JKW-KABUM-23-'A-004-010

🚧 This website is under continued development. We appreciate your patience!

Previous Text Back to Volume PageNext Text

Wylie title	rgyun gyi dam bca' smon lam chen mo phan bde'i sa bon
Location	mkhyen brtse'i bka' 'bum Volume 23, sde tshan 4, Text 10, Pages 240-243 (Folios 8b3 to 10a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rgyun gyi dam bca' smon lam chen mo phan bde'i sa bon. In 'jam dbyangs mkhyen brtse'i dbang po'i bka' 'bum, Vol. 23: 240-243. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam
Colophon	ཅེས་པའང་ལུགས་གཉིས་ལ་དཔྱོད་པའི་བློ་གྲོས་ཡངས་ཤིང་། སྐྱེས་བུ་ཆེན་པོའི་ལམ་ལ་དམ་བཅའ་བརྟན་པ་དྲུང་དཔོན་ཚེ་རིང་དོན་གྲུབ་བམ། འཇམ་དབྱངས་གཞན་ཕན་ཉི་མས་རང་ཉིད་ཀྱིས་ཇི་ལྟར་ཞལ་གྱིས་བཞེས་པའི་གཡར་དམ་གྱི་གོ་ཆ་མཐར་ཕྱིན་པར་བྱ་བའི་སླད། བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་དཔལ་གདོང་ལོའི་དབྱུག་པ་ཟླ་བའི་དུས་ཆེན་ཡར་ཚེས་བཅོ་ལྔའི་སྔ་ཆར་བྲིས་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang lugs gnyis la dpyod pa'i blo gros yangs shing /__skyes bu chen po'i lam la dam bca' brtan pa drung dpon tshe ring don grub bam/__'jam dbyangs gzhan phan nyi mas rang nyid kyis ji ltar zhal gyis bzhes pa'i g.yar dam gyi go cha mthar phyin par bya ba'i slad/__bya bral chos rje 'jam dbyangs mkhyen brtse'i dbang pos dpal gdong lo'i dbyug pa zla ba'i dus chen yar tshes bco lnga'i snga char bris pa de de bzhin du 'grub par bla ma rgyal ba sras dang bcas pas byin gyis brlab tu gsol/__/sarba dA ka l+yA NaM b+ha ba tu/

Tibetan Text

Wylie

[edit]

རྒྱུན་གྱི་དམ་བཅའ་སྨོན་ལམ་ཆེན་མོ་ཕན་བདེའི་ས་བོན་ཞེས་བྱ་བ་བཞུགས་སོ། །བཀྲ་ཤིས་མཚན་གྱི་དབྱངས་སྙན་ཐོས་པས་ཀྱང་། །ཕུན་ཚོགས་སྲིད་ཞིའི་དགེ་ལེགས་སྦྱིན་མཛད་པ། །རྩ་བརྒྱུད་བླ་མ་དཀོན་མཆོག་རྣམ་གསུམ་སོགས། །སྐྱབས་གནས་རྒྱ་མཚོའི་ཚོགས་ལ་ཕྱག་འཚལ་ལོ། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་ལྟུང་བཤགས་ཤིང་བསྡམ། །འཕགས་དང་སོ་སྐྱེའི་དགེ་བར་རྗེས་ཡི་རངས། །ཟབ་རྒྱས་ཆོས་ཀྱི་འཁོར་ལོ་བསྐོར་བཞིན་དུ། །རྟག་པར་མྱ་ངན་མི་འདའ་བཞུགས་གསོལ་འདེབས། །དགེ་བ་འདིས་མཚོན་དུས་གསུམ་ལེགས་བྱས་ཚོགས། །འགྲོ་ཀུན་ཀུན་མཁྱེན་གོ་འཕང་ཐོབ་བྱའི་ཕྱིར། །བྱང་ཆུབ་སྙིང་པོར་ཡོངས་སུ་བསྔོ་བར་བགྱི། །བསོད་ནམས་གང་དེས་བདག་གཞན་ཡིད་ཅན་ཀུན། །དེང་ནས་བཟུང་སྟེ་ཚེ་རབས་ཐམས་ཅད་དུ། །འཁོར་ལོ་བཞི་དང་ལྡན་པའི་རྟེན་ཐོབ་ནས། །ཐེག་མཆོག་བཤེས་དང་ནམ་ཡང་མི་འབྲལ་ཤོག །མཉེས་པ་གསུམ་གྱིས་དམ་པའི་ཞབས་བསྟེན་ནས། །ཇི་ལྟར་ཁས་བླངས་ཚུལ་ཁྲིམས་རྣམ་པར་དག །མང་དུ་ཐོས་དང་བསམ་པའི་ཕ་རོལ་ཕྱིན། །རྩེ་གཅིག་ཟབ་མོའི་དོན་མཆོག་བསྒོམ་པར་ཤོག །དལ་འབྱོར་རྙེད་དཀའ་འཇིག་སླའི་ངང་ཚུལ་ཅན། །འཁོར་བའི་སྡུག་བསྔལ་དྲན་པའི་ངེས་འབྱུང་གིས། །དགེ་སྡིག་བླང་དོར་ཚུལ་བཞིན་ལེགས་སྤྱོད་པའི། །སྔོན་འགྲོ་རྟེན་གྱི་ཆོས་ལ་བློ་འབྱོངས་ཤོག །གཟུང་བའི་ཆོས་ཀུན་རྨི་ལམ་ལྟ་བུར་རྟོགས། །འཛིན་པའི་ཤེས་པ་མ་སྐྱེས་རིག་པའི་གཤིས། །སྤྲོས་བྲལ་བློ་འདས་ངང་དུ་མཉམ་བཞག་པས། །བདེན་གཉིས་ཟུང་འཇུག་གནས་ལུགས་མངོན་གྱུར་ཤོག །བདག་གི་བདེ་དགེ་སེམས་ཅན་རྣམས་ལ་གཏོང་། །གཞན་གྱི་སྡུག་བསྔལ་ཀུན་འབྱུང་རང་ལ་བླངས། །རྣམ་པ་ཀུན་ཏུ་འགྲོ་ལ་ཕན་བརྩོན་པའི། །རླབས་ཆེན་བྱང་ཆུབ་སེམས་མཆོག་འབྱུང་བར་ཤོག །རྐྱེན་ངན་ཐམས་ཅད་བྱང་ཆུབ་ལམ་དུ་གྱུར། །ཚེ་གཅིག་ཉམས་ལེན་སྟོབས་ལྔའི་དམ་བཅའ་བརྟན། །བློ་སྦྱོང་ཚད་ཕྱིན་བསླབ་བྱ་དམ་ཚིག་རྣམས། །ནམ་ཡང་ཉམས་མེད་སྲོག་བཞིན་བསྲུང་ནུས་ཤོག །བསམས་བཞིན་གཞན་སྲོག་གཅོད་དང་མ་བྱིན་ལེན། །འདོད་པས་ལོག་གཡེམ་རྫུན་སྨྲ་སྤངས་པ་སྟེ། །ཡོངས་རྫོགས་དགེ་བསྙེན་སྡོམ་པའི་བསླབ་བྱ་རྣམས། །དགྲ་བཅོམ་འཕགས་པའི་རྗེས་སུ་སློབ་ནུས་ཤོག །སྡིག་ཟས་གཙོ་བོ་ཤ་ཁྲག་ལོངས་སྤྱོད་དང་། །མྱོས་བྱེད་ཆང་དང་ཐ་མ་ཁ་ལ་སོགས། །བག་མེད་རྩ་བར་གྱུར་བ་ཀུན་སྤངས་ནས། །རྟག་ཏུ་དྲན་ཤེས་བག་ཡོད་སྤྱོད་པར་ཤོག །རང་དོན་ཉི་ཚེའི་བསམ་པ་ལ་བརྟེན་པའི། །ལུས་ངག་སྦྱོར་བས་གཞན་ལ་གནོད་པ་དང་། །ཉེས་ཀུན་རྩ་བ་ངག་འཁྱལ་ཚིག་རྩུབ་སོགས། ཁ་ན་མ་ཐོའི་ཚོགས་ཀུན་སྤོང་ནུས་ཤོག །མདོར་ན་གཞན་ལ་དངོས་སུ་མ་ཕན་ཡང་། །རྣམ་པ་ཀུན་ཏུ་གནོད་པར་མི་འགྱུར་ཞིང་། །དགེ་བའི་རྩ་བ་ཅི་ནུས་བསྒྲུབ་པ་དང་། །སྡིག་པ་ཚབ་ཆེན་ནམ་ཡང་མི་བགྱིད་ཤོག །བསམ་པ་བྱང་ཆུབ་སེམས་མཆོག་རྣམ་པར་དག །སྦྱོར་བ་དམིགས་མེད་ཚོགས་གཉིས་ཟུང་འབྲེལ་སྤྱོད། །རྗེས་ཐོབ་ཡོངས་སུ་བསྔོ་བས་མཚམས་སྦྱར་ཏེ། །རང་གཞན་དོན་མཆོག་ལྷུན་གྱིས་གྲུབ་པར་ཤོག །རྩ་བརྒྱུད་བླ་མ་མཆོག་གསུམ་བྱིན་རླབས་དང་། །ཆོས་ཉིད་ཆོས་ཅན་རྒྱུ་འབྲས་བསླུ་མེད་མཐུས། །ཇི་ལྟར་སྨོན་པའི་གནས་ཀུན་ཡོངས་གྲུབ་ནས། །ཕན་བདེའི་དགེ་ལེགས་རྒྱས་པའི་བཀྲ་ཤིས་ཤོག །ཅེས་པའང་ལུགས་གཉིས་ལ་དཔྱོད་པའི་བློ་གྲོས་ཡངས་ཤིང་། སྐྱེས་བུ་ཆེན་པོའི་ལམ་ལ་དམ་བཅའ་བརྟན་པ་དྲུང་དཔོན་ཚེ་རིང་དོན་གྲུབ་བམ། འཇམ་དབྱངས་གཞན་ཕན་ཉི་མས་རང་ཉིད་ཀྱིས་ཇི་ལྟར་ཞལ་གྱིས་བཞེས་པའི་གཡར་དམ་གྱི་གོ་ཆ་མཐར་ཕྱིན་པར་བྱ་བའི་སླད། བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་དཔལ་གདོང་ལོའི་དབྱུག་པ་ཟླ་བའི་དུས་ཆེན་ཡར་ཚེས་བཅོ་ལྔའི་སྔ་ཆར་བྲིས་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

rgyun gyi dam bca' smon lam chen mo phan bde'i sa bon/ rgyun gyi dam bca' smon lam chen mo phan bde'i sa bon zhes bya ba bzhugs so/__/bkra shis mtshan gyi dbyangs snyan thos pas kyang /__/phun tshogs srid zhi'i dge legs sbyin mdzad pa/__/rtsa brgyud bla ma dkon mchog rnam gsum sogs/__/skyabs gnas rgya mtsho'i tshogs la phyag 'tshal lo/__/lus dang longs spyod kun bzang mchod sprin 'bul/__/tshe rabs bsags pa'i sdig ltung bshags shing bsdam/__/'phags dang so skye'i dge bar rjes yi rangs/__/zab rgyas chos kyi 'khor lo bskor bzhin du/__/rtag par mya ngan mi 'da' bzhugs gsol 'debs/__/dge ba 'dis mtshon dus gsum legs byas tshogs/__/'gro kun kun mkhyen go 'phang thob bya'i phyir/__/byang chub snying por yongs su bsngo bar bgyi/__/bsod nams gang des bdag gzhan yid can kun/__/deng nas bzung ste tshe rabs thams cad du/__/'khor lo bzhi dang ldan pa'i rten thob nas/__/theg mchog bshes dang nam yang mi 'bral shog__/mnyes pa gsum gyis dam pa'i zhabs bsten nas/__/ji ltar khas blangs tshul khrims rnam par dag__/mang du thos dang bsam pa'i pha rol phyin/_/rtse gcig zab mo'i don mchog bsgom par shog__/dal 'byor rnyed dka' 'jig sla'i ngang tshul can/__/'khor ba'i sdug bsngal dran pa'i nges 'byung gis/__/dge sdig blang dor tshul bzhin legs spyod pa'i/__/sngon 'gro rten gyi chos la blo 'byongs shog__/gzung ba'i chos kun rmi lam lta bur rtogs/__/'dzin pa'i shes pa ma skyes rig pa'i gshis/__/spros bral blo 'das ngang du mnyam bzhag pas/__/bden gnyis zung 'jug gnas lugs mngon gyur shog__/bdag gi bde dge sems can rnams la gtong /__/gzhan gyi sdug bsngal kun 'byung rang la blangs/__/rnam pa kun tu 'gro la phan brtson pa'i/__/rlabs chen byang chub sems mchog 'byung bar shog__/rkyen ngan thams cad byang chub lam du gyur/__/tshe gcig nyams len stobs lnga'i dam bca' brtan/__/blo sbyong tshad phyin bslab bya dam tshig rnams/__/nam yang nyams med srog bzhin bsrung nus shog__/bsams bzhin gzhan srog gcod dang ma byin len/__/'dod pas log g.yem rdzun smra spangs pa ste/__/yongs rdzogs dge bsnyen sdom pa'i bslab bya rnams/__/dgra bcom 'phags pa'i rjes su slob nus shog__/sdig zas gtso bo sha khrag longs spyod dang /__/myos byed chang dang tha ma kha la sogs/__/bag med rtsa bar gyur ba kun spangs nas/__/rtag tu dran shes bag yod spyod par shog__/rang don nyi tshe'i bsam pa la brten pa'i/__/lus ngag sbyor bas gzhan la gnod pa dang /__/nyes kun rtsa ba ngag 'khyal tshig rtsub sogs/__kha na ma tho'i tshogs kun spong nus shog__/mdor na gzhan la dngos su ma phan yang /__/rnam pa kun tu gnod par mi 'gyur zhing /__/dge ba'i rtsa ba ci nus bsgrub pa dang /__/sdig pa tshab chen nam yang mi bgyid shog__/bsam pa byang chub sems mchog rnam par dag__/sbyor ba dmigs med tshogs gnyis zung 'brel spyod/__/rjes thob yongs su bsngo bas mtshams sbyar te/__/rang gzhan don mchog lhun gyis grub par shog__/rtsa brgyud bla ma mchog gsum byin rlabs dang /__/chos nyid chos can rgyu 'bras bslu med mthus/__/ji ltar smon pa'i gnas kun yongs grub nas/__/phan bde'i dge legs rgyas pa'i bkra shis shog__/ces pa'ang lugs gnyis la dpyod pa'i blo gros yangs shing /__skyes bu chen po'i lam la dam bca' brtan pa drung dpon tshe ring don grub bam/__'jam dbyangs gzhan phan nyi mas rang nyid kyis ji ltar zhal gyis bzhes pa'i g.yar dam gyi go cha mthar phyin par bya ba'i slad/__bya bral chos rje 'jam dbyangs mkhyen brtse'i dbang pos dpal gdong lo'i dbyug pa zla ba'i dus chen yar tshes bco lnga'i snga char bris pa de de bzhin du 'grub par bla ma rgyal ba sras dang bcas pas byin gyis brlab tu gsol/__/sarba dA ka l+yA NaM b+ha ba tu//___//___!