JKW-KABUM-23-'A-007

🚧 This website is under continued development. We appreciate your patience!

Previous Section Back to Volume PageNext Section

Wylie title	khang dmar mdo'i gu ru'i snang brnyan bzhengs pa'i dkar chag legs byas sprin gyi rol mo
Location	mkhyen brtse'i bka' 'bum Volume 23, sde tshan 7, Pages 341-369 (Folios 1a to 15a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. khang dmar mdo'i gu ru'i snang brnyan bzhengs pa'i dkar chag legs byas sprin gyi rol mo. In 'jam dbyangs mkhyen brtse'i dbang po'i bka' 'bum, Vol. 23: 341-369 . Khams sde dge rdzong sar dgon: Rdzong sar blo gros phun tshogs, 2020.
Genre	Catalogue of Contents - dkar chag
Colophon	།ཅེས་པའང་རྣམ་དཀར་གྱི་ཕྲིན་ལས་རྨད་དུ་བྱུང་བའི་བདག་པོའི་རྐྱེན་རིག་འཛིན་བླ་མ་དམ་པ་ཉིད་ནས་ཟིན་ཐོ་དང་བཅས་ཡང་ཡང་བཀའ་སྩལ་གནང་བ་ལས་རྒྱལ་ཁམས་ཕྱོགས་མེད་ཀྱི་བྱ་བྲལ་བ་ཤཱཀྱའི་དགེ་སློང་ཐེག་པ་མཆོག་གི་རྣལ་འབྱོར་པ་འཆད་རྩོད་རྩོམ་པའི་ཚུལ་ལ་བློ་གྲོས་ཀྱི་འཇུག་པ་ཅུང་ཟད་ཤར་བ་ཀུན་མཁྱེན་བླ་མ་དགྱེས་པའི་འབངས་གཙུག་ལག་སྨྲ་བའི་ཉི་མ་ཞེས་བགྱི་བས་སྦྱར་བ་སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang rnam dkar gyi phrin las rmad du byung ba'i bdag po'i rkyen rig 'dzin bla ma dam pa nyid nas zin tho dang bcas yang yang bka' stsal gnang ba las rgyal khams phyogs med kyi bya bral ba shAkya'i dge slong theg pa mchog gi rnal 'byor pa 'chad rtsod rtsom pa'i tshul la blo gros kyi 'jug pa cung zad shar ba kun mkhyen bla ma dgyes pa'i 'bangs gtsug lag smra ba'i nyi ma zhes bgyi bas sbyar ba sarba dA ka l+yA NaM b+ha ba tu

1 Texts in this Section (sde tshan or chos tshan)

341-369	ཁང་དམར་མདོའི་གུ་རུའི་སྣང་བརྙན་བཞེངས་པའི་དཀར་ཆག་ལེགས་བྱས་སྤྲིན་གྱི་རོལ་མོ། khang dmar mdo'i gu ru'i snang brnyan bzhengs pa'i dkar chag legs byas sprin gyi rol mo Catalogue of Contents - dkar chag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །སངས་རྒྱས་གཉིས་པ་མཚོ་སྐྱེས་རྡོ་རྗེའི་སྣང་བརྙན་གསར་དུ་འཁྲུངས་པའི་གཏམ་ལེགས་བྱས་སྤྲིན་གྱི་རོལ་མོ་ཞེས་བྱ་བ་བཞུགས་སོ།།

འཆི་མེད་གདོད་མའི་མགོན་པོ་ཡེ་ཤེས་ནི། །འཆི་མེད་བདེ་ཆེན་རྡོ་རྗེའི་རྣམ་རོལ་ཅན། །འཆི་མེད་གྲུབ་པའི་གཟུགས་སུ་ཡོངས་ཤར་བ། །འཆི་མེད་མཚོ་སྐྱེས་བླ་མས་རྟག་ཏུ་སྐྱོངས། །བྲལ་སྨིན་ཡོན་ཏན་རྒྱ་མཚོའི་མཐར་སོན་སྟོན་པ་མཚུངས་མེད་རྫོགས་སངས་རྒྱས། །དེས་གསུངས་འགོག་དང་ལམ་གྱིས་བསྡུས་པ་ཞི་བསིལ་ཆགས་བྲལ་དམ་པའི་ཆོས། །དེ་འཛིན་རིག་གྲོལ་ཡོན་ཏན་རྨད་བྱུང་ཚོགས་ཀྱི་མཆོག་གྱུར་དགེ་འདུན་ཏེ། །དཀོན་མཆོག་གསུམ་ཞེས་གྲགས་པའི་སྣང་བས་དགེ་མཚན་མེ་ཏོག་ཆར་དུ་བསྙིལ། །སྐུ་གསུམ་སྟོན་པའི་ཆུ་གཏེར་ལས་འོངས་ནང་བརྒྱུད་ནོར་བུའི་ཀརྞིཀ །རྣ་ལུང་དཔྱངས་པའི་ངལ་འཚོ་ཁོ་ནས་གྲུབ་གཉིས་འདོད་པ་འཇོ་བའི་གཏམ། །ཕྱོགས་ཀྱི་བུ་མོའི་འགྲམ་པར་འགོད་མཁས་སྔ་འགྱུར་རིག་འཛིན་བྱེ་སྙེད་ཀྱི། །རྣམ་པར་ཐར་པ་དྲན་པའི་མོད་ནས་མཆོག་ཏུ་གུས་པའི་བ་སྤུ་ཟིང་། །ཁྱད་པར་སྲས་བཅས་རྒྱལ་བ་ཀུན་གྱི་སོ་སོར་རྟོགས་པའི་ཡེ་ཤེས་ནི། །གཅིག་བསྡུས་མཁྱེན་རབ་ཕ་མཐའ་ཡས་པའི་སྔོན་མེད་ལེགས་གསུང་སེང་གེའི་སྒྲས། །འཕགས་བོད་མཁས་ཀུན་བརྟན་པ་འཕྲོག་མཛད་ཆོས་ཀྱི་རྒྱལ་པོ་ཀློང་ཆེན་པ། །བརྒྱུད་པར་བཅས་པའི་ཞབས་སེན་ཅོད་པན་གཙུག་ཏོར་ནོར་བུའི་འཁོར་ལོར་བསྙེན། །རྡོ་རྗེའི་ཡེ་ཤེས་འབར་བའི་སྣང་བ་ཆས། །ཡིད་སྲུབས་སྙིང་ལ་མུན་པ་སྐབས་སྟེར་བ། །དམ་ཅན་ཆོས་སྲུང་རྒྱ་མཚོའི་ཕྲིན་ལས་ཀྱིས། །སྡེ་བཞིའི་སྒོ་འཕར་གསར་པ་དེང་ཕྱེ་ཞིག །ཅེས་ཤིས་པར་བརྗོད་པའི་ཚིག་གི་མེ་ཏོག་ཕྲ་མོ་ཙམ་སྔོན་དུ་འཐོར་བས་ལམ་ཡངས་པར་བྱས་ཏེ། རྣམ་དཔྱོད་ཀྱི་ཆུ་སྐྱེས་དད་པའི་བདུད་རྩིས་ཁ་ཡོངས་སུ་བྱེ་བ་རྣམས་ཀྱི་སྙན་ལམ་དུ་སངས་རྒྱས་གཉིས་པ་སློབ་དཔོན་ཆེན་པོའི་སྣང་བརྙན་ཡིད་བཞིན་ནོར་བུ་འདི་ཉིད་གསར་དུ་འཁྲུངས་པའི་ཚུལ་ལས་བརྩམས་ཏེ་གཏམ་གྱི་སྦྱོར་བ་ཉུང་ཟད་གསོལ་ན། གང་གི་ཚེ་གཟོད་མ་ནས་སྒྲིབ་གསུམ་ཆ་དང་བཅས་པ་ཤིན་ཏུ་ཞི་བ་ཆོས་སྐུའི་ཡེ་ཤེས་དང་མི་གཉིས་པ་ལས། སྨོན་ལམ་དང་སྙིང་རྗེའི་རྣམ་པར་རོལ་པ་ཚད་མེད་པས་རྣམ་པར་སྣང་མཛད་གངས་ཆེན་མཚོའི་ཞིང་ཁམས་ཆེན་པོ་སྤྲིན་བཀོད་པའི་ནང་གསེས། བླ་ན་མེད་པའི་ཆོས་ཀྱི་བདུད་རྩིའི་སྣོད་དུ་རུང་བ་མི་མཇེད་འཇིག་རྟེན་གྱི་ཁམས། འཛམ་གླིང་ལས་ཀྱི་ས་པ་བྱང་ཆུབ་སྙིང་པོ་རྡོ་རྗེའི་གདན་གྱི་གནོད་གནས་དབང་པོའི་ཕྱོགས། བོད་ཆེན་པོ་ནོར་འཛིན་གྱི་ཐིག་ལེ་འབྲི་རྫ་ཟལ་མོ་སྒང་ཞེས་པའི་སའི་ཆ། ཡུལ་གྱི་དགེ་བཅུའི་དཔྱད་པ་མ་ཚང་བ་མེད་པའི་གཏེར་ལྟ་བུར་གྱུར་པས་ཡིད་ཅན་རྣམས་ཀྱི་རྟོགས་ལ་ཕྱོགས་དེ་ཉིད་དུ་ལྷུང་བའི་འབབས་སྟེགས་སུ་གྱུར་པ་ག་ལ་བར། སྔ་འགྱུར་འོད་གསལ་རྡོ་རྗེ་སྙིང་པོའི་བསྐྱེད་རྫོགས་ཀྱི་རྣལ་འབྱོར་ཟབ་མོ་དང་རྗེས་སུ་འབྲེལ་བར་སྤོང་བ་བསམ་གཏན་གྱི་འཁོར་ལོ་ལ་གཅིག་ཏུ་གཞོལ་བའི་སྒྲུབ་སྡེ་སྐྱེ་བོ་ཐུན་མོང་བའི་འདོད་རྒྱལ་གྱི་སྒྲར་ཁང་མདོ་གུ་རུའི་སྒྲུབ་ཕུག་གམ། གྲུབ་པའི་སྤྱན་རས་གསལ་བའི་སློབ་དཔོན་དག་གིས། པདྨ་བཀའི་ཐང་ཡིག་ལས། མཁའ་འགྲོ་ཕུག་པར་ཟླ་བ་བཞི༔ ཞེས་རྡོ་རྗེའི་ལུང་གིས་དཔང་པོར་བྱས་པའི་མདོ་ཁམས་མཁའ་འགྲོ་ཕུག་ཏུ་ངོས་འཛིན་གནང་བར་མ་ཟད། རིག་འཛིན་བདུད་འདུལ་རྡོ་རྗེའི་གདུང་རབས་ལྔ་པ་རྒྱལ་སྲས་མཐུ་སྟོབས་དབང་ཕྱུག་དང་། རྫོགས་པའི་སངས་རྒྱས་རིན་ཆེན་གཙུག་ཏོར་ཅན་གདུལ་བྱའི་སྐལ་པ་དང་འཚམས་པར་གང་འདུལ་སྤྲུལ་པའི་རྣམ་རོལ་དུ་ཤར་བའི་གྲུབ་དབང་རྫོགས་ཆེན་བཞི་པ་འཇིགས་མེད་མཁྱེན་བརྩེའི་དབང་ཕྱུག་ཕྲིན་ལས་རྣམ་རྒྱལ་རྡོ་རྗེ་སོགས་དམ་པ་དུ་མས་དག་བྱེད་ཡེ་ཤེས་ཀྱི་གཟིགས་ངོར་ནུབ་ཕྱོགས་སྤྲུལ་པའི་ཞིང་མཆོག་ཨོ་རྒྱན་དྷཱུ་མ་ཐ་ལ་དང་། འཆི་མེད་པདྨ་འོད་ཀྱི་ཕོ་བྲང་མངོན་སུམ་པར་གཟིགས་ཤིང་ངོ་མཚར་གྱི་གསལ་སྣང་གཏན་ལ་འབེབས་པར་མཛད་པས་མཚོན། གང་ལྟར་ཡང་དུས་གསུམ་མཁྱེན་པ་དཔལ་ཨོ་རྒྱན་ཆོས་ཀྱི་རྒྱལ་པོས་ཞབས་ཀྱིས་བཅགས་ཤིང་རྫུ་འཕྲུལ་རྡོ་རྗེའི་བཀོད་པ་ཟད་མི་ཤེས་པས་བྱིན་གྱིས་བརླབས་པ་ལ་བརྟེན་ནས། བྲག་རིའི་བ་གམ་ཐམས་ཅད་ཀྱང་དེ་བཞིན་གཤེག་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་བརྒྱན་གྱི་འཁོར་ལོའི་རང་གཟུགས་མངོན་སུམ་མིག་གི་བདུད་རྩིར་ཤར་བའི་རང་བྱོན་གྱི་བཀོད་པ་བསམ་གྱིས་མི་ཁྱབ་པས་གཏམས་པ། གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པ་རྩལ་དང་། གྲུབ་པའི་དབང་ཕྱུག་རིག་རྩལ་ཐོགས་མེད་གླིང་པས་ཀྱང་རྫས་གཏེར་གྱི་ཆ་ཤས་སྤྱན་དྲངས་ཤིང་། དུས་ཀུན་ཏུ་རིག་པ་འཛིན་པའི་ས་ལ་གནས་པའི་དཔའ་བོ་དང་ཌཱཀྐིའི་འདུ་བ་སྤྲིན་བཞིན་དུ་གཏིབས་པའི་གནས་མཆོག་ཁྱད་པར་ཅན་གྱི་ལྟེ་བ་རང་བྱུང་རྡོ་རྗེའི་བྲག་གི་ཀེའུ་ཚང་འདི་ཉིད་དུ། གངས་ཀྱི་རི་བོའི་སུལ་ན་སྟོན་པ་བདེ་བར་གཤེགས་པའི་དོན་བཟང་པོ་ཚིག་འབྲུ་བཟང་པོ། མ་འདྲེས་ཤིང་ཡོངས་སུ་རྫོགས་པའི་གསུང་གི་གསང་བ་རབ་འབྱམས་ཇི་བཞིན་དུ་གཟིགས་ནས་སྨྲ་བ་ལ་ལག་ན་རལ་གྲི་འཆང་བའི་བློ་གྲོས་དང་གཉིས་སུ་མི་ཕྱེད་པས་འཛམ་བུ་གླིང་མཛེས་པར་བྱེད་པའི་རྒྱན་དྲུག་དང་། རྨད་དུ་བྱུང་བའི་སློབ་དཔོན་གཉིས་ཀྱི་རྒྱལ་ཐབས་ལ་རང་སྟོབས་ཀྱིས་འཛེགས་ཤིང་། མཁས་པ་དང་གྲུབ་པའི་སྐྱེས་བུ་གྲངས་མེད་པའི་གཙུག་གི་ནོར་བུས་ཞབས་བསྟེན་གྱི་པདྨོ་ལ་ཕྱག་བྱས་པ། སྨྲ་བའི་ཉི་མ་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ཞེས་མཚན་གྱི་སྤྲིངས་ཡིག་སྲིད་ཞིའི་བླ་ན་མངོན་པར་མཐོ་བ་དེ་ཉིད། སླར་ཡང་ཐེག་མཆོག་སྙིང་པོའི་རིང་ལུགས་ཉིན་མོ་ལྟར་གསལ་བའི་སླད་གཟུགས་གཞན་དུ་བསྒྱུར་བ་ན། སོ་སོ་ཡང་དག་པ་རིག་པ་བཞི་ལ་སྤོབས་པའི་གཏེར་མཛོད་ཆེན་པོ་བརྒྱད་ཡོངས་སུ་གྲོལ་བས་ལེགས་གསུངས་ཀྱི་ཆ་ཤས་ཕྲ་མོ་རེས་ཀྱང་། རང་གཞན་གྱི་སྨྲ་བ་མཆོག་ཏུ་རློམ་པ་རྣམས་ཀྱི་ཁེངས་པའི་རུ་ཚོན་དབྱིངས་སུ་བརྟུལ་ནས་ཆེད་དུ་བརྗོད་པའི་སྐབས་གསར་དུ་ཕྱེ་བ་རང་བྱུང་རྡོ་རྗེ་འཇིགས་མེད་གླིང་པའི་ཐུགས་སྲས་ཀྱི་ཐུ་བོ། ལྷ་སྲས་རྒྱལ་པོའི་རྣམ་པར་རོལ་པ་མཁས་ཤིང་གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་དང་། དེ་ཉིད་ཀྱི་གསང་བའི་མཛོད་འཛིན་པ་གངས་ཁྲོད་གྲུབ་རིགས་རྒྱ་མཚོའི་གཙུག་རྒྱན་རྗེ་བཙུན་བཞད་པ་རྡོ་རྗེའི་སྤུན་ཟླར་འོས་པའི་རྣལ་འབྱོར་གྱི་དབང་ཕྱུག་ཆེན་པོ་དམ་ཚིག་རྡོ་རྗེ་ཟུང་གི་ཞབས་ཀྱི་ཆུ་སྐྱེས་མཉེས་པ་གསུམ་གྱི་ཐོར་ཚུགས་ཀྱིས་བསྟེན་ནས། ཐེག་མཆོག་གདམས་པའི་སྨིན་པ་རང་གྲོལ་བའི་བདུད་རྩི་གསན་བསམ་གྱི་སྙིམ་པས་ངོམས་པ་མེད་པར་གསོལ་བ་དང་ཆབས་ཅིག །ཕྱོགས་བྲལ་གྱི་དབེན་པའི་རི་ངོགས་ལྷ་དང་དྲང་སྲོང་གྲུབ་པའི་ཚོགས་ཀྱིས་བསྟེན་པ་རྣམས་སུ་སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ་བས་ཉམས་དང་རྟོགས་པའི་པུཎྜཱ་རི་ཀ་ཅིར་ཡང་གྲོལ་བའི་བྱ་བྲལ་བླ་མ་དམ་པ་ནམ་མཁའ་རྡོ་རྗེ་ནས། ཕན་བདེའི་འབྱུང་གནས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་དང་། འབྲེལ་ཚད་ཀྱི་འགྲོ་བ་རྣམས་གནས་སྐབས་མངོན་མཐོ་དང་མཐར་ཐུག་ངེས་པར་ལེགས་པའི་གོ་འཕང་ལ་དབུགས་འབྱིན་པའི་སླད་དུ། ལྷག་པའི་ཐུགས་བསྐྱེད་རྣམ་པར་དག་པ་ཟླ་བ་ཞུན་མའི་ཕུང་པོ་ལྟར་གཅིག་ཏུ་དཀར་བས་ཀུན་ནས་བསླངས་ཏེ། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་ཡེ་ཤེས་སྒྱུ་འཕྲུལ་དྲྭ་བའི་རོལ་གར། རིག་འཛིན་བླ་མ་ཀུན་གྱི་གཙུག་རྒྱན། ཡི་དམ་ཞི་ཁྲོ་ཡོངས་ཀྱི་ཁྱབ་བདག །དཔའ་བོ་དང་ཌཱཀྐི་རྒྱ་མཚོའི་འཁོར་ལོས་སྒྱུར་བ། སངས་རྒྱས་གཉིས་པ་པདྨ་སཾ་བྷཱ་ཝ་ཞེས་མཚན་ཉི་ཟླ་ལྟར་ཡོངས་སུ་གྲགས་ཤིང་། ཁྱད་པར་གངས་ཅན་པའི་འགྲོ་བ་རྣམས་ཀྱི་སྐྱབས་དང་། རྟེན་དང་། གླིང་དང་། མགོན་དང་། དཔུང་གཉེན་གཅིག་པུར་གྱུར་པ་གང་གི་སྐུ་གསུང་ཐུགས་ཡེ་ཤེས་རྡོ་རྗེའི་རྣམ་འཕྲུལ་གྱི་རོལ་མོ་མཐའ་ཀླས་པའི་ཡིད་ཅན་གྱི་མོས་པའི་རྗེས་སུ་འགྲོ་བའི་ཕྱིར་བསམ་པར་མི་ནུས་ཀྱང་། རེ་ཞིག་དུས་ཀྱི་རྒུད་པ་གློ་བུར་བ་རྒྱུ་དང་བཅས་པ་ཞི་ནས། བསྟན་འགྲོའི་བདེ་སྐྱིད་རྫོགས་ལྡན་གསར་པའི་དགའ་སྟོན་ལ་ལོངས་སུ་སྤྱོད་པའི་རྟེན་འབྲེལ་དུ། འཁོར་འདས་དང་སྣང་སྲིད་ཐམས་ཅད་ཟིལ་གྱིས་གནོན་པ་བདུད་དཔུང་འདུལ་བའི་ཆ་བྱད་ཅན་གཙོ་འཁོར་གསུམ་པའི་མཚན་དཔེའི་སྣང་བརྙན་ཁྱད་པར་ཅན་ཞིག་བཞེངས་པ་ལ་དྲན་པ་ཉེ་བར་བཞག་སྟེ། ཨེ་ཡུལ་རིག་པའི་འབྱུང་གནས་སུ་སྐྱེ་བའི་འཁྲི་ཤིང་བཟུང་ཞིང་། ཐལ་མོ་དང་གདོང་པས་གཞལ་བའི་ཆ་ཚད་ལ་བློ་གྲོས་ཀྱི་པདྨོ་བྱེ་བ། སོར་མོས་ཟློས་གར་གྱིས་ལྷ་དང་བཅས་པའི་ཡིད་འཕྲོག་པ་བཟོ་ཡི་རིག་བྱེད་ལ་མཆོག་ཏུ་བྱང་ཆུབ་པ། ཇི་ལྟར་བསྒོ་བའི་ལས་ལ་རྟག་གུས་ཀྱི་བརྩོན་པ་མི་ལྷོད་པའི་ངང་ཚུལ་ཅན་པུཎྱེའི་མིང་ཅན་ཕ་བུ་གཉིས་ཆེད་དུ་བོས་ནས། རབ་བྱུང་བཅུ་བཞི་པའི་ནང་ཚན་སྣ་ཚོགས་དབྱིག་ཅེས་པ་ཤིང་མོ་སྦྲུལ་གྱི་ལོའི་ཁྱུ་མཆོག་ཅན་གྱི་ཟླ་བའི་དུས་ཚེས་མཆོག་ཏུ་དགེ་བ་ནས་བརྩམས། རྒྱུན་དང་ཁྱད་པར་གྱི་བསྙེན་བཀུར་ཕུན་སུམ་ཚོགས་པ་དང་བཅས་ཏེ་ཞག་གི་ཕུང་པོ་རྩེ་མོའི་གྲངས་ཙམ་གྱི་ནང་དུ་བྱ་བ་མཐར་ཕྱིན་པར་གྱུར་པ་ལ། གཙོ་བོར་རིག་འཛིན་དམ་པ་ཉིད་ཀྱིས་བརྩོན་པས་བསྒྲུབས་པའི་རྒྱུད་སྡེ་བཞིའི་གཟུངས་ཀྱི་རིགས་གཏོས་ཆེ་བ་དང་། ཁྱད་པར་འཕགས་མཆོག་སེམས་ཉིད་ངལ་གསོའི་ཞལ་སྐྱིན་གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པ་རྩལ་བསམ་བཞིན་དུ་སྲིད་པ་ཉེ་བར་བཟུང་བའི་སྐུ་ཕྲེང་བཞི་པ། རིག་པ་དང་གྲོལ་བའི་ཡོན་ཏན་བསམ་གྱིས་མི་ཁྱབ་པའི་མངའ་བདག་མཆོག་སྤྲུལ་རྡོ་རྗེ་འཆང་ཨོ་རྒྱན་བསྟན་འཛིན་ཉི་མ། དཔལ་ཀཿཐོག་རྡོ་རྗེའི་གདན་གྱི་སེངྒེའི་ཁྲི་ལ་ཆོས་ཀྱི་འཁོར་ལོས་སྒྱུར་བ་རྨོག་སྟོན་ཧེ་རུ་ཀའི་རྣམ་འཕྲུལ་འཇིགས་བྲལ་ཆོས་དབྱིངས་རྡོ་རྗེ། སི་ཏུ་སྤྲུལ་པའི་སྐུ་རིན་པོ་ཆེ་ཆོས་ཀྱི་བློ་གྲོས་སོགས་ཕྱོགས་ཀྱི་དམ་པ་རྣམས་ཀྱིས་སྩལ་བ་དང་། དགོན་སྡེ་འདི་ཉིད་ཀྱི་བླ་མ་གྲྭ་ཚང་རྣམས་ཀྱི་ཕྱག་ཏུ་བཞུགས་པ་དང་། ཁོ་བོ་ཅག་གི་ལག་ན་ཡོད་རིགས་བཅས་ཁུངས་དང་འབྲེལ་ངེས་པའི་རིང་བསྲེལ་རྣམ་པ་བཞིའི་ཚོགས་ཀྱིས་ཕྱུར་བུར་གཏམས་པའི་བཞུགས་ཚུལ་ནི། རྟེན་གྱི་གཙོ་བོ་སློབ་དཔོན་རིན་པོ་ཆེར། ཐོག་མར་ཡུངས་འབྲུ་ལྟ་བུའི་རིང་བསྲེལ་ལ། རྭ་སྟོན་སྟོབས་ལྡན་རྡོ་རྗེས་བསྒྲགས་ཡོངས་རྫོང་དུས་དགྲའི་དབང་པོའི་ཕོ་བྲང་ནས་སྤྱན་དྲངས་པའི་རྫོགས་པའི་སངས་རྒྱས་གསེར་ཐུབ་ཀྱི་འཕེལ་གདུང་། རིག་འཛིན་བདུད་འདུལ་རྡོ་རྗེ་དང་། དྭགས་པོ་གཏེར་ཆེན་རྡོ་རྗེ་རྒྱལ་པོའི་གཏེར་བྱོན་སངས་རྒྱས་འོད་སྲུང་གི་འཕེལ་གདུང་། གཏེར་ཆེན་པདྨ་འགྲོ་འདུལ་རྩལ་གྱི་ཕྱག་ནས་བྱུང་བའི་འོད་སྲུང་གི་འཕེལ་གདུང་། རྨོག་གྲུབ་རིན་པོ་ཆེས་སྩལ་བའི་འཕེལ་གདུང་ཁྱད་འཕགས་བཅས། སྐུ་གདུང་གི་རིང་བསྲེལ་ལ། དྭགས་པོ་གཏེར་ཆེན་རིན་པོ་ཆེའི་གཏེར་བྱོན་རྫོགས་པའི་སངས་རྒྱས་ཀྱི་དབུ་ཀླད། གཏེར་ཆེན་ཉི་མ་གྲགས་པའི་གཏེར་བྱོན་གུ་རུ་ཡབ་ཡུམ་གྱི་བྱང་སེམས་ཨ་ཐཾ་མ། རིག་འཛིན་ཆོས་རྗེ་གླིང་པ་དང་། དེ་ཉིད་ཀྱི་ཡང་སྲིད་གཏེར་ཆེན་ཀུན་བཟང་འོད་ཟེར་གྱི་གཏེར་བྱོན་གུ་རུ་ཡབ་ཡུམ་གྱི་བྱང་སེམས་རིལ་བུ། ཀློང་ཆེན་རོལ་པ་རྩལ་གྱི་གཏེར་བྱོན་གུ་རུའི་ཤངས་མཚལ་རིལ་བུ། རིག་འཛིན་པདྨ་གླིང་པའི་གཏེར་བྱོན་སྐྱེ་བདུན་རིལ་བུ། བདུད་འདུལ་གཏེར་བྱོན་བྲམ་ཟེ་སྐྱེ་བདུན་སྐུ་ཤ །གཏེར་ཆེན་ཉི་མ་གྲགས་པས་རྩ་གསུམ་གསང་བ་སྙིང་ཏིག་དང་ལྷན་ཅིག་ཏུ་སྤྱན་དྲངས་པའི་སྤྱན་རས་གཟིགས་སྤྲུལ་བྲམ་ཟེ་དུང་ཕྲེང་ཅན་དང་། མདོ་ཁམས་ཀློང་ཐང་སྒྲོལ་མ་བྲག་ནས་སྤྱན་དྲངས་པའི་བྲམ་ཟེ་དྲི་མེད་སྙིང་པོའི་སྐུ་གདུང་། ཆོས་གླིང་ཀུན་བཟང་འོད་ཟེར་གྱི་གཏེར་བྱོན་བྲམ་ཟེ་སྐྱེ་བདུན་སྐུ་ཤ །དྭགས་པོ་རྒྱལ་སྲས་བདེ་ཆེན་གླིང་པའི་གཏེར་བྱོན་སྐྱེ་བདུན་རིལ་བུ། ཆོས་གླིང་ཀུན་བཟང་འོད་ཟེར་གྱི་གཏེར་བྱོན་ཡེ་ཤེས་སྤྲུལ་པའི་བྱ་ཁྱུང་ག་རུ་ཌཱའི་དབུ་ཐོད། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་གདུང་རུས། ཐམས་ཅད་མཁྱེན་པ་བུ་སྟོན་རིན་པོ་ཆེའི་གདུངས། བྱང་བདག་བཀྲ་ཤིས་སྟོབས་རྒྱལ་གྱི་གདུང་རུས། རིག་འཛིན་གཏེར་བདག་གླིང་པའི་ཤངས་མཚལ་རིལ་བུ། མི་བསྐྱོད་རིལ་བུ། གྲུབ་དབང་རྫོགས་ཆེན་པ་པདྨ་རིག་འཛིན་གྱི་ཐུགས་ལྗགས་སྤྱན་གསུམ་མེས་མ་རྨས་པར་བྱོན་པའི་ཆ་ཤས། ཉི་གྲགས་གཏེར་ཆེན་རིན་པོ་ཆེའི་སྐུ་གདུང་གི་ཆ་ཤས། ཉི་སྤྲུལ་གསུམ་པ་རིན་པོ་ཆེའི་ཕྱག་ཏུ་ཕེབས་པའི་ཀུན་མཁྱེན་འཇིགས་མེད་གླིང་པའི་སྐུ་གདུང་སྐྱེ་བདུན་ཁྱད་འཕགས། རྫོགས་ཆེན་གསུམ་པ་རིན་པོ་ཆེ་ངེས་དོན་བསྟན་འཛིན་བཟང་པོའི་ཤངས་མཚལ་རིལ་བུ། སི་ཏུ་ཐམས་ཅད་མཁྱེན་པ་ཆོས་ཀྱི་འབྱུང་གནས་ཀྱི་ཤངས་མཚལ། གྲུབ་དབང་ནམ་མཁའ་རྒྱ་མཚོའི་སྐུ་ཤ །དྭགས་པོ་གཏེར་ཆེན་རིན་པོ་ཆེའི་ཤངས་མཚལ། ནམ་མཁའ་ཚེ་དབང་མཆོག་གྲུབ་ཀྱི་གདུངས། གཏེར་ཆེན་པདྨ་འགྲོ་འདུལ་རྩལ་གྱི་གདུང་རུས་ལས་གྲུབ་པའི་བྱིན་སྐུ། གྲུབ་པའི་དབང་ཕྱུག་ཆེན་པོ་འཇིགས་མེད་ཕྲིན་ལས་འོད་ཟེར་ཀྱི་ཤངས་མཚལ་རིལ་བུ། མི་བསྐྱོད་རིལ་བུ། རྣམ་སྣང་རིལ་བུ། འཇིགས་མེད་རྒྱལ་བའི་མྱུ་གུའི་ཤངས་མཚལ་རིལ་བུ། ཉི་གྲགས་གདན་ཚབ་བསྟན་འཛིན་མཆོག་སྤྲུལ་རིན་པོ་ཆེའི་དབུ་ཐོད། རྫོགས་ཆེན་པ་གྲུབ་དབང་བླ་མ་སངས་རྒྱས་ལགས་ཀྱི་གདུང་རུས་ལས་བྱོན་པའི་རིང་བསྲེལ་བཅས། གཞན་ཡང་དམ་ཚིག་གི་རྫས་མྱོང་གྲོལ་རིལ་བུའི་སྐོར་ལ། དྭགས་པོ་གཏེར་ཆེན་རིན་པོ་ཆེའི་གཏེར་བྱོན་མྱོང་གྲོལ་ཨ་རྒྱ་ཅན། འཆི་མེད་བདུད་རྩིའི་རིལ་བུ། རྩྭ་མཆོག་ཀླུ་བདུད་རྡོ་རྗེའི་རིལ་བུ། རྒྱལ་སྲས་བདེ་ཆེན་གླིང་པས་རཏྣ་ཀོ་ཥའི་མཚོ་འགྲམ་ནས་སྤྱན་དྲངས་པའི་བདེ་བ་རྒྱས་པའི་རྩ་མཆོག་མྱོང་གྲོལ། ཆོས་གླིང་ཀུན་བཟང་འོད་ཟེར་གྱི་གཏེར་རྫས་ཨ་ཐཾ་མ། གཏེར་ཆེན་རཏྣ་གླིང་པའི་ཚེ་རིལ། བྱང་བདག་བཀྲ་ཤིས་སྟོབས་རྒྱལ་གྱི་དམ་རྫས་རིལ་བུ། རིག་འཛིན་འཇའ་ཚོན་སྙིང་པོ། རྡོ་རྗེ་བྲག་རིག་འཛིན་ཆེན་པོ། པདྨ་མདོ་སྔགས་གླིང་པ། ཀུན་མཁྱེན་འཇིགས་མེད་གླིང་པ། ཉི་གྲགས་གཏེར་ཆེན་སྐུ་ཐོག་སྔ་ཕྱི། དྭགས་པོ་གཏེར་ཆེན་རིན་པོ་ཆེ། རྒྱལ་སྲས་བདེ་ཆེན་གླིང་པ། ཀློང་ཆེན་རོལ་པ་རྩལ། གཏེར་ཆེན་པདྨ་འགྲོ་འདུལ་རྩལ་རྣམས་ཀྱིས་བསྒྲུབས་པའི་མྱོང་གྲོལ་བདུད་རྩི་ཆོས་སྨན་ཁྱད་འཕགས། ཉི་སྤྲུལ་བཞི་པ་རིན་པོ་ཆེས་གཏེར་གསར་པདྨ་དྲག་ཁྲོས་དང་། འཇམ་དབྱངས་དཀར་པོའི་སྒོ་ནས་བསྒྲུབས་པའི་རིལ་བུ། རྡོར་སྨིན་དཔལ་རི་ལྷ་ལུང་རྣམས་ཀྱི་མྱོང་གྲོལ་རིལ་བུ་དང་། བདུད་རྩི་ཆོས་སྨན། དཔལ་ཀཿཐོག་པ་རྫོགས་ཆེན་གསང་སྔགས་ཆོས་གླིང་། རྒྱལ་རོང་རྟག་བརྟན་སྒྲུབ་སྡེ་རྣམས་སུ་སྔ་ཕྱིར་བསྒྲུབས་པའི་བདུད་རྩི་ཆོས་སྨན་དང་། མྱོང་གྲོལ་རིལ་བུ། ཀཿཐོག་བླ་རབས་བཅུ་གསུམ་ཚུན་ཆད་ཀྱི་བུམ་ཆུ་རིལ་བུ། ཞི་ཁྲོ་ཁྲི་མཆོད་མང་པོ་དང་། སྔ་འགྱུར་བཀའ་མའི་དཀྱིལ་འཁོར་ཆེན་པོ་རྣམས་སུ་བསྒྲུབས་པའི་བུམ་ཆུ་རིལ་བུ། ཉི་གྲགས་གཏེར་ཆེན་རིན་པོ་ཆེ། ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ། ཉི་སྤྲུལ་བཞི་པ་བཅས་ཀྱིས་རིམ་པར་གཏའ་སྤེལ་གནང་བའི་རྟེན་འདུས་རིལ་བུ་ཁྱད་འཕགས། དཔལ་ཀཿཐོག་པའི་རྟེན་འདུས་རིལ་བུ། རྒྱ་གར་གྱི་སློབ་དཔོན་སངས་རྒྱས་ཡེ་ཤེས་ཞབས་ནས་བཟུང་རིམ་པར་སྤེལ་བའི་དཔལ་ས་སྐྱའི་རྟེན་འདམ་དཔེ་བྲལ་མ་ཞེས་ཤིན་ཏུ་ཁྱད་འཕགས། བསེ་འབག་ཞལ་བཞུགས་ཀྱི་བདུད་རྩི་རིལ་བུ་དང་། གོང་མ་སོ་སོས་ཕྱག་དྲིལ་གནང་བས་མཚོན་བདུད་རྩི་རིལ་བུ་བྱིན་ལྡན། ངོར་ཨེ་ཝཾ་པའི་པཎ་ཆེན་ག་ཡ་དྷཱ་རའི་བུམ་ཆུ། ཞྭ་ལུ་རི་སྦུགས་ཀྱི་པཎ་ཆེན་ག་ཡ་དྷཱ་རའི་བུམ་ཆུ་དང་བཅས་པ། ཀུན་མཁྱེན་བུ་སྟོན་རིན་པོ་ཆེས་རྒྱུད་སྡེ་བཞིའི་སྒྲུབ་མཆོད་གནང་བའི་བུམ་ཆུ་རིལ་བུ། ཚར་ཆེན་བློ་གསལ་རྒྱ་མཚོས་རྟ་མགྲིན་ཡང་གསང་ཁྲོས་པའི་དཀྱིལ་འཁོར་དུ་བསྒྲུབས་པའི་བདུད་རྩི་ཆོས་སྨན། རིགས་གསུམ་མགོན་པོའི་སྒོ་ནས་བསྒྲུབས་པའི་དངོས་གྲུབ་རིལ་བུ། འཇམ་དབྱངས་སྨྲ་བའི་སེངྒེའི་རིལ་བུ། ཀརྨ་པའི་དམ་རྫས་མྱོང་གྲོལ་རིལ་ནག་ཆེན་མོ། རྗེ་སྒམ་པོ་པའི་མྱོང་གྲོལ་རིལ་ནག་གི་ཕབ་རྒྱུན། དཔལ་སྟག་ལུང་པའི་རྟེན་འདུས། དགེ་ལུགས་པའི་མ་ཎི་རིལ་བུ། ཇོ་བོ་རིན་པོ་ཆེའི་སྐུ་ལ་ཁྲུས་ཆབ་གསོལ་བའི་རིལ་བུ། ཉི་སྤྲུལ་རིན་པོ་ཆེ་ནས་དབུས་གཙང་སྤྲུལ་པའི་ཞིང་གི་རྟེན་གསུམ་ཁྱད་པར་ཅན་རྣམས་ལ་སྐུ་ཁྲུས་གསོལ་བའི་རིལ་བུ། ཕོ་བྲང་ཆེན་པོ་པོ་ཏཱ་ལའི་གསེར་གདུང་འཛམ་གླིང་རྒྱན་གཅིག་བཞེངས་པའི་ཚེ་སྦྱར་བའི་རྟེན་འདུས་ཁྱད་འཕགས་ཀྱི་ཕབས་རྒྱུན་གྲུབ་མཐའ་རིས་མེད་ཀྱི་རྟེན་འདུས་རིལ་བུའི་ཕབ་རྟ་བཅས། སྐུ་བལ་གྱི་རིང་བསྲེལ་ལ། གཏེར་ཆེན་ཀུན་བཟང་འོད་ཟེར་གྱིས་གཏེར་བྱོན་སློབ་དཔོན་རིན་པོ་ཆེའི་ཟབ་བེར། དྭགས་པོ་གཏེར་ཆེན་གྱི་གཏེར་བྱོན་མཁན་ཆེན་བོ་དྷི་ས་ཏྭའི་ཆོས་གོས་ཀྱི་ཚལ་བུ། ཡེ་ཤེས་ཀྱི་ཌཱ་ཀི་ནཱི་འཆི་མེད་མནྡཱ་ར་བ་དང་། བདེ་ཆེན་ཡེ་ཤེས་མཚོ་རྒྱལ་གྱི་དབུ་སྐྲ། རྒྱ་གར་གྱི་གྲུབ་ཆེན་ཏེ་ལོ་པའི་བཞུགས་གདན་ཀྲྀཥྞ་སཱ་རའི་པགས་པའི་དུམ་བུ། རྗེ་བཙུན་དམ་པ་རྒྱ་གར་གྱི་སྒོམ་ཐག །དཔལ་ལྡན་ཨ་ཏཱི་ཤའི་ཆོས་གོས་ཀྱི་ཚལ་བུ། གྲུབ་དབང་མར་པ་ཡབ་སྲས་ཀྱི་གདུང་རས། གཏེར་ཆེན་གུ་རུ་ཆོས་དབང་གི་ཕྱག་དར། དབུ་ཞྭ་གྲུབ་ཆེན་ཐང་སྟོང་རྒྱལ་པོའི་སླེ་བེར་གྱི་ཚལ་བུ་དང་ཕྱག་མཁར་གྱི་ཆ་ཤས། ཁྲི་སྲོང་རྣམ་འཕྲུལ་དཔལ་བཀྲ་ཤིས་སྟོབས་རྒྱལ་གྱི་ན་བཟའ། རྡོ་བྲག་རིག་འཛིན་པདྨ་ཕྲིན་ལས་ཀྱི་ན་བཟའ། དབུ་སྐྲ་ཕྱག་ཕྲེང་གི་ཐགས་པ། སྐལ་བཟང་པདྨ་དབང་ཕྱུག་ན་བཟའ། རིག་འཛིན་ཁམས་གསུམ་ཟིལ་གནོན་གྱི་དབུ་སྐྲ། གྲུབ་དགོན་པ་འཇིགས་མེད་ཆོས་གྲགས་ན་བཟའ། སྔ་འགྱུར་བསྟན་པའི་སྲོག་ཤིང་གཅིག་པུར་གྱུར་པ་སྨིན་གླིང་གཏེར་ཆེན་རིན་པོ་ཆེའི་ན་བཟའ། དབུ་སྐྲ། ལོ་ཆེན་དྷརྨཱ་ཤྲཱིའི་ཆོས་གོས། གཏེར་ཆེན་འཇའ་ཚོན་སྙིང་པོའི་ན་བཟའ། རིག་འཛིན་བདུད་འདུལ་རྡོ་རྗེའི་ཕུར་དར། ཕྱག་ཕྲེང་། སྐུ་བེར། སྟག་བླ་པདྨ་མ་ཏིའི་ན་བཟའ། གྲུབ་དབང་རྫོགས་ཆེན་པ་པདྨ་རིག་འཛིན་གྱི་ན་བཟའ། དབུ་ཞྭའི་ཚལ་བུ། དཔོན་སློབ་ནམ་མཁའ་འོད་གསལ་གྱི་ན་བཟའ། གཏེར་ཆེན་ཉི་མ་གྲགས་པ་དང་། ཉི་སྤྲུལ་གཉིས་པ་ཐེག་མཆོག་བསྟན་པའི་རྒྱལ་མཚན་གྱི་ན་བཟའ། དབུ་སྐྲ། ཉི་སྤྲུལ་གསུམ་པའི་ན་བཟའ། རྗེ་དབོན་རིན་པོ་ཆེ་པདྨ་ཀུན་གྲོལ་རྣམ་རྒྱལ་གྱི་ན་བཟའ། དཔོན་སློབ་རིན་པོ་ཆེ་པདྨ་གསང་སྔགས་བསྟན་འཛིན་དང་། ངེས་དོན་བསྟན་འཛིན་བཟང་པོའི་གདུང་རས། རིག་འཛིན་ཆེན་པོ་དཔའ་བོ་ལས་རབ་རྩལ་གྱི་ན་བཟའ་དང་། དབུ་སྐྲ། ནམ་མཁའ་ཚེ་དབང་མཆོག་གྲུབ་ཀྱི་སྐུ་རེག །དབུ་ལྗོན། དྭགས་པོ་གཏེར་ཆེན་རིན་པོ་ཆེའི་ དབུ་སྐྲ། ན་བཟའ། གཏེར་ཆེན་པདྨ་འགྲོ་འདུལ་རྩལ་གྱི་ན་བཟའ་དང་། དབུ་སྐྲ། སྐུ་རེག །ཉི་གྲགས་གཏེར་ཆེན་རིན་པོ་ཆེའི་ཀརྨ་མུ་དྲ། ཡེ་ཤེས་མཚོ་རྒྱལ་གྱི་རྣམ་འཕྲུལ་ཀུན་བཟང་དབང་མོའི་དབུ་སྐྲ། གདན་ཚབ་བསྟན་འཛིན་མཆོག་སྤྲུལ་རིན་པོ་ཆེའི་དབུ་ཞྭ། རྩོད་པའི་དུས་ཀྱི་ཐམས་ཅད་མཁྱེན་ཅིང་གཟིགས་པ་ཆེན་པོ་རིག་འཛིན་འཇིགས་མེད་གླིང་པ། འཇིགས་མེད་ཕྲིན་ལས་འོད་ཟེར། འཇིགས་མེད་རྒྱལ་བའི་མྱུ་གུ། ཕྱག་ན་པདྨོ་དམ་ཚིག་རྡོ་རྗེ་རྣམས་ཀྱི་ན་བཟའ། དབུ་སྐྲ། རིག་འཛིན་པདྨ་བཤེས་གཉེན་གྱི་ཕུར་དར། སྤྲུལ་པའི་གཏེར་སྟོན་རིག་འཛིན་ཀློང་གསལ་སྙིང་པོའི་ན་བཟའ། བཞུགས་གདན། རིག་འཛིན་ཀུན་བཟང་ཤེས་རབ། རྒྱལ་སྲས་བསོད་ནམས་ལྡེའུ་བཙན། རིག་འཛིན་ཚེ་དབང་ནོར་བུ། དྲི་མེད་ཞིང་སྐྱོང་མགོན་པོ། རྒྱལ་སྲས་རྟ་མགྲིན་དབང་ཆེན། རྨོག་གྲུབ་ནམ་མཁའ་ཆོས་དབང་རྣམས་ཀྱི་ན་བཟའ། རྨོག་གྲུབ་རིན་པོ་ཆེའི་ཕྱག་ཕྲེང་། འགྱུར་མེད་ཚེ་དབང་མཆོག་གྲུབ། ཀུན་བཟང་ངེས་དོན་དབང་པོ། འཇིགས་མེད་རིག་འཛིན་མགོན་པོ་རྣམས་ཀྱི་ན་བཟའ་དང་། དབུ་སྐྲ་བཅས། གཞན་ཡང་གྲུབ་མཐའ་རིས་མེད་ཀྱི་སྐོར་ལ། ངོར་ཆེན་རྡོ་རྗེ་འཆང་ཆེན་པོའི་ན་བཟའ་དང་། དབུ་ཞྭའི་ཚལ་བུ། རྒྱལ་ཚབ་དམ་པ་ཀུན་དགའ་དབང་ཕྱུག །ཡོངས་འཛིན་དཀོན་མཆོག་འཕེལ་བ། ཐམས་ཅད་མཁྱེན་པ་དཀོན་མཆོག་ལྷུན་གྲུབ། ཚར་ཆེན་བློ་གསལ་རྒྱ་མཚོ། པཎ་ཆེན་ནམ་མཁའ་དཔལ་བཟང་། བྲང་ཏི་ནམ་མཁའ་སངས་རྒྱས། རྡོ་རྗེ་འཆང་དབང་ཕྱུག་རབ་བརྟན། མགོན་པོ་བསོད་ནམས་མཆོག་ལྡན། མཁན་ཆེན་ནམ་མཁའ་བསམ་འགྲུབ། དཔལ་ས་སྐྱ་པ་ངག་དབང་ཀུན་དགའ་བློ་གྲོས། མཁན་ཆེན་དཔལ་ལྡན་ཆོས་སྐྱོང་། ཤར་ཆེན་མི་འགྱུར་རྒྱལ་མཚན། འཇམ་མགོན་དབང་སྡུད་སྙིང་པོ། རྗེ་བཙུན་མ་འཆི་མེད་བསྟན་པའི་ཉི་མ། མཁན་ཆེན་ནམ་མཁའ་འཆི་མེད་བཅས་ཀྱི་ན་བཟའ་ཚལ་བུ་བཅས་དང་། རྒྱལ་དབང་ཀརྨ་པ་རང་བྱུང་རྡོ་རྗེ། ཆོས་དབྱིངས་རྡོ་རྗེ། ཞྭ་དམར་ཆོས་ཀྱི་དབང་ཕྱུག །སི་ཏུ་ཆོས་ཀྱི་འབྱུང་གནས་དཔའ་བོ་གཙུག་ལག་དགའ་བ། འབྲུག་པ་རིན་པོ་ཆེ་བཀའ་བརྒྱུད་ཕྲིན་ལས་ཤིང་རྟ་རྣམས་ཀྱི་ན་བཟའ། དྭགས་པོ་རིན་པོ་ཆེ་འཛམ་གླིང་ནོར་བུ་རྒྱན་པའི་ན་བཟའ། རྗེ་རིན་པོ་ཆེ་བློ་བཟང་གྲགས་པའི་ན་བཟའ། པཎ་ཆེན་བློ་བཟང་ཆོས་རྒྱན་གྱི་ན་བཟའ། རྒྱལ་དབང་ལྔ་པ་རིན་པོ་ཆེ་ངག་དབང་བློ་བཟང་རྒྱ་མཚོའི་དབུ་སྐྲ། བདུན་པ་བསྐལ་བཟང་རྒྱ་མཚོའི་འགན་སྦྱར། རྒྱལ་བ་ཚུལ་ཁྲིམས་རྒྱ་མཚོའི་སྤུར་རས། རྒྱལ་ཚབ་དེ་མོ་རིན་པོ་ཆེའི་དབུ་སྐྲ་བཅས་སོ།། །།ཆོས་སྐུའི་རིང་བསྲེལ་དུ་གཏོགས་པའི་གཏེར་བྱོན་གྱི་ཤོག་སེར་སྐོར་ལ། མངའ་བདག་ཉང་གི་གཏེར་བྱོན་བཀའ་བརྒྱད་བདེ་གཤེགས་འདུས་པའི་ཤོག་སེར། གུ་རུ་ཆོས་དབང་གཏེར་བྱོན་ཐུགས་རྗེ་ཆེན་པོ་ཡང་སྙིང་འདུས་པའི་ཤོག་སེར། རིག་འཛིན་རྒོད་ལྡེམ་དང་། འཇའ་ཚོན་སྙིང་པོའི་གཏེར་ཤོག །གཏེར་ཆེན་བདུད་འདུལ་རྡོ་རྗེའི་སྒྲོལ་དཀར་ཤོག་སེར། རིག་འཛིན་ཉི་མ་གྲགས་པའི་རྟ་མགྲིན་དྲེགས་པ་ཟིལ་གནོན་དང་། པདྨ་དྲག་པོའི་ཤོག་སེར། ཀློང་གསལ་གཏེར་བྱོན་ཡེ་ཤེས་རབ་འབར་རྩ་རྒྱུད་ཀྱི་ཤོག་སེར། གཏེར་སྟོན་མ་ཏི་རཏྣའི་སེར་གདོང་བདུད་འདུལ་དྲག་མོའི་ཤོག་སེར། ཆོས་གླིང་ཀུན་བཟང་འོད་ཟེར་གྱི་གཏེར་བྱོན་རྡོ་རྗེ་གྲོ་ལོད་གནམ་ལྕགས་མེ་འཁོར་གྱི་ཤོག་སེར། རྒྱལ་སྲས་བདེ་ཆེན་གླིང་པའི་གཏེར་ཁོག་ལ་སེར་གྱི་སྒྲོམ་བུའི་ཚལ་བུ། སྤྲུལ་པའི་གཏེར་སྟོན་པདྨ་འགྲོ་འདུལ་རྩལ་གྱི་གཏེར་ཤོག །ལོ་ཆེན་བཻ་རོའི་ཕྱག་བྲིས་ཀྱི་རྒྱ་དཔེ་ལེ་ཚན་གསུམ་དང་། ཤེར་ཕྱིན་བཅས། ཁྱད་པར་ཆོས་སྐུའི་རིང་བསྲེལ་དངོས་གཟུངས་ཀྱི་རིམ་པ་ནི། སྔ་འགྱུར་འོད་གསལ་རྡོ་རྗེ་སྙིང་པོའི་བཤད་སྒྲུབ་ཀྱི་ཆུ་གཏེར་ཆེན་པོ་རྫོགས་ཆེན་གསང་སྔགས་ཆོས་གླིང་དང་། བེ་རི་བསྟན་རྒྱས་གླིང་། ཉག་བྲག་མགོའི་འདུས་སྡེ་རྣམས་སུ་བཞུགས་པའི་འཕྲུལ་ཆེན་པར་གྱི་ཕྱི་མོ་ལ་ཉེ་བར་དྲངས་པ་ལ། ཐོག་མར་སྡོམ་པ་གསུམ་གྱི་བླ་མ་བརྒྱུད་པའི་མཚན་སྔགས་ནས་བརྩམས་ཏེ། རྡོ་རྗེ་ཐེག་པ་བླ་མེད་ཀྱི་རྒྱུད་སྔ་འགྱུར་ལ་འདུས་པ་ཆེན་པོའི་མདོ། །རྒྱུད་སྡེ་སྒྱུ་འཕྲུལ། སྒྲུབ་སྡེ་བཀའ་བརྒྱད། བླ་མ་ཞི་དྲག་སོགས་ཀྱིས་མཚོན་བཀའ་གཏེར་གྱི་རིང་ལུགས་རྒྱ་མཚོ་ལྟ་བུ་དང་། ཕྱི་འགྱུར་གསར་མ། གཉིས་སུ་མེད་པའི་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་དང་སྒྱུ་འཕྲུལ་དྲྭ་བ། མ་རྒྱུད་འཁོར་ལོས་སྒྱུར་བ་དྲུག །ཕ་རྒྱུད་རིགས་དྲུག་ལ་སོགས་བོད་དུ་འགྱུར་རོ་ཅོག་གི་རྒྱུད་སྡེ་ཕལ་མོ་ཆེའི་རྩ་སྔགས། སྙིང་པོ། ཉེ་སྙིང་། རྣལ་འབྱོར་གྱི་རྒྱུད་རྩ་བཤད་ཆ་མཐུན་དང་བཅས་པ། སྤྱོད་རྒྱུད་རིགས་གསུམ། བྱ་རྒྱུད་སྒོ་དྲུག་རྣམས་ཀྱི་གཟུངས་སྔགས། གཟུངས་ཆེན་སྡེ་ལྔ། རྡོ་རྗེའི་ཆོས་སྲུང་རྒྱ་མཚོ། གནོད་སྦྱིན་ནོར་ལྷ་ཇི་སྙེད་པའི་སྙིང་པོ། མཐའ་རྟེན་འདོད་གསོལ་བསྔོ་སྨོན་ཤིས་བརྗོད་དང་བཅས་ཚར་དུ་མ་དྲི་བཟང་དང་བདུད་རྩིའི་ཕུར་མས་ཁྱབ་པར་བྱུགས་ཤིང་། དྲིལ་ལུགས་ན་བཟའ་ སོགས་ཞིབ་མོ་རྣམ་པར་འཐག་པའི་བཅའ་ག་དང་ལྡན་པ། གཞན་ཡང་སྐུ་གསུང་ཐུགས་རྟེན་ཀྱི་རིགས་སྣ་ཚོགས་ལ། སྐུ་རྟེན་དུ་ཐུབ་དབང་སྐུ་ཚབ་རྒྱ་གར་ལི་མ། བོད་ལི་དང་རྒྱ་ནག་ལི་མའི་ཐུབ་སྐུ་རེ་རེ། དབུས་ལི་ལས་གྲུབ་པའི་ཡུམ་ཆེན་མོའི་སྐུ། ཟངས་གསེར་ལས་གྲུབ་པའི་འོད་དཔག་མེད། སློབ་དཔོན་རིན་པོ་ཆེ། རྗེ་བཙུན་སྒྲོལ་མ་རྣམས་ཀྱི་སྣང་བརྙན། རྫོགས་ཆེན་རིན་པོ་ཆེའི་ཕྱག་པར་ཚེ་དཔག་མེད་ཀྱི་སྐུ། རྨོག་གྲུབ་རིན་པོ་ཆེའི་ཕྱག་པར་རྟེན་འདམ་ལས་གྲུབ་པའི་ཚེ་དཔག་མེད། སྒྲོལ་མ་དཀར་སྔོན། རྗེ་བཙུན་མི་ལའི་སྣང་བརྙན། སི་ཏུ་རིན་པོ་ཆེའི་ཕྱག་པར་སློབ་དཔོན་ཆེན་པོའི་སྐུ། རིག་འཛིན་འཇིགས་མེད་དཔའ་བོའི་ཕྱག་པར་མཚོ་སྐྱེས་རྡོ་རྗེའི་སྐུ། རྒྱལ་སྲས་བདེ་ཆེན་གླིང་པའི་ཕྱག་པར་གུ་རུ་གཙོ་འཁོར་གསུམ་གྱི་སྣང་བརྙན་སྨན་འདམ་ལས་གྲུབ་པའི་བིར་ཝ་པ་དང་། ས་ཆེན་ཀུན་དགའ་སྙིང་པོའི་སྐུ་འདྲ་བཅས་སོ།། །།གསུང་རྟེན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་གླེགས་བམ་བཅུ་གཉིས། མདོ་སྡེ་བསྐལ་པ་བཟང་པོ། རྡོ་རྗེ་གཅོད་པ་གསེར་བྲིས། རིན་ཆེན་གཉིས་པས་བྲིས་པའི་སློབ་དཔོན་རིན་པོ་ཆེའི་རྣམ་ཐར། འཇམ་དཔལ་སྒྱུ་འཕྲུལ་དྲྭ་བའི་རྒྱུད། དྲི་མེད་བཤགས་རྒྱུད་ཆ་གཉིས། དཔང་སྐོང་ཕྱག་རྒྱ་པ་བཅས། འོད་དཔག་ཏུ་མེད་པའི་བཀོད་པ་བསྟན་པའི་མདོ་མཚལ་བྲིས། སོ་སོར་ཐར་པའི་མདོ། ཨོ་རྒྱན་རིན་པོ་ཆེའི་རྣམ་ཐར་ཐང་ཡིག་སྡེ་ལྔ། མངའ་རིས་མ་ཧཱ་པཎྜི་ཏ་པདྨ་དབང་རྒྱལ་རྡོ་རྗེའི་སྡོམ་གསུམ་རྣམ་ངེས་རྩ་འགྲེལ་གཞི་གསུམ་གྱི་ཆོ་ག །ཤྲཱི་ཧེ་བཛྲའི་སྒྲུབ་དཀྱིལ། འོག་མིན་ཚོགས་ཆེན་འདུས་པའི་སྒྲུབ་ཁོག །གཏེར་ཆེན་རཏྣ་གླིང་པའི་ཕུར་པ་ཡང་གསང་བླ་མེད། སྨིན་གླིང་གཏེར་བྱོན་ཚེ་དཔག་མེད་འཆི་མེད་ཡང་སྙིང་། བདུད་འདུལ་སྒྲོལ་དཀར། ཕྱག་རྡོར། རིག་འཛིན་ཉི་གྲགས་པའི་བླ་མ་རྩ་གསུམ་གསང་བ་འདུས་པ། ཡི་དམ་པདྨ་དྲག་པོ། སྨན་བླ་བདུད་རྩི་ཐིགས་པ་རྣམས་ཀྱི་སྒྲུབ་སྐོར། ཐུགས་རྗེ་ཆེན་པོ་མ་རིག་མུན་སེལ་གྱི་ཐོས་གྲོལ་ཚོར་བ་རང་གྲོལ། གཏེར་ཆེན་པདྨ་འགྲོ་འདུལ་རྩལ་གྱི་གཏེར་བྱོན་བླ་མ་ལོངས་སྐུའི་སྐོར་ཆ་ཚང་། བདེ་བ་ཅན་གྱི་ཞིང་བཀོད་སྨོན་ལམ། གསོལ་འདེབས་བསམ་པ་ལྷུན་གྲུབ་བཅས། ཐུགས་རྟེན་དུ། བདེ་གཤེགས་མཆོད་རྟེན་བརྒྱད། ཇོ་བོ་སྨྲི་ཏི་ཛྙཱ་ནའི་ཕྱག་པར་སཱཙྪ་རྣམས་ཏེ། དེ་ཡང་ཐོག་མར་སྲོག་ཤིང་མཚན་ཉིད་ལྡན་པར་གནས་སོ་སོའི་སྔགས་ཀྱིས་མཚོན་འབྲི་བར་འོས་པ་རྣམས་ལྷག་ཆད་མེད་པར་བཀོད་པ་ཉིད་སྐུ་དབུས་དྲང་པོར་བཙུགས་པའི། སྤྱི་བོ་ནས་བཟུང་གདན་ཁྲིའི་བར་སོ་སོའི་ནང་གཟུངས་ཀྱི་རིམ་པ་རྣམས་གོང་འོག་མ་འཁྲུལ་པ་དང་། སྨིན་མཚམས་སུ་རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་རྒྱལ་བ་རིག་འཛིན་གྱི་སྲོག་འཁོར། ཡུམ་ཀའི་མཐོང་གྲོལ་ཙཀྲ། སངས་རྒྱས་སྲས་གཅིག་གི་རྒྱུད་སོགས་དང་། སྐྱིལ་ཀྲུང་གི་མཚམས་སུ་འཇམ་དཔལ་དཔའ་བོ་གཅིག་གྲུབ་ཀྱི་རྒྱུད་ལས་གསུངས་པའི་གནོད་སྦྱིན་ཕོ་དགུ་མོ་དགུའི་འཁོར་ལོ་དུ་མ། དེ་ཡི་འོག་ཏུ་གཏེར་ཆེན་པོའི་བུམ་པ་དང་། ཕྱོགས་མཚམས་ཀུན་ཏུ་འཕགས་བལ་བོད་ལྗོངས་མ་ཧཱ་ཙི་ན་སོགས་ཀྱི་གནས་རྟེན་མང་པའི་ས་སྣ། ཆུ་སྣ། ཤིང་སྣ། དུག་རིགས་མ་འདྲེས་པའི་སྨན་སྣ་ཚོགས། མེ་ཏོག་སྣ་ཚོགས། འབྲུ་སྣ་ཚོགས། རིན་པོ་ཆེ་དང་། དར་ཟབ་སྣ་ཚོགས། དཀྱིལ་འཁོར་མང་པོའི་རྡུལ་ཚོན། རབ་གནས་ལན་གྲངས་དུ་མས་བསྒྲུབས་པའི་མེ་ཏོག་སོགས་བཀྲ་ཤིས་ཤིང་བྱིན་ཆགས་པའི་དངོས་གྲུབ་ཀྱི་རྫས་མ་ཚང་བ་མེད་པས་ཁོར་ཡུག་ཏུ་ཁྱབ་པར་བགྱིས་པས་མཚོན། མདོར་ན་མཁས་ཤིང་གྲུབ་པ་བརྙེས་པའི་སློབ་དཔོན་རྣམས་ཀྱི་ཞལ་ལུང་དང་། མཐོང་བ་བརྒྱུད་པའི་ཕྱག་ལེན་རྣམ་པར་དག་པ་ལ་བརྟེན་ནས་ཚུལ་བཞིན་དུ་བཞུགས་སུ་གསོལ་བ་དང་། སྐུའི་གཡས་སུ་བདག་ཅག་གི་སྟོན་པ་བདེ་བ་ཆེན་པོ་པདྨཱ་ཀ་རའི་སྤྱན་སྔར་འཆི་མེད་སྒྲུབ་པའི་དགྱེས་སྡེ་མནྡཱ་ར་བ། མཁས་གྲུབ་ཁྱུང་པོའི་དུས་སུ་ཌཱཀྐི་ནཱི་གུ་མ། གྲུབ་དབང་མར་པ་ལོ་ཙཱའི་དུས་སུ་ཆུ་ཤིང་གི་སྙེ་མ་ཅན། གཉན་ལོ་ཙཱ་བའི་དུས་སུ་རི་སུལ་གྱི་རྣལ་འབྱོར་མ། རྗེ་བཙུན་འཇའ་ཚོན་སྐུ་ཅན་རས་ཆུང་ཞབས་ཀྱིས་མཇལ་བའི་ཚེ་མ་གཅིག་གྲུབ་པའི་རྒྱལ་མོ་སོགས་མཚན་དང་སྐུའི་རྣམ་འགྱུར་འདོད་དགུར་བསྒྱུར་བ་ཡེ་ཤེས་ཀྱི་མཁའ་འགྲོ་བྱེ་བའི་གཙུག་རྒྱན་དེ་ཉིད་དང་། སྐུའི་གཡོན་དུ་སངས་རྒྱས་གཉིས་པ་ཨཽ་ཌཱི་ཡ་ནའི་སློབ་དཔོན་ཆེན་པོ་ཉིད་བསིལ་ལྗོངས་ཀྱི་གདུལ་བྱ་རྣམས་ལ་ཐུགས་ལྷག་པར་བརྩེ་བས། སྐུ་གསུང་ཐུགས་ཡོན་ཏན་ཕྲིན་ལས་ཀྱི་གནས་ལྔ། བྲག་ཕུག་ཆེན་པོ་བརྒྱད། གངས་ཆེན་ཉི་ཤུ་རྩ་གཅིག་སོགས་སྦས་པའི་གནས་ཆེན་བསམ་གྱིས་མི་ཁྱབ་པ་རྡོ་རྗེའི་དཀྱིལ་འཁོར་ཆེན་པོར་བྱིན་གྱིས་བརླབས་ཏེ་གཏེར་ཁ་གྲངས་མེད་པ་སྦས། ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་མཐའ་ཀླས་པར་བསྐོར་བ་རྣམས་ཀྱི་བཀའི་བསྡུ་བ་པོ་གཅིག་པུ་མི་བརྗེད་གཟུངས་ཐོབ་དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་ཏེ་རྣམ་པ་གཉིས་ལའང་ཡུངས་འབྲུ་ལྟ་བུའི་རིང་བསྲེལ་སོགས་ཀྱིས་མཚོན་སྔ་མ་དང་ཆ་མཚུངས་པའི་ནང་གཟུངས་རྨད་དུ་བྱུང་བ་དང་། ཁོ་བོ་ཅག་གིས་ཆེད་དུ་བསྐུལ་ཏེ་བཞེངས་པའི་སྟོན་མཆོག་ཐུབ་པའི་དབང་པོའི་སྣང་བརྙན་ཡིད་བཞིན་བསམ་འཕེལ། འཁོར་འཕགས་པའི་གནས་བརྟན་བཅུ་དྲུག་དྷརྨ་ཏཱ། རྒྱལ་ཆེན་སྡེ་བཞི། སྦྱིན་བདག་ཧ་ཤང་དང་བཅས་པ་རྣམས་ལས། གཙོ་བོའི་ཐུགས་ཀར་ཐུབ་པའི་དབང་པོའི་ཞལ་སྐྱིན་ལི་དཀར་ལས་གྲུབ་པས་མཚོན་རིང་བསྲེལ་རྣམ་པ་བཞི་ཏིལ་གྱི་གོང་བུ་ལྟར་གཏམས་ཏེ་བཞུགས་པ་ཡིན་ནོ།། །། དེ་ལྟ་བུའི་དགེ་ཚོགས་རིན་པོ་ཆེའི་བྱ་བ་ལ་ཐོག་མར་འཇུག་པ་ནས། དུས་གསུམ་གྱི་རྒྱལ་བ་སྲས་དང་བཅས་པའི་ཡེ་ཤེས་ཀྱི་གཟིགས་པས་ལྷག་པར་དགོངས་པའི་བྱིན་རླབས་ཀྱིས། ནག་པོའི་རྩ་ལག་སྡེ་དང་བཅས་པའི་བར་ཆད་ཀྱི་མཚན་མ་ཕྲ་མོ་ཙམ་གྱིས་ཀྱང་བརྫི་བར་མེད་པར་བཟོ་ཡི་བྱ་བ་ལེགས་པར་མཐར་ཕྱིན་པ་དང་། རབ་ཏུ་གནས་པའི་རྒྱུད་ལས། །རྒྱན་རྣམས་མ་ལུས་པ་ཡིས་ནི། །ཕྱིས་ནས་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། གཞན་དག་ཀྱང་ནི་མཆོད་པར་བགྱི། ཞེས་གསུངས་པ་ལྟར་བཟོ་གནས་ཀྱི་རིག་པ་འཛིན་པ་ཉིད་ཟང་ཟིང་གི་བདོག་པ་གྱ་ནོམ་པས་ཤིན་ཏུ་མགུ་བར་བགྱིས་ཤིང་། སྔ་མ་ལས། ཆོ་ག་དང་ནི་ནུས་པ་ཡི། །བརྟག་པ་ལས་གསུངས་ཚུལ་ལེགས་པ། །དེར་བྱས་བསོད་ནམས་ཆེ་བ་ཡིན། ཞེས་དང་། སློབ་དཔོན་ཆེན་པོས། ཕྱིར་བས་རྟེན་གསུམ་བཞེངས་པ་རྣམས། །གྲུབ་དང་རབ་གནས་མཉམ་དུ་བྱ། ཞེས་སོགས་རྒྱ་ཆེར་གསུངས་པའི་དོན་ཐུགས་ལ་བཅགས་ཏེ་བྱ་བྲལ་བླ་མ་དམ་པ་ཉིད་ནས་ཁོ་བོ་ཅག་ལ་ནན་ཏན་གྱིས་ཆེད་དུ་བསྐུལ་བ་བཞིན་ཚོགས་ཀྱི་སློབ་དཔོན་གྱི་ཁུར་བཟུང་སྟེ། མཆོག་སྤྲུལ་རིན་པོ་ཆེ་འཇིགས་མེད་རྡོ་རྗེ་སོགས་ངོས་ཅག་འདུས་པ་རྣམས་ཀྱིས་གྲོ་བཞིན་ཟླ་བའི་དཀར་ཕྱོགས་ཀྱི་དགའ་བ་དང་པོ་གཟའ་སྐར་བྱེད་སྦྱོར་ཕུན་སུམ་ཚོགས་པ་ནས་བརྩམས་ཏེ། རིག་འཛིན་བླ་མ་ཐམས་ཅད་འདུས་པའི་བདག་ཉིད་རྩ་གསུམ་རྒྱ་མཚོའི་ངོ་བོ་འཆི་མེད་པདྨ་ཀ་རའི་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་དང་། བདག་ཉིད་འཇུག་ཅིང་དབང་བླང་བ་སྔོན་དུ་འགྲོ་བས། རབ་གནས་ཀྱི་ཆོ་ག་རྨད་དུ་བྱུང་བའི་ལེགས་བཤད་ཀྱི་གཏེར་ཆེན་པོ་བཀྲ་ཤིས་འདོད་འཇོ་དགོངས་དོན་མ་འཁྲུལ་བར་དངོས་སྟ་ཉིན་གསུམ་དང་། རྒྱས་པའི་སྦྱིན་སྲེག་སོགས་མཐའ་རྒྱས་སུ་བསྒྲུབས་ཤིང་། སླར་ཡང་རྒྱུད་ལས། བསྙེན་རྫོགས་རྟགས་ལྡན་རྣལ་འབྱོར་པས། །གཟིགས་པས་རབ་གནས་དམ་པ་ཆགས། ཞེས་གསུངས་པ་ལྟར། དཔལ་གསང་བའི་བདག་པོ་རིག་གྲོལ་ངུར་སྨྲིག་ཟློས་གར་ལ་རྩེན་པ་རྨོག་གྲུབ་རིན་པོ་ཆེ་འཇིགས་བྲལ་ཆོས་དབྱིངས་རྡོ་རྗེ་དང་། བཅུ་ཕྲག་རིག་པའི་མ་ཧཱ་པཎྜི་ཏ་འཇམ་དཔལ་དབྱངས་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོ་སོགས་དམ་པའི་སྐྱེས་བུ་དུ་མས་ཀུན་རྫོབ་བརྡའི་ཆོ་ག་དང་། དོན་དམ་ཆོས་དབྱིངས་མཉམ་པ་ཆེན་པོ་ཡེ་ཤེས་རྡོ་རྗེས་ལྷག་པར་གནས་པས་ཡེ་ཤེས་པ་མངོན་དུ་བཞུགས་པར་མཛད་པའི་སྣང་བརྙན་འདི་རྣམས་ཀྱི་སྤྱན་སྔར། ཆོས་སྣང་བའི་སྒོ་དང་པོར་གྱུར་པ་མི་ཕྱེད་དད་པའི་ཡིད་ཀྱིས་མདུན་བདར་ཏེ། ཡན་ལག་བདུན་པ་དང་། མཎྜལ་དང་། ཚོགས་ཀྱི་མཆོད་པ་དང་། རྡོ་རྗེའི་རྣལ་འབྱོར་ཟབ་མོ་ལ་མཉམ་པར་བཞག་པ་སོགས་རྣམ་པར་དཀར་བའི་ལས་ལ་གཅིག་ཏུ་མཛའ་བར་བྱས་པའི་ཕན་ཡོན་ནི། ཨོ་རྒྱན་རིན་པོ་ཆེ་ཉིད་ཀྱི་རྡོ་རྗེའི་གསུང་ལས། ཉོན་ཅིག་ལྷ་མོའི་གཟུགས་ཅན་ཡིད་འོང་མ༔ ང་དང་མ་འཕྲད་མ་འོངས་སེམས་ཅན་རྣམས༔ མ་རིག་མུན་པའི་སྒྲོན་མེ་སྐུ་འདྲས་བྱེད༔ པད་འབྱུང་སྐུ་ཚབ་མཆོད་པའི་རྟེན་བཞེངས་པ༔ སྐུ་གསུམ་དོན་ལྡན་བསྟན་པའི་རྒྱལ་མཚན་འཛུག༔ ཞེས་སོགས་རྒྱ་ཆེར་གསུངས་པ་ལྟར་གནས་སྐབས་སུ་ནད་གདོན་བར་ཆད་འཇིགས་པ་ཆེན་པོ་བརྒྱད་དང་བཅུ་དྲུག་སོགས་མི་མཐུན་པའི་ཕྱོགས་ཐམས་ཅད་ཞི་བ་དང་། ཚེ་བསོད་དཔལ་འབྱོར་ཡེ་ཤེས་ཡོན་ཏན་སོགས་ཇི་ལྟར་བསམ་པ་དང་མཐུན་པའི་ལེགས་ཚོགས་ཐམས་ཅད་གོང་ནས་གོང་དུ་འཕེལ་ཞིང་རྒྱས་པས་མཚོན་དགོས་འདོད་མཐའ་དག་ཡིད་བཞིན་དུ་འགྲུབ་པར་མ་ཟད་མཐར་ཐུག་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱང་ལག་རྩེར་སྩོལ་བའི་བདག་ཉིད་ཅན་དུ་གདོན་མི་ཟ་བའི་ཕྱིར། མཐའ་ཡས་པའི་སེམས་ཅན་ཐམས་ཅད་ལ་དམིགས་པའི་སྐྱེས་བུ་ཆེན་པོའི་བློ་གྲོས་ཀྱིས་གནས་འབྲེལ། ཕྱག་སྐོར། མཆོད་འབུལ་སོགས་ཚོགས་བསགས་སྒྲིབ་སྦྱོང་སྒོ་དུ་མ་ནས་བརྩོན་པ་དང་། དེ་ཐམས་ཅད་ཀྱང་བཟང་པོ་བཞི་དང་ལྡན་པའི་ཡོངས་སུ་བསྔོ་བ་དང་སྨོན་ལམ་རྒྱ་ཆེན་པོས་མཚམས་སྦྱོར་འཕགས་པ་ཀུན་ཏུ་བཟང་པོའི་རྗེས་སུ་འབྲང་བར་རྩེ་གཅིག་པའི་ཡིད་ཀྱིས་གསོལ་བ་འདེབས་པ་ལགས་སོ།། །། སླར་ཡང་སྨྲས་པ། ཨེ་མ་དད་བརྩོན་ནོར་བུའི་ས་གཞིར་སངས་རྒྱས་གཉིས་པ་མཚོ་སྐྱེས་རྗེའི། །མཚན་དཔེའི་སྣང་བརྙན་གསར་དུ་འཁྲུངས་པའི་ལེགས་བྱས་གཏམ་གྱི་སྤྲིངས་ཡིག་གིས། །རྒྱལ་ཀུན་སོ་སོར་རྟོགས་པའི་རང་གཟུགས་འོད་སྣང་མཐའ་ཡས་ཡེ་ཤེས་བྱིན། །སིནྡྷུའི་པདྨོ་སྙིང་པོར་སྨིན་པའི་ངོ་མཚར་སླར་ཡང་འོངས་པ་བཞིན། །གང་ལ་བསྙེན་པའི་ཡིད་ཀྱི་ཤིང་རྟ་ཕུན་ཚོགས་འབྱོར་པས་འགེངས་པ་ལ། །དཔག་བསམ་རྐང་འཐུང་གསར་པའི་དཔལ་དང་ཙིནྟཱ་མ་ཎིར་རྣམ་བརྟགས་ཀྱང་། །སྒྲིབ་གསུམ་ཚ་གདུང་སྟུག་པོ་འཇིལ་དང་ཀུན་མཁྱེན་སྣང་བ་སྟེར་མཁས་ཕྱིར། །ཀུན་བཟོད་འདི་ན་མཚུངས་པ་མེད་ཅེས་བསོད་ནམས་སྤྲིན་གྱི་རོལ་མོར་འཁྲོལ། །དེ་ལས་བྱུང་བའི་དགེ་ཚོགས་དྲི་མེད་ཟླ་ཤེལ་བདུད་རྩིའི་རྗེས་འགྲོ་བས། །རྒྱལ་བསྟན་ཆུ་གཏེར་ཕྱོགས་བརྒྱར་འཕེལ་ཞིང་བསྟན་འཛིན་མཆོག་རྣམས་ཞབས་པད་བརྟན། །ཡངས་པའི་འཇིག་རྟེན་དགེ་བཅུའི་སྤྱོད་པས་རྫོགས་ལྡན་དུས་སྟོན་རྒྱས་པ་དང་། །ལྷན་ཅིག་རྣམ་པ་ཐམས་ཅད་མཁྱེན་པའི་གྲོང་ཁྱེར་ཆེན་པོར་འཇུག་གྱུར་ཅིག །ཁྱད་པར་བསིལ་ལྗོངས་བཀའ་དྲིན་མཚུངས་མེད་གྲུབ་པའི་སློབ་དཔོན་ཨོ་རྒྱན་རྗེས། །བྱིན་རླབས་སྣང་བས་རྟག་ཏུ་མཛེས་བྱས་ངོ་མཚར་རྡོ་རྗེའི་གནས་ཆེན་པོར། །འོད་གསལ་སྙིང་པོའི་དོན་ལ་དབང་འབྱོར་ཐེག་མཆོག་རིག་འཛིན་འདུས་པའི་གླིང་། །བཤད་སྒྲུབ་ཟུང་གི་བགྱི་བ་དང་བཅས་ཕྱོགས་དུས་ཀུན་ཏུ་རྒྱས་པར་ཤོག །མདོར་ན་སྲིད་དང་ཞི་བའི་ལེགས་བྱས་ཨུཏྤལ་གཞོན་ནུའི་སྙེ་མ་ནི། །ཡོངས་སུ་བསྔོ་བའི་བདུད་རྩིས་བརླན་པའི་དགེ་མཚན་ཕུན་སུམ་ཚོགས་པའི་དཔྱིད། །ཡིད་ཅན་རྒྱ་མཚོའི་ཉེར་འཚོ་གཅིག་གྱུར་ཕན་བདེའི་དགའ་སྟོན་དར་བབས་པའི། །བཀྲ་ཤིས་སྣང་བ་དམ་པའི་དཔལ་གྱིས་ས་གསུམ་ཀུན་ཏུ་ཁྱབ་གྱུར་ཅིག །ཅེས་པའང་རྣམ་དཀར་གྱི་ཕྲིན་ལས་རྨད་དུ་བྱུང་བའི་བདག་པོའི་རྐྱེན་རིག་འཛིན་བླ་མ་དམ་པ་ཉིད་ནས་ཟིན་ཐོ་དང་བཅས་ཡང་ཡང་བཀའ་སྩལ་གནང་བ་ལས་རྒྱལ་ཁམས་ཕྱོགས་མེད་ཀྱི་བྱ་བྲལ་བ་ཤཱཀྱའི་དགེ་སློང་ཐེག་པ་མཆོག་གི་རྣལ་འབྱོར་པ་འཆད་རྩོད་རྩོམ་པའི་ཚུལ་ལ་བློ་གྲོས་ཀྱི་འཇུག་པ་ཅུང་ཟད་ཤར་བ་ཀུན་མཁྱེན་བླ་མ་དགྱེས་པའི་འབངས་གཙུག་ལག་སྨྲ་བའི་ཉི་མ་ཞེས་བགྱི་བས་སྦྱར་བ་སརྦ་དཱ་ཀ་ལྱཱ་ཎཾ་བྷ་བ་ཏུ།། །།

[edit]

khang dmar mdo'i gu ru'i snang brnyan bzhengs pa'i dkar chag legs byas sprin gyi rol mo/ @#/__/sangs rgyas gnyis pa mtsho skyes rdo rje'i snang brnyan gsar du 'khrungs pa'i gtam legs byas sprin gyi rol mo zhes bya ba bzhugs so//_ 'chi med gdod ma'i mgon po ye shes ni/__/'chi med bde chen rdo rje'i rnam rol can/__/'chi med grub pa'i gzugs su yongs shar ba/__/'chi med mtsho skyes bla mas rtag tu skyongs/__/bral smin yon tan rgya mtsho'i mthar son ston pa mtshungs med rdzogs sangs rgyas/__/des gsungs 'gog dang lam gyis bsdus pa zhi bsil chags bral dam pa'i chos/__/de 'dzin rig grol yon tan rmad byung tshogs kyi mchog gyur dge 'dun te/__/dkon mchog gsum zhes grags pa'i snang bas dge mtshan me tog char du bsnyil/__/sku gsum ston pa'i chu gter las 'ongs nang brgyud nor bu'i kar+Nika__/rna lung dpyangs pa'i ngal 'tsho kho nas grub gnyis 'dod pa 'jo ba'i gtam/__/phyogs kyi bu mo'i 'gram par 'god mkhas snga 'gyur rig 'dzin bye snyed kyi/__/rnam par thar pa dran pa'i mod nas mchog tu gus pa'i ba spu zing /__/khyad par sras bcas rgyal ba kun gyi so sor rtogs pa'i ye shes ni/__/gcig bsdus mkhyen rab pha mtha' yas pa'i sngon med legs gsung seng ge'i sgras/__/'phags bod mkhas kun brtan pa 'phrog mdzad chos kyi rgyal po klong chen pa/__/brgyud par bcas pa'i zhabs sen cod pan gtsug tor nor bu'i 'khor lor bsnyen/__/rdo rje'i ye shes 'bar ba'i snang ba chas/__/yid srubs snying la mun pa skabs ster ba/__/dam can chos srung rgya mtsho'i phrin las kyis/__/sde bzhi'i sgo 'phar gsar pa deng phye zhig__/ces shis par brjod pa'i tshig gi me tog phra mo tsam sngon du 'thor bas lam yangs par byas te/__rnam dpyod kyi chu skyes dad pa'i bdud rtsis kha yongs su bye ba rnams kyi snyan lam du sangs rgyas gnyis pa slob dpon chen po'i snang brnyan yid bzhin nor bu 'di nyid gsar du 'khrungs pa'i tshul las brtsams te gtam gyi sbyor ba nyung zad gsol na/__gang gi tshe gzod ma nas sgrib gsum cha dang bcas pa shin tu zhi ba chos sku'i ye shes dang mi gnyis pa las/__smon lam dang snying rje'i rnam par rol pa tshad med pas rnam par snang mdzad gangs chen mtsho'i zhing khams chen po sprin bkod pa'i nang gses/__bla na med pa'i chos kyi bdud rtsi'i snod du rung ba mi mjed 'jig rten gyi khams/__'dzam gling las kyi sa pa byang chub snying po rdo rje'i gdan gyi gnod gnas dbang po'i phyogs/__bod chen po nor 'dzin gyi thig le 'bri rdza zal mo sgang zhes pa'i sa'i cha/__yul gyi dge bcu'i dpyad pa ma tshang ba med pa'i gter lta bur gyur pas yid can rnams kyi rtogs la phyogs de nyid du lhung ba'i 'babs stegs su gyur pa ga la bar/__snga 'gyur 'od gsal rdo rje snying po'i bskyed rdzogs kyi rnal 'byor zab mo dang rjes su 'brel bar spong ba bsam gtan gyi 'khor lo la gcig tu gzhol ba'i sgrub sde skye bo thun mong ba'i 'dod rgyal gyi sgrar khang mdo gu ru'i sgrub phug gam/__grub pa'i spyan ras gsal ba'i slob dpon dag gis/__pad+ma bka'i thang yig las/__mkha' 'gro phug par zla ba bzhi:__zhes rdo rje'i lung gis dpang por byas pa'i mdo khams mkha' 'gro phug tu ngos 'dzin gnang bar ma zad/__rig 'dzin bdud 'dul rdo rje'i gdung rabs lnga pa rgyal sras mthu stobs dbang phyug dang /__rdzogs pa'i sangs rgyas rin chen gtsug tor can gdul bya'i skal pa dang 'tshams par gang 'dul sprul pa'i rnam rol du shar ba'i grub dbang rdzogs chen bzhi pa 'jigs med mkhyen brtse'i dbang phyug phrin las rnam rgyal rdo rje sogs dam pa du mas dag byed ye shes kyi gzigs ngor nub phyogs sprul pa'i zhing mchog o rgyan d+hU ma tha la dang /__'chi med pad+ma 'od kyi pho brang mngon sum par gzigs shing ngo mtshar gyi gsal snang gtan la 'bebs par mdzad pas mtshon/__gang ltar yang dus gsum mkhyen pa dpal o rgyan chos kyi rgyal pos zhabs kyis bcags shing rdzu 'phrul rdo rje'i bkod pa zad mi shes pas byin gyis brlabs pa la brten nas/__brag ri'i ba gam thams cad kyang de bzhin gsheg pa rnams kyi sku gsung thugs yon tan phrin las mi zad brgyan gyi 'khor lo'i rang gzugs mngon sum mig gi bdud rtsir shar ba'i rang byon gyi bkod pa bsam gyis mi khyab pas gtams pa/__gter chen chos kyi rgyal po rig 'dzin nyi ma grags pa rtsal dang /__grub pa'i dbang phyug rig rtsal thogs med gling pas kyang rdzas gter gyi cha shas spyan drangs shing /__dus kun tu rig pa 'dzin pa'i sa la gnas pa'i dpa' bo dang DAk+ki'i 'du ba sprin bzhin du gtibs pa'i gnas mchog khyad par can gyi lte ba rang byung rdo rje'i brag gi ke'u tshang 'di nyid du/__gangs kyi ri bo'i sul na ston pa bde bar gshegs pa'i don bzang po tshig 'bru bzang po/__ma 'dres shing yongs su rdzogs pa'i gsung gi gsang ba rab 'byams ji bzhin du gzigs nas smra ba la lag na ral gri 'chang ba'i blo gros dang gnyis su mi phyed pas 'dzam bu gling mdzes par byed pa'i rgyan drug dang /__rmad du byung ba'i slob dpon gnyis kyi rgyal thabs la rang stobs kyis 'dzegs shing /__mkhas pa dang grub pa'i skyes bu grangs med pa'i gtsug gi nor bus zhabs bsten gyi pad+mo la phyag byas pa/__smra ba'i nyi ma kun mkhyen chos kyi rgyal po dri med 'od zer zhes mtshan gyi springs yig srid zhi'i bla na mngon par mtho ba de nyid/__slar yang theg mchog snying po'i ring lugs nyin mo ltar gsal ba'i slad gzugs gzhan du bsgyur ba na/__so so yang dag pa rig pa bzhi la spobs pa'i gter mdzod chen po brgyad yongs su grol bas legs gsungs kyi cha shas phra mo res kyang /__rang gzhan gyi smra ba mchog tu rlom pa rnams kyi khengs pa'i ru tshon dbyings su brtul nas ched du brjod pa'i skabs gsar du phye ba rang byung rdo rje 'jigs med gling pa'i thugs sras kyi thu bo/__lha sras rgyal po'i rnam par rol pa mkhas shing grub pa'i dbang phyug 'jigs med phrin las 'od zer dang /__de nyid kyi gsang ba'i mdzod 'dzin pa gangs khrod grub rigs rgya mtsho'i gtsug rgyan rje btsun bzhad pa rdo rje'i spun zlar 'os pa'i rnal 'byor gyi dbang phyug chen po dam tshig rdo rje zung gi zhabs kyi chu skyes mnyes pa gsum gyi thor tshugs kyis bsten nas/__theg mchog gdams pa'i smin pa rang grol ba'i bdud rtsi gsan bsam gyi snyim pas ngoms pa med par gsol ba dang chabs cig__/phyogs bral gyi dben pa'i ri ngogs lha dang drang srong grub pa'i tshogs kyis bsten pa rnams su snying po'i sgrub pa la rtse gcig tu gzhol bas nyams dang rtogs pa'i puN+DA ri ka cir yang grol ba'i bya bral bla ma dam pa nam mkha' rdo rje nas/__phan bde'i 'byung gnas kun mkhyen rgyal ba'i bstan pa rin po che dar zhing rgyas pa dang /__'brel tshad kyi 'gro ba rnams gnas skabs mngon mtho dang mthar thug nges par legs pa'i go 'phang la dbugs 'byin pa'i slad du/__lhag pa'i thugs bskyed rnam par dag pa zla ba zhun ma'i phung po ltar gcig tu dkar bas kun nas bslangs te/__dus gsum gyi rgyal ba sras dang bcas pa thams cad kyi ye shes sgyu 'phrul drwa ba'i rol gar/__rig 'dzin bla ma kun gyi gtsug rgyan/__yi dam zhi khro yongs kyi khyab bdag__/dpa' bo dang DAk+ki rgya mtsho'i 'khor los sgyur ba/__sangs rgyas gnyis pa pad+ma saM b+hA wa zhes mtshan nyi zla ltar yongs su grags shing /__khyad par gangs can pa'i 'gro ba rnams kyi skyabs dang /__rten dang /__gling dang /__mgon dang /__dpung gnyen gcig pur gyur pa gang gi sku gsung thugs ye shes rdo rje'i rnam 'phrul gyi rol mo mtha' klas pa'i yid can gyi mos pa'i rjes su 'gro ba'i phyir bsam par mi nus kyang /__re zhig dus kyi rgud pa glo bur ba rgyu dang bcas pa zhi nas/__bstan 'gro'i bde skyid rdzogs ldan gsar pa'i dga' ston la longs su spyod pa'i rten 'brel du/__'khor 'das dang snang srid thams cad zil gyis gnon pa bdud dpung 'dul ba'i cha byad can gtso 'khor gsum pa'i mtshan dpe'i snang brnyan khyad par can zhig bzhengs pa la dran pa nye bar bzhag ste/__e yul rig pa'i 'byung gnas su skye ba'i 'khri shing bzung zhing /__thal mo dang gdong pas gzhal ba'i cha tshad la blo gros kyi pad+mo bye ba/__sor mos zlos gar gyis lha dang bcas pa'i yid 'phrog pa bzo yi rig byed la mchog tu byang chub pa/__ji ltar bsgo ba'i las la rtag gus kyi brtson pa mi lhod pa'i ngang tshul can puN+ye'i ming can pha bu gnyis ched du bos nas/__rab byung bcu bzhi pa'i nang tshan sna tshogs dbyig ces pa shing mo sbrul gyi lo'i khyu mchog can gyi zla ba'i dus tshes mchog tu dge ba nas brtsams/__rgyun dang khyad par gyi bsnyen bkur phun sum tshogs pa dang bcas te zhag gi phung po rtse mo'i grangs tsam gyi nang du bya ba mthar phyin par gyur pa la/__gtso bor rig 'dzin dam pa nyid kyis brtson pas bsgrubs pa'i rgyud sde bzhi'i gzungs kyi rigs gtos che ba dang /__khyad par 'phags mchog sems nyid ngal gso'i zhal skyin gter chen chos kyi rgyal po rig 'dzin nyi ma grags pa rtsal bsam bzhin du srid pa nye bar bzung ba'i sku phreng bzhi pa/__rig pa dang grol ba'i yon tan bsam gyis mi khyab pa'i mnga' bdag mchog sprul rdo rje 'chang o rgyan bstan 'dzin nyi ma/__dpal kaHthog rdo rje'i gdan gyi seng+ge'i khri la chos kyi 'khor los sgyur ba rmog ston he ru ka'i rnam 'phrul 'jigs bral chos dbyings rdo rje/__si tu sprul pa'i sku rin po che chos kyi blo gros sogs phyogs kyi dam pa rnams kyis stsal ba dang /__dgon sde 'di nyid kyi bla ma grwa tshang rnams kyi phyag tu bzhugs pa dang /__kho bo cag gi lag na yod rigs bcas khungs dang 'brel nges pa'i ring bsrel rnam pa bzhi'i tshogs kyis phyur bur gtams pa'i bzhugs tshul ni/__rten gyi gtso bo slob dpon rin po cher/__thog mar yungs 'bru lta bu'i ring bsrel la/__rwa ston stobs ldan rdo rjes bsgrags yongs rdzong dus dgra'i dbang po'i pho brang nas spyan drangs pa'i rdzogs pa'i sangs rgyas gser thub kyi 'phel gdung /__rig 'dzin bdud 'dul rdo rje dang /__dwags po gter chen rdo rje rgyal po'i gter byon sangs rgyas 'od srung gi 'phel gdung /__gter chen pad+ma 'gro 'dul rtsal gyi phyag nas byung ba'i 'od srung gi 'phel gdung /__rmog grub rin po ches stsal ba'i 'phel gdung khyad 'phags bcas/__sku gdung gi ring bsrel la/__dwags po gter chen rin po che'i gter byon rdzogs pa'i sangs rgyas kyi dbu klad/__gter chen nyi ma grags pa'i gter byon gu ru yab yum gyi byang sems a thaM ma/__rig 'dzin chos rje gling pa dang /__de nyid kyi yang srid gter chen kun bzang 'od zer gyi gter byon gu ru yab yum gyi byang sems ril bu/__klong chen rol pa rtsal gyi gter byon gu ru'i shangs mtshal ril bu/__rig 'dzin pad+ma gling pa'i gter byon skye bdun ril bu/__bdud 'dul gter byon bram ze skye bdun sku sha__/gter chen nyi ma grags pas rtsa gsum gsang ba snying tig dang lhan cig tu spyan drangs pa'i spyan ras gzigs sprul bram ze dung phreng can dang /__mdo khams klong thang sgrol ma brag nas spyan drangs pa'i bram ze dri med snying po'i sku gdung /__chos gling kun bzang 'od zer gyi gter byon bram ze skye bdun sku sha__/dwags po rgyal sras bde chen gling pa'i gter byon skye bdun ril bu/__chos gling kun bzang 'od zer gyi gter byon ye shes sprul pa'i bya khyung ga ru DA'i dbu thod/__kun mkhyen chos kyi rgyal po klong chen rab 'byams gdung rus/__thams cad mkhyen pa bu ston rin po che'i gdungs/__byang bdag bkra shis stobs rgyal gyi gdung rus/__rig 'dzin gter bdag gling pa'i shangs mtshal ril bu/__mi bskyod ril bu/__grub dbang rdzogs chen pa pad+ma rig 'dzin gyi thugs ljags spyan gsum mes ma rmas par byon pa'i cha shas/__nyi grags gter chen rin po che'i sku gdung gi cha shas/__nyi sprul gsum pa rin po che'i phyag tu phebs pa'i kun mkhyen 'jigs med gling pa'i sku gdung skye bdun khyad 'phags/__rdzogs chen gsum pa rin po che nges don bstan 'dzin bzang po'i shangs mtshal ril bu/__si tu thams cad mkhyen pa chos kyi 'byung gnas kyi shangs mtshal/__grub dbang nam mkha' rgya mtsho'i sku sha__/dwags po gter chen rin po che'i shangs mtshal/__nam mkha' tshe dbang mchog grub kyi gdungs/__gter chen pad+ma 'gro 'dul rtsal gyi gdung rus las grub pa'i byin sku/__grub pa'i dbang phyug chen po 'jigs med phrin las 'od zer kyi shangs mtshal ril bu/__mi bskyod ril bu/__rnam snang ril bu/__'jigs med rgyal ba'i myu gu'i shangs mtshal ril bu/__nyi grags gdan tshab bstan 'dzin mchog sprul rin po che'i dbu thod/__rdzogs chen pa grub dbang bla ma sangs rgyas lags kyi gdung rus las byon pa'i ring bsrel bcas/__gzhan yang dam tshig gi rdzas myong grol ril bu'i skor la/__dwags po gter chen rin po che'i gter byon myong grol a rgya can/__'chi med bdud rtsi'i ril bu/__rtswa mchog klu bdud rdo rje'i ril bu/__rgyal sras bde chen gling pas rat+na ko Sha'i mtsho 'gram nas spyan drangs pa'i bde ba rgyas pa'i rtsa mchog myong grol/__chos gling kun bzang 'od zer gyi gter rdzas a thaM ma/__gter chen rat+na gling pa'i tshe ril/__byang bdag bkra shis stobs rgyal gyi dam rdzas ril bu/__rig 'dzin 'ja' tshon snying po/__rdo rje brag rig 'dzin chen po/__pad+ma mdo sngags gling pa/__kun mkhyen 'jigs med gling pa/__nyi grags gter chen sku thog snga phyi/__dwags po gter chen rin po che/__rgyal sras bde chen gling pa/__klong chen rol pa rtsal/__gter chen pad+ma 'gro 'dul rtsal rnams kyis bsgrubs pa'i myong grol bdud rtsi chos sman khyad 'phags/__nyi sprul bzhi pa rin po ches gter gsar pad+ma drag khros dang /__'jam dbyangs dkar po'i sgo nas bsgrubs pa'i ril bu/__rdor smin dpal ri lha lung rnams kyi myong grol ril bu dang /__bdud rtsi chos sman/__dpal kaHthog pa rdzogs chen gsang sngags chos gling /__rgyal rong rtag brtan sgrub sde rnams su snga phyir bsgrubs pa'i bdud rtsi chos sman dang /__myong grol ril bu/__kaHthog bla rabs bcu gsum tshun chad kyi bum chu ril bu/__zhi khro khri mchod mang po dang /__snga 'gyur bka' ma'i dkyil 'khor chen po rnams su bsgrubs pa'i bum chu ril bu/__nyi grags gter chen rin po che/__nyi sprul gsum pa mi 'gyur phan bde rgya mtsho/__nyi sprul bzhi pa bcas kyis rim par gta' spel gnang ba'i rten 'dus ril bu khyad 'phags/__dpal kaHthog pa'i rten 'dus ril bu/__rgya gar gyi slob dpon sangs rgyas ye shes zhabs nas bzung rim par spel ba'i dpal sa skya'i rten 'dam dpe bral ma zhes shin tu khyad 'phags/__bse 'bag zhal bzhugs kyi bdud rtsi ril bu dang /__gong ma so sos phyag dril gnang bas mtshon bdud rtsi ril bu byin ldan/__ngor e waM pa'i paN chen ga ya d+hA ra'i bum chu/__zhwa lu ri sbugs kyi paN chen ga ya d+hA ra'i bum chu dang bcas pa/__kun mkhyen bu ston rin po ches rgyud sde bzhi'i sgrub mchod gnang ba'i bum chu ril bu/__tshar chen blo gsal rgya mtshos rta mgrin yang gsang khros pa'i dkyil 'khor du bsgrubs pa'i bdud rtsi chos sman/__rigs gsum mgon po'i sgo nas bsgrubs pa'i dngos grub ril bu/__'jam dbyangs smra ba'i seng+ge'i ril bu/__karma pa'i dam rdzas myong grol ril nag chen mo/__rje sgam po pa'i myong grol ril nag gi phab rgyun/__dpal stag lung pa'i rten 'dus/__dge lugs pa'i ma Ni ril bu/__jo bo rin po che'i sku la khrus chab gsol ba'i ril bu/__nyi sprul rin po che nas dbus gtsang sprul pa'i zhing gi rten gsum khyad par can rnams la sku khrus gsol ba'i ril bu/__pho brang chen po po tA la'i gser gdung 'dzam gling rgyan gcig bzhengs pa'i tshe sbyar ba'i rten 'dus khyad 'phags kyi phabs rgyun grub mtha' ris med kyi rten 'dus ril bu'i phab rta bcas/__sku bal gyi ring bsrel la/__gter chen kun bzang 'od zer gyis gter byon slob dpon rin po che'i zab ber/__dwags po gter chen gyi gter byon mkhan chen bo d+hi sa twa'i chos gos kyi tshal bu/__ye shes kyi DA ki nI 'chi med man+dA ra ba dang /__bde chen ye shes mtsho rgyal gyi dbu skra/__rgya gar gyi grub chen te lo pa'i bzhugs gdan kr-iSh+Na sA ra'i pags pa'i dum bu/__rje btsun dam pa rgya gar gyi sgom thag__/dpal ldan a tI sha'i chos gos kyi tshal bu/__grub dbang mar pa yab sras kyi gdung ras/__gter chen gu ru chos dbang gi phyag dar/__dbu zhwa grub chen thang stong rgyal po'i sle ber gyi tshal bu dang phyag mkhar gyi cha shas/__khri srong rnam 'phrul dpal bkra shis stobs rgyal gyi na bza'/__rdo brag rig 'dzin pad+ma phrin las kyi na bza'/__dbu skra phyag phreng gi thags pa/__skal bzang pad+ma dbang phyug na bza'/__rig 'dzin khams gsum zil gnon gyi dbu skra/__grub dgon pa 'jigs med chos grags na bza'/__snga 'gyur bstan pa'i srog shing gcig pur gyur pa smin gling gter chen rin po che'i na bza'/__dbu skra/__lo chen d+harmA shrI'i chos gos/__gter chen 'ja' tshon snying po'i na bza'/__rig 'dzin bdud 'dul rdo rje'i phur dar/__phyag phreng /__sku ber/__stag bla pad+ma ma ti'i na bza'/__grub dbang rdzogs chen pa pad+ma rig 'dzin gyi na bza'/__dbu zhwa'i tshal bu/__dpon slob nam mkha' 'od gsal gyi na bza'/__gter chen nyi ma grags pa dang /__nyi sprul gnyis pa theg mchog bstan pa'i rgyal mtshan gyi na bza'/__dbu skra/__nyi sprul gsum pa'i na bza'/__rje dbon rin po che pad+ma kun grol rnam rgyal gyi na bza'/__dpon slob rin po che pad+ma gsang sngags bstan 'dzin dang /__nges don bstan 'dzin bzang po'i gdung ras/__rig 'dzin chen po dpa' bo las rab rtsal gyi na bza' dang /__dbu skra/__nam mkha' tshe dbang mchog grub kyi sku reg__/dbu ljon/__dwags po gter chen rin po che'i _dbu skra/__na bza'/__gter chen pad+ma 'gro 'dul rtsal gyi na bza' dang /__dbu skra/__sku reg__/nyi grags gter chen rin po che'i karma mu dra/__ye shes mtsho rgyal gyi rnam 'phrul kun bzang dbang mo'i dbu skra/__gdan tshab bstan 'dzin mchog sprul rin po che'i dbu zhwa/__rtsod pa'i dus kyi thams cad mkhyen cing gzigs pa chen po rig 'dzin 'jigs med gling pa/__'jigs med phrin las 'od zer/__'jigs med rgyal ba'i myu gu/__phyag na pad+mo dam tshig rdo rje rnams kyi na bza'/__dbu skra/__rig 'dzin pad+ma bshes gnyen gyi phur dar/__sprul pa'i gter ston rig 'dzin klong gsal snying po'i na bza'/__bzhugs gdan/__rig 'dzin kun bzang shes rab/__rgyal sras bsod nams lde'u btsan/__rig 'dzin tshe dbang nor bu/__dri med zhing skyong mgon po/__rgyal sras rta mgrin dbang chen/__rmog grub nam mkha' chos dbang rnams kyi na bza'/__rmog grub rin po che'i phyag phreng /__'gyur med tshe dbang mchog grub/__kun bzang nges don dbang po/__'jigs med rig 'dzin mgon po rnams kyi na bza' dang /__dbu skra bcas/__gzhan yang grub mtha' ris med kyi skor la/__ngor chen rdo rje 'chang chen po'i na bza' dang /__dbu zhwa'i tshal bu/__rgyal tshab dam pa kun dga' dbang phyug__/yongs 'dzin dkon mchog 'phel ba/__thams cad mkhyen pa dkon mchog lhun grub/__tshar chen blo gsal rgya mtsho/__paN chen nam mkha' dpal bzang /__brang ti nam mkha' sangs rgyas/__rdo rje 'chang dbang phyug rab brtan/__mgon po bsod nams mchog ldan/__mkhan chen nam mkha' bsam 'grub/__dpal sa skya pa ngag dbang kun dga' blo gros/__mkhan chen dpal ldan chos skyong /__shar chen mi 'gyur rgyal mtshan/__'jam mgon dbang sdud snying po/__rje btsun ma 'chi med bstan pa'i nyi ma/__mkhan chen nam mkha' 'chi med bcas kyi na bza' tshal bu bcas dang /__rgyal dbang karma pa rang byung rdo rje/__chos dbyings rdo rje/__zhwa dmar chos kyi dbang phyug__/si tu chos kyi 'byung gnas dpa' bo gtsug lag dga' ba/__'brug pa rin po che bka' brgyud phrin las shing rta rnams kyi na bza'/__dwags po rin po che 'dzam gling nor bu rgyan pa'i na bza'/__rje rin po che blo bzang grags pa'i na bza'/__paN chen blo bzang chos rgyan gyi na bza'/__rgyal dbang lnga pa rin po che ngag dbang blo bzang rgya mtsho'i dbu skra/__bdun pa bskal bzang rgya mtsho'i 'gan sbyar/__rgyal ba tshul khrims rgya mtsho'i spur ras/__rgyal tshab de mo rin po che'i dbu skra bcas so//__//chos sku'i ring bsrel du gtogs pa'i gter byon gyi shog ser skor la/__mnga' bdag nyang gi gter byon bka' brgyad bde gshegs 'dus pa'i shog ser/__gu ru chos dbang gter byon thugs rje chen po yang snying 'dus pa'i shog ser/__rig 'dzin rgod ldem dang /__'ja' tshon snying po'i gter shog__/gter chen bdud 'dul rdo rje'i sgrol dkar shog ser/__rig 'dzin nyi ma grags pa'i rta mgrin dregs pa zil gnon dang /__pad+ma drag po'i shog ser/__klong gsal gter byon ye shes rab 'bar rtsa rgyud kyi shog ser/__gter ston ma ti rat+na'i ser gdong bdud 'dul drag mo'i shog ser/__chos gling kun bzang 'od zer gyi gter byon rdo rje gro lod gnam lcags me 'khor gyi shog ser/__rgyal sras bde chen gling pa'i gter khog la ser gyi sgrom bu'i tshal bu/__sprul pa'i gter ston pad+ma 'gro 'dul rtsal gyi gter shog__/lo chen bai ro'i phyag bris kyi rgya dpe le tshan gsum dang /__sher phyin bcas/__khyad par chos sku'i ring bsrel dngos gzungs kyi rim pa ni/__snga 'gyur 'od gsal rdo rje snying po'i bshad sgrub kyi chu gter chen po rdzogs chen gsang sngags chos gling dang /__be ri bstan rgyas gling /__nyag brag mgo'i 'dus sde rnams su bzhugs pa'i 'phrul chen par gyi phyi mo la nye bar drangs pa la/__thog mar sdom pa gsum gyi bla ma brgyud pa'i mtshan sngags nas brtsams te/__rdo rje theg pa bla med kyi rgyud snga 'gyur la 'dus pa chen po'i mdo/__/rgyud sde sgyu 'phrul/__sgrub sde bka' brgyad/__bla ma zhi drag sogs kyis mtshon bka' gter gyi ring lugs rgya mtsho lta bu dang /__phyi 'gyur gsar ma/__gnyis su med pa'i rgyud kyi rgyal po dpal dus kyi 'khor lo dang sgyu 'phrul drwa ba/__ma rgyud 'khor los sgyur ba drug__/pha rgyud rigs drug la sogs bod du 'gyur ro cog gi rgyud sde phal mo che'i rtsa sngags/__snying po/__nye snying /__rnal 'byor gyi rgyud rtsa bshad cha mthun dang bcas pa/__spyod rgyud rigs gsum/__bya rgyud sgo drug rnams kyi gzungs sngags/__gzungs chen sde lnga/__rdo rje'i chos srung rgya mtsho/__gnod sbyin nor lha ji snyed pa'i snying po/__mtha' rten 'dod gsol bsngo smon shis brjod dang bcas tshar du ma dri bzang dang bdud rtsi'i phur mas khyab par byugs shing /__dril lugs na bza' _sogs zhib mo rnam par 'thag pa'i bca' ga dang ldan pa/__gzhan yang sku gsung thugs rten kyi rigs sna tshogs la/__sku rten du thub dbang sku tshab rgya gar li ma/__bod li dang rgya nag li ma'i thub sku re re/__dbus li las grub pa'i yum chen mo'i sku/__zangs gser las grub pa'i 'od dpag med/__slob dpon rin po che/__rje btsun sgrol ma rnams kyi snang brnyan/__rdzogs chen rin po che'i phyag par tshe dpag med kyi sku/__rmog grub rin po che'i phyag par rten 'dam las grub pa'i tshe dpag med/__sgrol ma dkar sngon/__rje btsun mi la'i snang brnyan/__si tu rin po che'i phyag par slob dpon chen po'i sku/__rig 'dzin 'jigs med dpa' bo'i phyag par mtsho skyes rdo rje'i sku/__rgyal sras bde chen gling pa'i phyag par gu ru gtso 'khor gsum gyi snang brnyan sman 'dam las grub pa'i bir wa pa dang /__sa chen kun dga' snying po'i sku 'dra bcas so//__//gsung rten du shes rab kyi pha rol tu phyin pa stong phrag brgya pa'i glegs bam bcu gnyis/__mdo sde bskal pa bzang po/__rdo rje gcod pa gser bris/__rin chen gnyis pas bris pa'i slob dpon rin po che'i rnam thar/__'jam dpal sgyu 'phrul drwa ba'i rgyud/__dri med bshags rgyud cha gnyis/__dpang skong phyag rgya pa bcas/__'od dpag tu med pa'i bkod pa bstan pa'i mdo mtshal bris/__so sor thar pa'i mdo/__o rgyan rin po che'i rnam thar thang yig sde lnga/__mnga' ris ma hA paN+Di ta pad+ma dbang rgyal rdo rje'i sdom gsum rnam nges rtsa 'grel gzhi gsum gyi cho ga__/shrI he badz+ra'i sgrub dkyil/__'og min tshogs chen 'dus pa'i sgrub khog__/gter chen rat+na gling pa'i phur pa yang gsang bla med/__smin gling gter byon tshe dpag med 'chi med yang snying /__bdud 'dul sgrol dkar/__phyag rdor/__rig 'dzin nyi grags pa'i bla ma rtsa gsum gsang ba 'dus pa/__yi dam pad+ma drag po/__sman bla bdud rtsi thigs pa rnams kyi sgrub skor/__thugs rje chen po ma rig mun sel gyi thos grol tshor ba rang grol/__gter chen pad+ma 'gro 'dul rtsal gyi gter byon bla ma longs sku'i skor cha tshang /__bde ba can gyi zhing bkod smon lam/__gsol 'debs bsam pa lhun grub bcas/__thugs rten du/__bde gshegs mchod rten brgyad/__jo bo smri ti dz+nyA na'i phyag par sAts+tsha rnams te/__de yang thog mar srog shing mtshan nyid ldan par gnas so so'i sngags kyis mtshon 'bri bar 'os pa rnams lhag chad med par bkod pa nyid sku dbus drang por btsugs pa'i/__spyi bo nas bzung gdan khri'i bar so so'i nang gzungs kyi rim pa rnams gong 'og ma 'khrul pa dang /__smin mtshams su rdzogs pa chen po klong chen snying gi thig le'i rgyal ba rig 'dzin gyi srog 'khor/__yum ka'i mthong grol tsakra/__sangs rgyas sras gcig gi rgyud sogs dang /__skyil krung gi mtshams su 'jam dpal dpa' bo gcig grub kyi rgyud las gsungs pa'i gnod sbyin pho dgu mo dgu'i 'khor lo du ma/__de yi 'og tu gter chen po'i bum pa dang /__phyogs mtshams kun tu 'phags bal bod ljongs ma hA tsi na sogs kyi gnas rten mang pa'i sa sna/__chu sna/__shing sna/__dug rigs ma 'dres pa'i sman sna tshogs/__me tog sna tshogs/__'bru sna tshogs/__rin po che dang /__dar zab sna tshogs/__dkyil 'khor mang po'i rdul tshon/__rab gnas lan grangs du mas bsgrubs pa'i me tog sogs bkra shis shing byin chags pa'i dngos grub kyi rdzas ma tshang ba med pas khor yug tu khyab par bgyis pas mtshon/__mdor na mkhas shing grub pa brnyes pa'i slob dpon rnams kyi zhal lung dang /__mthong ba brgyud pa'i phyag len rnam par dag pa la brten nas tshul bzhin du bzhugs su gsol ba dang /__sku'i g.yas su bdag cag gi ston pa bde ba chen po pad+mA ka ra'i spyan sngar 'chi med sgrub pa'i dgyes sde man+dA ra ba/__mkhas grub khyung po'i dus su DAk+ki nI gu ma/__grub dbang mar pa lo tsA'i dus su chu shing gi snye ma can/__gnyan lo tsA ba'i dus su ri sul gyi rnal 'byor ma/__rje btsun 'ja' tshon sku can ras chung zhabs kyis mjal ba'i tshe ma gcig grub pa'i rgyal mo sogs mtshan dang sku'i rnam 'gyur 'dod dgur bsgyur ba ye shes kyi mkha' 'gro bye ba'i gtsug rgyan de nyid dang /__sku'i g.yon du sangs rgyas gnyis pa au DI ya na'i slob dpon chen po nyid bsil ljongs kyi gdul bya rnams la thugs lhag par brtse bas/__sku gsung thugs yon tan phrin las kyi gnas lnga/__brag phug chen po brgyad/__gangs chen nyi shu rtsa gcig sogs sbas pa'i gnas chen bsam gyis mi khyab pa rdo rje'i dkyil 'khor chen por byin gyis brlabs te gter kha grangs med pa sbas/__zab pa dang rgya che ba'i chos kyi 'khor lo mtha' klas par bskor ba rnams kyi bka'i bsdu ba po gcig pu mi brjed gzungs thob dbyangs can sprul pa ye shes mtsho rgyal te rnam pa gnyis la'ang yungs 'bru lta bu'i ring bsrel sogs kyis mtshon snga ma dang cha mtshungs pa'i nang gzungs rmad du byung ba dang /__kho bo cag gis ched du bskul te bzhengs pa'i ston mchog thub pa'i dbang po'i snang brnyan yid bzhin bsam 'phel/__'khor 'phags pa'i gnas brtan bcu drug d+harma tA/__rgyal chen sde bzhi/__sbyin bdag ha shang dang bcas pa rnams las/__gtso bo'i thugs kar thub pa'i dbang po'i zhal skyin li dkar las grub pas mtshon ring bsrel rnam pa bzhi til gyi gong bu ltar gtams te bzhugs pa yin no//__// de lta bu'i dge tshogs rin po che'i bya ba la thog mar 'jug pa nas/__dus gsum gyi rgyal ba sras dang bcas pa'i ye shes kyi gzigs pas lhag par dgongs pa'i byin rlabs kyis/__nag po'i rtsa lag sde dang bcas pa'i bar chad kyi mtshan ma phra mo tsam gyis kyang brdzi bar med par bzo yi bya ba legs par mthar phyin pa dang /__rab tu gnas pa'i rgyud las/__/rgyan rnams ma lus pa yis ni/__/phyis nas bzo bo rnams la mchod/__/gang dag de la grogs byed pa/__gzhan dag kyang ni mchod par bgyi/__zhes gsungs pa ltar bzo gnas kyi rig pa 'dzin pa nyid zang zing gi bdog pa gya nom pas shin tu mgu bar bgyis shing /__snga ma las/__cho ga dang ni nus pa yi/__/brtag pa las gsungs tshul legs pa/__/der byas bsod nams che ba yin/__zhes dang /__slob dpon chen pos/__phyir bas rten gsum bzhengs pa rnams/__/grub dang rab gnas mnyam du bya/__zhes sogs rgya cher gsungs pa'i don thugs la bcags te bya bral bla ma dam pa nyid nas kho bo cag la nan tan gyis ched du bskul ba bzhin tshogs kyi slob dpon gyi khur bzung ste/__mchog sprul rin po che 'jigs med rdo rje sogs ngos cag 'dus pa rnams kyis gro bzhin zla ba'i dkar phyogs kyi dga' ba dang po gza' skar byed sbyor phun sum tshogs pa nas brtsams te/__rig 'dzin bla ma thams cad 'dus pa'i bdag nyid rtsa gsum rgya mtsho'i ngo bo 'chi med pad+ma ka ra'i dkyil 'khor chen po sgrub cing mchod pa dang /__bdag nyid 'jug cing dbang blang ba sngon du 'gro bas/__rab gnas kyi cho ga rmad du byung ba'i legs bshad kyi gter chen po bkra shis 'dod 'jo dgongs don ma 'khrul bar dngos sta nyin gsum dang /__rgyas pa'i sbyin sreg sogs mtha' rgyas su bsgrubs shing /__slar yang rgyud las/__bsnyen rdzogs rtags ldan rnal 'byor pas/__/gzigs pas rab gnas dam pa chags/__zhes gsungs pa ltar/__dpal gsang ba'i bdag po rig grol ngur smrig zlos gar la rtsen pa rmog grub rin po che 'jigs bral chos dbyings rdo rje dang /__bcu phrag rig pa'i ma hA paN+Di ta 'jam dpal dbyangs 'gyur med mthu stobs rnam rgyal dpal bzang po sogs dam pa'i skyes bu du mas kun rdzob brda'i cho ga dang /__don dam chos dbyings mnyam pa chen po ye shes rdo rjes lhag par gnas pas ye shes pa mngon du bzhugs par mdzad pa'i snang brnyan 'di rnams kyi spyan sngar/__chos snang ba'i sgo dang por gyur pa mi phyed dad pa'i yid kyis mdun bdar te/__yan lag bdun pa dang /__maN+Dal dang /__tshogs kyi mchod pa dang /__rdo rje'i rnal 'byor zab mo la mnyam par bzhag pa sogs rnam par dkar ba'i las la gcig tu mdza' bar byas pa'i phan yon ni/__o rgyan rin po che nyid kyi rdo rje'i gsung las/__nyon cig lha mo'i gzugs can yid 'ong ma:__nga dang ma 'phrad ma 'ongs sems can rnams:__ma rig mun pa'i sgron me sku 'dras byed:__pad 'byung sku tshab mchod pa'i rten bzhengs pa:__sku gsum don ldan bstan pa'i rgyal mtshan 'dzug:__zhes sogs rgya cher gsungs pa ltar gnas skabs su nad gdon bar chad 'jigs pa chen po brgyad dang bcu drug sogs mi mthun pa'i phyogs thams cad zhi ba dang /__tshe bsod dpal 'byor ye shes yon tan sogs ji ltar bsam pa dang mthun pa'i legs tshogs thams cad gong nas gong du 'phel zhing rgyas pas mtshon dgos 'dod mtha' dag yid bzhin du 'grub par ma zad mthar thug rnam pa thams cad mkhyen pa'i ye shes kyang lag rtser stsol ba'i bdag nyid can du gdon mi za ba'i phyir/__mtha' yas pa'i sems can thams cad la dmigs pa'i skyes bu chen po'i blo gros kyis gnas 'brel/__phyag skor/__mchod 'bul sogs tshogs bsags sgrib sbyong sgo du ma nas brtson pa dang /__de thams cad kyang bzang po bzhi dang ldan pa'i yongs su bsngo ba dang smon lam rgya chen pos mtshams sbyor 'phags pa kun tu bzang po'i rjes su 'brang bar rtse gcig pa'i yid kyis gsol ba 'debs pa lags so//__// slar yang smras pa/__e ma dad brtson nor bu'i sa gzhir sangs rgyas gnyis pa mtsho skyes rje'i/__/mtshan dpe'i snang brnyan gsar du 'khrungs pa'i legs byas gtam gyi springs yig gis/__/rgyal kun so sor rtogs pa'i rang gzugs 'od snang mtha' yas ye shes byin/__/sin+d+hu'i pad+mo snying por smin pa'i ngo mtshar slar yang 'ongs pa bzhin/__/gang la bsnyen pa'i yid kyi shing rta phun tshogs 'byor pas 'gengs pa la/__/dpag bsam rkang 'thung gsar pa'i dpal dang tsin+tA ma Nir rnam brtags kyang /__/sgrib gsum tsha gdung stug po 'jil dang kun mkhyen snang ba ster mkhas phyir/__/kun bzod 'di na mtshungs pa med ces bsod nams sprin gyi rol mor 'khrol/__/de las byung ba'i dge tshogs dri med zla shel bdud rtsi'i rjes 'gro bas/__/rgyal bstan chu gter phyogs brgyar 'phel zhing bstan 'dzin mchog rnams zhabs pad brtan/__/yangs pa'i 'jig rten dge bcu'i spyod pas rdzogs ldan dus ston rgyas pa dang /__/lhan cig rnam pa thams cad mkhyen pa'i grong khyer chen por 'jug gyur cig__/khyad par bsil ljongs bka' drin mtshungs med grub pa'i slob dpon o rgyan rjes/__/byin rlabs snang bas rtag tu mdzes byas ngo mtshar rdo rje'i gnas chen por/__/'od gsal snying po'i don la dbang 'byor theg mchog rig 'dzin 'dus pa'i gling /__/bshad sgrub zung gi bgyi ba dang bcas phyogs dus kun tu rgyas par shog__/mdor na srid dang zhi ba'i legs byas ut+pal gzhon nu'i snye ma ni/__/yongs su bsngo ba'i bdud rtsis brlan pa'i dge mtshan phun sum tshogs pa'i dpyid/__/yid can rgya mtsho'i nyer 'tsho gcig gyur phan bde'i dga' ston dar babs pa'i/__/bkra shis snang ba dam pa'i dpal gyis sa gsum kun tu khyab gyur cig__/ces pa'ang rnam dkar gyi phrin las rmad du byung ba'i bdag po'i rkyen rig 'dzin bla ma dam pa nyid nas zin tho dang bcas yang yang bka' stsal gnang ba las rgyal khams phyogs med kyi bya bral ba shAkya'i dge slong theg pa mchog gi rnal 'byor pa 'chad rtsod rtsom pa'i tshul la blo gros kyi 'jug pa cung zad shar ba kun mkhyen bla ma dgyes pa'i 'bangs gtsug lag smra ba'i nyi ma zhes bgyi bas sbyar ba sarba dA ka l+yA NaM b+ha ba tu//__//