JKW-KABAB-13-PA-043

🚧 This website is under continued development. We appreciate your patience!

Previous Text Back to Volume PageNext Text

Wylie title	bcom ldan 'das mgon po tshe dang ye shes dpag tu med pa la bstod pa 'chi med zla gzhon gsar pa'i rol mo
Location	mkhyen brtse'i bka' babs Volume 13, Text 43, Pages 557-566 (Folios 1a to 5b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bcom ldan 'das mgon po tshe dang ye shes dpag tu med pa la bstod pa 'chi med zla gzhon gsar pa'i rol mo. In Rdzong sar 'jam dbyangs mkhyen brtse'i dbang po'i bka' babs, Vol. 13: 557-566. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Verses of Praise - bstod pa
Karchag page	JKW-KABAB-Volume-13-PA-Karchag
Recension Link	Other Versions on this site: བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལ་བསྟོད་པ་འཆི་མེད་ཟླ་གཞོན་གསར་པའི་རོལ་མོ།
Colophon	།དེ་ལྟར་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་པོ་ལ་བསྟོད་པའི་རབ་ཏུ་བྱེད་པ་འཆི་མེད་ཟླ་གཞོན་གསར་པའི་རོལ་མོ་ཞེས་བྱ་བ་འདི་ནི། བདེ་བ་ཅན་གྱི་ཞིང་གི་བཀོད་པ་རྟེན་དང་བརྟེན་པར་བཅས་པ་དང་མཐུན་ཞིང་མངོན་རྟོགས་དག་གི་དོན་དང་ཡང་མི་འགལ་བར་གཞོན་ནུ་ཨ་བྷ་ཡས་རང་ལོ་བཅོ་བརྒྱད་པར་བྲྀ་ཥ་བྷ་ཞེས་ཁྱུ་མཆོག་ཟླ་བའི་དགའ་བ་གཉིས་པའི་གྲལ་ཚེས་དགེ་བར་ཡོངས་སུ་འགྲུབ་པར་བགྱིས་པའི་དགེ་བས་གནས་སྐབས་ལུས་ཅན་ཐམས་ཅད་སྡུག་བསྔལ་གསུམ་གྱི་ཆུ་གཏེར་ལས་བསྒྲལ་ནས་མཐར་ཐུག་ཐམས་ཅད་མཁྱེན་པའི་གྲོང་ཁྱེར་དུ་དབུགས་འབྱིན་ཐོབ་པའི་རྒྱུར་གྱུར་ཅིག།
	de ltar bcom ldan 'das mgon po tshe dang ye shes dpag tu med pa shin tu rnam par nges pa gzi brjid kyi rgyal po la bstod pa'i rab tu byed pa 'chi med zla gzhon gsar pa'i rol mo zhes bya ba 'di ni/__bde ba can gyi zhing gi bkod pa rten dang brten par bcas pa dang mthun zhing mngon rtogs dag gi don dang yang mi 'gal bar gzhon nu a b+ha yas rang lo bco brgyad par br-i Sha b+ha zhes khyu mchog zla ba'i dga' ba gnyis pa'i gral tshes dge bar yongs su 'grub par bgyis pa'i dge bas gnas skabs lus can thams cad sdug bsngal gsum gyi chu gter las bsgral nas mthar thug thams cad mkhyen pa'i grong khyer du dbugs 'byin thob pa'i rgyur gyur cig

Tibetan Text

Wylie

[edit]

།བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལ་བསྟོད་པ་འཆི་མེད་ཟླ་གཞོན་གསར་པའི་རོལ་མོ་ཞེས་བྱ་བ་བཞུགས་སོ།། རྒྱ་གར་སྐད་དུ། ཏ་ཐཱ་ག་ཏཱ་པ་རི་མི་ཏཱ་ཡུརྫྙཱ་ན་སུ་བི་ནིཤྩིཏྟ་ཏེ་ཛོ་རཱ་ཛྙེ་སྟོ་ཏྲཾ་ནཱ་མ། །བོད་སྐད་དུ། །དེ་བཞིན་གཤེགས་པ་ཚེ་དང་ཡེ་ཤེས་དཔག་ཏུ་མེད་པ་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་པོ་ལ་བསྟོད་པ་ཞེས་བྱ་བ། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཟག་མེད་ཡེ་ཤེས་དམ་པའི་སྣོད་གྱུར་ངོ་མཚར་མཚན་དཔེའི་འཇོ་སྒེག་ཅན། །གདུལ་བྱའི་དབང་པོར་འཚམས་པར་འཇུག་པའི་གསུང་གསང་བརྗོད་བྲལ་ནཱ་དའི་དབྱངས། །སྤྲོས་པའི་མཐའ་དང་མཛའ་བ་མ་ཡིན་རྣམ་པ་ཀུན་གྱི་མཆོག་ལྡན་ཐུགས། །མི་ཟད་རྒྱན་གྱི་འཁོར་ལོར་དགྱེས་རོལ་བདེ་ལྡན་ཞིང་གཙོ་ཚེ་མཐའ་ཡས། །གང་མཚན་ནོར་བུའི་དོ་ཤལ་གཡོ་བ་ལུས་ཅན་བསོད་ནམས་རྣ་ལུང་དུ། །དཔྱངས་པ་ཙམ་གྱིས་སྡུག་བསྔལ་གསུམ་གྱི་མྱ་ངན་གྲོང་ལས་དབུགས་འབྱིན་ནས། །འཆི་མེད་ཚེ་དང་ཡེ་ཤེས་མཆོག་གི་འདོད་དོན་ཅི་དགར་འཇོ་བ་ཡིས། །རེ་བའི་ཤིང་རྟ་ཕྱུར་བུར་འགེངས་ཕྱིར་སུ་ཞིག་རབ་ཏུ་བསྟོད་མི་བྱེད། །ཆོས་ཀྱི་འབྱུང་གནས་རྣམ་དག་བདེན་སྨོན་སྤྲིན་དཀར་མེ་ཏོག་འཇོ་བ་ལས། །གནས་ངན་ལེན་གྱི་རྡུལ་དང་མི་མཛའ་བྱེ་བ་ཁྲག་ཁྲིག་བརྒྱ་སྟོང་ཕྲག །བརྒྱད་ཅུ་རྩ་གཅིག་སངས་རྒྱས་ཞིང་བཀོད་ཡོད་ཏན་གཅིག་བསྡོམས་ཟ་མ་ཏོག །དག་པ་རབ་འབྱམས་དགའ་ཚལ་དམ་པར་ཕུལ་བྱུང་བསྔགས་འོས་བརྗོད་མི་ལོང༌། །ཤིན་ཏུ་གཞོན་ཤ་ཆགས་པའི་ལག་མཐིལ་ཛམྦུ་ནཱ་དས་མདངས་པའི་དབྱིག །གང་གི་གཞིར་ཆགས་ཨུཏྤལ་གྱིས་བསྲུངས་མནན་ནེམ་བཏེག་འཕར་ས་འཛིན་ངོས། །ཡན་ལག་བརྒྱད་ལྡན་ཅ་ཅོ་རྣམ་སྤངས་ཞི་བསིལ་བདེན་གཉིས་ཆོས་ཀྱི་སྒྲས། །ཀུན་རྨོངས་མ་རིག་གཉིད་ལས་སད་མཛད་བདེ་འཐུང་ཆུ་གཏེར་གཡོ་བའི་འགྲམ། །བཻ་ཌཱུརྻ་དང་ཨིནྡྲ་ནཱི་ལ་ཤེལ་དང་མ་རྒད་ལ་སོགས་པའི། །རིན་ཆེན་སྣ་ཚོགས་མནྡཱ་ར་བ་ཡིད་འོང་གཡོ་བའི་བར་བར་ནས། །གསེར་གྱི་དྲ་བས་རྣམ་པར་སྦྲེལ་གྱུར་དྲི་བཞོན་ཕོ་ཉས་བསྐུལ་བ་ལས། །མཉན་པར་འོས་པའི་སྒྲ་དབྱངས་ཟད་མེད་ཆོག་མི་ཤེས་པར་ཀུན་ཏུ་སྒྲོགས། །དེ་དག་རྣམས་ཀྱི་ཡལ་འདབ་གཞོན་ནུས་བསྟི་སྟང་བྱས་པའི་དོ་ཀེར་རྩེར། །ཤིན་ཏུ་རབ་སྒེག་ངང་ཚུལ་ཞི་ཞིང་ཕན་ཚུན་རྩེ་བའི་ཤ་ཀུུ་ནཿ །གཙུག་ཕུད་མདངས་ཅན་མ་རྒད་གཤོག་ལྡན་མགྲིན་པའི་རྫ་རྔ་འཁྲོལ་ལ་སོགས། །སྣ་ཚོགས་ཤིང་རྟའི་གླུ་དབྱངས་ལས་ལྷག་རབ་སྙན་རོལ་མོས་ཡོངས་སུ་བཀང༌། །དེ་ན་ཐུན་མཚམས་མངའ་བ་མ་ཡིན་ཁོར་ཡུག་འོད་སྣང་ཕྲེང་བས་གཏམས། །མཆོག་ཏུ་མཛེས་པའི་དགའ་ཚལ་ལས་བྱུང་འདོད་པའི་ཡོན་ཏན་གཞལ་དཀའ་བ། །གཞལ་འཕྲུལ་དབང་བྱེད་བཀོད་པས་མི་བསྒྲུན་ཕུན་སུམ་ཚོགས་པའི་བདེ་བ་ཆེར། །ངོམས་པ་མེད་པར་ལོངས་སུ་སྤྱོད་ཕྱིར་མཚན་གྱི་སྤྲིང་ཡིག་རྣམ་པར་གསལ། །མདོར་ན་ཀུན་མཁྱེན་ཡེ་ཤེས་ཀྱིས་སྦྱངས་དག་པའི་རྡུལ་བྲལ་སྤྱན་རྣོན་པོས། །ཕྱོགས་བཅུའི་ཞིང་ཁམས་རྒྱ་མཚོར་བཙལ་ཀྱང་མཚུངས་ཟླས་དབེན་པར་རབ་གཟིགས་ནས། །མཆོག་ཏུ་བསྔགས་པའི་སྤྲིན་གྱི་མེ་ཏོག་རྨད་བྱུང་འཇོ་བའི་ངོ་མཚར་ཁུར། །ནོར་འཛིན་བུ་མོས་ཐེག་པར་དཀའ་བའི་དོགས་པས་རིང་དུ་འདར་བ་བཞིན། །གང་ན་རིན་ཆེན་སྣ་ཚོགས་ཕ་གུས་རྣམ་པར་བརྩེགས་པའི་གཞལ་ཡས་ཁང༌། །འཆི་མེད་གྲུབ་པའི་གྲོང་ཁྱེར་ལས་ལྷག་བྱང་ཆུབ་ཕྱོགས་ཆོས་ཡོངས་རྫོགས་དབུས། །མདངས་ལྡན་གཞོན་ནུའི་རོལ་སྒེག་གིས་བསྟེན་ནོར་བུའི་བ་གམ་གཡོ་བའི་ཁྲིར། །ལོ་འདབ་གོས་བཟང་མངོན་པར་འཛིན་པའི་ཆུ་སྐྱེས་སར་པའི་འཛུམ་ཕྲེང་གིས། །ཐིག་ལེ་མཆོག་མའི་ལང་ཚོ་སྨ་དབབ་ལྟ་ན་སྡུག་དེའི་དཔལ་འཕྲོག་ཕྱིར། །པདྨའི་རྩ་ལག་ཀུནྡཱའི་བཤེས་ཟུང་དོ་ཟླར་ལྷགས་པའི་དེ་མ་ཐག །གང་གི་ཞལ་བཟང་ལྟ་བས་མི་ངོམས་འོད་ཟེར་བརྒྱ་ཕྲག་གཡོ་བའི་དཔལ། །ཆ་ཤས་ཙམ་ཡང་བཟོད་པར་མ་ནུས་ཞབས་མཐིལ་འཁོར་ལོར་ཡིབས་པ་བཞིན། །བྱེ་རུའི་ལྷུན་པོ་ཉི་གཞོན་འཆར་ཀའི་དྲྭ་བས་མཛེས་པའི་ལང་ཚོ་ལྟར། །ཀུན་ཏུ་རབ་དམར་གཟུགས་སྐུའི་དཀྱིལ་འཁོར་མཐོང་ན་མི་མཐུན་བྲལ་བ་དེར། །མཚན་དཔེའི་འཇོ་སྒེགས་གསར་པས་འཁྱུད་གྱུར་འོད་ཟེར་དཔག་མེད་ཕྲེང་བ་ཡིས། །ཕྱོགས་བཅུའི་ཁྱོན་ཀུན་ཡོངས་སུ་རབ་འགེངས་སྒྲིབ་པའི་མུན་པ་རྣམ་པར་བཅོམ། །ཐལ་མོའིཨུཏྤལ་དམར་པོ་ཕན་ཚུན་མཉམ་བཞག་གིས་སྦྲེལ་ཆུ་སྐྱེས་སྦུབས། །སྣ་ཚོགས་དར་གྱི་ལོ་འདབ་རབ་གཡོ་པདྨ་རཱ་གའི་ཀ་ལ་ཤ །སྲིད་ཞིའི་བཅུད་བསྡུས་འཆི་མེད་ཆུ་གཏེར་རིང་འཚོའི་ཟླ་ཤེལ་འཛུམ་དཀར་ཅན། །འགྲོ་ཀུན་ཚེ་ཡི་ཀུ་མུ་དཱ་དཔལ་ཡིད་འོང་དབྱེ་བའི་བྱེད་པོར་གྲུབ། །ཞལ་གྱི་དཀྱིལ་འཁོར་བནྡྷུ་ཛཱི་བའི་འདབ་བརྒྱ་དགོད་པའི་སྤྱན་རས་ཟུང༌། ཀུན་ནས་དཀྱུས་རིང་རྟག་ཏུ་འགྲོ་ལ་རྗེས་སུ་ཆགས་པའི་རོལ་སྒེག་ཅན། །དབུ་སྐྱེས་མཐོན་མཐིང་ཨུཏྤལ་གཞོན་ནུ་སྣ་ཚོགས་རིན་ཆེན་དྲྭ་བ་ཡིས། །རྣམ་པར་བཅིངས་བྱས་རལ་པའི་གདེངས་ཀ་དགོས་འབྱུང་ནོར་བུའི་རྒྱན་གྱིས་སྦུད། །དབང་པོའི་གཞུ་ལྟར་ཁ་དོག་ཡིད་འོང་ལྕིད་ཀྱིས་ནོན་སྤངས་རེག་བྱ་ཡི། །སྟོད་གཡོགས་སྨད་དཀྲིས་མཛེས་པར་འཆར་ཞིང་དོ་ཤལ་དཔུང་རྒྱན་གདུ་བུ་སོགས། །རིན་ཐང་བྲལ་བའི་རཏྣའི་རྒྱན་དང་མེ་ཏོག་ཕྲེང་བའི་ཚངས་སྐུད་རྣམས། །བྱང་ཆུབ་ཡན་ལག་བདུན་གྱི་མཚོན་བྱེད་གང་སྐུའི་གསང་བར་ཡོངས་སུ་འཛིན། །དེ་ནི་མཐའ་གཅིག་ཁོ་ན་ཉིད་མོད་གཞན་དུ་ཚོགས་གཉིས་ཆུ་གཏེར་ཆེ། །བསྐལ་པར་གོམས་པའི་མནྡཱ་རས་བསྲུབས་ཟག་བྲལ་ཟླ་བའི་ལང་ཚོ་ལ། །སྐྱེ་དང་འབྲེ་སོགས་དོན་ལ་མེད་ཀྱང་སྣང་ཚུལ་རྣམ་མང་སྤྲུལ་པའི་གར། །ཉན་རང་སོ་སྐྱེའི་བློ་ལས་འདས་དེར་རབ་གུས་ཀུ་མུད་འཛུམ་ཕྲེང་དགོད། །གསུང་གི་གསང་བ་མཆོག་ཏུ་མི་འགྱུར་སྒྲ་དང་སྒྲ་མིན་རྣམ་དཔྱད་ལས། །ཡོངས་སུ་བརྒལ་ཡང་ཐ་དད་རྟོག་པའི་རྗེས་སུ་འགྲོ་བའི་ནཱ་དའི་དབྱངས། །ཡན་ལག་དྲུག་ཅུའི་འཇོ་སྒེག་གིས་འཁྱུད་བདེན་གཉིས་ཆོས་ཚུལ་རྒྱ་མཚོ་ཡིས། །ཐར་པ་མཆོག་གི་གོ་འཕང་ལ་སྦྱོར་འབྲས་བུའི་ཁུར་གྱིས་ལྕི་ལ་འདུད། །རྟག་ཆད་གདོན་དང་མཛའ་བ་མ་ཡིན་སྤྲོས་མ་ཀུན་བྲལ་དེ་བཞིན་ཉིད། །གཅིག་པུ་ཉིད་མིན་དུ་མ་ལས་འདས་བསམ་གྱིས་མི་ཁྱབ་ཡེ་ཤེས་ནི། །སོ་སོ་ཡང་དག་རིག་པའི་རང་བཞིན་ཇི་ལྟ་ཇི་སྙེད་མཁྱེན་དང་བརྩེའི། །ཐུགས་རྗེའི་རྣམ་རོལ་བྲི་གང་མེད་པར་ལྷུན་གྱིས་གྲུབ་པ་མཆོག་ལ་འདུད། །ཕྱོགས་བཅུའི་ཞིང་བཞུགས་གངྒཱའི་བྱེ་སྙེད་དེ་བཞིན་གཤེགས་པའི་ཚོགས་རྣམས་ཀྱང༌། །ཁྱོད་ཀྱི་སྤངས་རྟོགས་རྗེས་སུ་བསྔགས་པའི་རོལ་མོ་རྣམ་པར་འཁྲོལ་བ་དང༌། །མིག་མི་འཛུམ་དང་གསང་བ་འཛིན་སོགས་བྱང་ཆུབ་སེམས་དཔའི་ཁྱུ་མཆོག་གིས། །སྤྱི་བོས་ཞབས་མཐིལ་འཁོར་ལོ་ལ་བཏུད་ཡོན་ཏན་དཔག་ཡས་དེ་ལ་འདུད། །འདི་ན་སྣ་ཚོགས་ལས་ཀྱི་ཕྱི་བཞིན་རྣམ་པར་འཁྱམས་པའི་འགྲོ་ཀུན། །སྒྲིབ་གཉིས་ཉོན་མོངས་ལིང་ཏོག་གིས་ལྡོང་ཐར་པའི་ལམ་ལས་ཕྱིར་ཕྱོགས་པར། །བརྩེ་ཆེན་ཐུགས་རྗེའི་ཞགས་པས་འཛིན་ཕྱིར་སྣ་ཚོགས་སྤྲུལ་པའི་ཟློས་གར་ནི། །སེམས་ཅན་ཁམས་དང་མཐུན་པར་འཇུག་པའི་ཕྲིན་ལས་མཆོག་མངའ་ཁྱོད་ལ་འདུད། །དེ་ལྟར་གསེར་གྱི་མངལ་ཅན་བློས་ཀྱང་གཞལ་བར་མི་ནུས་ཡོན་ཏན་ཕུལ། །ཟླ་བས་འཕེལ་བའི་གཏིང་ལས་རབ་ཟབ་ཀུན་གསལ་ཁམས་ལས་རྒྱ་ཆེ་བའི། །རྣམ་པར་ཐར་པ་སོ་སྐྱེའི་ཡིད་ངོར་ཆ་ཤས་ཕྲ་བའང་མི་མཐོང་མོད། །འདིར་ནི་རྟག་ཏུ་དད་པའི་དབང་གྱུར་བསྟོད་ཚིག་རོལ་མོ་གསར་པས་མཆོད། །སྙན་པའི་སྒྲ་དབྱངས་དྲི་བཞོན་དགའ་མ་དལ་བུར་གཡོ་བའི་འཇོ་སྒེག་གིས། །ཀུན་ནས་མཁྱེན་པའི་ཡེ་ཤེས་ཆེ་ལྡན་ཐུགས་རྗེའི་སྤྲིན་དཀར་ལ་འཁྱུད་པས། །རྗེས་སུ་བརྩེ་བའི་སྙིང་རྗེའི་དབང་གྱུར་གློག་ཕྲེང་དོ་ཤལ་གཡོ་བ་དང༌། །ལྷན་ཅིག་བདག་བློའི་ཆུ་སྐྱེས་མཛེས་པར་ཕན་བདེའི་བདུད་རྩིས་བརླན་གྱུར་ཅིག །གནས་སྐབས་གང་མཚན་དཔལ་གྱི་དུམ་བུའི་བསིལ་ངད་ལས་ལྷག་ཟླ་གཞོན་ཟེར། །བརྒྱད་གཉིས་འཇིག་པའི་ཚ་གདུང་གིས་ཉེན་ས་ཡི་གདུ་བུ་ལ་རྩེན་པས། །མི་མཐུན་ཚོགས་ཀུན་ཡོངས་སུ་བཅོམ་སྟེ་མཐོ་རིས་ཡོན་ཏན་བདུན་ལ་སོགས། །ལེགས་ཚོགས་འདབ་མའི་འཛུམ་ཕྲེང་གྲོལ་བས་ཀུན་ཡིད་དགའ་བ་སྦྱིན་གྱུར་ཅིག །ཁྱད་པར་སྲིད་དང་ཞི་བར་ཡོངས་ཁྱབ་རིང་འཚོའི་ཆུ་གཏེར་འཕྱུར་བ་ཉིད། །ཁྱོད་སྐུའི་འོད་ཟེར་རྣམ་པར་གཡོ་བའི་མནྡཱ་ར་ཡིས་བསྲུབས་པ་ལས། །ཕུན་ཚོགས་བདུད་རྩིའི་སྣང་བས་རབ་མཛེས་འཆི་མེད་གྲུབ་པའི་ཀར་པཱུར་དབང༌། །རབ་ཏུ་གུས་པས་བསྟོད་པ་ལྷུར་ལེན་སྐལ་བཟང་བདེ་འབྱུང་རལ་རྩེར་སྩོལ། །དེ་མཐུས་འཚོ་བའི་འཁྲི་ཤིང་ཡིད་འོང་གཡོ་མེད་གཅིག་ཏུ་བཙུགས་པའི་མོད། །མི་བགྲེས་ལང་ཚོའི་མེ་ཏོག་འཛུམ་དཀར་ཐར་པ་ཉིན་མོའི་ཕྱོགས་སུ་གྲོལ། །ལུང་རྟོགས་འབྲས་བཟང་ཁུར་གྱིས་རབ་དུད་ལྷ་དང་བཅས་པའི་འགྲོ་ཀུན་ལ། །དགའ་དང་གཏན་བདེའི་ནོར་གྱིས་ཚིམ་བྱེད་ཡོན་ཏན་མཆོག་གིས་ལྕི་བར་ཤོག །གང་སྐུ་ཡིད་འོང་མཚན་དཔེའི་རླབས་ཕྲེང་ལྟ་ན་སྡུག་པའི་ཞིང་ཁམས་གཅས། །རྟག་ཏུ་གསལ་བཏབ་གསང་སྔགས་མཆོག་བཟླས་ཟབ་མོའི་ཏིང་འཛིན་ལ་གཞོལ་ཚེ། །དཔག་མེད་འདྲེན་པ་ཀུན་གྱི་འཁོར་བཅས་བྱེ་རུའི་ཞལ་བཟང་གཡོ་བའི་རྡུལ། །མངོན་སུམ་མིག་གི་བདུད་རྩིར་བཏུང་བས་དོན་གཉིས་ལང་ཚོ་རྒྱས་གྱུར་ཅིག །གཞན་ཡང་ཐོས་བསམ་སྒོམ་པའི་ཆུ་གཏེར་རླབས་ཆེན་འཕྱུར་བ་ལས་ཐོན་པའི། །རྩོད་འཆད་རྩོམ་སོགས་ལུང་རྟོགས་ཆོས་ཚུལ་འོད་ཟེར་འབུམ་ཕྲག་བཞུ་བའི་རྡུལ། །འཁོར་ལོ་གསུམ་ལྡན་དགེ་འདུན་འདུས་པའི་བློ་མཆོག་སྤོབས་པས་བཟུང་བ་ལས། །རྒྱལ་བསྟན་རིན་ཆེན་པདྨའི་དགའ་ཚལ་དར་བབས་གཡོ་བའི་རྒྱུར་གྱུར་ཅིག །ཤིན་ཏུ་དབེན་པའི་ནགས་ཀྱི་སྐྱིལ་པོར་ཀུ་ཤ་འཇམ་པོའི་གདན་གྱི་སྟེང༌། །དག་བྱེད་ཁྲུས་བཏུང་དཀའ་ཐུབ་ལ་གནས་དྲང་སྲོང་ཆེན་པོའི་ངང་ཚུལ་ལྟར། །གཅིག་ཏུ་ངེས་འབྱུང་སེམས་ཀྱིས་རབ་བསྐུལ་ཐར་པ་དོན་དུ་གཉེར་རྣམས་ཀྱི། །སྦྱངས་པའི་ཡོན་ཏན་ཆ་ཤས་ཀུན་གང་ངེས་ལེགས་ཐེམ་སྐས་ལ་འཛེག་ཤོག །ནམ་ཞིག་བདག་གཞན་འདིར་སྣང་རྫོགས་ཏེ་སྲོག་གི་དབང་པོ་སྡུད་པའི་ཚེ། །མགོན་པོ་གང་གིས་དགྱེས་པའི་ཕྱག་གིས་འཁོར་བའི་གཡང་ས་ལས་དྲངས་ཏེ། །ཡོན་ཏན་བཀོད་པ་གཞལ་གྱིས་མི་ལོང་དག་པའི་ཞིང་དེར་པདྨོའི་སྦུབས། །མཚན་དཔེའི་ལུས་མཆོག་རྣམ་པར་འཛིན་ནས་ཁྱོད་ཞབས་རྟག་ཏུ་བསྙེན་པར་ཤོག །དེ་ལྟར་བསྟོད་བསྔགས་འོད་ཟེར་ཕྲེང་ལྡན་ཟླ་ཤེལ་མྱུ་གུ་གསར་པའི་གཟུགས། །ཤིན་ཏུ་གུས་པའི་བདེ་འབྱུང་རལ་རྩེར་བྲལ་ཐོབ་སྤངས་པར་སོན་པ་ལས། །ཚེ་བསོད་དཔལ་འབྱོར་ཀུ་མུད་འཛུམ་དཀར་ཡིད་འོང་བྱེ་བའི་དེ་མ་ཐག །རྣམ་པ་ཐམས་ཅད་མཁྱེན་པའི་གེ་སར་རྟག་ཏུ་ལྕི་བ་ཐོབ་པར་འགྱུར། །དེ་ལྟར་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་པོ་ལ་བསྟོད་པའི་རབ་ཏུ་བྱེད་པ་འཆི་མེད་ཟླ་གཞོན་གསར་པའི་རོལ་མོ་ཞེས་བྱ་བ་འདི་ནི། བདེ་བ་ཅན་གྱི་ཞིང་གི་བཀོད་པ་རྟེན་དང་བརྟེན་པར་བཅས་པ་དང་མཐུན་ཞིང་མངོན་རྟོགས་དག་གི་དོན་དང་ཡང་མི་འགལ་བར་གཞོན་ནུ་ཨ་བྷ་ཡས་རང་ལོ་བཅོ་བརྒྱད་པར་བྲྀ་ཥ་བྷ་ཞེས་ཁྱུ་མཆོག་ཟླ་བའི་དགའ་བ་གཉིས་པའི་གྲལ་ཚེས་དགེ་བར་ཡོངས་སུ་འགྲུབ་པར་བགྱིས་པའི་དགེ་བས་གནས་སྐབས་ལུས་ཅན་ཐམས་ཅད་སྡུག་བསྔལ་གསུམ་གྱི་ཆུ་གཏེར་ལས་བསྒྲལ་ནས་མཐར་ཐུག་ཐམས་ཅད་མཁྱེན་པའི་གྲོང་ཁྱེར་དུ་དབུགས་འབྱིན་ཐོབ་པའི་རྒྱུར་གྱུར་ཅིག། །།

[edit]

/bcom ldan 'das mgon po tshe dang ye shes dpag tu med pa la bstod pa 'chi med zla gzhon gsar pa'i rol mo zhes bya ba bzhugs so//______rgya gar skad du/__ta thA ga tA pa ri mi tA yur+dz+nyA na su bi nish+tsit+ta te dzo rA dz+nye sto traM nA ma/__/bod skad du/__/de bzhin gshegs pa tshe dang ye shes dpag tu med pa shin tu rnam par nges pa gzi brjid kyi rgyal po la bstod pa zhes bya ba/__/'phags pa 'jam dpal gzhon nur gyur pa la phyag 'tshal lo/__/zag med ye shes dam pa'i snod gyur ngo mtshar mtshan dpe'i 'jo sgeg can/__/gdul bya'i dbang por 'tshams par 'jug pa'i gsung gsang brjod bral nA da'i dbyangs/__/spros pa'i mtha' dang mdza' ba ma yin rnam pa kun gyi mchog ldan thugs/__/mi zad rgyan gyi 'khor lor dgyes rol bde ldan zhing gtso tshe mtha' yas/__/gang mtshan nor bu'i do shal g.yo ba lus can bsod nams rna lung du/__/dpyangs pa tsam gyis sdug bsngal gsum gyi mya ngan grong las dbugs 'byin nas/__/'chi med tshe dang ye shes mchog gi 'dod don ci dgar 'jo ba yis/__/re ba'i shing rta phyur bur 'gengs phyir su zhig rab tu bstod mi byed/__/chos kyi 'byung gnas rnam dag bden smon sprin dkar me tog 'jo ba las/__/gnas ngan len gyi rdul dang mi mdza' bye ba khrag khrig brgya stong phrag__/brgyad cu rtsa gcig sangs rgyas zhing bkod yod tan gcig bsdoms za ma tog__/dag pa rab 'byams dga' tshal dam par phul byung bsngags 'os brjod mi long*/__/shin tu gzhon sha chags pa'i lag mthil dzam+bu nA das mdangs pa'i dbyig__/gang gi gzhir chags ut+pal gyis bsrungs mnan nem bteg 'phar sa 'dzin ngos/__/yan lag brgyad ldan ca co rnam spangs zhi bsil bden gnyis chos kyi sgras/__/kun rmongs ma rig gnyid las sad mdzad bde 'thung chu gter g.yo ba'i 'gram/__/bai DUr+Ya dang in+d+ra nI la shel dang ma rgad la sogs pa'i/__/rin chen sna tshogs man+dA ra ba yid 'ong g.yo ba'i bar bar nas/__/gser gyi dra bas rnam par sbrel gyur dri bzhon pho nyas bskul ba las/__/mnyan par 'os pa'i sgra dbyangs zad med chog mi shes par kun tu sgrogs/__/de dag rnams kyi yal 'dab gzhon nus bsti stang byas pa'i do ker rtser/__/shin tu rab sgeg ngang tshul zhi zhing phan tshun rtse ba'i sha ku+u naH__/gtsug phud mdangs can ma rgad gshog ldan mgrin pa'i rdza rnga 'khrol la sogs/__/sna tshogs shing rta'i glu dbyangs las lhag rab snyan rol mos yongs su bkang*/__/de na thun mtshams mnga' ba ma yin khor yug 'od snang phreng bas gtams/__/mchog tu mdzes pa'i dga' tshal las byung 'dod pa'i yon tan gzhal dka' ba/__/gzhal 'phrul dbang byed bkod pas mi bsgrun phun sum tshogs pa'i bde ba cher/__/ngoms pa med par longs su spyod phyir mtshan gyi spring yig rnam par gsal/__/mdor na kun mkhyen ye shes kyis sbyangs dag pa'i rdul bral spyan rnon pos/__/phyogs bcu'i zhing khams rgya mtshor btsal kyang mtshungs zlas dben par rab gzigs nas/__/mchog tu bsngags pa'i sprin gyi me tog rmad byung 'jo ba'i ngo mtshar khur/__/nor 'dzin bu mos theg par dka' ba'i dogs pas ring du 'dar ba bzhin/__/gang na rin chen sna tshogs pha gus rnam par brtsegs pa'i gzhal yas khang*/__/'chi med grub pa'i grong khyer las lhag byang chub phyogs chos yongs rdzogs dbus/__/mdangs ldan gzhon nu'i rol sgeg gis bsten nor bu'i ba gam g.yo ba'i khrir/__/lo 'dab gos bzang mngon par 'dzin pa'i chu skyes sar pa'i 'dzum phreng gis/__/thig le mchog ma'i lang tsho sma dbab lta na sdug de'i dpal 'phrog phyir/__/pad+ma'i rtsa lag kun+dA'i bshes zung do zlar lhags pa'i de ma thag__/gang gi zhal bzang lta bas mi ngoms 'od zer brgya phrag g.yo ba'i dpal/__/cha shas tsam yang bzod par ma nus zhabs mthil 'khor lor yibs pa bzhin/__/bye ru'i lhun po nyi gzhon 'char ka'i drwa bas mdzes pa'i lang tsho ltar/__/kun tu rab dmar gzugs sku'i dkyil 'khor mthong na mi mthun bral ba der/__/mtshan dpe'i 'jo sgegs gsar pas 'khyud gyur 'od zer dpag med phreng ba yis/__/phyogs bcu'i khyon kun yongs su rab 'gengs sgrib pa'i mun pa rnam par bcom/__/thal mo'i.ut+pal dmar po phan tshun mnyam bzhag gis sbrel chu skyes sbubs/__/sna tshogs dar gyi lo 'dab rab g.yo pad+ma rA ga'i ka la sha__/srid zhi'i bcud bsdus 'chi med chu gter ring 'tsho'i zla shel 'dzum dkar can/__/'gro kun tshe yi ku mu dA dpal yid 'ong dbye ba'i byed por grub/__/zhal gyi dkyil 'khor ban+d+hu dzI ba'i 'dab brgya dgod pa'i spyan ras zung*/__kun nas dkyus ring rtag tu 'gro la rjes su chags pa'i rol sgeg can/__/dbu skyes mthon mthing ut+pal gzhon nu sna tshogs rin chen drwa ba yis/__/rnam par bcings byas ral pa'i gdengs ka dgos 'byung nor bu'i rgyan gyis sbud/__/dbang po'i gzhu ltar kha dog yid 'ong lcid kyis non spangs reg bya yi/__/stod g.yogs smad dkris mdzes par 'char zhing do shal dpung rgyan gdu bu sogs/__/rin thang bral ba'i rat+na'i rgyan dang me tog phreng ba'i tshangs skud rnams/__/byang chub yan lag bdun gyi mtshon byed gang sku'i gsang bar yongs su 'dzin/__/de ni mtha' gcig kho na nyid mod gzhan du tshogs gnyis chu gter che/__/bskal par goms pa'i man+dA ras bsrubs zag bral zla ba'i lang tsho la/__/skye dang 'bre sogs don la med kyang snang tshul rnam mang sprul pa'i gar/__/nyan rang so skye'i blo las 'das der rab gus ku mud 'dzum phreng dgod/__/gsung gi gsang ba mchog tu mi 'gyur sgra dang sgra min rnam dpyad las/__/yongs su brgal yang tha dad rtog pa'i rjes su 'gro ba'i nA da'i dbyangs/__/yan lag drug cu'i 'jo sgeg gis 'khyud bden gnyis chos tshul rgya mtsho yis/__/thar pa mchog gi go 'phang la sbyor 'bras bu'i khur gyis lci la 'dud/__/rtag chad gdon dang mdza' ba ma yin spros ma kun bral de bzhin nyid/__/gcig pu nyid min du ma las 'das bsam gyis mi khyab ye shes ni/__/so so yang dag rig pa'i rang bzhin ji lta ji snyed mkhyen dang brtse'i/__/thugs rje'i rnam rol bri gang med par lhun gyis grub pa mchog la 'dud/__/phyogs bcu'i zhing bzhugs gang+gA'i bye snyed de bzhin gshegs pa'i tshogs rnams kyang*/__/khyod kyi spangs rtogs rjes su bsngags pa'i rol mo rnam par 'khrol ba dang*/__/mig mi 'dzum dang gsang ba 'dzin sogs byang chub sems dpa'i khyu mchog gis/__/spyi bos zhabs mthil 'khor lo la btud yon tan dpag yas de la 'dud/__/'di na sna tshogs las kyi phyi bzhin rnam par 'khyams pa'i 'gro kun/__/sgrib gnyis nyon mongs ling tog gis ldong thar pa'i lam las phyir phyogs par/__/brtse chen thugs rje'i zhags pas 'dzin phyir sna tshogs sprul pa'i zlos gar ni/__/sems can khams dang mthun par 'jug pa'i phrin las mchog mnga' khyod la 'dud/__/de ltar gser gyi mngal can blos kyang gzhal bar mi nus yon tan phul/__/zla bas 'phel ba'i gting las rab zab kun gsal khams las rgya che ba'i/__/rnam par thar pa so skye'i yid ngor cha shas phra ba'ang mi mthong mod/__/'dir ni rtag tu dad pa'i dbang gyur bstod tshig rol mo gsar pas mchod/__/snyan pa'i sgra dbyangs dri bzhon dga' ma dal bur g.yo ba'i 'jo sgeg gis/__/kun nas mkhyen pa'i ye shes che ldan thugs rje'i sprin dkar la 'khyud pas/__/rjes su brtse ba'i snying rje'i dbang gyur glog phreng do shal g.yo ba dang*/__/lhan cig bdag blo'i chu skyes mdzes par phan bde'i bdud rtsis brlan gyur cig__/gnas skabs gang mtshan dpal gyi dum bu'i bsil ngad las lhag zla gzhon zer/__/brgyad gnyis 'jig pa'i tsha gdung gis nyen sa yi gdu bu la rtsen pas/__/mi mthun tshogs kun yongs su bcom ste mtho ris yon tan bdun la sogs/__/legs tshogs 'dab ma'i 'dzum phreng grol bas kun yid dga' ba sbyin gyur cig__/khyad par srid dang zhi bar yongs khyab ring 'tsho'i chu gter 'phyur ba nyid/__/khyod sku'i 'od zer rnam par g.yo ba'i man+dA ra yis bsrubs pa las/__/phun tshogs bdud rtsi'i snang bas rab mdzes 'chi med grub pa'i kar pUr dbang*/__/rab tu gus pas bstod pa lhur len skal bzang bde 'byung ral rtser stsol/__/de mthus 'tsho ba'i 'khri shing yid 'ong g.yo med gcig tu btsugs pa'i mod/__/mi bgres lang tsho'i me tog 'dzum dkar thar pa nyin mo'i phyogs su grol/__/lung rtogs 'bras bzang khur gyis rab dud lha dang bcas pa'i 'gro kun la/__/dga' dang gtan bde'i nor gyis tshim byed yon tan mchog gis lci bar shog__/gang sku yid 'ong mtshan dpe'i rlabs phreng lta na sdug pa'i zhing khams gcas/__/rtag tu gsal btab gsang sngags mchog bzlas zab mo'i ting 'dzin la gzhol tshe/__/dpag med 'dren pa kun gyi 'khor bcas bye ru'i zhal bzang g.yo ba'i rdul/__/mngon sum mig gi bdud rtsir btung bas don gnyis lang tsho rgyas gyur cig__/gzhan yang thos bsam sgom pa'i chu gter rlabs chen 'phyur ba las thon pa'i/__/rtsod 'chad rtsom sogs lung rtogs chos tshul 'od zer 'bum phrag bzhu ba'i rdul/__/'khor lo gsum ldan dge 'dun 'dus pa'i blo mchog spobs pas bzung ba las/___/rgyal bstan rin chen pad+ma'i dga' tshal dar babs g.yo ba'i rgyur gyur cig__/shin tu dben pa'i nags kyi skyil por ku sha 'jam po'i gdan gyi steng*/__/dag byed khrus btung dka' thub la gnas drang srong chen po'i ngang tshul ltar/__/gcig tu nges 'byung sems kyis rab bskul thar pa don du gnyer rnams kyi/__/sbyangs pa'i yon tan cha shas kun gang nges legs them skas la 'dzeg shog__/nam zhig bdag gzhan 'dir snang rdzogs te srog gi dbang po sdud pa'i tshe/__/mgon po gang gis dgyes pa'i phyag gis 'khor ba'i g.yang sa las drangs te/__/yon tan bkod pa gzhal gyis mi long dag pa'i zhing der pad+mo'i sbubs/__/mtshan dpe'i lus mchog rnam par 'dzin nas khyod zhabs rtag tu bsnyen par shog__/de ltar bstod bsngags 'od zer phreng ldan zla shel myu gu gsar pa'i gzugs/__/shin tu gus pa'i bde 'byung ral rtser bral thob spangs par son pa las/__/tshe bsod dpal 'byor ku mud 'dzum dkar yid 'ong bye ba'i de ma thag__/rnam pa thams cad mkhyen pa'i ge sar rtag tu lci ba thob par 'gyur/__/de ltar bcom ldan 'das mgon po tshe dang ye shes dpag tu med pa shin tu rnam par nges pa gzi brjid kyi rgyal po la bstod pa'i rab tu byed pa 'chi med zla gzhon gsar pa'i rol mo zhes bya ba 'di ni/__bde ba can gyi zhing gi bkod pa rten dang brten par bcas pa dang mthun zhing mngon rtogs dag gi don dang yang mi 'gal bar gzhon nu a b+ha yas rang lo bco brgyad par br-i Sha b+ha zhes khyu mchog zla ba'i dga' ba gnyis pa'i gral tshes dge bar yongs su 'grub par bgyis pa'i dge bas gnas skabs lus can thams cad sdug bsngal gsum gyi chu gter las bsgral nas mthar thug thams cad mkhyen pa'i grong khyer du dbugs 'byin thob pa'i rgyur gyur cig/__//