JKW-KABUM-12-NA-001-013

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 12, sde tshan 1, Text 13, Pages (Folios 60a4 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 12: 119-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

1 Texts in this Section (sde tshan or chos tshan)

13 119-123	འཕགས་མ་སོ་སོར་འབྲང་མའི་རྗེས་གནང་གི་ཆོ་ག་བདུད་རྩིའི་རྒྱུན་བཟང་། 'phags ma so sor 'brang ma'i rjes gnang gi cho ga bdud rtsi'i rgyun bzang Permission to Invoke (anujñā) - rjes gnang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་མ་སོ་སོར་འབྲང་མའི་རྗེས་གནང་གི་ཆོ་ག་བདུད་རྩིའི་རྒྱུན་བཟང་། ༄༅། །འཕགས་མ་སོ་སོར་འབྲང་མའི་རྗེས་གནང་གི་ཆོ་ག་བདུད་རྩིའི་རྒྱུན་བཟང་ཞེས་བྱ་བ་བཞུགས་སོ། །ཨོཾ་སྭ་སྟི། དགེ་ལེགས་ཕན་བདེའི་མཆོག་སྦྱིན་པ། །བླ་མ་སོ་སོར་འབྲང་མ་ལ། །བཏུད་ནས་དེ་ཡི་རྗེས་གནང་ཚུལ། །བདུད་རྩིའི་རྒྱུན་བཟང་དབབ་པར་བྱ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྟེགས་བུའི་དབུས་སུ་མཉྫིའི་ཁར་མཎྜ་ལར་དྲི་བཟང་གི་ཐིག་ལེ་དང་བཅས་མེ་ཏོག་གི་ཚོམ་བུ་གཅིག་བཀོད་པའི་མདུན་དུ་འབུལ་གཏོར་དང་ཆུ་གཉིས་སྔོན་འགྲོའི་ཉེར་སྤྱོད་བཤམ། ཉེ་ལོགས་སུ་སློབ་མ་ལ་དགོས་པའི་མཎྜལ་མེ་ཏོག་སོགས་དང་། སློབ་དཔོན་གྱི་མདུན་དུ་རྡོར་དྲིལ་འབྲུའི་སྣོད་སོགས་འདུ་བྱའོ། །གཉིས་པ་ལ་གསུམ། བདག་གི་རྣལ་འབྱོར། །མདུན་བསྐྱེད་བསྒྲུབ་པ། སློབ་མ་རྗེས་སུ་གཟུང་བའོ། །དང་པོ་ནི། མཆོད་པ་རྣམས་བསང་སྦྱངས་བྱིན་རླབས་དྷརྨཱ་ར་ཎི་ཏའི་སྔགས་ཀྱིས་བྱིན་དབབ་པ་བཅས་སྤྱི་ལྟར་དང་། བདག་དང་འགྲོ་བ་སོགས་སྐྱབས་འགྲོ་ནས་བཟུང་བཟླས་པའི་བར་རྗེ་དཀོན་མཆོག་ལྷུན་གྲུབ་ཀྱིས་མཛད་པའི་སྒྲུབ་ཐབས་བཞིན་བྱ། བཟླས་པའི་མཐར། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་གསོལ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་པར་བསམ་མོ། །གཉིས་པ་ནི། ཚོམ་བུ་བསང་སྦྱངས། སྟོང་པའི་ངང་ལས་པྃ་ལས་ནས། རྣམ་པར་སྣང་མཛད་ཀྱིས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ་བདག་ཉིད་ཅེས་དོར། བདག་ལ་ཞེས་པར་འདི་ལ་ཞེས་པ་སྒྱུར། མཆོད་པ་བསང་སྦྱངས་བྱིན་བརླབ། ཨོཾ་མ་ཧཱ་པྲ་ཏི་ས་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས། ཤཔྡའི་བར་སྦྱར་བས་མཆོད། གང་གིས་འཕགས་མ་ཁྱོད་བསྙེན་པས། །འཇིགས་དང་སྡུག་བསྔལ་ཀུན་སེལ་ཞིང་། །དངོས་གྲུབ་འདོད་རྒུའི་མཆོག་སྩོལ་བའི། །སོ་སོར་འབྲང་མར་ཕྱག་འཚལ་ལོ། །ཞེས་བསྟོད། གཏོར་མ་བསང་སྦྱངས། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབ། ནམ་མཁའ་མཛོད་ཀྱི་ཕྱག་རྒྱ་དང་། མཚན་སྔགས་ཀྱི་མཐར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་དབུལ། མཆོད་བསྟོད་འདོད་དོན་གསོལ། མདུན་བསྐྱེད་ཀྱི་ཐུགས་རྒྱུད་བསྐུལ་བར་དམིགས་ཏེ་བཟླས་པ་ཅུང་ཟད་བྱའོ། །གསུམ་པ་ནི། སློབ་མ་རྣམས་ཕྱི་རོལ་ཏུ་ཁྲུས་བྱ། ནང་དུ་འོངས་ནས་ཕྱག་དང་འཇུག་པའི་ཡོན་ཕུལ་ཏེ་གུས་པའི་ཚུལ་གྱིས་འཁོད་པ་ལ་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་གདབ་སོགས་ཆོས་བཤད་ཇི་ལྟར་རིགས་པ་སྔོན་དུ་འགྲོ་བས། དེ་ལ་འདིར་གང་གསན་པར་བྱ་བའི་ཆོས་ནི། རྒྱུད་སྡེ་རིན་པོ་ཆེ་རྣམས་ནས་ཐུན་མོང་དང་མཆོག་གི་དངོས་གྲུབ་སྒྲུབ་པའི་ལྷག་པའི་ལྷའི་རྣལ་འབྱོར་བསམ་གྱིས་མི་ཁྱབ་པ་ཞིག་གསུངས་པ་ལ། འདིར་རྣལ་འབྱོར་བླ་མེད་ཐབས་དང་ཤེས་རབ་ཟུང་དུ་འཇུག་པའི་རྒྱུད་ཀྱི་རྒྱལ་པོ་ཆེན་པོ་དཔལ་ཀྱེ་རྡོ་རྗེའི་ཐུན་མོངས་མ་ཡིན་པའི་བཤད་རྒྱུད་འཕགས་པ་མཁའ་འགྲོ་མ་རྡོ་རྗེ་གུར་གྱི་ལེའུ་བཅོ་ལྔ་པ་ལས། པྲྃ་གི་ཡི་གེ་ལས་སྐྱེས་པ། །ལུས་ནི་དཀར་ཞིང་ཡིད་འོང་མ། །ལྷ་མོ་རལ་གྲི་འཁོར་ལོ་འཛིན། །སྤྱི་བོར་ཕན་པས་མནན་པའོ། །རང་གི་མང་པོའི་དུས་ལྟ་བུར། །དཀྱིལ་འཁོར་དབུས་སུ་ཡང་དག་གནས། །ནམ་མཁའི་གནས་ནས་འཇམ་པའི་དབྱངས། །འབྱུང་བ་རྣམ་པར་བསམ་པར་བྱ། །ཞེས་སོགས་ལྷ་སྔགས་ཕན་ཡོན་དང་བཅས་པ་ཇི་སྐད་གསུངས་པ་བཞིན་ནད་ཞི་བ་དང་། ཚེ་རྒྱས་པ་དང་། སྲིད་སྤེལ་བའི་ལས་ཀྱི་ལྷ་ཁྱད་པར་ཅན་འཕགས་མ་སོ་སོར་འབྲང་མ་དཀར་མོའི་མན་ངག་གྲུབ་ཆེན་བིཪྺ་པ་དང་། རྗེ་བཙུན་ས་སྐྱ་པ་ཡབ་སྲས་སོགས་ལས་བརྒྱུད་པ་བར་མ་ཆད་པར་བྱོན་པའི་རྗེས་སུ་གནང་བ་བསྒྲུབ་པ་ལ་སློབ་དཔོན་གྱི་བྱ་བ་གྲུབ་ནས་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། ཐོག་མར་སློབ་དཔོན་དང་ལྷག་པའི་ལྷ་ཐ་མི་དད་པའི་མོས་གུས་དང་ལྡན་པའི་སྒོ་ནས་རྗེས་གནང་ཟབ་མོ་ཞུ་བའི་ཡོན་དུ་མཎྜལ་ཞིག་འབུལ་བར་ཞུ། ཞེས་མཚམས་སྦྱར་ནས། མཎྜལ་གསོལ་གདབ་ནས་བརྩམས་དགེ་བ་བསྔོ་བའི་བར་སྒྲུབ་ཐབས་བརྒྱ་རྩ་ལྟར་བྱའོ། །གསུམ་པ་རྗེས་ནི། མཆོད་པ་ཞལ་གསོས་ལ་བསང་སྦྱང༷ས་བྱིན་བརླབ། མཆོད་བསྟོད་གསོལ་གདབ། ནོངས་པ་ཤགས། ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། གནས་གསུམ་བསྲུང་། དགེ་བ་བསྔོ་བ་དང་བཀྲ་ཤིས་རྣམས་སྤྱི་ལྟར་བྱའོ། །འཕགས་མ་སོ་སོར་འབྲང་མ་ཡི། །བྱིན་རླབས་བདུད་རྩིའི་རྒྱུན་བཟང་པོས། །འགྲོ་ཀུན་སྡེ་བཞིའི་ཕུན་ཚོགས་ཀྱི། །བཅུད་ལེན་མཆོག་ཏུ་གྲུབ་གྱུར་ཅིག །ཅེས་ཐར་རྩེ་མ་ཧཱ་པཎྜིཏ་ནམ་མཁའ་དཔལ་བཟང་པོས་མཛད་པར་གྲགས་པའི་ཐོ་ཡིག་ལས་ཅུང་ཟད་གསལ་བར་ཕྱེ་བ་འདིའང་འཇམ་དབྱངས་མཁྱེན་བརྩེའི་དབང་པོས་བྲིས་པ་སུ་ཤྲེ་ཡནྟུ།། །། ༈

[edit]

'phags ma so sor 'brang ma'i rjes gnang gi cho ga bdud rtsi'i rgyun bzang / @#/_/'phags ma so sor 'brang ma'i rjes gnang gi cho ga bdud rtsi'i rgyun bzang zhes bya ba bzhugs so/__/oM swa sti/__dge legs phan bde'i mchog sbyin pa/__/bla ma so sor 'brang ma la/__/btud nas de yi rjes gnang tshul/__/bdud rtsi'i rgyun bzang dbab par bya/__/'di la gsum/__sbyor ba/__dngos gzhi/__rjes so/__/dang po ni/__stegs bu'i dbus su many+dzi'i khar maN+Da lar dri bzang gi thig le dang bcas me tog gi tshom bu gcig bkod pa'i mdun du 'bul gtor dang chu gnyis sngon 'gro'i nyer spyod bsham/__nye logs su slob ma la dgos pa'i maN+Dal me tog sogs dang /__slob dpon gyi mdun du rdor dril 'bru'i snod sogs 'du bya'o/__/gnyis pa la gsum/__bdag gi rnal 'byor/__/mdun bskyed bsgrub pa/__slob ma rjes su gzung ba'o/__/dang po ni/__mchod pa rnams bsang sbyangs byin rlabs d+harmA ra Ni ta'i sngags kyis byin dbab pa bcas spyi ltar dang /__bdag dang 'gro ba sogs skyabs 'gro nas bzung bzlas pa'i bar rje dkon mchog lhun grub kyis mdzad pa'i sgrub thabs bzhin bya/__bzlas pa'i mthar/__bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__zhes 'dod don gsol/__rang gi snying ga nas 'od zer 'phros pas gdan 'od zer gyi rnam par gyur te rang la thim par bsam mo/__/gnyis pa ni/__tshom bu bsang sbyangs/__stong pa'i ngang las pa~M las nas/__rnam par snang mdzad kyis dbur brgyan zhes pa'i bar bdag bskyed ltar la bdag nyid ces dor/__bdag la zhes par 'di la zhes pa sgyur/__mchod pa bsang sbyangs byin brlab/__oM ma hA pra ti sa re sa pa ri wA ra ar+g+haM pra tIts+tsha swA hA nas/__shap+da'i bar sbyar bas mchod/__gang gis 'phags ma khyod bsnyen pas/__/'jigs dang sdug bsngal kun sel zhing /__/dngos grub 'dod rgu'i mchog stsol ba'i/__/so sor 'brang mar phyag 'tshal lo/__/zhes bstod/__gtor ma bsang sbyangs/__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa ye shes kyi bdud rtsi'i rgya mtsho chen por gyur/__oM AHhU~M lan gsum gyis byin gyis brlab/__nam mkha' mdzod kyi phyag rgya dang /__mtshan sngags kyi mthar oM a kA ro sogs btags pa lan gsum gyis dbul/__mchod bstod 'dod don gsol/__mdun bskyed kyi thugs rgyud bskul bar dmigs te bzlas pa cung zad bya'o/__/gsum pa ni/__slob ma rnams phyi rol tu khrus bya/__nang du 'ongs nas phyag dang 'jug pa'i yon phul te gus pa'i tshul gyis 'khod pa la me tog bkye bsdu grub rjes/__slob dpon gyis sems bskyed gsal gdab sogs chos bshad ji ltar rigs pa sngon du 'gro bas/__de la 'dir gang gsan par bya ba'i chos ni/__rgyud sde rin po che rnams nas thun mong dang mchog gi dngos grub sgrub pa'i lhag pa'i lha'i rnal 'byor bsam gyis mi khyab pa zhig gsungs pa la/__'dir rnal 'byor bla med thabs dang shes rab zung du 'jug pa'i rgyud kyi rgyal po chen po dpal kye rdo rje'i thun mongs ma yin pa'i bshad rgyud 'phags pa mkha' 'gro ma rdo rje gur gyi le'u bco lnga pa las/__pra~M gi yi ge las skyes pa/__/lus ni dkar zhing yid 'ong ma/__/lha mo ral gri 'khor lo 'dzin/__/spyi bor phan pas mnan pa'o/__/rang gi mang po'i dus lta bur/__/dkyil 'khor dbus su yang dag gnas/__/nam mkha'i gnas nas 'jam pa'i dbyangs/__/'byung ba rnam par bsam par bya/__/zhes sogs lha sngags phan yon dang bcas pa ji skad gsungs pa bzhin nad zhi ba dang /__tshe rgyas pa dang /__srid spel ba'i las kyi lha khyad par can 'phags ma so sor 'brang ma dkar mo'i man ngag grub chen biR+Wa pa dang /__rje btsun sa skya pa yab sras sogs las brgyud pa bar ma chad par byon pa'i rjes su gnang ba bsgrub pa la slob dpon gyi bya ba grub nas khyed rang rnams kyi ngo skal du gyur pa la/__thog mar slob dpon dang lhag pa'i lha tha mi dad pa'i mos gus dang ldan pa'i sgo nas rjes gnang zab mo zhu ba'i yon du maN+Dal zhig 'bul bar zhu/__zhes mtshams sbyar nas/__maN+Dal gsol gdab nas brtsams dge ba bsngo ba'i bar sgrub thabs brgya rtsa ltar bya'o/__/gsum pa rjes ni/__mchod pa zhal gsos la bsang sbyangaXs byin brlab/__mchod bstod gsol gdab/__nongs pa shags/__tshom bu'i ye shes pa gshegs/__dam tshig pa rang la bstim/__gnas gsum bsrung /__dge ba bsngo ba dang bkra shis rnams spyi ltar bya'o/__/'phags ma so sor 'brang ma yi/__/byin rlabs bdud rtsi'i rgyun bzang pos/__/'gro kun sde bzhi'i phun tshogs kyi/__/bcud len mchog tu grub gyur cig__/ces thar rtse ma hA paN+Dita nam mkha' dpal bzang pos mdzad par grags pa'i tho yig las cung zad gsal bar phye ba 'di'ang 'jam dbyangs mkhyen brtse'i dbang pos bris pa su shre yan+tu//___//__!_