JKW-KABAB-22-ZA-009

🚧 This website is under continued development. We appreciate your patience!

Previous Text Back to Volume PageLast text in volume.

བཀྲ་ཤིས་ཀྱི་ཚིགས་སུ་བཅད་པ་སྡེ་ཚན་དགུ་དཀྱུས་གཅིག་ཏུ་བཀོད་པ།

Wylie title	bkra shis kyi tshigs su bcad pa sde tshan dgu dkyus gcig tu bkod pa
Location	mkhyen brtse'i bka' babs Volume 22, Text 9, Pages 749-756 (Folios 1a1 to 4b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bkra shis kyi tshigs su bcad pa sde tshan dgu dkyus gcig tu bkod pa. In Rdzong sar 'jam dbyangs mkhyen brtse'i dbang po'i bka' babs, Vol. 22: 749-756. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Invocation of Auspiciousness - bkra shis brjod pa
Karchag page	JKW-KABAB-Volume-22-ZA-Karchag
Colophon	ཅེས་པའང་མཉྫུ་གྷོ་ཥས་བྲིས་པའོ། །འདིས་ཀྱང་རིས་སུ་མ་ཆད་པའི་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །སརྦ་དཱ་མངྒ་ལཾ་བྷ་བ་ཏུ། དགེའོ།།
	ces pa'ang many+dzu g+ho Shas bris pa'o/__/'dis kyang ris su ma chad pa'i rgyal ba'i bstan pa rin po che phyogs dus gnas skabs thams cad du dar zhing rgyas la yun ring du gnas pa'i rgyur gyur cig__/sarba dA mang+ga laM b+ha ba tu/__dge'o//

Tibetan Text

Wylie

[edit]

བཀྲ་ཤིས་ཚིགས་སུ་བཅད་པ་སྡེ་ཚན་དགུ་ཕྱོགས་གཅིག་ཏུ་བཀོད་པ་བཞུགས། ཨོཾ་སྭསྟི། སངས་རྒྱས་བཀྲ་ཤིས་ཆོས་སྐུའི་དཀྱིལ་འཁོར་ཟླུམ། །དམ་ཆོས་བཀྲ་ཤིས་སྦྱོར་བཞིའི་འོད་སྟོང་འབར། །དགེ་འདུན་བཀྲ་ཤིས་མཁྱེན་གསུམ་ཕྱོགས་ཀུན་གསལ། །མཆོག་གསུམ་ཉི་མའི་བཀྲ་ཤིས་དེང་འདིར་ཤོག །བླ་མའི་བཀྲ་ཤིས་བྱིན་རླབས་བདུད་རྩིས་གཏམས། །ཡི་དམ་བཀྲ་ཤིས་དངོས་གྲུབ་ཟིལ་དངར་འབེབས། །མཁའ་འགྲོའི་བཀྲ་ཤིས་ཕྲིན་ལས་ཆུ་གཏེར་རྒྱས། །རྩ་གསུམ་ཟླ་བའི་བཀྲ་ཤིས་དེང་འདིར་ཤོག །ཆོས་སྐུའི་བཀྲ་ཤིས་འགྱུར་མེད་བྱིན་རེ་ཆགས། །ལོངས་སྐུའི་བཀྲ་ཤིས་ལྷུན་གྲུབ་བཀོད་རེ་ལེགས། །སྤྲུལ་སྐུའི་བཀྲ་ཤིས་གང་འདུལ་རྒྱ་རེ་ཆེ། །སྐུ་གསུམ་ལྷུན་པོའི་བཀྲ་ཤིས་དེང་འདིར་ཤོག །ཅེས་གནས་ཁང་གཡང་ཆགས་ཤིང༌། སྦྱིན་བདག་བཀྲ་ཤིས་པའི་རྟེན་འབྲེལ་དུ་འཇིགས་བྲལ་གྱི་སློབ་དཔོན་འཇམ་དབྱངས་མཁྱེན་བརྩེའི་དབང་པོ་དང༌། པདྨ་གར་དབང་བློ་གྲོས་མཐའ་ཡས་ལྷན་ཅིག་པས་གསོལ་བ་བཏབ་པ་སིདྡྷི་རསྟུ། ༈ །ཚེ་དཔག་མེད་མགོན་ཕྱག་གི་བུམ་བཟང་བདུད་རྩིའི་རྒྱུན་གྱིས་དབང་བསྐུར་ཞིང༌། །རྣམ་པར་རྒྱལ་མས་སྣ་ཚོགས་རྡོ་རྗེས་མི་མཐུན་ཕྱོགས་ཀུན་ཡོངས་སུ་བཅོམ། །ཡིད་བཞིན་འཁོར་ལོའི་སྐྱབས་སྦྱིན་ཨུཏྤལ་བྱིན་རླབས་ཟིལ་དངར་གཡོ་བ་ཡིས། །སྐལ་ལྡན་རྣམས་ཀྱི་སྙིང་ལ་སིམ་པས་འཆི་མེད་གྲུབ་པའི་བཀྲ་ཤིས་ཤོག །དགེའོ། ༈ །འབྱུང་བར་དཀོན་པའི་སངས་རྒྱས་སྤངས་རྟོགས་མཆོག །ཐོས་པར་དཀོན་པའི་དམ་ཆོས་ཆགས་བྲལ་མཆོག །བསྒྲུབ་པར་དཀོན་བའི་དགེ་འདུན་ཚོགས་ཞིང་མཆོག །དཀོན་པའི་མཆོག་གྱུར་གསུམ་གྱི་བཀྲ་ཤིས་ཤོག །དད་ལྡན་བྱིན་རླབས་རྩ་བ་བླ་མ་རྗེ། །སྐལ་ལྡན་དངོས་གྲུབ་རྩ་བ་ཡི་དམ་ལྷ། །དམ་ལྡན་ཕྲིན་ལས་རྩ་བ་མཁའ་འགྲོའི་ཚོགས། །ཕན་བདེའི་རྩ་ལག་གསུམ་གྱི་བཀྲ་ཤིས་ཤོག །ཆོས་ཉིད་ཞི་བ་དམ་པ་དོན་གྱི་སྐུ། །ཆོས་ཅན་རྟག་པའི་ལོངས་སྤྱོད་བརྡ་ཡི་སྐུ། །དབྱེར་མེད་གང་འདུལ་སྒྱུ་འཕྲུལ་སྤྲུལ་པའི་སྐུ། །རབ་འབྱམས་སྐུ་གསུམ་རྒྱ་མཚོའི་བཀྲ་ཤིས་ཤོག །དགེའོ། ༈ །ལྷ་དབང་ལྷ་ཡི་འབྱོར་བ་ཆེན་པོས་མཐོ། །ཀླུ་དབང་ཀླུ་ཡི་ནོར་བུ་ཆེན་པོས་བརྗིད། །མི་དབང་མི་ཡི་ལོངས་སྤྱོད་ཆེན་པོས་ཁེངས། །འཇིག་རྟེན་ཆེན་པོ་གསུམ་གྱི་བཀྲ་ཤིས་ཤོག །གེ་སར་མངོན་ཤེས་རྫུ་འཕྲུལ་འགྲན་ཟླ་མེད། །ཞལ་ལུ་སྙིང་སྟོབས་དཔའ་རྒོད་འགྲན་ཟླ་མེད། །ཁྲོ་ཐུང་འཕྲུལ་དང་བཀྲ་ལག་འགྲན་ཟླ་མེད། །འགྲན་མེད་མི་ཕོ་གསུམ་གྱི་བཀྲ་ཤིས་ཤོག །རྒྱ་བཟས་རྒྱ་ཡི་རྟེན་མཆོག་ཐབས་ཀྱིས་དྲངས། །བལ་བཟས་བལ་པོའི་མཆོད་སྡོང་བརྫོངས་སུ་ཐོབ། །འབྲུག་མོས་འབྲུག་ལྟར་གྲགས་པའི་གཏམ་བརྒྱུད་བཞག །ཡ་མཚན་བུད་མེད་གསུམ་གྱི་བཀྲ་ཤིས་ཤོག །ངོ་བོ་སྟོང་པ་སྤྲོས་བྲལ་དབུ་མ་ཆེ། །རང་བཞིན་གསལ་བ་བདེ་སྟོང་ཕྱག་རྒྱ་ཆེ། །ཐུགས་རྗེ་ལྷུན་གྲུབ་འོད་གསལ་རྫོགས་པ་ཆེ། །གཞི་རྒྱུད་ཆེན་པོ་གསུམ་གྱི་བཀྲ་ཤིས་ཤོག །ཐ་མལ་སྣང་ཞེན་སྦྱང་བ་བསྐྱེད་པའི་རིམ། །ལྷར་སྣང་བདེ་ཆེན་བསྒྱུར་བ་རྫོགས་པའི་རིམ། །བདེ་བ་སྟོང་པར་མི་ཕྱེད་རྫོགས་རིམ་ཆེ། །ལམ་རྒྱུད་རིམ་པ་གསུམ་གྱི་བཀྲ་ཤིས་ཤོག །ཤིན་ཏུ་རྣམ་པར་དག་པ་ཆོས་ཀྱི་སྐུ། །མ་འགག་རོལ་པར་འཆར་བ་རྫོགས་པའི་སྐུ། །གདུལ་བྱའི་སྐལ་བར་འཚམས་པ་སྤྲུལ་པའི་སྐུ། །འབྲས་རྒྱུད་སྐུ་གསུམ་དབྱེར་མེད་བཀྲ་ཤིས་ཤོག །སརྦ་མངྒ་ལཾ། ༈ །ཨོཾ་སྭསྟི། སངས་རྒྱས་བཀྲ་ཤིས་སྒྲིབ་གཉིས་རྡུལ་དང་བྲལ། །དམ་ཆོས་བཀྲ་ཤིས་བདེན་གཉིས་འདོད་རྒུར་འཆར། །དགེ་འདུན་བཀྲ་ཤིས་ཚོགས་གཉིས་གཟུགས་མང་འཛིན། །མཆོག་གསུམ་ནོར་བུའི་མེ་ལོང་བཀྲ་ཤིས་ཤོག །སངས་རྒྱས་བཀྲ་ཤིས་སྤངས་རྟོགས་སྙིང་པོའི་བཅུད། །དམ་ཆོས་བཀྲ་ཤིས་ཞི་བསིལ་སྨན་གྱི་མཆོག །དགེ་འདུན་བཀྲ་ཤིས་ཉོན་མོངས་གདུང་སེལ་ཕུལ། །མཆོག་གསུམ་གི་ཝྃ་བཟང་པོའི་བཀྲ་ཤིས་ཤོག །སངས་རྒྱས་བཀྲ་ཤིས་རིགས་ཁམས་རྣམ་པར་དག །དམ་ཆོས་བཀྲ་ཤིས་དག་བྱེད་ཟིལ་མངར་མཆོག །དགེ་འདུན་བཀྲ་ཤིས་ཐར་བདེའི་ལང་ཚོ་རྒྱས། །མཆོག་གསུམ་རབ་དཀར་ཞོ་ཡི་བཀྲ་ཤིས་ཤོག །སངས་རྒྱས་བཀྲ་ཤིས་སྐུ་གསུམ་རྩ་བ་བརྟན། །དམ་ཆོས་བཀྲ་ཤིས་འཆི་མེད་ཡལ་འདབ་རྒྱས། །དགེ་འདུན་བཀྲ་ཤིས་རྣམ་གྲོལ་བཅུད་ལེན་གྲུབ། །མཆོག་གསུམ་དཱུརྺའི་མྱུ་གུའི་བཀྲ་ཤིས་ཤོག །སངས་རྒྱས་བཀྲ་ཤིས་སྐུ་བཞིའི་འབྲས་བུ་སྨིན། །དམ་ཆོས་བཀྲ་ཤིས་ལུང་རྟོགས་གྲིབ་མ་བསིལ། །དགེ་འདུན་བཀྲ་ཤིས་བསླབ་གྲོལ་དོན་ཀུན་གྲུབ། །མཆོག་གསུམ་བིལྦའི་ལྗོན་པའི་བཀྲ་ཤིས་ཤོག །སངས་རྒྱས་བཀྲ་ཤིས་མཚན་དཔེ་གཡས་སུ་འཁྱིལ། །དམ་ཆོས་བཀྲ་ཤིས་བདེན་བཞིའི་དབྱངས་སྙན་སྒྲོགས། །དགེ་འདུན་བཀྲ་ཤིས་སྲིད་པའི་རིམས་ནད་གཅོད། །མཆོག་གསུམ་ཆོས་དུང་དཀར་པོའི་བཀྲ་ཤིས་ཤོག །སངས་རྒྱས་བཀྲ་ཤིས་འགྲོ་ལ་རྗེས་ཆགས་མདངས། །དམ་ཆོས་བཀྲ་ཤིས་ཤེས་བྱ་རང་དབང་བསྒྱུར། །དགེ་འདུན་བཀྲ་ཤིས་བསླབ་གཞིའི་རྒྱལ་སྲིད་བརྟན། །མཆོག་གསུམ་ལི་ཁྲིའི་ཐིག་ལེའི་བཀྲ་ཤིས་ཤོག །སངས་རྒྱས་བཀྲ་ཤིས་རྒྱུན་གྱིས་རྟག་པ་གྲུབ། །དམ་ཆོས་བཀྲ་ཤིས་ཕན་བདེའི་མཐུ་ཆེན་ཐོབ། །དགེ་འདུན་བཀྲ་ཤིས་ཡིད་སྲུབས་གཡུལ་ལས་རྒྱལ། །མཆོག་གསུམ་གྲུབ་པའི་ཡུངས་ཀར་བཀྲ་ཤིས་ཤོག །ཅེས་ཡང་དག་པར་རྫོགས་པའི་སངས་རྒྱས་ཀྱིས་སྲིད་ཞིའི་དགེ་མཚན་ཀུན་གྱི་སྙིང་པོར་བྱིན་གྱིས་བརླབས་པའི་བཀྲ་ཤིས་རྫས་མཆོག་བརྒྱད་ལས་ཉེ་བར་དྲངས་ཏེ་བརྗོད་བྱ་དང་རྗོད་བྱེད་གཉིས་ཀ་ཕུན་སུམ་ཚོགས་པའི་དབྱངས་ཀྱི་ཡན་ལག་སྙན་པར་བསྒྲགས་པ་འདིའང་བསྟན་པ་རྒྱ་མཚོའི་ཤིང་རྟ་མཁས་ཤིང་གྲུབ་པ་བརྙེས་པའི་ཁྱུ་མཆོག་དཔལ་སའི་སྟེང་ན་འགྲན་ཟླ་དང་བྲལ་བའི་ཆོས་ཀྱི་རྗེ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོའི་འཛམ་གླིང་བཤད་སྒྲུབ་བསྟན་པའི་ཆུ་ཀླུང་མཐའ་དག་གཅིག་ཏུ་འཁྱིལ་བའི་མ་དྲོས་ཀྱི་རྒྱ་མཚོ་ཆེན་པོ་དཔལ་སྤུངས་ཡང་ཁྲོད་དེ་ཝཱི་ཀོ་ཊི་དབུས་མ། ཙཱ་རི་ཏྲ་སྙིང་པོ་དཔལ་ཆེན་དགྱེས་པའི་ཐུགས་ཀྱི་ཕོ་བྲང་སྒྲུབ་པའི་སྡེ་རྣམས་ཀྱི་སྤྱོད་ཡུལ་གྱི་གྲོང་ཁྱེར། ཕྱ་གཡང་ཆོས་ཀྱི་གཞིས་ཀ་བཀྲ་ཤིས་བདེ་གནས་གཡུང་དྲུང་འཁྱིལ་བའི་གཞལ་མེད་ཁང་ཆེན་པོར་རྟེན་དང་བརྟེན་པ་ཁོར་ཡུག་དང་བཅས་པ་བཀྲ་ཤིས་ཤིང་དགེ་མཚན་གྱི་སྣང་བ་རྒྱུན་གྱིས་རྟག་ཅིང་འདོད་དགུར་གྲུབ་པའི་སླད་དུ་འཇིགས་བྲལ་གྱི་སློབ་དཔོན་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོས་སྐྱབས་གནས་མཆོག་གསུམ་རྒྱ་མཚོ་མངོན་སུམ་བཞིན་ཡིད་ལ་བཀོད་དེ་མི་བྱེད་དད་པའི་ཤུགས་རབ་ཏུ་རྒྱས་པས་རྩེ་གཅིག་ཏུ་གསོལ་བ་བཏབ་པ་ལྟར་སྡེ་སྣོད་འཛིན་པ་ཆེན་པོ་ཀརྨ་བཀྲ་ཤིས་ཞི་བའི་སྙིང་པོ་བློ་གྲོས་རྒྱས་པའི་སྡེས་ཡི་གེར་བྲིས་པ་ཕྱོགས་དང་དུས་དང་གནས་སྐབས་ཐམས་ཅད་དུ་དོན་གྲུབ་ཅིང་དགེ་ལེགས་བཀྲ་ཤིས་ཀྱི་དགའ་སྟོན་ཡོངས་སུ་རྒྱས་པར་གྱུར་ཅིག །སརྦ་མངྒ་ལཾ། ༈ །ཨོཾ་སྭསྟི་སིདྡྷཾ། སངས་རྒྱས་བཀྲ་ཤིས་སྤངས་རྟོགས་ནོར་བུས་བརྗིད། །དམ་ཆོས་བཀྲ་ཤིས་ལུང་རྟོགས་དར་ཤམས་གཡོ། །དགེ་འདུན་བཀྲ་ཤིས་རིག་གྲོལ་ཡུ་བ་བརླིང༌། །མཆོག་གསུམ་གསེར་གྱི་གདུགས་མཛེས་བཀྲ་ཤིས་ཤོག །བླ་མའི་བཀྲ་ཤིས་བྱིན་རླབས་ཆུ་གཏེར་ཆེ། །ཡི་དམ་བཀྲ་ཤིས་ཡེ་ཤེས་སྤྱན་རས་གསལ། །མཁའ་འགྲོའི་བཀྲ་ཤིས་ཕྲིན་ལས་གཤོག་རྩལ་བསྒྱུར། །རྩ་གསུམ་གསེར་གྱི་ཉ་མོའི་བཀྲ་ཤིས་ཤོག །ཆོས་སྐུའི་བཀྲ་ཤིས་འོད་གསལ་ལྟོབ་ཟླུམ། །ལོངས་སྐུའི་བཀྲ་ཤིས་ཁ་སྦྱོར་རྒྱན་གྱིས་སྤྲས། །སྤྲུལ་སྐུའི་བཀྲ་ཤིས་གང་འདུལ་འདོད་རྒུར་འཆར། །སྐུ་གསུམ་བུམ་པ་བཟང་པོའི་བཀྲ་ཤིས་ཤོག །སྐུ་ཡི་བཀྲ་ཤིས་མཚན་དཔེའི་འདབ་སྟོང་བཞད། །གསུང་གི་བཀྲ་ཤིས་ཞི་བསིལ་བདུད་རྩིས་གཏམ། །ཐུགས་ཀྱི་བཀྲ་ཤིས་སྒྲིབ་གཉིས་རྡུལ་དང་བྲལ། །གསང་གསུམ་པདྨ་དཀར་པོའི་བཀྲ་ཤིས་ཤོག །རྣམ་མཁྱེན་བཀྲ་ཤིས་བྲལ་སྨིན་གཡས་སུ་འཁྱིལ། །ལམ་ཤེས་བཀྲ་ཤིས་ལམ་གསུམ་དབྱངས་སྙན་སྒྲོག །གཞི་ཤེས་བཀྲ་ཤིས་སྲིད་པའི་རིམས་ནད་གཅོད། །མཁྱེན་གསུམ་ཆོས་དུང་ཆེན་པོའི་བཀྲ་ཤིས་ཤོག །དབུ་མའི་བཀྲ་ཤིས་སྤྲོས་བྲལ་ཁོང་སེང་ཡངས། །ཕྱག་ཆེན་བཀྲ་ཤིས་ཟབ་གསལ་རི་མོས་མཛེས། །རྫོགས་ཆེན་བཀྲ་ཤིས་དབྱིངས་རིག་འོད་དུ་འབར། །ཆེན་པོ་གསུམ་ལྡན་དཔལ་བེའུའི་བཀྲ་ཤིས་ཤོག །གཞི་རྒྱུད་བཀྲ་ཤིས་རིགས་ཁམས་རྩ་བ་བརྟན། །ལམ་རྒྱུད་བཀྲ་ཤིས་བསྐྱེད་རྫོགས་དར་འཕན་འཕྱོ། །འབྲས་རྒྱུད་བཀྲ་ཤིས་སྐུ་གཉིས་ཏོག་གིས་མཛེས། །རྒྱུད་གསུམ་རྒྱལ་མཚན་བཟང་པོའི་བཀྲ་ཤིས་ཤོག །ཐོག་མར་བཀྲ་ཤིས་བྱང་སེམས་གསེར་སྦྱངས་ཁམས། །བར་དུ་བཀྲ་ཤིས་དམིགས་མེད་ལྟེ་བ་ཟླུམ། །ཐ་མར་བཀྲ་ཤིས་ཡོངས་བསྔོའི་རྩིབས་སྟོང་བསྐོར། །དུས་གསུམ་དགེ་བའི་གསེར་འཁོར་བཀྲ་ཤིས་ཤོག །ཅེས་པའང་ལི་ཀྱང་ཅུའི་ས་འཛིན་གྱི་ཐིག་ལེར། སྒྲུབ་བརྒྱུད་ཀརྨ་ཀཾ་ཚང་གི་འཁོར་ལོ་གསུམ་གྱི་ཕྱག་རྗེས་ལམ་མེར་གསལ་བའི་ཆོས་གྲྭ་ཆེན་པོ་ཀརྨ་ཕུན་ཚོགས་བསྟན་འཕེལ་བཀྲ་ཤིས་དར་རྒྱས་གླིང་གཾ་བླ་མ་དགེ་འདུན་རྣམས་ཞབས་པད་བརྟན་ཅིང༌། ཐུགས་མཐུན་ཁྲིམས་གཙང༌། བཤད་སྒྲུབ་ཀྱི་བསྟན་པ་རིན་པོ་ཆེ་གོང་ནས་གོང་དུ་འཕེལ་བའི་ཆེད། སྨོན་ཚིག་འདི་ལྟ་བུ་བྲིས་ཞེས་འོག་མིན་གཉིས་པ་ཤར་དཔལ་སྤུངས་ཐུབ་བསྟན་ཆོས་འཁོར་གླིང་གི་ཡང་ཁྲོད་དེ་ཝཱི་ཀོ་ཊིའི་འཇམ་མགོན་རྡོ་རྗེ་འཆང་ཆེན་པོའི་ཞལ་སློབ་སྒྲུབ་བརྩོན་བླ་མ་ཀརྨ་རིག་འཛིན་སྙིང་པོས་གསོལ་བ་བཏབ་པའི་ངོར་སངས་རྒྱས་གཉིས་པ་ཨོ་ཌཱི་ཡཱ་ནའི་སློབ་དཔོན་མཆོག་གིས་བྱིན་གྱིས་བརླབས་ཤིང༌། རིས་མེད་པའི་བསྟན་པ་ལ་དག་པའི་སྣང་བ་གཅིག་ཏུ་དཀར་བ་ཤཱཀྱའི་དགེ་སློང་འཇམ་དབྱངས་མཁྱེན་བརྩེའི་དབང་པོའམ། པདྨ་འོད་གསལ་མདོ་སྔགས་གླིང་པའི་སྡེས་གང་ཤར་བྲིས་པ་ཤིན་ཏུ་བཀྲ་ཤིས་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། ༈ །ཨོཾ་སྭསྟི། རྗེ་བཙུན་ཡིད་བཞིན་འཁོར་ལོ་ཡི། །ཐུགས་རྗེས་རྣམ་ཀུན་བྱིན་བརླབས་པས། །བར་དུ་གཅོད་པ་ཀུན་ཞི་ཞིང༌། །ཆོས་མཐུན་བསམ་དོན་ལྷུན་གྲུབ་ཤོག །ཅེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་དགེ་ལེགས་སུ་གྱུར་ཅིག ༈ །ཨོཾ་སྭསྟི་སིདྡྷཾ། བཀྲ་ཤིས་ཕན་བདེའི་འབྱུང་གནས་དཀོན་མཆོག་གསུམ། །དགེ་ལེགས་ཆར་འབེབས་རྩ་གསུམ་རབ་འབྱམས་ལྷ། །ཕུན་ཚོགས་འདོད་རྒུའི་དཔལ་སྟེར་མཁའ་འགྲོ་དང༌། །ཆོས་སྲུང་ནོར་ལྷ་རྒྱ་མཚོས་ཤིས་པར་མཛོད། །ཅེས་པའང་མཁྱེན་བརྩེའི་དབང་པོས་སྨྲས་པ་སིདྡྷི་རསྟུ། ༈ །གངས་ལྗོངས་རིས་མེད་བསྟན་པ་རྒྱ་མཚོའི་བདག །ངོ་མཚར་བཀའ་བབས་བདུན་གྱི་འཁོར་ལོས་བསྒྱུར། །འཇམ་པའི་དབྱངས་དངོས་མཁྱེན་བརྩེའི་དབང་པོ་ཡི། །རིང་ལུགས་བསྟན་པ་དར་རྒྱས་བཀྲ་ཤིས་ཤོག །ཅེས་པའང་མཉྫུ་གྷོ་ཥས་བྲིས་པའོ། །འདིས་ཀྱང་རིས་སུ་མ་ཆད་པའི་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །སརྦ་དཱ་མངྒ་ལཾ་བྷ་བ་ཏུ། དགེའོ།། །།

[edit]

bkra shis tshigs su bcad pa sde tshan dgu phyogs gcig tu bkod pa bzhugs/__oM swasti/__sangs rgyas bkra shis chos sku'i dkyil 'khor zlum/__/dam chos bkra shis sbyor bzhi'i 'od stong 'bar/__/dge 'dun bkra shis mkhyen gsum phyogs kun gsal/__/mchog gsum nyi ma'i bkra shis deng 'dir shog__/bla ma'i bkra shis byin rlabs bdud rtsis gtams/__/yi dam bkra shis dngos grub zil dngar 'bebs/__/mkha' 'gro'i bkra shis phrin las chu gter rgyas/__/rtsa gsum zla ba'i bkra shis deng 'dir shog__/chos sku'i bkra shis 'gyur med byin re chags/__/longs sku'i bkra shis lhun grub bkod re legs/__/sprul sku'i bkra shis gang 'dul rgya re che/__/sku gsum lhun po'i bkra shis deng 'dir shog__/ces gnas khang g.yang chags shing*/__sbyin bdag bkra shis pa'i rten 'brel du 'jigs bral gyi slob dpon 'jam dbyangs mkhyen brtse'i dbang po dang*/__pad+ma gar dbang blo gros mtha' yas lhan cig pas gsol ba btab pa sid+d+hi rastu/__!__/tshe dpag med mgon phyag gi bum bzang bdud rtsi'i rgyun gyis dbang bskur zhing*/__/rnam par rgyal mas sna tshogs rdo rjes mi mthun phyogs kun yongs su bcom/__/yid bzhin 'khor lo'i skyabs sbyin ut+pal byin rlabs zil dngar g.yo ba yis/__/skal ldan rnams kyi snying la sim pas 'chi med grub pa'i bkra shis shog__/dge'o/__!__/'byung bar dkon pa'i sangs rgyas spangs rtogs mchog__/thos par dkon pa'i dam chos chags bral mchog__/bsgrub par dkon ba'i dge 'dun tshogs zhing mchog__/dkon pa'i mchog gyur gsum gyi bkra shis shog__/dad ldan byin rlabs rtsa ba bla ma rje/__/skal ldan dngos grub rtsa ba yi dam lha/__/dam ldan phrin las rtsa ba mkha' 'gro'i tshogs/__/phan bde'i rtsa lag gsum gyi bkra shis shog__/chos nyid zhi ba dam pa don gyi sku/__/chos can rtag pa'i longs spyod brda yi sku/__/dbyer med gang 'dul sgyu 'phrul sprul pa'i sku/__/rab 'byams sku gsum rgya mtsho'i bkra shis shog__/dge'o/__!__/lha dbang lha yi 'byor ba chen pos mtho/__/klu dbang klu yi nor bu chen pos brjid/__/mi dbang mi yi longs spyod chen pos khengs/__/'jig rten chen po gsum gyi bkra shis shog__/ge sar mngon shes rdzu 'phrul 'gran zla med/__/zhal lu snying stobs dpa' rgod 'gran zla med/__/khro thung 'phrul dang bkra lag 'gran zla med/__/'gran med mi pho gsum gyi bkra shis shog__/rgya bzas rgya yi rten mchog thabs kyis drangs/__/bal bzas bal po'i mchod sdong brdzongs su thob/__/'brug mos 'brug ltar grags pa'i gtam brgyud bzhag__/ya mtshan bud med gsum gyi bkra shis shog__/ngo bo stong pa spros bral dbu ma che/__/rang bzhin gsal ba bde stong phyag rgya che/__/thugs rje lhun grub 'od gsal rdzogs pa che/__/gzhi rgyud chen po gsum gyi bkra shis shog__/tha mal snang zhen sbyang ba bskyed pa'i rim/__/lhar snang bde chen bsgyur ba rdzogs pa'i rim/__/bde ba stong par mi phyed rdzogs rim che/__/lam rgyud rim pa gsum gyi bkra shis shog__/shin tu rnam par dag pa chos kyi sku/__/ma 'gag rol par 'char ba rdzogs pa'i sku/__/gdul bya'i skal bar 'tshams pa sprul pa'i sku/__/'bras rgyud sku gsum dbyer med bkra shis shog__/sarba mang+ga laM/__!__/oM swasti/__sangs rgyas bkra shis sgrib gnyis rdul dang bral/__/dam chos bkra shis bden gnyis 'dod rgur 'char/__/dge 'dun bkra shis tshogs gnyis gzugs mang 'dzin/__/mchog gsum nor bu'i me long bkra shis shog__/sangs rgyas bkra shis spangs rtogs snying po'i bcud/__/dam chos bkra shis zhi bsil sman gyi mchog__/dge 'dun bkra shis nyon mongs gdung sel phul/__/mchog gsum gi wa~M bzang po'i bkra shis shog__/sangs rgyas bkra shis rigs khams rnam par dag__/dam chos bkra shis dag byed zil mngar mchog__/dge 'dun bkra shis thar bde'i lang tsho rgyas/__/mchog gsum rab dkar zho yi bkra shis shog__/sangs rgyas bkra shis sku gsum rtsa ba brtan/__/dam chos bkra shis 'chi med yal 'dab rgyas/__/dge 'dun bkra shis rnam grol bcud len grub/__/mchog gsum dUr+Wa'i myu gu'i bkra shis shog__/sangs rgyas bkra shis sku bzhi'i 'bras bu smin/__/dam chos bkra shis lung rtogs grib ma bsil/__/dge 'dun bkra shis bslab grol don kun grub/__/mchog gsum bilba'i ljon pa'i bkra shis shog__/sangs rgyas bkra shis mtshan dpe g.yas su 'khyil/__/dam chos bkra shis bden bzhi'i dbyangs snyan sgrogs/__/dge 'dun bkra shis srid pa'i rims nad gcod/__/mchog gsum chos dung dkar po'i bkra shis shog__/sangs rgyas bkra shis 'gro la rjes chags mdangs/__/dam chos bkra shis shes bya rang dbang bsgyur/__/dge 'dun bkra shis bslab gzhi'i rgyal srid brtan/__/mchog gsum li khri'i thig le'i bkra shis shog__/sangs rgyas bkra shis rgyun gyis rtag pa grub/__/dam chos bkra shis phan bde'i mthu chen thob/__/dge 'dun bkra shis yid srubs g.yul las rgyal/__/mchog gsum grub pa'i yungs kar bkra shis shog__/ces yang dag par rdzogs pa'i sangs rgyas kyis srid zhi'i dge mtshan kun gyi snying por byin gyis brlabs pa'i bkra shis rdzas mchog brgyad las nye bar drangs te brjod bya dang rjod byed gnyis ka phun sum tshogs pa'i dbyangs kyi yan lag snyan par bsgrags pa 'di'ang bstan pa rgya mtsho'i shing rta mkhas shing grub pa brnyes pa'i khyu mchog dpal sa'i steng na 'gran zla dang bral ba'i chos kyi rje karma ngag dbang yon tan rgya mtsho phrin las kun khyab dpal bzang po'i 'dzam gling bshad sgrub bstan pa'i chu klung mtha' dag gcig tu 'khyil ba'i ma dros kyi rgya mtsho chen po dpal spungs yang khrod de wI ko Ti dbus ma/__tsA ri tra snying po dpal chen dgyes pa'i thugs kyi pho brang sgrub pa'i sde rnams kyi spyod yul gyi grong khyer/__phya g.yang chos kyi gzhis ka bkra shis bde gnas g.yung drung 'khyil ba'i gzhal med khang chen por rten dang brten pa khor yug dang bcas pa bkra shis shing dge mtshan gyi snang ba rgyun gyis rtag cing 'dod dgur grub pa'i slad du 'jigs bral gyi slob dpon 'jam dbyangs mkhyen brtse'i dbang po kun dga' bstan pa'i rgyal mtshan dpal bzang pos skyabs gnas mchog gsum rgya mtsho mngon sum bzhin yid la bkod de mi byed dad pa'i shugs rab tu rgyas pas rtse gcig tu gsol ba btab pa ltar sde snod 'dzin pa chen po karma bkra shis zhi ba'i snying po blo gros rgyas pa'i sdes yi ger bris pa phyogs dang dus dang gnas skabs thams cad du don grub cing dge legs bkra shis kyi dga' ston yongs su rgyas par gyur cig__/sarba mang+ga laM/__!__/oM swasti sid+d+haM/__sangs rgyas bkra shis spangs rtogs nor bus brjid/__/dam chos bkra shis lung rtogs dar shams g.yo/__/dge 'dun bkra shis rig grol yu ba brling*/__/mchog gsum gser gyi gdugs mdzes bkra shis shog__/bla ma'i bkra shis byin rlabs chu gter che/__/yi dam bkra shis ye shes spyan ras gsal/__/mkha' 'gro'i bkra shis phrin las gshog rtsal bsgyur/__/rtsa gsum gser gyi nya mo'i bkra shis shog__/chos sku'i bkra shis 'od gsal ltob zlum/__/longs sku'i bkra shis kha sbyor rgyan gyis spras/__/sprul sku'i bkra shis gang 'dul 'dod rgur 'char/__/sku gsum bum pa bzang po'i bkra shis shog__/sku yi bkra shis mtshan dpe'i 'dab stong bzhad/__/gsung gi bkra shis zhi bsil bdud rtsis gtam/__/thugs kyi bkra shis sgrib gnyis rdul dang bral/__/gsang gsum pad+ma dkar po'i bkra shis shog__/rnam mkhyen bkra shis bral smin g.yas su 'khyil/__/lam shes bkra shis lam gsum dbyangs snyan sgrog__/gzhi shes bkra shis srid pa'i rims nad gcod/__/mkhyen gsum chos dung chen po'i bkra shis shog__/dbu ma'i bkra shis spros bral khong seng yangs/__/phyag chen bkra shis zab gsal ri mos mdzes/__/rdzogs chen bkra shis dbyings rig 'od du 'bar/__/chen po gsum ldan dpal be'u'i bkra shis shog__/gzhi rgyud bkra shis rigs khams rtsa ba brtan/__/lam rgyud bkra shis bskyed rdzogs dar 'phan 'phyo/__/'bras rgyud bkra shis sku gnyis tog gis mdzes/__/rgyud gsum rgyal mtshan bzang po'i bkra shis shog__/thog mar bkra shis byang sems gser sbyangs khams/__/bar du bkra shis dmigs med lte ba zlum/__/tha mar bkra shis yongs bsngo'i rtsibs stong bskor/__/dus gsum dge ba'i gser 'khor bkra shis shog__/ces pa'ang li kyang cu'i sa 'dzin gyi thig ler/__sgrub brgyud karma kaM tshang gi 'khor lo gsum gyi phyag rjes lam mer gsal ba'i chos grwa chen po karma phun tshogs bstan 'phel bkra shis dar rgyas gling gaM bla ma dge 'dun rnams zhabs pad brtan cing*/__thugs mthun khrims gtsang*/__bshad sgrub kyi bstan pa rin po che gong nas gong du 'phel ba'i ched/__smon tshig 'di lta bu bris zhes 'og min gnyis pa shar dpal spungs thub bstan chos 'khor gling gi yang khrod de wI ko Ti'i 'jam mgon rdo rje 'chang chen po'i zhal slob sgrub brtson bla ma karma rig 'dzin snying pos gsol ba btab pa'i ngor sangs rgyas gnyis pa o DI yA na'i slob dpon mchog gis byin gyis brlabs shing*/__ris med pa'i bstan pa la dag pa'i snang ba gcig tu dkar ba shAkya'i dge slong 'jam dbyangs mkhyen brtse'i dbang po'am/__pad+ma 'od gsal mdo sngags gling pa'i sdes gang shar bris pa shin tu bkra shis par gyur cig__/sarba dA ka l+yA NaM b+ha ba tu/__!__/oM swasti/__rje btsun yid bzhin 'khor lo yi/__/thugs rjes rnam kun byin brlabs pas/__/bar du gcod pa kun zhi zhing*/__/chos mthun bsam don lhun grub shog__/ces pa'ang mtsho skyes bla ma dgyes pa'i 'bangs mkhyen brtse'i dbang pos gsol ba btab pa dge legs su gyur cig__!__/oM swasti sid+d+haM/__bkra shis phan bde'i 'byung gnas dkon mchog gsum/__/dge legs char 'bebs rtsa gsum rab 'byams lha/__/phun tshogs 'dod rgu'i dpal ster mkha' 'gro dang*/__/chos srung nor lha rgya mtshos shis par mdzod/__/ces pa'ang mkhyen brtse'i dbang pos smras pa sid+d+hi rastu/__!__/gangs ljongs ris med bstan pa rgya mtsho'i bdag__/ngo mtshar bka' babs bdun gyi 'khor los bsgyur/__/'jam pa'i dbyangs dngos mkhyen brtse'i dbang po yi/__/ring lugs bstan pa dar rgyas bkra shis shog__/ces pa'ang many+dzu g+ho Shas bris pa'o/__/'dis kyang ris su ma chad pa'i rgyal ba'i bstan pa rin po che phyogs dus gnas skabs thams cad du dar zhing rgyas la yun ring du gnas pa'i rgyur gyur cig__/sarba dA mang+ga laM b+ha ba tu/__dge'o//__//