JKCL-KABUM-12-NA-053

🚧 This website is under continued development. We appreciate your patience!

Previous Text Back to Volume PageNext Text

Wylie title	smon lam bsam don myur 'grub
Location	chos kyi blo gros bka' 'bum Volume 12, Text 53, Pages 265-267 (Folios 1a1 to 2a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. smon lam bsam don myur 'grub. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 265-267. Bir, H.P.: Khyentse Labrang, 2012.
Genre	Prayers - smon lam
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/swift-fulfilment-aspiration
Colophon	།ཅེས་པའང་རང་གི་དོན་དུ། ཆོས་བློས་རྡོ་རྗེ་གླིང་དུ་ས་ཟླའི་དགའ་བ་གཉིས་པའི་ཚེས་ལ་བྲིས་པ་དགེ།
	/ces pa'ang rang gi don du/__chos blos rdo rje gling du sa zla'i dga' ba gnyis pa'i tshes la bris pa dge/

Tibetan Text

Wylie

[edit]

སྨོན་ལམ་བསམ་དོན་མྱུར་འགྲུབ་ཅེས་བྱ་བ་བཞུགས་སོ། །ན་མོ་གུ་རུ། རྩ་གསུམ་ཀུན་འདུས་གུ་རུ་པདྨ་འབྱུང་། །དངོས་གཅིག་དུ་མའི་གར་བསྒྱུར་མཚན་མཆོག་བརྒྱད། །ཐོད་ཕྲེང་སྡེ་ལྔ་དྲག་པོ་དམར་ནག་དང་། །རྣམ་འཕྲུལ་བཅུ་གཉིས་འཕྲུལ་མཚན་བཞི་བཅུ་སོགས། ངོ་མཚར་སྤྲུལ་པ་བྱེ་བ་ཕྲག་བརྒྱ་དང་། །རྗེ་འབངས་ཉེར་ལྔ་སོ་ཟུར་གནུབ་གཉགས་ཉང་། །ཆོས་དབང་རྒོད་ལྡེམ་ཀློང་ཆེན་སྨིན་གཏེར་སོགས། །བཀའ་གཏེར་རིག་འཛིན་བརྒྱུད་པ་ཐམས་ཅད་དང་། །འཛམ་གླིང་མཛེས་རྒྱན་རྨད་བྱུང་སློབ་དཔོན་ཚོགས། །ཟླ་བཟང་ལ་སོགས་ཆོས་རྒྱལ་རིགས་ལྡན་ཚོགས། །གྲུབ་བརྒྱའི་གཙུག་རྒྱན་བྲམ་ཟེ་ས་ར་ཧ། །བིཪྺ་པ་དང་ཌོཾ་བྷི་ལཱུ་ནག་དྲིལ། །ཏེ་ལོ་ནཱ་རོ་མཻ་ཏྲི་ལ་སོགས་དང་། །ཇོ་རྔོག་འབྲོམ་དང་སྐུ་མཆེད་རྣམ་པ་གསུམ། །གླང་ཤར་གཉིས་སོགས་བཀའ་གདམས་བརྒྱུད་པ་དང་། །འབྲོག་མི་ས་ཆེན་བསོད་ནམས་རྩེ་མོའི་ཞབས། །གྲགས་རྒྱལ་པཎ་ཆེན་ཆོས་འཕགས་ངོར་ཚར་རྫོང་། །ས་སྐྱའི་བསྟན་འཛིན་བརྒྱུད་པར་བཅས་པའི་ཚོགས། །འཇམ་དབྱངས་བླ་མ་བློ་བཟང་གྲགས་པ་དང་། །ཐུགས་སྲས་རྣམ་གསུམ་ལ་སོགས་གསེར་རིའི་ཕྲེང་། །མར་པ་མི་ལ་མཉམ་མེད་དྭགས་པོ་དང་། །རས་ཆུང་ཕག་གྲུ་འབྲི་སྟག་འབྲུག་པ་སོགས། །བཀའ་བརྒྱུད་ནོར་བུའི་ཕྲེང་མཛེས་མཁས་གྲུབ་ཚོགས། །རྩོད་དུས་ཀུན་མཁྱེན་གཉིས་པ་རིན་ཆེན་གྲུབ། །དོལ་པོ་སངས་རྒྱས་ཀུན་དགའ་སྙིང་པོ་སོགས། །གསང་སྔགས་རྒྱུད་སྡེའི་གཏེར་འཆང་སྐྱེས་ཆེན་དང་། །ཁྱད་པར་བཀའ་བབས་བདུན་ལྡན་མཁྱེན་བརྩེའི་དབང་། །མཛོད་ལྔའི་ཤིང་རྟ་བློ་གྲོས་མཐའ་ཡས་ཞབས། །གསང་སྔགས་བཀའ་ཡི་སྡུད་པོ་བློ་གཏེར་དབང་། །བཻ་རོ་དངོས་སྣང་གཞན་ཕན་མཐའ་ཡས་རྗེ། །ཨོ་རྒྱན་འཇིགས་མེད་ཆོས་ཀྱི་དབང་པོ་དང་། །སྨྲ་བའི་སེང་གེ་མི་ཕམ་རྣམ་པར་རྒྱལ། །བཀའ་དྲིན་ཆེ་བའི་ཡོངས་འཛིན་དམ་པའི་མགོན། །རྩ་བརྒྱུད་བླ་མའི་དཀྱིལ་འཁོར་ལྷ་ཚོགས་དང་། །རྒྱུད་སྡེ་བཞི་དྲུག་ཡི་དམ་ཞི་ཁྲོའི་ཚོགས། །གནས་གསུམ་དཔའ་བོ་མཁའ་འགྲོ་ཆོས་སྐྱོང་དང་། །ནོར་ལྷ་གཏེར་བདག་དཀར་ཕྱོགས་སྐྱོང་འཁོར་བཅས། །ཁྱད་པར་ཐུབ་དབང་སྨན་ལྷ་མི་འཁྲུགས་པ། །རྡོ་རྗེ་སེམས་དཔའ་ཉེ་སྲས་སྒྲོལ་མ་དང་། །གནས་བརྟན་ཆེན་པོ་བཅུ་དྲུག་ལ་སོགས་པ། །སྐྱབས་གནས་ཐུགས་རྗེ་ཅན་རྣམས་དགོངས་སུ་གསོལ། །མཁྱེན་བརྩེའི་ཡེ་ཤེས་སྤྱན་གྱིས་གཟིགས་སུ་གསོལ། །བདག་གི་ལས་ངན་སྡིག་བསགས་འབྲས་བུ་སྨིན། །ལུས་སེམས་བདེ་འཕྲོག་ནད་ཀྱི་ཟུག་རྔུས་མནར། །ཕྱི་མ་ངན་སོང་སྡུག་བསྔལ་མྱོང་རེ་རན། །ཉམ་ཐག་འདི་འདྲར་དགོངས་པར་མཛད་ནས་ཀྱང་། །བྱམས་པའི་ཕྱག་གིས་སྐྱོབས་པར་མཛད་དུ་གསོལ། །གཞན་གྱི་སྡིག་སྡུག་བདག་ལ་སྨིན་གྱུར་ནས། །དེ་རྣམས་བདེ་བ་ཕུན་ཚོགས་ཐོབ་པར་ཤོག །མིང་ཙམ་ཐོས་པས་འབྲེལ་བར་གྱུར་པ་རྣམས། །རྣམ་གྲོལ་བྱང་ཆུབ་ལམ་བཟང་རྙེད་པར་ཤོག །བདག་ཀྱང་དུས་མིན་འཆི་བས་མི་གཙེས་ཤིང་། །ཚེ་མཐར་ཕྱིན་ཅིང་བསམ་དོན་ཀུན་འགྲུབ་ནས། །ཀུན་ཏུ་བཟང་པོའི་སྨོན་ལམ་རྫོགས་བྱས་ཤིང་། །བར་དུ་གཅོད་པའི་བདུད་ཀྱིས་མི་ཚུགས་ཤོག །སྒོ་གསུམ་དངོས་དང་བརྒྱུད་ནས་བསྟན་པ་དང་། །སེམས་ཅན་ཀུན་ལ་ཕན་བདེ་སྦྱིན་གྱུར་ཅིང་། །རྒྱལ་བའི་ཆོས་ཚུལ་དྲི་མ་མེད་པ་དག །འཛིན་འཆང་སྤེལ་ལ་ཐོགས་པ་མེད་པར་ཤོག །མཆོག་གསུམ་རིན་པོ་ཆེ་ཡི་བདེན་པ་དང་། །རྩ་བ་གསུམ་གྱི་མཐུ་བྱིན་ནུས་སྟོབས་ཀྱིས། །སྨོན་པའི་གནས་འདི་གེགས་མེད་འགྲུབ་པ་དང་། །བསྟན་དང་བསྟན་འཛིན་དར་ཞིང་རྒྱས་པར་ཤོག །ཅེས་པའང་རང་གི་དོན་དུ། ཆོས་བློས་རྡོ་རྗེ་གླིང་དུ་ས་ཟླའི་དགའ་བ་གཉིས་པའི་ཚེས་ལ་བྲིས་པ་དགེ། །།

[edit]

smon lam bsam don myur 'grub ces bya ba bzhugs so/__/na mo gu ru/__rtsa gsum kun 'dus gu ru pad+ma 'byung /__/dngos gcig du ma'i gar bsgyur mtshan mchog brgyad/__/thod phreng sde lnga drag po dmar nag dang /__/rnam 'phrul bcu gnyis 'phrul mtshan bzhi bcu sogs/__ngo mtshar sprul pa bye ba phrag brgya dang /__/rje 'bangs nyer lnga so zur gnub gnyags nyang /__/chos dbang rgod ldem klong chen smin gter sogs/__/bka' gter rig 'dzin brgyud pa thams cad dang /__/'dzam gling mdzes rgyan rmad byung slob dpon tshogs/__/zla bzang la sogs chos rgyal rigs ldan tshogs/__/grub brgya'i gtsug rgyan bram ze sa ra ha/__/biR+Wa pa dang DoM b+hi lU nag dril/__/te lo nA ro mai tri la sogs dang /__/jo rngog 'brom dang sku mched rnam pa gsum/__/glang shar gnyis sogs bka' gdams brgyud pa dang /__/'brog mi sa chen bsod nams rtse mo'i zhabs/__/grags rgyal paN chen chos 'phags ngor tshar rdzong /__/sa skya'i bstan 'dzin brgyud par bcas pa'i tshogs/__/'jam dbyangs bla ma blo bzang grags pa dang /__/thugs sras rnam gsum la sogs gser ri'i phreng /__/mar pa mi la mnyam med dwags po dang /__/ras chung phag gru 'bri stag 'brug pa sogs/__/bka' brgyud nor bu'i phreng mdzes mkhas grub tshogs/__/rtsod dus kun mkhyen gnyis pa rin chen grub/__/dol po sangs rgyas kun dga' snying po sogs/__/gsang sngags rgyud sde'i gter 'chang skyes chen dang /__/khyad par bka' babs bdun ldan mkhyen brtse'i dbang /__/mdzod lnga'i shing rta blo gros mtha' yas zhabs/__/gsang sngags bka' yi sdud po blo gter dbang /__/bai ro dngos snang gzhan phan mtha' yas rje/__/o rgyan 'jigs med chos kyi dbang po dang /__/smra ba'i seng ge mi pham rnam par rgyal/__/bka' drin che ba'i yongs 'dzin dam pa'i mgon/__/rtsa brgyud bla ma'i dkyil 'khor lha tshogs dang /__/rgyud sde bzhi drug yi dam zhi khro'i tshogs/__/gnas gsum dpa' bo mkha' 'gro chos skyong dang /__/nor lha gter bdag dkar phyogs skyong 'khor bcas/__/khyad par thub dbang sman lha mi 'khrugs pa/__/rdo rje sems dpa' nye sras sgrol ma dang /__/gnas brtan chen po bcu drug la sogs pa/__/skyabs gnas thugs rje can rnams dgongs su gsol/__/mkhyen brtse'i ye shes spyan gyis gzigs su gsol/__/bdag gi las ngan sdig bsags 'bras bu smin/__/lus sems bde 'phrog nad kyi zug rngus mnar/__/phyi ma ngan song sdug bsngal myong re ran/__/nyam thag 'di 'drar dgongs par mdzad nas kyang /__/byams pa'i phyag gis skyobs par mdzad du gsol/__/gzhan gyi sdig sdug bdag la smin gyur nas/__/de rnams bde ba phun tshogs thob par shog__/ming tsam thos pas 'brel bar gyur pa rnams/__/rnam grol byang chub lam bzang rnyed par shog__/bdag kyang dus min 'chi bas mi gtses shing /__/tshe mthar phyin cing bsam don kun 'grub nas/__/kun tu bzang po'i smon lam rdzogs byas shing /__/bar du gcod pa'i bdud kyis mi tshugs shog__/sgo gsum dngos dang brgyud nas bstan pa dang /__/sems can kun la phan bde sbyin gyur cing /__/rgyal ba'i chos tshul dri ma med pa dag__/'dzin 'chang spel la thogs pa med par shog__/mchog gsum rin po che yi bden pa dang /__/rtsa ba gsum gyi mthu byin nus stobs kyis/__/smon pa'i gnas 'di gegs med 'grub pa dang /__/bstan dang bstan 'dzin dar zhing rgyas par shog__/ces pa'ang rang gi don du/__chos blos rdo rje gling du sa zla'i dga' ba gnyis pa'i tshes la bris pa dge/__//__