PJCW-KABUM-01-KA-016

🚧 This website is under continued development. We appreciate your patience!

Previous Text Back to Volume PageNext Text

Wylie title	lugs zung tshogs gtam gyi lhan thabs rin chen phra tshom
Location	dpal sprul bka' 'bum Volume 1, Text 16, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Discourses - gtam

Tibetan Text

[edit]

༄༅། །ལུགས་ཟུང་ཚོགས་གཏམ་གྱི་ལྷན་ཐབས་རིན་ཆེན་ཕྲ་ཚོམ་བཞུགས་སོ། །

དེང་བསླབ་གསུམ་བསྟན་པའི་སྒྲོན་མེ། སྐྱབས་མགོན་དམ་པའི་གཙོར་མཛད། འཕགས་ཚོགས་འདུས་པ་རྒྱ་མཚོ་འགྲོ་བ་ལྷ་དང་བཅས་པའི་བསོད་ནམས་ཀྱི་ཞིང་ས་རྨད་དུ་བྱུང་བར་བཞུགས་པ་ནས། གྲལ་མཛེས་པའི་གཏམ་དང་། རྒྱན་མཛེས་པའི་གྲ་རུ་འབོད་པའི་དཔེ་བཞིན། མཁས་པ་དགྱེས་པའི་གཏམ་གྱི་རྣམ་གྲངས་ཅུང་ཟད་ཙམ་དུ་ཞུ་ན། གཏམ་ལ་ཡས་གཏམ་དང་། མས་གཏམ་གཉིས་སུ་ཡོད་དེ། ཡས་གཏམ་དམ་པ་ཆོས་ནས་གླེང་ན། ཆོས་ཀྱི་ཕུ་ཐག་གང་ལ་ཐུག་པ་སྟོན་པ་སྐུ་གསུམ་གྱི་བྱོན་ཚུལ་ལ་ཐུག །མས་གཏམ་འཇིག་རྟེན་མི་ཆོས་ལྟར་བཤད་ན། སྟེང་ན་རྗེ་ཡི་གདུང་རབས། འོག་ན་འབངས་ཀྱི་མི་རབས། འཇིག་རྟེན་སྲིད་པའི་ཆགས་ཚུལ་ལ་སོགས་པ་བཤད་ན་རྒྱ་ཆེ། བགྲང་ན་གྲངས་མང་། བཤིག་ན་དོན་ཞིབ་པ་མང་པོ་ཡོད་མོད་དེ། མང་པོ་བཤད་ན་གོ་དཀའ། ལྕི་མོ་གྱོན་ན་འགྲོ་དཀའ་བས་ཉུང་བསྡུས་སུ་གླེང་ན། ཇི་སྐད་དུ། སོགས་ཕུན་སུམ་ཚོགས་པ་ལྔ་དང་སྦྲེལ། མཇུག་ཏུ། ལགས་ཏེ། དེ་ལྟར་ཕུན་སུམ་ཚོགས་པ་ལྔའི་རང་བཞིན་དུ་བཀྲ་ཤིས་ཀྱི་གྲལ་འཛོམས། རྟེན་འབྲེལ་གྱི་དབུ་ཚུགས་པ་ནས། གྲྭ་ས་སྒྲིག་གིས་འཛིན། སྒྲིག་ལམ་ཁྲེལ་གྱིས་འཚོ། ཞེས་པ་ལྟར། ཡར་བླ་མ་དབུ་ཆོས་ནས་གཙོ་མཛད། མར་འདྲེན་པ་ཐབ་སྐོར་གྱི་མཐའ་བརྟེན། ཁྲིམས་རང་ས་ནས་བསྡམ་ན་གྱོད་མི་འོང་། གཅུས་ཕུར་རྩ་ནས་དམ་ན་སྣེ་མི་འབུད་ཟེར་བའི་དཔེ་བཞིན། རང་ལམ་ནས་གྲྭ་ས་གོང་མའི་ཕྱག་བཞེས། བླ་མ་དམ་པའི་གསུང་སྲོལ་དང་མཐུན་པའི་དད་ལྡན་དང་བ་འདྲེན་པའི་རྟེན། འབྱོར་ལྡན་བསོད་ནམས་བསགས་པའི་ཞིང་། མཐོང་ན་མི་མཐུན་པ་མེད་པའི་ཕྱི་ཚུལ་སོ་སོར་ཐར་པའི་གཞུང་ལམ་དང་བསྟུན་ནས་སྒོ་གསུམ་དཀྱིལ་འཁོར་གསུམ་གྱི་ཁྱེར་སོ་དང་མ་བྲལ་བ་ལ་གསང་སྔགས་རྡོ་རྗེ་ཐེག་པའི་ཉམས་ལེན་འདུ་བས་སྡོམ་གསུམ་འགལ་བ་མེད་པར་ཉམས་སུ་ལེན་པ་སྟོན་པ་རྡོ་རྗེ་འཆང་གི་བཅས་ཁྲིམས་ཡིན་པས་ཆོས་ཁྲིམས་དར་གྱི་མདུད་པ་འཇམ་ལ་དམ། རྒྱལ་ཁྲིམས་གསེར་གྱི་གཉའ་ཤིང་སྦྲམ་ལ་ལྕི། ཞེས་འདི་ཕྱི་གཉིས་ཀ་ལ་བསམ་ནས་ཆོས་ཀྱི་ཁྲིམས་རང་ས་ནས་དམ་པ་དགོས་ཤིང་། ཆོས་ཁྲིམས་ལས་འགལ་ན་རྒྱལ་ཁྲིམས་ཀྱི་སྟངས་གཅོད་འོང་བའང་རྒྱ་གར་ཆོས་ཁུངས་བཙུན་པའི་ལོ་རྒྱུས་སུ་བཤད་པ་ལྟར་ཡིན་ལ། འཕྲལ་གྱི་སྤང་བླང་བཅའ་ཁྲིམས་ཀྱི་རིམ་པ། འདི་དང་འདི་ལྟ་བུ་ཡོད་པ་རྣམས་ཀྱང་། སླ་ཆོས་དང་བག་ཡངས་སུ་མི་མཛད་པ་ཞུ་བྱའི་སྙིང་པོ་ཡིན་ཞིང་། སླད་མར་ཡང་། སྤྱིར་གྱི་ཡངས་པའི་རྒྱལ་ཁམས་མཐའ་དབུས་མེད་པ་ཀུན་དང་། བྱེ་བྲག་བོད་ཁ་བ་ཅན་གྱི་ཡུལ་གྲུ་མ་ལུས་པ་ཐམས་ཅད་བདེ་སྐྱིད་རྫོགས་ལྡན་གསར་པའི་དགའ་བ་བླ་ན་མེད་པས་མི་ངོམས་པར་ལོངས་སུ་སྤྱོད་པའི་རྟེན་འབྲེལ་གྱི་སྒོ་འཕར་བརྒྱ་ཕྲག་ཅིག་ཆར་དུ་འབྱེད་ཅིང་། སངས་རྒྱས་ཀྱི་བསྟན་པ་སྡེ་དང་རིས་སུ་གཅོད་པ་མེད་པར་ནམ་མཁའི་གར་ཁྱབ་ཏུ་དཀར་འཇམ་ཡུག་གཅིག་ཏུ་བརྡལ་ཞིང་། བསྟན་འཛིན་གྱི་སྐྱེས་བུ་དམ་པ་རྣམས་ཀྱང་ཞབས་པད་རྡོ་རྗེའི་ཁྲི་ལ་གཡོ་མེད་བསྐལ་པ་རྒྱ་མཚོར་ལེགས་པར་བཀོད་ཅིང་། གཅིག་ཏུ་རྣམ་པར་དཀར་བའི་མཛད་འཕྲིན་གོང་ནས་གོང་འཕེལ་དུ་འགྱུར་ཞིང་། རིག་འཛིན་འདུས་པའི་ཚོམ་བུ་རྣམས་ཀྱང་བརྩེ་གདུང་རྒྱུན་ཆད་མེད་པའི་དམ་ཚིག་ཉམས་པ་མེད་པར་ཚེ་ལུས་གཅིག་གིས་མགོན་པོ་རྡོ་རྗེ་འཆང་བླ་ན་མེད་པའི་གོ་སར་ཚོམ་བུ་གཅིག་ཏུ་མངོན་སངས་རྒྱས་ཤིང་། འབྲེལ་ཐོག་ཐམས་ཅད་རྣམ་མཁྱེན་དམ་པའི་ལམ་ལས་གཞན་དུ་མི་འགྱུར་བའི་རྟེན་འབྲེལ་གྱི་མཐུན་འགྱུར་ཀྱང་ཞུ་བ་ལགས། ། ༈ བླ་མ་ཆོས་ཁྲིམས་སོགས་ལས་སྣེ་རྣམས་ལ། དང་པོ་བླ་མ་ནི་དཀྱིལ་འཁོར་ཐམས་ཅད་ཀྱི་མངའ་བདག །དངོས་གྲུབ་ཐམས་ཅད་ཀྱི་འབྱུང་གནས་ཡིན་པས། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་འབྱུང་། །ཞེས་པ་ལ་སོགས་བརྗོད་པ་ལས་འདས་པའི་ཡོན་ཏན་གྱི་གཏེར་མཛོད་དུ་གྱུར་པ་ཡིན་ལ། བྱེ་བྲག་འདུལ་བ་ལྟར་ན། སུམ་བརྒྱ་པ་ལས། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམ་པ་དེ་དག་བླ་མར་བསྔགས། །ཞེས་པ་ལྟར། བརྟན་མཁས་ཀྱི་ཡོན་ཏན་གཉིས་དང་ལྡན་པ་དང་། བྱང་སེམས་ལྟར་ན། སྡེ་སྣོད་གསུམ་ལ་མཁས་ཤིང་། རྒྱུད་བྱང་ཆུབ་སེམས་ཀྱིས་ངེས་པར་གང་བས་གཞན་སྣང་གདུལ་བར་ནུས་པ་དང་། གསང་སྔགས་ལྟར་ན་དེ་ཉིད་བཅུ་དང་ལྡན་པ་སྟེ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང་། །གསང་བ་ཤེས་རབ་ཡེ་ཤེས་དང་། །ཁ་སྦྱོར་འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་བསྒྲུབས་པའི་ཆོ་ག་དང་། ། རབ་ཏུ་གནས་དང་དཀྱིལ་འཁོར་བསྒྲུབས། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟངས་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་པ་ལྟར་རྒྱུད་སྡེ་ཕྱི་ནང་དང་སྦྱར་བའི་དེ་ཉིད་བཅུ་པོ་རྣམས་ཤེས་དགོས་པ་ཡིན་ལ། བྱེ་བྲག་ཏུ་སྒྲུབ་པ་ཆེན་པོའི་རྡོ་རྗེ་སློབ་དཔོན་ནི་བསྐྱེད་རྫོགས་ལ་བརྟན་པ་ཐོབ་ཅིང་། ལྟ་བ་མ་ནོར་བ་གཞིར་བཞག །དཀྱིལ་འཁོར་བྲི་ཐིག །ཆོ་གའི་ས་བཅད། གར་དང་ཕྱག་རྒྱ། འཆམ་དང་རོལ་མོ་ལ་སོགས་ཕྱག་བཞེས་སྒྲུབ་འཕྲིན་གྱི་བྱ་བ་ཕྲ་ཞིང་ཕྲ་བ་རྣམས་ཀྱང་མི་མཁྱེན་པ་ཅུང་ཟད་ཀྱང་མེད་ཅིང་། དེ་དག་ཀྱང་བརྡ་དོན་རྟགས་ཀྱི་སྒོ་ནས་རྒྱུད་སྡེའི་དགོངས་པ་དང་སྦྱོར་ཞིང་། བྱང་ཆུབ་སྒྲུབ་པའི་ཐབས་སུ་འགྱུར་ཚུལ་ལ་མ་རྨོངས་པས། གཞན་གྱི་ལད་མོ་དང་། མཐོང་བརྒྱུད་ཙམ་ལས་དོན་གྱི་གོ་བ་མ་ལོང་པ་དང་། རང་བཟོ་དང་ཕོ་ཚོད་ཁོ་ནས་བླུན་པོའི་དབུས་ན་ལེགས་ལེགས་ལྟར་བཅོས་པ་ཙམ་མ་ཡིན་པར་གསང་སྔགས་རྡོ་རྗེ་ཐེག་པའི་ཐབས་མཁས་ཀྱི་སྤྱོད་པ་ཇི་སྙེད་པ་ཤེས་ཤིང་རྒྱུད་ལ་སྦྱོར་བ་ཞིག་དགོས་ཏེ། དེ་ཡང་སྔ་འགྱུར་རྙིང་མ་བ་ལྟར་ན། སྔ་འགྱུར་བཀའ་བབས་ཀྱི་ཆུ་བོ་བཞི་ཞེས་དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྨིན་བྱེད་དབང་བཞིའི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཉམས་མྱོང་གདམས་པའི་ཆུ་བོ་དམར་ཁྲིད་གནད་ཡིག་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་བསྲུང་དྲག་སྔགས་དང་བཅས་པ་སྟེ་སྔ་འགྱུར་བཀའ་བབས་ཀྱི་ཆུ་བོ་བཞི་དང་ལྡན་པ་དགོས་ཤིང་། དོན་དུ་མཁས་བཙུན་བཟང་གསུམ། འཆད་རྩོད་རྩོམ་གསུམ། ཐོས་བསམ་སྒོམ་གསུམ་སྟེ་དམ་པའི་ཚུལ་དགུ་དང་ལྡན་པ་ཞིག་དགོས་ལ། ཁྱད་པར་དབང་དང་རབ་གནས་ཀྱི་རྡོ་རྗེ་སློབ་དཔོན་ནི། རང་རྒྱུད་ངེས་པར་སྨིན་པ་ཞིག་དགོས་ཏེ། རང་རྒྱུད་མ་སྨིན་པར་གཞན་བྱིན་གྱིས་རློབས་མི་ནུས་ཤིང་། ཁྱད་པར་བླ་མ་ལ་ནི། སྙིང་རྗེ་དང་ལྟ་དགོངས་ཁོ་ན་གཙོ་ཆེ་བ་ལས། ཚུལ་འཆོས་དང་ཁ་བཤད། ཐོབ་དང་རྣམ་གྲངས། སྐྱེ་སྤྲུལ་གྱི་གྲགས་སྙན། རྟ་དྲེལ་གྱི་འུར་རྒྱག །སྒར་ཆས་ཀྱི་གཟི་བརྗིད། ལྟ་སྟངས་ཀྱི་མཛེས་ཆོས་ལྟ་བུས་ཤེས་པར་མི་ནུས་པའི་རྣམ་གྲངས་རྒྱས་པ་བསྟན་བཅོས་ཡིད་བཞིན་རིན་པོ་ཆེའི་མཛོད་དུ་རྒྱས་པར་བསྟན་པ་ལྟ་བུས་རྟོགས་པར་བྱ་དགོས་ལ། ཆོས་ཁྲིམས་ནི། འདུལ་བ་ལས། དགེ་སློང་ལས་བྱེད་པ་ཞེས་སྨྲོས་ལ། དགེ་འདུན་གྱི་བྱ་བ་དབང་ཞིང་དཀོར་རྫས་ལ་འབག་དགོས་པས། མགོན་པོ་ཀླུ་སྒྲུབ་ཀྱིས། དགེ་བསྐོས་གཙང་སྦྱོར་བ་དང་དམ་བཞག་པ། །གང་ཟག་ལས་བྱེད་རྣམས་སུ་བདག་མ་སྐྱེས། །ཞེས་སྨོན་ལམ་དུའང་མཛད་ལ། དེ་ལས་དགེ་བསྐོས་དམ་བཞག་པ་ཞེས་ཆོས་ཁྲིམས་ཡིན་ཏེ། དེའང་རང་ཁྲིམས་ལ་གནས་ནས་གཞན་ཁྲིམས་སུ་བཙུད་དགོས་པ་ཡིན་པས། ཆོས་ཀྱི་ཁྲིམས་ནི་སྡོམ་པ་གསུམ་སྟེ། ཕྱི་འདུལ་བའི་བཅས་ཁྲིམས། ནང་བྱང་སེམས་ཀྱི་བསླབ་ཁྲིམས། གསང་བ་རིག་འཛིན་སྔགས་ཀྱི་སྡོམ་ཁྲིམས་དང་གསུམ་ཡིན་ཞིང་། དེ་ཐམས་ཅད་ལ་བཅས་འགལ་གྱི་ཉེས་པ་སྤུ་ཙམ་ཡང་མ་གོས་པ་ནས། གཞན་འགལ་ན་དེ་བསྐུལ་ནས་ཆོས་བཞིན་དུ་དེ་བཤགས་སུ་འཇུག་པ་ཡིན་ལ། དེ་ཡང་ཆོས་བཞིན་དུ་བཤགས་ན་འདགས་པས། ལུས་སྲོག་དང་རྒྱུ་ཐོག་ནས་ཆད་པ་མི་འོང་བས་ཆོས་ཁྲིམས་དར་གྱི་མདུད་པ་ཞེས་འཇམ་པའི་དཔེར་བཞག་ལ། འགལ་ནས་མ་བཤགས་ན་འདི་ཕྱི་གཉིས་ཀར་ཕུང་བས་འདའ་དཀའ་བས་ན་དམ་པའི་དཔེར་ཡང་བཞག་པ་ཡིན་ལ། ཆོས་ཁྲིམས་ལས་འགལ་ཀྱང་འཇིག་རྟེན་ལུགས་ཀྱི་ཉེས་ཆད་དབབ་པ་ནི། སྟོན་པ་སངས་རྒྱས་ཀྱིས་མ་གནང་སྟེ། ང་ཡི་རྗེས་འཇུག་ཇི་ལྟར་ཞན་ན་ཡང་། །སྐྱེ་བོ་ཕལ་བ་བརྒྱ་ཡིས་དོ་ཟླ་མིན། །ཞེས་གླ་བ་ཤི་ཡང་གླ་རྩི་དང་། གླང་པོ་ཤི་ཡང་གི་ཝཾ་ཡོད་པའི་དཔེ་བཞིན། སངས་རྒྱས་ཀྱི་རྗེས་འཇུག་ཚུལ་ཁྲིམས་རལ་ཀྱང་ད་དུང་ཡོན་ཏན་གྱི་ཆ་འགའ་ཙམ་ཡོད་ངེས་པས་རྒྱལ་པོ་ལ་སོགས་པས་ཆད་པ་བཅད་ན་དེ་ལ་རྩ་ལྟུང་འབྱུང་བར་བཤད་པ་ལྟར་ཡིན་པས། ཆོས་ཀྱི་ཁྲིམས་ཆོས་ཁྲིམས་ཀྱིས་སྡོམ་དགོས་ཤིང་། སྡོམ་རྒྱུའི་ཁྲིམས་ཀྱི་རྣམ་གྲངས་རང་གི་མ་ཤེས་ན་སྡོམ་རྒྱུ་དང་། ཁྲིམས་འཇོག་རྒྱུ་གཉིས་ཀ་མེད་དེ། ལྟུང་བ་འབྱུང་བའི་སྒོ་བཞིའི་དང་པོའང་། མི་ཤེས་པ་ཞེས་ཐོགས་མེད་བཞེད་པ་ཡིན། ཞེས་པ་ཡིན་ཕྱིར། འདུས་པ་སྤྱིའི་བྱ་བཞག་སྒྲིག་སྲོལ་ཐམས་ཅད་སྡོམ་གསུམ་གྱི་ཁོངས་སུ་མ་འདུས་པ་ཅུང་ཟད་མེད་པས་དེ་དག་ཐམས་ཅད་ཤེས་ཤིང་རང་ཉམས་ལ་སྦྱོར་བ་ཞིག་དགོས། ༈ དབུ་མཛད་ནི། འདུལ་བ་སོགས་ལས་མ་བཤད་ཀྱང་། གསང་སྔགས་ཀྱི་ཚོམ་བུ་ཚོགས་ཀྱི་སྒྲུབ་པའི་སྐབས་སུ་སྐད་གདངས་ཆེ་ཞིང་ལས་ཁྲིགས་ལ་མཁས་པའི་ཀརྨ་གདངས་ཆེན་ཞེས་འཁོར་ཕུན་སུམ་ཚོགས་པའི་གྲལ་དུ་བཤད་ལ། དེ་ཡང་གསང་སྔགས་ཀྱི་ཕྲིན་ལས་ཐམས་ཅད་ཆོ་ག་ལ་རག་ལས་ཤིང་། ཆོ་ག་མཛེས་པར་བྱེད་པ་གདངས་དབྱངས། གདངས་དབྱངས་ཁྲིགས་སུ་འཇུག་པ་རོལ་མོ་ལ་ལྟོས་ཤིང་། རྒྱལ་བ་དགྱེས་པར་བྱེད་པ་ལུས་ཀྱི་སྟངས་སྟབས་གར་དང་ཕྱག་རྒྱ། ངག་གི་གྱེར་ཚིག་རྡོ་རྗེའི་གླུ། ཡིད་ཀྱི་ཏིང་ངེ་འཛིན་གསལ་འདེབས་པ་ཆོ་གའི་གཞུང་སྟེ། ཕྱག་བཞེས་ཕྲིན་ལས་ཀྱི་རྣམ་གྲངས་ཀུན་གྱི་དང་པོ་སྣ་འདྲེན། བར་དུ་ཚུགས་འཛིན། མཇུག་ཏུ་གཅོད་མཚམས་ཤེས་ཤིང་བྱེད་པ་པོ་ཡིན་པས་ན་དབུ་མཛད་དམ་བྱང་འདྲེན་པ་ཞེས་བཤད་པ་ཡིན་ལ། ༈ མཆོད་དཔོན་ལ་ནི། གསང་སྔགས་ཀྱི་རྒྱུད་སྡེ་ནས་ལས་ཀྱི་རྡོ་རྗེ་ཞེས་གསུངས་ཤིང་། དཀྱིལ་འཁོར་གྱི་རྒྱན་དང་ཡོ་བྱད། བྲི་ཐིག་གི་རྣམ་གྲངས་ལ་སོགས་རྡོ་རྗེ་སློབ་དཔོན་གྱི་ཕྱག་ལེན་ཆེ་ཕྲ་ཀུན་གྱི་ཞབས་ཕྱིར་འབྱོར་བ་དགོས་པས་དེ་དག་ཐམས་ཅད་ལ་མཁས་ཤིང་བྱང་ཆུབ་པ་དགོས་ལ། ཁྱད་པར་ནང་གསང་སྔགས་ཀྱི་མཆོད་པ་ཀུན་གྱི་གཙོ་བོ་སྨན་རཀ་གཏོར་གསུམ་དུ་ངེས་པས་གཏོར་མའི་རྣམ་གྲངས་དུ་མ་དག་ནི་མཛེས་ཤིང་ཡིད་དུ་འོང་ལ་བརྗིད་ཅིང་ལྷུན་ཆགས་པ་རྒྱན་དང་མེ་རི། ཚོན་དང་རི་མོའི་རྣམ་པ། རྒྱལ་བ་དགྱེས་པ་སྐོངས་ཤིང་དཀྱིལ་འཁོར་མཛེས་པར་བྱེད་པའི་ལག་གི་བཟོ་ལ་མཁས་པ་དང་། ཁྱད་པར་ཆོ་གའི་སྐབས་སུ་ལས་ཀྱི་རྡོ་རྗེ་བགྱི་བར་འོས་པའི་ཕྱག་བཞེས་དུ་མ་ཞིག་བྱུང་བ་རྣམས་ཀྱང་དེ་དང་དེའི་སྐབས་སུ་མ་ནོར་བར་ངེས་པར་ཤེས་པ་དགོས་ལ། འཕྲལ་གྱི་སྤྱོད་ལམ་ཞིབ་ཅིང་ཚུལ་དང་མཐུན་པ་སོགས་དགོས་ལ།

༈ སྤྱིར་ཚོམ་བུ་ཚོགས་སྒྲུབ་ཀྱི་འཁོར་དུ་འདུས་པ་ཐམས་ཅད་ཀྱང་། ཇི་སྐད་དུ། སྒྱུ་འཕྲུལ་ལས། སྟོན་པ་མཆོད་བརྩོན་རྟོགས་པ་གསལ། །ཏིང་འཛིན་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་མཚན་ཉིད་དྲུག་ལྡན་དུ་བཤད་པ་ངེས་པར་འཛོམ་དགོས་པ་ལགས་ཤིང་དེ་དག་གི་རྣམ་གྲངས་རྒྱས་པར་ཚིག་ཚོགས་ཉུང་ངུས་ཤེས་པར་མི་ནུས་པས་རེ་ཞིག་དེ་ཙམ་མོ། །དགེའོ། །དགེའོ། །དགེའོ། །