JKCL-KABUM-08-NYA-011-025

🚧 This website is under continued development. We appreciate your patience!

Previous Text Back to Volume PageNext Text

ཕན་པའི་གཏམ་དྲན་པའི་གསོལ་འདེབས།

Wylie title	phan pa'i gtam dran pa'i gsol 'debs
Location	chos kyi blo gros bka' 'bum Volume 8, sde tshan 11, Text 25, Pages 351-356 (Folios 34a2 to 36b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. phan pa'i gtam dran pa'i gsol 'debs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 351-356. Bir, H.P.: Khyentse Labrang, 2012.
Genre	Advice - zhal gdams
Colophon	།དེ་ལྟར་གདམས་པའི་ཚིགས་བཅད་འདི། །དད་ལྡན་པདྨ་རྒྱལ་མཚན་གྱི། །བསྐུལ་བ་དོན་ཡོད་བྱ་བའི་ཕྱིར། །འཇམ་དབྱངས་ཆོས་ཀྱི་བློ་གྲོས་པས། །རང་གཞན་ཀུན་ལ་ཕན་ཕྱིར་གདམས། །སརྦ་མངྒ་ལཾ།།
	/de ltar gdams pa'i tshigs bcad 'di/__/dad ldan pad+ma rgyal mtshan gyi/__/bskul ba don yod bya ba'i phyir/__/'jam dbyangs chos kyi blo gros pas/__/rang gzhan kun la phan phyir gdams/__/sarba mang+ga laM//

1 Texts in this Section (sde tshan or chos tshan)

25 351-356	ཕན་པའི་གཏམ་དྲན་པའི་གསོལ་འདེབས། phan pa'i gtam dran pa'i gsol 'debs Advice - zhal gdams	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ ཕན་པའི་གཏམ་དྲན་པའི་གསོལ་འདེབས་ཞེས་བྱ་བ་བཞུགས་སོ། །ཨོཾ་སྭསྟི། སྒྲིབ་གཉིས་མུན་པ་མ་ལུས་གཏན་བཅོམ་ཞིང་། །མཁྱེན་གཉིས་ཡེ་ཤེས་སྣང་བའི་གཏེར་ཆེན་པོ། བློ་མཆོག་སྤོབས་པའི་དངོས་གྲུབ་སྦྱིན་མཛད་པ། །བླ་མ་འཇམ་པའི་དབྱངས་ལ་གུས་བཏུད་ནས། །རང་ཉིད་དམ་པའི་སྤྱོད་པ་མི་གནས་ཤིང་། །ཉེས་བརྒྱའི་ཕུང་པོ་ཆེན་པོའི་རང་བཞིན་པས། །གཞན་ལ་གདམས་པ་ནེ་ཙོའི་འདོན་པ་བཞིན། །ཁྲེལ་བར་གྱུར་ཀྱང་ཉུང་ངུའི་ངག་གིས་གདམས། །རང་གཞན་སྲིད་པའི་གནས་ལས་སྒྲོལ་བའི་སླད། །མི་རྟག་འཆི་བ་རྗེས་སུ་དྲན་པ་དང་། །རྙེད་དཀའི་ཚུལ་བསམ་འཁོར་བའི་ཉེས་པ་དང་། །ལས་འབྲས་སྤངས་བླང་མ་ནོར་བྱེད་པ་གཅེས། །ལུས་ངག་ཡིད་གསུམ་མ་སྒྲིམ་བག་མེད་པར། །གྱུར་པའི་དབང་གིས་ལས་ངན་སྣ་ཚོགས་བསགས། །དེ་ལས་འབྲས་བུ་རྩུབ་མོ་མྱོང་བར་ངེས། །དེ་བས་སྡིག་པ་ཆུང་ལའང་འཛེམ་པར་མཛོད། །འཁོར་བ་མཐོ་དམན་གང་དུ་སྐྱེས་གྱུར་ཀྱང་། །བདེ་བའི་སྐབས་མེད་སྡུག་བསྔལ་རང་བཞིན་དུ། །ངེས་པར་འབྱུང་བ་སྙིང་ནས་སྐྱེས་པ་དང་། །ཚེ་འདིའི་ཞེན་དོར་ཕྱི་མ་དྭངས་དུ་ལོང་། །སྡོམ་པའི་རྩ་བ་མཆོག་གསུམ་རིན་པོ་ཆེར། །རང་གཞན་འཇིགས་པ་ཀུན་ལས་སྐྱོབས་པའི་ཕྱིར། །ཡིད་ཆེས་མོས་གུས་བརྟན་པོས་སྐྱབས་སུ་བསྙེན། །སྐྱིད་སྡུག་ཅི་བྱུང་ཡིད་རྟོན་ཁེལ་བར་གཅེས། །ཐེག་ཆེན་ལམ་གྱི་རྩ་བ་བྱང་ཆུབ་སེམས། །གཞན་ཕན་ལྷག་བསམ་བཟང་པོ་རིས་མེད་པ། །ཀུན་ལ་སྙོམས་པས་བློ་སྦྱོང་རྟག་ཏུ་སྒོམ། །བདག་བས་གཞན་གཅེས་སེམས་མཆོག་འབྱོང་པར་མཛོད། །འདི་མེད་ཆོས་ཀྱི་སྙིང་པོར་བོར་བས་ན། །སེམས་མཆོག་ཉམས་པའི་རྒྱུ་རྣམས་སྤངས་བྱས་ནས། །རྐྱེན་ངན་ཅི་བྱུང་བཟོད་པའི་གོ་ཆ་བགོས། །དཔག་བསམ་ཤིང་བཞིན་གོང་འཕེལ་འབྱུང་བ་གཅེས། །རྟག་ཏུ་དགེ་བའི་བྱ་བ་ཅི་སྤྱོད་ཀྱང་། །བྱང་ཆུབ་སེམས་ཀྱི་གསེར་འགྱུར་རྩི་ཡིས་ཐེབས། །ཕ་རོལ་ཕྱིན་པ་དྲུག་དང་ལྡན་པ་ཡིས། །བསླབ་གསུམ་ཉམས་ལེན་རྒྱུན་དུ་བརྩོན་པར་ཞུ། །ཚུལ་གནས་ཐོས་བསམ་སྒོམ་པའི་བྱ་བ་འདིས། །རྒྱལ་བའི་བསྟན་པ་རིན་ཆེན་གཟུང་བས་ན། །ཉེས་པའི་སྐྱོན་རྣམས་རིངས་སུ་དོར་བ་དང་། །ཡོན་ཏན་རྒྱ་མཚོའི་རྡུལ་སྙེད་སྡུད་པ་གཅེས། །ཀུན་ལ་དག་སྣང་སྦྱོང་ལ་གཤེ་སྐུར་དང་། །ཟུར་ཟ་མི་སྙན་ཚིག་རྣམས་བརྗོད་པ་སྤངས། །རང་གཤིས་དྲང་པོ་སོར་མར་འཇོག་པ་དང་། །ཀུན་དང་མཐུན་ལ་འགྲོགས་ན་བདེ་བར་མཛོད། །རང་ཉིད་དམ་པའི་ཚུལ་ལས་མི་འདའ་ཞིང་། །དྲན་ཤེས་བག་ཡོད་རྒྱུན་དུ་བརྟེན་པ་དང་། །དོན་མེད་ངག་འཁྱལ་རྩེད་མོས་མི་གཡེངས་བར། །ཆོས་སྤྱོད་བཅུ་ལ་འབད་པ་དྲག་པོ་མཛོད། །འབད་པས་སྦྱངས་པའི་ཕྱི་ནང་རིག་གནས་རྣམས། །བརྗེད་པར་མི་བྱེད་ཉན་པོ་མཆིས་གྱུར་ན། །དཀའ་ཚེགས་སྤངས་ལ་བརྩེ་བའི་བློ་བསྐྱེད་ནས། །རང་གི་ཡོན་ཏན་གཞན་རྒྱུད་འབྱོར་བར་གྱིས། །ཟང་ཟིང་བྱུང་ན་བླ་མ་དཀོན་མཆོག་མཆོད། །ཧ་ཅང་དཀོར་ལ་སྲེད་པ་མི་ཆེ་བར། །ཆོག་ཤེས་བསྐྱེད་ནས་འདོད་པའི་ཉེས་དམིགས་དྲན། །གང་ལའང་ཆགས་འཛིན་སྤང་བ་ཤིན་ཏུ་གཅེས། །ཟབ་རྒྱས་གྲུབ་མཐའི་རྣམ་པར་བཞག་པ་རྣམས། །རང་རང་ལུགས་བཞིན་འགལ་བར་མ་སྒྲུབ་ཅིག། ཐེག་ཆེན་དབུ་སེམས་དགོངས་པའི་ཞེ་ཕུག་ནི། །དབུ་མ་ཆེན་པོར་གནས་ཕྱིར་དེ་ཉིད་འཛིན། །ཚེ་ཐུང་འདི་ལ་རྡོ་རྗེ་ཐེག་པ་ལ། །གཙོ་བོར་སྟོན་ན་ཤིན་ཏུ་ཁེ་ཆེ་བས། །ཟབ་མོའི་རྒྱུད་སྡེ་མཉན་ཞིང་བསམ་པ་དང་། །མན་ངག་དག་ལ་རྟག་ཏུ་འདྲིས་པར་བྱ། །ཡི་དམ་རྣམ་མང་བགྱི་བ་མ་ལྕོགས་ཀྱང་། །སྔ་འགྱུར་ཕྱོགས་ལ་རྡོ་རྗེ་སེམས་དཔའ་དང་། །ཕྱི་འགྱུར་བླ་མེད་རྒྱུད་སྡེའི་ཡང་སྙིང་ཆེ། །རྔོག་ལུགས་དགྱེས་རྡོར་ཉམས་ལེན་སྙིང་པོར་མཛོད། །བསྟན་སྲུང་རྣམ་མང་ཡོད་ཀྱང་སྙིང་པོ་ནི། །སྔགས་སྲུང་མ་དང་མྱུར་མཛད་ཕྱག་དྲུག་པར། །བསྙེན་སྒྲུབ་མཆོད་གཏོར་ལ་བརྩོན་ལས་བཞི་སྒྲུབ། །འདི་ཕྱི་བར་དོའི་འཇིགས་ལ་བསྐྱབ་པར་ངེས། །སྙིགས་དུས་བྱང་ཆུབ་སྒྲུབ་ལ་བར་ཆད་མང་། །དེ་བཟློག་རྡོ་རྗེ་ཁྲོ་བོའི་སྟོབས་འདུས་པ། །རྡོ་རྗེ་གཞོན་ནུ་ཆེ་བཙན་འགྲན་ཟླ་བྲལ། །དེ་ཡི་ལྷ་སྔགས་རྒྱུན་དུ་བརྩོན་པར་ཞུ། །ཚེ་རིང་བ་ནི་མཐོ་རིས་ནོར་གྱི་མཆོག། ལོང་ཡོད་གྱུར་ན་ལུགས་གཉིས་འབད་མེད་འགྲུབ། །དེ་ཕྱིར་རྗེ་བཙུན་འཕགས་མའི་རྣལ་འབྱོར་ལ། །རྒྱུན་དུ་འབད་ན་འཆི་མེད་འགྲུབ་པར་འགྱུར། །ཉམས་ལེན་མཐར་ཐུག་བླ་མའི་རྣལ་འབྱོར་སྒོམ། །དེ་ཡང་རྩ་གསུམ་འདུས་ཞལ་ཨོ་རྒྱན་རྗེ། །སྙིང་དབུས་འོད་ལྔའི་ཀློང་དུ་འབྲལ་མེད་བཞུགས། །གསོལ་བཏབ་ཐུགས་ཡིད་བསྲེ་བའི་ཉམས་ལེན་མཛོད། །ཐེག་པའི་མཐར་ཐུག་ལྷུན་པོའི་རྩེ་མོ་འདྲ། །ཨ་ཏི་འོད་གསལ་རྫོགས་པ་ཆེན་པོའི་དོན། །ཡིད་དཔྱོད་བློ་ཡིས་མ་སླད་ཀ་དག་དང་། །ལྷུན་གྲུབ་དབྱེར་མེད་རང་ཞལ་རྟག་ཏུ་སྐྱོང་། །མ་ཡེངས་མ་བསྒོམ་འཛིན་རྩོལ་བྲལ་བར་བཞག། རང་བྱུང་རང་བབ་རང་གྲོལ་ཁྱབ་བརྡལ་ཆེར། །མི་གཡོ་མི་འཕོ་ཀུན་བཟང་དགོངས་ཀློང་དེར། །བཙན་ས་ཟིན་ན་སྐུ་གསུམ་མངོན་དུ་འགྱུར། །དེ་སྐད་གདམས་པའི་ཚིག་ཕྲེང་འདི་དག་མཐུས། །ཁྱོད་ཉིད་དོན་གཉིས་ལྷུན་གྱིས་གྲུབ་པ་དང་། །བསྟན་འགྲོར་སྨན་པའི་མཐུ་ནུས་རྩལ་རྫོགས་ཤིང་། །ཕན་བདེའི་དགའ་སྟོན་མཆོག་ཏུ་རྒྱས་གྱུར་ཅིག། དེ་སྐད་སྨྲ་བ་ཆོས་ཀྱི་བློ་གྲོས་ལ། །སྐྱེས་སྦྱངས་ཤེས་རབ་དད་ལྡན་མང་དུ་ཐོས། །བློ་གསལ་དེས་བསྐུལ་ཁ་ཁྲལ་ཡི་གེར་བྲིས། །རྣམ༵་གྲོལ་བཟང༵་པོའི་དཔལ་ལ་སྤྱོད་གྱུར་ཅིག། ཤུ་བྷཾ་མསྟུ་སརྦ་ཛ་ག་ཏཾ། ། ༈ བླ་མའི་ཞབས་ལ་ཕྱག་འཚལ་ལོ། །རྟེན་དལ་འབྱོར་མི་ལུས་རིན་ཆེན་ཐོབ། །རྗེ་མཚན་ལྡན་གྱི་བླ་མ་མཇལ་དུ་ཡོད། །སངས་རྒྱས་ཀྱི་བསྟན་པ་ཡོད་སྐབས་སུ། །རང་གཞན་ཀུན་ཆོས་ལ་སྤྱོད་པ་རིགས། ༡། དགྲ་འཆི་བདག་གཤེད་མ་རྔམ་འཇིགས་ཅན། །དུས་ནམ་འོང་ངེས་པར་ཆ་མེད་པས། །ཚེ་འདིར་སྣང་གི་ཞེན་པ་རྦད་ཀྱི་ཆོད། །ལམ་ཕྱི་མའི་གྲོ་ཞིག་སྒྲུབ་ལ་རན། ༢། ལས་རྒྱུ་འབྲས་གོ་ལྡོག་མི་འོང་ཞིང་། །ལས་གང་བྱས་དེ་ཡི་འབྲས་བུ་སྨིན། །འབྲས་སྡུག་བསྔལ་འཕེལ་བའི་རྒྱུ་ངན་པ། །ཉོན་མོངས་པ་འདུལ་བའི་ཆོས་དེས་སྤང་། ༣། དེ་སྤངས་ན་སྲིད་པའི་རྩ་བ་ཆོད། །དགེ་ཐར་པའི་ཡོན་ཏན་གོང་དུ་འཕེལ། །རང་གཞན་གྱི་འདུན་མ་འགྲུབ་ནས་གདའ། །ཚེ་འདི་ལ་སྲིད་པའི་མཚོ་ལས་བརྒལ། ༤། ཆོས་ཀུན་གྱི་རྩ་བ་དད་མོས་དང་། །ངེས་འབྱུང་དང་སྐྱབས་འགྲོའི་གཞི་བཅས་ནས། །ཆོས་ཀུན་གྱི་སྙིང་པོ་བྱམས་སྙིང་རྗེ། །ཚད་མེད་ཀྱི་ཆོས་བཞི་འབད་འཚལ་ལོ། ༥། ཡིད་བཞིན་གྱི་ནོར་བུ་བརྒྱ་སྟོང་གིས། །ཕྱོགས་ཙམ་ཡང་མི་མཚོན་བྱང་ཆུབ་སེམས། །བདག་གཞན་མཉམ་བརྗེས་ཀྱི་ཉམས་ལེན་ལ། །དུས་རྟག་ཏུ་བློ་སྦྱང་བྱ་བ་གཅེས། །འཁོར་འདས་ཀྱི་ཆོས་ཀུན་སྒྱུ་མ་དང་། །རྨི་ལམ་ལྟར་མཐོང་ནས་རྟག་ཆད་ཀྱི། །མཐའ་ཀུན་ལས་རྣམ་གྲོལ་དབུ་མ་ཡི། །ལྟ་བ་མཆོག་ཟབ་གསལ་གཉིས་མེད་ལ། །དུས་རྟག་པར་མཚན་འཛིན་བྲལ་བར་བསྐྱངས། །ད་སྒོམ་པས་འཁྲུལ་སྣང་རང་སར་གྲོལ། །བདག་འཛིན་གྱི་འགོང་པོ་དྲུང་ནས་བཅོམ། །ཡེ་ཤེས་ཀྱི་ཉི་མ་ཁོངས་ནས་འཆར། །དེ་ལྟ་བུའི་གཟུང་འཛིན་གཉིས་སྟོང་གི །ལྟ་བ་དེ་རྒྱུད་ལ་སྐྱེ་བའི་ཐབས། །ལམ་ཟབ་མོ་བླ་མའི་རྣལ་འབྱོར་ལ། །བུ་ཁྱོད་ཀྱིས་ཆུ་བོའི་རྒྱུན་ལྟར་བརྩོན། །དུས་ཀུན་དུ་སྣང་གྲགས་རྟོགས་ཚོགས་ཀུན། །རྗེ་བླ་མའི་གསང་བ་གསུམ་དུ་འཆར། །དྲན་པ་དང་ཤེས་བཞིན་བསྟེན་པར་འཚལ། །དགེ་ཚོགས་ཀུན་མཁའ་ཁྱབ་ཕ་མར་བསྔོ། །དེ་ལྟར་གདམས་པའི་ཚིགས་བཅད་འདི། །དད་ལྡན་པདྨ་རྒྱལ་མཚན་གྱི། །བསྐུལ་བ་དོན་ཡོད་བྱ་བའི་ཕྱིར། །འཇམ་དབྱངས་ཆོས་ཀྱི་བློ་གྲོས་པས། །རང་གཞན་ཀུན་ལ་ཕན་ཕྱིར་གདམས། །སརྦ་མངྒ་ལཾ།། །།

[edit]

!_phan pa'i gtam dran pa'i gsol 'debs zhes bya ba bzhugs so/__/oM swasti/__sgrib gnyis mun pa ma lus gtan bcom zhing /__/mkhyen gnyis ye shes snang ba'i gter chen po/__blo mchog spobs pa'i dngos grub sbyin mdzad pa/__/bla ma 'jam pa'i dbyangs la gus btud nas/__/rang nyid dam pa'i spyod pa mi gnas shing /__/nyes brgya'i phung po chen po'i rang bzhin pas/__/gzhan la gdams pa ne tso'i 'don pa bzhin/__/khrel bar gyur kyang nyung ngu'i ngag gis gdams/__/rang gzhan srid pa'i gnas las sgrol ba'i slad/__/mi rtag 'chi ba rjes su dran pa dang /__/rnyed dka'i tshul bsam 'khor ba'i nyes pa dang /__/las 'bras spangs blang ma nor byed pa gces/__/lus ngag yid gsum ma sgrim bag med par/__/gyur pa'i dbang gis las ngan sna tshogs bsags/__/de las 'bras bu rtsub mo myong bar nges/__/de bas sdig pa chung la'ang 'dzem par mdzod/__/'khor ba mtho dman gang du skyes gyur kyang /__/bde ba'i skabs med sdug bsngal rang bzhin du/__/nges par 'byung ba snying nas skyes pa dang /__/tshe 'di'i zhen dor phyi ma dwangs du long /__/sdom pa'i rtsa ba mchog gsum rin po cher/__/rang gzhan 'jigs pa kun las skyobs pa'i phyir/__/yid ches mos gus brtan pos skyabs su bsnyen/__/skyid sdug ci byung yid rton khel bar gces/__/theg chen lam gyi rtsa ba byang chub sems/__/gzhan phan lhag bsam bzang po ris med pa/__/kun la snyoms pas blo sbyong rtag tu sgom/__/bdag bas gzhan gces sems mchog 'byong par mdzod/__/'di med chos kyi snying por bor bas na/__/sems mchog nyams pa'i rgyu rnams spangs byas nas/__/rkyen ngan ci byung bzod pa'i go cha bgos/__/dpag bsam shing bzhin gong 'phel 'byung ba gces/__/rtag tu dge ba'i bya ba ci spyod kyang /__/byang chub sems kyi gser 'gyur rtsi yis thebs/__/pha rol phyin pa drug dang ldan pa yis/__/bslab gsum nyams len rgyun du brtson par zhu/__/tshul gnas thos bsam sgom pa'i bya ba 'dis/__/rgyal ba'i bstan pa rin chen gzung bas na/__/nyes pa'i skyon rnams rings su dor ba dang /__/yon tan rgya mtsho'i rdul snyed sdud pa gces/__/kun la dag snang sbyong la gshe skur dang /__/zur za mi snyan tshig rnams brjod pa spangs/__/rang gshis drang po sor mar 'jog pa dang /__/kun dang mthun la 'grogs na bde bar mdzod/__/rang nyid dam pa'i tshul las mi 'da' zhing /__/dran shes bag yod rgyun du brten pa dang /__/don med ngag 'khyal rtsed mos mi g.yengs bar/__/chos spyod bcu la 'bad pa drag po mdzod/__/'bad pas sbyangs pa'i phyi nang rig gnas rnams/__/brjed par mi byed nyan po mchis gyur na/__/dka' tshegs spangs la brtse ba'i blo bskyed nas/__/rang gi yon tan gzhan rgyud 'byor bar gyis/__/zang zing byung na bla ma dkon mchog mchod/__/ha cang dkor la sred pa mi che bar/__/chog shes bskyed nas 'dod pa'i nyes dmigs dran/__/gang la'ang chags 'dzin spang ba shin tu gces/__/zab rgyas grub mtha'i rnam par bzhag pa rnams/__/rang rang lugs bzhin 'gal bar ma sgrub cig/__theg chen dbu sems dgongs pa'i zhe phug ni/__/dbu ma chen por gnas phyir de nyid 'dzin/__/tshe thung 'di la rdo rje theg pa la/__/gtso bor ston na shin tu khe che bas/__/zab mo'i rgyud sde mnyan zhing bsam pa dang /__/man ngag dag la rtag tu 'dris par bya/__/yi dam rnam mang bgyi ba ma lcogs kyang /__/snga 'gyur phyogs la rdo rje sems dpa' dang /__/phyi 'gyur bla med rgyud sde'i yang snying che/__/rngog lugs dgyes rdor nyams len snying por mdzod/__/bstan srung rnam mang yod kyang snying po ni/__/sngags srung ma dang myur mdzad phyag drug par/__/bsnyen sgrub mchod gtor la brtson las bzhi sgrub/__/'di phyi bar do'i 'jigs la bskyab par nges/__/snyigs dus byang chub sgrub la bar chad mang /__/de bzlog rdo rje khro bo'i stobs 'dus pa/__/rdo rje gzhon nu che btsan 'gran zla bral/__/de yi lha sngags rgyun du brtson par zhu/__/tshe ring ba ni mtho ris nor gyi mchog/__long yod gyur na lugs gnyis 'bad med 'grub/__/de phyir rje btsun 'phags ma'i rnal 'byor la/__/rgyun du 'bad na 'chi med 'grub par 'gyur/__/nyams len mthar thug bla ma'i rnal 'byor sgom/__/de yang rtsa gsum 'dus zhal o rgyan rje/__/snying dbus 'od lnga'i klong du 'bral med bzhugs/__/gsol btab thugs yid bsre ba'i nyams len mdzod/__/theg pa'i mthar thug lhun po'i rtse mo 'dra/__/a ti 'od gsal rdzogs pa chen po'i don/__/yid dpyod blo yis ma slad ka dag dang /__/lhun grub dbyer med rang zhal rtag tu skyong /__/ma yengs ma bsgom 'dzin rtsol bral bar bzhag/__rang byung rang bab rang grol khyab brdal cher/__/mi g.yo mi 'pho kun bzang dgongs klong der/__/btsan sa zin na sku gsum mngon du 'gyur/__/de skad gdams pa'i tshig phreng 'di dag mthus/__/khyod nyid don gnyis lhun gyis grub pa dang /__/bstan 'gror sman pa'i mthu nus rtsal rdzogs shing /__/phan bde'i dga' ston mchog tu rgyas gyur cig/__de skad smra ba chos kyi blo gros la/__/skyes sbyangs shes rab dad ldan mang du thos/__/blo gsal des bskul kha khral yi ger bris/__/rnama~X grol bzanga~X po'i dpal la spyod gyur cig/__shu b+haM mastu sarba dza ga taM/__/_!_bla ma'i zhabs la phyag 'tshal lo/__/rten dal 'byor mi lus rin chen thob/__/rje mtshan ldan gyi bla ma mjal du yod/__/sangs rgyas kyi bstan pa yod skabs su/__/rang gzhan kun chos la spyod pa rigs/__1/__dgra 'chi bdag gshed ma rngam 'jigs can/__/dus nam 'ong nges par cha med pas/__/tshe 'dir snang gi zhen pa rbad kyi chod/__/lam phyi ma'i gro zhig sgrub la ran/__2/__las rgyu 'bras go ldog mi 'ong zhing /__/las gang byas de yi 'bras bu smin/__/'bras sdug bsngal 'phel ba'i rgyu ngan pa/__/nyon mongs pa 'dul ba'i chos des spang /__3/__de spangs na srid pa'i rtsa ba chod/__/dge thar pa'i yon tan gong du 'phel/__/rang gzhan gyi 'dun ma 'grub nas gda'/__/tshe 'di la srid pa'i mtsho las brgal/__4/__chos kun gyi rtsa ba dad mos dang /__/nges 'byung dang skyabs 'gro'i gzhi bcas nas/__/chos kun gyi snying po byams snying rje/__/tshad med kyi chos bzhi 'bad 'tshal lo/__5/__yid bzhin gyi nor bu brgya stong gis/__/phyogs tsam yang mi mtshon byang chub sems/__/bdag gzhan mnyam brjes kyi nyams len la/__/dus rtag tu blo sbyang bya ba gces/__/'khor 'das kyi chos kun sgyu ma dang /__/rmi lam ltar mthong nas rtag chad kyi/__/mtha' kun las rnam grol dbu ma yi/__/lta ba mchog zab gsal gnyis med la/__/dus rtag par mtshan 'dzin bral bar bskyangs/__/da sgom pas 'khrul snang rang sar grol/__/bdag 'dzin gyi 'gong po drung nas bcom/__/ye shes kyi nyi ma khongs nas 'char/__/de lta bu'i gzung 'dzin gnyis stong gi__/lta ba de rgyud la skye ba'i thabs/__/lam zab mo bla ma'i rnal 'byor la/__/bu khyod kyis chu bo'i rgyun ltar brtson/__/dus kun du snang grags rtogs tshogs kun/__/rje bla ma'i gsang ba gsum du 'char/__/dran pa dang shes bzhin bsten par 'tshal/__/dge tshogs kun mkha' khyab pha mar bsngo/__/de ltar gdams pa'i tshigs bcad 'di/__/dad ldan pad+ma rgyal mtshan gyi/__/bskul ba don yod bya ba'i phyir/__/'jam dbyangs chos kyi blo gros pas/__/rang gzhan kun la phan phyir gdams/__/sarba mang+ga laM//___//