JKW-KABUM-20-WA-001-074

🚧 This website is under continued development. We appreciate your patience!

Previous Text Back to Volume PageNext Text

Wylie title	yon tan dpag tu med pa'i zhing khams kyi/ zhes pa'i dbu can
Location	mkhyen brtse'i bka' 'bum Volume 20, sde tshan 1, Text 74, Pages 141-143 (Folios 71a1 to 72a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yon tan dpag tu med pa'i zhing khams kyi zhes pa'i dbu can. In 'jam dbyangs mkhyen brtse'i dbang po'i bka' 'bum, Vol. 20: 141-143. Khams sde dge rdzong sar dgon: Rdzong sar blo gros phun tshogs, 2020.
Genre	Invocation of Auspiciousness - bkra shis brjod pa  ·  Prayers - smon lam
Colophon	།ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེའི་རིལ་བུ་བཅས།།
	ces pa'i zhu mtshon lha'i reg bya/_'chi med tshe'i ril bu bcas

1 Texts in this Section (sde tshan or chos tshan)

74 141-143	ཡོན་ཏན་དཔག་ཏུ་མེད་པའི་ཞིང་ཁམས་ཀྱི། ཞེས་པའི་དབུ་ཅན། yon tan dpag tu med pa'i zhing khams kyi/ zhes pa'i dbu can Invocation of Auspiciousness - bkra shis brjod pa   ·   Prayers - smon lam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོཾ་སྭསྟི་སིདྡྷཾ། ཡོན་ཏན་དཔག་ཏུ་མེད་པའི་ཞིང་ཁམས་ཀྱི། །འདྲེན་མཆོག་འཆི་མེད་མགོན་པོའི་ཡེ་ཤེས་སྤྱན། །ས་ཡི་དབང་ཕྱུག་ཁྱོད་ལ་གཡོས་པའི་མོད། །ཕུན་ཚོགས་ཚེ་ཡི་དགེ་མཚན་སྦྱིན་གྱུར་ཅིག །བསོད་ནམས་སྟོབས་ཀྱི་དཔུང་པའི་འཁྲི་ཤིང་གིས། །ལུགས་གཉིས་གདུགས་དཀར་བསྒྲེང་བའི་གྲིབ་བསིལ་དུ། །བོད་ཆེན་བསྟན་འགྲོ་མཐའ་དག་དབུགས་འབྱིན་པའི། །ཞབས་སྟེགས་ཕྱོགས་ལས་རྣམ་པར་རྒྱལ་བའི་དྲུང་། །གྲགས་པ་མ་ལ་ཡ་ཡི་འཁྲི་ཤིང་དང་། །ཡོན་ཏན་ག་བུར་ཐང་ཆུས་སྒེག་འཆང་བའི། །དམ་པའི་ངང་ཚུལ་སྙིང་ནས་དྲན་པའི་མོད། །ཡུད་གཅིག་བཏུད་དེ་ཞུ་འཕྲིན་འདི་སྐད་གསོལ། །བསྐལ་མང་བསོད་ནམས་ཆུ་གཏེར་བསྲུབས་པ་ལས། །ལེགས་པར་འཁྲུངས་པའི་མཚན་དཀྱིལ་ཟླ་རིས་ནི། །བསྟན་སྲིད་གླིང་བཞིའི་མཁའ་ལ་འཆར་བའི་མོད། །སྙིགས་མའི་རྒུད་མུན་མཐའ་དག་གཅིག་ཅར་བཅིལ། །ཕུན་ཚོགས་རིགས་གཟུགས་ལང་ཚོ་དར་བབ་ཅིང་། །འཇིག་རྟེན་གཞུང་ལུགས་རྒྱ་མཚོའི་ཕ་རོལ་སོན། །དམ་པའི་ཆོས་ཀྱི་འབྱོར་པས་མངོན་མཐོ་བ། །ཁྱོད་འདྲ་ས་སྟེང་འདི་ན་གཉིས་པ་དཀོན། །དེ་སླད་འཚོ་གཞེས་བརྟན་པའི་དགེ་མཚན་དང་། །རྗེས་བརྩེའི་སྤྱན་ཟུར་གཡོ་བའི་འོད་རླབས་དང་། །ལེགས་གསུང་རྟེན་དང་བཅས་པ་འདིར་སོན་པའི། །དགའ་སྟོན་གསུམ་པོས་བདག་ཡིད་རིང་དུ་སིམ། །འདི་ན་གནས་པའི་དགེ་སྦྱོང་ཡང་། །མཆོག་གསུམ་ཐུགས་རྗེས་འཚོ་བཞིན་དུ། །བསྟན་འགྲོར་སྨན་འདོད་བྱང་ཆུབ་སེམས། །སྙིང་ལ་རི་མོར་འབྲི་བཞིན་མཆིས། །མཚམས་ཞུས། ཤྲཱི་བི་ཛ་ཡནྟུ། ཚེ་མཐའ་ཡས་པའི་ཕྱག་གི་བདུད་རྩིའི་ཀླུང་། །ཕུང་ཁམས་སྐྱེ་མཆེད་སྲོག་ཏུ་འདྲེས་པ་ལས། །མི་ཤིགས་གཟུགས་སྐུའི་ལྷུན་པོ་རབ་བརྟན་པའི། །སྐལ་བཟང་ནམ་ཡང་ནུབ་པ་མེད་གྱུར་ཅིག །ཡིད་བཞིན་འཁོར་ལོའི་དབང་ཕྱུག་རྗེ་བཙུན་མའི། །སྒྲ་དབྱངས་འགག་པ་མེད་པའི་ཡེ་ཤེས་བྱིན། །གང་གསུང་བཻ་ཌཱུར་རྒྱུད་མང་ལ་ཆགས་པས། །འཇིག་རྟེན་ཀུན་ན་རྟག་ཏུ་སྙན་གྱུར་ཅིག །སྲིད་ཞིའི་ཕྱོགས་ལས་རྣམ་རྒྱལ་འཕགས་མ་དང་། །འོད་གསལ་དབྱིངས་ཀྱི་ཐིག་ལེ་དབྱེར་མེད་བཞིན། །མ་འགག་ཉམས་བརྒྱས་རོལ་པའི་མཁྱེན་བརྩེའི་ཐུགས། །བསིལ་ལྡན་བསོད་ནམས་དཔྱིད་དུ་བརྟན་གྱུར་ཅིག །བསྔགས་འོས་ཡོན་ཏན་མི་ཟད་ནོར་གྱི་བུ། །ཕྲིན་ལས་རྒྱལ་མཚན་རྩེ་མོར་གཟི་འབར་བས། །ཕན་བདེའི་གྲུ་ཆར་ལྷུག་པར་འབེབས་བཞིན་ཏུ། །ངེས་པར་ཞིང་ཁམས་འདི་ལས་ཡོལ་མེད་ཤོག །བདག་ཀྱང་རྣམ་ཀུན་རྗེས་བརྩེའི་གཟིགས་པ་ཡིས། །ཉི་དང་པདྨོའི་ངང་ཚུལ་བཞིན་དུ་སྐྱོངས། །རིང་མིན་དངོས་ཞལ་མཇལ་བའི་དགེ་མཚན་གྱིས། །སྲིད་ཞིའི་ཕུན་ཚོགས་མཆོག་ཏུ་རྒྱས་གྱུར་ཅིག །ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེའི་རིལ་བུ་བཅས།། །། ༈

[edit]

yon tan dpag tu med pa'i zhing khams kyi/__zhes pa'i dbu can/ oM swasti sid+d+haM/_yon tan dpag tu med pa'i zhing khams kyi/_/'dren mchog 'chi med mgon po'i ye shes spyan/_/sa yi dbang phyug khyod la g.yos pa'i mod/_/phun tshogs tshe yi dge mtshan sbyin gyur cig_/bsod nams stobs kyi dpung pa'i 'khri shing gis/_/lugs gnyis gdugs dkar bsgreng ba'i grib bsil du/_/bod chen bstan 'gro mtha' dag dbugs 'byin pa'i/_/zhabs stegs phyogs las rnam par rgyal ba'i drung /_/grags pa ma la ya yi 'khri shing dang /_/yon tan ga bur thang chus sgeg 'chang ba'i/_/dam pa'i ngang tshul snying nas dran pa'i mod/_/yud gcig btud de zhu 'phrin 'di skad gsol/_/bskal mang bsod nams chu gter bsrubs pa las/_/legs par 'khrungs pa'i mtshan dkyil zla ris ni/_/bstan srid gling bzhi'i mkha' la 'char ba'i mod/_/snyigs ma'i rgud mun mtha' dag gcig car bcil/_/phun tshogs rigs gzugs lang tsho dar bab cing /_/'jig rten gzhung lugs rgya mtsho'i pha rol son/_/dam pa'i chos kyi 'byor pas mngon mtho ba/_/khyod 'dra sa steng 'di na gnyis pa dkon/_/de slad 'tsho gzhes brtan pa'i dge mtshan dang /_/rjes brtse'i spyan zur g.yo ba'i 'od rlabs dang /_/legs gsung rten dang bcas pa 'dir son pa'i/_/dga' ston gsum pos bdag yid ring du sim/_/'di na gnas pa'i dge sbyong yang /_/mchog gsum thugs rjes 'tsho bzhin du/_/bstan 'gror sman 'dod byang chub sems/_/snying la ri mor 'bri bzhin mchis/_/mtshams zhus/_shrI bi dza yan+tu/_tshe mtha' yas pa'i phyag gi bdud rtsi'i klung /_/phung khams skye mched srog tu 'dres pa las/_/mi shigs gzugs sku'i lhun po rab brtan pa'i/_/skal bzang nam yang nub pa med gyur cig_/yid bzhin 'khor lo'i dbang phyug rje btsun ma'i/_/sgra dbyangs 'gag pa med pa'i ye shes byin/_/gang gsung bai DUr rgyud mang la chags pas/_/'jig rten kun na rtag tu snyan gyur cig_/srid zhi'i phyogs las rnam rgyal 'phags ma dang /_/'od gsal dbyings kyi thig le dbyer med bzhin/_/ma 'gag nyams brgyas rol pa'i mkhyen brtse'i thugs/_/bsil ldan bsod nams dpyid du brtan gyur cig_/bsngags 'os yon tan mi zad nor gyi bu/_/phrin las rgyal mtshan rtse mor gzi 'bar bas/_/phan bde'i gru char lhug par 'bebs bzhin tu/_/nges par zhing khams 'di las yol med shog_/bdag kyang rnam kun rjes brtse'i gzigs pa yis/_/nyi dang pad+mo'i ngang tshul bzhin du skyongs/_/ring min dngos zhal mjal ba'i dge mtshan gyis/_/srid zhi'i phun tshogs mchog tu rgyas gyur cig_/ces pa'i zhu mtshon lha'i reg bya/_'chi med tshe'i ril bu bcas//__//_!_