JKW-KABUM-03-GA-001-002

🚧 This website is under continued development. We appreciate your patience!

Previous Text Back to Volume PageNext Text

རྣམ་པར་རིག་བྱེད་མ་ཡིན་པའི་གཟུགས་སོགས།

Wylie title	rnam par rig byed ma yin pa'i gzugs sogs
Location	mkhyen brtse'i bka' 'bum Volume 3, sde tshan 1, Text 2, Pages 6-19 (Folios 3b6 to 10a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rnam par rig byed ma yin pa'i gzugs sogs. In 'jam dbyangs mkhyen brtse'i dbang po'i bka' 'bum, Vol. 3: 6-19. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

2 6-19	རྣམ་པར་རིག་བྱེད་མ་ཡིན་པའི་གཟུགས་སོགས། rnam par rig byed ma yin pa'i gzugs sogs Vows - sdom pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྣམ་པར་རིག་བྱེད་མ་ཡིན་པའི་གཟུགས་ནི། བརྟན་མེད་ཐོགས་མེད་དེ། དེ་ལུས་ངག་གི་སྦྱོར་བ་ལས་རྗེས་སུ་དཔགས་ཏེ་ནང་གི་སེམས་ཀྱི་ངོ་བོ་རིག་པར་མི་རུང་བས་ན་དེ་སྐད་དུ་བྱ། ཅིའི་ཕྱིར་གཟུགས་སུ་བཞག་ན་བཞག་ཅིང་གནོད་པ་བྱར་རུང་བས་ཏེ། ངོ་བོ་དངོས་ལ་དེ་ལྟར་མི་རུང་ཡང་། ཤིང་བཅད་ན་གྲིབ་མ་མེད་པ་བཞིན། འབྱུང་བ་ཆེན་པོ་བཞི་ཉམས་པར་བྱས་པ་ན་དེ་ཡང་ཉམས་པར་འགྱུར་ཏེ་བརྟེན་པའི་མིང་རྟེན་ལ་བཏགས་པ་སྟེ་འགལ་བ་མེད་དོ། །སྡོམ་པ་ལའང་། མཛོད་ལས། རྣམ་རིག་མིན་རྣམ་གསུམ་ཞེས་བྱ། །སྡོམ་དང་། ཞེས་པས་རྣམ་པར་རིག་བྱེད་མ་ཡིན་པའི་གཟུགས་སུ་བཞག་པ་དང་། དྲིན་ལན་བསབས་པའི་མདོ་ལས། ཐོག་མའི་སེམས་སྐད་ཅིག་མ་དང་པོའི་ཚུལ་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་ནི་ལས་ཞེས་ཀྱང་བྱ། ལས་ཀྱི་ལམ་ཞེས་ཀྱང་བྱ། ཞེས་སོགས་ཀྱིས་རྣམ་པར་རིག་བྱེད་ཀྱི་གཟུགས་སུ་བསྟན་པ་དང་། ཞིབ་ཏུ་ཕྱེ་ན། མཛོད་འགྲེལ་ལས། དང་པོར་རྣམ་རིག་རྣམ་རིག་མིན། །སོ་སོར་ཐར་དང་བྱ་བའི་ལམ། །ཞེས་སོགས་ཀྱི་དོན། ལས་བརྗོད་པ་གསུམ་གྱི་ཐ་མ་ལ་རྣམ་པར་རིག་བྱེད་ཀྱི་གཟུགས་དང་། དེའི་སྐད་ཅིག་གི་རྣམ་པར་རིག་བྱེད་མ་ཡིན་པ་གང་ཡིན་པ་དེ་ལས་སམ་དངོས་གཞིར་འདོད་པས་གཉིས་ཀ་ཡོད་པར་བཤད་ལ། གཞན་ཡང་མཛོད་འགྲེལ་ལས། སྲོག་གཅོད་པ་ལྟ་བུ་དཔེར་མཚོན་ན། མཚོན་བསྣུན་པ་གང་ཞིག་རྣམ་པར་རིག་བྱེད་དང་། དེའི་རྗེས་སུ་སྐད་ཅིག་མར་རིག་བྱེད་མ་ཡིན་པ་འབྱུང་བས་ལས་ལམ་དངོས་གཉི་ག་ཡོད་པར་བཤད་པས་མཚོན་ཏེ། སོ་སོར་ཐར་པའི་སྡོམ་པར་གཟུགས་གཉིས་ཀ་ཡོད་པ་གསལ་ཀྱང་། སྤྱི་ལྡོག་ནས་རྣམ་རིག་བྱེད་མིན་གྱི་གཟུགས་ཁོ་ན་ཤས་ཆེ་བར་བཤད་པས་འགལ་བ་མེད་དེ། སྡོམ་པར་རིག་བྱེད་གཟུགས་ཡོད་ཀྱང་འཇོག་ཚེ་རིག་མིན་གྱི་ལྡོག་པ་གཙོ་ཆེ་བར་འཇོག་སྟེ། དཔེར་ན་རྡུལ་ཕྲ་རབ་དབང་ཤེས་ཀྱི་ཡུལ་ཡིན་ཡང་། དེ་མི་སྣང་བས་ཡུལ་དུ་མི་འཇོག་པ་བཞིན་ནོ། །བྱེ་སྨྲས་རྣམ་པར་རིག་བྱེད་ཀྱི་གཟུགས་ཡོད་པར་འདོད་དེ། རྣམ་རིག་མིན་གྱི་གཟུགས་མེད་ན་སོར་སྡོམ་ཀྱང་མེད་པར་འགྱུར་ཏེ། དེ་སྤོང་བ་ནི་འཆལ་ཚུལ་གྱི་གེགས་བྱེད་པའི་ཆུ་ལོན་ལྟ་བུར་གསུངས་པའི་ཕྱིར་རོ། །ཞེས་འདོད་ལ། ཐེག་ཆེན་པ་དག་རྣམ་རིག་བྱེད་མིན་མེད་དེ་ཚད་མས་ཡུལ་དུ་མ་གྲུབ་པའི་ཕྱིར། སོར་སྡོམ་ཡོད་དེ། ཁས་བླངས་པའི་སེམས་དེས་ལུས་ངག་གི་ལས་བཀག་པའི་སྡོམ་སེམས་དེས་མ་འོངས་པ་ན་དེ་དང་དེ་ཅི་རིགས་སུ་བསྐྱེད་དེ་ཀུན་གཞིའི་རྣམ་ཤེས་ལ་ས་བོན་བཏབ་ནས། དེའི་འོག་ཏུ་བདག་གི་སྲོག་གཅོད་སྤངས་པའོ། །ཞེས་ཡང་དག་པར་བླངས་པའི་དྲན་པ་འབྱུང་སྟེ། དེས་འཛེམ་པའི་བསླབ་པ་དང་མི་འབྲལ་བའི་ཕྱིར། ཡང་དག་བླངས་པའི་སེམས་ཀྱི་ས་བོན་རྒྱུན་ཆགས་དང་བཅས་པ་ནི་སྡོམ་པའོ། །ཞེས་བཤད་དོ། །རྒྱུ་མཚན་དེས་ན་བྱེ་སྨྲ་བས་སྡོམ་པ་གཙོ་བོར་རྣམ་པར་རིག་མིན་གྱི་གཟུགས་སུ་འདོད། རིག་མིན་གྱི་གཟུགས་དེ་ཡང་འབྱུང་བ་ཆེན་པོར་བརྟེན་པའི་ཕྱིར་ཡོད་པར་འདོད། དེ་འདོད་པས་རྟེན་ལུས་བོར་པའི་ཚེ་བརྟེན་པ་སྡོམ་པའང་འཇིག་པར་བཤད་དེ། འབྲི་གུང་པ་སོགས་སྡོམ་པ་གཟུགས་ཅན་དུ་འདོད་པ་བཞིན་དུ་ཤི་བའི་ཚེ་ཡང་རྗེས་སུ་འབྲང་བ་གཉིས་ཀ་འདོད་པ་འགལ་ཏེ། སློབ་དཔོན་དབྱིག་གཉེན་གྱིས་བྱེ་སྨྲ་བས་དགེ་བ་གཟུགས་ཅན་དུ་འདོད་པ་འགོག་པ་ན། དེ་གཟུགས་ཅན་དུ་འདོད་བཞིན་ཤི་ནས་འབྲས་བུ་བདེ་བ་བསྐྱེད་པར་འདོད་པ་ཡང་འགལ་ཏེ། འཇིག་པའི་ཕྱིར་རོ། །ཞེས་སུན་འབྱིན་མཛད་པ་དང་ཚུལ་མཐུན་པར་བཤད་པས་གྲུབ་བོ། །བྱེ་སྨྲ་བས་བསྙེན་གནས་དགེ་སློང་ལས་བླང་བའི་ཚུལ་ནི། བྱེ་སྨྲ་བའི་ལུགས་དྲིན་ལན་བསབས་པའི་མདོར། སོ་ཐར་རིས་བདུན་གྱི་ནང་གི་དགེ་བསྙེན་གྱི་སྡོམ་པར་བསྡུས་ཏེ་བཤད་པ་དང་། ཉིན་ཞག་གཅིག་གི་ཁྲིམས་ཡོད་ཅིང་ཇི་སྲིད་འཚོ་བའི་ཁྲིམས་མེད་པ་གང་ཟག་བར་མ་ཞེས་བཤད་པ་དང་། སོ་ཐར་རིས་བརྒྱད་ཀྱི་བརྒྱད་པར་བཤད་པ་སྟེ་གསུམ་ལས། སྔ་མ་དང་ཕྱི་མ་ལྟར་ན། མཛོད་འགྲེལ་ལས། དགེ་སློང་སོགས་ལྔ་དགེ་འདུན་དང་། ལྷག་མ་གསུམ་གང་ཟག་སྟེ་དགེ་སློང་ལས་ལེན་པར་བཤད་པས་གྲུབ་ལ། རིག་རལ་གྱིས་མགོན་མེད་ཟས་སྦྱིན་གྱིས་བསྙེན་གནས་ཕོག་པར་འདུལ་ལུང་ལས་བཤད་པར་གསུངས་ཀྱང་དེར་མི་སྣང་ལ། ལས་བརྒྱ་པར་བཤད་ཀྱང་དེ་ནི་བར་མ་ཙམ་ལ་དགོངས་པའམ། མདོ་སྡེ་པའི་ལུགས་ཡིན་པའི་ཕྱིར་མ་ཁྱབ་བོ། འདུལ་བའི་ལུགས་ཀྱི་བསྙེན་གནས་ཀྱི་ཆོ་ག་ནི། སྤྱིར་ཡན་ལག་བརྒྱད་དང་ལྡན་པའི་ཆོ་ག་ཙམ་ནི་རིགས་བྱེད་ཀྱི་གཞུང་རྣམས་ལས་ཀྱང་འབྱུང་བར་རྒྱ་ཆེར་རོལ་པར་བཤད་ལ། བྱེ་བྲག་ཏུ་ཉན་ཐོས་བྱེ་སྨྲ་བའི་ལུགས་ལྟར་ན། སྐྱབས་འགྲོ་སྔོན་དུ་འགྲོ་བས་གཽ་མཱིའི་དགེ་བསྙེན་དུ་ཁས་བླངས་པས་སྡོམ་པ་བརྒྱད་དང་ལྡན་པར་བྱས་པའི་གསོ་སྦྱོང་འབོགས་པའི་ཆོ་ག་རྣམས་ཡིན་ལ། དེའང་འགྲེལ་བཤད་དང་། སྟན་པའི་ནོར་རྫས་དང་། སྡོམ་བརྒྱད་དང་། ཀུན་ཏུ་རྒྱུ་སེན་རིང་གིས་ཞུས་པ་རྣམས་ལས་ཆོ་ག་གསལ་བར་བཤད་ལ། འོན་ཀྱང་བྱེ་སྨྲ་དང་མདོ་སྡེ་བ་གཉིས་ཀ་བླང་ཡུལ་དང་། རྟེན་གྱི་ཁྱད་པར་མ་གཏོགས་ཆོ་ག་དངོས་གཞི་ལ་ཁྱད་པར་མེད་དོ། །དེས་ན་འདུལ་བའི་ལུང་ནས་ཆོ་ག་དེ་གསལ་པོར་མ་གསུངས་ཀྱང་། མདོ་སྡེ་ལ་གསུངས་པའི་ཆོ་ག་དེར་ཡང་སྦྱོར་བར་བཤད་པའི་ཕྱིར་རོ། །མདོ་སྡེ་པའི་ལུགས་ཇི་ལྟར་འདོད་ཚེ་ལེན་པའི་ཆོ་ག་ཇི་ལྟར་ཞེ་ན། ཇོ་བོ་རྗེས་མངའ་རིས་སུ་བཞུགས་པའི་ཚེ་འདི་ལྟ་བུ་ཞིག་གནང་ནས་མདོ་སྡེ་པའི་ལུགས་ཡིན་པར་གསུངས་པའི་རྗེས་སུ་འབྲངས་ནས་ཞང་ཞུང་རྒྱལ་བའི་ཤེས་རབ་ཀྱིས་འདུལ་བའི་ལག་ལེན་དུ་བྲིས་པ་ཡིན་ནོ། །དེས་ན་འདིའི་ལུགས་ལ་སྔོན་སློབ་དཔོན་ལ་བླངས་ནས། སྔར་གྱི་སྤང་སེམས་དྲན་པ་ཙམ་གྱིས་ཕྱིས་ནམ་འདོད་པའི་དུས་སུ་རྟེན་གྱི་དྲུང་དུ་བླངས་ཏེ་ཉིན་ཞག་གཅིག་རྫོགས་པར་བསྲུང་བ་ཇི་ལྟར་འདོད་པའི་ཚེ་བླང་བ་ཡིན་ལ། བྱེ་སྨྲ་བའི་ལུགས་སུ་གཞན་ལ་ནོད་དགོས་པར་དོན་གྱིས་ཤེས། དམིགས་བསལ་ཟས་ཟོས་ཀྱང་བླངས་པས་ཆོག་པར་འཕགས་པ་དྲིན་ལན་བསབས་པ་ལས་གསུངས་པ་ནི་ཉིན་ཞག་ཚང་བ་ལེན་མི་དགོས་པའི་ཁྱད་ཡོད། ཞག་གསུམ་སོགས་སྦྲེལ་མར་བྱས་པའི་བསྙེན་གནས་ཆོ་ག་གཅིག་གིས་ལེན་པ་ནི་གཏན་ནས་མི་རུང་། མདོར་ན་གཽ་མཱིའི་སྡོམ་པ་འབོགས་ཚུལ་གཅིག་དང་། ཇི་ལྟར་འདོད་ཚེ་ལེན་པའི་ཕྱག་ལེན་གཉིས་ལས་ཕྱི་མ་འཕགས་པས་མཛད་པ་སོགས་ཡིན། བྱེ་སྨྲ་བའི་ལུགས་ཀྱིས་ཀུན་ཏུ་རྒྱུ་སེན་རིང་གིས་ཞུས་པའི་མདོར་ཇི་སྲིད་འཚོའི་བར་དུ་ཡན་ལག་བརྒྱད་པའི་སྡོམ་པ་ལེན་པ་དང་། དེ་གཽ་མཱིའི་སྡོམ་པ་ཞེས་མིང་འདོགས། ཆོ་ག་འདི་ཉིན་ཞག་གཅིག་པར་ཁས་བླངས་པ་ནི་བྱེ་སྨྲའི་རང་ལུགས་ཀྱི་སྡོམ་པ་ཡིན་པར་གསལ་ལོ། །དེས་ན་སྡོམ་གསུམ་ལས་མདོ་སྡེ་པའི་ལུགས་སུ་བོད་ན་གྲགས་པ་ལྟར། ཇི་ལྟར་འདོད་ཚེ་ལེན་ནའང་ཉིན་ཞག་གི་མཐར་འབུལ་མི་དགོས་པར་གཏོང་སྟེ། དམ་བཅའ་རྫོགས་པའི་ཕྱིར་རོ། །ཞེས་པ་ལས་དེ་གཏན་ནས་དགག་པའམ། མདོ་སྡེ་པའི་ལུགས་སུ་གྲགས་པ་དེ་མདོ་སྡེ་པའི་ལུགས་ཁས་ལེན་པའི་ཁྱབ་མཐའ་འཆའ་བ་ནི་མ་ཡིན་ནོ། །དེ་ལ་ཁོ་ན་རེ། སྡོམ་བརྒྱད་དང་། དོན་ཞགས་ནས་གསུངས་པའི་ཆོ་ག་ཚང་བར་དགེ་བསྙེན་མན་ཆད་ཀྱིས་ནོད་དུ་མི་རུང་སྟེ། ཇི་སྲིད་འཚོའི་མཐའ་ཅན་གྱི་སྡོམ་པ་ལ་གནས་བཞིན་དུ་ཉིན་ཞག་གཅིག་གི་སྡོམ་པ་བླང་བ་ལ་དགོས་པ་མེད་པའི་ཕྱིར་དང་། སྔ་མའི་འཇིག་རྒྱུ་ཡིན་པའི་ཕྱིར། དེས་ན་བསྙེན་གནས་པར་ཁས་བླངས་ནས། ལྷག་མ་སྲུང་བ་ཙམ་གྱིས་ཆོ་ག་ཡང་མི་འཆད་ཅིང་། གསོ་སྦྱོང་ལ་གནས་པར་འགྱུར་རོ། །ཞེས་བཞེད་དེ། དེ་ནི་མི་འཐད་དོ། །དོན་ཞགས་པའི་ཆོ་གར། དགེ་སློང་ཕའམ། ཞེས་སོགས་གསུངས་ཤིང་། དེའི་གཟུངས་འོག་ཏུ། འདི་རབ་ཏུ་བྱུང་བའི་ཕྱོགས་ལ་ཡང་བླངས་དགོས་ཏེ། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། ཞེས་སོགས་ཐེག་ཆེན་གྱི་ལུགས་ཡིན་པའི་ཕྱིར་རོ། །ཞེས་རྗེ་བཙུན་གྱིས་གསུངས་པ་དང་འགལ་ཞིང་། འཇིག་རྒྱུར་འགྲོ་ན། ཁྱིམ་པའི་གསོ་སྦྱོང་དང་། བསྙེན་གནས་ཀྱི་སྡོམ་པ་ལ་མུ་བཞིར་བརྩི་བའི་སྐབས་ཀྱི་གཉིས་ཀ་མ་ཡིན་པའི་མུ་ལ་ཡོངས་རྫོགས་དགེ་བསྙེན་གྱིས་ཉིན་ཞག་གཅིག་གི་གསོ་སྦྱོང་བླངས་པ་ལྟ་བུ་དཔེར་མཛད་པ་དེས་ཀྱང་འཇིག་པར་འགྱུར་བའི་ཕྱིར་དང་། མདོ་རྩར་གསུངས་པ་ནི། རྟེན་མཆོག་ལ་གནས་བཞིན་དུ་དམན་པར་ཁས་བླངས་པ་སྡོམ་པ་སྔ་མའི་འཇིག་རྒྱུར་སོང་བ་ལ་དགོངས་ཕྱིར་མི་འགལ་ལོ། །ཕར་ཕྱིན་ལས་གཏན་ལ་དབབ་པ་བསྡུ་བར་བཤད་པ་དང་། རྒྱུད་སྡེ་འོག་མ་གསུམ་ལས་རྟོག་པའི་ཆོ་གའི་སྔོན་འགྲོར་བཤད་པ་དང་འདྲ། ལོ་ཆེན་རིན་བཟང་གི་སྔགས་ལོག་སུན་འབྱིན་གྱི་གཞུང་ལས་བླ་མེད་ཀྱི་རྒྱུད་ལས་ཀྱང་བཤད་པར་གསུངས་པས་ན། གསོ་སྦྱོང་ཡན་ལག་བརྒྱད་པ་ནི་ཉན་ཐོས་བྱེ་སྨྲ་བ་ནས། བླ་མེད་ཀྱི་བར་ཐམས་ཅད་ལས་བཤད་པ་ཡིན་ནོ། །ཆོས་དབྱིངས་ནི་དགེ་བ་མ་ཡིན་ཏེ། དེ་དགེ་དང་མི་དགེའི་ཟླས་དྲངས་པའི་མི་དགེ་བ་མེད་པས་ན་དགེ་བར་ཡང་མ་གྲུབ་བོ། །སྦྱོར་རུང་གི་མི་དགེ་བ་མ་ཡིན་པས་དངོས་མ་ཡིན་ལ། མིང་གི་ཐ་སྙད་ཙམ་ནི་མི་འགོག་སྟེ། དོན་ལ་རྣམ་པར་དག་པའི་ཡེ་ཤེས་ཀྱི་སྤྱོད་ཡུལ་ཡིན་ཕྱིར་དགེ་སྡིག་ཏུ་གཟིགས་པ་མེད་དོ། །ངེས་པའི་དོན་ལ་ཆོས་ཀྱི་དབྱིངས་ནི་ཤེས་བྱར་སྒྲོ་བཏགས་པས་བརྗོད་པར་བྱ་བ་མ་ཡིན་པས་བདེ་གཤེགས་སྙིང་པོ་ཉིད་དུའང་མི་འཇོག་ཅིང་། ཐ་སྙད་དུ་ནི་ཆོས་ཅན་སྣ་ཚོགས་པ་མིང་གིས་བསྟན་པའི་ཕྱིར་སྒྲས་བརྗོད་པ་ཙམ་ལ་འགལ་བ་ཡོད་པ་མ་ཡིན་ལ། དངོས་པོའི་སྒྲས་སྟོན་པའང་འདུས་མ་བྱས་ཡིན་པར་ལང་གཤེགས་ལས་གསུངས་ཕྱིར། དེ་ཁོ་ནས་ཀྱང་བདག་དང་། རྟག་པ་སོགས་ཐམས་ཅད་སྒྲ་ཙམ་གྱི་ངོར་དྲངས་པའི་དོན་ཡིན་པར་ཤེས་པར་བྱ་བ་འདི་ནི་འཇམ་དབྱངས་བླ་མའི་དགོངས་པ་འཁྲུལ་མེད་ལགས་སོ། །འདུལ་བའི་སྡེ་པ་བཅོ་བརྒྱད་ལ་འདུལ་བ་མི་འདྲ་བ་བཅོ་བརྒྱད་ཡོད་པར་བཤད་པ་ནི་ས་པཎ་ཁོ་ནའི་བཞེད་པ་ཟུར་པ་མིན་ཏེ། རྟོག་གེ་འབར་བ་སོགས་ལས་གྱེས་ཚུལ་དང་གྲུབ་མཐའ་ཕྲ་མོ་ཚུན་ཆད་གསལ་བར་བཤད་པའི་ཕྱིར་དང་། སྡེ་པ་བཞི་དང་རྒྱུད་སྡེ་ནས་གསུངས་ཕྱིར། སངས་རྒྱས་ཉིད་ཀྱི་གསུང་གཅིག་གིས་སྡེ་པ་བཞི་ཀ་སོ་སོར་བསྟན་པ། གང་ཟག་སོ་སོའི་རང་རང་གི་འདུལ་བ་སོ་སོར་གོ་ཞིང་། སངས་རྒྱས་མྱ་ངན་ལས་འདས་ནས་བསྡུ་བ་གསུམ་པ་མ་བྱུང་བར། དགྲ་བཅོམ་སོ་སོའི་ཐུགས་ལ་ཡོད་པའི་འདུལ་བའི་ཐོག་ནས་འདུལ་བའི་ལག་ལེན་སོ་སོར་མཛད་པའི་ལུགས་སྲོལ་ཡོད་ལ། སྟོན་པ་མྱ་ངན་ལས་འདས་ནས་ལོ་སུམ་བརྒྱ་ཙམ་ལོན་པ་ན། རང་རང་གི་འདུལ་བ་འདི་ཁོ་ན་ཡིན་གྱི། གཞན་རྣམས་ནི་མ་ཡིན་ནོ། །ཞེས་རྩོད་པ་བྱུང་བ་ཀྲྀ་ཀའི་ལུང་བསྟན་གྱི་མདོ་ལ་བརྟེན་ནས་སྡེ་བ་ཐམས་ཅད་འདུལ་བའི་བསྟན་པ་ཡིན་པར་གཅིག་ཏུ་བསྡུས་ཤིང་། སྐད་རིགས་སོ་སོར་ཡི་གེར་བྲིས་ཏེ་འབུམ་ཕྲག་རེ་རེ་བ་བཞིར་བྱས་ནས། འདུལ་ལུང་སྡེ་བཞི་ཞེས་དེ་ཕྱིན་ཆད་གྲགས་པར་བྱས་པས། ད་ལྟ་བོད་ན་བཞུགས་པ་འདི་ཐམས་ཅད་ཡོད་པར་སྨྲ་བའི་ལུང་གི་དུམ་བུ་བཞི་པ་ཡིན་ནོ། །ཞེས་པཎྜི་ཏ་ཤཱཀྱ་ཤྲཱི་བྷ་དྲ་སོགས་དང་། ཆོས་རྗེ་ལོ་འཕགས་པ་རིན་པོ་ཆེའི་སྡོམ་གསུམ་གྱི་གསུང་སྒྲོས་ལས་བཤད། ཙཱ་བ་འཇམ་པའི་དབྱངས་མཁན་སློབ་ཀྱི་གཏམ་སྟེ། ལྷོ་པ་ཀུན་མཁྱེན་རིན་ཆེན་དཔལ་གྱིས་ཀྱང་། གངས་ཅན་གྱི་འདུལ་བ་འཛིན་པ་དག་ཞུ་བ་དང་། རྣམ་འབྱེད་ལ་སོགས་པ་ལུང་སྡེ་བཞིར་འཆད་པ་ནི་འཁྲུལ་ཏེ། རྒྱུ་མཚན་དང་བཅས་ཏེ་བཤད་པར་བྱའོ། །ཞེས་གསུངས། གྱེས་ཚུལ་ནི་རང་ལུགས་རྟོག་གེ་འབར་བའི་རྗེས་སུ་འབྲངས་ལ། བཅས་པ་མི་འདྲ་བ་སོ་སོར་ཡོད་ཚུལ་ནི། དབུ་མ་སྤྱན་རས་གཟིགས་བརྟུལ་ཞུགས་ལས། གཞན་ཡང་སྡེ་པ་ཐམས་ཅད་ཀྱི་སྡེ་སྣོད་གསུམ་པོ་གཅིག་གིས་གཅིག་ལ་གནོད་དེ། འདི་ལྟར་ཁ་ཅིག་དགེ་སློང་ནད་པར་དུས་མ་ཡིན་པའི་ཟས་གནང་བ་ལ། ཁ་ཅིག་ལ་མི་གནང་བ་དང་། ཁ་ཅིག་ལ་དུས་མིན་པར་བུ་རམ་ཟ་བ་གནང་ལ། ཁ་ཅིག་ལ་མི་གནང་བ་དང་། ཁ་ཅིག་ལ་མཚན་མོ་བསྙེན་པར་མ་རྫོགས་པ་དང་གནས་གཅིག་ཏུ་ལྷན་ཅིག་ཉལ་བར་གནང་ལ། ཁ་ཅིག་ལ་མི་གནང་བ་དེ་དག་ཇི་ལྟར་སངས་རྒྱས་ཀྱི་བཀའ་མ་ཡིན་པར་འགྱུར། ཞེས་སོགས་དང་། ལྟ་བ་ཐ་དད་དུ་ཡོད་ཚུལ་ནི་གཞུང་ལུགས་བྱེ་བྲག་བཀོད་པའི་འཁོར་ལོ་ལས་ཤེས་ཏེ། དེའི་སླད། འཇམ་དབྱངས་བླ་མས། ཁྱོད་ཀྱི་འདུལ་བའི་སྡེ་སྣོད་ལ། །སྡུད་མཛད་ཕྱི་མས་སྡེ་པ་བཞི། །སྐད་རིགས་རྣམ་པ་བཞི་དག་གིས། །འདུལ་བ་ལུང་རྣམས་སྡེ་བར་བསྡུས། །ཞེས་གསུངས་པས་གྲུབ་ཅིང་། སྡུད་མཛད་ཕྱི་མ་ཞེས་པ་ནི་གསུམ་པ་ཉིད་ལ་ངོས་འཛིན་ཏོ། ། ༈ གསང་སྔགས་ཀྱི་ལུགས་ལ་དོན་དམ་སེམས་བསྐྱེད་ཆོ་གས་ཐོབ་པ་ཡོད་དེ། དབང་བསྐུར་བཞི་པ་བཞིན་ནོ། །ཞེས་བུ་སྟོན་གསུངས་ཀྱང་། དབང་བསྐུར་བཞི་པ་ཚིག་གི་བརྡ་ཙམ་སྤྲད་ནས་ཐོས་པ་གྱུར་བའི་རྟོགས་པ་བསྐྱེད་པ་ཙམ་ཡིན་གྱི་ཆོ་གས་མི་ཐོབ་པས་སོ། །ཕྱག་རྒྱ་བཞི་པ་འགོས་ལོས་ཀླུ་སྒྲུབ་ཀྱིས་མ་མཛད་པར་བཤད་པ་དེ་ནི་ཚིགས་བཅད་མ་དེ་ཡིན་ལ། ཨ་མ་ན་སེའི་ཆོས་སྐོར་དུ་བཞུགས་པ་ཚིག་ལྷུག་ཅན་འདི་ནི་ཀླུ་སྒྲུབ་ཀྱིས་མཛད་དེ། དབང་བསྐུར་ངེས་བསྟན་གྱི་འགྲེལ་པ་སློབ་དཔོན་དགའ་བ་སྐྱོང་གིས་མཛད་པར་ལུང་དྲངས་པའི་ཕྱིར་རོ། ། ༈ དྲག་པོ་འཁོར་ལོ་ཅན་ཕྱག་རྡོར་གྱི་སྤྲུལ་པར་གསུངས་པ་ནི། རྒྱུད་ནས་བཤད་ན། རིགས་ལྡན་དྲག་པོ་འཇམ་དཔལ་གྲགས་པའི་སྤྲུལ་པ་ཡིན་ཞིང་། དེ་ཟླ་བ་བཟང་པོའི་སྤྲུལ་པ་ཡིན་ལ། དེ་ཉིད་ཕྱག་རྡོར་གྱི་སྤྲུལ་པ་ཡིན་པར་རྩ་རྒྱུད་ཀྱི་ལུང་གིས་གྲུབ་པའི་ཕྱིར་རོ། །དངོས་སུ་བཤད་ན། དུས་ཀྱི་འཁོར་ལོའི་རྒྱུད་གསུངས་པའི་སྐབས་འདིར་ཕྱག་ན་རྡོ་རྗེའམ། དུས་ཀྱི་འཁོར་ལོ་ཉིད་ཀྱིས་ཆོས་རྒྱལ་དང་རིགས་ལྡན་ཐམས་ཅད་སྤྲུལ་པ་ཡིན་པས། སྐབས་འདིའི་སྤྲུལ་བྱེད་ཀྱི་གཙོ་བོ་ནི་ཕྱག་ན་རྡོ་རྗེ་སྟེ། རྒྱུད་ལས། འཁོར་ལོ་ཅན་ནི་རང་གི་ལུས་ལ་རྡོ་རྗེ་ཅན་ཏེ་ལྷ་མཆོག་བདག་རྣམས་ཡན་ལག་བཅུ་གཉིས་འགོག །ཅེས་གསུངས་པ་ལྟར་དང་། འཇམ་དབྱངས་བྱང་རྩེས་རིགས་ལྡན་ཉེར་ལྔ་དང་། བླ་མ་དམ་པས་སེང་གེ་རྣམ་མཐོན་ཐ་དད་དུ་བྱས་ཏེ། ཉེར་དྲུག་དང་། བུ་དོ་ལ་སོགས་ཀྱིས་ཉེར་ལྔ་དང་། རང་ལུགས་སྤྲུལ་པའི་ཆོས་རྒྱལ་བདུན་དང་། རིགས་ལྡན་ཉེར་བདུན་ཏེ་བཞེད་པ་༣༤སོགས་ཡོད་དོ། ། ༈ སྟོན་པ་ལོངས་སྐུ་སངས་རྒྱས་པའི་གནས་འོག་མིན་ནི། ཁམས་གསུམ་ལས་འདས་པའི་སྤྱོད་ཡུལ་ཅན་གྱི་འོག་མིན་ཆེན་པོ་དང་། སྤྲུལ་སྐུ་སངས་རྒྱས་ཀྱི་གནས་ནི། འཛམ་བུའི་གླིང་རྡོ་རྗེའི་གདན་ནོ། །བུ་སྟོན་གྱིས་གསང་སྔགས་བྱུང་ཚུལ་ལྷན་ཅིག་སྐྱེས་གྲུབ་ཀྱི་འགྲེལ་པ་ན་མི་སྣང་ངོ་། །ཞེས་དགག་པ་བྱེད་པ་ནི། གྲུབ་པ་ཐོབ་པའི་རྒྱལ་པོ་རྣམས་ཇི་ལྟར་བྱུང་བའི་ཚུལ་གཞུང་དེ་ལས་བཤད་ཅེས་པའི་དགོངས་གཞི་མ་ལོན་པར་སྣང་སྟེ། ཨོ་རྒྱན་དུ་སངས་རྒྱས་དངོས་ཀྱི་སློབ་མ་ཨིནྡྲ་བྷཱུ་ཏི་ཆེ་བ་དང་། བར་དུ་ཕྱག་ན་རྡོ་རྗེས་སྨིན་པར་བྱས་པའི་ཨིནྡྲ་བྷཱུ་ཏི་འབྲིང་པོ་ཡེ་ཤེས་གྲུབ་པ་མཛད་པ་པོ་དང་། ཐ་མ་ལྷན་ཅིག་སྐྱེས་གྲུབ་མཛད་པའི་ཨིནྡྲ་བྷཱུ་ཏི་ཆུང་བ་རྣམས་ཀྱང་རིམ་གྱིས་བྱུང་སྟེ། ཡུལ་དེའི་གྲུབ་པའི་རྒྱལ་པོ་རྣམས་བྱུང་ཚུལ་གྱི་གཏམ་ནི་ལྷན་ཅིག་སྐྱེས་གྲུབ་ཀྱི་འགྲེལ་པར་གསལ་ལོ། །ཞེས་པའི་དོན་ཏོ། །རེད་མདའ་བས་འོག་མིན་གྱི་ངེས་འཛིན་འདི་ཚིག་དོན་གཉིས་ཀ་མ་དག་ཅིང་། ཕལ་ཆེན་ལས་གཞི་སྙིང་པོ་མེ་ཏོག་བརྒྱན་པའི་འཇིག་རྟེན་གྱི་ཁམས་རྒྱ་མཚོའི་ཐ་སྙད་མི་འབྱུང་ལ། ཕལ་ཆེན་དུ་བཤད་པའི་འོག་མིན་ཡང་སྤྲུལ་སྐུའི་ཞིང་ཁམས་ཡིན་ནོ་ཟེར་བ་ནི་མདོ་དངོས་སུམ་མཐོང་ཞིང་། འོག་མིན་གྱི་ནང་ཚན་ལ་སྤྲུལ་སྐུའི་ཞིང་ཁམས་མང་དུ་བཤད་པ་དང་འོག་མིན་གྱི་ཁྱད་པར་མ་ཕྱེད་ལ། འདུས་པ་རིན་པོ་ཆེ་ལས། ཁམས་གསུམ་ལས་འདས་པའི་སྤྱོད་ཡུལ་ཅེས་འོག་མིན་འཇིག་རྟེན་གྱི་ཁམས་མ་ཡིན་པར་གསུངས་པའི་དོན་མ་གོ་བར་ཟད་དོ། །རྣལ་འབྱོར་རྒྱུད་ཀྱི་མངོན་རྟོགས་ཐམས་ཅད་བསྡུ་ན། རྒྱུ་རྒྱུད། ཐབས་རྒྱུད། འབྲས་རྒྱུད་གསུམ་དུ་འདུའོ། །སཾ་བུ་ཊ་ད་ལྟ་དངོས་སུ་ཕན་འདོགས་པའི་རྒྱུད་བཅུ་དྲུག་གམ་བཅུ་བདུན་ཡོད་དེ། ཕ་རྒྱུད་གསང་འདུས། རྡོར་ཕྲེང་། ལྷ་མོ་བཞི་ཞུས། རྟོགས་བདུན། དགྲ་ནག་སྟེ་ལྔ། མ་རྒྱུད་གུར། རྟག །ཕྱག་ཐིག །བདེ་མཆོག་རྩ་རྒྱུད། མངོན་བརྗོད། རྡོ་རྗེ་མཁའ་འགྲོ། ཧེ་རུ་ཀ་མངོན་འབྱུང་། ཀུན་སྤྱོད། རྣམ་སྣང་སྒྱུ་དྲ། གདན་བཞི་སྟེ་བཅུ། རྩེ་མོ་དང་། དེ་ཉིད་འདུས་པ་སྟེ་ཡོ་གའི་རྒྱུད་གཉིས་སོ། །དག་ལྡན་ལས་གནོད་སྦྱིན་ཁརྦ་ར་ནི་མིའུ་ཐུང་སྟེ། རྟོག་གེ་འབར་བར་བཤད་པའི་འཇིགས་སྡེའི་བུ་བུམ་རྣ་ཞེས་པ་དེའོ། །ཞེས་གསུངས།། །། ༈ ཡང་དགོངས་གསལ་ལས། མུ་སྟེགས་བྱེད་ལ་ལྟ་ལོག་བསམ་གྱིས་མི་ཁྱབ་ཀྱང་བསྡུ་ན་རྟག་ཆད་གཉིས་སུ་འདུའོ། །དེ་ལ་རྟག་པར་སྨྲ་བ་ནི་བཞི་སྟེ། རིག་བྱེད་པ། གྲངས་ཅན་པ། བྱེ་བྲག་པ། ཟད་བྱེད་པའོ། །ཆད་པར་སྨྲ་བ་ནི་ཚུ་རོལ་མཛེས་པ་གཅིག་ཁོ་ན་གྲགས་སོ། །འདི་དག་ལ་བོད་ཀྱི་དགེ་བའི་བཤེས་གཉེན་དག་གིས་རྣམ་དབྱེ་བྱས་པ་མང་པོ་སྣང་སྟེ་དེ་དག་འཁྲུལ་པར་སྣང་ངོ་། །འདི་དག་ཀྱང་རྒྱུ་བདག་འཛིན་གྱིས་བསྐྱེད། རྐྱེན་མི་དགེ་བའི་བཤེས་གཉེན་གྱིས་བཟུང་། ངོ་བོ་རྟག་ཆད་གཉིས་སུ་འདོད་དེ། དེའང་རྟག་ལྟ་བཞི་པོ་བདག་རྟག་པ་དེ་ལས་དང་ཉོན་མོངས་པས་བཅིངས་པའི་ཚེ་འཁོར་བ། གྲོལ་བའི་ཚེ་ཐར་བར་འདོད་དོ། །ཆད་པར་ལྟ་བ་ནི་བདག་ཡོད་པ་དེ་ཤི་བའི་ཚེ་བཅིངས་པའི་འཁོར་བ་དང་གྲོལ་བའི་ཐར་པ་གཉིས་ཀ་མི་འདོད་དེ། འདི་དག་སུན་ཕྱུང་མདོར་བསྡུ་ན། གང་ཟག་དང་ཆོས་ཀྱི་བདག་ཆོད་དེ་ཆོས་ཐམས་ཅད་རང་བཞིན་མེད་པར་རྟོགས་པ་ཉིད་ཀྱིས་རྟག་ཆད་ལས་གྲོལ་བར་གསལ་ལོ།། །། ༈

[edit]

rnam par rig byed ma yin pa'i gzugs sogs/ rnam par rig byed ma yin pa'i gzugs ni/__brtan med thogs med de/__de lus ngag gi sbyor ba las rjes su dpags te nang gi sems kyi ngo bo rig par mi rung bas na de skad du bya/__ci'i phyir gzugs su bzhag na bzhag cing gnod pa byar rung bas te/__ngo bo dngos la de ltar mi rung yang /__shing bcad na grib ma med pa bzhin/__'byung ba chen po bzhi nyams par byas pa na de yang nyams par 'gyur te brten pa'i ming rten la btags pa ste 'gal ba med do/__/sdom pa la'ang /__mdzod las/__rnam rig min rnam gsum zhes bya/__/sdom dang /__zhes pas rnam par rig byed ma yin pa'i gzugs su bzhag pa dang /__drin lan bsabs pa'i mdo las/__thog ma'i sems skad cig ma dang po'i tshul khrims kyi rnam par rig byed kyi gzugs ni las zhes kyang bya/__las kyi lam zhes kyang bya/__zhes sogs kyis rnam par rig byed kyi gzugs su bstan pa dang /__zhib tu phye na/__mdzod 'grel las/__dang por rnam rig rnam rig min/__/so sor thar dang bya ba'i lam/__/zhes sogs kyi don/__las brjod pa gsum gyi tha ma la rnam par rig byed kyi gzugs dang /__de'i skad cig gi rnam par rig byed ma yin pa gang yin pa de las sam dngos gzhir 'dod pas gnyis ka yod par bshad la/__gzhan yang mdzod 'grel las/__srog gcod pa lta bu dper mtshon na/__mtshon bsnun pa gang zhig rnam par rig byed dang /__de'i rjes su skad cig mar rig byed ma yin pa 'byung bas las lam dngos gnyi ga yod par bshad pas mtshon te/__so sor thar pa'i sdom par gzugs gnyis ka yod pa gsal kyang /__spyi ldog nas rnam rig byed min gyi gzugs kho na shas che bar bshad pas 'gal ba med de/__sdom par rig byed gzugs yod kyang 'jog tshe rig min gyi ldog pa gtso che bar 'jog ste/__dper na rdul phra rab dbang shes kyi yul yin yang /__de mi snang bas yul du mi 'jog pa bzhin no/__/bye smras rnam par rig byed kyi gzugs yod par 'dod de/__rnam rig min gyi gzugs med na sor sdom kyang med par 'gyur te/__de spong ba ni 'chal tshul gyi gegs byed pa'i chu lon lta bur gsungs pa'i phyir ro/__/zhes 'dod la/__theg chen pa dag rnam rig byed min med de tshad mas yul du ma grub pa'i phyir/__sor sdom yod de/__khas blangs pa'i sems des lus ngag gi las bkag pa'i sdom sems des ma 'ongs pa na de dang de ci rigs su bskyed de kun gzhi'i rnam shes la sa bon btab nas/__de'i 'og tu bdag gi srog gcod spangs pa'o/__/zhes yang dag par blangs pa'i dran pa 'byung ste/__des 'dzem pa'i bslab pa dang mi 'bral ba'i phyir/__yang dag blangs pa'i sems kyi sa bon rgyun chags dang bcas pa ni sdom pa'o/__/zhes bshad do/__/rgyu mtshan des na bye smra bas sdom pa gtso bor rnam par rig min gyi gzugs su 'dod/__rig min gyi gzugs de yang 'byung ba chen por brten pa'i phyir yod par 'dod/__de 'dod pas rten lus bor pa'i tshe brten pa sdom pa'ang 'jig par bshad de/__'bri gung pa sogs sdom pa gzugs can du 'dod pa bzhin du shi ba'i tshe yang rjes su 'brang ba gnyis ka 'dod pa 'gal te/__slob dpon dbyig gnyen gyis bye smra bas dge ba gzugs can du 'dod pa 'gog pa na/__de gzugs can du 'dod bzhin shi nas 'bras bu bde ba bskyed par 'dod pa yang 'gal te/__'jig pa'i phyir ro/__/zhes sun 'byin mdzad pa dang tshul mthun par bshad pas grub bo/__/bye smra bas bsnyen gnas dge slong las blang ba'i tshul ni/__bye smra ba'i lugs drin lan bsabs pa'i mdor/__so thar ris bdun gyi nang gi dge bsnyen gyi sdom par bsdus te bshad pa dang /__nyin zhag gcig gi khrims yod cing ji srid 'tsho ba'i khrims med pa gang zag bar ma zhes bshad pa dang /__so thar ris brgyad kyi brgyad par bshad pa ste gsum las/__snga ma dang phyi ma ltar na/__mdzod 'grel las/__dge slong sogs lnga dge 'dun dang /__lhag ma gsum gang zag ste dge slong las len par bshad pas grub la/__rig ral gyis mgon med zas sbyin gyis bsnyen gnas phog par 'dul lung las bshad par gsungs kyang der mi snang la/__las brgya par bshad kyang de ni bar ma tsam la dgongs pa'am/__mdo sde pa'i lugs yin pa'i phyir ma khyab bo/__'dul ba'i lugs kyi bsnyen gnas kyi cho ga ni/__spyir yan lag brgyad dang ldan pa'i cho ga tsam ni rigs byed kyi gzhung rnams las kyang 'byung bar rgya cher rol par bshad la/__bye brag tu nyan thos bye smra ba'i lugs ltar na/__skyabs 'gro sngon du 'gro bas gau mI'i dge bsnyen du khas blangs pas sdom pa brgyad dang ldan par byas pa'i gso sbyong 'bogs pa'i cho ga rnams yin la/__de'ang 'grel bshad dang /__stan pa'i nor rdzas dang /__sdom brgyad dang /__kun tu rgyu sen ring gis zhus pa rnams las cho ga gsal bar bshad la/__'on kyang bye smra dang mdo sde ba gnyis ka blang yul dang /__rten gyi khyad par ma gtogs cho ga dngos gzhi la khyad par med do/__/des na 'dul ba'i lung nas cho ga de gsal por ma gsungs kyang /__mdo sde la gsungs pa'i cho ga der yang sbyor bar bshad pa'i phyir ro/__/mdo sde pa'i lugs ji ltar 'dod tshe len pa'i cho ga ji ltar zhe na/__jo bo rjes mnga' ris su bzhugs pa'i tshe 'di lta bu zhig gnang nas mdo sde pa'i lugs yin par gsungs pa'i rjes su 'brangs nas zhang zhung rgyal ba'i shes rab kyis 'dul ba'i lag len du bris pa yin no/__/des na 'di'i lugs la sngon slob dpon la blangs nas/__sngar gyi spang sems dran pa tsam gyis phyis nam 'dod pa'i dus su rten gyi drung du blangs te nyin zhag gcig rdzogs par bsrung ba ji ltar 'dod pa'i tshe blang ba yin la/__bye smra ba'i lugs su gzhan la nod dgos par don gyis shes/__dmigs bsal zas zos kyang blangs pas chog par 'phags pa drin lan bsabs pa las gsungs pa ni nyin zhag tshang ba len mi dgos pa'i khyad yod/__zhag gsum sogs sbrel mar byas pa'i bsnyen gnas cho ga gcig gis len pa ni gtan nas mi rung /__mdor na gau mI'i sdom pa 'bogs tshul gcig dang /__ji ltar 'dod tshe len pa'i phyag len gnyis las phyi ma 'phags pas mdzad pa sogs yin/__bye smra ba'i lugs kyis kun tu rgyu sen ring gis zhus pa'i mdor ji srid 'tsho'i bar du yan lag brgyad pa'i sdom pa len pa dang /__de gau mI'i sdom pa zhes ming 'dogs/__cho ga 'di nyin zhag gcig par khas blangs pa ni bye smra'i rang lugs kyi sdom pa yin par gsal lo/__/des na sdom gsum las mdo sde pa'i lugs su bod na grags pa ltar/__ji ltar 'dod tshe len na'ang nyin zhag gi mthar 'bul mi dgos par gtong ste/__dam bca' rdzogs pa'i phyir ro/__/zhes pa las de gtan nas dgag pa'am/__mdo sde pa'i lugs su grags pa de mdo sde pa'i lugs khas len pa'i khyab mtha' 'cha' ba ni ma yin no/__/de la kho na re/__sdom brgyad dang /__don zhags nas gsungs pa'i cho ga tshang bar dge bsnyen man chad kyis nod du mi rung ste/__ji srid 'tsho'i mtha' can gyi sdom pa la gnas bzhin du nyin zhag gcig gi sdom pa blang ba la dgos pa med pa'i phyir dang /__snga ma'i 'jig rgyu yin pa'i phyir/__des na bsnyen gnas par khas blangs nas/__lhag ma srung ba tsam gyis cho ga yang mi 'chad cing /__gso sbyong la gnas par 'gyur ro/__/zhes bzhed de/__de ni mi 'thad do/____/don zhags pa'i cho gar/__dge slong pha'am/__zhes sogs gsungs shing /__de'i gzungs 'og tu/__'di rab tu byung ba'i phyogs la yang blangs dgos te/__sems can thams cad la phan par bya ba'i phyir dang /__zhes sogs theg chen gyi lugs yin pa'i phyir ro/__/zhes rje btsun gyis gsungs pa dang 'gal zhing /__'jig rgyur 'gro na/__khyim pa'i gso sbyong dang /__bsnyen gnas kyi sdom pa la mu bzhir brtsi ba'i skabs kyi gnyis ka ma yin pa'i mu la yongs rdzogs dge bsnyen gyis nyin zhag gcig gi gso sbyong blangs pa lta bu dper mdzad pa des kyang 'jig par 'gyur ba'i phyir dang /__mdo rtsar gsungs pa ni/__rten mchog la gnas bzhin du dman par khas blangs pa sdom pa snga ma'i 'jig rgyur song ba la dgongs phyir mi 'gal lo/__/phar phyin las gtan la dbab pa bsdu bar bshad pa dang /__rgyud sde 'og ma gsum las rtog pa'i cho ga'i sngon 'gror bshad pa dang 'dra/__lo chen rin bzang gi sngags log sun 'byin gyi gzhung las bla med kyi rgyud las kyang bshad par gsungs pas na/__gso sbyong yan lag brgyad pa ni nyan thos bye smra ba nas/__bla med kyi bar thams cad las bshad pa yin no/__/chos dbyings ni dge ba ma yin te/__de dge dang mi dge'i zlas drangs pa'i mi dge ba med pas na dge bar yang ma grub bo/__/sbyor rung gi mi dge ba ma yin pas dngos ma yin la/__ming gi tha snyad tsam ni mi 'gog ste/__don la rnam par dag pa'i ye shes kyi spyod yul yin phyir dge sdig tu gzigs pa med do/__/nges pa'i don la chos kyi dbyings ni shes byar sgro btags pas brjod par bya ba ma yin pas bde gshegs snying po nyid du'ang mi 'jog cing /__tha snyad du ni chos can sna tshogs pa ming gis bstan pa'i phyir sgras brjod pa tsam la 'gal ba yod pa ma yin la/__dngos po'i sgras ston pa'ang 'dus ma byas yin par lang gshegs las gsungs phyir/__de kho nas kyang bdag dang /__rtag pa sogs thams cad sgra tsam gyi ngor drangs pa'i don yin par shes par bya ba 'di ni 'jam dbyangs bla ma'i dgongs pa 'khrul med lags so/__/'dul ba'i sde pa bco brgyad la 'dul ba mi 'dra ba bco brgyad yod par bshad pa ni sa paN kho na'i bzhed pa zur pa min te/__rtog ge 'bar ba sogs las gyes tshul dang grub mtha' phra mo tshun chad gsal bar bshad pa'i phyir dang /__sde pa bzhi dang rgyud sde nas gsungs phyir/__sangs rgyas nyid kyi gsung gcig gis sde pa bzhi ka so sor bstan pa/__gang zag so so'i rang rang gi 'dul ba so sor go zhing /__sangs rgyas mya ngan las 'das nas bsdu ba gsum pa ma byung bar/__dgra bcom so so'i thugs la yod pa'i 'dul ba'i thog nas 'dul ba'i lag len so sor mdzad pa'i lugs srol yod la/__ston pa mya ngan las 'das nas lo sum brgya tsam lon pa na/__rang rang gi 'dul ba 'di kho na yin gyi/__gzhan rnams ni ma yin no/__/zhes rtsod pa byung ba kr-i ka'i lung bstan gyi mdo la brten nas sde ba thams cad 'dul ba'i bstan pa yin par gcig tu bsdus shing /__skad rigs so sor yi ger bris te 'bum phrag re re ba bzhir byas nas/__'dul lung sde bzhi zhes de phyin chad grags par byas pas/__da lta bod na bzhugs pa 'di thams cad yod par smra ba'i lung gi dum bu bzhi pa yin no/__/zhes paN+Di ta shAkya shrI b+ha dra sogs dang /__chos rje lo 'phags pa rin po che'i sdom gsum gyi gsung sgros las bshad/__tsA ba 'jam pa'i dbyangs mkhan slob kyi gtam ste/__lho pa kun mkhyen rin chen dpal gyis kyang /__gangs can gyi 'dul ba 'dzin pa dag zhu ba dang /__rnam 'byed la sogs pa lung sde bzhir 'chad pa ni 'khrul te/__rgyu mtshan dang bcas te bshad par bya'o/__/zhes gsungs/__gyes tshul ni rang lugs rtog ge 'bar ba'i rjes su 'brangs la/__bcas pa mi 'dra ba so sor yod tshul ni/__dbu ma spyan ras gzigs brtul zhugs las/__gzhan yang sde pa thams cad kyi sde snod gsum po gcig gis gcig la gnod de/__'di ltar kha cig dge slong nad par dus ma yin pa'i zas gnang ba la/__kha cig la mi gnang ba dang /__kha cig la dus min par bu ram za ba gnang la/__kha cig la mi gnang ba dang /_kha cig la mtshan mo bsnyen par ma rdzogs pa dang gnas gcig tu lhan cig nyal bar gnang la/__kha cig la mi gnang ba de dag ji ltar sangs rgyas kyi bka' ma yin par 'gyur/__zhes sogs dang /__lta ba tha dad du yod tshul ni gzhung lugs bye brag bkod pa'i 'khor lo las shes te/__de'i slad/__'jam dbyangs bla mas/__khyod kyi 'dul ba'i sde snod la/__/sdud mdzad phyi mas sde pa bzhi/__/skad rigs rnam pa bzhi dag gis/__/'dul ba lung rnams sde bar bsdus/__/zhes gsungs pas grub cing /__sdud mdzad phyi ma zhes pa ni gsum pa nyid la ngos 'dzin to/___/__!_gsang sngags kyi lugs la don dam sems bskyed cho gas thob pa yod de/__dbang bskur bzhi pa bzhin no/__/zhes bu ston gsungs kyang /__dbang bskur bzhi pa tshig gi brda tsam sprad nas thos pa gyur ba'i rtogs pa bskyed pa tsam yin gyi cho gas mi thob pas so/__/phyag rgya bzhi pa 'gos los klu sgrub kyis ma mdzad par bshad pa de ni tshigs bcad ma de yin la/__a ma na se'i chos skor du bzhugs pa tshig lhug can 'di ni klu sgrub kyis mdzad de/__dbang bskur nges bstan gyi 'grel pa slob dpon dga' ba skyong gis mdzad par lung drangs pa'i phyir ro/___/__!_drag po 'khor lo can phyag rdor gyi sprul par gsungs pa ni/__rgyud nas bshad na/__rigs ldan drag po 'jam dpal grags pa'i sprul pa yin zhing /__de zla ba bzang po'i sprul pa yin la/__de nyid phyag rdor gyi sprul pa yin par rtsa rgyud kyi lung gis grub pa'i phyir ro/__/dngos su bshad na/__dus kyi 'khor lo'i rgyud gsungs pa'i skabs 'dir phyag na rdo rje'am/__dus kyi 'khor lo nyid kyis chos rgyal dang rigs ldan thams cad sprul pa yin pas/__skabs 'di'i sprul byed kyi gtso bo ni phyag na rdo rje ste/__rgyud las/__'khor lo can ni rang gi lus la rdo rje can te lha mchog bdag rnams yan lag bcu gnyis 'gog__/ces gsungs pa ltar dang /__'jam dbyangs byang rtses rigs ldan nyer lnga dang /__bla ma dam pas seng ge rnam mthon tha dad du byas te/__nyer drug dang /__bu do la sogs kyis nyer lnga dang /__rang lugs sprul pa'i chos rgyal bdun dang /__rigs ldan nyer bdun te bzhed pa 34sogs yod do/___/_!_ston pa longs sku sangs rgyas pa'i gnas 'og min ni/__khams gsum las 'das pa'i spyod yul can gyi 'og min chen po dang /__sprul sku sangs rgyas kyi gnas ni/__'dzam bu'i gling rdo rje'i gdan no/__/bu ston gyis gsang sngags byung tshul lhan cig skyes grub kyi 'grel pa na mi snang ngo /__/zhes dgag pa byed pa ni/__grub pa thob pa'i rgyal po rnams ji ltar byung ba'i tshul gzhung de las bshad ces pa'i dgongs gzhi ma lon par snang ste/__o rgyan du sangs rgyas dngos kyi slob ma in+d+ra b+hU ti che ba dang /__bar du phyag na rdo rjes smin par byas pa'i in+d+ra b+hU ti 'bring po ye shes grub pa mdzad pa po dang /__tha ma lhan cig skyes grub mdzad pa'i in+d+ra b+hU ti chung ba rnams kyang rim gyis byung ste/__yul de'i grub pa'i rgyal po rnams byung tshul gyi gtam ni lhan cig skyes grub kyi 'grel par gsal lo/__/zhes pa'i don to/__/red mda' bas 'og min gyi nges 'dzin 'di tshig don gnyis ka ma dag cing /__phal chen las gzhi snying po me tog brgyan pa'i 'jig rten gyi khams rgya mtsho'i tha snyad mi 'byung la/__phal chen du bshad pa'i 'og min yang sprul sku'i zhing khams yin no zer ba ni mdo dngos sum mthong zhing /__'og min gyi nang tshan la sprul sku'i zhing khams mang du bshad pa dang 'og min gyi khyad par ma phyed la/__'dus pa rin po che las/__khams gsum las 'das pa'i spyod yul ces 'og min 'jig rten gyi khams ma yin par gsungs pa'i don ma go bar zad do/__/rnal 'byor rgyud kyi mngon rtogs thams cad bsdu na/__rgyu rgyud/__thabs rgyud/__'bras rgyud gsum du 'du'o/__/saM bu Ta da lta dngos su phan 'dogs pa'i rgyud bcu drug gam bcu bdun yod de/__pha rgyud gsang 'dus/__rdor phreng /__lha mo bzhi zhus/__rtogs bdun/__dgra nag ste lnga/__ma rgyud gur/__rtag__/phyag thig__/bde mchog rtsa rgyud/__mngon brjod/__rdo rje mkha' 'gro/__he ru ka mngon 'byung /__kun spyod/__rnam snang sgyu dra/__gdan bzhi ste bcu/__rtse mo dang /__de nyid 'dus pa ste yo ga'i rgyud gnyis so/__/dag ldan las gnod sbyin kharba ra ni mi'u thung ste/__rtog ge 'bar bar bshad pa'i 'jigs sde'i bu bum rna zhes pa de'o/__/zhes gsungs//____//__!_yang dgongs gsal las/__mu stegs byed la lta log bsam gyis mi khyab kyang bsdu na rtag chad gnyis su 'du'o/__/de la rtag par smra ba ni bzhi ste/__rig byed pa/__grangs can pa/__bye brag pa/__zad byed pa'o/__/chad par smra ba ni tshu rol mdzes pa gcig kho na grags so/__/'di dag la bod kyi dge ba'i bshes gnyen dag gis rnam dbye byas pa mang po snang ste de dag 'khrul par snang ngo /__/'di dag kyang rgyu bdag 'dzin gyis bskyed/__rkyen mi dge ba'i bshes gnyen gyis bzung /__ngo bo rtag chad gnyis su 'dod de/__de'ang rtag lta bzhi po bdag rtag pa de las dang nyon mongs pas bcings pa'i tshe 'khor ba/__grol ba'i tshe thar bar 'dod do/__/chad par lta ba ni bdag yod pa de shi ba'i tshe bcings pa'i 'khor ba dang grol ba'i thar pa gnyis ka mi 'dod de/__'di dag sun phyung mdor bsdu na/__gang zag dang chos kyi bdag chod de chos thams cad rang bzhin med par rtogs pa nyid kyis rtag chad las grol bar gsal lo//___//__!