DKR-KABUM-17-TSA-013

🚧 This website is under continued development. We appreciate your patience!

<div class="wylie-content"

@#/_rang byung pad+ma'i snying thig las/_phrin las 'bring po dngos grub kun 'byung bzhugs so//

@#/_na mo gu ru/_rang byung sku lnga'i khyab bdag kun tu 'chang*/_/rab 'byams rtsa gsum spro bsdu'i spyi mes che/_/yid mkha'i ngos su 'du 'bral med pa la/_/btud nas las byang 'bring po 'di ltar dbye/_/'di la gsum/_sngon 'gro'i thog ma skyabs 'gro ni/_na mo:_bla ma sangs rgyas rin po che:_skyabs gnas rgya mtsho'i ye shes sku:_mkhyen brtse nus pa'i bdag nyid la:_mi phyed dad pas skyabs su mchi:_lan gsum/_gnyis pa sems bskyed ni/_hoH_nam mkha' mnyam pa'i sems can rnams:_med snang 'khor ba'i chos la zhen:_sdug bsngal mtsho las bsgral ba'i phyir:_byang chub sgrub par sems bskyed do:_lan gsum/_gsum pa yan lag brgyad pa ni/_bla ma rtsa gsum lha tshogs la:_sgo gsum gus pas phyag 'tshal lo:_kun bzang sgyu 'phrul drwa bas mchod:_sdig ltung nyes par byas kun bshags:_rnam grol dge la rjes yi rang:_zab rgyas chos 'khor bskor bar bskul:_mya ngan mi 'da' bzhugs gsol 'debs:_dge tshogs byang chub chen por bsngo:_kun kyang bla ma'i gnas thob shog:_lan gsum/_bzhi pa bka' bsgo ba ni/_hrIH_nga ni dbang chen he ru ka:_'khor 'das yongs kyi spyi dpal yin:_nyon cig bgegs dang log 'dren tshogs:_chos nyid skye med dbyings su song:_hU~M bzhi'i sngags brjod/__lnga pa srung 'khor ni/_hrIH_dpal gyi thugs las ye shes 'od:_mtshon cha rnam lnga'i sprin du spros:_phyogs mtshams steng 'og srung ba'i gur:_gzhom gzhig bral bar lhun gyis grub:_dz+nyA na badz+ra rak+Sha b+h+rU~M:_drug pa byin 'bebs ni/_hU~M hrIH_chos dbyings rang byung kun khyab brdal ba che:_sku dang ye shes mi zad rgyan gyi sprin:_gdod nas 'du 'bral med pa'i klong nas bzhengs:_'gags med thugs rje'i rtsal gyis byin phob cig:_dbang dang byin rlabs dngos grub myur du stsol:_bgegs dang log 'dren bar chad dbyings su sol:_mchog dang thun mong dngos grub myur bstsal nas:_gnyis med klong yangs chen por byin gyis rlobs:_oM AHhU~M badz+ra gu ru pad+ma thod phreng rtsal d+he wa d+hA ki ni d+harma pA la sa pa ri wA ra maN+Da la a be sha ya a aH_hrIM hrIM pheM pheM:_hU~M hU~M hU~M:_bdun pa mchod pa byin brlab ni/_hU~M hrIH_snang srid kun bzang rol pa'i zhing:_rdo rje'i bde ba chen po'i dal:_zag med mchod pa'i sprin chen po:_rang bzhin nyid du lhun gyis grub:_oM dz+nyA na sarba pU dza ar+g+haM nas/_shab+da AHhU~M:_oM sarba pany+tsa a mr-i ta ba liM ta rak+ta sa ma ya AHhU~M:_lan gsum/_gnyis pa dngos gzhi'i las rim la/_thog mar rten bskyed pa ni/_hU~M:_chos sku stong nyid rdo rje sems:_dbyings dang mnyam pa'i snying rje las:_zung 'jug sems kyi yi ge hrIH_dkyil 'khor 'byung ba'i gnas su shar:_rdo rje phung po rang byung grong:_ngo mtshar gzhal yas blo las 'das:_pho brang dbus kyi lte ba ru:_pad+ma nyi zla'i dkyil 'khor bkra:_sa bon bab pa yongs gyur las:_dbang chen pad+ma he ru ka:_dmar smug zhal gcig phyag gnyis pa:_phyag g.yas gri gug g.yon thod pa:_zhabs gnyis dor stabs phag mo sbyor:_rang lus dza lan+d+ha ra ru:_chos sku pad+ma kun tu 'chang:_bde chen phyag rgya dkar dmar mdangs:_phyag gnyis bde stong rdo rje dril:_bsnol bas dbyings phyug mtsho rgyal 'khyud:_gcer bu brtul zhugs grub pa'i gzugs:_pad zla rgyas pa'i steng na rol:_dbang chen khro rgyal he ru ka'i:_snying dbus tsit+ta'i gur khang du:_khyab bdag rdo rje thod phreng rtsal:_dmar smug khro 'dzum rus pas brgyan:_phyag gnyis rdo rje dril bu bsnams:_phung khams zhi khro'i tshom bur shar:_dbyings phyug dkar mo gnyis med sbyor:_rta mgrin spyi bor gshin rje ser:_mgrin par pad+ma dbang chen dmar:_thugs kar yang dag sku mdog mthing:_lte bar che mchog bdud rtsi ljang:_gsang gnas kI la ya mthing nag:_lte 'og e klong ral gcig smug:_nor bur dregs pa kun 'dul nag:_snams su stobs ldan drag sngags sngo:_'bar ba khrag 'thung rgyud sde drug:_sgrub pa bka' brgyad lha ru shar:_phyi ltar rtsa ba gsum po yang:_nang du gnyug ma'i rdo rje gsum:_nges don bde gsal mi rtog pa'i:_dkyil 'khor gcig gi rang bzhin la:_rang byung rang shar 'du 'bral med:_gdod nas ma bcos lhun gyis grub:_gnyis pa spyan drangs pa ni/_DA dril dbyangs dang spos rol bcas te/_hU~M:_o rgyan yul gyi nub byang mtshams:_pad+ma ge sar sdong po la:_ya mtshan mchog gi dngos grub brnyes:_pad+ma 'byung gnas zhes su grags:_'khor du mkha' 'gro mang pos bskor:_khyed kyi rjes su bdag sgrub kyis:_byin gyis brlab phyir gshegs su gsol:_gu ru pad+ma sid+d+hi hU~M:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra badz+ra sa ma dza dzaH_dzaHhU~M baM hoH_zhes brjod pas ye shes kyi 'khor lo mdun du byon pa la/_kye kye:_bla ma o rgyan rin po che:_khyed ni sangs rgyas kun dang mnyam:_mkhyen brtse ye shes bsam mi khyab:_nus pas mkha' mnyam 'gro ba 'dul:_brgyud gsum rig 'dzin bla ma dang:_yi dam zhi khro'i khyab bdag che:_gnas gsum mkha' 'gro'i gtso bo ste:_chos skyong sde brgyad bran du bkol:_phyogs dus skyabs gnas ma lus pa:_kun 'dus rdo rje thod phreng rtsal:_bdag cag snyigs ma'i 'gro ba la:_dmigs med thugs rjes brtser dgongs nas:_ji ltar sngon gyi zhal bzhes bzhin:_byin rlabs rtags mtshan dngos su ston:_phyi nang gsang ba'i bar chad sol:_nyams dang rtogs pa'i ye shes skyed:_rje btsun khyed dang mnyam par mdzod:_ces bskul te gsol 'debs rdo rje'i tshig bdun gyis gsol ba yang yang btab pas/_spyi bo'i bla ma'i gnas bzhi las byung ba'i 'od zer dkar dmar mthing ga sna tshogs pa bzhi'i dbang dang dngos grub bstsal zhing sgrib pa dag_/sku gsung thugs kyi byin rlabs rgyud la zhugs par mos la/_oM AHhU~M badz+ra gu ru pad+ma sid+d+hi hU~M:_bzla ba bsnyen pa dang*/_gsum pa dam ye gnyis med bzhugs gsol ni/_hrIH_ye shes rang snang lha tshogs rnams:_bdag dang gnyis med brtan par bzhugs:_sku gsung thugs kyi byin rlobs la:_mchog dang thun mong dngos grub stsol:_sa ma ya tiSh+Tha lhan:_bzhi pa brda phyag ni/_hrIH_rtsa gsum dkyil 'khor lha tshogs rnams:_gdod nas rang dang gnyis med kyang:_kun rdzob dad dang gdung ba'i blos:_gus pa'i tshul gyis phyag bgyi'o:_a ti pU hoH_pra tIts+tsha hoH_lnga pa phyi nang gsang ba bla med kyi mchod pa ni/_hrIH_kun bzang sgyu 'phrul drwa ba yi:_mchod pa'i phyag rgya chen po ni:_sems kyi yid bzhin sprin chen po:_bla ma rtsa gsum lha la 'bul:_bzhes nas mchog thun dngos grub dang:_byin rlabs ma lus bstsal du gsol:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ar+g+haM nas/_shab+da sarba pU dza sa ma ye AHhU~M:_hrIH_dbang drag rol pa dpal gyi zhing:_nyams pa bsgral ba'i tshogs khang 'dir:_dur khrod drag po'i nyer spyod kun:_rtsa gsum lha la gus 'bul na:_dgyes pa chen pos bzhes nas kyang:_dbang drag brtul zhugs mthar phyin te:_dngos grub ma lus bstsal du gsol:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra rU pa shab+da gan+d+he rA sa spar+she AHhU~M:_hrIH_rang byung gdod nas rnam par dag:_dam rdzas rtsa brgyad yan lag stong:_rmad du byung ba'i mchod pa 'bul:_dngos grub chen po bstsal du gsol:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ma hA pany+tsa a mr-i ta khA hi:_brgyud mchod ni/_snang mtha' spyan gzigs rig mchog lnga/_/rigs gsum zhi khro thod phreng lnga/_/mtsho skyes rje 'bangs grogs gsum la/_/sman mchod 'bul lo dngos grub stsol/_/rdo rje gzi brjid ma ti'i mtshan/_/drin chen bla ma rta phag gtso/_/sgrub sde brgyad dang mkha' 'gro lnga/_/sman mchod 'bul lo dngos grub stsol/_/ma mgon gter srung snang srid kun/_/rtsa gsum bla ma'i dkyil 'khor lhar/_/yongs grub chen po'i mos gus kyis/_/sman mchod 'bul lo dngos grub stsol/_kA ya wAka tsit+ta sarba sid+d+hi oM AHhU~M gis dngos grub blang*/_hrIH_pad+ma b+hany+dza lcang lo can:_rgyud drug bsgral ba'i rak+tas bkang:_rdo rje chags pa'i dam rdzas 'bul:_dug lnga ye shes klong dag mdzod:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ma hA rak+ta khA hi:_hrIH_snod bcud yongs rdzogs ba liM ta:_bza' bca' bda' dgu'i ri gling bkod:_dbang po drug la dgyes bskyed pas:_dngos grub ma lus bstsal du gsol:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ma hA ba liM ta khA hi:_hrIH_rdo rje pad+ma mnyam sbyor ba'i:_bde stong rol pa'i cho 'phrul las:_nyon mongs dug lnga dbyings su sgrol:_bla na med pa'i mchod pas mchod:_oM AHhU~M badz+ra gu ru pad+ma d+he wa d+hA gi ni d+harma pA la maN+Da la sa pa ri wA ra ta na ga Na pU dza hoH_hrIH_gdod nas rnam dag brdal ba che:_'khor gsum rtog tshogs dbyings su zhi:_mchod bya mchod byed las 'das pa:_bla na med pa'i gsang bas mchod:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ma hA su kha d+harma d+hA tu pU dza AHhU~M:_drug pa bstod pa ni/_hrIH_chos dbyings zag med dgongs pa mkha' ltar khyab:_ye shes sgyu 'phrul bkod pa bsam mi khyab:_srid zhi'i rgud sel bde chen mchog stsol mdzad:_rang byung sangs rgyas rdo rje'i bla mar bstod:_bde ba chen po'i ngo mtshar rol pa las:_zhi khro rab 'byams bkod pa cir yang snang:_gsang ba mi zad rgyan gyi cho 'phrul che:_rab 'byams yi dam lha tshogs kun la bstod:_chos nyid dbyings kyi mkha' las ma 'das par:_'gag med sgyu 'phrul phrin las rnam bzhi'i bdag:_gsang mchog rdo rje bkod pa'i rnam 'gyur can:_'bum phrag mkha' 'gro rgya mtsho'i tshogs la bstod:_ye shes chen po'i dbyings su ro gcig kyang:_gang 'dul der snang rnam rol cir yang ston:_rtsa gsum 'dus pa bla ma'i dkyil 'khor la:_mi phyed dad pa'i blo yis phyag 'tshal bstod:_bdun pa yi dam ltar bzlas pa nye bsnyen gyi spyi bye brag gnyis las/_dang po ni/_bdag nyid dbang chen he ru ka:_ye shes sems dpa' thod phreng gi:_thugs dbus pad+ma nyi zla'i steng:_hrIHla sngags kyi phreng bas bskor:_'od zer spro bsdus don gnyis byas:_snod bcud gdod nas rnam dag pa:_pad+ma dbang gi zhing du shar:_oM AHhU~M badz+ra gu ru pad+ma kro d+ha h+ya gr-I wa hU~M:_bye brag gi bzlas pa ni/_bla ma'i rdo rje'i sku'i gnas lngar bzhugs pa'i lha tshogs kyi thugs srog las byung ba'i 'od zer spro bsdus zhi rgyas dbang drag mchog gi phrin las lnga sgrub par mos la/_oM AHhU~M badz+ra gu ru ya mAn+ta ka sarba sid+d+hi hU~M phaT:_oM AHhU~M badz+ra gu ru ha ya gr-I wa sarba sid+d+hi hU~M phaT:_oM AHhU~M badz+ra gu ru ru lu ru lu hU~M b+h+yo hU~M sarba sid+d+hi hU~M phaT:_oM AHhU~M badz+ra gu ru ma hA kro d+ha sarba sid+d+hi hU~M phaT:_oM AHhU~M badz+ra gu ru karma kI li kI la ya sarba sid+d+hi hU~M phaT:_oM AHhU~M badz+ra gu ru ma ma yo ki ni kro d+hI sarba sid+d+hi hU~M phaT:_oM AHhU~M badz+ra gu ru badz+ra tsaN+Da sarba sid+d+hi hU~M phaT:_oM AHhU~M badz+ra gu ru kro d+ha ma hA bA la sarba sid+d+hi hU~M phaT:_bsdu na hU~M 'ba' zhig bzlas kyang rung*/_brgyad pa mkha' 'gro ltar sgrub pa'i bzlas pa ni/_mkha' 'gro'i thugs kar dga' 'khyil dbus:_baM dang ha ri ni sa gsal:_dbang chen thugs ka'i hrIH'od kyis:_bskul bas baM las sngags phreng spros:_yab yum zhal brgyud 'gal me ltar:_'khor bas rigs lnga'i DA ki nis:_las bzhi'i phrin las sgrub par bsam:_oM AHhU~M badz+ra gu ru pad+ma d+he wa d+hA ki ni baM ha ri ni sa sarba karma sid+d+hi hU~M AH_bzlas pa'am rdo rje'i bzlas pas/_a ha ri ni sa sarba sid+d+hi hU~M:_bzlas kyang rung*/_chos skyong gi sgrub pa chen po ni/_rta mgrin gyi thugs ka'i 'od kyis gsang gnas kyi chos skyong rnams la reg pas sngon gyi dam bca' bskul te phrin las sgrub par mos la/_shA sa na bzla'o/__/gsum pa rjes rim la/_dang po tshogs mchod ni/_zhing ngam gcan gzan gyi pags par thabs shes dam tshig gi rdzas gtsang la dag par 'du byas te chu chang nang gsum gyis bran/_dang po byin brlab ni/_hrIH_bdag nyid dpal gyi thugs ka nas:_ra~M ya~M kha~M 'phros bsregs gtor sbyangs:_oM AHhU~M gis rigs mchog lnga'i:_rtog 'dul dam tshig rdzas su gyur:_ra~M ya~M kha~M:_oM AHhU~M/_lan gsum/__gnyis pa tshogs zhing spyan 'dren ni/_hU~M hrIH_rtsa ba gsum gyi lha tshogs rnams:_sku yi gar stabs shigs se shig:_rgyan dang cod pan pu ru ru:_rdo rje'i glu bro lams se lam:_ye shes dgongs nyams ta la la:_ngo mtshar rtags dang mtshan ma bcas:_dam tshig tshogs kyi gnas 'dir gshegs:_rnal 'byor nyams rtogs rig rtsal spor:_bar chad bdud bgegs dbyings su sgrol:_mchog thun dngos grub kun stsol bas:_dgyes pa'i tshul du bzhugs su gsol:_oM AHhU~M badz+ra gu ru pad+ma d+he wa d+hA ki ni d+harma pA la sarba sa ma ya dzaHdzaHhrIM hrIM pheM pheM e a ral+li hoH_gsum pa mchod pa ni/_hU~M hrIH_snod bcud dbyings kyi b+han+d+ha ru:_phung khams rtsa rlung 'od gsal bcud:_bza' bca' btung ba'i brdas mtshon te:_bla ma rtsa gsum lha la 'bul:_oM AHhU~M badz+ra gu ru pad+ma d+he wa d+hA ki ni shrI d+harma pA la ga Na tsakra pU dza sa ma ya hoH_bzhi pa bshags pa ni/_hU~M hrIH_rtsa ba gsum gyi lha tshogs la:_dam rdzas tshogs kyis mchod pa yis:_sku gsung thugs kyi nyams chag bshags:_gnyis med mnyam par bskang gyur cig:_sa ma ya shud+d+he aH_yig brgya brjod/__lnga pa bsgral bstab ni/_e nr-i tri dzaH_dzaHhU~M baM hoH_hU~M:_dbang chen pad+ma he ru kas:_nyams pa'i dgra bgegs bkug cing bstim:_ye shes dbyings bsgral sha khrag rus:_rtsa gsum lha la bstab bo bzhes:_sarba sha trUn mA ra ya phaT:_ma hA maM sa rak+ta kiM ni ri ti kha raM khA hiH_drug pa tshogs la rol pa ni/_phyi nang gsang ba'i tshogs rnal 'byor gyi nus pa dang bstun te rol/_bdun pa lhag ma ni/_oM pany+tsa a mr-i ta ha ho hrIHsa byin brlab ste/_hrIH_pad+ma dbang gi bka' nyan pa:_dkyil 'khor mu ran skyong ba kun:_ye shes bdud rtsi'i lhag ma 'di:_bzhes la las kun 'grub par mdzod:_oM uts+tshiSh+Ta ba liM ta khA hiH_brgyad pa thugs dam bskul ba ni/_hrIH_chos dbyings bde ba chen po nas:_'gag med thugs rje'i rol pa ni:_gang 'dul sgyu 'phrul drwa ba'i sku:_rtsa gsum lha tshogs dbyings nas bzhengs:_bdag rtog gnyis 'dzin 'khrul pa yi:_sdug bsngal rgyu 'bras spyod pa'i tshe:_snang grags ye shes snang ba yi:_go 'phang mchog la dbugs 'byin mdzod:_dgu pa chad tho ni/_hU~M hrIH_sngon tshe bar dang tha ma'i bskal pa la:_sku gsum ston 'khor phun sum tshogs pa yis:_rgyud lung man ngag gsang ba'i rgya bkrol tshe:_rig rtsal bka' gter rgyud gsum srung ma yis:_khas blangs dam bcas bzhin du phrin las mdzod:_shrI d+harma pA la ba liM ta pU dza khA hiH_bcu pa brtan ma mchod pa ni/_hrIH_phyi nang gzhan gsum rten 'brel dus sbyor khams:_gnas dag bdud sman gnod sbyin DA ki mas:_'pho med zhu bde'i bshal chu 'di bzhes la:_gzhi grol gtan srid zin pa'i las mdzod cig:_ma ma hriM hriM ba liM ta khA hiH_bcu gcig pa rta bro ni/_hrIH_dbang chen pad+ma he ru ka:_ma mo mkha' 'gro'i 'khor dang bcas:_dpal gyi rta bro chems se chem:_bdud rigs mnan pa'i las mdzod cig:_oM laM hU~M laM s+t+wam+b+ha ya nan:_tshogs mchod 'di rgyun gyi rnal 'byor la ma sbyar kyang rung ngo*/__/bcu gnyis pa mchod bstod ni/_hrIH_kun bzang sgyu 'phrul drwa ba yi:_mchod pa'i phyag rgya chen po ni:_sems kyi yid bzhin sprin chen po:_bla ma rtsa gsum lha la 'bul:_bzhes nas mchog thun dngos grub dang:_byin rlabs ma lus bstsal du gsol:_oM AHhU~M badz+ra gu ru pad+ma d+he wa d+hA ki ni d+harma pA la maN+Da la sa pa ri wA ra ar+g+haM nas/_shab+da pany+tsa kA ma gu Na ma hA a mr-i ta rak+ta ba liM ta ta na ga Na d+harma d+hA tu pU dza hoH_hU~M hrIH_byin rlabs rtsa ba rig 'dzin bla ma dang:_dngos grub char 'bebs yi dam zhi dang khro:_dgos 'dod 'bras bu smin mdzad mkha' 'gro'i tshogs:_rtsa gsum dkyil 'khor lha la phyag 'tshal bstod/_bcu gsum pa dngos grub blang ba ni/_hrIH_bde ba chen po 'od mi 'gyur ba'i zhing:_bkod pa tshad med rtsa gsum lha tshogs bcas:_mkhyen brtse nus pa'i ye shes rtsal bskyed la:_dbang dang byin rlabs dngos grub bstsal du gsol:_rtsa gsum kun 'dus don gyi dkyil 'khor nas:_sku gsung thugs kyi dngos grub bstsal du gsol:_don gnyis lhun grub mi slob rdo rje'i sar:_smin grol yongs rdzogs dngos grub bstsal du gsol:_oM AHhU~M badz+ra gu ru pad+ma thod phreng rtsal d+he wa d+hA ki ni d+harma pA la sa pa ri wA ra kA ya a b+hi Shiny+tsa oM:_wAka a b+hi Shiny+tsa AH_tsit+ta a b+hi Shiny+tsa hU~M:_sarba a b+hi Shiny+tsa hrIH_bcu bzhi pa nongs bshags ni/_hoH_bdag cag mi shes rmongs pa yis:_gzung 'dzin 'khrul pa'i las bsags te:_'gal 'khrul nongs pa ci mchis pa:_rtsa gsum lha tshogs spyan sngar bshags:_yi ge brgya pa lan gsum bzla/_bco lnga pa bsdu ldang ni/_tshogs mgron ye shes pa brtan bzhugs dang dam tshig pa'i dkyil 'khor/_snang stong gnyis med dkyil 'khor lha:_dwangs ma'i 'ja' ltar dbyings su yal:_lhun grub thugs rje'i rol pa las:_phrin las gang 'dul de ltar snang:_bcu drug pa bsngo smon shis brjod ni/_e ma hoH_rtsa gsum dkyil 'khor lha tshogs kun:_rtse gcig bsgom bzlas la sogs pa'i:_dus gsum dge ba'i dngos po kun:_mi gnas mya ngan 'das par bsngo:_legs spyad 'bras bu dus 'di ru:_smin nas gu rus rjes su bzung:_'gro drug sems can ma lus pa:_byang chub mchog gi skal ldan shog:_shes bya'i don la ma rmongs pa'i:_bla ma dam pa'i bkra shis shog:_gang la bsam pa'i don 'grub pa'i:_don grub mchog gi bkra shis shog:_sku gsung thugs kyi b+ha ga nas:_phyag rgya chen po'i bkra shis shog:_ces shis brjod kyi mtshams sbyar nas tshogs gnyis spel ba'i spyod lam la 'jug par bya'o/__/zhes pa'ang e waM chos kyi sgar chen gyi byang 'dren pa pad+ma bkra shis nas bskul ba'i rkyen gyis sgrub chen gyi bsnyen thun sogs la nyer mkhor mthong nas mtsho skyes rgyal ba dgyes pa'i 'bangs pad+ma gar dbang mdo sngags gling pas rdo rje'i gnas mchog stag tshang seng ge bsam grub kyi mdun lha klu kun tu dga' ba'i ne'u gseng du ras dkar gyi lding gur 'og nas sug bris bgyis pa/_yi ge gnyis pa'i grogs kyang bskul ba pos mdzad pas 'brel tshad rig 'dzin rnam bzhi'i lam mchog mthar phyin pa'i rgyur gyur cig__/dge'o/__//