JKW-KABUM-23-'A-001-025

🚧 This website is under continued development. We appreciate your patience!

Previous Text Back to Volume PageNext Text

Wylie title	chos nyid gnyug ma'i glu dbyangs 'od gsal grub pa'i rol mo
Location	mkhyen brtse'i bka' 'bum Volume 23, sde tshan 1, Text 25, Pages 56-59 (Folios 28b5 to 30a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. chos nyid gnyug ma'i glu dbyangs 'od gsal grub pa'i rol mo. In 'jam dbyangs mkhyen brtse'i dbang po'i bka' 'bum, Vol. 23: 56-59. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ཆོས་ཉིད་གཉུག་མའི་གླུ་དབྱངས་འོད་གསལ་གྲུབ་པའི་རོལ་མོ་ཞེས་བྱ་བ། ཨེ་མ་ཧོ། སྤྲོས་བྲལ་བདེ་བ་ཆེན་པོའི་ཡེ་ཤེས་ནི། །རྣམ་པ་ཀུན་གྱི་མཆོག་དང་ལྡན་པའི་ཞལ། །ཟུང་འཇུག་ཀུན་ཁྱབ་རང་རིག་གཉུག་མའི་གཤིས། །དུས་གསུམ་རྟོག་བྲལ་དབྱིངས་སུ་ཕྱག་བགྱིའོ། །འདི་ལྟར་སྣ་ཚོགས་སྣང་བའི་རོལ་པ་ཀུན། །སྐྱེ་འགགས་གནས་གསུམ་བྲལ་བའི་སེམས་ཀྱི་འཕྲུལ། །གཉིས་སྣང་དྲྭ་བར་འཐུམས་པའི་འགྲོ་བ་རྣམས། །བློ་བྲལ་རང་རིག་སྒྲིབ་སྟེ་འཁོར་བར་འཁྱམས། །དེ་ཡང་ཀུན་གཞི་ལུང་དུ་མ་བསྟན་པར། །ལྷུན་གྲུབ་སྒོ་བརྒྱ་ཐུགས་རྗེའི་འཆར་ཚུལ་གྱིས། །འཁྲུལ་གྲོལ་འཇུག་ལྡོག་སྒྱུ་མའི་རོལ་པ་ཡིས། །འཁོར་དང་མྱ་ངན་འདས་པར་ཡོངས་སུ་གྲུབ། །རང་སྣང་སྐྱེ་མེད་ནམ་མཁའ་ཡངས་པ་ལ། །བློ་ཡིས་གཏིང་མཐའ་གཞལ་དུ་མེད་ན་ཡང་། །རང་རིག་རང་བཞག་ཟེར་བརྒྱ་འཕྲོ་བའི་ཚེ། །འཁོར་བའི་མུན་པ་མ་ལུས་ཡོངས་སུ་བཅོམ། །སྣ་ཚོགས་སེམས་ཀྱི་འགྱུ་འཕྲོའི་རྐུན་བུ་ཡིས། །སེམས་ཉིད་བདེ་གཤེགས་སྙིང་པོ་བསླུས་གྱུར་ཀྱང་། །སྣང་སྲིད་རིག་ངོར་གྲོལ་བའི་དཔའ་བོ་ཡིས། །ཤུགས་འབྱུང་གཉུག་མའི་ངང་དུ་རྣམ་པར་གསོད། །ལས་དང་ལས་ཀྱི་འབྲས་བུར་བཅིང་བའི་མཐུས། །རྟོགས་ཚོགས་ངང་གིས་ཞི་བར་མ་འདོད་ནས། །ཕུང་ལྔའི་ཟག་བཅས་དྲ་བར་འཐུམས་པའི་ཚེ། །རང་གྲོལ་ཡིད་དཔྱོད་ལས་འདས་རལ་གྲིས་བཀྲལ། །དབུ་མའི་རྗེས་དཔག་འཛིན་སྟངས་རྣོན་པོ་ཡིས། །མཐའ་བཞི་བཀག་པའི་སྤྲོས་བྲལ་སྒྲུབ་པ་དེ། །ཐ་སྙད་ཙམ་གྱི་རྗེས་སུ་མ་སོང་བར། །ངེས་ཤེས་གཏིང་ཚུགས་གཏན་ལ་ཕེབས་པའི་ཚེ། །དེ་ཉིད་ཕྱག་རྒྱ་ཆེན་པོའི་རང་ངོ་རུ། །གཉུག་མ་ཉིད་དུ་འཇོག་སྟེ་བློ་འདས་ཀྱི། །སྒོམ་མེད་བར་དུ་གསལ་སྟོང་རྒྱས་འདེབས་དང་། །ཡིད་བྱེད་ཤེས་བྱའི་སྒྲིབ་པ་ཕྲ་མོ་ཡང་། །གཅེར་མཐོང་རྫོགས་པ་ཆེན་པོར་རབ་ཐིམ་སྟེ། །མཉམ་རྗེས་དབྱེར་མེད་འོད་གསལ་ཆོས་ཀྱི་སྐུ། །ངེས་ཤེས་ཐག་ཆོད་གདིངས་ཐོབ་རང་སར་གྲོལ། །དེས་ན་ཀུན་ཀྱང་མཐར་ཐུག་སྙིང་པོར་གཅིག །དེ་ཡང་བསྒོམ་པས་ཉམས་སུ་ལེན་པའི་ཚེ། །ཚོགས་དྲུག་ཡུལ་ལ་སེམས་ཀྱི་རྩལ་ཤར་བའི། །སྣ་ཚོགས་སྣང་བ་ཤར་གྲོལ་དུས་མཉམ་དུ། །ཆུ་ལ་རལ་གྲི་བསྣུན་ལྟར་ངང་བཞག་གི །དབྱིངས་སུ་རྣམ་པར་གྲོལ་བ་མཆོག་གི་ལམ། །དེ་སྐད་དུའང་སློབ་དཔོན་དགའ་རབ་རྗེས། །ཤར་བའི་དུས་ན་མཉམ་ཤར་བཟང་ངན་མེད། །གྲོལ་བའི་དུས་ན་མཉམ་གྲོལ་བཟང་ངན་མེད། །གནས་པའི་ཚེ་ན་མཉམ་གནས་བཟང་ངན་མེད། །ཅེས་གསུངས་དེ་ཕྱིར་རྟག་ཏུ་བརྟན་གོམས་བྱ། །འོན་ཀྱང་བྱས་པའི་བསྒོམ་པས་མ་འཕོས་ཤིང་། །མ་བྱས་རང་གར་བཞག་པས་གཡོ་བ་མེད། །ཟབ་ཞི་སྤྲོས་བྲལ་མི་རྟོག་གཉུག་མའི་དབྱིངས། །འཕོ་འགྱུར་ཀུན་བྲལ་ལྷན་སྐྱེས་ཡེ་ཤེས་ནི། །ཡོད་ཅེས་བློ་ཡིས་དཔྱད་དུ་མེད་པས་སྟོང་། །མེད་ཅེས་ངོ་བོ་བསམ་མི་ཁྱབ་པས་བྲལ། །སྒྲོ་འདོགས་སྐུར་འདེབས་ཟད་པའི་གཉུག་མའི་ལམ། །དུས་གསུམ་རྒྱལ་བ་ཡོངས་ཀྱི་གཤེགས་ཤུལ་མཆོག །གཟོད་ནས་མ་བྱས་ལྷུན་གྲུབ་ངང་དུ་གནས། །ད་ལྟ་མ་བཅོས་བཟོ་མེད་དེ་བཞིན་ཉིད། །མ་འོངས་དེ་ལས་འཕོ་འགྱུར་གཞན་བྲལ་བའི། །འགྲོ་ཀུན་ཡོངས་ཁྱབ་བདེ་གཤེགས་རྡོ་རྗེ་སེམས། །མཐའ་བྲལ་གནས་སུ་ཕྱིན་ཡང་ལེགས་མིན་ཤིང་། །ངན་སོང་སྡུག་བསྔལ་ཁུར་ཡང་མ་དམན་པའི། །རིག་སྟོང་དངུལ་ཆུ་ལྟ་བུ་ཡེ་ཤེས་ཁམས། །རྟག་ཏུ་ལྷུན་གྱིས་གྲུབ་པ་དེ་རྟོགས་མཛོད། །མཐར་ཐུག་གཟོད་ནས་དག་པའི་ངོ་བོ་ཉིད། །རང་བཞིན་སྐུ་དང་ཡེ་ཤེས་ལྷུན་གྲུབ་ཅིང་། །ཐུགས་རྗེས་འགྲོ་ཀུན་གང་འདུལ་སྒྲོལ་མཛད་བའི། །བསམ་མི་ཁྱབ་པའི་གོ་འཕང་ལ་རེག་འགྱུར། །དེ་སྐད་གང་ཤར་གྲགས་སྟོང་གཉུག་མའི་དབྱངས། །རང་གྲོལ་བཅོས་བསྒྱུར་བྲལ་བར་སྨྲས་དེའི་མཐུས། །སྐྱེ་འགགས་གཉིས་མེད་རང་རིག་སྐུ་གསུམ་ངང་། །འགྲོ་ཀུན་ཡོངས་སུ་སྒྲོལ་བའི་མཐུ་ཐོབ་ཤོག །ཁྱད་པར་རྟོག་གེས་བརྟག་པའི་ཚིག་གི་མེས། །མཐའ་བྲལ་དབུ་མའི་ལྗོན་ཤིང་མི་བསྲེག་པར། །འོད་གསལ་འགྲོ་འོང་བྲལ་བར་འབྱམས་ཀླས་པས། །ཚེ་འདིར་མཆོག་གི་འབྲས་བུ་འཛིན་གྱུར་ཅིག ། ༈

[edit]

gnyug ma'i glu 'od gsal grub pa'i rol mo/__ chos nyid gnyug ma'i glu dbyangs 'od gsal grub pa'i rol mo zhes bya ba/__e ma ho/__spros bral bde ba chen po'i ye shes ni/__/rnam pa kun gyi mchog dang ldan pa'i zhal/__/zung 'jug kun khyab rang rig gnyug ma'i gshis/__/dus gsum rtog bral dbyings su phyag bgyi'o/__/'di ltar sna tshogs snang ba'i rol pa kun/__/skye 'gags gnas gsum bral ba'i sems kyi 'phrul/__/gnyis snang drwa bar 'thums pa'i 'gro ba rnams/__/blo bral rang rig sgrib ste 'khor bar 'khyams/__/de yang kun gzhi lung du ma bstan par/__/lhun grub sgo brgya thugs rje'i 'char tshul gyis/__/'khrul grol 'jug ldog sgyu ma'i rol pa yis/__/'khor dang mya ngan 'das par yongs su grub/__/rang snang skye med nam mkha' yangs pa la/__/blo yis gting mtha' gzhal du med na yang /__/rang rig rang bzhag zer brgya 'phro ba'i tshe/__/'khor ba'i mun pa ma lus yongs su bcom/__/sna tshogs sems kyi 'gyu 'phro'i rkun bu yis/__/sems nyid bde gshegs snying po bslus gyur kyang /__/snang srid rig ngor grol ba'i dpa' bo yis/__/shugs 'byung gnyug ma'i ngang du rnam par gsod/__/las dang las kyi 'bras bur bcing ba'i mthus/__/rtogs tshogs ngang gis zhi bar ma 'dod nas/__/phung lnga'i zag bcas dra bar 'thums pa'i tshe/__/rang grol yid dpyod las 'das ral gris bkral/__/dbu ma'i rjes dpag 'dzin stangs rnon po yis/__/mtha' bzhi bkag pa'i spros bral sgrub pa de/__/tha snyad tsam gyi rjes su ma song bar/__/nges shes gting tshugs gtan la phebs pa'i tshe/__/de nyid phyag rgya chen po'i rang ngo ru/__/gnyug ma nyid du 'jog ste blo 'das kyi/__/sgom med bar du gsal stong rgyas 'debs dang /__/yid byed shes bya'i sgrib pa phra mo yang /__/gcer mthong rdzogs pa chen por rab thim ste/__/mnyam rjes dbyer med 'od gsal chos kyi sku/__/nges shes thag chod gdings thob rang sar grol/__/des na kun kyang mthar thug snying por gcig__/de yang bsgom pas nyams su len pa'i tshe/__/tshogs drug yul la sems kyi rtsal shar ba'i/__/sna tshogs snang ba shar grol dus mnyam du/__/chu la ral gri bsnun ltar ngang bzhag gi__/dbyings su rnam par grol ba mchog gi lam/__/de skad du'ang slob dpon dga' rab rjes/__/shar ba'i dus na mnyam shar bzang ngan med/__/grol ba'i dus na mnyam grol bzang ngan med/__/gnas pa'i tshe na mnyam gnas bzang ngan med/__/ces gsungs de phyir rtag tu brtan goms bya/__/'on kyang byas pa'i bsgom pas ma 'phos shing /__/ma byas rang gar bzhag pas g.yo ba med/__/zab zhi spros bral mi rtog gnyug ma'i dbyings/__/'pho 'gyur kun bral lhan skyes ye shes ni/__/yod ces blo yis dpyad du med pas stong /__/med ces ngo bo bsam mi khyab pas bral/__/sgro 'dogs skur 'debs zad pa'i gnyug ma'i lam/__/dus gsum rgyal ba yongs kyi gshegs shul mchog__/gzod nas ma byas lhun grub ngang du gnas/__/da lta ma bcos bzo med de bzhin nyid/__/ma 'ongs de las 'pho 'gyur gzhan bral ba'i/__/'gro kun yongs khyab bde gshegs rdo rje sems/__/mtha' bral gnas su phyin yang legs min shing /__/ngan song sdug bsngal khur yang ma dman pa'i/__/rig stong dngul chu lta bu ye shes khams/__/rtag tu lhun gyis grub pa de rtogs mdzod/__/mthar thug gzod nas dag pa'i ngo bo nyid/__/rang bzhin sku dang ye shes lhun grub cing /__/thugs rjes 'gro kun gang 'dul sgrol mdzad ba'i/__/bsam mi khyab pa'i go 'phang la reg 'gyur/__/de skad gang shar grags stong gnyug ma'i dbyangs/__/rang grol bcos bsgyur bral bar smras de'i mthus/__/skye 'gags gnyis med rang rig sku gsum ngang /__/'gro kun yongs su sgrol ba'i mthu thob shog__/khyad par rtog ges brtag pa'i tshig gi mes/__/mtha' bral dbu ma'i ljon shing mi bsreg par/__/'od gsal 'gro 'ong bral bar 'byams klas pas/__/tshe 'dir mchog gi 'bras bu 'dzin gyur cig__/__!