JKW-KABUM-19-DZA-001-012

🚧 This website is under continued development. We appreciate your patience!

Previous Text Back to Volume PageNext Text

Wylie title	chos 'byung skor sogs thor bu
Location	mkhyen brtse'i bka' 'bum Volume 19, sde tshan 1, Text 12, Pages 116-133 (Folios 58b4 to 67a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. chos 'byung skor sogs thor bu. In 'jam dbyangs mkhyen brtse'i dbang po'i bka' 'bum, Vol. 19: 116-133. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

12 116-133	ཆོས་འབྱུང་སྐོར་སོགས་ཐོར་བུ། chos 'byung skor sogs thor bu History Texts - lo rgyus   ·   Religious History Texts - chos 'byung	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྡོ་རྗེ་ཐེག་པའི་ལམ་སྐོར་དགུར་གྲགས་པ་ལས། གྲུབ་ཆེན་བི་རཱུ་པའི་བཞེད་སྲོལ་ལམ་འབྲས་བུ་དང་བཅས་པ་ནི། ནག་པོ་པ། ཌ་མ་རུ་པ། ཨ་ཝ་དྷུ་ཏི་པ། ག་ཡ་དྷ་རའི་བར་བརྒྱུད་ནས། དེ་ཉིད་བོད་དུ་ལན་གསུམ་ཕེབས་པའི་དང་པོ་འབྲོག་མི། བར་པ་འགོས། ཐ་མ་གྱི་ཇོ་ཟླ་འོད་རྣམས་ལ་གནང་བའི་ལུགས་སྲོལ་ལས། བར་པ་ལ་ཀྱེ་རྡོར་རྒྱུད་རྐྱང་གི་སྨིན་གྲོལ་ལས་ལམ་འབྲས་མ་གནང་བས་གྲུབ་ཆེན་དེས་དངོས་སུ་གནང་བ་གཉིས་སོ། །འབྲོག་མི་ལ་གཞུང་ཚང་བ༧། མན་ངག་ཚང་བ༤། གྲུབ་པ་ཐོབ་པའི་སློབ་མ་གསུམ་ལས། གཉིས་པ་ནི། འབྲོམ་དེ་བ་སྟོན་ཆུང་ཙནྡྲ་བརྟི་ཞེས་གྲགས་པ་དང་། ལྷ་བཙུན་ཀ་ལི། སེ་མཁར་ཆུ་བ་གསུམ་ལས། དང་པོ་ལའང་འགའ་ཞིག་འཕེལ། ཕྱི་མ་ལ་ལམ་འབྲས་རབ་ཏུ་ཐོབ་པ་ཞང་སྟོན་སྐུ་མཆེད། འབྲིང་དུ་ཐོབ་བ་ཞྭ་མ་ལྕམ་སྲིང་། མཐའ་མ་སེ་སྒོམ་བྱང་ཡེ་རྣམས་སོ། །ཀྱེ་རྡོར་བཀའ་བབས་བཞི་ནི། མན་ངག་ལུགས། ཌོམྦྷི་ལུགས། མཚོ་སྐྱེས་ལུགས། ནག་པོ་ལུགས་རྣམས་སོ། །དེ་ནས་ལམ་འབྲས་ཞང་ལུགས་སུ་གྲགས་པ་ནི། ཞང་དགོན་པ་བ། ཞྭ་མ་དཀོན་མཆོག །སློབ་དཔོན་ཉང་སྟོན། མཁན་པོ་སྨོན་མཁར་བའི་བར་དུ་བརྒྱུད་ཅིང་ཅུང་ཟད་འཕེལ། ལམ་འབྲས་ཞྭ་མ་ལུགས་ལ་སྔར་བྱོན་པ་མོ་རྒྱུད་ཕོ་རྒྱུད་གཉིས། ཕྱིས་བྱུང་བ་བསྲེས་པའི་ལུགས་དང་གསུམ་མོ། །དང་པོ་ནི། གྲུབ་པའི་དབང་མོ་མ་གཅིག་ཞྭ་མ་དང་། དེས་ཉང་སྒོམ་ཆེན་མོ། དེས་བླ་མ་སྨོན་མཁར་བ། དེས་གཉོས་ཆོས་ཀྱི་གཟི་བརྗིད། དེས་བླ་མ་ཀོ་བྲག་པ་སོགས་ལས་བརྒྱུད་དེ་དར་རྒྱས་སུ་གྱུར། བླ་མ་ཀོ་བྲག་པའི་ལུགས་ནི། ཀོ་བྲག་པ་བསོད་ནམས་རྒྱལ་མཚན་གྱིས་མཁན་པོ་སྨོན་མཁར་བ་ལ་ཞྭ་མ་མོ་བརྒྱུད་དང་། ཞང་དགོན་པ་བར་ཞྭ་མ་དཀོན་མཆོག་གིས་ཞུས་པ་ལམ་འབྲས་ཞང་ལུགས་སུ་གྲགས་པ་རྣམས་ཞུས་ནས་བསྒོམས་པས་དྲོད་རྟགས་སྐྱེས། ལྷག་པར་གེགས་སེལ་ལ་མཁས་པར་བྱུང་། དེ་ལ་ལྷ་ལུང་པ་མཁའ་འགྲོ། རྒྱ་གར་ཡེ་ཤེས། གཉོས་རྡོ་རྗེ་སེང་གེ་གསུམ་གྱིས་ཞུས་ནས་འཕེལ། གཉིས་པ་ཞྭ་མ་ཕོ་ལུགས་སུ་གྲགས་པ་ལ། ལམ་འབྲས་སྤང་རྗེ་ལུགས་ནི། སེ་སྟོན་ལ་ཞྭ་མའི་མིང་པོ་རྗེ་ཁུང་བུ་ཞྭ་མ་ཆོས་ཀྱི་རྒྱལ་པོ། དེས་སེ་སྒོམ་བྲག་སྐྱབས་དང་། ཞྭ་མ་ཙིནྡྲཱི་གཉིས། དེ་གཉིས་ཀ་ལ་སྤང་རྗེ་ཉི་མ་གྲགས་དང་རྗེ་མར་ཇོ་བ་གཉིས་ཀྱིས་ཞུས་སོ། །སྔ་མར་ཟངས་ཕུག་པ་སོགས་ཀྱིས་ཞུས་ནས་དར། ལམ་འབྲས་མང་ལམ་ལུགས་ནི། ཞྭ་མ་ཙིནྡྲཱི་ལས། མང་ལམ་ཇོ་སྟན་སེང་གེ་བཟང་བོའམ། བྱང་ཆུབ་བཟང་པོའམ། རྣལ་འབྱོར་པ་ཀྱཻ་ཡི་རྡོ་རྗེར་གྲགས་པའི་བཤེས་གཉེན་དེས་ཞུས་ཤིང་བསྒོམས་པས་གྲུབ་པ་བརྙེས་ནས་ཡིག་ཆ་ཡང་མང་དུ་མཛད་དོ། །གསུམ་པ་བསྲེས་པའི་ལུགས་ལ། ལམ་འབྲས་བཀའ་རྒྱ་མའམ་ཆ་གན་ལུགས་ནི། ས་པཎ་གྱི་སློབ་མ་ཀུན་མཁྱེན་པུ་ཧྲང་པ་སངས་རྒྱས་གྲགས་ལས་ས་ལུགས་དང་། མ་གཅིག་ཞྭ་མ་ནས། ཞང་རས། མང་ལམ། ཞིག་པོ། ཉང་རས། མ་གཅིག་གི་དེ་ལས་ཞྭ་མ་ལུགས་གཉིས་ཀ་བླ་མ་ཆ་གན་པ་དབང་ཕྱུག་རྒྱལ་མཚན་གྱིས་ཞུས་ཤིང་བསྒོམས་པས་ཉམས་རྟོགས་འཁྲུངས་ནས་ཡིག་ཆ་རྒྱ་ཆེར་མཛད། དེ་ལ་མཉམ་མེད་གྲགས་པ་རྒྱལ་མཚན་སོགས་ཀྱིས་ཞུས་ནས་དར་རོ། །ཇོ་ནང་ལུགས་ནི། ཀུན་སྤངས་ཀུན་ཏུ་བཟང་པོ་དཔལ་མི་བསྐྱོད་རྡོ་རྗེར་གྲགས་པས་ཁ་ཆར་བ་རིན་ཆེན་འོད་ལ་ཞྭ་ལུགས་ཕོ་རྒྱུད་མོ་རྒྱུད་གཉིས་ཀ་གསན་ནས་ཉམས་བཞེས་གནང་། སེ་སྟོན་གྱིས་རྣམ་འཕྲུལ་མཐོང་བ་ལ་བསྟེན། ཞྭ་ལུགས། འབྲོམ་ལུགས། ས་ལུགས་གསུམ་བསྲེས་ནས་རྡོ་རྗེའི་ཚིག་རྐང་རྩ་འགྲེལ་མཛད། དེ་ལ་བྲག་ཁ་གྲགས་པ་སེང་གེ་སོགས་ཀྱིས་ཞུས་ཏེ་དར། དབང་རྒྱལ་ལུགས་ནི། ཇོ་ནང་ཀུན་སྤངས་ཆེན་པོའི་སློབ་མ་ལ་སྟོད་གཉོས་དབང་རྒྱལ་དུ་གྲགས་པ་དེས་ཞྭ་ལུགས་ཀྱི་ལམ་འབྲས་གསན་ནས་སྦྱོར་དྲུག་བསྲེས་ནས་ལམ་འབྲས་སྔ་མ་སུ་དང་ཡང་མི་མཐུན་པའི་རྟོག་བཟོ་ཆེན་པོ་བྱས་སོ། །ལམ་འབྲས་ལྕེ་སྒོམ་ལུགས་ནི། ས་ཆེན་གྱི་སློབ་མ་དཔལ་ཏལ་ཕུག་པ་དང་། ཡང་ས་ཆེན་ཉིང་སློབ་སློབ་དཔོན་ཇོ་བོ་ལ་ལྕེ་སྒོམ་རིན་པོ་ཆེས་ཞུས། བསྒོམས་པས་ཉམས་མྱོང་བསམ་གྱིས་མི་ཁྱབ་པ་ཤར། ལམ་འབྲིང་པོའི་ཡིག་ཆ་ཞིག་མཛད་པ་ཡང་ཕལ་ཆེར་ས་ལུགས་དང་མཐུན། དེས་སྤྲུལ་སྐུ་བརྩོན་འགྲུས་ལ་གནང་ནས་ཅུང་ཟད་འཕེལ། ལམ་འབྲས་ཕག་གྲུ་ལུགས་ནི། ཕག་མོ་གྲུ་པས་ས་ཆེན་ལོ་༡༢བསྟེན། མན་ངག་ཐོབ་པས་གཞུང་བཤད་དཔེ་མཛོད་མ་ཞེས་གྲགས་པ་མཛད་དོ། །གྱི་ཇོ་ལུགས༡། འབྲོམ་ལུགས༢། ཞང་སྟོན་ལུགས༣། ཞམ་ལུགས་༤ཀོ་བྲག་ལུགས༥། སྤང་རྗེ་ལུགས༦། མང་ལམ་ལུགས༧། ཆ་གན་ལུགས༨། ཇོ་ནང་ལུགས༩། དབང་རྒྱལ་ལུགས༡༠། ལྕེ་སྒོམ་ལུགས༡༡། ས་ལུགས༡༢། །མཁར་ཆུ་ལུགས༡༣། གཉོས་ལུགས༡༤། །ཉང་ལུགས༡༥། འགོས་ལོས་འགྱུར་བའི་རྡོ་རྗེའི་ཚིག་རྐང་དང་དབང་གི་རབ་དབྱེ་འདུག་པས་འགོས་ལུགས༡༦། ཕྱི་མ་ཕེབས་པའི་ཚེ་གཉོས་ལོ་ཙཱ་བ་ཡོན་ཏན་གྲགས་པ་ལ་ཡང་གསུངས་པར་ངེས་པས་གཉོས་ལུགས༡༧། གཞན་ཡང་གྲགས་པ་དང་། ས་པཎ་གཉིས་ཀའི་སློབ་མ་ནགས་ཕུག་༡༨པ་འཇམ་དབྱངས་ཤེས་རབ་འོད་ཟེར་ལས་འཕེལ་བ་དང་། གྲགས་པཎ་གཉིས་ཀའི་སློབ་མ་ཤར་བ་ཤེར་འབྱུང་གིས་གཞུང་བཤད་ཆེན་མོ་མཛད༡༩། ཡང་ཆོས་རྗེའི་སློབ་མ་ཚོགས་སྒོམ་པ་ཀུན་དགའ་དཔལ་ལས་གཉགས་སྙིང་པོ་རྒྱལ་མཚན། དེ་ལས་བར་སྟོན་དང་། རྒྱ་རྒན་ཐུགས་རྗེ་བསོད་ནམས་༢༠གཉིས་ཀྱིས་ཞུས་ཤིང་གཉིས་ཀས་ཡིག་ཆ་མཛད། ཡང་ཆོས་རྗེའི་སློབ་མ་དམར་སྟོན་ཆོས་ཀྱི་རྒྱལ་པོས་ལམ་འབྲས་གཞུང་བཤད་དམར་མ་སོགས་མཛད་པ་མཐའ་ཡས་སོ། །ཕྱིས་སུ་ངོར་རྫོང་ཚར་གསུམ་ལས་རྒྱ་ཆེར་འཕེལ་བ་ལགས། ། ༈ གསང་འདུས་ཀླུ་སྒྲུབ་ལུགས་ལ། འགོས་ཀྱིས་པཎ་གྲུབ་མང་པོ་ལས་གསན། དེ་ལ་སློབ་མ་ཀ་བ་ཚུགས་པ་བཞི། གདུང་ཐེག་པ་བརྒྱད་སོགས་ལས་ཚོགས་ཕྲིན་ལས་ལ་མཁས་པ་ཕྱམ་དང་དྲལ་མ་གཤིབས་པ་ལྟ་བུ་བསམ་གྱིས་མི་ཁྱབ་པ་ལས་དམར་སྟོན་སེང་རྒྱལ་དང་རྔོག་ཡེ་ཤེས་སེང་གེ་སོགས་ལ་བརྒྱུད་པས་རྔོག་ལུགས་ཞེས་གྲགས། མར་པ་ལོ་ཙཱས་ནཱ་རོ་པ་དང་། ནུབ་ཀུ་རུ་ཀྵེ་ཏྲར་ཡེ་ཤེས་སྙིང་པོ་ལ་གསན་པའི་སྔ་མར་གྲུབ་ཐོབ་ཀུ་སཱ་ལི་དང་། ཕྱི་མར་མཁས་པ་པཎྜི་ཏའི་བརྒྱུད་པར་འདོད། ཇོ་བོས་རོང་པ་འགར་དགེ་ལ་གནང་བ་ཇོ་ལུགས་སམ་རོང་ལུགས། ནི་སྐ་ལངྐ་དེ་བ་ལ་ཆག་ལོ་ཙཱ་བས་ཞུས་པ་ཆག་ལུགས། ཡང་རེ་བེནྡྲ་པ་ལ་ཡང་ཞུས། ཤཱཀ྄་ཤྲཱི་ལས་ས་པཎ་གྱིས་ཞུས་པ་ས་ལུགས། དེ་ལ་དཔྱལ་ལོ་ཙཱ་བ་ཆོས་ཀྱི་བཟང་པོས་ཞུས་པ་དཔྱལ་ལུགས་ཏེ། སྔ་མ་ལྔ་དབང་བཤད་གཉིས་ཀ་དང་། ཕྱི་མ་དབང་རྒྱུད་དོ། །ཡེ་ཤེས་ཞབས་ལུགས་ནི། པདྨཱ་ཀ་ར་ལས་ལོ་ཆེན་རིན་བཟང་གིས་གསན་པ་དང་། བ་ལིཾ་ཨཱ་ཙཪྻ་ལས་གཉོས་ལོ་ཙཱ་བ་རྡོ་རྗེ་བླ་མས་གསན་པ་གཉོས་ལུགས་དང་། པུཎྱེ་ཤྲཱི་ལས་རྭ་རྡོར་གྲགས་ཀྱིས་གསན་པ་རྭ་ལུགས་སོ། །བདེ་མཆོག་ལཱུ་ཧི་པ། ཕམ་མཐིང་པ་སྐུ་མཆེད་ནས་ཀློག་སྐྱ་ཤེས་རབ་བརྩེགས། དེས་མལ་ལོ། ས་ཆེན་སོགས་བརྒྱུད་པ་ས་ལུགས། བལ་པོ་བྷ་དནྟ་པ་ལས་མར་པ་དངོས་ལ་བརྒྱུད་པ་མར་ལུགས། ཇོ་བོ་ཤཱནྟི་པ་ནས་རོང་པ་འགར་དགེར་བརྒྱུད་པ་རོང་ལུགས་སམ་ཇོ་ལུགས། ཤཱཀ་ཤྲཱི་ནས། བི་བྷཱུ་ཏི་ཙནྡྲ་ནས་བརྒྱུད་པར་པཎ་ཆེན་ལུགས། ཀ་ཎ་ཤྲཱི། ཕམ་མཐིང་པ། བྷ་དནྟ་གསུམ་ཀར་པུ་ཧྲང་ལོ་ཆུང་གྲགས་མཆོག་གིས་གསན་པར་དབང་བཤད་གཉིས་ཀ་ཡོད། གཞན་ཡང་པུ་ཧྲང་པའི་བརྒྱུད་འཛིན་ལས་གྱེས་པ་དམར་ལུགས་དང་། པཎ་ཆེན་ཀྵི་ཏི་གརྦྷ་ནས་དཔྱལ་ཆོས་བཟང་ལ་བརྒྱུད་པ་དཔྱལ་ལུགས་ཏེ། བཤད་པ་ལ་མལ་གྱོ་དང་། པུ་ཧྲང་ལུགས་གཙོ་ཆེ། ཡང་སྦལ་ཡང་སྣང་ལུགས་ནི། ཇོ་བོ་རྗེ་ལ་ལོ་ཆེན་དང་། ནག་ཚོས་གསན་པའི་རྒྱུན་ལས་སྒོམ་པ་མང་སྒོམ་ལ་སྦལ་ཡང་སྣང་གིས་གསན་ནོ། །ནག་པོ་པའི་དབང་རྒྱུད་ནི་མལ་གྱོ་ལས་བརྒྱུད། དྲིལ་བུ་པ་ཀློག་སྐྱ་ནས་མལ་གྱོ་དང་། ཁ་ཆེ་པཎ་ཆེན་ནས། སྤྱི་བོ་ལྷས་པ་སེང་གེ་དཔལ་ལ་བརྒྱུད་པ་ས་ལུགས་དང་། ཁ་ཆེ་ལུགས་གཉིས་དང་། དྲིལ་བུ་པའི་ལྷ་བཅུ་གསུམ་མ་ནི། སུ་མ་ཏི་ཀཱི་རྟི་ནས་མར་པ་དོ་པ་ལ་བརྒྱུད་པའོ། །ལོ་པའི་མངོན་རྟོགས་རྩ་འགྲེལ། ཕྱི་རོལ་མཆོད་པ། ལག་མཆོད། གཏོར་ཆོག་ལྔ་ལ་ལཱུ་ཧི་པའི་སྨད་ལྔར་གྲགས། དང་པོ་རང་ཉིད་དང་། ཕྱི་མ་༤པྲཛྙ་རཀྵི་ཏས་མཛད། སྒྲུབ་དཀྱིལ་སྦྱིན་སྲེག་སྟེ་བསྐྱེད་རིམ་དང་། དཔྱིད་ཐིག །གསང་བའི་དེ་ཉིད་གསལ་བ། ཨོ་ལ་པ་ཏི་སྟེ་རྫོགས་རིམ་སྟོན་པའི་ནག་པོ་གཞུང་དྲུག །སྒྲུབ་ཐབས། དབང་གི་བྱ་བའི་རིམ་པ། རིམ་ལྔ་སྟེ་དྲིལ་བུ་སྐོར་གསུམ་ཞེས་གྲགས། མངོན་པ་ཀུན་བཏུས་བཤད་པ་སྔ་འགྱུར་གྱི་སྐབས་དཱ་ན། ཛི་ན་གཉིས་ལ་ཅོག་ཞང་། སྐབས་གསན་ནས་རིམ་པར་བརྒྱུད་པ་ལ། ཕྱིས་ལི་སྟོན་ཆོས་གྲགས་ལ་བྲང་ཏི་དར་མ་སྙིང་པོས་གསན་ནས་འཆད་ཉན་རྩལ་དུ་བཏོན། རྣལ་འབྱོར་རྒྱུད་འཇམ་དཔལ་གསང་ལྡན། འཇམ་དབྱངས་ནས་འཇམ་བཤེས། དེས་སྒེག་པའི་རྡོ་རྗེ་ནས་རིམ་པར་བོད་དུ་སྨྲྀ་ཏིས་ཤཱནྟིང་གརྦྷ་ལས་དར་བར་མཛད། ཆད་སྡེ་ངག་གི་དབང་ཕྱུག །ཁམ་པ་ཤེས་རབ་རྡོ་རྗེ། ཡང་ན་ཤཱིནྟཾ་གརྦྷ་ནས། ཉི་མའི་དངོས་གྲུབ། སྐྱི་བྱེ་མ་ལུང་པ། དེ་གཉིས་ཀ་ལས། ཤེར་རྡོར་གྱིས་གསན། དེ་ལ་རྔོག་ཆོས་སྐུ་རྡོ་རྗེ་ནས་རྔོག་པའི་ཕྱོགས་ལ་བཀའ་བབས་པར་བཤད་སྣང་ངོ་། ། ༈ བསྟན་བཅོས་ཉེར་སྦས་སོགས་ཀྱིས་བྱེ་བྲག་བཤད་པའི་ནང་ཚན་འདུལ་བ་བྱེ་བྲག་བཤད་པ། དྲི་མེད་བཤེས་གཉེན་དང་ཁྱད་པར་བཤེས་གཉེན་སོགས་ཀྱིས་སོ་ཐར་གྱི་མདོ་བཀྲལ། དགེ་ལེགས་བཤེས་གཉེན་གྱིས་ལུང་མ་མོ་དང་། དུལ་ལྷས་རྣམ་འབྱེད། དགེ་བའི་བཤེས་གཉེན་གྱིས་ལུང་ཞུ་བ། ཚུལ་ཁྲིམས་བཤེས་གཉེན་གྱིས་ཕྲན་ཚེགས། ཕྱིས་དབྱིག་གཉེན་སློབ་མ་འདུལ་བ་རང་ལས་མཁས་པ་ཡོན་ཏན་འོད་ཀྱིས་མདོ་རྩ་དང་། རང་འགྲེལ། ཆོས་བཤེས་ཀྱིས་རྒྱ་ཆེར་འགྲེལ་སོགས་མཛད། བོད་དུ་བཤད་རྒྱུན་ནི་བསྟན་པའི་གཏད་རབས་བདུན་གྱི་རྗེས། ཕྱིར་མི་འོང་བློས་མི་འབེབས། ཡོན་ཏན་འོད། ཤཱཀྱ་འོད་ཆོས་བཤེས་གཉིས། དེས་སེང་གེའི་གདོང་ཅན། དེས་དཱ་ན་ཛི་ན་གཉིས་ལ་སྐ་ཅོག་ཞང་གསུམ་གྱིས་གསན་ནས་དར། སྡོམ་རྒྱུན་ནི་འཕགས་པ་ཤཱ་རིའི་བུ་ནས་བརྒྱུད་བོ་དྷི་སཏྭ་ལས་བོད་དུ་དར་ཞིང་། བཤད་རྒྱུན་སྟོད་འདུལ་སྨད་འདུལ་གཉིས་ཀ་གཟུས་ནས་ཆུ་བོ་གཅིག་འདྲེས་སུ་གྱུར་པས་གཟུས་ལ་བུ་བཞིར་གྲགས་པ་སོགས་བྱུང་། ཁ་ཆེ་པཎ་ཆེན་གྱིས་ཀྱང་ས་པཎ་ལ་མདོ་རྩ་དང་། ཁྲོ་ཕུར་མེ་ཏོག་ཕྲེང་རྒྱུད་གསུངས་ནས། དེའི་རྒྱུན་ལས་ཕྱིས་སུ་བུ་སྟོན་རིན་པོ་ཆེ་དང་། ཀུན་མཁྱེན་རོང་སྟོན་སོགས་ལ་ལུགས་གསུམ་ཀ་བཀའ་བབས་པར་གྱུར། ། ༈ མར་པས་ནཱ་རོ་པ་སྟེ་རྩོད་མེད་ཞབས་ལ་གཙོ་བོར་དགྱེས་རྡོར། དེས་ལུང་བསྟན་ཏེ་ནུབ་ཀུ་རུ་ཀྵེ་ཏྲར་ཡེ་ཤེས་སྙིང་པོར་གསང་འདུས། ཀུ་ཀུ་རི་པ་ལ་མ་ཧཱ་མཱ་ཡ། མཻ་ཏྲི་པ་ལ་ཕྱག་ཆེན། རུས་པའི་རྒྱན་ཅན་མ་ལ་གདན་བཞི་སོགས་གསན། ཕྱིས་རྔོག་སྟོན་ཆོས་སྐུ་རྡོ་རྗེས་དེ་རྣམས་གསན། དེ་ཡང་དགྱེས་རྡོར་ལྷ་དགུ། བདག་མེད་ལྷ་མོ་བཅོ་ལྔ། གདན་བཞི་ཡབ་བཀའ་ལྷ་མང་། ཡུམ་བཀའ་ཡེ་ཤེས་དབང་ཕྱུག །མ་ཧཱ་མཱ་ཡཱ་ལྷ་ལྔ། གུར་རིགས་བསྡུས་མཁའ་འགྲོ་ལྔ་སྟེ་མར་པ་ལས་བྱུང་བ་དྲུག་དང་། གནམ་བྱེ་མ་ལུང་པ་དང་ཁམ་པ་ཤེར་རྡོར་ལས་མཚན་བརྗོད་རྣལ་འབྱོར་རྒྱུད་ལྟར་བཀྲལ་བའི་བཤད་པ་དང་། འཇམ་དཔལ་གསང་ལྡན་གྱི་སྐོར་གསན་ཏེ་རྔོག་དཀྱིལ་བདུན་དུ་གྲགས་སོ། ། ༈ ངོར་ལུགས་དཀྱིལ་འཁོར༧། ཀྱཻ་གུར་སཾ་གསུམ། ལུ་ནག །གསང་འཇམ་རྣམས་སོ། །དགེ་ལྡན་པས་གསང་བདེ་འཇིགས་གསུམ་རྩལ་བཏོན་བྱས། ཀར་ཕྱོགས་ཁ་ཅིག་བདེ་ཀྱཻ་དུས་གསུམ་ལ་ནན་ཏན་མཛད། ནག་རྒྱལ་ཕག་གསུམ་ཞེས་པའང་སྣང་སྟེ་ཀཾ་ཚང་ལུགས་སོ། །བདེ་མཆོག་མཁའ་འགྲོ་རྒྱ་མཚོ་དང་། རྡོ་རྗེ་མཁའ་འགྲོ་དང་། སྡོམ་འབྱུང་དང་། བོང་ཞལ་ཅན་དང་། སྟོད་འགྲེལ་ལུགས་སོགས་མང་ངོ་། །རྙིང་ལུགས་བཀའ་མ། མདོ་སྒྱུ་སེམས་གསུམ། ལོ་དྲིལ་ནག་གསུམ། གཏེར་མ་བླ་རྫོགས་ཞི་དྲག་གཉིས་ཐུགས་གསུམ། ཞི་དྲག་གཉིས། བཀའ་རྣམ་གསུམ་དགོངས་སྔ་ཕྱི་བར་གསུམ་ཕུར་གསུམ་བཀའ་གཏེར་གཉིས་རྣམས་དར་སོ་ཆེ། བཀའ་འདུས། དགོངས་འདུས། རིག་འཛིན་ཡོངས་འདུས་སམ་གྲོལ་ཐིག་གསུམ་ལ་དགོངས་འདུས་སྔ་ཕྱི་བར་གསུམ། བདེར་འདུས། གསང་རྫོགས། རང་ཤར་གསུམ་ལ་བཀའ་བརྒྱད་རྣམ་གསུམ། ཕུར་པ་ཇོ་ལུགས། འཁོན་ལུགས། ངོར་ལུགས་སོགས་བཀའ་མ་དང་། ཆོས་དབང་། སངས་གླིང་། རཏྣ་གླིང་པ་སོགས་གཏེར་མ་སྔ་ཕྱི་མང་། ། ༈ དུས་འཁོར་རྒྱུད་འདི་བོད་དུ་གྱི་དུས་ཞབས་པ་ཤྲཱི་བྷ་དྲ་དང་། ཞང་རྒྱ་གར་བརྩེགས། ཇོ་ཟླ་འོད་ཀྱིས་འགྱུར། དེ་ནས་བཟུང་མར་འོད་བྱང་ཆུབ་ཤེས་རབ། རྨ་དགེ་བའི་བློ་གྲོས། བློ་གྲོས་སྙིང་པོ། བསོད་ནམས་ཡེ་ཤེས། འབྲོམ། འགོས། གཉན་དར་གྲགས། ལྡི་རི་ཆོས་གྲགས། རོང་གླིང་ལོ་ཙཱ། སྟེང་པ། རྭ་ཆོས་རབ། ཆག །ཤོང་ལོ། དབང་ལོ་རྣམ་གཉིས་འགྱུར་སོགས་ཉི་ཤུ་རྩ་ལྔ་ཙམ་བྱུང་། མན་ངག་གི་བཀའ་ནི། དུས་འཁོར་ཞབས་ཆུང་བ་ལས་ཁ་ཆེ་ཟླ་མགོན་གྱིས་གསན། དེ་ཉིད་པད་དཀར་གྱིས་ལུང་བསྟན་ནས་བོད་དུ་བྱོན། དེས་སྒོམ་པ་དཀོན་མཆོག་སྲུངས། དེས་སྒྲོ་སྟོན་གྲུབ་ཆེན་ཡུ་མོ་བ། མཁས་པ་ཀྲེ་བོ་མགོན་པོ། ལྡུམ་ར་སྒང་པ། སྙེ་མདོ་ཐམས་ཅད་མཁྱེན་པ། སྙེ་མདོ་བསོད་ནམས་དཔལ་དང་། ཀུན་དགའ་དོན་གྲུབ། དེས་རང་བྱུང་པ་སྟེ་ཀར་ལུགས། ཡང་ཡུ་མོ་ནས། གྲུབ་ཐོབ་སེ་མོ་ཆེ། འཇམ་གསར། ཀུན་མཁྱེན་ཆོས་སྐུ་འོད་ཟེར། འཕགས་བོད། བུ་རིན་པོ་ཆེ་སྟེ་བུ་ལུགས། ཀུན་མཁྱེན་ཆོས་འོད་ནས། ཀུན་སྤངས་ཐུགས་རྗེ་བརྩོན་འགྲུས། བྱང་སེམས་རྒྱལ་བ་ཡེ་ཤེས། ཡོན་ཏན་རྒྱ་མཚོ། ཀུན་མཁྱེན་དོལ་བུ་པ་སྟེ་ཇོ་ནང་ལུགས་སམ། བཤད་པ་འབྲོམ་འགྱུར་ལ་མཛད་པས་འབྲོམ་ལུགས། གྱི་ཇོ་ཟླ་བའི་འོད་ཟེར་གྱི་གསུང་ཁྲམ་པདྨ་འོད་ཟེར་གྱིས་བྲིས་པ་གྱི་ཇོ་ལུགས། ཙཱ་མི་ལོ་ཙཱ་ནས། རྒྭ་ལོ། ཞང་རིན་པོ་ཆེ་སོགས་ཚལ་ལུགས། ཙ་མི། རྒྭ་ལོ། ས་ཆེན་སོགས་ས་ལུགས། སེ་ལོ་ཙཱ། གཉོས་འོད་མ། བཀྲ་ཤིས་རིན་ཆེན། དེ་གཉིས་ལ་དུས་འཁོར་བ་སངས་རྒྱས་རྡོ་རྗེ། དེས་ཨོ་རྒྱན་པ། དེ་ལ་ལྷ་ཆེན་ཚུལ་ཁྲིམས་རྡོ་རྗེ། དེ་ལ་རྗེ་རང་བྱུང་པས་གསན་པ་སོགས་ཙ་མི་ལུགས། ཤེའུ་ལོ་ཙཱ། རྒྱ་ཐམས་ཅད་མཁྱེན་པ། སྙེ་མདོ་བ་ཡབ་སྲས་ཏེ་སྙེ་མདོ་ལུགས། ས་མནྟ་ཤྲཱི། རྭ་ཆོས་རབ། དྲེ་བོ་མགོན་པོ་སོགས་དང་། ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་ནང་བཏབ། བྱང་སེམས་རྒྱལ་ཡེ་སོགས་ཀུན་སྤངས་བུ་བཞིར་གྲགས་པ་བྱུང་བ་དང་། ཕྱིས་དོལ་བུ་པ་ལ་སློབ་མ་ཀུན་སྤངས་ཆོས་གྲགས། ཕྱོགས་རྒྱལ་བ། ཉ་དབོན་པ། མ་ཏི་རྣམ་གཉིས་སོགས་བྱོན་ནས་སློབ་མ་མཁས་ཤིང་སྦྱོར་བ་ཡན་ལག་དྲུག་གི་རྣལ་འབྱོར་ལྷུར་ལེན་པ་མང་པོས་དབུས་གཙང་ཁམས་གསུམ་གྱི་རི་སུལ་ཐམས་ཅད་བཀང་། དེ་ནས་བརྒྱུད་དེ་བུ་ལ་བཀའ་བབས་པ་རྭ་ལུགས། རཏྣ་རཀྵི་ཏ་དང་། རི་བེནྡྲ་སོགས་ལ་ཆག་ལོ། དེས་གོ་ལུང་པ་མདོ་སྡེ་དཔལ། ཨོ་རྒྱན་པ་སོགས་ཆག་ལུགས། པཎ་ཆེན་ཤཱཀྱ་ཤྲཱི། དཔྱལ་ལོ་སོགས་པཎ་ཆེན་ལུགས་སམ་དཔྱལ་ལོ་ལུགས། ཤ་བ་རིས་བི་བྷཱུ་ཏི་ཙནྡྲ་དང་། ཕྱིས་ནགས་རིན་ལ་གསུངས་པ་སོགས་མཐའ་ཡས་སོ། །གསང་འདུས་མར་འགོས་གཉོས་གསུམ། འཇིགས་བྱེད་རྭ་སྐྱོ་ཞང་གསུམ། བདེ་མཆོག་མར་དོ་མལ་ཇོ་ལོ་ཆུང་གསུམ། ཀྱེ་རྡོར་མར་འབྲོག་འགོས་གསུམ། དུས་འཁོར་རྭ་འབྲོམ་ཙ་གསུམ་ལས་བྱུང་ཞེས་བཤད་པའང་ཡོད། ། ༈ མངོན་རྟོགས་རྒྱན་ལ་སློབ་དཔོན་ཐོགས་མེད༡། དབྱིག་གཉེན༢། འཕགས་པ་རྣམ་གྲོལ་སྡེ༣། བཙུན་པ་གྲོལ་༤སྡེ་བཞིས་རང་རང་གི་བློ་གྲོས་དང་འཚམས་པའི་འགྲེལ་པ་རེ་བྱས། དེ་རྗེས་སློབ་དཔོན་སེང་གེ་བཟང་པོས་༥རྒྱ་ཆེར་བཀྲལ། དེ་ཉིད་ཆོས་བཤེས། ཤེར་འབྱུང་བློ་གྲོས། གསེར་གླིང་པ་རྣམས་ཀྱིས་བསྐྱངས། དེ་ལ་ཟུར་ཟ་བར་བཞེད་ནས་སྙིགས་དུས་ཀྱི་ཐམས་ཅད་མཁྱེན་པ་རིན་འབྱུང་ཞི་བས་༦འགྲེལ་པ་སོགས་རྒྱ་ཆེར་མཛད། ཐོགས་མེད་ཀྱི་མན་ངག་གི་རྒྱུན་ལ་བརྟེན་ཀྱང་། དཾཥྟྭཾ་སེ་ནཱ་དང་། དི་གིརྷ་སྟིས་སྒོ་གསུམ་རྣམ་གྲངས་བཅུ་གཅིག་དང་། གཙོ་བོའི་དོན་གྱིས་༣༢བཀྲལ་ཚུལ་གཞན་མཛད་དོ། ། ༈ བཀའ་གདམས་པ་ནི། ཇོ་བོའི་སློབ་མ་ཁུ་རྔོག་འབྲོམ་གསུམ། འབྲོམ་སྟོན་གྱི་སློབ་མ་རིགས་གསུམ་རྣམ་འཕྲུལ། པུ་ཏོ་བ་རིན་ཆེན་གསལ། སྤྱན་སྔ་ཚུལ་ཁྲིམས་འབར། ཕུ་ཆང་བ་གཞོན་ནུ་རྒྱལ་མཚན་གསུམ། དང་པོ་ནི། གཞུང་པར་གྲགས་ཤིང་སློབ་མ་ཤར་བ་ཡོན་ཏན་གྲགས་དང་། གླང་ཐང་པ་གཉིས། རྡོ་རྗེ་སེང་གེ། རོག་དམར་ཞུང་བ། དོལ་པ་ཤེས་རབ་རྒྱ་མཚོ། འབན་སྒོམ་གུང་རྒྱལ་ཚུལ་ཁྲིམས་རྒྱལ་བ་སོགས་མང་དུ་བྱོན། བར་པ་ལ་གདམས་ངག་པ་དང་། ཕྱི་མ་ལ་མན་ངག་པ་ཞེས་གྲགས་པ་དང། ཡང་ཇོ་བོའི་སློབ་མ་གུང་ཐང་པ་ནག་ཚོ་ལོ་ཙཱ་སོགས་དངོས་སློབ་བརྒྱད་དང་། ཉིང་སློབ་གཉིས་ཏེ་བཅུ་བསྟེན་པ་རོང་པ་ཕྱག་སོར་བ་སྟེ། འདི་ལག་སོར་དགོན་པར་བཞུགས། བརྒྱུད་པ་དང་བཅས་པ་ལ་བཀའ་གདམས་འོག་མའམ་ནག་ཚོའི་བཀའ་བརྒྱུད་ཅེས་གྲགས། འདི་ལ་རོང་པའི་བུ་བཞིར་གྲགས་པ་སོགས་བྱུང་། དེ་ལྟར་ན་བཀའ་གདམས་གཞུང་པ། མན་ངག་པ། གདམས་ངག་པ། ནག་ཚོའི་བཀའ་བརྒྱུད་དེ་བཞི་ནི་རྩ་བ་ལྟ་བུ་ཡིན་ནོ། ། ༈ བཀའ་བརྒྱུད་པ་ནི། དྭགས་པོ་ལྷ་རྗེའི་སློབ་མ་ཁམས་པ་མི་གསུམ་གྱི་ནང་ཚན་ཁམས་པ་དབུ་སེ་ལས་ཀརྨ་ཀཾ་ཚང་གི་བརྒྱུད་པ་དང་། ཕག་གྲུ་ལས་ཕག་གྲུ་བཀའ་བརྒྱུད་དང་། དྭགས་པོ་སྒོམ་ཚུལ་གྱི་སློབ་མ་ཞང་ལས་ཚལ་པ་བཀའ་བརྒྱུད་དང་། ཕག་གྲུའི་སློབ་མ་གླིང་རས་ལས་འབྲུག་པ་དང་། ཀྱུ་ར་རིན་ཆེན་དཔལ་དང། ཉེ་གནས་བཀྲ་ཤིས་དཔལ་གཉིས་ལས་འབྲི་སྟག་བཀའ་བརྒྱུད་དང་། རྒྱལ་ཚབ་རིན་ཆེན་མགོན་པོ་དང་། དེའི་དབོན་པོ་ཀུན་ལྡན་གཙང་པ་རས་ཆུང་གཉིས་ཀྱི་ཕྱི་མའི་དབོན་རྒྱུད་ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་སོགས་ཁྲོ་ཕུ་བཀའ་བརྒྱུད་སྐོར་བྱོན། ། ༈ ཤར་ཆེན་ཡེ་ཤེས་རྒྱལ་མཚན་གྱི་སློབ་མ་ས་བཟང་པ་ཀུན་དགའ་བཟང་པོ་ནི། བོད་ཆོས་རྒྱལ་སྐུ་ཞང་གི་རིགས་ཅོག་རོའི་གདུང་ལས་འཁྲུངས། གསན་བསམ་རྒྱ་མཚོའི་ཕ་རོལ་སོན། ༤༥པར་གཤེགས། ཐེག་ཆེན་ཆོས་ཀྱི་རྒྱལ་པོའི་སློབ་མ་བླ་བྲང་རྫོང་ཆུང་གི་རྗེས་འབྲང་ཀུན་དགའ་རྒྱལ་མཚན་ནི། ཞང་ཡེ་ཤེས་སྡེའི་རིགས་ལས་ཆུ་བྱི་ལོར་འཁྲུངས། སློབ་མ་དཔལ་ལྡན་ཆོས་སྐྱོང་། གཞོན་ནུ་རྒྱལ་མཆོག་སོགས་སོ། །གཡག་ཕྲུག་པ་ནི། རྩེ་ཐང་གི་ཆེན་པོ་བྱང་ཆུབ་རིན་ཆེན་པའི་སྲས་སུ་འཁྲུངས། ས་སྐྱ་རྩེ་ཐང་སོགས་སུ་མཚན་ཉིད་དང་། གོན་འགྱོ་ཡེ་ཤེས་དཔལ་ལས་གསུང་ངག་སོགས་གསན། རྗེས་འབྲངས་གོང་དཀར་དང་མུས་སྲད་པ་སོགས་སོ། །བུ་དོལ་གྱི་སློབ་མ་ཉ་བརྩོན་གཉིས་ཞེས་གྲགས་པའི་མཁས་པའི་དབང་ཕྱུག་བརྩོན་འགྲུས་དཔལ་ལ་གཙོ་བོར་བསྟེན། སློབ་མའི་གཙོ་བོ་རོང་སྟོན་དང་། གཞོན་ནུ་རྒྱལ་མཆོག་སོགས་བྱུང་། རེད་མདའ་བ་ནི་ས་སྐྱ་དང་ཉེ་བར་འགར་གྱི་རིགས་ལས་འཁྲུངས། མ་ཏི་པཎ་ཆེན་སོགས་གཙོ་བོར་བསྟེན། དབུ་མ་ཐལ་འགྱུར་བའི་སྲོལ་ལྷག་པར་བཏོད། སློབ་མའང་གཞུང་ལུགས་རབ་འབྱམས་སྨྲ་བའི་བཤེས་གཉེན་བདུན་སོགས་བྱུང་། ནཱ་ལེནྡྲ་རོང་རྔོག་ཕྱ་སྟོན་གྱི་སློབ་མ་བྱམས་ཆེན་སངས་རྒྱས་སྐྱེད་ཚལ། འཕེལ་དང་། གསེར་མདོག་ཤཱཀྱ་མཆོག་ལྡན། སངས་རྒྱས་འཕེལ་གྱི་སློབ་མ་གོར་མ་རྟ་ནག་པ་རྣམས་ཀྱིས་ཆོས་གྲྭ་སོ་སོར་བཏབ་ཅིང་མཚན་ཉིད་ལ་ཕན་པར་བྱུང་། ༈ ལམ་འབྲས་ལུགས་སྲོལ་བཅོ་བརྒྱད་ནི། བླ་ཆེན་འབྲོག་མི་དང་གྱི་ཇོ་ལས་༡བརྒྱུད་པ་གཉིས། སྔ་མ་ལས་འབྲོག་མའི་སྲས་ཨིནྡྲ་དང་རྡོ་རྗེ་ལས་བརྒྱུད་པའི་ལམ་འབྲས༢། ཐུགས་ཀྱི་སྲས་འབྲོམ་དེ་བའི་ལམ་འབྲས༣། སེ་མཁར་ཆུང་བ་ནས་འཕེལ་བ་རབ་འབྲིང་ཐ་གསུམ་དུ་ཡོད་པའི། འབྲིང་དུ་ཐོབ་པ་ཞྭ་མ་ནས་འཕེལ་བ་ལས། ཕོ་རྒྱུད་མོ་རྒྱུད་བསྲེས་བརྒྱུད་དང་གསུམ། ཕོ་རྒྱུད་ལའང་། རྗེ་ཁུམ་བུ་པ་ཆོས་རྒྱལ་ནས་སེ་སྒོམ་གྲགས་རྒྱལ། རྗེ་མལ་ཇོ་བ་སོགས་ལས་འཕེལ་བའི་སློབ་བརྒྱུད་༤དང་། སྲས་ཞྭ་མ་ཙནྡྲི་ནས་སྤ་ང་རྗེ་ཉི་མ་གྲགས་ལས་འཕེལ་བའི་སྲས་རྒྱུད་དེ་༥གཉིས། མོ་རྒྱུད་ལའང་། ཞྭ་མའི་སློབ་མ་ཉ་༦སྒོམ། སྨོན་དཀར་བ་སྟོན་གཡུང་༧། དབོན་པོ་ཤེར་༥ཚུལ་གསུམ་ལས་འཕེལ་བའི་ལུགས་གསུམ། བསྲེས་རྒྱུད་ལས། ཞྭ་མ་ཕོ་མོ་བསྲེས་པ་དུམ་བུ་ཀོ་བྲག་པའི་ལུགས༩། ཞྭ་མ་ཕོ་མོ་གཉིས་དང་ས་ལུགས་གསུམ་བསྲེས་པ་ཆ་གན་ལུགས༡༠། འབྲོག་མི་ལུགས་དང་གྱི་ཇོ་ལུགས་བསྲེས་པ་ཇོ་ནང་ཀུན་སྤངས་༡༡ལུགས། ལམ་འབྲས་སྦྱོར་དྲུག་རྫོགས་ཆེན་གསུམ་བསྲེས་པ་ལ་སྟོད་དབང་རྒྱལ་གྱི་ལུགས༡༢། རབ་ཏུ་ཐོབ་པ་ཞང་གི་བརྒྱུད་པར། ས་ལུགས་ལ་སྔ་བུ་ཕག་གྲུ་ལུགས་དང་༡༣། ལྕེ་སྒོམ་ལུགས༡༤། ཕྱི་བུ་ལ་ཉེ་བརྒྱུད་དང་༡༥། རིང་བརྒྱུད་༡༦གཉིས། འབྲོག་མིའི་ཇོ་སྲས་གཉིས། ཞང་སྟོན་མཆེད་གཉིས་ཏེ་བཞིའི་གསུང་གཅེས་པ་བསྡུས་པ་མང་ལམ་ཞིག་པོའི་ལུགས༡༧། སེ་སྟོན་ལས་ཐ་མར་ཐོབ་པ་བྱང་ཆུབ་ཡེ་ཤེས་ཀྱིས་ཞིང་ཕུག་པ་ལ་གདམས་པའི་ལུགས་༡༨སོ། ། ༈ ཆོས་འབྱུང་བསྟན་པ་རྒྱ་མཚོར་འཇུག་པའི་གྲུ་ཆེན་གྱིས་བཅད་ལ། བསོད་ནམས་བསྐྱེད་པའི་ཆེད་དུ་བསྟན་པ་ལ་བྱ་བ་བསྒྲུབ་པའི་ཚུལ། ཡིད་ཆེས་བསྐྱེད་པའི་ཆེད་དུ་བསྟན་པ་ཇི་ལྟར་བྱུང་བའི་ཚུལ། བརྩོན་འགྲུས་བསྐྱེད་པའི་ཆེད་དུ་བསྟན་པའི་གནས་ཚད་བཤད་པའོ། །དང་པོ་ལ། བཤད་སྒྲུབ་ཀྱི་ཕན་ཡོན་བསྟན་པ། བསྒྲུབ་བྱའི་ཆོས་ངོས་བཟུང་བ། བཤད་པ་ཇི་ལྟར་བྱ་བའི་ཚུལ་༤༥དངོས་སོ། ། ༈ གཉིས་པ་ལ་སྟོན་པ་སངས་རྒྱས་བྱོན་ཚུལ། བསྟན་པ་དམ་ཆོས་དར་ཚུལ། དེ་ཉིད་བོད་དུ་བྱུང་༢༡༡ཚུལ་ལོ། ། ༈ གསུམ་པ་ལ་བསྟན་པ་གནས་པའི་གཞི། བསྐལ་པའི་རྣམ་གཞག །བསྟན་པའི་གནས་ཚད་དངོས། བརྩོན་འགྲུས་བསྐྱེད་དགོས་པའི་རྒྱུ་མཚན་༣༤༨ནོ། །འདིའི་བསྟན་པ་ཕྱི་དར་གྱི་རྣམ་གཞག་ལ། སྨད་ནས་ཇི་ལྟར་དར་བའི་ཚུལ་གྱིས་དགེ་ཚུལ་ཆུ་གཏོར་མར་གྲགས་པའི་ལོ་རྒྱུས་ཡན་ཆད་དཀོན་མཆོག་ལྷུན་གྲུབ་དང་། ལྷག་མ་སངས་རྒྱས་ཕུན་ཚོགས་ཀྱིས་ཁ་བསྐངས་བའོ། །པ་ཚབ་ནི། འཕན་ཡུལ་དུ་འཁྲུངས། ཁ་ཆེར་བྱོན། ལོ་༢༣སྦྱངས་པ་མཛད། སླར་དབུས་སུ་ཕེབས། ཤར་བས་ཀྱང་གྲོགས་མཛད་དེ་ཐལ་འགྱུར་བའི་སྲོལ་བཏོད། འབྲོག་མི་རིན་བཟང་ལས་༣༣ཀྱིས་གཞོན། ཆུ་སྦྲུལ་ལ་མང་མཁར་དུ་འཁྲུངས། སྐུ་ཚེའི་སྟོད་ལ་བཤད་པ་དང་། སྨད་ལ་སྒྲུབ་པ་གཙོ་བོར་མཛད། དགུང་ལོ་༥༨པར་གཤེགས། གྱི་ཇོས་དུས་འཁོར། ཐོད་པ། རྡོ་རྗེ་བདུད་རྩི། བདེ་མཆོག་སོགས། བསྒྱུར། འགོས་ཁུག་པ་རྒྱལ་དུ་ལན་༣བྱོན། གྲུབ་༧༢ཐོབ། མཁའ་འགྲོ་མའི་བླ་མ་གཉིས་བསྟེན་ནོ། ༈ །

[edit]

chos 'byung skor sogs thor bu/ rdo rje theg pa'i lam skor dgur grags pa las/__grub chen bi rU pa'i bzhed srol lam 'bras bu dang bcas pa ni/__nag po pa/__Da ma ru pa/__a wa d+hu ti pa/__ga ya d+ha ra'i bar brgyud nas/__de nyid bod du lan gsum phebs pa'i dang po 'brog mi/__bar pa 'gos/__tha ma gyi jo zla 'od rnams la gnang ba'i lugs srol las/__bar pa la kye rdor rgyud rkyang gi smin grol las lam 'bras ma gnang bas grub chen des dngos su gnang ba gnyis so/__/'brog mi la gzhung tshang ba7/__man ngag tshang ba4/__grub pa thob pa'i slob ma gsum las/__gnyis pa ni/__'brom de ba ston chung tsan+d+ra brti zhes grags pa dang /__lha btsun ka li/__se mkhar chu ba gsum las/__dang po la'ang 'ga' zhig 'phel/__phyi ma la lam 'bras rab tu thob pa zhang ston sku mched/__'bring du thob ba zhwa ma lcam sring /__mtha' ma se sgom byang ye rnams so/__/kye rdor bka' babs bzhi ni/__man ngag lugs/__Dom+b+hi lugs/__mtsho skyes lugs/__nag po lugs rnams so/__/de nas lam 'bras zhang lugs su grags pa ni/__zhang dgon pa ba/__zhwa ma dkon mchog__/slob dpon nyang ston/__mkhan po smon mkhar ba'i bar du brgyud cing cung zad 'phel/__lam 'bras zhwa ma lugs la sngar byon pa mo rgyud pho rgyud gnyis/__phyis byung ba bsres pa'i lugs dang gsum mo/__/dang po ni/__grub pa'i dbang mo ma gcig zhwa ma dang /__des nyang sgom chen mo/__des bla ma smon mkhar ba/__des gnyos chos kyi gzi brjid/__des bla ma ko brag pa sogs las brgyud de dar rgyas su gyur/__bla ma ko brag pa'i lugs ni/__ko brag pa bsod nams rgyal mtshan gyis mkhan po smon mkhar ba la zhwa ma mo brgyud dang /__zhang dgon pa bar zhwa ma dkon mchog gis zhus pa lam 'bras zhang lugs su grags pa rnams zhus nas bsgoms pas drod rtags skyes/__lhag par gegs sel la mkhas par byung /__de la lha lung pa mkha' 'gro/__rgya gar ye shes/__gnyos rdo rje seng ge gsum gyis zhus nas 'phel/__gnyis pa zhwa ma pho lugs su grags pa la/__lam 'bras spang rje lugs ni/__se ston la zhwa ma'i ming po rje khung bu zhwa ma chos kyi rgyal po/__des se sgom brag skyabs dang /__zhwa ma tsin+d+rI gnyis/__de gnyis ka la spang rje nyi ma grags dang rje mar jo ba gnyis kyis zhus so/__/snga mar zangs phug pa sogs kyis zhus nas dar/__lam 'bras mang lam lugs ni/__zhwa ma tsin+d+rI las/__mang lam jo stan seng ge bzang bo'am/__byang chub bzang po'am/__rnal 'byor pa kyai yi rdo rjer grags pa'i bshes gnyen des zhus shing bsgoms pas grub pa brnyes nas yig cha yang mang du mdzad do/__/gsum pa bsres pa'i lugs la/__lam 'bras bka' rgya ma'am cha gan lugs ni/__sa paN gyi slob ma kun mkhyen pu hrang pa sangs rgyas grags las sa lugs dang /__ma gcig zhwa ma nas/__zhang ras/__mang lam/__zhig po/__nyang ras/__ma gcig gi de las zhwa ma lugs gnyis ka bla ma cha gan pa dbang phyug rgyal mtshan gyis zhus shing bsgoms pas nyams rtogs 'khrungs nas yig cha rgya cher mdzad/__de la mnyam med grags pa rgyal mtshan sogs kyis zhus nas dar ro/__/jo nang lugs ni/__kun spangs kun tu bzang po dpal mi bskyod rdo rjer grags pas kha char ba rin chen 'od la zhwa lugs pho rgyud mo rgyud gnyis ka gsan nas nyams bzhes gnang /__se ston gyis rnam 'phrul mthong ba la bsten/__zhwa lugs/__'brom lugs/__sa lugs gsum bsres nas rdo rje'i tshig rkang rtsa 'grel mdzad/__de la brag kha grags pa seng ge sogs kyis zhus te dar/__dbang rgyal lugs ni/__jo nang kun spangs chen po'i slob ma la stod gnyos dbang rgyal du grags pa des zhwa lugs kyi lam 'bras gsan nas sbyor drug bsres nas lam 'bras snga ma su dang yang mi mthun pa'i rtog bzo chen po byas so/__/lam 'bras lce sgom lugs ni/__sa chen gyi slob ma dpal tal phug pa dang /__yang sa chen nying slob slob dpon jo bo la lce sgom rin po ches zhus/__bsgoms pas nyams myong bsam gyis mi khyab pa shar/__lam 'bring po'i yig cha zhig mdzad pa yang phal cher sa lugs dang mthun/__des sprul sku brtson 'grus la gnang nas cung zad 'phel/__lam 'bras phag gru lugs ni/__phag mo gru pas sa chen lo 12bsten/__man ngag thob pas gzhung bshad dpe mdzod ma zhes grags pa mdzad do/__/gyi jo lugs1/__'brom lugs2/__zhang ston lugs3/__zham lugs 4ko brag lugs5/__spang rje lugs6/__mang lam lugs7/__cha gan lugs8/__jo nang lugs9/__dbang rgyal lugs10/__lce sgom lugs11/__sa lugs12/__/mkhar chu lugs13/__gnyos lugs14/__/nyang lugs15/__'gos los 'gyur ba'i rdo rje'i tshig rkang dang dbang gi rab dbye 'dug pas 'gos lugs16/__phyi ma phebs pa'i tshe gnyos lo tsA ba yon tan grags pa la yang gsungs par nges pas gnyos lugs17/__gzhan yang grags pa dang /__sa paN gnyis ka'i slob ma nags phug 18pa 'jam dbyangs shes rab 'od zer las 'phel ba dang /__grags paN gnyis ka'i slob ma shar ba sher 'byung gis gzhung bshad chen mo mdzad19/__yang chos rje'i slob ma tshogs sgom pa kun dga' dpal las gnyags snying po rgyal mtshan/__de las bar ston dang /__rgya rgan thugs rje bsod nams 20gnyis kyis zhus shing gnyis kas yig cha mdzad/__yang chos rje'i slob ma dmar ston chos kyi rgyal pos lam 'bras gzhung bshad dmar ma sogs mdzad pa mtha' yas so/__/phyis su ngor rdzong tshar gsum las rgya cher 'phel ba lags/___/__!_gsang 'dus klu sgrub lugs la/__'gos kyis paN grub mang po las gsan/__de la slob ma ka ba tshugs pa bzhi/__gdung theg pa brgyad sogs las tshogs phrin las la mkhas pa phyam dang dral ma gshibs pa lta bu bsam gyis mi khyab pa las dmar ston seng rgyal dang rngog ye shes seng ge sogs la brgyud pas rngog lugs zhes grags/__mar pa lo tsAs nA ro pa dang /__nub ku ru k+She trar ye shes snying po la gsan pa'i snga mar grub thob ku sA li dang /__phyi mar mkhas pa paN+Di ta'i brgyud par 'dod/__jo bos rong pa 'gar dge la gnang ba jo lugs sam rong lugs/__ni ska lang+ka de ba la chag lo tsA bas zhus pa chag lugs/__yang re ben+d+ra pa la yang zhus/__shAka? shrI las sa paN gyis zhus pa sa lugs/__de la dpyal lo tsA ba chos kyi bzang pos zhus pa dpyal lugs te/__snga ma lnga dbang bshad gnyis ka dang /__phyi ma dbang rgyud do/__/ye shes zhabs lugs ni/__pad+mA ka ra las lo chen rin bzang gis gsan pa dang /__ba liM A tsaR+Ya las gnyos lo tsA ba rdo rje bla mas gsan pa gnyos lugs dang /__puN+ye shrI las rwa rdor grags kyis gsan pa rwa lugs so/__/bde mchog lU hi pa/__pham mthing pa sku mched nas klog skya shes rab brtsegs/__des mal lo/__sa chen sogs brgyud pa sa lugs/__bal po b+ha dan+ta pa las mar pa dngos la brgyud pa mar lugs/__jo bo shAn+ti pa nas rong pa 'gar dger brgyud pa rong lugs sam jo lugs/__shAka shrI nas/__bi b+hU ti tsan+d+ra nas brgyud par paN chen lugs/__ka Na shrI/__pham mthing pa/__b+ha dan+ta gsum kar pu hrang lo chung grags mchog gis gsan par dbang bshad gnyis ka yod/__gzhan yang pu hrang pa'i brgyud 'dzin las gyes pa dmar lugs dang /__paN chen k+Shi ti gar+b+ha nas dpyal chos bzang la brgyud pa dpyal lugs te/__bshad pa la mal gyo dang /__pu hrang lugs gtso che/__yang sbal yang snang lugs ni/__jo bo rje la lo chen dang /__nag tshos gsan pa'i rgyun las sgom pa mang sgom la sbal yang snang gis gsan no/__/nag po pa'i dbang rgyud ni mal gyo las brgyud/__dril bu pa klog skya nas mal gyo dang /__kha che paN chen nas/__spyi bo lhas pa seng ge dpal la brgyud pa sa lugs dang /__kha che lugs gnyis dang /__dril bu pa'i lha bcu gsum ma ni/__su ma ti kI rti nas mar pa do pa la brgyud pa'o/__/lo pa'i mngon rtogs rtsa 'grel/__phyi rol mchod pa/__lag mchod/__gtor chog lnga la lU hi pa'i smad lngar grags/__dang po rang nyid dang /__phyi ma 4pradz+nya rak+Shi tas mdzad/__sgrub dkyil sbyin sreg ste bskyed rim dang /__dpyid thig__/gsang ba'i de nyid gsal ba/__o la pa ti ste rdzogs rim ston pa'i nag po gzhung drug__/sgrub thabs/__dbang gi bya ba'i rim pa/__rim lnga ste dril bu skor gsum zhes grags/__mngon pa kun btus bshad pa snga 'gyur gyi skabs dA na/__dzi na gnyis la cog zhang /__skabs gsan nas rim par brgyud pa la/__phyis li ston chos grags la brang ti dar ma snying pos gsan nas 'chad nyan rtsal du bton/__rnal 'byor rgyud 'jam dpal gsang ldan/__'jam dbyangs nas 'jam bshes/__des sgeg pa'i rdo rje nas rim par bod du smr-i tis shAn+ting gar+b+ha las dar bar mdzad/__chad sde ngag gi dbang phyug__/kham pa shes rab rdo rje/__yang na shIn+taM gar+b+ha nas/__nyi ma'i dngos grub/__skyi bye ma lung pa/__de gnyis ka las/__sher rdor gyis gsan/__de la rngog chos sku rdo rje nas rngog pa'i phyogs la bka' babs par bshad snang ngo /___/__!_bstan bcos nyer sbas sogs kyis bye brag bshad pa'i nang tshan 'dul ba bye brag bshad pa/__dri med bshes gnyen dang khyad par bshes gnyen sogs kyis so thar gyi mdo bkral/__dge legs bshes gnyen gyis lung ma mo dang /__dul lhas rnam 'byed/__dge ba'i bshes gnyen gyis lung zhu ba/__tshul khrims bshes gnyen gyis phran tshegs/__phyis dbyig gnyen slob ma 'dul ba rang las mkhas pa yon tan 'od kyis mdo rtsa dang /__rang 'grel/__chos bshes kyis rgya cher 'grel sogs mdzad/__bod du bshad rgyun ni bstan pa'i gtad rabs bdun gyi rjes/__phyir mi 'ong blos mi 'bebs/__yon tan 'od/__shAkya 'od chos bshes gnyis/__des seng ge'i gdong can/__des dA na dzi na gnyis la ska cog zhang gsum gyis gsan nas dar/__sdom rgyun ni 'phags pa shA ri'i bu nas brgyud bo d+hi satwa las bod du dar zhing /__bshad rgyun stod 'dul smad 'dul gnyis ka gzus nas chu bo gcig 'dres su gyur pas gzus la bu bzhir grags pa sogs byung /__kha che paN chen gyis kyang sa paN la mdo rtsa dang /__khro phur me tog phreng rgyud gsungs nas/__de'i rgyun las phyis su bu ston rin po che dang /__kun mkhyen rong ston sogs la lugs gsum ka bka' babs par gyur/___/__!_mar pas nA ro pa ste rtsod med zhabs la gtso bor dgyes rdor/__des lung bstan te nub ku ru k+She trar ye shes snying por gsang 'dus/__ku ku ri pa la ma hA mA ya/__mai tri pa la phyag chen/__rus pa'i rgyan can ma la gdan bzhi sogs gsan/__phyis rngog ston chos sku rdo rjes de rnams gsan/__de yang dgyes rdor lha dgu/__bdag med lha mo bco lnga/__gdan bzhi yab bka' lha mang /__yum bka' ye shes dbang phyug__/ma hA mA yA lha lnga/__gur rigs bsdus mkha' 'gro lnga ste mar pa las byung ba drug dang /__gnam bye ma lung pa dang kham pa sher rdor las mtshan brjod rnal 'byor rgyud ltar bkral ba'i bshad pa dang /__'jam dpal gsang ldan gyi skor gsan te rngog dkyil bdun du grags so/___/__!_ngor lugs dkyil 'khor7/__kyai gur saM gsum/__lu nag__/gsang 'jam rnams so/__/dge ldan pas gsang bde 'jigs gsum rtsal bton byas/__kar phyogs kha cig bde kyai dus gsum la nan tan mdzad/__nag rgyal phag gsum zhes pa'ang snang ste kaM tshang lugs so/__/bde mchog mkha' 'gro rgya mtsho dang /__rdo rje mkha' 'gro dang /__sdom 'byung dang /__bong zhal can dang /__stod 'grel lugs sogs mang ngo /__/rnying lugs bka' ma/__mdo sgyu sems gsum/__lo dril nag gsum/__gter ma bla rdzogs zhi drag gnyis thugs gsum/__zhi drag gnyis/__bka' rnam gsum dgongs snga phyi bar gsum phur gsum bka' gter gnyis rnams dar so che/__bka' 'dus/__dgongs 'dus/__rig 'dzin yongs 'dus sam grol thig gsum la dgongs 'dus snga phyi bar gsum/__bder 'dus/__gsang rdzogs/__rang shar gsum la bka' brgyad rnam gsum/__phur pa jo lugs/__'khon lugs/__ngor lugs sogs bka' ma dang /__chos dbang /__sangs gling /__rat+na gling pa sogs gter ma snga phyi mang /___/__!_dus 'khor rgyud 'di bod du gyi dus zhabs pa shrI b+ha dra dang /__zhang rgya gar brtsegs/__jo zla 'od kyis 'gyur/__de nas bzung mar 'od byang chub shes rab/__rma dge ba'i blo gros/__blo gros snying po/__bsod nams ye shes/__'brom/__'gos/__gnyan dar grags/__ldi ri chos grags/__rong gling lo tsA/__steng pa/__rwa chos rab/__chag__/shong lo/__dbang lo rnam gnyis 'gyur sogs nyi shu rtsa lnga tsam byung /__man ngag gi bka' ni/__dus 'khor zhabs chung ba las kha che zla mgon gyis gsan/__de nyid pad dkar gyis lung bstan nas bod du byon/__des sgom pa dkon mchog srungs/__des sgro ston grub chen yu mo ba/__mkhas pa kre bo mgon po/__ldum ra sgang pa/__snye mdo thams cad mkhyen pa/__snye mdo bsod nams dpal dang /__kun dga' don grub/__des rang byung pa ste kar lugs/__yang yu mo nas/__grub thob se mo che/__'jam gsar/__kun mkhyen chos sku 'od zer/__'phags bod/__bu rin po che ste bu lugs/__kun mkhyen chos 'od nas/__kun spangs thugs rje brtson 'grus/__byang sems rgyal ba ye shes/__yon tan rgya mtsho/__kun mkhyen dol bu pa ste jo nang lugs sam/__bshad pa 'brom 'gyur la mdzad pas 'brom lugs/__gyi jo zla ba'i 'od zer gyi gsung khram pad+ma 'od zer gyis bris pa gyi jo lugs/__tsA mi lo tsA nas/__rgwa lo/__zhang rin po che sogs tshal lugs/__tsa mi/__rgwa lo/__sa chen sogs sa lugs/__se lo tsA/__gnyos 'od ma/__bkra shis rin chen/__de gnyis la dus 'khor ba sangs rgyas rdo rje/__des o rgyan pa/__de la lha chen tshul khrims rdo rje/__de la rje rang byung pas gsan pa sogs tsa mi lugs/__she'u lo tsA/__rgya thams cad mkhyen pa/__snye mdo ba yab sras te snye mdo lugs/__sa man+ta shrI/__rwa chos rab/__dre bo mgon po sogs dang /__kun spangs thugs rje brtson 'grus kyis jo nang btab/__byang sems rgyal ye sogs kun spangs bu bzhir grags pa byung ba dang /__phyis dol bu pa la slob ma kun spangs chos grags/__phyogs rgyal ba/__nya dbon pa/__ma ti rnam gnyis sogs byon nas slob ma mkhas shing sbyor ba yan lag drug gi rnal 'byor lhur len pa mang pos dbus gtsang khams gsum gyi ri sul thams cad bkang /__de nas brgyud de bu la bka' babs pa rwa lugs/__rat+na rak+Shi ta dang /__ri ben+d+ra sogs la chag lo/__des go lung pa mdo sde dpal/__o rgyan pa sogs chag lugs/__paN chen shAkya shrI/__dpyal lo sogs paN chen lugs sam dpyal lo lugs/__sha ba ris bi b+hU ti tsan+d+ra dang /__phyis nags rin la gsungs pa sogs mtha' yas so/__/gsang 'dus mar 'gos gnyos gsum/__'jigs byed rwa skyo zhang gsum/__bde mchog mar do mal jo lo chung gsum/__kye rdor mar 'brog 'gos gsum/__dus 'khor rwa 'brom tsa gsum las byung zhes bshad pa'ang yod/___/__!_mngon rtogs rgyan la slob dpon thogs med1/__dbyig gnyen2/__'phags pa rnam grol sde3/__btsun pa grol 4sde bzhis rang rang gi blo gros dang 'tshams pa'i 'grel pa re byas/__de rjes slob dpon seng ge bzang pos 5rgya cher bkral/__de nyid chos bshes/__sher 'byung blo gros/__gser gling pa rnams kyis bskyangs/__de la zur za bar bzhed nas snyigs dus kyi thams cad mkhyen pa rin 'byung zhi bas 6'grel pa sogs rgya cher mdzad/__thogs med kyi man ngag gi rgyun la brten kyang /__daMSh+t+waM se nA dang /__di gir+ha stis sgo gsum rnam grangs bcu gcig dang /__gtso bo'i don gyis 32bkral tshul gzhan mdzad do/___/__!_bka' gdams pa ni/__jo bo'i slob ma khu rngog 'brom gsum/__'brom ston gyi slob ma rigs gsum rnam 'phrul/__pu to ba rin chen gsal/__spyan snga tshul khrims 'bar/__phu chang ba gzhon nu rgyal mtshan gsum/__dang po ni/__gzhung par grags shing slob ma shar ba yon tan grags dang /__glang thang pa gnyis/__rdo rje seng ge/__rog dmar zhung ba/__dol pa shes rab rgya mtsho/__'ban sgom gung rgyal tshul khrims rgyal ba sogs mang du byon/__bar pa la gdams ngag pa dang /__phyi ma la man ngag pa zhes grags pa dang/__yang jo bo'i slob ma gung thang pa nag tsho lo tsA sogs dngos slob brgyad dang /__nying slob gnyis te bcu bsten pa rong pa phyag sor ba ste/__'di lag sor dgon par bzhugs/__brgyud pa dang bcas pa la bka' gdams 'og ma'am nag tsho'i bka' brgyud ces grags/__'di la rong pa'i bu bzhir grags pa sogs byung /__de ltar na bka' gdams gzhung pa/__man ngag pa/__gdams ngag pa/__nag tsho'i bka' brgyud de bzhi ni rtsa ba lta bu yin no/___/__!_bka' brgyud pa ni/__dwags po lha rje'i slob ma khams pa mi gsum gyi nang tshan khams pa dbu se las karma kaM tshang gi brgyud pa dang /__phag gru las phag gru bka' brgyud dang /__dwags po sgom tshul gyi slob ma zhang las tshal pa bka' brgyud dang /__phag gru'i slob ma gling ras las 'brug pa dang /__kyu ra rin chen dpal dang/__nye gnas bkra shis dpal gnyis las 'bri stag bka' brgyud dang /__rgyal tshab rin chen mgon po dang /__de'i dbon po kun ldan gtsang pa ras chung gnyis kyi phyi ma'i dbon rgyud khro phu lo tsA ba gnubs byams pa'i dpal sogs khro phu bka' brgyud skor byon/___/__!_shar chen ye shes rgyal mtshan gyi slob ma sa bzang pa kun dga' bzang po ni/__bod chos rgyal sku zhang gi rigs cog ro'i gdung las 'khrungs/__gsan bsam rgya mtsho'i pha rol son/__45par gshegs/__theg chen chos kyi rgyal po'i slob ma bla brang rdzong chung gi rjes 'brang kun dga' rgyal mtshan ni/__zhang ye shes sde'i rigs las chu byi lor 'khrungs/__slob ma dpal ldan chos skyong /__gzhon nu rgyal mchog sogs so/__/g.yag phrug pa ni/__rtse thang gi chen po byang chub rin chen pa'i sras su 'khrungs/__sa skya rtse thang sogs su mtshan nyid dang /__gon 'gyo ye shes dpal las gsung ngag sogs gsan/__rjes 'brangs gong dkar dang mus srad pa sogs so/__/bu dol gyi slob ma nya brtson gnyis zhes grags pa'i mkhas pa'i dbang phyug brtson 'grus dpal la gtso bor bsten/__slob ma'i gtso bo rong ston dang /__gzhon nu rgyal mchog sogs byung /__red mda' ba ni sa skya dang nye bar 'gar gyi rigs las 'khrungs/__ma ti paN chen sogs gtso bor bsten/__dbu ma thal 'gyur ba'i srol lhag par btod/__slob ma'ang gzhung lugs rab 'byams smra ba'i bshes gnyen bdun sogs byung /__nA len+d+ra rong rngog phya ston gyi slob ma byams chen sangs rgyas skyed tshal/__'phel dang /__gser mdog shAkya mchog ldan/__sangs rgyas 'phel gyi slob ma gor ma rta nag pa rnams kyis chos grwa so sor btab cing mtshan nyid la phan par byung /__!__lam 'bras lugs srol bco brgyad ni/__bla chen 'brog mi dang gyi jo las 1brgyud pa gnyis/__snga ma las 'brog ma'i sras in+d+ra dang rdo rje las brgyud pa'i lam 'bras2/__thugs kyi sras 'brom de ba'i lam 'bras3/__se mkhar chung ba nas 'phel ba rab 'bring tha gsum du yod pa'i/__'bring du thob pa zhwa ma nas 'phel ba las/__pho rgyud mo rgyud bsres brgyud dang gsum/__pho rgyud la'ang /__rje khum bu pa chos rgyal nas se sgom grags rgyal/__rje mal jo ba sogs las 'phel ba'i slob brgyud 4dang /__sras zhwa ma tsan+d+ri nas spa nga rje nyi ma grags las 'phel ba'i sras rgyud de 5gnyis/__mo rgyud la'ang /__zhwa ma'i slob ma nya 6sgom/__smon dkar ba ston g.yung 7/__dbon po sher 5tshul gsum las 'phel ba'i lugs gsum/__bsres rgyud las/__zhwa ma pho mo bsres pa dum bu ko brag pa'i lugs9/__zhwa ma pho mo gnyis dang sa lugs gsum bsres pa cha gan lugs10/__'brog mi lugs dang gyi jo lugs bsres pa jo nang kun spangs 11lugs/__lam 'bras sbyor drug rdzogs chen gsum bsres pa la stod dbang rgyal gyi lugs12/__rab tu thob pa zhang gi brgyud par/__sa lugs la snga bu phag gru lugs dang 13/__lce sgom lugs14/__phyi bu la nye brgyud dang 15/__ring brgyud 16gnyis/__'brog mi'i jo sras gnyis/__zhang ston mched gnyis te bzhi'i gsung gces pa bsdus pa mang lam zhig po'i lugs17/__se ston las tha mar thob pa byang chub ye shes kyis zhing phug pa la gdams pa'i lugs 18so/___/__!_chos 'byung bstan pa rgya mtshor 'jug pa'i gru chen gyis bcad la/__bsod nams bskyed pa'i ched du bstan pa la bya ba bsgrub pa'i tshul/__yid ches bskyed pa'i ched du bstan pa ji ltar byung ba'i tshul/__brtson 'grus bskyed pa'i ched du bstan pa'i gnas tshad bshad pa'o/__/dang po la/__bshad sgrub kyi phan yon bstan pa/__bsgrub bya'i chos ngos bzung ba/__bshad pa ji ltar bya ba'i tshul 45dngos so/___/__!_gnyis pa la ston pa sangs rgyas byon tshul/__bstan pa dam chos dar tshul/__de nyid bod du byung 211tshul lo/___/__!_gsum pa la bstan pa gnas pa'i gzhi/__bskal pa'i rnam gzhag__/bstan pa'i gnas tshad dngos/__brtson 'grus bskyed dgos pa'i rgyu mtshan 348no/__/'di'i bstan pa phyi dar gyi rnam gzhag la/__smad nas ji ltar dar ba'i tshul gyis dge tshul chu gtor mar grags pa'i lo rgyus yan chad dkon mchog lhun grub dang /__lhag ma sangs rgyas phun tshogs kyis kha bskangs ba'o/__/pa tshab ni/__'phan yul du 'khrungs/__kha cher byon/__lo 23sbyangs pa mdzad/__slar dbus su phebs/__shar bas kyang grogs mdzad de thal 'gyur ba'i srol btod/__'brog mi rin bzang las 33kyis gzhon/__chu sbrul la mang mkhar du 'khrungs/__sku tshe'i stod la bshad pa dang /__smad la sgrub pa gtso bor mdzad/__dgung lo 58par gshegs/__gyi jos dus 'khor/__thod pa/__rdo rje bdud rtsi/__bde mchog sogs/__bsgyur/__'gos khug pa rgyal du lan 3byon/__grub 72thob/__mkha' 'gro ma'i bla ma gnyis bsten no/__!_/