིགས་ཀྱང་ལེགས་ཤིང་། བུམ་བསྐྱེད་སྐབས་ཀྱང་དེ་གཉིས་གང་ལྟར་བྱས་ཀྱང་རུང་ངོ་། །འཆི་མེད་ཚེ་ཡི་དངོས་གྲུབ་ཐོབ། ལུས་ཀྱི་བ་སྤུའི་བུ་ག་ཚུན་ཆད་ཀྱང་བདུད་རྩིའི་ཟིལ་པ་ཕྲམ་མེར་ཡོད་པར་བསམས་ལ་སྔགས་བཟླ། འདིར་འོད་ཟེར་དྲུག་སྦྲགས་ཀྱི་དམིགས་པ་ཡོངས་རྫོགས་མདུན་བསྐྱེད་ལ་སྦྱར་བའི་ཚུལ་ཀྱང་སྣང་བ། དེ་ལྟར་ན། རང་གི་ཕྱི་རོལ་དུ་སོགས་ལ་མདུན་བསྐྱེད་ཀྱི་ཕྱི་རོལ་ཏུ་སོགས་དང་། མདུན་བསྐྱེད་ཀྱི་ཐུགས་ཀའི་སྔགས་ཕྲེང་ལས་འོད་དཀར་པོ་འཕྲོས་སོགས་དང་། རང་དང་བསྒྲུབ་བྱའི་ལུས་ཀྱི་ནང་ཐམས་ཅད་གང་། སོགས་ཀྱིས་ཚིག་གི་ཁ་བསྒྱུར་ཚུལ་རིགས་འགྲེ་སྦྱར་དགོས་པར་སྣང་ནའང་། ཞྭ་ལུ་པ་སོགས་ཀྱི་ཡིག་ཆར་དེ་ལྟ་བུའི་དམིགས་བསལ་མི་སྣང་བས་འདིར་མ་བྲིས་ལ། སྤྲོ་ན་འགལ་བ་མེད་པར་སེམས། ཨཱ་ལི་ཀཱ་ལི་ཡེ་དྷརྨཱ་ཡིག་བརྒྱ་རྣམས་ལན་གསུམ་རེས་ལྷག་ཆད་ཁ་བསྐང་ཞིང་དངོས་གྲུབ་བརྟན་པར་བྱ། མཐར་ཐལ་མོ་སྦྱར་ཏེ། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ་བོ། །གཉིས་པ་བུམ་བསྐྱེད་བཟླས་པ་དང་བཅས་པ་ནི་བུམ་པའི་སྟེང་དུ་དུང་ཆོས་དྲི་བཟང་གི་ཆུས་གང་བའི་སྟེང་རྡོ་རྗེ་ལ་གཟུངས་ཐག་བཏགས་པ་བཞག །བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་བཅིངས་ཤིང་། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་པྃ་ལས་པདྨ་དཀར་པོ་འདབ་མ་བརྒྱད་པ་ནས། འོད་དཔག་མེད་ཀྱིས་དབུར་བརྒྱན་ཞེས་པའི་བར་བདག་བསྐྱེད་བཞིན་ལ། རང་ཉིད་ཅེས་པའི་ཚིག་དོར། བདག་ལ་ཞེས་པའི་ཚབ་ཏུ་འདི་ལ་ཞེས་བསྒྱུར། གོང་བཞིན་མཆོད་ཅིང་བསྟོད་ལ། བུམ་ནང་གི་ལྷ་ཡི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་སོགས་ནས། གཡས་སྐོར་དུ་ཡོད་པ། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་བས་བུམ་ནང་གི་ལྷ་ཡི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ། ཐུགས་ཀའི་འཁོར་ལོ་སྔགས་ཕྲེང་དང་བཅས་པ་དང་། སྐུའི་ཆ་ཐམས་ཅད་ནས་ཀྱང་བདུད་རྩིའི་རྒྱུད་དཔག་ཏུ་མེད་པ་བབས་པས་བུམ་པ་གང་བར་བསམ་ཞིང་གཟུངས་ཐག་ནས་བཟུང་སྟེ། སྔགས་སྤེལ་ཚིག་ཅན་སྟོང་ཕྲག་སོགས་བཟླས་མཐར་གཟུངས་ཐག་བསྡུ། སྤྲོ་ན། སླར་ཡང་བུམ་པའི་ལྷ་ཡི་སྤྱི་བོའི་བླ་མ་འོད་དཔག་མེད་ཡོངས་སུ་གྱུར་པ་ལས། མགོན་པོ་ཚེ་དཔག་མེད་སོགས་གོང་བཞིན་ཚེ་བཅུད་བསྡུ་བསྟིམ་གྱི་དམིགས་བཟླས་ཀྱང་བྱ། ཡིག་བརྒྱ་དང་དབྱངས་གསལ་རྟེན་སྙིང་རྣམས་ཚར་གསུམ་རེའི་མཐར་གསོལ་བ་གདབ། གསུམ་པ་མདུན་བུམ་ཐུན་མོང་དུ་མཆོད་བསྟོད་དང་མདུན་བསྐྱེད་ལ་གཏོར་མ་འབུལ་བ་ནི་མར་མེ་ལ་སོགས་པ་སྦར་ནས། མཆོད་པ་རྣམས་བསང་སྦྱང་བྱིན་རླབས་གོང་བཞིན་ལ། ཐལ་མོ་སྦྱར་ཏེ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །འཕགས་མ་ཡིད་བཞིན་འཁོར་ལོ་དང་། །རྒྱལ་བ་སྲས་དང་བཅས་ལ་འབུལ། ཅི་བདེ་བར་ནི་བཞེས་ནས་ཀྱང་། །ཚེ་དང་ཡེ་ཤེས་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་ཨཱཪྻཱ་ཏཱ་རཱ་ས་པ་རི་ཝཱ་ར་ཨརྒྷྃ་པྲ་ཏཱི་ཙྪ་སྭཱ་ཧཱ། དེ་བཞིན་དུ་མཆོད་ཡོན་གྱི་གནས་སུ་ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དང་། ཨརྒྷཾ་གྱི་གནས་སུ་པཱདྱཾ་ནས། ཤབྡའི་བར་སྦྱར་བས་མཆོད་ཅིང་། དྷརྨཱ་ར་ཎི་ཏས་རོལ་མོ་དབུལ། སྤྲོ་ན་རྒྱལ་སྲིད་སྣ་བདུན་དང་། འདོད་ཡོན་ལྔ་རྣམས་སྤྱི་ལྟར་སྦྱར་བས་མཆོད། རྡོ་རྗེ་དྲིལ་བུ་འཛིན་པས། འཁོར་བ་ལས་སྒྲོལ་སོགས་ནས། །འཁོར་ལོ་ཅན་ལ་ཕྱག་འཚལ་ལོ། །ཞེས་པའི་བར་གྱིས་བསྟོད། བཅོམ་ལྡན་འདས་མས་སོགས་གསོལ་བ་གདབ། ཡི་གེ་ཞྭ་ལུ་མཁན་ཆེན་གྱིས་འདི་ལྟར་མཛད་སྣང་བ་རྗེས་གནང་སོགས་ཀྱི་ཚེ་འདི་ཁོ་ན་འཐད་ཅིང་། བརྒྱ་པ་ལན་གསུམ་གྱི་མཐར། ཨོཾ་ཨཱཿཧཱུྃ་གིས་མཆོད་ཡོན་ཕུལ་བའི་རྐྱེན་གྱིས་བུམ་པའི་ཡེ་ཤེས་པ་གཤེགས། དམ་ཚིག་པ་འོད་དུ་ཞུ་བ་ལས་བུམ་པའི་ཆུ་བདུད་རྩིའི་རང་བཞིན་དུ་གྱུར་པར་བསམས་གཞན་རྗེས་ཆོག་གི་བཟོད་གསོལ་རྗེས་སུ་ཕུལ་ཀྱང་ཆོག །ལ་དུང་ཆོས་ཀྱི་ཆུ་བུམ་ནང་དུ་ཕུལ། འདིར་ཡེ་ཤེས་པ་གཤེགས་བརྒྱུད་སྡེ་འོག་མ་སྤྱིར་བཏང་ལྟར་བྱས་ཀྱི། དཀོན་མཆོག་ལྷུན་གྲུབ་སོགས་ཀྱི་ཡིག་ཆར་དམ་ཡེ་དབྱེར་མེད་དུ་འོད་ཞུ་མཛད་པ་ལྟར་བྱས་ཀྱང་རུང་ངོ་། །གཏོར་མ་རྣམས་ཆབ་གཙང་མས་བྲན་ཏེ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཞུ་བ་ལས་བྱུང་བའི་གཏོར་མ་ལྷ་ཡི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ་གྱིས་བརླབ། གཏོར་མ་དང་པོ་ནམ་མཁའ་མཛོད་ཀྱི་ཕྱག་རྒྱ་དང་བཅས། ན་མསྶརྦ་བུདྡྷ་བོ་དྷི་སཏྭཱ་ནཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཧེ་ཧེ་བྷ་ག་ཝ་ཏཱི་མ་ཧཱ་ས་ཏྭ་སརྦ་བུདྡྷ་ཨ་བ་ལོ་ཀི་ཏེ། མཱ་བི་ལམྦ་མཱ་བི་ལམྦ། ཨི་དཾ་བ་ལིཾ་གྲྀཧྞཱ་པ་ཡ་གྲྀཧྞཱ་པ་ཡ། ཧཱུྃ་ཧཱུྃ་སརྦ་བི་སཉྩ་རེ་སྭཱ་ཧཱ། ལན་གསུམ་གྱིས་ཕུལ། མཚན་སྔགས་སྔོན་དུ་འགྲོ་བའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། ལྷ་དང་ལྷ་མིན་ཅོད་པན་གྱིས། །སོགས་ཤློ་ཀ་གཅིག་གིས་བསྟོད། རྗེ་བཙུན་འཕགས་མ་སྒྲོལ་མས་བདག་དང་སེམས་ཅན་ཐམས་ཅད་འཇིགས་པ་ཆེན་པོ་བརྒྱད་དང་བཅུ་དྲུག་ལས་བསྐྱབ་ཏུ་གསོལ། །འཁོར་བ་དང་ངན་སོང་གི་སྡུག་བསྔལ་ལས་བསྒྲལ་དུ་གསོལ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། གཏོར་མ་ལྷག་མ་རྣམས་ཆ་གསུམ་གྱི་ཆོ་གས་བཏང་ངོ་། །གསུམ་པ་རྗེས་ནི། མཆོད་པ་རྣམས་ཁ་གསོ། བསང་སྦྱང་བྱིན་རླབས་སྔར་བཞིན་ལ། ཨོཾ་སརྦ་ཏ་ཐཱ་ག་ཏ་ཨཱརྻཱ་ཏཱ་རཱ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤབྡའི་བར་དང་། དྷརྨཱ་ར་ཎི་ཏས་མཆོད། འཁོར་བ་ལས་སྒྲོལ་སོགས་ཀྱིས་བསྟོད། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་ཞི་བ་དང་། ཚེ་དང་བསོད་ནམས་ཡེ་ཤེས་ལ་སོགས་པ་གོང་ནས་གོང་དུ་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཞེས་འདོད་དོན་གསོལ། རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། །མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཞག་གྲངས་སྦྲེལ་ནས་བྱེད་ན། ཉིན་སྔ་མ་རྣམས་སུ། ཕྱོགས་བཅུ་ན་སོགས་ནས། བྱེ་བྲག་ཏུ་ཚོམ་བུའི་རྟེན་འདི་ཉིད་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་རྣམས་ཇི་སྲིད་གཤེགས་གསོལ་གྱི་ཆོ་ག་མ་བྱས་ཀྱི་བར་དུ་བརྟན་པར་བཞུགས་སུ་གསོལ། ཞེས་སོགས་ཀྱིས་བརྟན་བཞུགས་བྱ། གྲོལ་རྒྱུའི་ཐུན་ཐ་མ་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱིས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པར་བསམ། གང་ལྟར་ཡང་། རང་གི་དཔྲལ་བར་ཨོཾ་དཀར་པོ་སོགས་ཀྱིས་གནས་གསུམ་བསྲུང་། དགེ་བ་འདི་ཡིས་མྱུར་དུ་བདག །ཡིད་བཞིན་འཁོར་ལོ་འགྲུབ་གྱུར་ནས། །སོགས་བསྔོ་བ་དང་། ཆེ་བའི་ཆེ་མཆོག་སོགས་ཤིས་པ་བརྗོད་པའི་ཚིགས་སུ་བཅད་པ་དང་བཅས་མེ་ཏོག་གི་ཆར་སིལ་མ་དགྲམ་ཞིང་། ལས་ཀྱི་རྗེས་མི་མངོན་པར་བྱའོ། །འཆི་མེད་ཚེ་དང་བསོད་ནམས་ཡེ་ཤེས་ཀྱིས། །འཆི་མེད་གྲུབ་པའི་དགེ་མཚན་བརྙེས་འདོད་ན། །འཆི་མེད་ཡིད་བཞིན་འཁོར་ལོ་འདི་སྟེན་དང་། །འཆི་མེད་གོ་འཕང་ཐོབ་པར་གདོན་མི་ཟ། །དེ་སྐད་སྲས་བཅས་རྒྱལ་བའི་ཡེ་ཤེས་སྐུ། །ཁྱབ་བདག་བླ་མའི་ཐུགས་རྗེའི་བདུད་རྩི་ཡིས། །མོས་གུས་པདྨོའི་དགའ་ཚལ་དར་བབས་པས། །རང་དང་སྐལ་མཉམ་གཞན་ལ་ཕན་ཕྱིར་གདམས། །གང་ལས་བྱུང་བའི་ལེགས་བྱས་སྣང་བ་ཡིས། །སྲིད་དང་ཞི་བའི་གདུང་བ་ཀུན་བསལ་ནས། །ཚེ་དང་ཡེ་ཤེས་དཔག་མེད་བཅོམ་ལྡན་འདས། །འཆི་མེད་མགོན་དེའི་གོ་འཕང་མྱུར་ཐོབ་ཤོག །ཅེས་སྒྲོལ་མ་དཀར་མོ་ཡིད་བཞིན་འཁོར་ལོ་ཐུན་མོང་མ་ཡིན་པའི་སྒྲུབ་ཅིང་མཆོད་པའི་ཆོ་གའི་ངག་འདོན་སྙིང་པོར་དྲིལ་བ་འདི་ཡང་། གནས་གསར་བ་འཇམ་དབྱངས་མཁྱེན་བརྩེའི་དབང་ཕྱུག་དང་། ཞྭ་ལུ་མཁན་ཆེན་རིན་ཆེན་བསོད་ནམས་མཆོག་གྲུབ། མཁྱེན་རབ་བྱམས་པ་ངག་དབང་ལྷུན་གྲུབ་སོགས་ལུགས་འདི་ལ་ཚད་མར་གྱུར་པ་རྣམས་ཀྱི་གསུང་གི་སྣང་བ་ལ་བརྟེན་ནས་རང་གཞན་མང་པོར་ཕན་པའི་ལྷག་བསམ་རྣམ་པར་དག་པས་ཀུན་ནས་བསླངས་ཏེ། ཁྱབ་བདག་རྡོ་རྗེ་སེམས་དཔའི་ངོ་བོ་གྱུར་པ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དམ་པ་བདུན་ལས་ཆོས་ཚུལ་འདིའི་བཀའ་དྲིན་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བ་དགེ་ལེགས་སུ་གྱུར་ཅིག ། ༈

[edit]

sgrol dkar yid bzhin 'khor lo thun mong ma yin pa'i sgrub cing mchod pa'i cho ga 'chi med bdud rtsi'i rol mtsho/ @#/_/sgrol dkar yid bzhin 'khor lo thun mong ma yin pa'i sgrub cing mchod pa'i cho ga 'chi med bdud rtsi'i rol mtsho zhes bya ba bzhugs so/__/na mo gu ru b+h+yaH__'chi med rtag pa dam pa'i snang ba yis/__/'chi med tshe dang ye shes sbyin mdzad pa/__/'chi med 'phags ma yid bzhin 'khor lo yis/__/'chi med grub pa'i dga' ston mchog stsol cig__/gang de'i thun mong ma yin pa'i/__/sgrub cing mchod pa'i zla shel ni/__/phun tshogs tshe dang blo gros kyi/__/bdud rtsi'i rol mtsho rgyas phyir 'char/__/'di la gsum/__sbyor ba/__dngos gzhi/__rjes so/__/dang po ni/__thun mong ma yin pa'i rjes su gnang ba dang man ngag gi rgyun legs par thob cing dam tshig dang sdom par ldan pa'i gang zag gis rang gzhan gyi phan bde'i dga' ston spel ba'i slad du gnas gtsang zhing yid dang mthun par rje btsun ma'i sku brnyan bris 'bur gang rigs kyi mdun/__stegs bu khebs ldan gyi dbus su maN+Da lar rdul tshon gyis pad+ma dkar po 'dab ma brgyad pa bris pa'i lte ba zla gdan la tshom bu dkar po gcig bkod/__de'i g.yas su rin po che'i bum pa bcud ldan kha rgyan mgul chings dang bcas pa/__g.yon du rje btsun mar 'bul gtor dkar zlum/__mdun du byang shar nas brtsams te gtor ma cha gsum dang /__/chu gnyis sngon 'gro'i nyer spyod g.yas skor/__rang gi mdun du rdor dril me tog gi snod sogs sta gon bya/__gnyis pa la gsum las/__dang po bdag bskyed ni/__khrus dang gtsang sbra'i kun spyod la gnas pas stan bde ba la 'dug ste/__thog mar mdun gyi nam mkhar rtsa brgyud kyi bla ma rnams lam gyis gsal btab nas/__/de dag gi gsang gsum gyi yon tan yid la dran bzhin du brgyud pa'i gsol 'debs lam rim gyi smon lam dang bcas pa bya/__de nas mchod pa rnams/__oM badz+ra yak+Sha hU~M gis bsang /__swA b+hA was sbyang /__stong pa'i ngang las oM las byung ba'i rin po che las grub pa'i snod yangs shing rgya che ba'i nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__/mar me/__dri chab/__zhal zas/__rol mo la sogs pa dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shab+da'i bar sbyar bas byin gyis brlab/__d+harmA ra Ni ta rol mo dang bcas pa lan gsum gyis byin dbab pa sngon du 'gro bas/__skyabs 'gro nas brtsams te thun mtshams kyi lhar ldang ba'i bar 'jam mgon kun dga' blo gros kyi sgrub thabs ji lta ba bzhin la/__bla ma dang sbyin bdag sogs kyi ched du yin na dmigs pa'i khyad par/__thugs srog tA~M yig gi klad kor nang du bla ma/__khog par bsgrub bya'i gtso bo dang /__mdun rgyab g.yas g.yon sogs su bsgrub bya gzhan rnams ngo bo de ka yin pa la/__rnam pa gzhon tshul lang tsho rgyas shing gos rgyan sogs phun sum tshogs par bsgom/__tshe bcud bsdu bstim gyi dmigs pa grub nas/__ngo bo bsgrub bya la rnam pa rdo rje sngon po rtse lnga gyen 'greng lte bar hU~M sngon pos mtshan pa re rer gsal btab/__rang dang bsgrub bya'i sems gnyis ka'i ngo bo blo 'das brjod bral du shes par byas la 'dzin med du 'jog go/__/gnyis pa mdun bskyed sgrub cing mchod pa la'ang gsum las/__dang po tshom bu lhar bskyed cing bzlas pa bya ba ni/__sngar ltar bsang sbyang /__stong pa'i ngang las pa~M las pad+ma dkar po 'dab ma brgyad pa'i lte bar a las zla ba'i dkyil 'khor gyi steng du tA~M yig dkar po zhes pa nas/__sangs rgyas dang byang chub sems dpa'i tshogs kyis bskor ba oM badz+ra sa mA dzaH__zhes pa'i bar bdag bskyed bzhin la/__rang nyid ces pa'i tshig rnams dor/__de nas rdo rje dril bu spos bcas 'dzin pas/__ma lus sems can kun gyi mgon gyur cing /__/sogs sh+lo ka gsum gyi mthar/__oM AR+YA tA re sa pa ri wA ra e h+ye hi/__zhes pas spyan drangs te nam mkhar bzhugs pa la/__bcom ldan 'dir ni byon pa legs/__/sogs nas/__'di nyid du ni bzhugs su gsol/__/oM sarba ta thA ga ta ga ga na sa ma ye hU~M swA hAs mchod yon phul/__ji ltar bltams pa sogs kyis sku khrus gsol/__bdag dang 'gro la sogs nas/__pad+ma ka ma lA ya stAM gyis gdan 'bul/__oM badz+ra puSh+pe AHhU~M nas/__nai wid+ya'i bar gyis mchod/__oM badz+ra aM ku sha dzaH__oM badz+ra pA sha hU~M/__oM badz+ra s+pho Ta ba~M/__oM badz+ra A be sha AH__phyag rgya dang bcas pas dgug gzhug bcing zhing mnyes par bsam/__slar yang thugs ka'i hU~M las nas/__'od dpag med kyis dbur brgyan par bdag bskyed bzhin la/__bdag la mngon par dbang bskur ba zhes pa'i tshab tu/__'di la zhes bsgyur ba tsam khyad par ro/__/de nas/__oM AR+YA tA re sa pa ri wA ra ar+g+haM pra tI ts+tsha swA hA nas/__shab+da'i bar gyis mchod/__'khor ba las sgrol sogs sh+lo ka gcig gis bstod/__mdun bskyed kyi thugs kar zla ba'i rang bzhin gyi 'khor lo nas/__'od zer sna lnga'i phreng ba g.yas skor du yod pa zhes pa'i bar bdag bskyed bzhin la/__de las 'od zer 'phros pas bdag dang sems can thams cad kyi nad gdon sdig sgrib thams cad zhi bar byas/__tshe dang bsod nams ye shes la sogs pa gong nas gong du 'phel zhing rgyas par gyur/__ces brjod cing bsams la/__sngags yi ge bcu pa spel tshig dang bcas pa ci nus bzla/__tshe sgrub dmigs bsal byed na/__/slar yang mdun bskyed kyi spyi bo'i bla ma 'od dpag med yongs su gyur pa las/__mgon po tshe dpag med nas/__zhabs rdo rje'i skyil mo krung gis bzhugs pa/__de'i thugs ka'i hrIHlas 'od zer phyogs bcur 'phros pas snod bcud 'khor 'das kyis bsdus pa'i tshe dang bsod nams ye shes thams cad 'od zer gyi rnam par bsdus te phyag gi bum pa'i nang du song bas 'chi med bdud rtsi'i chu rgyun du gyur/__de nyid gyen du 'phyur zhing kha nas lud pa dang /__rje btsun ma'i thugs ka'i 'khor lo sngags phreng dang bcas pa las kyang 'chi med bdud rtsi'i zil dngar gyi rgyun dang /__'od zer dkar po sngags kyi sgra sgrogs pa'i tshogs dpag tu med pa 'phros/__'di skabs bsgrub bya gsal 'debs tshul mdun bskyed kyi thugs kar bsgom na'ang rung mod/__rang dang bsgrub bya'i spyi bo tshangs pa'i bu ga nas zhugs/__lus kyi nang thams cad gang bas nad gdon sdig sgrib dus ma yin par 'chi ba'i 'jigs pa bag chags dang bcas pa thams cad sbyangs/__yig cha gzhan las bdag mdun gnyis kyi bar du zla ba'i gdan la bsgrub bya nyid gos rgyan gzab 'byor phun sum tshogs pas mdun bskyed la gdong phyogs te gus pa'i tshul gyis 'khod par bsam zhes 'byung ba ltar dmigs kyang legs shing /__bum bskyed skabs kyang de gnyis gang ltar byas kyang rung ngo /__/'chi med tshe yi dngos grub thob/__lus kyi ba spu'i bu ga tshun chad kyang bdud rtsi'i zil pa phram mer yod par bsams la sngags bzla/__'dir 'od zer drug sbrags kyi dmigs pa yongs rdzogs mdun bskyed la sbyar ba'i tshul kyang snang ba/__de ltar na/__rang gi phyi rol du sogs la mdun bskyed kyi phyi rol tu sogs dang /__mdun bskyed kyi thugs ka'i sngags phreng las 'od dkar po 'phros sogs dang /__rang dang bsgrub bya'i lus kyi nang thams cad gang /__sogs kyis tshig gi kha bsgyur tshul rigs 'gre sbyar dgos par snang na'ang /__zhwa lu pa sogs kyi yig char de lta bu'i dmigs bsal mi snang bas 'dir ma bris la/__spro na 'gal ba med par sems/__A li kA li ye d+harmA yig brgya rnams lan gsum res lhag chad kha bskang zhing dngos grub brtan par bya/__mthar thal mo sbyar te/__bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__/zhes gsol ba gdab bo/__/gnyis pa bum bskyed bzlas pa dang bcas pa ni bum pa'i steng du dung chos dri bzang gi chus gang ba'i steng rdo rje la gzungs thag btags pa bzhag__/bsang sbyang /__stong pa'i ngang las pa~M las pad+ma dang /__a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/__lto ba ldir ba/__zhabs zhum pa/__mgrin pa phra ba/__kha g.yel ba/__mchu 'phyang ba/__lha rdzas kyi gos kyis mgul pa bcings shing /__dpag bsam gyi shing gis kha brgyan pa/__nang chu dang bcud sna tshogs kyis yongs su gang ba'i dbus su pa~M las pad+ma dkar po 'dab ma brgyad pa nas/__'od dpag med kyis dbur brgyan zhes pa'i bar bdag bskyed bzhin la/__rang nyid ces pa'i tshig dor/__bdag la zhes pa'i tshab tu 'di la zhes bsgyur/__gong bzhin mchod cing bstod la/__bum nang gi lha yi thugs kar zla ba'i rang bzhin gyi 'khor lo dkar po sogs nas/__g.yas skor du yod pa/__rang gi snying ga nas sngags kyi phreng ba gzungs thag la brten te song bas bum nang gi lha yi thugs kar phog pas thugs rgyud bskul te/__thugs ka'i 'khor lo sngags phreng dang bcas pa dang /__sku'i cha thams cad nas kyang bdud rtsi'i rgyud dpag tu med pa babs pas bum pa gang bar bsam zhing gzungs thag nas bzung ste/__sngags spel tshig can stong phrag sogs bzlas mthar gzungs thag bsdu/__spro na/__slar yang bum pa'i lha yi spyi bo'i bla ma 'od dpag med yongs su gyur pa las/__mgon po tshe dpag med sogs gong bzhin tshe bcud bsdu bstim gyi dmigs bzlas kyang bya/__yig brgya dang dbyangs gsal rten snying rnams tshar gsum re'i mthar gsol ba gdab/__gsum pa mdun bum thun mong du mchod bstod dang mdun bskyed la gtor ma 'bul ba ni mar me la sogs pa sbar nas/__mchod pa rnams bsang sbyang byin rlabs gong bzhin la/__thal mo sbyar te/__rab 'byams rgya mtsho dpag med na/__/mchod yon ji snyed yod pa rnams/__/'phags ma yid bzhin 'khor lo dang /__/rgyal ba sras dang bcas la 'bul/__ci bde bar ni bzhes nas kyang /__/tshe dang ye shes stsal du gsol/__/oM sarba ta thA ga ta AR+YA tA rA sa pa ri wA ra ar+g+ha~M pra tI ts+tsha swA hA/__de bzhin du mchod yon gyi gnas su zhabs bsil/__me tog__/bdug spos/__mar me/__dri chab/__zhal zas/__rol mo rnams dang /__ar+g+haM gyi gnas su pAd+yaM nas/__shab+da'i bar sbyar bas mchod cing /__d+harmA ra Ni tas rol mo dbul/__spro na rgyal srid sna bdun dang /__'dod yon lnga rnams spyi ltar sbyar bas mchod/__rdo rje dril bu 'dzin pas/__'khor ba las sgrol sogs nas/__/'khor lo can la phyag 'tshal lo/__/zhes pa'i bar gyis bstod/__bcom ldan 'das mas sogs gsol ba gdab/__yi ge zhwa lu mkhan chen gyis 'di ltar mdzad snang ba rjes gnang sogs kyi tshe 'di kho na 'thad cing /__brgya pa lan gsum gyi mthar/__oM AHhU~M gis mchod yon phul ba'i rkyen gyis bum pa'i ye shes pa gshegs/__dam tshig pa 'od du zhu ba las bum pa'i chu bdud rtsi'i rang bzhin du gyur par bsams gzhan rjes chog gi bzod gsol rjes su phul kyang chog__/la dung chos kyi chu bum nang du phul/__'dir ye shes pa gshegs brgyud sde 'og ma spyir btang ltar byas kyi/__dkon mchog lhun grub sogs kyi yig char dam ye dbyer med du 'od zhu mdzad pa ltar byas kyang rung ngo /__/gtor ma rnams chab gtsang mas bran te bsang sbyang /__stong pa'i ngang las rin po che las grub pa'i snod yangs shing rgya che ba'i nang du oM zhu ba las byung ba'i gtor ma lha yi bdud rtsi kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M/__lan gsum gyis brlab/__gtor ma dang po nam mkha' mdzod kyi phyag rgya dang bcas/__na mas+sarba bud+d+ha bo d+hi satwA naM/__a pra ti ha ta shA sa nA nAM/__he he b+ha ga wa tI ma hA sa twa sarba bud+d+ha a ba lo ki te/__mA bi lam+ba mA bi lam+ba/__i daM ba liM gr-ih+NA pa ya gr-ih+NA pa ya/__hU~M hU~M sarba bi sany+tsa re swA hA/__lan gsum gyis phul/__mtshan sngags sngon du 'gro ba'i chu gnyis nyer spyod rol mo dang bcas pas mchod/__lha dang lha min cod pan gyis/__/sogs sh+lo ka gcig gis bstod/__rje btsun 'phags ma sgrol mas bdag dang sems can thams cad 'jigs pa chen po brgyad dang bcu drug las bskyab tu gsol/__/'khor ba dang ngan song gi sdug bsngal las bsgral du gsol/__/'jig rten dang 'jig rten las 'das pa'i dngos grub ma lus pa stsal du gsol/__/zhes gsol ba gdab/__gtor ma lhag ma rnams cha gsum gyi cho gas btang ngo /__/gsum pa rjes ni/__mchod pa rnams kha gso/__bsang sbyang byin rlabs sngar bzhin la/__oM sarba ta thA ga ta Ar+YA tA rA sa pa ri wA ra ar+g+haM pra tI ts+tsha swA hA nas/__shab+da'i bar dang /__d+harmA ra Ni tas mchod/__'khor ba las sgrol sogs kyis bstod/__bcom ldan 'das mas bdag dang sems can thams cad kyi nad gdon sdig sgrib thams cad zhi ba dang /__tshe dang bsod nams ye shes la sogs pa gong nas gong du 'phel zhing rgyas pa dang /__mchog dang thun mong gi dngos grub ma lus pa stsal du gsol/__/zhes 'dod don gsol/__rdo rje sems dpa'i yi ge brgya pa lan gsum gyis lhag chad kha bskang /__/ma 'byor pa dang sogs kyis nongs pa bzod par gsol/__zhag grangs sbrel nas byed na/__nyin snga ma rnams su/__phyogs bcu na sogs nas/__bye brag tu tshom bu'i rten 'di nyid la bskyed cing spyan drangs pa'i lha tshogs rnams ji srid gshegs gsol gyi cho ga ma byas kyi bar du brtan par bzhugs su gsol/__zhes sogs kyis brtan bzhugs bya/__grol rgyu'i thun tha ma la/__oM khyed kyis sems can don kun mdzad/__/sogs kyis tshom bu'i ye shes pa gshegs/__dam tshig pa rang la thim par bsam/__gang ltar yang /__rang gi dpral bar oM dkar po sogs kyis gnas gsum bsrung /__dge ba 'di yis myur du bdag__/yid bzhin 'khor lo 'grub gyur nas/__/sogs bsngo ba dang /__che ba'i che mchog sogs shis pa brjod pa'i tshigs su bcad pa dang bcas me tog gi char sil ma dgram zhing /__las kyi rjes mi mngon par bya'o/__/'chi med tshe dang bsod nams ye shes kyis/__/'chi med grub pa'i dge mtshan brnyes 'dod na/__/'chi med yid bzhin 'khor lo 'di sten dang /__/'chi med go 'phang thob par gdon mi za/__/de skad sras bcas rgyal ba'i ye shes sku/__/khyab bdag bla ma'i thugs rje'i bdud rtsi yis/__/mos gus pad+mo'i dga' tshal dar babs pas/__/rang dang skal mnyam gzhan la phan phyir gdams/__/gang las byung ba'i legs byas snang ba yis/__/srid dang zhi ba'i gdung ba kun bsal nas/__/tshe dang ye shes dpag med bcom ldan 'das/__/'chi med mgon de'i go 'phang myur thob shog__/ces sgrol ma dkar mo yid bzhin 'khor lo thun mong ma yin pa'i sgrub cing mchod pa'i cho ga'i ngag 'don snying por dril ba 'di yang /__gnas gsar ba 'jam dbyangs mkhyen brtse'i dbang phyug dang /__zhwa lu mkhan chen rin chen bsod nams mchog grub/__mkhyen rab byams pa ngag dbang lhun grub sogs lugs 'di la tshad mar gyur pa rnams kyi gsung gi snang ba la brten nas rang gzhan mang por phan pa'i lhag bsam rnam par dag pas kun nas bslangs te/__khyab bdag rdo rje sems dpa'i ngo bo gyur pa mkhan chen thams cad mkhyen pa byams pa kun dga' bstan 'dzin sogs yongs 'dzin dam pa bdun las chos tshul 'di'i bka' drin mang du thos pa'i rgyal khams kyi bya bral ba 'jam dbyangs mkhyen brtse'i dbang pos sbyar ba dge legs su gyur cig____/__!