JKCL-KABUM-12-NA-069

🚧 This website is under continued development. We appreciate your patience!

Previous Text Back to Volume PageNext Text

Wylie title	thugs chen pad+ma zhi khro'i lam rim smon lam 'khor ba dwongs sprugs
Location	chos kyi blo gros bka' 'bum Volume 12, Text 69, Pages 327-330 (Folios 1a1 to 2b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. thugs chen pad+ma zhi khro'i lam rim smon lam 'khor ba dwongs sprugs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 327-330. Bir, H.P.: Khyentse Labrang, 2012.
Genre	Prayers - smon lam
Colophon	།ཅེས་པའང་གླིང་རྫོང་མགོར་ས་སྐྱོངས་ཆོས་ཀྱི་རྒྱལ་པོ་ཡབ་སྲས་ཀྱི་ཡོན་སྦྱར་ནས་ཐུགས་རྗེ་ཆེན་པོའི་མྱོང་གྲོལ་སྒྲུབ་ཆེན་སྐབས་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་སུ་གྱུར་ཅིག།
	/ces pa'ang gling rdzong mgor sa skyongs chos kyi rgyal po yab sras kyi yon sbyar nas thugs rje chen po'i myong grol sgrub chen skabs 'jam dbyangs chos kyi blo gros pas bris pa dge legs su gyur cig/

1 Texts in this Section (sde tshan or chos tshan)

327-330	ཐུགས་ཆེན་པདྨ་ཞི་ཁྲོའི་ལམ་རིམ་སྨོན་ལམ་འཁོར་བ་དྭོངས་སྤྲུགས། thugs chen pad+ma zhi khro'i lam rim smon lam 'khor ba dwongs sprugs Prayers - smon lam	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཐུགས་ཆེན་པདྨ་ཞི་ཁྲོའི་ལམ་རིམ་སྨོན་ལམ་འཁོར་བ་དྭོངས་སྤྲུགས་ཅེས་བྱ་བ་བཞུགས་སོ། །ཧོཿ བླ་མ་འཕགས་མཆོག་ཐུགས་རྗེའི་གཏེར། སོགས་ལས་གཞུང་གི་སྨོན་ལམ་མཐར། དེང་ནས་ཚེ་རབ་ཐམས་ཅད་དུ། །དལ་དང་འབྱོར་པའི་རྟེན་བཟང་རྙེད། །སྲིད་ལས་ངེས་པར་འབྱུང་བའི་བློས། །མི་རྟག་འཆི་བ་རྗེས་དྲན་ཤོག །འཁོར་བ་སྡུག་བསྔལ་ཅན་དུ་ཤེས། །ལས་འབྲས་བླངས་དོར་ལ་བརྩོན་ཞིང་། །ཐར་པའི་ཕན་ཡོན་རྗེས་དྲན་ནས། །བླ་མའི་ཞབས་དྲུང་བསྙེན་པར་ཤོག །མཉེས་པ་གསུམ་གྱིས་བཀའ་བཞིན་སྒྲུབ། །གདམས་ངག་བདུད་རྩི་ཟབ་མོ་ནོས། །ཡིད་ཆེས་དད་མོས་དྲག་པོ་ཡིས། །གསུམ་ལ་སྐྱབས་སུ་འགྲོ་བར་ཤོག །སྲིད་ཞིའི་མཐའ་ལས་སྒྲོལ་བའི་སླད། །བྱང་ཆུབ་སེམས་མཆོག་བསྐྱེད་པ་དང་། །ཁྱད་པར་ཟབ་ལམ་བླ་མ་ཡི། །རྣལ་འབྱོར་མཆོག་ལ་བརྩོན་པར་ཤོག །ཚོགས་བསགས་སྒྲིབ་སྦྱངས་ལ་འབད་པས། །ལམ་གྱི་གཞི་རྟེན་ཐེངས་པ་དང་། །ཟབ་མོའི་ལམ་མཆོག་བསྒོམ་པ་ཡི། །རྒྱུད་དག་སྣོད་དུ་རུང་བར་ཤོག །གསོལ་འདེབས་དབང་བཞི་བླང་བ་དང་། །ཐུགས་ཡིད་བསྲེ་ཞིང་དགོངས་པ་བསྐྱངས། །རང་སེམས་བླ་མར་ཤེས་པ་ལས། །དགོངས་བརྒྱུད་བྱིན་བརླབ་འཕོ་བར་ཤོག །དཀྱིལ་འཁོར་ཟབ་མོར་དབང་བཞིས་སྨིན། །བསྙེན་དང་སྒྲུབ་པ་ལས་སྦྱོར་དང་། །ཚོགས་སྒྲུབ་ཟབ་མོར་བརྩོན་པ་ཡི། །གྲུབ་པའི་འབྲས་བུ་མངོན་གྱུར་ཤོག །ལྷ་དང་རང་སེམས་དབྱེར་མེད་དུ། །ཤེས་པའི་བསྐྱེད་རིམ་རྣལ་འབྱོར་དང་། །གསལ་དག་བརྟན་པ་ཚད་དུ་སྦྱིན། །ཡེ་ཤེས་སྒྱུ་མའི་སྐུ་འཆར་ཤོག །སྔགས་ཀྱི་བཟླས་བརྗོད་འཁྲུལ་འཁོར་ལ། །ཆུ་བོའི་རྒྱུན་བཞིན་བརྩོན་པ་དང་། །རླུང་སྔགས་རྡོ་རྗེའི་གསུང་དུ་སྨིན། །གྲགས་སྟོང་སྔགས་སུ་འཆར་བར་ཤོག །སེམས་ཚོལ་ལས་སུ་རུང་བའི་ཕྱིར། །ཞི་གནས་བསམ་གཏན་ཟབ་མོ་བསྒོམས། །ཏིང་འཛིན་རྩོལ་མེད་ཤར་བ་དང་། །འབྲས་བུ་ཤིན་སྦྱངས་ཐོབ་པར་ཤོག །རང་རང་དབང་པོའི་སྐལ་བ་བཞིན། །རིམ་དང་གཅིག་ཆར་མན་ངག་གི །སེམས་ཀྱི་རྩ་བ་གཅོད་པ་ལས། །གཞི་མེད་རྩ་བྲལ་རྟོགས་པར་ཤོག །སེམས་ཀྱི་དྭངས་སྙིགས་ཕྱེད་པ་དང་། །དུས་གསུམ་སྤྲོས་པས་མ་བཅིངས་ཤིང་། །གཟུང་འཛིན་དྲི་མས་མ་གོས་པའི། །ལྷག་མཐོང་ལྟ་བ་རྟོགས་པར་ཤོག །མ་བཅོས་མཉམ་པར་བཞག་པ་ཡི། །འཁྲུལ་རྟོག་ཐམས་ཅད་དབྱིངས་སུ་དེངས། །རིག་པའི་ཡེ་ཤེས་ངང་དུ་འབྱམས། །ཐུགས་ཀྱི་རྡོ་རྗེ་སྨིན་པར་ཤོག །སྣང་སྟོང་ཟུང་འཇུག་བུམ་དབང་དང་། །རླུང་སེམས་རྩེ་གཅིག་གསང་དབང་ལམ། །ཆོས་ཉིད་དོན་མཐོང་ཤེར་དབང་སྟེ། །ངང་གནས་བཞི་པའི་ལམ་བསྒོམ་ཤོག །རྗེས་སྤྱོད་མི་དགེ་རྩད་ནས་སྤངས། །ཕར་ཕྱིན་བཅུ་དང་ཆོས་སྤྱོད་བཅུའི། །སྤྱོད་པ་རྟག་ཏུ་བརྩོན་པ་ཡིས། །གཞན་ཕན་བརླབ་ཆེན་བསྒྲུབ་པར་ཤོག །དེ་ལྟར་བརྩོན་པས་ཚེ་འདི་ལ། །ལུས་སེམས་འཆིང་བ་རབ་གྲོལ་ནས། །མི་གནས་མྱ་ངན་འདས་པ་ཡི། །གོ་འཕང་དམ་པ་མངོན་གྱུར་ཤོག །གལ་ཏེ་ཚེ་འདིར་མ་གྲོལ་ན། །རླུང་སེམས་གོང་འཕོའི་རྣལ་འབྱོར་གྱིས། །བདེ་བ་ཅན་གྱི་ཞིང་ཁམས་སུ། །བར་དོ་མེད་པར་སྐྱེ་བར་ཤོག །བར་དོའི་སྣང་བ་འཆར་སྲིད་ན། །འཆི་སྲིད་ཆོས་སྐུའི་འོད་གསལ་དང་། །བར་དོ་རྒྱལ་བ་ལོངས་སྐུ་ཤར། །སྐྱེ་བ་སྤྲུལ་སྐུར་ལམ་བྱེད་ཤོག །གཞན་ཡང་ལས་ཚོགས་རབ་འབྱམས་ཀྱིས། །འགྲོ་བའི་དོན་རབ་སྒྲུབ་པ་དང་། །རྡོ་རྗེ་ནམ་མཁའི་ཏིང་འཛིན་གྱིས། །ལས་རྣམས་འབད་མེད་འགྲུབ་པར་ཤོག །བསྐྱེད་དང་སྒྲུབ་པའི་ལམ་མཐར་སོན། །ཉམས་རྟོགས་ཡོན་ཏན་གོང་དུ་འཕེལ། །ཡེ་ཤེས་རྩལ་ཁ་ཕྱོགས་མེད་རྒྱས། །ལུས་སེམས་ཆོས་སྐུར་གྲོལ་བར་ཤོག །སླར་ཡང་ནམ་མཁའ་གནས་ཀྱི་བར། །གཞན་དོན་སྒྲུབ་ལ་སྐྱོ་མེད་པས། །སྲིད་པར་གནས་པའི་སེམས་ཅན་ཀུན། །ཐུགས་རྗེའི་གོ་འཕང་བཀྲི་བར་ཤོག །བསྟན་དང་དེར་འཛིན་དར་ཤིང་རྒྱས། །བདག་ཅག་དམ་ཚིག་རྣམ་པར་དག །དད་མོས་བརྩོན་འགྲུས་དྲག་པོ་ཡི། །སྐལ་བ་བཟང་པོ་ལྡན་པར་ཤོག །ཕུན་ཚོགས་འདོད་རྒུའི་འབྱོར་པ་རྒྱས། །ནག་ཕྱོགས་དུས་ཀྱི་རྒུད་པ་ཞི། །རྫོགས་ལྡན་གསར་པའི་སྣང་བ་ཡིས། །ས་གསུམ་ཀུན་ཏུ་ཁྱབ་པར་ཤོག །ཅེས་པའང་གླིང་རྫོང་མགོར་ས་སྐྱོངས་ཆོས་ཀྱི་རྒྱལ་པོ་ཡབ་སྲས་ཀྱི་ཡོན་སྦྱར་ནས་ཐུགས་རྗེ་ཆེན་པོའི་མྱོང་གྲོལ་སྒྲུབ་ཆེན་སྐབས་འཇམ་དབྱངས་ཆོས་ཀྱི་བློ་གྲོས་པས་བྲིས་པ་དགེ་ལེགས་སུ་གྱུར་ཅིག། །།

[edit]

thugs chen pad+ma zhi khro'i lam rim smon lam 'khor ba dwongs sprugs ces bya ba bzhugs so/__/hoHbla ma 'phags mchog thugs rje'i gter/__sogs las gzhung gi smon lam mthar/__deng nas tshe rab thams cad du/__/dal dang 'byor pa'i rten bzang rnyed/__/srid las nges par 'byung ba'i blos/__/mi rtag 'chi ba rjes dran shog__/'khor ba sdug bsngal can du shes/__/las 'bras blangs dor la brtson zhing /__/thar pa'i phan yon rjes dran nas/__/bla ma'i zhabs drung bsnyen par shog__/mnyes pa gsum gyis bka' bzhin sgrub/__/gdams ngag bdud rtsi zab mo nos/__/yid ches dad mos drag po yis/__/gsum la skyabs su 'gro bar shog__/srid zhi'i mtha' las sgrol ba'i slad/__/byang chub sems mchog bskyed pa dang /__/khyad par zab lam bla ma yi/__/rnal 'byor mchog la brtson par shog__/tshogs bsags sgrib sbyangs la 'bad pas/__/lam gyi gzhi rten thengs pa dang /__/zab mo'i lam mchog bsgom pa yi/__/rgyud dag snod du rung bar shog__/gsol 'debs dbang bzhi blang ba dang /__/thugs yid bsre zhing dgongs pa bskyangs/__/rang sems bla mar shes pa las/__/dgongs brgyud byin brlab 'pho bar shog__/dkyil 'khor zab mor dbang bzhis smin/__/bsnyen dang sgrub pa las sbyor dang /__/tshogs sgrub zab mor brtson pa yi/__/grub pa'i 'bras bu mngon gyur shog__/lha dang rang sems dbyer med du/__/shes pa'i bskyed rim rnal 'byor dang /__/gsal dag brtan pa tshad du sbyin/__/ye shes sgyu ma'i sku 'char shog__/sngags kyi bzlas brjod 'khrul 'khor la/__/chu bo'i rgyun bzhin brtson pa dang /__/rlung sngags rdo rje'i gsung du smin/__/grags stong sngags su 'char bar shog__/sems tshol las su rung ba'i phyir/__/zhi gnas bsam gtan zab mo bsgoms/__/ting 'dzin rtsol med shar ba dang /__/'bras bu shin sbyangs thob par shog__/rang rang dbang po'i skal ba bzhin/__/rim dang gcig char man ngag gi__/sems kyi rtsa ba gcod pa las/__/gzhi med rtsa bral rtogs par shog__/sems kyi dwangs snyigs phyed pa dang /__/dus gsum spros pas ma bcings shing /__/gzung 'dzin dri mas ma gos pa'i/__/lhag mthong lta ba rtogs par shog__/ma bcos mnyam par bzhag pa yi/__/'khrul rtog thams cad dbyings su dengs/__/rig pa'i ye shes ngang du 'byams/__/thugs kyi rdo rje smin par shog__/snang stong zung 'jug bum dbang dang /__/rlung sems rtse gcig gsang dbang lam/__/chos nyid don mthong sher dbang ste/__/ngang gnas bzhi pa'i lam bsgom shog__/rjes spyod mi dge rtsad nas spangs/__/phar phyin bcu dang chos spyod bcu'i/__/spyod pa rtag tu brtson pa yis/__/gzhan phan brlab chen bsgrub par shog__/de ltar brtson pas tshe 'di la/__/lus sems 'ching ba rab grol nas/__/mi gnas mya ngan 'das pa yi/__/go 'phang dam pa mngon gyur shog__/gal te tshe 'dir ma grol na/__/rlung sems gong 'pho'i rnal 'byor gyis/__/bde ba can gyi zhing khams su/__/bar do med par skye bar shog__/bar do'i snang ba 'char srid na/__/'chi srid chos sku'i 'od gsal dang /__/bar do rgyal ba longs sku shar/__/skye ba sprul skur lam byed shog__/gzhan yang las tshogs rab 'byams kyis/__/'gro ba'i don rab sgrub pa dang /__/rdo rje nam mkha'i ting 'dzin gyis/__/las rnams 'bad med 'grub par shog__/bskyed dang sgrub pa'i lam mthar son/__/nyams rtogs yon tan gong du 'phel/__/ye shes rtsal kha phyogs med rgyas/__/lus sems chos skur grol bar shog__/slar yang nam mkha' gnas kyi bar/__/gzhan don sgrub la skyo med pas/__/srid par gnas pa'i sems can kun/__/thugs rje'i go 'phang bkri bar shog__/bstan dang der 'dzin dar shing rgyas/__/bdag cag dam tshig rnam par dag__/dad mos brtson 'grus drag po yi/__/skal ba bzang po ldan par shog__/phun tshogs 'dod rgu'i 'byor pa rgyas/__/nag phyogs dus kyi rgud pa zhi/__/rdzogs ldan gsar pa'i snang ba yis/__/sa gsum kun tu khyab par shog__/ces pa'ang gling rdzong mgor sa skyongs chos kyi rgyal po yab sras kyi yon sbyar nas thugs rje chen po'i myong grol sgrub chen skabs 'jam dbyangs chos kyi blo gros pas bris pa dge legs su gyur cig/__//