JKW-KABUM-04-NGA-001-003

🚧 This website is under continued development. We appreciate your patience!

Previous Text Back to Volume PageNext Text

Wylie title	mngon pa mdzod sogs kyi zin bris sogs
Location	mkhyen brtse'i bka' 'bum Volume 4, sde tshan 1, Text 3, Pages 53-60 (Folios 27a4 to 30b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mngon pa mdzod sogs kyi zin bris sogs. In 'jam dbyangs mkhyen brtse'i dbang po'i bka' 'bum, Vol. 4: 53-60. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

3 53-60	མངོན་པ་མཛོད་སོགས་ཀྱི་ཟིན་བྲིས་སོགས། mngon pa mdzod sogs kyi zin bris sogs Notes - zin bris	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

མཛོད་ཀྱི་སྐོར་སྣ་ཚོགས། མངོན་པ་མཛོད་ཀྱི་འགྲེལ་པར། ཆོས་མ་འོངས་པ་རྣམས་སྐྱེ་བ་ལ་གཏན་དུ་གེགས་བྱེད་པ་ལ་སོགས་པ་དང་བྲལ་བ་ལས་གཞན་གང་ཡིན་པ་དེ་ནི་སོ་སོར་བརྟག་མིན་པས་འགོག་པ་སྟེ། དེ་ཡང་སོ་སོར་བརྟག་པ་ལས་ཐོབ་པ་མ་ཡིན་པ་དང་། རྐྱེན་མ་ཚང་བ་ལས་ཐོབ་པ་ཡིན་ཏེ། དཔེར་ན་མིག་དང་ཡིད་གཟུགས་གཅིག་ལ་སེམས་པའི་གཟུགས་གཞན་རྣམས་དང་། སྒྲ་དང་དྲི་དང་རོ་དང་རེག་བྱ་གང་ཡིན་པ་དག་ནི་འདས་པར་འགྱུར་ལ། དེ་དག་ལ་དམིགས་པའི་རྣམ་པ་ཤེས་པ་ཚོགས་ལྔ་པོ་དག་ནི་ཡང་སྐྱེ་བར་མི་ནུས་ཏེ། དེ་དག་འདས་པའི་ཡུལ་ལ་དམིགས་པའི་མཐུ་མེད་པའི་ཕྱིར་རོ། །ཞེས་དང་། ཆོས་ཀྱི་ཕུང་པོའི་ཚད་གང་ཞེ་ན། ཁ་ཅིག་བསྟན་བཅོས་མངོན་པའི་ཚད་ཅེས་ཟེར། དེ་ནི་ཤྭོ་ལོ་ཀ་དྲུག་སྟོང་ངོ་། །གཞན་དག་ཕུང་པོ་ལ་སོགས་པའི་གཏམ་རེ་ཡིན་པར་འདོད་ལ། ཡིན་ལུགས་ལ། སེམས་ཅན་ལ་སྤྱོད་པ་འདོད་ཆགས་ཞེ་སྡང་གཏི་མུག་ང་རྒྱལ་ལ་སོག་པ་བརྒྱད་ཁྲི་ཡོད་དེ། དེ་རྣམས་ཀྱི་གཉེན་པོར་བཅོམ་ལྡན་འདས་ཀྱིས་ཆོས་ཀྱི་ཕུང་པོ་དེ་དང་གྲངས་མཐུན་པར་གསུངས་སོ། །ཞེས་དང་། བསྟན་དུ་ཡོད་པ་ནི། འདི་འདི་ནས་སོ། ཆེ་གེ་མོ་ཞིག་ནས་སོ། །ཞེས་པའོ། །ཐོགས་པ་ནི། རང་རང་གི་ཡུལ་དུ་གཞན་སྐྱེ་བའི་གེགས་བྱེད་པ་སྒྲིབ་ཐོག །མིག་སོགས་ཀྱི་ཡུལ་ཅན་རྣམས་གཟུགས་སོགས་ལ་ཐོགས་པ་ཡུལ་ཐོགས་པ། སེམས་ལས་བྱུང་བ་རྣམས་རང་རང་གི་དམིགས་པ་དག་ལ་ཐོགས་པ་སྟེ་གསུམ་མོ། །ཞེས་བཤད།། །། ༈

དབང་པོ་ཉེར་གཅིག་ལས་མིག་སོགས་ལྔ་པོས་ནི་ཕན་ཚུན་རང་རང་གི་དོན་ཐམས་ཅད་ལ་དབང་བ་དང་། དེ་བཞིན་དུ། ཡིད་ནི་དོན་ཐམས་ཅད་ལ་དམིགས་པར་བྱ་བ་ལྷག་པར་དབང་བར་བྱེད་པ་དང་། ཕོ་ཉིད་དང་མོ་ཉིད་ལ་དབང་བར་བྱེད་པའི་ཕྱིར་ལུས་དབང་ཁོ་ན་ལ། རིས་མཐུན་པར་གནས་པར་བྱེད་པ་དབང་བའི་ཕྱིར་སྲོག་དབང་། ཚོར་བས་ཀུན་ནས་ཉོན་མོངས་པ། དད་སོགས་ཀྱིས་རྣམ་པར་བྱང་བ། མྱ་ངན་ལས་འདས་པ་སོགས་གོང་ནས་གོང་མར་སོང་བ་འཐོབ་པ་ལ་དབང་བྱེད་པའི་ཕྱིར། ཀུན་ཤེས་སོགས་གསུམ་སྟེ། དེ་ཡང་ཀུན་ཤེས་པར་བྱེད་པའི་དབང་པོས་ནི་ཀུན་ཤེས་པའི་དབང་ཐོབ་པ་ལ་དབང་བར་བྱེད་དོ། །ཀུན་ཤེས་པའི་དབང་པོས་ནི་ཀུན་ཤེས་ལྡན་པ་ཐོབ་པ་ལ་དབང་བར་བྱེད་དོ། །ཀུན་ཤེས་པ་དང་ལྡན་པའི་དབང་པོས་ནི་ཡོངས་སུ་མྱ་ངན་ལས་འདའ་བ་ལ་དབང་བར་བྱེད་དོ། །མདོ་ནས་དབང་ནི་དབང་ཕྱུག་དམ་པ་ཡིན་ལ། དེས་དབང་བར་བྱེད་པས་དབང་པའོ། །ཞེས་དང་། མཐོང་ལམ་ནི་མི་ཤེས་པ་ཀུན་ཤེས་པར་བྱ་བ་ལ་ཞུགས་པ་ཡིན་ནོ། །སྒོམ་ལམ་ནི་སྔོན་མ་མཐོང་བ་ཀུན་ཤེས་པར་བྱ་བ་ནི་མེད་ཀྱི། ཕྲ་རྒྱས་ལྷག་མ་སྤང་བར་བྱ་བའི་ཕྱིར་དེ་ཉིད་ཀུན་ཤེས་པར་བྱེད་དོ། །མི་སློབ་པའི་ལམ་ནི། ཀུན་ཤེས་སོ་སྙམ་དུ་རྟོགས་པ་ནི་ཀུན་ཤེས་པ་སྟེ། དེ་འདི་ལ་ཡོད་པས་སམ་འདི་ཀུན་ཤེས་པ་བསྲུངས་བའི་ངང་ཚུལ་ཅན་ཡིན་པས་ཀུན་ཤེས་པ་དང་ལྡན་པའོ། །ཟད་པ་དང་མི་སྐྱེ་བའི་ཡེ་ཤེས་ཐོབ་པའི་ཕྱིར་བདག་གི་སྡུག་བསྔལ་ཡོངས་སུ་ཤེས་པར་བྱར་མེད་དོ་སྙམ་པ་སྟེ། དེ་ལྟ་བུའི་དབང་པོ་ནི་ཀུན་ཤེས་པ་ལྡན་པའི་དབང་པོ་ཡིན་ནོ། །ཞེས་སོ།། །། ༈ འདུ་ཤེས་མེད་པ་ནི་འདུ་ཤེས་མེད་པའི་སྙོམས་འཇུག་བསྒོམ་པ་ལས་བྱུང་བའི་འབྲས་བུ་གཟུགས་ཁམས་བསམ་གཏན་བཞི་པའི་ནང་ཚན་ནོ། །འདུ་ཤེས་མེད་པའི་སྙོམས་འཇུག་ནི་དེའི་རྒྱུ་སྟེ། འདི་ལ་ངེས་པར་འབྱུང་བ་འདོད་པས་ཏེ། ཐར་པ་འདོད་པས་དེ་ལ་སྙོམས་པར་འཇུག་གོ །དེ་དགེ་བ་ཡིན་ཡང་སྐྱེས་ནས་མྱོང་བར་འགྱུར་བ་ཁོ་ན་ལས་མཐོང་ཆོས་དང་ལན་གྲངས་གཞན་ལ་མྱོང་འགྱུར་མ་ཡིན་ནོ། །དེ་ཡང་སོ་སྐྱེ་ལས་འཕགས་པ་རྣམས་ཀྱིས་ནི་མ་ཡིན་ནོ། །འགོག་པའི་སྙོམས་འཇུག་ནི་ཞི་བར་གནས་པའི་དོན་གྱིས་སྙོམས་པར་འཇུག་གི །ཐར་པར་འདོད་པས་མ་ཡིན་ཏེ། འདིས་སྲིད་རྩེར་སྐྱེ་བས་འདུ་ཤེས་དང་འདུ་ཤེས་མེད་མིན་ཁོ་ནའི་ས་སྟེ་གང་ཟག་ཀྱང་འཕགས་པ་ཁོ་ནས་བསྡུས་པའོ།། །། ༈ སྟོན་པས་བདེན་པ་བཞི་ཞེས་ཀྱང་བཤད། བདེན་པ་གཉིས་སུ་ཡང་གསུངས་ན་གཉིས་ཀྱི་མཚན་ཉིད་གང་ཞེ་ན། གང་ལ་ཆ་ཤས་བཅོམ་ན་དེའི་བློ་མ་འཇུག་པ་དེ་ནི་ཀུན་རྫོབ་ཏུ་ཡོད་པ་སྟེ། དཔེར་ན་བུམ་པ་ལྟ་བུའོ། །དེ་ལ་གྱོ་མོར་བཅོམ་ན་བུམ་པའི་བློ་མི་འཇུག་གོ །གང་ལ་བློ་ཡིས་ཆོས་གཞན་བསལ་ན་དེའི་བློ་མི་འཇུག་པ་དེ་ཡང་ཀུན་རྫོབ་ཏུ་ཡོད་པ་སྟེ། དཔེར་ན་ཆུ་ལྟ་བུ་དེ་ལ་བློས་གཟུགས་ལ་སོགས་པའི་ཆོས་བསལ་ན་ཆུའི་བློ་མི་འཇུག་གོ །དེ་དག་ཁོ་ན་ཀུན་རྫོབ་དེའི་མིང་བཏགས་པ་ཡིན་པས་ཀུན་རྫོབ་ཀྱི་དབང་གིས་བུམ་པ་དང་ཆུ་ཡོད་དོ། །ཞེས་བརྗོད་པ་ན་བདེན་པ་ཁོ་ནར་སྨྲས་པ་ཡིན་གྱི་བརྫུན་པ་ནི་མ་ཡིན་པས་དེ་ནི་ཀུན་རྫོབ་གྱི་བདེན་པའོ། །དོན་དམ་པའི་བདེན་པ་གཞན་ནོ་སྟེ། གང་ལ་བཅོམ་ཡང་དེའི་བློ་འཇུག་པ་ཁོ་ན་ཡིན་ལ། བློས་ཆོས་གཞན་བསལ་ཡང་དེའི་བློ་འཇུག་པ་ནི་དོན་དམ་པར་ཡོད་པ་ཡིན་ཏེ། དཔེར་ན་གཟུགས་ལྟ་བུའོ། །དེ་ནི་རྡུལ་ཕྲ་རབ་ཏུ་བཅོམ་ཡང་རུང་། བློས་རོ་ལ་སོགས་པའི་ཆོས་བསལ་ཀྱང་རུང་། གཟུགས་ཀྱི་རང་བཞིན་གྱི་བློ་འཇུག་པ་ཉིད་དེ། དེ་ནི་དོན་དམ་པར་ཡོད་པའི་ཕྱིར་དོན་དམ་པའི་བདེན་པའོ། །ཞེས་བཤད། ལུས་ཚོར་སེམས་ཆོས་རྣམས་ཀྱི་རང་སྤྱིའི་མཚན་ཉིད་ལ་བསྟན་པ་ནི་དྲན་པ་ཉེར་བཞག་གོ །དང་པོ་ནི་རང་གི་ངོ་བོ། གཉིས་པ་ནི་འདུས་བྱས་ཐམས་ཅད་ལ་ཡོད་པ་མི་རྟག་པ། ཟག་བཅས་ཐམས་ཅད་ལ་ཡོད་པ་སྡུག་བསྔལ་བ། ཆོས་ཐམས་ཅད་ལ་ཡོད་པ་སྟོང་དང་བདག་མེད་པའོ། །ངེས་པར་འབྱེད་པས་ན་ངེས་པར་འབྱེད་པ་སྟེ་འཕགས་པའི་ལམ་མོ། །དེས་ཐེ་ཚོམ་སྤང་བའི་ཕྱིར་དང་། བདེན་པ་འདི་རྣམས་ནི་སྡུག་བསྔལ་ལོ་ནས་འདི་ནི་ལམ་མོ་ཞེས་པའི་བར་རྣམ་པར་འབྱེད་པའི་ཕྱིར་རོ། །དེའི་ཆ་ནི་མཐོང་ལམ་གྱི་ཕྱོགས་གཅིག་ཡིན་ཏེ། དེ་འདྲེན་པར་བྱེད་པའི་ཕྱིར་ངེས་པར་འབྱེད་པའི་ཆ་དང་མཐུན་པ་ཞེས་བྱའོ། །ཞེས་དང་། འཇིག་རྟེན་ཆོས་མཆོག་གི་མཇུག་ཐོག་ནས་འདོད་ཁམས་ལ་དམིགས་པའི་ཆ་ལ་ཆོས་ཤེས་པའི་བཟོད་པ་སྐྱེ་སྟེ། དེ་སྐྱེས་ནས་འཕགས་པའི་གང་ཟག་ཅེས་བྱ་བ་ཉིད་དོ་དེའི་རྗེས་ལ་དེ་ཉིད་ལ་དམིགས་པའི་ཆོས་ཤེས་པ་སྐྱེ་སྟེ་ངོ་བོ་དེ་ཁོ་ན་ཉིད་ཤེས་པའོ། །དེའི་རྗེས་སུ་ལྷག་མ་གཟུགས་དང་གཟུགས་མེད་ན་སྤྱོད་པའི་སྡུག་བསྔལ་ལ་རྗེས་སུ་ཤེས་པའི་བཟོད་པ་དང། ཤེས་པ་སྐྱེ་སྟེ། དེ་བཞིན་བདེན་པ་ལྷག་མ་གསུམ་ལའང་སྦྱར་བས་སེམས་ཀྱི་སྐད་ཅིག་མ་བཅུ་དྲུག་གོ། །། ༈ ཚད་མ་སྡེ་བདུན་གྱི་སྤྱི་དོན་ལས། སྡེ་པ་གཉིས་ཀ་འདོད་པ་མཐུན་པར་བསགས་པའི་རྡུལ་ཕྲ་རབ་ཆ་དང་བཅས་པ་དེ་འདོད་པ་ན་སྒྲ་དང་དབང་པོ་མེད་པས་རྡུལ་རྫས་བརྒྱད་ལྡན་དུ་སྐྱེ། རྫས་བརྒྱད་ནི་འབྱུང་བ་བཞིའོ། །འབྱུང་འགྱུར་བཞིའོ། །སྒྲ་མེད་ལ་དབང་པོ་དང་བཅས་ན་དགུའམ་བཅུ། ལུས་དབང་པོ་གཞན་མེད་ན་དེའི་ཁ་མིག་སོགས་གང་དང་ལྡན་པས་སྒྲ་དང་ལྡན། གོ་རིམ་བཞིན་དུ། དགུ། བཅུ། བཅུ་གཅིག་དང་ལྡན་པར་སྐྱེའོ།། །། ༈

རྒྱུ་འབྲས་བུའི་རྐྱེན་གྱི་རྣམ་པར་བཞག་པ་ལ། རྒྱུ་ནི་དྲུག་སྟེ། བྱེད་རྒྱུ། ལྷན་ཅིག་འབྱུང་བའི་རྒྱུ། སྐལ་མཉམ་གྱི་རྒྱུ། མཚུངས་ལྡན་གྱི་རྒྱུ། ཀུན་ཏུ་འགྲོ་བའི་རྒྱུ། རྣམ་སྨིན་ཀྱི་རྒྱུ་དང་བཅས་པའོ། །དང་པོ་ནི། རང་གི་ངོ་བོ་ལས་གཞན་པའི་ཆོས་ཐམས་ཅད་ནི་འདུས་བྱས་ཀྱི་བྱེད་རྒྱུ་ཡིན་ཏེ། སྐྱེ་བ་ལས་གེགས་མི་བྱེད་པའི་ངོ་བོར་གནས་པའི་ཕྱིར་རོ། །གཉིས་པ་ནི། ཆོས་གང་དག་ཕན་ཚུན་གྱི་འབྲས་བུ་ཡིན་པ་དེ་དག་སྟེ། དེ་ཡང་འབྱུང་བ་བཞིའམ་སེམས་རྗེས་སུ་འཇུག་པའི་ཆོས་རྣམས་ཀྱིས་སམ། འདུས་བྱས་ཀྱི་མཚན་ཉིད་རྣམས་ནི་མཚན་གཞིའི་ཡིན་ལ། དེ་དག་ཀྱང་མཚན་ཉིད་དེའི་ཡིན་པ་ལྟ་བུའོ། །གསུམ་པ་ནི་བཅོས་འདྲ་བ་རྣམས་ཏེ། རང་རིགས་ཀྱི་དགེ་བ་རྣམས་ཀྱང་ཕན་ཚུན་དུ་དགེ་བ་དང་ཉོན་མོངས་པ་དག་ཀྱང་དེ་བཞིན་ནོ། །བཞི་པ་ནི། སེམས་དང་སེམས་ལས་བྱུང་བའི་ནང་ནས་གང་དག་ལ་རྟེན་མཚུངས་པ་ཡོད་པའི་སེམས་དང་སེམས་ལས་བྱུང་བ་རྣམས་ཏེ། དཔེར་ན་མིག་གི་རྣམ་ཤེས་རྟེན་མིག་དབང་སྐད་ཅིག་མ་གང་ཡིན་པ་དེ་ཉིད་དེ་དང་མཚུངས་པར་ལྡན་པ་ཚོར་བ་ལ་སོགས་པ་རྣམས་ཀྱིའང་ཡིན་པ་ལྟ་བུའོ། །ལྔ་པ་ནི། རང་གི་ས་པའི་ཉོན་མོངས་པ་ཅན་གྱི་ཆོས་སྔར་སྐྱེས་པ་རྣམས་ཉོན་མོངས་པ་ཅན་གྱི་ཆོས། ཕྱི་མའི་ནི་ཀུན་ཏུ་འགྲོ་བའི་རྒྱུ་ཡིན་ནོ། །དྲུག་པ་ནི། མི་དགེ་བ་དང་། དགེ་བ་རྣམས་ཀྱི་ཆོས་ཟག་པ་དང་བཅས་པ་ཁོ་ན་སྟེ། རྣམ་པར་སྨིན་པའི་དངོས་པོ་ཡིན་པའི་ཕྱིར་རོ། །གཉིས་པ་འབྲས་བུ་ལ། རྣམ་སྨིན། ཐུན་མོང་མ་ཡིན་པ། ཐུན་མོང་པ། བདག་པོ། རྒྱུ་མཐུན་སྐྱེས་བུ་བྱེད་པ། བྲལ་འབྲས་ཏེ་ལྔ་ལས་ཕྱི་མ་འབྲས་བུ་བཏགས་པ་དང་། དང་པོ་གཉིས་རྒྱུ་ཐ་མའི་འབྲས་བུ། གཉིས་པ་རྒྱུ་དང་པོའི། གསུམ་པ་སྐལ་མཉམ་དང་ཀུན་འགྲོའི། བཞི་པ་ལྷན་ཅིག་འབྱུང་བ་དང་མཚུངས་ལྡན་གྱི་རྒྱུའི་འབྲས་བུའོ། །དེ་བས་བདག་པོའི་འབྲས་བུ་དང་སྐྱེས་བུ་བྱེད་པ་གཉིས་འདུས་བྱས་དང་ཁྱབ་མཉམ་མོ། །རྐྱེན་བཞིའི་དང་པོ་བྱེད་རྒྱུ་མ་གཏོགས་པའི་རྒྱུ་ཐམས་ཅད་ཡིན་ལ། རྐྱེན་བཞི་ནི། རྒྱུ། དམིགས་པ། དེ་མ་ཐག་པ། བདག་པོའི་རྐྱེན་ནོ། །དང་པོ་ནི། བྱེད་རྒྱུ་མ་གཏོགས་པའི་རྒྱུ་ལྔ་སྟེ། དེ་ཡང་མིག་དང་ཡུལ་གཟུགས་ལ་བརྟེན་ནས་དེའི་རྣམ་ཤེས་སྐྱེས་པ་ལྟ་བུའི་དུས་ལ་མཚོན་ན་མིག་གི་དབང་པོར་ལ་ཡོད་པའི་འབྱུང་བ་དང་འབྱུང་འགྱུར་རྣམས་ཏེ། དེས་རྒྱུ་བྱས་ནས་མིག་གི་དབང་ཤེས་ཚང་ཞིང་རྫོགས་པར་བསྐྱེད་པས་སོ། །གཉིས་པ་ནི། ཆོས་ཐམས་ཅད་དེ་འདུས་མ་བྱས་ཀྱང་ངོ་། །དེ་ཡང་ཡུལ་ཁ་དོག་དང་དབྱིབས་སུ་སྣང་བའི་གཟུགས་ཉིད་དེ་ལ་དམིགས་པས་སོ། །གསུམ་པ་ནི། དགྲ་བཅོམ་པའི་ཐ་མའི་ཡིད་མ་གཏོགས་པའི་སེམས་དང་སེམས་བྱུང་ཐམས་ཅད་དེ། མིག་གི་རྣམ་ཤེས་སྐྱེ་བའི་སྐད་ཅིག་མའི་ཤེས་པ་སྟེ། དེའི་སྐད་ཅིག་པ་གཞན་གྱིས་བར་མ་ཆད་པར་སྐྱེ་བའི་ཕྱིར་རོ། །བཞི་པ་ནི། བྱེད་རྒྱུ་ཐམས་ཅད་དེ། དཔེར་ན་མིག་གི་དབང་པོ་ཁོ་ན་སྟེ་དེའི་བདག་རྐྱེན་གྱིས་གཟུགས་མཐོང་བའི་ཕྱིར་རོ། །ཞེས་བཤད་དོ།། །། ༈

[edit]

mngon pa mdzod sogs kyi zin bris sogs/__ mdzod kyi skor sna tshogs/__mngon pa mdzod kyi 'grel par/__chos ma 'ongs pa rnams skye ba la gtan du gegs byed pa la sogs pa dang bral ba las gzhan gang yin pa de ni so sor brtag min pas 'gog pa ste/__de yang so sor brtag pa las thob pa ma yin pa dang /__rkyen ma tshang ba las thob pa yin te/__dper na mig dang yid gzugs gcig la sems pa'i gzugs gzhan rnams dang /__sgra dang dri dang ro dang reg bya gang yin pa dag ni 'das par 'gyur la/__de dag la dmigs pa'i rnam pa shes pa tshogs lnga po dag ni yang skye bar mi nus te/__de dag 'das pa'i yul la dmigs pa'i mthu med pa'i phyir ro/__/zhes dang /__chos kyi phung po'i tshad gang zhe na/__kha cig bstan bcos mngon pa'i tshad ces zer/__de ni shwo lo ka drug stong ngo /__/gzhan dag phung po la sogs pa'i gtam re yin par 'dod la/__yin lugs la/__sems can la spyod pa 'dod chags zhe sdang gti mug nga rgyal la sog pa brgyad khri yod de/__de rnams kyi gnyen por bcom ldan 'das kyis chos kyi phung po de dang grangs mthun par gsungs so/__/zhes dang /__bstan du yod pa ni/__'di 'di nas so/__che ge mo zhig nas so/__/zhes pa'o/__/thogs pa ni/__rang rang gi yul du gzhan skye ba'i gegs byed pa sgrib thog__/mig sogs kyi yul can rnams gzugs sogs la thogs pa yul thogs pa/__sems las byung ba rnams rang rang gi dmigs pa dag la thogs pa ste gsum mo/__/zhes bshad//____//_! dbang po nyer gcig las mig sogs lnga pos ni phan tshun rang rang gi don thams cad la dbang ba dang /__de bzhin du/__yid ni don thams cad la dmigs par bya ba lhag par dbang bar byed pa dang /__pho nyid dang mo nyid la dbang bar byed pa'i phyir lus dbang kho na la/__ris mthun par gnas par byed pa dbang ba'i phyir srog dbang /__tshor bas kun nas nyon mongs pa/__dad sogs kyis rnam par byang ba/__mya ngan las 'das pa sogs gong nas gong mar song ba 'thob pa la dbang byed pa'i phyir/__kun shes sogs gsum ste/__de yang kun shes par byed pa'i dbang pos ni kun shes pa'i dbang thob pa la dbang bar byed do/__/kun shes pa'i dbang pos ni kun shes ldan pa thob pa la dbang bar byed do/__/kun shes pa dang ldan pa'i dbang pos ni yongs su mya ngan las 'da' ba la dbang bar byed do/__/mdo nas dbang ni dbang phyug dam pa yin la/__des dbang bar byed pas dbang pa'o/__/zhes dang /__mthong lam ni mi shes pa kun shes par bya ba la zhugs pa yin no/__/sgom lam ni sngon ma mthong ba kun shes par bya ba ni med kyi/__phra rgyas lhag ma spang bar bya ba'i phyir de nyid kun shes par byed do/__/mi slob pa'i lam ni/__kun shes so snyam du rtogs pa ni kun shes pa ste/__de 'di la yod pas sam 'di kun shes pa bsrungs ba'i ngang tshul can yin pas kun shes pa dang ldan pa'o/__/zad pa dang mi skye ba'i ye shes thob pa'i phyir bdag gi sdug bsngal yongs su shes par byar med do snyam pa ste/__de lta bu'i dbang po ni kun shes pa ldan pa'i dbang po yin no/__/zhes so//____//_! 'du shes med pa ni 'du shes med pa'i snyoms 'jug bsgom pa las byung ba'i 'bras bu gzugs khams bsam gtan bzhi pa'i nang tshan no/__/'du shes med pa'i snyoms 'jug ni de'i rgyu ste/__'di la nges par 'byung ba 'dod pas te/__thar pa 'dod pas de la snyoms par 'jug go__/de dge ba yin yang skyes nas myong bar 'gyur ba kho na las mthong chos dang lan grangs gzhan la myong 'gyur ma yin no/__/de yang so skye las 'phags pa rnams kyis ni ma yin no/__/'gog pa'i snyoms 'jug ni zhi bar gnas pa'i don gyis snyoms par 'jug gi__/thar par 'dod pas ma yin te/__'dis srid rtser skye bas 'du shes dang 'du shes med min kho na'i sa ste gang zag kyang 'phags pa kho nas bsdus pa'o//____//_! ston pas bden pa bzhi zhes kyang bshad/__bden pa gnyis su yang gsungs na gnyis kyi mtshan nyid gang zhe na/__gang la cha shas bcom na de'i blo ma 'jug pa de ni kun rdzob tu yod pa ste/__dper na bum pa lta bu'o/_/de la gyo mor bcom na bum pa'i blo mi 'jug go__/gang la blo yis chos gzhan bsal na de'i blo mi 'jug pa de yang kun rdzob tu yod pa ste/__dper na chu lta bu de la blos gzugs la sogs pa'i chos bsal na chu'i blo mi 'jug go_/de dag kho na kun rdzob de'i ming btags pa yin pas kun rdzob kyi dbang gis bum pa dang chu yod do/__/zhes brjod pa na bden pa kho nar smras pa yin gyi brdzun pa ni ma yin pas de ni kun rdzob gyi bden pa'o/_/don dam pa'i bden pa gzhan no ste/__gang la bcom yang de'i blo 'jug pa kho na yin la/__blos chos gzhan bsal yang de'i blo 'jug pa ni don dam par yod pa yin te/__dper na gzugs lta bu'o/__/de ni rdul phra rab tu bcom yang rung /__blos ro la sogs pa'i chos bsal kyang rung /__gzugs kyi rang bzhin gyi blo 'jug pa nyid de/__de ni don dam par yod pa'i phyir don dam pa'i bden pa'o/__/zhes bshad/__lus tshor sems chos rnams kyi rang spyi'i mtshan nyid la bstan pa ni dran pa nyer bzhag go__/dang po ni rang gi ngo bo/__gnyis pa ni 'dus byas thams cad la yod pa mi rtag pa/__zag bcas thams cad la yod pa sdug bsngal ba/__chos thams cad la yod pa stong dang bdag med pa'o/__/nges par 'byed pas na nges par 'byed pa ste 'phags pa'i lam mo/__/des the tshom spang ba'i phyir dang /__bden pa 'di rnams ni sdug bsngal lo nas 'di ni lam mo zhes pa'i bar rnam par 'byed pa'i phyir ro/__/de'i cha ni mthong lam gyi phyogs gcig yin te/__de 'dren par byed pa'i phyir nges par 'byed pa'i cha dang mthun pa zhes bya'o/__/zhes dang /__'jig rten chos mchog gi mjug thog nas 'dod khams la dmigs pa'i cha la chos shes pa'i bzod pa skye ste/__de skyes nas 'phags pa'i gang zag ces bya ba nyid do de'i rjes la de nyid la dmigs pa'i chos shes pa skye ste ngo bo de kho na nyid shes pa'o/__/de'i rjes su lhag ma gzugs dang gzugs med na spyod pa'i sdug bsngal la rjes su shes pa'i bzod pa dang/__shes pa skye ste/__de bzhin bden pa lhag ma gsum la'ang sbyar bas sems kyi skad cig ma bcu drug go/____//__! tshad ma sde bdun gyi spyi don las/__sde pa gnyis ka 'dod pa mthun par bsags pa'i rdul phra rab cha dang bcas pa de 'dod pa na sgra dang dbang po med pas rdul rdzas brgyad ldan du skye/__rdzas brgyad ni 'byung ba bzhi'o/__/'byung 'gyur bzhi'o/_/sgra med la dbang po dang bcas na dgu'am bcu/__lus dbang po gzhan med na de'i kha mig sogs gang dang ldan pas sgra dang ldan/__go rim bzhin du/__dgu/__bcu/__bcu gcig dang ldan par skye'o//____//__! rgyu 'bras bu'i rkyen gyi rnam par bzhag pa la/__rgyu ni drug ste/__byed rgyu/__lhan cig 'byung ba'i rgyu/__skal mnyam gyi rgyu/__mtshungs ldan gyi rgyu/__kun tu 'gro ba'i rgyu/__rnam smin kyi rgyu dang bcas pa'o/__/dang po ni/__rang gi ngo bo las gzhan pa'i chos thams cad ni 'dus byas kyi byed rgyu yin te/__skye ba las gegs mi byed pa'i ngo bor gnas pa'i phyir ro/__/gnyis pa ni/__chos gang dag phan tshun gyi 'bras bu yin pa de dag ste/__de yang 'byung ba bzhi'am sems rjes su 'jug pa'i chos rnams kyis sam/__'dus byas kyi mtshan nyid rnams ni mtshan gzhi'i yin la/__de dag kyang mtshan nyid de'i yin pa lta bu'o/__/gsum pa ni bcos 'dra ba rnams te/__rang rigs kyi dge ba rnams kyang phan tshun du dge ba dang nyon mongs pa dag kyang de bzhin no/__/bzhi pa ni/__sems dang sems las byung ba'i nang nas gang dag la rten mtshungs pa yod pa'i sems dang sems las byung ba rnams te/__dper na mig gi rnam shes rten mig dbang skad cig ma gang yin pa de nyid de dang mtshungs par ldan pa tshor ba la sogs pa rnams kyi'ang yin pa lta bu'o/__/lnga pa ni/__rang gi sa pa'i nyon mongs pa can gyi chos sngar skyes pa rnams nyon mongs pa can gyi chos/__phyi ma'i ni kun tu 'gro ba'i rgyu yin no/__/drug pa ni/__mi dge ba dang /__dge ba rnams kyi chos zag pa dang bcas pa kho na ste/__rnam par smin pa'i dngos po yin pa'i phyir ro/__/gnyis pa 'bras bu la/__rnam smin/__thun mong ma yin pa/__thun mong pa/__bdag po/__rgyu mthun skyes bu byed pa/__bral 'bras te lnga las phyi ma 'bras bu btags pa dang /__dang po gnyis rgyu tha ma'i 'bras bu/__gnyis pa rgyu dang po'i/__gsum pa skal mnyam dang kun 'gro'i/__bzhi pa lhan cig 'byung ba dang mtshungs ldan gyi rgyu'i 'bras bu'o/__/de bas bdag po'i 'bras bu dang skyes bu byed pa gnyis 'dus byas dang khyab mnyam mo/_/rkyen bzhi'i dang po byed rgyu ma gtogs pa'i rgyu thams cad yin la/__rkyen bzhi ni/__rgyu/__dmigs pa/__de ma thag pa/__bdag po'i rkyen no/__/dang po ni/__byed rgyu ma gtogs pa'i rgyu lnga ste/__de yang mig dang yul gzugs la brten nas de'i rnam shes skyes pa lta bu'i dus la mtshon na mig gi dbang por la yod pa'i 'byung ba dang 'byung 'gyur rnams te/__des rgyu byas nas mig gi dbang shes tshang zhing rdzogs par bskyed pas so/__/gnyis pa ni/__chos thams cad de 'dus ma byas kyang ngo /__/de yang yul kha dog dang dbyibs su snang ba'i gzugs nyid de la dmigs pas so/__/gsum pa ni/__dgra bcom pa'i tha ma'i yid ma gtogs pa'i sems dang sems byung thams cad de/__mig gi rnam shes skye ba'i skad cig ma'i shes pa ste/__de'i skad cig pa gzhan gyis bar ma chad par skye ba'i phyir ro/_/bzhi pa ni/__byed rgyu thams cad de/__dper na mig gi dbang po kho na ste de'i bdag rkyen gyis gzugs mthong ba'i phyir ro/__/zhes bshad do//____//__!