JKW-KABUM-23-'A-003-001

🚧 This website is under continued development. We appreciate your patience!

First text in section. Back to Volume PageNext Text

Wylie title	spang blang gi bslab bya mdor bsdus pa'i gtam chos tshul bdud rtsi'i sprin char
Location	mkhyen brtse'i bka' 'bum Volume 23, sde tshan 3, Text 1, Pages 193-197 (Folios 1a to 3a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. spang blang gi bslab bya mdor bsdus pa'i gtam chos tshul bdud rtsi'i sprin char. In 'jam dbyangs mkhyen brtse'i dbang po'i bka' 'bum, Vol. 23: 193-197. Khams sde dge rdzong sar dgon: Rdzong sar blo gros phun tshogs, 2020.
Genre	Advice - zhal gdams
Colophon	།ཅེས་དབྱངས་ཨ་ངེས་པ་དང་། བོད་ཀྱི་ཡི་གེ་སུམ་ཅུ་ལ་ཨཱ་ལི་གསལ་བྱེད་བཞིས་བརྒྱན་པ་དང་སྤེལ་བས་རྗོད་བྱེད་བྱ་དཀའ་ཞིང་། བརྗོད་བྱ་བློ་གསལ་ཐར་འདོད་རྣམས་ཀྱི་སྤང་བླང་གི་བསླབ་བྱ་ཐམས་ཅད་མདོར་བསྡུས་ཏེ་མཚོན་པར་ནུས་པའི་གཏམ་གྱི་སྦྱོར་བ་ཉུང་ངུ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཀར་པོའི་གནམ་ལོ་གསར་དུ་འཆར་བའི་དཀར་ཕྱོགས་ཀྱི་རྒྱལ་བ་དང་པོའི་ཉིན་བྲིས་པ་དོན་དང་ལྡན་པར་གྱུར་ཅིག།
	ces dbyangs a nges pa dang /__bod kyi yi ge sum cu la A li gsal byed bzhis brgyan pa dang spel bas rjod byed bya dka' zhing /__brjod bya blo gsal thar 'dod rnams kyi spang blang gi bslab bya thams cad mdor bsdus te mtshon par nus pa'i gtam gyi sbyor ba nyung ngu 'di'ang 'jam dbyangs bla ma dgyes pa'i 'bangs mkhyen brtse'i dbang pos rab tshes dkar po'i gnam lo gsar du 'char ba'i dkar phyogs kyi rgyal ba dang po'i nyin bris pa don dang ldan par gyur cig

Tibetan Text

Wylie

[edit]

༄༅། །སྤང་བླང་གི་བསླབ་བྱ་མདོར་བསྡུས་པའི་གཏམ། ཆོས་ཚུལ་བདུད་རྩིའི་སྤྲིན་ཆར་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། དཔག་ཡས་རྒྱལ་བ་སྲས་བཅས་རྣམས་དང་བླ་མ་འཕགས་པ་འཇམ་དབྱངས་ལ། །མཁའ་ཁྱབ་བགྲང་ཡས་མ་རྣམས་དང་བཅས་བདག་ཅག་དད་པས་ཕྱག་བྱས་ནས། །གཞན་ཕན་ལ་ཆགས་ལྷག་བསམ་བཟང་ལྡན་ཁ་བ་པད་རྩ་ལྟར་དཀར་བས། །སྤང་བླང་གནས་འགའ་ཤས་ཙམ་བསྙད་གང་ཡང་དག་དགའ་བས་མཉན་བྱ་ལགས། །ཀི་སོགས་ངག་གི་ཅ་ཅོའི་ཚེར་མ་སྣ་ཚོགས་ཡིད་ཀྱི་རྣམ་གཡེང་དང་། །ཁུ་འཕང་ལྟ་བུའི་ལུས་ཀྱི་སྤྱོད་ལམ་གནས་ངན་ལེན་བཅས་ཀུན་བསལ་ནས། །གེ་སར་འབྲས་བུས་རྣམ་པར་བརྒྱན་པ་དྲང་སྲོང་དགྱེས་པའི་རི་ངོགས་སུ། །ངོ་མཚར་ཀློག་དང་སྤོང་བའི་བྱ་བས་དམ་པའི་རྗེས་སུ་སློབ་པར་མཛོད། །ཅི་ལྟར་ཁས་བླངས་ཚུལ་ཁྲིམས་རྣམ་དག་སོ་ཐར་བསླབ་གཞིའི་རྩ་བ་བརྟན། །ཆུ་སྐྱེས་ཇི་བཞིན་ཡིད་དུ་འོང་བའི་སྨོན་འཇུག་བྱང་སེམས་ཡལ་ག་རྒྱས། །ཇེ་ཞིག་མ་ཡིན་ཐ་མལ་དངོས་ཀུན་སྔགས་སུ་སྡོམ་པའི་འབྲས་བུས་དུད། །ཉོ་ཚོང་ལ་སོགས་བྱ་བ་ཀུན་སྤངས་འཕགས་བཞིའི་རིགས་སུ་བསྙེན་པར་མཛོད། །ཏི་ར་ཕྱུགས་ལྟ་བུར་བླང་དོར་གནས་ལ་རྨོངས་པའི་གཞན་དབང་རིང་བཅད་ཕྱིར། །ཐུ་མིའི་གཞུང་ལུགས་རྣམ་གཉིས་ནས་བཟུང་ཐུན་མོང་རིག་ལམ་ཇི་སྙེད་དང་། །དེ་བཞིན་གཤེགས་པས་ལེགས་པར་གསུངས་པའི་སྡེ་སྣོད་རྒྱུད་སྡེའི་ངེས་གསང་ཀུན། །ནོ་པི་སྒྲུབ་པ་ཀ་ཡི་ཆེད་དུ་བསླབས་པས་མཁས་པ་དགྱེས་པའི་དཔལ་ཐོབ་མཛོད། །པི་ཝཾ་སྙན་པའི་འགྱུར་བས་མི་མཚོན་གཞུང་ལུགས་རྒྱ་མཚོ་འཆད་ལ་དབང་། །ཕུ་ཆུ་ལྷུང་ལྷུང་དལ་འབབས་ཇི་བཞིན་འཛད་མེད་རྩོམ་ཕྲེང་མགྲིན་པར་བརྒྱན། །བེ་ཏ་པ་ཡི་ཡལ་ག་ལྟར་གཟེངས་ཕས་རྒོལ་སྟོང་གི་དམ་བཅའ་ཀུན། །རྨོངས་པ་མོ་ཧའི་ཤུལ་དུ་རྐང་པ་འགོད་བྱེད་རྩོད་ངག་སེང་གེའི་སྒྲ་སྒྲོགས་མཛོད། །ཙི་ཏྲ་ཀ་བཞིན་གདུང་བ་སྐྱེད་པའི་ཉེས་པ་ལྔ་པོ་བསལ་སླད་དང་། །ཚུ་རོལ་མཐོང་བས་ནམ་ཡང་མི་མཚོན་འཕགས་པའི་ཡེ་ཤེས་མངོན་བྱེད་ཕྱིར། །ཛེ་ཏའི་ཚལ་མཚུངས་ཞི་བའི་ནགས་སུ་སྤོང་བའི་འདུ་བྱེད་བརྒྱད་བསྟེན་པས། །ཝོ་ཆུ་ལྷ་ཛི་ཧྭས་ཀྱང་སྨྲ་བར་མི་ནུས་བསམ་གཏན་བདེ་བས་སིམ་པར་མཛོད། །ཞི་ལ་མ་ཆགས་སྲིད་མཐར་མི་གནས་བརྩེ་དང་རིག་པས་འཁོར་འདས་མཐའ། །ཟུ་ཆ་མཉམ་པའི་བརྡ་རྙིང་གུ་ལུགས་སུ་དབུ་མར་འཛུད་བྱེད་ཤེས་རབ་ཟབ་མོར་མི་ཕྱེད་པས། །འེ་ཞེས་སྙན་པའི་སྨྲ་བ་དང་བཅས་སྦྱིན་སོགས་ཕར་ཕྱིན་ཀུན་སྤྱོད་ཅིང་། །ཡོ་ག་ཆེན་པོའི་ལམ་མཆོག་ལ་བརྟེན་ཚེ་འདིར་ཟུང་འཇུག་ཐོབ་པར་མཛོད། །རི་དབང་ལྟར་བརྟན་བྱང་ཆུབ་སེམས་དང་ཤེས་རབ་སྙིང་རྗེའི་མཐུས་བསྐུལ་ཏེ། །ལུ་མའི་ཆུ་བཞིན་རྒྱུན་མི་འཆད་པར་གཞན་ཕན་སྙིང་སྟོབས་གོ་ཆ་བགོ །ཤེ་མུན་སྟུག་པོ་ཉམ་ངར་འཁྱམས་པའི་མ་རྣམས་ཐར་པའི་ལམ་བཟང་ལ། །སོ་སོར་འགོད་པའི་གཡར་དམ་བརྟན་པོས་སྲས་བཅས་རྒྱལ་བ་དགྱེས་པར་མཛོད། །ཧི་ཁ་བ་མའི་ཕུང་པོ་ཇི་བཞིན་རབ་དཀར་ཀུན་སློང་བཟང་པོས་གཞི་བཟུང་ནས། །ཨུ་ད་དྷི་ཆུ་འཛིན་ལྟར་སྙན་པའི་ངག་གིས་ཆོས་ཚུལ་བདུད་རྩིའི་ཆར་ཕབ་མཐུས། །ཀྱེ་ཧེ་ཞེས་ཚིག་གིས་བསྐུལ་བའི་མོད་ལ་འགྲོ་ཀུན་ཕན་བདེའི་ལམ་ཞུགས་ཏེ། སྨན། ཨོ་ཥ་དྷི་ལྟར་ཉོན་མོངས་ནད་སེལ་ཀུན་མཁྱེན་གོ་འཕང་མྱུར་ཐོབ་ཤོག །ཅེས་དབྱངས་ཨ་ངེས་པ་དང་། བོད་ཀྱི་ཡི་གེ་སུམ་ཅུ་ལ་ཨཱ་ལི་གསལ་བྱེད་བཞིས་བརྒྱན་པ་དང་སྤེལ་བས་རྗོད་བྱེད་བྱ་དཀའ་ཞིང་། བརྗོད་བྱ་བློ་གསལ་ཐར་འདོད་རྣམས་ཀྱི་སྤང་བླང་གི་བསླབ་བྱ་ཐམས་ཅད་མདོར་བསྡུས་ཏེ་མཚོན་པར་ནུས་པའི་གཏམ་གྱི་སྦྱོར་བ་ཉུང་ངུ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་དཀར་པོའི་གནམ་ལོ་གསར་དུ་འཆར་བའི་དཀར་ཕྱོགས་ཀྱི་རྒྱལ་བ་དང་པོའི་ཉིན་བྲིས་པ་དོན་དང་ལྡན་པར་གྱུར་ཅིག། །། ༈

[edit]

spang blang gi bslab bya mdor bsdus pa'i gtam chos tshul bdud rtsi'i sprin char/__ @#/_/spang blang gi bslab bya mdor bsdus pa'i gtam/__chos tshul bdud rtsi'i sprin char zhes bya ba bzhugs so/__/ oM swa sti sid+d+haM/__dpag yas rgyal ba sras bcas rnams dang bla ma 'phags pa 'jam dbyangs la/__/mkha' khyab bgrang yas ma rnams dang bcas bdag cag dad pas phyag byas nas/__/gzhan phan la chags lhag bsam bzang ldan kha ba pad rtsa ltar dkar bas/__/spang blang gnas 'ga' shas tsam bsnyad gang yang dag dga' bas mnyan bya lags/__/ki sogs ngag gi ca co'i tsher ma sna tshogs yid kyi rnam g.yeng dang /__/khu 'phang lta bu'i lus kyi spyod lam gnas ngan len bcas kun bsal nas/__/ge sar 'bras bus rnam par brgyan pa drang srong dgyes pa'i ri ngogs su/__/ngo mtshar klog dang spong ba'i bya bas dam pa'i rjes su slob par mdzod/__/ci ltar khas blangs tshul khrims rnam dag so thar bslab gzhi'i rtsa ba brtan/__/chu skyes ji bzhin yid du 'ong ba'i smon 'jug byang sems yal ga rgyas/__/je zhig ma yin tha mal dngos kun sngags su sdom pa'i 'bras bus dud/__/nyo tshong la sogs bya ba kun spangs 'phags bzhi'i rigs su bsnyen par mdzod/__/ti ra phyugs lta bur blang dor gnas la rmongs pa'i gzhan dbang ring bcad phyir/__/thu mi'i gzhung lugs rnam gnyis nas bzung thun mong rig lam ji snyed dang /__/de bzhin gshegs pas legs par gsungs pa'i sde snod rgyud sde'i nges gsang kun/__/no pi sgrub pa ka yi ched du bslabs pas mkhas pa dgyes pa'i dpal thob mdzod/__/pi waM snyan pa'i 'gyur bas mi mtshon gzhung lugs rgya mtsho 'chad la dbang /__/phu chu lhung lhung dal 'babs ji bzhin 'dzad med rtsom phreng mgrin par brgyan/__/be ta pa yi yal ga ltar gzengs phas rgol stong gi dam bca' kun/__/rmongs pa mo ha'i shul du rkang pa 'god byed rtsod ngag seng ge'i sgra sgrogs mdzod/__/tsi tra ka bzhin gdung ba skyed pa'i nyes pa lnga po bsal slad dang /__/tshu rol mthong bas nam yang mi mtshon 'phags pa'i ye shes mngon byed phyir/__/dze ta'i tshal mtshungs zhi ba'i nags su spong ba'i 'du byed brgyad bsten pas/__/wo chu lha dzi hwas kyang smra bar mi nus bsam gtan bde bas sim par mdzod/__/zhi la ma chags srid mthar mi gnas brtse dang rig pas 'khor 'das mtha'/__/zu cha mnyam pa'i brda rnying gu lugs su dbu mar 'dzud byed shes rab zab mor mi phyed pas/__/'e zhes snyan pa'i smra ba dang bcas sbyin sogs phar phyin kun spyod cing /__/yo ga chen po'i lam mchog la brten tshe 'dir zung 'jug thob par mdzod/__/ri dbang ltar brtan byang chub sems dang shes rab snying rje'i mthus bskul te/__/lu ma'i chu bzhin rgyun mi 'chad par gzhan phan snying stobs go cha bgo__/she mun stug po nyam ngar 'khyams pa'i ma rnams thar pa'i lam bzang la/__/so sor 'god pa'i g.yar dam brtan pos sras bcas rgyal ba dgyes par mdzod/__/hi kha ba ma'i phung po ji bzhin rab dkar kun slong bzang pos gzhi bzung nas/_/u da d+hi chu 'dzin ltar snyan pa'i ngag gis chos tshul bdud rtsi'i char phab mthus/__/kye he zhes tshig gis bskul ba'i mod la 'gro kun phan bde'i lam zhugs te/__sman/__o Sha d+hi ltar nyon mongs nad sel kun mkhyen go 'phang myur thob shog__/ces dbyangs a nges pa dang /__bod kyi yi ge sum cu la A li gsal byed bzhis brgyan pa dang spel bas rjod byed bya dka' zhing /__brjod bya blo gsal thar 'dod rnams kyi spang blang gi bslab bya thams cad mdor bsdus te mtshon par nus pa'i gtam gyi sbyor ba nyung ngu 'di'ang 'jam dbyangs bla ma dgyes pa'i 'bangs mkhyen brtse'i dbang pos rab tshes dkar po'i gnam lo gsar du 'char ba'i dkar phyogs kyi rgyal ba dang po'i nyin bris pa don dang ldan par gyur cig/___//___!_