JKCL-KABUM-12-NA-071

🚧 This website is under continued development. We appreciate your patience!

Previous Text Back to Volume PageNext Text

བསྟན་འགྲོ་བདེ་བའི་སྨོན་ལམ།

Wylie title	bstan 'gro bde ba'i smon lam
Location	chos kyi blo gros bka' 'bum Volume 12, Text 71, Pages 333-336 (Folios 1a1 to 2b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bstan 'gro bde ba'i smon lam. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 333-336. Bir, H.P.: Khyentse Labrang, 2012.
Genre	Prayers - smon lam
Colophon	།ཅེས་པ་འདི་ནི་ཤིང་ལུག་ཟླ་བ་ལྔ་པའི་ཚེས་ལ་བོད་ཁམས་བསྟན་འགྲོ་བདེ་བའི་སྨོན་འདུན་བགྱིས་སྐབས་ལ་འཇམ་དབྱངས་ཆོས་ཀྱི་བློ་གྲོས་པས་རྫོང་གསར་བཀྲ་ཤིས་ལྷ་རྩེ་ནས་བྲིས་པའོ།། །།སརྦ་མངྒ་ལཾ།།
	/ces pa 'di ni shing lug zla ba lnga pa'i tshes la bod khams bstan 'gro bde ba'i smon 'dun bgyis skabs la 'jam dbyangs chos kyi blo gros pas rdzong gsar bkra shis lha rtse nas bris pa'o//___//sarba mang+ga laM//

1 Texts in this Section (sde tshan or chos tshan)

333-336	བསྟན་འགྲོ་བདེ་བའི་སྨོན་ལམ། bstan 'gro bde ba'i smon lam Prayers - smon lam	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

བསྟན་འགྲོ་བདེ་བའི་སྨོན་ལམ་བཞུགས་སོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཕྱོགས་བཅུ་དུས་གསུམ་རྒྱལ་བ་སྲས་བཅས་དང་། །ཁྱད་པར་སྟོན་པ་མཉམ་མེད་ཤཱཀྱའི་རྒྱལ། །ཉེ་སྲས་བརྒྱད་དང་གཏད་རབས་གནས་བརྟན་དང་། །འཛམ་གླིང་རྒྱན་དྲུག་རྨད་བྱུང་སློབ་དཔོན་ཆེ། །རིག་འཛིན་རྣམ་བརྒྱད་གྲུབ་ཆེན་བརྒྱད་ཅུ་སོགས། །ཀུན་འདུས་རིག་འཛིན་པདྨ་སཾ་བྷ་ཝ། །མཚན་མཆོག་བརྒྱད་དང་འཕྲུལ་ཚན་བཞི་བཅུ་དང་། །ཌཱ་ཀི་རྣམ་གཉིས་རྗེ་འབངས་ཉི་ཤུ་ལྔ། །ཐུབ་དབང་གཉིས་པ་ཞི་འཚོ་ཨ་ཏི་ཤ། །གསར་རྙིང་མཁས་གྲུབ་རིག་པ་འཛིན་རྣམས་དང་། །སྤྲུལ་པའི་གཏེར་སྟོན་བརྒྱ་རྩ་ལ་སོགས་པ། །རིག་འཛིན་བླ་མ་བྱེ་བ་ས་ཡ་དང་། །རྒྱུད་སྡེ་བཞི་དང་ཁྱད་པར་སྒྲུབ་སྡེ་བརྒྱད། །དཔལ་ཆེན་བཀའ་འདུས་བླ་མ་དགོངས་པ་འདུས། །མདོ་དང་སྒྱུ་འཕྲུལ་དུས་ཀྱི་འཁོར་ལོ་སོགས། །ཞི་དང་ཁྲོ་བོའི་དཀྱིལ་འཁོར་བསམ་ཡས་དང་། །རྗེ་བཙུན་སྒྲོལ་མ་མྱུར་མ་དཔའ་མོའི་ཞབས། །ཕག་མོ་སེང་གདོང་གནས་གསུམ་དཔའ་བོ་དང་། །རྣལ་འབྱོར་མ་དཔལ་བྱེ་བ་འབུམ་ཕྲག་ཚོགས། །མགོན་ཆེན་སྡེ་ལྔ་མ་ནིང་ཞིང་སྐྱོང་དང་། །སྔགས་སྲུང་ཁྱབ་འཇུག་དམ་ཅན་རྡོ་རྗེ་ལེགས། །དྲེགས་པའི་སྡེ་དཔོན་སུམ་ཅུ་ལ་སོགས་པ། །རྒྱུད་གསུམ་དམ་ཅན་དྲེགས་ཚོགས་འཁོར་དང་བཅས། །གཙང་རིས་མགོན་པོ་བདུན་ཅུ་རྩ་ལྔ་མཆེད། །རྣམ་སྲས་ཛཾ་ལྷ་ནོར་ལྷ་རྒྱ་མཚོ་དང་། །ཚེ་རིང་མཆེད་ལྔ་བརྟན་མ་མགུར་ལྷ་སོགས། །བསྟན་ལ་དགའ་བའི་དཀར་ཕྱོགས་སྐྱོང་རྣམས་དང་། །གནས་དང་གཏེར་གྱི་བདག་པོ་ཆེ་རྣམས་སོགས། །མདོར་ན་རྩ་གསུམ་རབ་འབྱམས་ཐུགས་རྗེ་དང་། །བྱིན་རླབས་མཐུ་སྟོབས་བདེན་པའི་རྩལ་སྤྲུགས་ཏེ། །སྙིགས་མ་ལྔ་བདོའི་མཐའ་ལ་ཐུག་པ་ཡིས། །བསྟན་དང་འགྲོ་བའི་བདེ་སྐྱིད་ཉི་མྱུར་ཙམ། །བསྟན་འཛིན་སྐྱེས་དང་བསྟན་པའི་སྦྱིན་བདག་རྣམས། །དམངས་སུ་འབེབས་ཤིང་མངའ་ཐང་འཕྲོགས་པ་སོགས། །ཆོས་འཁོར་གཉེན་པོ་འཇིགས་ལ་ཉེ་བས་ན། །ཁྱེད་རྣམས་ཐུགས་བསྐྱེད་ནུས་པ་ཟད་དམ་ཅི། །བདག་ཅག་ཉིན་མཚན་གདུང་ཤུགས་དྲག་པོ་ཡི། །དད་མོས་གསོལ་འདེབས་སྙན་གྱིས་མ་གསན་ནམ། །ད་ནི་ཐུགས་རྗེའི་དཔལ་མཚོན་རབ་བསྐྱེད་དེ། །ནག་ཕྱོགས་གདུག་པས་བཅོམ་པར་མ་གྱུར་གང་། །སྐྱོབས་པ་མཛོད་ཅིག་བཅོམ་ཟིན་ཅི་ཞིག་བྱེད། །དེས་ན་གསང་གསུམ་ཕྲིན་ལས་རྩལ་ཤུགས་ཀྱི། །ནུས་མཐུ་བསྐལ་པའི་མེ་བཞིན་སྤར་དུ་གསོལ། །ཁྱད་པར་གུ་རུ་པདྨ་དྲག་པོ་ཡི། །སྦས་གནས་གངས་བྲག་རི་གླིང་ལ་སོགས་པས། །དུ་རུ་ཁ་ཡི་འཇིགས་ལས་སྐྱོབ་བོ་ཞེས། །ཞལ་བཞེས་དམ་བཅའ་བརྫུན་དུ་ཟད་དམ་ཅི། །སྔོན་སྨོན་ལྡན་པའི་སྐྱེས་བུ་བླ་མ་དང་། །ཌཱཀྐིའི་ལུང་བསྟན་འཁྲུལ་མེད་ཐེབས་པ་ཡི། །ད་ནི་མྱུར་དུ་གནས་ཡུལ་སྦས་པ་རྣམས། །དཀའ་བ་མེད་པ་འབྱེད་ནས་བསྟན་འཛིན་དང་། །དད་ལྡན་སྐྱེ་བོ་ཕོ་མོའི་དབུགས་དབྱུང་མཛོད། །དེ་ལ་འགལ་རྐྱེན་ཉེར་འཚེའི་རིགས་མཐའ་དག །བདུད་ལས་རྒྱལ་བའི་ཁྲོ་རྒྱལ་གྲོ་བོ་ལོད། །དྲན་པའི་མོད་ལས་ལྕགས་སྲེག་མེ་བཞིན་དུ། །ངང་གིས་ཞི་ནས་བསམ་པའི་དོན་ཀུན་འགྲུབ། །གུ་རུ་པད་འབྱུང་ཁྱེད་ཀྱིས་ལམ་སྣ་དྲོངས། །ཆོས་སྐྱོང་སྲུང་མ་རྣམས་ཀྱིས་རྒྱབ་ནས་སྐྱོབས། །དཀར་ཕྱོགས་སྐྱོང་བ་རྣམས་ཀྱིས་གྲོགས་མཛོད་ཅིག །བདུད་ལས་རྣམ་པར་རྒྱལ་བའི་དཔལ་ཐོབ་ཅིང་། །ཚེ་བསོད་འདོད་རྒུའི་འབྱོར་པ་རྒྱས་པ་དང་། །ལུང་དང་མངོན་པར་རྟོགས་པའི་ཡོན་ཏན་རྣམས། །དཀར་པོའི་ཕྱོགས་བཞིན་གོང་ནས་གོང་འཕེལ་ཤོག །སྣོད་བཅུད་རྟེན་འབྲེལ་ཉེས་པའི་ཚོགས་ཀུན་ཞི། །ཕྱི་ནང་གསང་བའི་རྟེན་འབྲེལ་ཤུགས་འབྱུང་འགྲུབ། །ཉེས་ཚོགས་ལྟར་སྣང་དགེ་ཞིང་ཤིས་པར་གྱུར། །རྟེན་འབྲེལ་ཕུན་སུམ་ཚོགས་པའི་བཀྲ་ཤིས་ཤོག །ཇི་ལྟར་སྨོན་པ་འདི་བཞིན་འགྲུབ་པ་ལ། །དཀོན་མཆོག་རྩ་གསུམ་རྒྱ་མཚོས་བྱིན་གྱིས་རློབས། །ཆོས་ཉིད་རང་བཞིན་རྣམ་པར་དག་པ་དང་། །ཆོས་ཅན་རྒྱུ་འབྲས་རྟེན་འབྲེལ་བསླུ་མེད་ཀྱི། །བདེན་པའི་སྟོབས་ཀྱིས་དབང་དུ་འབྱོར་པ་དང་། །ཀུན་མཁྱེན་རྒྱལ་བའི་བསྟན་པ་དར་རྒྱས་ཤོག །ཅེས་པ་འདི་ནི་ཤིང་ལུག་ཟླ་བ་ལྔ་པའི་ཚེས་ལ་བོད་ཁམས་བསྟན་འགྲོ་བདེ་བའི་སྨོན་འདུན་བགྱིས་སྐབས་ལ་འཇམ་དབྱངས་ཆོས་ཀྱི་བློ་གྲོས་པས་རྫོང་གསར་བཀྲ་ཤིས་ལྷ་རྩེ་ནས་བྲིས་པའོ།། །།སརྦ་མངྒ་ལཾ།། །།

[edit]

bstan 'gro bde ba'i smon lam bzhugs so/__/oM AHhU~M badz+ra gu ru pad+ma sid+d+hi hU~M/__phyogs bcu dus gsum rgyal ba sras bcas dang /__/khyad par ston pa mnyam med shAkya'i rgyal/__/nye sras brgyad dang gtad rabs gnas brtan dang /__/'dzam gling rgyan drug rmad byung slob dpon che/__/rig 'dzin rnam brgyad grub chen brgyad cu sogs/__/kun 'dus rig 'dzin pad+ma saM b+ha wa/__/mtshan mchog brgyad dang 'phrul tshan bzhi bcu dang /__/DA ki rnam gnyis rje 'bangs nyi shu lnga/__/thub dbang gnyis pa zhi 'tsho a ti sha/__/gsar rnying mkhas grub rig pa 'dzin rnams dang /__/sprul pa'i gter ston brgya rtsa la sogs pa/__/rig 'dzin bla ma bye ba sa ya dang /__/rgyud sde bzhi dang khyad par sgrub sde brgyad/__/dpal chen bka' 'dus bla ma dgongs pa 'dus/__/mdo dang sgyu 'phrul dus kyi 'khor lo sogs/__/zhi dang khro bo'i dkyil 'khor bsam yas dang /__/rje btsun sgrol ma myur ma dpa' mo'i zhabs/__/phag mo seng gdong gnas gsum dpa' bo dang /__/rnal 'byor ma dpal bye ba 'bum phrag tshogs/__/mgon chen sde lnga ma ning zhing skyong dang /__/sngags srung khyab 'jug dam can rdo rje legs/__/dregs pa'i sde dpon sum cu la sogs pa/__/rgyud gsum dam can dregs tshogs 'khor dang bcas/__/gtsang ris mgon po bdun cu rtsa lnga mched/__/rnam sras dzaM lha nor lha rgya mtsho dang /__/tshe ring mched lnga brtan ma mgur lha sogs/__/bstan la dga' ba'i dkar phyogs skyong rnams dang /__/gnas dang gter gyi bdag po che rnams sogs/__/mdor na rtsa gsum rab 'byams thugs rje dang /__/byin rlabs mthu stobs bden pa'i rtsal sprugs te/__/snyigs ma lnga bdo'i mtha' la thug pa yis/__/bstan dang 'gro ba'i bde skyid nyi myur tsam/__/bstan 'dzin skyes dang bstan pa'i sbyin bdag rnams/__/dmangs su 'bebs shing mnga' thang 'phrogs pa sogs/__/chos 'khor gnyen po 'jigs la nye bas na/__/khyed rnams thugs bskyed nus pa zad dam ci/__/bdag cag nyin mtshan gdung shugs drag po yi/__/dad mos gsol 'debs snyan gyis ma gsan nam/__/da ni thugs rje'i dpal mtshon rab bskyed de/__/nag phyogs gdug pas bcom par ma gyur gang /__/skyobs pa mdzod cig bcom zin ci zhig byed/__/des na gsang gsum phrin las rtsal shugs kyi/__/nus mthu bskal pa'i me bzhin spar du gsol/__/khyad par gu ru pad+ma drag po yi/__/sbas gnas gangs brag ri gling la sogs pas/__/du ru kha yi 'jigs las skyob bo zhes/__/zhal bzhes dam bca' brdzun du zad dam ci/__/sngon smon ldan pa'i skyes bu bla ma dang /__/DAk+ki'i lung bstan 'khrul med thebs pa yi/__/da ni myur du gnas yul sbas pa rnams/__/dka' ba med pa 'byed nas bstan 'dzin dang /__/dad ldan skye bo pho mo'i dbugs dbyung mdzod/__/de la 'gal rkyen nyer 'tshe'i rigs mtha' dag__/bdud las rgyal ba'i khro rgyal gro bo lod/__/dran pa'i mod las lcags sreg me bzhin du/__/ngang gis zhi nas bsam pa'i don kun 'grub/__/gu ru pad 'byung khyed kyis lam sna drongs/__/chos skyong srung ma rnams kyis rgyab nas skyobs/__/dkar phyogs skyong ba rnams kyis grogs mdzod cig__/bdud las rnam par rgyal ba'i dpal thob cing /__/tshe bsod 'dod rgu'i 'byor pa rgyas pa dang /__/lung dang mngon par rtogs pa'i yon tan rnams/__/dkar po'i phyogs bzhin gong nas gong 'phel shog__/snod bcud rten 'brel nyes pa'i tshogs kun zhi/__/phyi nang gsang ba'i rten 'brel shugs 'byung 'grub/__/nyes tshogs ltar snang dge zhing shis par gyur/__/rten 'brel phun sum tshogs pa'i bkra shis shog__/ji ltar smon pa 'di bzhin 'grub pa la/__/dkon mchog rtsa gsum rgya mtshos byin gyis rlobs/__/chos nyid rang bzhin rnam par dag pa dang /__/chos can rgyu 'bras rten 'brel bslu med kyi/__/bden pa'i stobs kyis dbang du 'byor pa dang /__/kun mkhyen rgyal ba'i bstan pa dar rgyas shog__/ces pa 'di ni shing lug zla ba lnga pa'i tshes la bod khams bstan 'gro bde ba'i smon 'dun bgyis skabs la 'jam dbyangs chos kyi blo gros pas rdzong gsar bkra shis lha rtse nas bris pa'o//___//sarba mang+ga laM//___//