JKW-KABUM-18-TSHA-001-009

🚧 This website is under continued development. We appreciate your patience!

Previous Text Back to Volume PageNext Text

ཡང་སྐབས་ཇི་ལྟར་རིགས་པར་དབང་ཆོས་སོགས་ཀྱི་བཀའ་དྲིན་ཞུས་པའི་ལེགས་འབུལ་གྱི་ཚེ།

Wylie title	yang skabs ji ltar rigs par dbang chos sogs kyi bka' drin zhus pa'i legs 'bul gyi tshe
Location	mkhyen brtse'i bka' 'bum Volume 18, sde tshan 1, Text 9, Pages 140-146 (Folios 70b4 to 73b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang skabs ji ltar rigs par dbang chos sogs kyi bka' drin zhus pa'i legs 'bul gyi tshe. In 'jam dbyangs mkhyen brtse'i dbang po'i bka' 'bum, Vol. 18: 140-146. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

9 140-146	ཡང་སྐབས་ཇི་ལྟར་རིགས་པར་དབང་ཆོས་སོགས་ཀྱི་བཀའ་དྲིན་ཞུས་པའི་ལེགས་འབུལ་གྱི་ཚེ། yang skabs ji ltar rigs par dbang chos sogs kyi bka' drin zhus pa'i legs 'bul gyi tshe Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཡང་སྐབས་ཇི་ལྟར་རིགས་པར་དབང་ཆོས་སོགས་ཀྱི་བཀའ་དྲིན་ཞུས་པའི་ལེགས་འབུལ་གྱི་ཚེ། གོང་རྒྱན་དང་། འབེབས་ཞུས་སོགས་དཀྱུས་ལྟར་ལ། ཁྱད་པར་ཚད་མེད་ཐུགས་རྗེའི་འཇུག་པ་ཡིས། །རིང་ནས་བསྐྱངས་པའི་སྐལ་བཟང་བདག་ཅག་ལ། །ཞི་བསིལ་གདམས་པའི་བདུད་རྩི་སྦྱིན་མཛད་པའི། །བཀའ་དྲིན་བྱང་ཆུབ་བར་དུ་གཞལ་ནུས་མིན། །དེ་ལྟ་ནའང་རེ་ཞིག་དད་སྤྲོ་ཡིས། །རྣམ་པར་བསྐུལ་བའི་ལྷག་བློའི་ས་འཛིན་ལས། །ཡིད་སྤྲུལ་མཎྜལ་རྒྱ་ཆེར་སྔོན་འགྲོ་བས། །དངོས་འབྱོར་མེ་ཏོག་ཟེགས་མས་བསྙེན་བཀུར་བགྱི། །ཞེས་སམ། ལྷག་པར་རྒྱལ་ཀུན་གསུང་གི་རྡོ་རྗེ་གང་། །མཆུ་སྒྲོས་དམར་བའི་ཚོན་ཆགས་ལ་བརྟེན་ནས། །ངེས་གསང་གདམས་པའི་བདུད་རྩི་སྩལ་བ་ཡིས། །དབང་རྣོན་གྲུབ་པའི་རྒྱལ་སར་ཡུད་ལ་བཞག །དེ་ཕྱིར་ཚད་མེད་ཐུགས་རྗེའི་ཟླ་ཤེལ་ལས། །དད་དམ་ཆུ་གཏེར་འཕེལ་དང་ཆབ་གཅིག་པར། །དངོས་འབྱོར་མཎྜལ་ཕྲ་མོའི་འདུ་འགོད་ཀྱིས། །ཕྱོགས་རེའི་བཀའ་དྲིན་གཞལ་ལ་མངོན་པར་ཕྱོགས། །ཞེས་སམ། གང་ཚེ་གཞན་ལ་ཕན་པར་དགོངས་པ་ཡི། །ཟབ་རྒྱས་གདམས་པའི་བདུད་རྩིའི་བགོ་སྐལ་གྱིས། །སྐལ་བཟང་བློ་གྲོས་བུམ་པ་འགེངས་བྱས་པའི། །བཀའ་དྲིན་བརྗོད་ན་ཚངས་པའི་བློ་ཡང་ངལ། །དེ་སླད་བྱང་ཆུབ་བར་དུ་དམན་པ་བདག །མགོན་པོ་ཁྱེད་ཀྱིས་འབངས་སུ་དམ་བཅས་ནས། །གནས་སྐབས་ཕྱོགས་རེའི་བསོད་ནམས་བསགས་པའི་སླད། །དངོས་པོའི་མཆོད་སྤྲིན་ཅུང་ཟད་སྟོབ་ལ་བྲེལ། །ཞེས་སམ། ཁྱད་པར་བདག་སོགས་སྐལ་བཟང་འགྲོར། །སྨིན་གྲོལ་ལམ་མཆོག་མངོན་བསྟན་ནས། །སྐུ་བཞིའི་ས་བོན་བཏབ་པ་ཡིས། །བཀའ་དྲིན་ཕ་མཐའ་གཞལ་དུ་ཅི། །འོན་ཀྱང་ལྷག་བསམ་རྒྱ་མཚོ་ལས། །ཉེ་བར་བླངས་པའི་དངོས་འབྱོར་གྱི། །མཎྜལ་ཟེགས་མ་ཕྲ་མོ་ཡིས། །ཅུང་ཟད་བསྙེན་བསྐུར་བགྱི་ལ་ཕྱོགས། །ཞེས་སམ། གང་ཞིག་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོ་ཁྱོད་ཞབས་ནས། །ཟབ་གསང་བདུད་རྩི་སྩལ་བ་ལ། །གུས་སྤྲོའི་མེ་ཏོག་སྙིང་ནས་འཛུམ། །དེ་སླད་བྱང་ཆུབ་སྙིང་པོའི་བར། །གང་གི་དགྱེས་པ་བསྒྲུབས་པ་དང་། །རེ་ཞིག་ཕྱོགས་རེའི་བཀའ་དྲིན་མཐའ། །གཞལ་སླད་མཆོད་སྤྲིན་ཅུང་ཟད་སྟོབ། ཞེས་པ་ལ་སོགས་པ་གང་འོས་ཀྱི་མཐར། དེ་ལྟར་སྐབས་སུ་བབས་པའི་ཚིགས་སུ་བཅད་པ་ཀ་མ་ལའི་ཕང་ཕུང་ལྟར་ཆར་དུ་བསྙིལ་བ་སྔོན་དུ་འགྲོ་བར་བྱས་ནས། ཇི་ལྟར་གསོལ་བ་བཏབ་པའི་སྙིང་པོ་ནི། རིགས་དང་དཀྱིལ་འཁོར་ཐམས་ཅད་ཀྱི་བདག་ཉིད། ལུང་རྟོགས་བསྟན་པ་རྒྱ་མཚོའི་སྣང་བྱེད། སྐལ་བཟང་འགྲོ་བ་ཡོངས་ཀྱི་སྐྱབས་གཅིག །དྲན་པས་སྲིད་དང་ཞི་བའི་འཇིགས་པ་མཐའ་དག་ཡོངས་སུ་འཕྲོག་པར་མཛད་པའི་རྗེ་བཙུན་རྡོ་རྗེ་འཆང་ཆེན་པོ་འདིར་ཡང་སྤྲོ་ན་བླ་མའི་མཚན་བྱང་སྦྱར། གང་གི་ཞལ་སྔ་ནས། གུས་ལྡན་པ་ཁོ་བོ་ཅག་གིས་འདིར་ཡང་རང་གི་མིང་སྨོས་པའམ་དཀྱུས་ལྟར་ཡང་རུང་ངོ་། །ཇི་ལྟར་གསོལ་བ་བཏབ་པ་ལྟར་ཚད་མེད་པའི་ཡེ་ཤེས་ཀྱི་གཟིགས་པས་རྗེས་སུ་དགོངས་ཏེ་སྨིན་གྲོལ་འདིར་བཀའ་ཆོས་གང་ཡིན་གྱི་དམིགས་གསལ་འཛུད། གྱི་གདམས་པ་ཟབ་མོ་སྩལ་བའི་བཀའ་དྲིན་གྱི་ཕ་མཐའ་ནི་སྟོང་གསུམ་ཛམྦུ་ན་དས་བཀང་ཡང་ཅུང་ཟད་ཞིག་གཞལ་དུའང་ལྷག་ལ། དེ་ལྟ་ནའང་རེ་ཞིག་དངོས་སུ་འབྱོར་བའི་བདོག་པ་ཕྲ་མོ་འདིས་མཚོན། ཡིད་སྤྲུལ་གྱི་མཆོད་སྤྲིན་འཕགས་པ་ཀུན་ཏུ་བཟང་པོའི་རྣམ་པར་ཐར་པ་དང་རྗེས་སུ་མཐུན་པར་སྤྲུལ་ཏེ་བྱང་ཆུབ་སྙིང་པོའི་བར་དུ་བསྙེན་བཀུར་བགྱི་བའི་དམ་བཅའ་བདག་གིར་བྱ་བའི་སླད་དུ། ཐོག་མར་བཀྲ་ཤིས་པའི་ལྷ་རྫས་ཀྱི་ཝསྟྲ་དཀར་པོ་སྲིད་དུ་རིང་བ། སོགས་བར་འདིར་འབུལ་བའི་རྣམ་གྲངས་བཀོད་ནས། མཐར་བཅས་རྣམ་གྲངས་༡༨༣འབུལ་ལམ་ཞུས་པ་སྐྱབས་འོག་པ་ཁོ་བོ་ཅག་གི་བསོད་ནམས་ཀྱི་ཚོགས་ཡོངས་སུ་རྫོགས་པའི་ཕྱིར་ཡེ་ཤེས་གཟིགས་པའི་སྤྱན་རས་ཀྱིས་བཙའ་བར་གསོལ་བ་འདེབས་པ་ལགས། སླར་སྨྲས་པས། འདིར་བརྟན་བཞུགས་སོ་སོའི་དཀྱུས་སུ་བྲིས་པ་ལྟར་གང་འོས་བཀོད་པའི་གཤམ། དེ་ལྟར་འདིས་མཚོན་ལེགས་བྱས་ཆུ་ཀླུང་འབུམ། །ཐམས་ཅད་མཁྱེན་པའི་ཆུ་གཏེར་ལ་ཞུགས་པས། །འགྲོ་ཀུན་སྒྲིབ་གཉིས་དྲི་མ་ཡོངས་སྦྱངས་ཏེ། །བྱང་ཆུབ་སྙིང་པོའི་འབྱོར་པས་རྩེན་པར་ཤོག །ཁྱད་པར་རྒྱལ་ཀུན་འདུས་ཞལ་མགོན་ཁྱོད་ཀྱི། །ཐུགས་རྗེའི་ཕྱག་གིས་རྟག་ཏུ་བཟུང་བ་དང་། །ལེགས་གསུང་བདུད་རྩིའི་སྐལ་བ་སྦོམ་གྱུར་པའི། །རྣམ་གྲོལ་ཤིས་པའི་ལང་ཚོ་འབར་གྱུར་ཅིག །སརྦ་དཱ་ཤྲེ་ཡོ་བྷ་བནྟུ། ཞེས་པ་ལྟ་བུ་སྐབས་དང་འབྲེལ་པར་སྦྱར་རོ། །བྱེ་བྲག་ཏུ་རྒྱལ་དབང་ཀརྨ་པས་དབུ་ཞྭ་མཐོང་གྲོལ་ཆེན་མོ་བཞེས་པའི་དུས་ལེགས་འབུལ་སྟོབ་པའི་ཚེ། གོང་གཤམ་གྱི་བརྗོད་བྱ་སྤྱི་དང་བྱེ་བྲག་སྐབས་དང་འབྲེལ་བར་བླངས་པའི་མཐར། ཁྱད་པར་མཐོང་བ་ཙམ་གྱིས་ལས་ཉོན་མུན། །འཇིལ་ལ་ཟླ་ཤེལ་གསར་པས་མཚོན་མིན་པའི། །ཨིནྡྲ་ནཱི་ལའི་ཅོད་པན་གཡོ་བ་གང་། །རྒྱལ་ཀུན་བསྔགས་པའི་རོལ་མོ་ཁྱོད་ལ་བྱིན། །དེ་ཚེ་འཇིག་རྟེན་དབང་ཕྱུག་འདྲེན་པ་ནི། །མི་བསྐྱོད་རིགས་ཀྱི་ཕྱག་རྒྱས་བཏབ་བཞིན་དུ། །གངས་ཅན་རི་བོའི་ཁོངས་སུ་སྣང་བའི་མོད། །ལྷར་བཅས་ཕན་བདེའི་དཔལ་གྱིས་དུད་པར་མཛད། །མཐོང་ཐོས་དྲན་རེག་ཡིད་ཅན་རྡུལ་སྙེད་ཀྱི། །སྒོ་གསུམ་བྱེད་པ་ཨེ་ཝཾ་མཱ་ཡཱའི་དབྱིངས། །སྨིན་ཅིང་སྦྱོང་བའི་ཐབས་མཁས་ལ་འཆེལ་བའི། །ཕྲིན་ལས་འདི་འདྲ་སྲིད་ན་དབེན་ལགས་གྲང་། །དེ་ཕྱིར་ཚད་མེད་ཐུགས་རྗེའི་བཀའ་དྲིན་མཐའ། །བྱང་ཆུབ་སྙིང་པོའི་བར་དུ་གཞལ་དཀའ་ཡང་། །གནས་སྐབས་ཕྱོགས་རེའི་བསོད་ནམས་བསགས་པའི་སླད། །དངོས་འབྱོར་མཆོད་སྤྲིན་ཟེགས་མས་བསྙེན་བཀུར་བགྱི། །ཞེས་སྐབས་སུ་བབས་པའི་ཚིགས་སུ་བཅད་པ་ཉུང་ངུས་མདུན་བསུས་ཏེ། དེང་གི་ཆར་ཡང་ལྷ་དང་བཅས་པའི་འགྲོ་བ་ཐམས་ཅད་ཀྱི་མ་འདྲིས་པའི་མཛའ་བཤེས་ཆེན་པོ་འཇིག་རྟེན་གསུམ་གྱི་འདྲེན་པ་འཕགས་མཆོག་མིག་མི་འཛུམ་པ་རིག་གྲོལ་ངུར་སྨྲིག་གི་ཟློས་གར་ལ་རྩེན་པའི་དཔལ་དུས་གསུམ་མཁྱེན་པ་རྫོགས་པའི་སངས་རྒྱས་ཀརྨ་ཀཿགང་ཉིད་འཕགས་སྐྱེའི་འདུས་པ་རྒྱ་མཚོའི་དབུས་སུ་མི་འཇིགས་པ་ཆོས་ཀྱི་ཁྲི་འཕང་མཐོན་པོར་མཚན་དཔེའི་གཟི་བྱིན་ལྷམ་མེར་བཞུགས་པ་ནས། །རང་རྟགས་ཀྱི་ཅོད་པན་རིགས་བདག་མི་བསྐྱོད་རྒྱལ་བའི་ངོ་བོ་གྲོལ་བ་བཞི་ལྡན་གྱི་བདག་ཉིད་ཆེན་པོ་དབུ་ལ་བཅིངས་ནས་བརྡ་ཐབས་ཀྱི་ཆོས་སྒོ་བྱེ་བ་སྟོན་ཅིང་མཐོང་ཐོས་དྲན་རེག་གི་འགྲོ་བ་ཐམས་ཅད་གནས་སྐབས་མངོན་མཐོ་དང་། མཐར་གྱིས་ངེས་པར་ལེགས་པའི་གོ་འཕང་ལ་བཀྲི་ནས་འབྲེལ་ཚད་དོན་ལྡན་དུ་མཛད་པའི་བཀའ་དྲིན་གྱི་ཕ་མཐའ་ནི་བློ་ཡི་ར་བ་ལས་ཆེས་བརྒལ་བའི་ཕྱིར། དངོས་པོའི་ཟོང་གིས་གཞལ་བའི་ཡུལ་མ་ཡིན་ཡང་། རེ་ཞིག་རང་གཞན་གྱི་རྒྱུད་ཀྱིས་བསྡུས་པའི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་ནམ་མཁའ་མཛོད་ཀྱི་མཆོད་སྤྲིན་ཆེན་པོར་དད་བློས་སྤྲུལ་ཏེ་འབུལ་བའི་མཎྜལ་མཚོན་བྱེད་དུ། ཐོག་མར་བཀྲ་ཤིས་པའི་ལྷ་གོས་ཟླ་བ་ཞུན་མའི་མདོག་ཅན་དཀྱུས་སུ་རིང་བ་སོགས་གྲངས་ལྡན་ཡེ་ཤེས་གཟིགས་པའི་སྤྱན་ཟུར་གཡོ་བའི་རྟེན་ཙམ་དུ་འབུལ་ལམ་ཞུ་བ་དང་། སླར་ཡང་གསོལ་བ་འདེབས་པ། ཞེས་སོགས་དཀྱུས་ཀྱི་ཞབས་བརྟན་བསྔོ་སྨོན་སོགས་ཇི་ལྟར་འོས་པར་སྦྱར་བར་བྱའོ། ། ༈ ཡང་ཡུལ་གང་ཡང་རུང་བར་དམིགས་བསལ་ཆོས་འབྲེལ་ལམ་ཉེས་སེལ་ལྟ་བུར་ཚེ་དབང་ཙམ་ཞུས་པའི་སྐབས་ཡིན་ན། ཁྱད་པར་རྡུལ་བྲལ་རྣམ་ཀུན་མཆོག་ལྡན་ལས། །ཟུང་འཇུག་འཆི་མེད་མགོན་པོའི་སྐུར་བཞེངས་ཏེ། །མཐའ་ཀླས་ཏིང་འཛིན་བྱེ་བའི་འཇུག་ལྡངས་ཀྱིས། །སྲིད་ཞིའི་ཚེ་བཅུད་མ་ལུས་ཡོངས་བསྡུས་ཏེ། །སྐལ་བཟང་ཨུཏྤལ་སར་པའི་དགའ་སྟོན་དུ། །སྨིན་གྲོལ་གྲུབ་པའི་བདུད་རྩིས་དགེ་བྱས་ཚེ། །རིང་འཚོའི་སྲོག་གི་ཀ་བ་ཚུགས་པ་དང་། །ལྷན་ཅིག་དངོས་པོའི་མཆོད་སྤྲིན་ཅུང་ཟད་སྟོབ། །ཞེས་པ་ལྟ་བུ་དང་། ། ༈ གཤིན་པོ་རྗེས་འཛིན་གྱི་ཆོ་ག་ལྟ་བུའི་ཚེ། ལྷག་པར་གཞན་ལ་ཕན་དགོངས་ཆུ་ཡི་གཏེར། །བསྲུབས་སྐྱེས་ངན་འདིར་མི་འཁྲུགས་པ་ལྟ་བུའི་ཚེ། མི་འཁྲུགས་མགོན་པོའི་ཏིང་འཛིན་གྱིས། །ཞེས་སམ། རྡོར་སེམས་ལྟ་བུ་ལ། མི་བསྐྱོད་མགོན་པོའི་ཏིང་འཛིན་གྱིས། ཞེས་སམ། ཞི་ཁྲོ་ལྟ་བུ་ལ། སྒྱུ་འཕྲུལ་དྲྭ་བའི་ཏིང་འཛིན་གྱིས། ཞེས་སམ། གདན་གསུམ་ཞི་ཁྲོའི་ཏིང་འཛིན་གྱིས། ཞེས་པ་ལྟ་བུའི་སྐབས་སུ་བབས་པའི་འབྱིན་འཇུག་བྱའོ། །སོང་སྦྱོང་བའི་ཏིང་འཛིན་གྱིས། །ཟླ་ཤེལ་བསིལ་བའི་རེག་བྱ་མ་སྨད་པས། །དམིགས་ཡུལ་ཐར་པའི་ངལ་འཚོར་ཡུད་ལ་སྦྱར། །དེ་ཚེ་ཚད་མེད་བཀའ་དྲིན་དྲན་པ་ཡི། །ཡིད་སྤྲུལ་མཎྜལ་རྒྱ་ཆེར་སྔོན་འགྲོ་བས། །དངོས་འབྱོར་མཆོད་སྤྲིན་ཉུང་ངུའི་བདོག་པ་ཡིས། །ཞབས་སེན་རི་མོར་བགྱི་བའི་བརྟུལ་ཞུགས་ལེན། །ཞེས་སོགས་རྒྱ་ཆེར་འཕྲུལ་ཤེས་པར་བྱའོ། ། ༈

[edit]

yang skabs ji ltar rigs par dbang chos sogs kyi bka' drin zhus pa'i legs 'bul gyi tshe/ yang skabs ji ltar rigs par dbang chos sogs kyi bka' drin zhus pa'i legs 'bul gyi tshe/__gong rgyan dang /__'bebs zhus sogs dkyus ltar la/__khyad par tshad med thugs rje'i 'jug pa yis/__/ring nas bskyangs pa'i skal bzang bdag cag la/__/zhi bsil gdams pa'i bdud rtsi sbyin mdzad pa'i/__/bka' drin byang chub bar du gzhal nus min/__/de lta na'ang re zhig dad spro yis/__/rnam par bskul ba'i lhag blo'i sa 'dzin las/__/yid sprul maN+Dal rgya cher sngon 'gro bas/__/dngos 'byor me tog zegs mas bsnyen bkur bgyi/__/zhes sam/__lhag par rgyal kun gsung gi rdo rje gang /__/mchu sgros dmar ba'i tshon chags la brten nas/__/nges gsang gdams pa'i bdud rtsi stsal ba yis/__/dbang rnon grub pa'i rgyal sar yud la bzhag__/de phyir tshad med thugs rje'i zla shel las/__/dad dam chu gter 'phel dang chab gcig par/__/dngos 'byor maN+Dal phra mo'i 'du 'god kyis/__/phyogs re'i bka' drin gzhal la mngon par phyogs/__/zhes sam/__gang tshe gzhan la phan par dgongs pa yi/__/zab rgyas gdams pa'i bdud rtsi'i bgo skal gyis/__/skal bzang blo gros bum pa 'gengs byas pa'i/__/bka' drin brjod na tshangs pa'i blo yang ngal/__/de slad byang chub bar du dman pa bdag__/mgon po khyed kyis 'bangs su dam bcas nas/__/gnas skabs phyogs re'i bsod nams bsags pa'i slad/__/dngos po'i mchod sprin cung zad stob la brel/__/zhes sam/__khyad par bdag sogs skal bzang 'gror/__/smin grol lam mchog mngon bstan nas/__/sku bzhi'i sa bon btab pa yis/__/bka' drin pha mtha' gzhal du ci/__/'on kyang lhag bsam rgya mtsho las/__/nye bar blangs pa'i dngos 'byor gyi/__/maN+Dal zegs ma phra mo yis/__/cung zad bsnyen bskur bgyi la phyogs/__/zhes sam/__gang zhig rgyal ba thams cad kyi/__/ye shes phung po khyod zhabs nas/__/zab gsang bdud rtsi stsal ba la/__/gus spro'i me tog snying nas 'dzum/__/de slad byang chub snying po'i bar/__/gang gi dgyes pa bsgrubs pa dang /__/re zhig phyogs re'i bka' drin mtha'/__/gzhal slad mchod sprin cung zad stob/__zhes pa la sogs pa gang 'os kyi mthar/__de ltar skabs su babs pa'i tshigs su bcad pa ka ma la'i phang phung ltar char du bsnyil ba sngon du 'gro bar byas nas/__ji ltar gsol ba btab pa'i snying po ni/__rigs dang dkyil 'khor thams cad kyi bdag nyid/__lung rtogs bstan pa rgya mtsho'i snang byed/__skal bzang 'gro ba yongs kyi skyabs gcig__/dran pas srid dang zhi ba'i 'jigs pa mtha' dag yongs su 'phrog par mdzad pa'i rje btsun rdo rje 'chang chen po 'dir yang spro na bla ma'i mtshan byang sbyar/__gang gi zhal snga nas/__gus ldan pa kho bo cag gis 'dir yang rang gi ming smos pa'am dkyus ltar yang rung ngo /__/ji ltar gsol ba btab pa ltar tshad med pa'i ye shes kyi gzigs pas rjes su dgongs te smin grol 'dir bka' chos gang yin gyi dmigs gsal 'dzud/__gyi gdams pa zab mo stsal ba'i bka' drin gyi pha mtha' ni stong gsum dzam+bu na das bkang yang cung zad zhig gzhal du'ang lhag la/__de lta na'ang re zhig dngos su 'byor ba'i bdog pa phra mo 'dis mtshon/__yid sprul gyi mchod sprin 'phags pa kun tu bzang po'i rnam par thar pa dang rjes su mthun par sprul te byang chub snying po'i bar du bsnyen bkur bgyi ba'i dam bca' bdag gir bya ba'i slad du/__thog mar bkra shis pa'i lha rdzas kyi was+t+ra dkar po srid du ring ba/__sogs bar 'dir 'bul ba'i rnam grangs bkod nas/__mthar bcas rnam grangs 183'bul lam zhus pa skyabs 'og pa kho bo cag gi bsod nams kyi tshogs yongs su rdzogs pa'i phyir ye shes gzigs pa'i spyan ras kyis btsa' bar gsol ba 'debs pa lags/__slar smras pas/__'dir brtan bzhugs so so'i dkyus su bris pa ltar gang 'os bkod pa'i gsham/__de ltar 'dis mtshon legs byas chu klung 'bum/__/thams cad mkhyen pa'i chu gter la zhugs pas/__/'gro kun sgrib gnyis dri ma yongs sbyangs te/__/byang chub snying po'i 'byor pas rtsen par shog__/khyad par rgyal kun 'dus zhal mgon khyod kyi/__/thugs rje'i phyag gis rtag tu bzung ba dang /__/legs gsung bdud rtsi'i skal ba sbom gyur pa'i/__/rnam grol shis pa'i lang tsho 'bar gyur cig__/sarba dA shre yo b+ha ban+tu/__zhes pa lta bu skabs dang 'brel par sbyar ro/__/bye brag tu rgyal dbang karma pas dbu zhwa mthong grol chen mo bzhes pa'i dus legs 'bul stob pa'i tshe/__gong gsham gyi brjod bya spyi dang bye brag skabs dang 'brel bar blangs pa'i mthar/__khyad par mthong ba tsam gyis las nyon mun/__/'jil la zla shel gsar pas mtshon min pa'i/__/in+d+ra nI la'i cod pan g.yo ba gang /__/rgyal kun bsngags pa'i rol mo khyod la byin/__/de tshe 'jig rten dbang phyug 'dren pa ni/__/mi bskyod rigs kyi phyag rgyas btab bzhin du/__/gangs can ri bo'i khongs su snang ba'i mod/__/lhar bcas phan bde'i dpal gyis dud par mdzad/__/mthong thos dran reg yid can rdul snyed kyi/__/sgo gsum byed pa e waM mA yA'i dbyings/__/smin cing sbyong ba'i thabs mkhas la 'chel ba'i/__/phrin las 'di 'dra srid na dben lags grang /__/de phyir tshad med thugs rje'i bka' drin mtha'/__/byang chub snying po'i bar du gzhal dka' yang /__/gnas skabs phyogs re'i bsod nams bsags pa'i slad/__/dngos 'byor mchod sprin zegs mas bsnyen bkur bgyi/__/zhes skabs su babs pa'i tshigs su bcad pa nyung ngus mdun bsus te/__deng gi char yang lha dang bcas pa'i 'gro ba thams cad kyi ma 'dris pa'i mdza' bshes chen po 'jig rten gsum gyi 'dren pa 'phags mchog mig mi 'dzum pa rig grol ngur smrig gi zlos gar la rtsen pa'i dpal dus gsum mkhyen pa rdzogs pa'i sangs rgyas karma kaHgang nyid 'phags skye'i 'dus pa rgya mtsho'i dbus su mi 'jigs pa chos kyi khri 'phang mthon por mtshan dpe'i gzi byin lham mer bzhugs pa nas/__/rang rtags kyi cod pan rigs bdag mi bskyod rgyal ba'i ngo bo grol ba bzhi ldan gyi bdag nyid chen po dbu la bcings nas brda thabs kyi chos sgo bye ba ston cing mthong thos dran reg gi 'gro ba thams cad gnas skabs mngon mtho dang /__mthar gyis nges par legs pa'i go 'phang la bkri nas 'brel tshad don ldan du mdzad pa'i bka' drin gyi pha mtha' ni blo yi ra ba las ches brgal ba'i phyir/__dngos po'i zong gis gzhal ba'i yul ma yin yang /__re zhig rang gzhan gyi rgyud kyis bsdus pa'i lus longs spyod dge tshogs rgya mtsho dang bcas pa nam mkha' mdzod kyi mchod sprin chen por dad blos sprul te 'bul ba'i maN+Dal mtshon byed du/__thog mar bkra shis pa'i lha gos zla ba zhun ma'i mdog can dkyus su ring ba sogs grangs ldan ye shes gzigs pa'i spyan zur g.yo ba'i rten tsam du 'bul lam zhu ba dang /__slar yang gsol ba 'debs pa/__zhes sogs dkyus kyi zhabs brtan bsngo smon sogs ji ltar 'os par sbyar bar bya'o/__/_!_yang yul gang yang rung bar dmigs bsal chos 'brel lam nyes sel lta bur tshe dbang tsam zhus pa'i skabs yin na/__khyad par rdul bral rnam kun mchog ldan las/__/zung 'jug 'chi med mgon po'i skur bzhengs te/__/mtha' klas ting 'dzin bye ba'i 'jug ldangs kyis/__/srid zhi'i tshe bcud ma lus yongs bsdus te/__/skal bzang ut+pal sar pa'i dga' ston du/__/smin grol grub pa'i bdud rtsis dge byas tshe/__/ring 'tsho'i srog gi ka ba tshugs pa dang /__/lhan cig dngos po'i mchod sprin cung zad stob/__/zhes pa lta bu dang /____/_!_gshin po rjes 'dzin gyi cho ga lta bu'i tshe/__lhag par gzhan la phan dgongs chu yi gter/__/bsrubs skyes ngan 'dir mi 'khrugs pa lta bu'i tshe/__mi 'khrugs mgon po'i ting 'dzin gyis/__/zhes sam/__rdor sems lta bu la/__mi bskyod mgon po'i ting 'dzin gyis/__zhes sam/__zhi khro lta bu la/__sgyu 'phrul drwa ba'i ting 'dzin gyis/__zhes sam/__gdan gsum zhi khro'i ting 'dzin gyis/__zhes pa lta bu'i skabs su babs pa'i 'byin 'jug bya'o/__/song sbyong ba'i ting 'dzin gyis/__/zla shel bsil ba'i reg bya ma smad pas/__/dmigs yul thar pa'i ngal 'tshor yud la sbyar/__/de tshe tshad med bka' drin dran pa yi/__/yid sprul maN+Dal rgya cher sngon 'gro bas/__/dngos 'byor mchod sprin nyung ngu'i bdog pa yis/__/zhabs sen ri mor bgyi ba'i brtul zhugs len/__/zhes sogs rgya cher 'phrul shes par bya'o/__/_!_