JKW-KABUM-20-WA-001-077

🚧 This website is under continued development. We appreciate your patience!

Previous Text Back to Volume PageNext Text

Wylie title	bsod nams bye ba'i chu gter bsrubs pa'i phul/ zhes pa'i dbu can
Location	mkhyen brtse'i bka' 'bum Volume 20, sde tshan 1, Text 77, Pages 146-148 (Folios 73b4 to 74b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bsod nams bye ba'i chu gter bsrubs pa'i phul zhes pa'i dbu can. In 'jam dbyangs mkhyen brtse'i dbang po'i bka' 'bum, Vol. 20: 146-148. Khams sde dge rdzong sar dgon: Rdzong sar blo gros phun tshogs, 2020.
Genre	Prayers - smon lam
Colophon	།ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེ་ལྷ་རྣམ་གསུམ་གྱི་སྣང་བརྙན། སྒྲུབ་ཐབས་ཀྱི་གླེགས་བུ། རིག་པའི་འཁོར་ལོ། དམ་རྫས་ལེ་ཚན་བཅས་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེ་ས་ཟླ་༢ཚེས་༥དགེ་བར་གུས་ཕུལ།།
	ces pa'i zhu mtshon lha'i reg bya/_'chi med tshe lha rnam gsum gyi snang brnyan/_sgrub thabs kyi glegs bu/_rig pa'i 'khor lo/_dam rdzas le tshan bcas bya bral chos rje 'jam dbyangs mkhyen brtse sa zla 2tshes 5dge bar gus phul/

1 Texts in this Section (sde tshan or chos tshan)

77 146-148	བསོད་ནམས་བྱེ་བའི་ཆུ་གཏེར་བསྲུབས་པའི་ཕུལ། ཞེས་པའི་དབུ་ཅན། bsod nams bye ba'i chu gter bsrubs pa'i phul/ zhes pa'i dbu can Prayers - smon lam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཨོཾ་སྭསྟི། བསོད་ནམས་བྱེ་བའི་ཆུ་གཏེར་བསྲུབས་པའི་ཕུལ། །མཛེས་སྡུག་སྣང་བརྙན་ཐོག་མར་འཆར་བའི་མོད། །ཕུན་ཚོགས་ཤིས་དགུའི་ལང་ཚོ་དར་བབས་པའི། །ལྷ་སྲས་ཟླ་བ་གཞོན་ནུའི་ཞབས་སྟེགས་སུ། །པུཎྜ་རི་ཀའི་རྗེས་སུ་འགྲོ་བའི་ཡིད། །གསུང་མཆིད་བདུད་རྩིས་རེག་པའི་དེ་མ་ཐག །སླར་ཡང་གུས་པའི་འདབ་བརྒྱ་བྱེ་བཞིན་དུ། །ཞུ་གསོལ་སྦྲང་རྩིའི་བསུང་ཞིམ་ཅུང་ཟད་འབུལ། །གང་ནས་རིགས་ཀྱིས་ཆེ་བའི་སཱ་ལའི་ལྗོན། །ཡོན་ཏན་མེ་ཏོག་དུ་མའི་སྒེག་འཆང་ཞིང་། །བསྔགས་འོས་འབྲས་བཟང་ཀུན་གྱིས་དུད་པ་ནི། །རིས་བྲལ་བསྟན་འགྲོའི་ཉེར་འཚོ་གཅིག་ཏུ་གྱུར། །འདིར་ཡང་བླ་མ་མཆོག་གསུམ་ཐུགས་རྗེའི་དཔྱིད། །རྫོགས་ལྡན་དུས་ཀྱི་དགེ་བཞིན་ལ་རེག་པས། །ཉེར་འཚེའི་གདུང་བ་ཆེན་པོས་མ་ནོངས་བཞིན། །ལྷག་བསམ་དག་པའི་པདྨོ་ཅིར་ཡང་དགོད། །ཁྱད་པར་ཡི་གེའི་གཟུགས་མཚར་པོས། །བརྗོད་པ་སྙན་པའི་བཀའ་གླེགས་ནི། །སྤྱི་བོའི་པད་མཚོར་ཐོབ་པ་ལས། །གུས་སྤྲོའི་འདབ་བརྒྱ་ལྷག་པར་བྱེ། །མཚམས་ཞུས། སླད་མའི་ཆར་ཡང་འཇིག་རྟེན་ན། །དགེ་ལེགས་དཔལ་སྟེར་གསང་བ་གསུམ། །འཚོ་གཞེས་ཕྲིན་ལས་རྒྱས་པའི་དཔྱིད། །གསོལ་འདེབས་རྨད་བྱུང་འདི་ལྟར་བསྒྲེངས། །ཨོཾ་སྭསྟི་ཀུརྦནྟུ། ལེགས་བྱས་བདུད་རྩིའི་བརླན་གྱིས་རབ་བསྒོས་པ། །མཚན་བཟང་འཆི་མེད་སྤྲིན་གྱི་ཕུང་པོ་ནི། །མི་མཐུན་དུས་ཀྱི་རླུང་གིས་གཡོ་མེད་པས། །ལྟོས་བཅས་སྐྱེ་རྒུའི་ཉེར་འཚོ་སྦྱིན་གྱུར་ཅིག །དབྱངས་ཅན་མགྲིན་པར་ཆགས་པའི་ལེགས་གསུང་ཕུལ། །སྙན་བརྗིད་དབྱར་རྔའི་རོལ་མོ་འཁྲོལ་བའི་མོད། །མཐའ་གཞིའི་དྲེགས་ལྡན་ཐམས་ཅད་ཟིལ་མནན་ནས། །སྐལ་བཟང་མདོངས་མཐའི་དགའ་སྟོན་རྒྱས་པར་ཤོག །ལུགས་གཉིས་རྒྱ་མཚོར་འཇུག་པའི་མཁྱེན་རབ་ཀྱིས། །དཔྱོད་ལྡན་ཡིད་ཀྱི་བརྟན་པ་འཕྲོག་བཞིན་ཏུ། །ཡོན་ཏན་ནོར་བུའི་དོ་ཤལ་འོད་འབར་ཞིང་། །ཕྲིན་ལས་འདོད་དགུའི་དགེ་མཚན་རྒྱས་གྱུར་ཅིག །དེ་སྲིད་ཀུན་ཏུ་འདི་ན་ཡང་། །ཐུགས་བརྩེའི་འཇུག་པས་རབ་བཟུང་སྟེ། །མཉན་འོས་བཀའ་མཆིད་སྩོལ་བ་དང་། །ཕན་བདེའི་དུས་སྟོན་རྒྱས་པར་སྨོན། །ཅེས་པའི་ཞུ་མཚོན་ལྷའི་རེག་བྱ། འཆི་མེད་ཚེ་ལྷ་རྣམ་གསུམ་གྱི་སྣང་བརྙན། སྒྲུབ་ཐབས་ཀྱི་གླེགས་བུ། རིག་པའི་འཁོར་ལོ། དམ་རྫས་ལེ་ཚན་བཅས་བྱ་བྲལ་ཆོས་རྗེ་འཇམ་དབྱངས་མཁྱེན་བརྩེ་ས་ཟླ་༢ཚེས་༥དགེ་བར་གུས་ཕུལ།། །། ༈

[edit]

bsod nams bye ba'i chu gter bsrubs pa'i phul/__zhes pa'i dbu can/ oM swasti/_bsod nams bye ba'i chu gter bsrubs pa'i phul/_/mdzes sdug snang brnyan thog mar 'char ba'i mod/_/phun tshogs shis dgu'i lang tsho dar babs pa'i/_/lha sras zla ba gzhon nu'i zhabs stegs su/_/puN+Da ri ka'i rjes su 'gro ba'i yid/_/gsung mchid bdud rtsis reg pa'i de ma thag_/slar yang gus pa'i 'dab brgya bye bzhin du/_/zhu gsol sbrang rtsi'i bsung zhim cung zad 'bul/_/gang nas rigs kyis che ba'i sA la'i ljon/_/yon tan me tog du ma'i sgeg 'chang zhing /_/bsngags 'os 'bras bzang kun gyis dud pa ni/_/ris bral bstan 'gro'i nyer 'tsho gcig tu gyur/_/'dir yang bla ma mchog gsum thugs rje'i dpyid/_/rdzogs ldan dus kyi dge bzhin la reg pas/_/nyer 'tshe'i gdung ba chen pos ma nongs bzhin/_/lhag bsam dag pa'i pad+mo cir yang dgod/_/khyad par yi ge'i gzugs mtshar pos/_/brjod pa snyan pa'i bka' glegs ni/_/spyi bo'i pad mtshor thob pa las/_/gus spro'i 'dab brgya lhag par bye/_/mtshams zhus/_slad ma'i char yang 'jig rten na/_/dge legs dpal ster gsang ba gsum/_/'tsho gzhes phrin las rgyas pa'i dpyid/_/gsol 'debs rmad byung 'di ltar bsgrengs/_/oM swasti kurban+tu/_legs byas bdud rtsi'i brlan gyis rab bsgos pa/_/mtshan bzang 'chi med sprin gyi phung po ni/_/mi mthun dus kyi rlung gis g.yo med pas/_/ltos bcas skye rgu'i nyer 'tsho sbyin gyur cig_/dbyangs can mgrin par chags pa'i legs gsung phul/_/snyan brjid dbyar rnga'i rol mo 'khrol ba'i mod/_/mtha' gzhi'i dregs ldan thams cad zil mnan nas/_/skal bzang mdongs mtha'i dga' ston rgyas par shog_/lugs gnyis rgya mtshor 'jug pa'i mkhyen rab kyis/_/dpyod ldan yid kyi brtan pa 'phrog bzhin tu/_/yon tan nor bu'i do shal 'od 'bar zhing /_/phrin las 'dod dgu'i dge mtshan rgyas gyur cig_/de srid kun tu 'di na yang /_/thugs brtse'i 'jug pas rab bzung ste/_/mnyan 'os bka' mchid stsol ba dang /_/phan bde'i dus ston rgyas par smon/_/ces pa'i zhu mtshon lha'i reg bya/_'chi med tshe lha rnam gsum gyi snang brnyan/_sgrub thabs kyi glegs bu/_rig pa'i 'khor lo/_dam rdzas le tshan bcas bya bral chos rje 'jam dbyangs mkhyen brtse sa zla 2tshes 5dge bar gus phul//__//_!_