JKW-KABUM-03-GA-001-003

🚧 This website is under continued development. We appreciate your patience!

Previous Text Back to Volume PageNext Text

དགེ་ཚུལ་གྱི་བསླབ་བྱ་ནི་རགས་སྡོམ་བཅུ།

Wylie title	dge tshul gyi bslab bya ni rags sdom bcu
Location	mkhyen brtse'i bka' 'bum Volume 3, sde tshan 1, Text 3, Pages 19-22 (Folios 10a4 to 11b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dge tshul gyi bslab bya ni rags sdom bcu. In 'jam dbyangs mkhyen brtse'i dbang po'i bka' 'bum, Vol. 3: 19-22. Khams sde dge rdzong sar dgon: Rdzong sar blo gros phun tshogs, 2020.
Genre	Vows - sdom pa

1 Texts in this Section (sde tshan or chos tshan)

3 19-22	དགེ་ཚུལ་གྱི་བསླབ་བྱ་ནི་རགས་སྡོམ་བཅུ། dge tshul gyi bslab bya ni rags sdom bcu Vows - sdom pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཐམས་ཅད་མཁྱེན་པ་ལ་ཕྱག་འཚལ་ལོ། །དགེ་ཚུལ་གྱི་བསླབ་བྱ་ནི་རགས་སྡོམ་བཅུ་སྟེ། ཇི་སྐད་དུ། གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་རྫུན་བཅོས་མའི་ཆང་ལ་སོགས། །གར་སོགས་ཕྲེང་སོགས་མལ་ཆེན་མཐོ་བ་དང་། །ཕྱི་དྲོའི་ཁ་ཟས་གསེར་དངུལ་ལེན་པ་སྤང་། །ཞེས་པ་ལྟར་རོ། །དེ་ལ་དང་པོ་སྲོག་གཅོད་པ་ནི། གཞི་བསམ་པ་སྦྱོར་བ་མཐར་ཐུག་པའི་ཡན་ལག་བཞི་ཚང་ན་ཕམ་པ་སྟེ། དེ་ལ་གཞི་ནི། མིའམ་མིར་ཆགས་པ། བསམ་པ་མ་འཁྲུལ་ཞིང་གསོད་འདོད་པ། སྦྱོར་བ་དུག །མཚོན། མཐུ། གཡོ་སྒྱུས་འཆི་བར་གཏོང་བ། གཞན་གྱིས་གསོད་པར་ཞུ་བ་གནང་བ། གནོད་སེམས་ཀྱིས་གསོད་འོས་སུ་སྟོན་པ་སོགས་རང་ངམ་བསྒོས་པའི་མིས་མི་འགྱོད་པར་བསད་པའོ། །མཐར་ཐུག་རྐྱེན་དེ་རྣམས་ཀྱིས་ཤི་ནའོ། །གཉིས་པ་མ་བྱིན་ལེན་ལ། གཞིའི་ཡན་ལག །ཐབས་སྣ་ཚོགས་ཀྱིས་རང་ངམ་གཞན་ལ་བརྐུར་འཇུག་པར་བརྩམས་པ། མིའི་ཡིན་པ། རང་ལ་ནོར་ཐ་དད་པའི་རྫས། རིན་ཐང་ཚང་བ་སྟེ། བོད་དུ་དངུལ་སྐྱ་ཞོ་གང་གི་བརྒྱད་ཆ་བརྐུས་ན་རིན་ཐང་ཚང་ངོ་། །བསམ་པའི་ཡན་ལག །གཞན་གྱི་ནོར་ཡིན་པར་ཤེས་པ། རང་གི་ཆེད་དུ་ཐོབ་འདོད་རྒྱུན་མི་འཆད་པ། སྦྱོར་བའི་ཡན་ལག་ཐབས་སྣ་ཚོགས་ཀྱིས་རང་ངམ་གཞན་བརྐུར་འཇུག་པ་བརྩམས་པ། མཐར་ཐུག་གི་ཡན་ལག་བརྐུས་ནས་ཐོབ་བློ་སྐྱེས་པའོ། །གསུམ་པ་མི་ཚངས་སྤྱོད་ལ། གཞིའི་ཡན་ལག །བུད་མེད་ཀྱི་ཁ། གཤང་ལམ། ཟག་བྱེད་དེ་སྒོ་གསུམ་དུ་ནོར་བུ་ལས་སུ་རུང་བས་བརྩམས་པ། བསམ་པའི་ཡན་ལག་འདུ་ཤེས་འཁྲུལ་མ་འཁྲུལ་འདྲ་ཞིང་། གཉིས་སྦྱོར་བདག་གིར་བྱེད་འདོད་རྒྱུན་མི་འཆད་པ། སྦྱོར་བའི་ཡན་ལག །མི་ཚངས་པར་སྤྱོད་པ་བྱེད་པར་བརྩམས་པ། མཐར་ཐུག་པའི་ཡན་ལག །གཅུགས་ཤིང་ཉམས་སུ་མྱོང་བའོ། །བཞི་པ་རྫུན་ནི། གཞི་སྨྲ་བའི་ཡུལ་མི་ཡིན་པ། སྨྲ་ཤེས་དོན་གོ་བ། ཤེས་པ་རང་བཞིན་དུ་གནས་པ། མ་ནིང་དང་མཚན་གཉིས་པ་མ་ཡིན་པ་ལ། ཟག་མེད་ཀྱི་ཡོན་ཏན་བཟང་པོ་ཡོད་པར་ཤེས་པའི་ཚིག་གོ །བསམ་པ། འདུ་ཤེས་མ་འཁྲུལ་བ། སྦྱོར་བ། རང་གི་མི་ཆོས་བླ་མ་རང་གིས་ཐོབ་པར་སྨྲ་བར་བརྩམས་པ། མཐར་ཐུག་སྨྲས་ཤིང་ཡུལ་དེས་གོ་བའོ། །ལྔ་པ་ཆང་སོགས་ནི། ཕབ་བཏབ་པ་འབྲུའི་ཆང་དང་། མ་བཏབ་པ་བུ་རམ་དང་། རྒུན་ཆང་ལ་སོགས་པ་མྱོས་པར་འགྱུར་པའི་ཆང་ཧུབ་གཅིག་ཡན་མིད་ན་ལྟུང་བར་འགྱུར་རོ། །དྲུག་པ་གར་སོགས་ནི། རྒོད་པའི་བསམ་པས་གླུ་དང་། གར་དང་། རོལ་མོ་སྣ་ཚོགས་དགོས་མེད་དུ་བྱེད་པའོ། །བདུན་པ་ཕྲེང་སོགས་ནི། སོར་གདུབ་དང་། གོས་ཁྲ་བོ་དང་། དགོས་མེད་དུ་ལི་ཁྲི་སོགས་བྱུགས་པ། སྤོས་ལུས་ལ་བྱུགས་པ། མེ་ཏོག་གི་ཕྲེང་བས་ཐོད་བཅིངས་པ་རྣམས་སོ། །བརྒྱད་པ་མལ་ཆེན་མཐོ་བ་ནི། རིན་པོ་ཆེ་དང་། བ་སོ་ལ་སོགས་པའི་ཁྲི་ཁྲུ་གང་ལས་ལྷག་པར་འདུག་པ་དང་། ཉལ་བ་དང་། དེ་བཞིན་དུ་སྟན་ཁྲུ་གང་ལས་ལྷག་པར་དགོས་པ་མེད་པར་འདུག་པ་དང་། ཉལ་བའོ། །དགུ་པ་ཕྱི་དྲོའི་ཁ་ཟས་ནི། གླིང་པའི་ཉི་མ་ཕྱེད་ཡོལ་ནས། སང་སྐྱ་རེངས་དང་པོ་མ་ཤར་བར་ལ་ནད་ལ་སོགས་པའི་རྐྱེན་མེད་པར་ཕྱེ་དང་ཐུད་ལ་སོགས་པ་དུས་རུང་གི་སྨན་བཟའ་བའོ། །བཅུ་པ་གསེར་དངུལ་ལེན་པ་ནི། གསེར་དང་དངུལ་ལ་སོགས་པའི་རིན་པོ་ཆེ། ཆོས་ལྡན་གྱི་རྐྱེན་མེད་བཞིན་དུ་བདག་ཏུ་བཟུང་ནའོ། །འདི་རྣམས་ལ་རྩ་བ་བཞི་ཉམས་ན་སླར་གསོ་རྒྱུ་མེད། ལྷག་མ་དྲུག་ཉམས་ན། སྡོམ་པ་དང་ལྡན་པའི་དྲུང་དུ་བཤགས་ལ་ཉེས་པས་མ་གོས་པར་བྱའོ། །དགེ་ཚུལ་གྱི་བསླབ་བྱ་མདོར་བསྡུས་པ་སྟེ། རྒྱས་པར་འོད་ལྡན་དུ་ཤེས་པར་བྱའོ། །མངྒ་ལཾ་བྷ་ཝ་ཏུ།། ། ༈ །

[edit]

dge tshul gyi bslab bya ni rags sdom bcu/ thams cad mkhyen pa la phyag 'tshal lo/__/dge tshul gyi bslab bya ni rags sdom bcu ste/__ji skad du/__gang zhig srog gcod gzhan gyi nor 'phrog dang /__/mi tshangs spyod rdzun bcos ma'i chang la sogs/__/gar sogs phreng sogs mal chen mtho ba dang /__/phyi dro'i kha zas gser dngul len pa spang /__/zhes pa ltar ro/__/de la dang po srog gcod pa ni/__gzhi bsam pa sbyor ba mthar thug pa'i yan lag bzhi tshang na pham pa ste/__de la gzhi ni/__mi'am mir chags pa/__bsam pa ma 'khrul zhing gsod 'dod pa/__sbyor ba dug__/mtshon/__mthu/__g.yo sgyus 'chi bar gtong ba/__gzhan gyis gsod par zhu ba gnang ba/__gnod sems kyis gsod 'os su ston pa sogs rang ngam bsgos pa'i mis mi 'gyod par bsad pa'o/__/mthar thug rkyen de rnams kyis shi na'o/__/gnyis pa ma byin len la/__gzhi'i yan lag__/thabs sna tshogs kyis rang ngam gzhan la brkur 'jug par brtsams pa/__mi'i yin pa/__rang la nor tha dad pa'i rdzas/__rin thang tshang ba ste/__bod du dngul skya zho gang gi brgyad cha brkus na rin thang tshang ngo /__/bsam pa'i yan lag__/gzhan gyi nor yin par shes pa/__rang gi ched du thob 'dod rgyun mi 'chad pa/__sbyor ba'i yan lag thabs sna tshogs kyis rang ngam gzhan brkur 'jug pa brtsams pa/__mthar thug gi yan lag brkus nas thob blo skyes pa'o/__/gsum pa mi tshangs spyod la/__gzhi'i yan lag__/bud med kyi kha/__gshang lam/__zag byed de sgo gsum du nor bu las su rung bas brtsams pa/__bsam pa'i yan lag 'du shes 'khrul ma 'khrul 'dra zhing /__gnyis sbyor bdag gir byed 'dod rgyun mi 'chad pa/__sbyor ba'i yan lag__/mi tshangs par spyod pa byed par brtsams pa/__mthar thug pa'i yan lag__/gcugs shing nyams su myong ba'o/__/bzhi pa rdzun ni/__gzhi smra ba'i yul mi yin pa/__smra shes don go ba/__shes pa rang bzhin du gnas pa/__ma ning dang mtshan gnyis pa ma yin pa la/__zag med kyi yon tan bzang po yod par shes pa'i tshig go__/bsam pa/__'du shes ma 'khrul ba/__sbyor ba/__rang gi mi chos bla ma rang gis thob par smra bar brtsams pa/__mthar thug smras shing yul des go ba'o/__/lnga pa chang sogs ni/__phab btab pa 'bru'i chang dang /__ma btab pa bu ram dang /__rgun chang la sogs pa myos par 'gyur pa'i chang hub gcig yan mid na ltung bar 'gyur ro/__/drug pa gar sogs ni/__rgod pa'i bsam pas glu dang /__gar dang /__rol mo sna tshogs dgos med du byed pa'o/__/bdun pa phreng sogs ni/__sor gdub dang /__gos khra bo dang /__dgos med du li khri sogs byugs pa/__spos lus la byugs pa/__me tog gi phreng bas thod bcings pa rnams so/__/brgyad pa mal chen mtho ba ni/__rin po che dang /__ba so la sogs pa'i khri khru gang las lhag par 'dug pa dang /__nyal ba dang /__de bzhin du stan khru gang las lhag par dgos pa med par 'dug pa dang /__nyal ba'o/__/dgu pa phyi dro'i kha zas ni/__gling pa'i nyi ma phyed yol nas/__sang skya rengs dang po ma shar bar la nad la sogs pa'i rkyen med par phye dang thud la sogs pa dus rung gi sman bza' ba'o/__/bcu pa gser dngul len pa ni/__gser dang dngul la sogs pa'i rin po che/__chos ldan gyi rkyen med bzhin du bdag tu bzung na'o/__/'di rnams la rtsa ba bzhi nyams na slar gso rgyu med/__lhag ma drug nyams na/__sdom pa dang ldan pa'i drung du bshags la nyes pas ma gos par bya'o/__/dge tshul gyi bslab bya mdor bsdus pa ste/__rgyas par 'od ldan du shes par bya'o/__/mang+ga laM b+ha wa tu//___/__!_/