JKW-KABUM-03-GA-001-015

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title
Location	mkhyen brtse'i bka' 'bum Volume 3, sde tshan 15, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 3: 281-. Khams sde dge rdzong sar dgon: Rdzong sar blo gros phun tshogs, 2020.
Genre	Collected Works - Selected - bka' 'bum

Tibetan Text

Wylie

[edit]

དཔྱལ་ལུགས་ཕག་མོའི་ལོ་རྒྱུས་ལས། དཔྱལ་ལུགས་ཕག་མོའི་ལོ་རྒྱུས་ལས། ནུབ་ཕྱོགས་ཨོ་རྒྱན་གྱི་ཡུལ་དུ་རྒྱལ་པོ་ཨིནྡྲ་བྷཱུ་ཏིའི་བུ་མོ་ལྷ་ལྕམ་ལཀྵྨཱི་ཀ་ར་ཞེས་བྱ་བ་ཞིག་གིས་ལོ་བཅུ་གཉིས་ལོན་པའི་ཚེ་ཕྱི་ནང་གི་རྟེན་ཡོད་པའི་ལྷ་ཁང་ཀུན་ཏུ་མཆོད་པ་ཆེན་པོ་བྱས་ཤིང་། ཡི་དམ་གྱི་ལྷ་བཙལ་བས་ཀེང་རུས་མེ་འབར་བའི་དུར་ཁྲོད་ན་ལྷ་ཁང་གཅིག་ཡོད་པ་དེར་ཕྱིན་པས། རྡོ་རྗེ་རྣལ་འབྱོར་མའི་རྟེན་གཙོ་བཞུགས་པ་མཐོང་སྟེ་མོས་པ་སྐྱེས་ཤིང་དགའ་ཆེས་ནས་འདི་ལ་ངའི་ཡི་དམ་བྱ་ཞེས་སྨྲས་སོ། །དེ་ནས་ལྷ་དེའི་ཆོས་ལུགས་ཤེས་པ་སུ་ཡོད་ཅེས་ཡུལ་ཀུན་ཏུ་དྲིས་ཀྱང་ཤེས་པ་མ་བྱུང་ནས། རང་ཉིད་ཀྱིས་མཆོད་པ་ཕུལ་ཞིང་གསོལ་བ་བཏབ་པས་རེ་ཞིག་གི་ཚེ་རྡོ་རྗེ་རྣལ་འབྱོར་མས་དངོས་སུ་བྱིན་གྱིས་བརླབས་ཤིང་དབང་དང་གདམས་ངག་ཐམས་ཅད་གནང་། མཁའ་འགྲོ་མ་དྲྭ་བ་སྡོམ་བ་རྒྱ་མཚོའི་རྒྱུད་བཤད། གྲུབ་པའི་སྤྱོད་པ་རྨད་དུ་བྱུང་བའང་བསྟན། དབུ་བཅད་མའི་སྒྲུབ་ཐབས་ཆུང་བ་མཛད། དེས་བྲམ་ཟེ་བིཪྺ་པ་རྗེས་སུ་བཟུང་ཞིང་གྲུབ་པ་ཐོབ། རང་གི་སློབ་མ་ཤར་ཕྱོགས་ཨ་ཝ་དྷཱུ་ཏི་པའི་དོན་དུ་དབུ་བཅད་མའི་སྒྲུབ་ཐབས་ཆེ་བ་མཛད། བྷཾ་ག་ལར་བསྒྲུབས་པས་དངོས་གྲུབ་བརྙེས་ཏེ་མཚན་བསོད་སྙོམས་པ་ཆེ་བར་གྲགས་ཏེ་དོན་གྲུབ་མ་སྒྲུབ་ཐབས་ཆུང་བ་མཛད། དེའི་སློབ་མ་མ་ག་དྷ་བ་ཏིང་འཛིན་རྡོ་རྗེས་ཞལ་གཉིས་མའི་སྒྲུབ་ཐབས་ཆུང་ངུ་ཞིག་མཛད། ལྷོ་ཕྱོགས་བཻ་ཏཱའི་ཡུལ་གྱི་རྒྱལ་པོ་ཏིང་འཛིན་བཟང་པོ་རྗེས་སུ་བཟུང་སྟེ། དེའི་དོན་དུ་ཞལ་གཉིས་མའི་སྒྲུབ་ཐབས་ཆུང་ངུ་ཞིག་མཛད་དེ་གནང་། དེ་ནས་རྒྱལ་པོས་དཔལ་གྱི་རིར་སོང་བས་མཆོག་དང་ཐུན་མོང་གི་དངོས་གྲུབ་བརྙེས། ས་དྲུག་པའི་རྟོགས་པ་མངོན་དུ་གྱུར། དེས་བལ་བོ་མ་ཧཱ་བྷ་རོ་དང་། སློབ་དཔོན་ཧ་དུ་དཀར་པོ། དེ་བ་ཨཱ་ཀ་ར་ཙནྡྲ་གསུམ་རྗེས་སུ་བཟུང་། ཏིང་འཛིན་བཟང་པོའི་ཉེ་གནས་ཁྱབ་ཆེན་སངས་རྒྱས་བྱིན་གྱིས་སྦྱིན་སྲེག་གི་ཡི་གེ་མཛད། པཎྜི་ཏ་དེ་ཝ་ཨཱ་ཀ་ར་ཙནྡྲས་ཀྱང་གྲུབ་པ་ཅུང་ཟད་བརྙེས་ཏེ། ཞལ་གཉིས་མ་དང་། དོན་གྲུབ་མའི་སྒྲུབ་ཐབས་ཆེ་བ་མཛད། བལ་པོ་ག་དུས་ཀྱང་རྣམ་ཤེས་དང་ཡེ་ཤེས་ཆ་མཉམ་པའི་ལས་གྲུབ་ཅིང་། གསང་མཚན་བྷ་ལེནྡྲ་རུ་ཙི་ཞེས་གྲགས། དེ་ལ་བླ་མ་སྨན་ལུང་བ་དཔྱ ལ་ཀུན་དགའ་རྡོ་རྗེ་བལ་པོར་ལན་གསུམ་བྱོན། ལུས་སྲོག་ལོངས་སྤྱོད་ཀྱི་དཀའ་བ་དཔག་ཏུ་མེད་པས་བླ་མ་མཉེས་པར་བྱས་ཏེ་ཞུས། དེ་ནས་རིམ་པར་བརྒྱུད་ཅིང་ཤིན་ཏུ་ཟབ་པར་མཛད། ཚད་མའི་སྐྱེས་བུ་བུ་སྟོན་རིན་པོ་ཆེས་ཀྱང་དར་རྒྱས་སུ་སྲོལ་བཏོད། འདི་ལ་བདེ་མཆོག་གི་དབང་སྔོན་དུ་སོང་ནས་བྱིན་རླབས་བྱེད། དེ་ཡང་རིམ་དང་གཅིག་ཅར་བ་གང་ཡང་རུང་། དེ་ནས་རྫོགས་རིམ་སྒོམ་པ་དྲུག །དབྱིབས་ལ་བསླབ་པ། རླུང་ལ་བསླབ་པ། ཡིག་འབྲུ་ལ་བསླབ་པ། འོད་ལུས་ལ་བསླབ་པ། འོད་གསལ་ལ་བསླབ་པ། ཟུང་འཇུག་ལ་བསླབ་པ་སྟེ་དྲུག་བསྟན་ནས་འབྲས་བུ་ཕྱག་རྒྱ་ཆེན་པོའི་གོ་འཕང་ལ་སྦྱོར་བའི་ཚུལ་ཤིན་ཏུ་ཟབ་པ་ཡོད། དེའང་སྤྱིར་ཧེ་རུ་ཀའི་རིགས་བདེ་མཆོག་ལ་ཡབ་བཀའ། ཡུམ་བཀའ་གཉིས། ཕྱི་མ་ལ་དཀྱིལ་འཁོར་ཡོངས་རྫོགས། དཔའ་བོ་གཅིག་མ་གཉིས། དང་པོ་ནི། སྡོམ་འབྱུང་གི་རྒྱུད་དང་། ཕྲེང་བ་སོགས་ནས་བསྟན། ཕྱི་མ་ནི། སློབ་དཔོན་ཀངྐ་བྱིན་གྱི་ཕག་མོ་དཀར་མོ། ཤ་བ་རིའི་སེར་མོ། དམར་མོ་ལ་རྒྱ་གར་པའི་སྒྲུབ་ཐབས་ཤིན་ཏུ་མང་བ་ལས་འདིར་དམར་མོ། དེའང་ཨིནྡྲ་བྷཱུ་ཏིས་བསྐྱེད་རིམ་གཙོ་བོར་སྟོན་པ་ཕག་མོ་ཞལ་གཅིག་མ། ལྕམ་དཔལ་མོས་རྫོགས་རིམ་གཙོ་བོར་སྟོན་པ་དབུ་བཅད་མ། བིཪྺ་པ་ཆུང་བས་ལས་ཚོགས་གཙོ་བོར་སྟོན་པ་དོན་གྲུབ་མའི་གཞུང་གསུམ་དང་། སྟོང་ཉིད་ཏིང་འཛིན་རྡོ་རྗེས་སྒྲུབ་ཐབས་ཀྱི་གཞུང་གསུམ་བྱས་པ་དང་དྲུག་གི་ཕྱག་ལེན་བལ་པོ་ཧང་དུའི་ལུགས་བླ་མ་དཔྱལ་བ་རྣམས་ལས་བརྒྱུད། གུང་རུའི་ཐོ་ཡིག་ན། ཞལ་གཉིས་མའི་བདག་བསྐྱེད། བུམ་པ་གསུམ་དུ་ལྷ་སོ་སོའི་བསྐྱེད་བཟླས། མདུན་དུ་ཚོམ་བུ་གསུམ། དེ་སྟེང་གི་བདུད་རྩི་གསུམ་བྱིན་རླབས་སོ་སོ། དེ་སྟེང་སིན་དཀྱིལ་ལྷ་སོ་སོར་བསྐྱེད། མཆོད་བསྟོད་ཐུན་མོང་བྱ། བྱིན་རླབས་ཚེ་ཡེ་ཤེས་དབབ་པར་ཞལ་གཉིས་མར་བསྐྱེད་པས་ཆོག །ལྷ་ངོ་བསྟན་པ་ཡན་ཐུན་མོང་དུ་བྱ། དེ་ནས་བྱིན་རླབས་སོ་སོར་བྱེད་པ་ལ། ཐོག་མར་ཞལ་གཉིས་མའི་བྱིན་རླབས་ཞུ་བའི་ཡོན་དུ་མཎྜལ་ནས། གསོལ་འདེབས། སློབ་མ་སིནྡྷུ་རའི་དཀྱིལ་འཁོར་དབུས་སུ་ཞལ་གཉིས་མར་བསྐྱེད། གོ་ཆ་བཀོད། ཡེ་ཤེས་པ་སྤྱན་དྲངས་བསྟིམ། དབང་ལྷ་སྤྱན་དྲངས། དབང་བཞི་སོ་སོར་བསྐུར། གཙོ་བོའི་ཇི་ལྟ་བར་བྱ། དེ་ནས་སླར་དབུ་བཅད་མའི་བྱིན་རླབས་ཀྱི་དོན་དུ་མཎྜལ་སོགས་དང་། དོན་གྲུབ་མ་ལའང་དེ་བཞིན་བྱ། དེ་ནས་གཙོ་བོའི་མཐའ་རྟེན་དྲུག་ཐུན་མོང་དུ་སྦྱིན། དུང་སོགས་ཀྱང་བཤད། དེ་ནས་ཡང་གཙོ་བོས་ཇི་ལྟར། མཎྜལ་སོགས་བྱའོ་ཞེས་སྣང་།། །། ༈

[edit]

dpyal lugs phag mo'i lo rgyus las/ dpyal lugs phag mo'i lo rgyus las/__nub phyogs o rgyan gyi yul du rgyal po in+d+ra b+hU ti'i bu mo lha lcam lak+Sh+mI ka ra zhes bya ba zhig gis lo bcu gnyis lon pa'i tshe phyi nang gi rten yod pa'i lha khang kun tu mchod pa chen po byas shing /__yi dam gyi lha btsal bas keng rus me 'bar ba'i dur khrod na lha khang gcig yod pa der phyin pas/__rdo rje rnal 'byor ma'i rten gtso bzhugs pa mthong ste mos pa skyes shing dga' ches nas 'di la nga'i yi dam bya zhes smras so/__/de nas lha de'i chos lugs shes pa su yod ces yul kun tu dris kyang shes pa ma byung nas/__rang nyid kyis mchod pa phul zhing gsol ba btab pas re zhig gi tshe rdo rje rnal 'byor mas dngos su byin gyis brlabs shing dbang dang gdams ngag thams cad gnang /__mkha' 'gro ma drwa ba sdom ba rgya mtsho'i rgyud bshad/__grub pa'i spyod pa rmad du byung ba'ang bstan/__dbu bcad ma'i sgrub thabs chung ba mdzad/__des bram ze biR+Wa pa rjes su bzung zhing grub pa thob/__rang gi slob ma shar phyogs a wa d+hU ti pa'i don du dbu bcad ma'i sgrub thabs che ba mdzad/__b+haM ga lar bsgrubs pas dngos grub brnyes te mtshan bsod snyoms pa che bar grags te don grub ma sgrub thabs chung ba mdzad/__de'i slob ma ma ga d+ha ba ting 'dzin rdo rjes zhal gnyis ma'i sgrub thabs chung ngu zhig mdzad/__lho phyogs bai tA'i yul gyi rgyal po ting 'dzin bzang po rjes su bzung ste/__de'i don du zhal gnyis ma'i sgrub thabs chung ngu zhig mdzad de gnang /__de nas rgyal pos dpal gyi rir song bas mchog dang thun mong gi dngos grub brnyes/__sa drug pa'i rtogs pa mngon du gyur/__des bal bo ma hA b+ha ro dang /__slob dpon ha du dkar po/__de ba A ka ra tsan+d+ra gsum rjes su bzung /__ting 'dzin bzang po'i nye gnas khyab chen sangs rgyas byin gyis sbyin sreg gi yi ge mdzad/__paN+Di ta de wa A ka ra tsan+d+ras kyang grub pa cung zad brnyes te/__zhal gnyis ma dang /__don grub ma'i sgrub thabs che ba mdzad/__bal po ga dus kyang rnam shes dang ye shes cha mnyam pa'i las grub cing /__gsang mtshan b+ha len+d+ra ru tsi zhes grags/__de la bla ma sman lung ba dpya_la kun dga' rdo rje bal por lan gsum byon/__lus srog longs spyod kyi dka' ba dpag tu med pas bla ma mnyes par byas te zhus/__de nas rim par brgyud cing shin tu zab par mdzad/__tshad ma'i skyes bu bu ston rin po ches kyang dar rgyas su srol btod/__'di la bde mchog gi dbang sngon du song nas byin rlabs byed/__de yang rim dang gcig car ba gang yang rung /__de nas rdzogs rim sgom pa drug__/dbyibs la bslab pa/__rlung la bslab pa/__yig 'bru la bslab pa/__'od lus la bslab pa/__'od gsal la bslab pa/__zung 'jug la bslab pa ste drug bstan nas 'bras bu phyag rgya chen po'i go 'phang la sbyor ba'i tshul shin tu zab pa yod/__de'ang spyir he ru ka'i rigs bde mchog la yab bka'/__yum bka' gnyis/__phyi ma la dkyil 'khor yongs rdzogs/__dpa' bo gcig ma gnyis/__dang po ni/__sdom 'byung gi rgyud dang /__phreng ba sogs nas bstan/__phyi ma ni/__slob dpon kang+ka byin gyi phag mo dkar mo/__sha ba ri'i ser mo/__dmar mo la rgya gar pa'i sgrub thabs shin tu mang ba las 'dir dmar mo/__de'ang in+d+ra b+hU tis bskyed rim gtso bor ston pa phag mo zhal gcig ma/__lcam dpal mos rdzogs rim gtso bor ston pa dbu bcad ma/__biR+Wa pa chung bas las tshogs gtso bor ston pa don grub ma'i gzhung gsum dang /__stong nyid ting 'dzin rdo rjes sgrub thabs kyi gzhung gsum byas pa dang drug gi phyag len bal po hang du'i lugs bla ma dpyal ba rnams las brgyud/__gung ru'i tho yig na/__zhal gnyis ma'i bdag bskyed/__bum pa gsum du lha so so'i bskyed bzlas/__mdun du tshom bu gsum/__de steng gi bdud rtsi gsum byin rlabs so so/__de steng sin dkyil lha so sor bskyed/__mchod bstod thun mong bya/__byin rlabs tshe ye shes dbab par zhal gnyis mar bskyed pas chog__/lha ngo bstan pa yan thun mong du bya/__de nas byin rlabs so sor byed pa la/__thog mar zhal gnyis ma'i byin rlabs zhu ba'i yon du maN+Dal nas/__gsol 'debs/__slob ma sin+d+hu ra'i dkyil 'khor dbus su zhal gnyis mar bskyed/__go cha bkod/__ye shes pa spyan drangs bstim/__dbang lha spyan drangs/__dbang bzhi so sor bskur/__gtso bo'i ji lta bar bya/__de nas slar dbu bcad ma'i byin rlabs kyi don du maN+Dal sogs dang /__don grub ma la'ang de bzhin bya/__de nas gtso bo'i mtha' rten drug thun mong du sbyin/__dung sogs kyang bshad/__de nas yang gtso bos ji ltar/__maN+Dal sogs bya'o zhes snang //___//_!