JKCL-KABUM-08-NYA-012-028

🚧 This website is under continued development. We appreciate your patience!

Previous Text Back to Volume PageNext Text

Wylie title	dus la mngon par skyo ba'i gtam mu ku'i mgrin glu
Location	chos kyi blo gros bka' 'bum Volume 8, sde tshan 12, Text 28, Pages 455-458 (Folios 21a4 to 22b5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. dus la mngon par skyo ba'i gtam mu ku'i mgrin glu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 455-458. Bir, H.P.: Khyentse Labrang, 2012.
Genre	Vajra Songs - rdo rje'i glu
Colophon	ཅེས་པའང་སྡིག་རྒན་ཟོག་པོ་བློ་གྲོས་མིང་ཅན་གྱིས་བྲིས་པའོ།།
	ces pa'ang sdig rgan zog po blo gros ming can gyis bris pa'o//

1 Texts in this Section (sde tshan or chos tshan)

28 455-458	དུས་ལ་མངོན་པར་སྐྱོ་བའི་གཏམ་མུ་ཀུའི་མགྲིན་གླུ། dus la mngon par skyo ba'i gtam mu ku'i mgrin glu Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ དུས་ལ་མངོན་པར་སྐྱོ་བའི་གཏམ་མུ་ཀུའི་མགྲིན་གླུ་ཞེས་བྱ་བ། ན་མོ་གུ་རུ། དྲན་པ་ཙམ་གྱིས་སྙིང་གི་གདུང་སེལ། །མ་རིག་མུན་པ་སེལ་བའི་སྒྲོན་མེ། །རྗེ་བཙུན་དྲན་པས་གདུང་སེལ་ཁྱེད་རྣམས། །བདག་གི་སྤྱི་བོའི་རྒྱན་དུ་བཞུགས་ཤིག། སེམས་ཅན་རྣམས་ཀྱི་ལས་ངན་བསགས་པའི། །ས་བོན་བག་ཆགས་རྩུབ་མོ་སྨིན་པས། །ཆེར་སྙིགས་གནས་དུས་བསྐལ་པ་ངན་པ། །འདི་འདྲར་སྐྱེས་པས་སེམས་པ་སྐྱོ་འོ། །དགེ་སྡིག་བླང་དོར་གནས་ལ་རྨོངས་ཤིང་། །ཤེས་ཀྱང་བཙན་དུག་འཐུང་བ་དང་འདྲ། །ཉོན་མོངས་ཤུགས་དྲག་གཉེན་པོ་སྟོབས་ཆུང་། །མི་དགེའི་ལས་ལ་སྤྱོད་འདིས་སེམས་སྐྱོ། །རང་ལ་དབང་མེད་གཏི་མུག་གཞན་དབང་། །དུག་ལྔའི་མེ་དཔུང་དྲག་ཏུ་འབར་བས། །སྙིགས་དུས་རང་གཞན་ཐམས་ཅད་བསྲེགས་ནས། །ངན་སོང་འབྲས་བུ་བསྐྱེད་འདིས་སེམས་སྐྱོ། །ཆོས་པ་རྣམས་ཀྱང་དམ་ཆོས་བྱེད་ཟེར། །བདག་བསྟོད་གཞན་སྨོད་ངན་སེམས་ཕྲག་དོག། གཅིག་གིས་གཅིག་ལ་ངན་སྨྲས་སྐུར་འདེབས། །ངན་སེམས་འཁོར་ལོ་བསྐོར་འདིས་སེམས་སྐྱོ། །སྐྱེ་བོ་ཕལ་ཆེར་མི་དགེའི་འདམ་དུ། །ཉིན་མཚན་བར་མེད་དོག་མེད་བྱ་བས། །མི་ཚེའི་ཉི་མ་ནུབ་རིར་བསྐྱལ་ཞིང་། །མི་ལུས་ཆུད་ཟོས་བཏང་འདིས་སེམས་སྐྱོ། །མི་རྟག་འཆི་བས་མདུན་ནས་སྒུག་ཀྱང་། །ཚེ་ནི་ནམ་ཟད་མི་ཤེས་བཞིན་དུ། །སྡིག་པའི་ཁུར་ཆེན་བཏེགས་ནས་འགྲོ་དུས། །སྐྱབས་མེད་ཉམ་ཐག་གྱུར་པས་སེམས་སྐྱོ། །ཐོས་པ་བྱས་ཀྱང་ཐོས་དོན་མ་སྒྲུབ། །སྒོ་གསུམ་མ་ཞི་མ་དུལ་རྩུབ་ཟིང་། །ཚེར་མ་དར་ཐུམ་འདྲ་བའི་གྱོང་པོ། །ཚུལ་འདི་བསམ་གྱིན་བསམ་གྱིན་སེམས་སྐྱོ། །ཆོས་བཞིན་སྤྱོད་པ་ཉིན་མོའི་སྐར་མ། །ཆོས་མིན་སྤྱོད་པས་ས་སྟེང་ཁེངས་ཤིང་། །སྡིག་པའི་ལྟ་ངན་མུན་པ་འཐིབ་པས། །ལོག་པའི་ལམ་དུ་འཁྱམས་འདིས་སེམས་སྐྱོ། །རྒྱལ་བའི་བསྟན་པ་སྣུམ་ཟད་མར་མེ། །བསྟན་འཛིན་སྐྱེས་རྣམས་དགུང་དུ་ཡལ་ནས། །ས་སྟེང་མུན་པའི་སྨག་གིས་ཁྱབ་ཅིང་། །ཀླ་ཀློ་མིན་ཀྱང་དེ་འདྲས་སེམས་སྐྱོ། །ཆོས་ལྡན་རྒྱལ་པོའི་དབུ་འཕང་སྨད་ཅིང་། །ཡ་རབས་དྲྭ་མའི་གྲལ་བཟང་འཐོར་ནས། །མ་རབས་སྐྱེ་བོས་འཛིན་མའི་ཁྱོན་གང་། །སྙིགས་མའི་ངང་ཚུལ་འདི་ཡིས་སེམས་སྐྱོ། །ཞག་རེའི་ནང་དུ་གཏམ་གསར་རེ་རེ། །མི་རྣམས་ཆ་ལུགས་ཕལ་ཆེར་འགྱུར་ནས། །རྒྱན་གོས་ཡོ་བྱད་མཐའ་མིའི་ཆ་ལུགས། །སྤྱོད་ངན་འདི་འདྲ་མཐོང་ནས་སེམས་སྐྱོ། །བསྟན་ལ་ཞུགས་རྣམས་ཆོས་སྤྱོད་མི་བརྩོན། །དམག་ཇག་སྒྲུང་དང་བུད་མེད་གཏམ་སོགས། །ཆགས་སྡང་དྲག་པོས་ཉིན་མཚན་དུས་འདའ། །ཐར་པའི་ལམ་ཆེན་བཀག་འདིས་སེམས་སྐྱོ། །གྲྭ་པ་རྣམས་ལ་ཆོས་གཏམ་མེད་ཅིང་། །ཁྱིམ་པའི་ཁ་ནས་ཆོས་བཤད་འུར་འུར། །གོང་འོག་ནོར་བའི་དུས་ངན་རང་རྟགས། །འདི་འདྲ་མང་པོ་མཐོང་བས་སེམས་སྐྱོ། །ཕར་ལ་ཅི་ཙམ་བྱམས་སེམས་བྱས་ཀྱང་། །ཇེ་རྩུབ་ཇེ་རྩུབ་ངན་དབང་ཇེ་ཆེ། །ལབ་རྒྱུ་མང་པོས་རང་གཞན་རྒྱུད་བསྲེགས། །འཁོར་ངན་སྐྱེ་བོ་འདི་ལ་སེམས་སྐྱོ། །བླ་མ་བསྟེན་ཟེར་དམ་ཆོས་མང་ཐོབ། །མ་བསྒོམ་མ་བསྒྲུབ་དད་དང་དག་སྣང་། །ཅུང་ཟད་མེད་པའི་བླ་སློབ་འདི་འདྲ། །དེ་ཡི་རང་བཞིན་མཐོང་བས་སེམས་སྐྱོ། །རང་རྒྱུད་མ་གྲོལ་གཞན་ལ་ཆོས་བཤད། །གསང་སྔགས་དབང་ཆོས་ནོར་དང་བརྗེ་ཞིང་། །ཕན་སེམས་མེད་ལ་རྒྱུ་ནོར་གང་ཐོབ། །ཡིད་ལ་བརྣགས་པ་འདི་ཡིས་སེམས་སྐྱོ། །བསྐྱེད་རྫོགས་ལྟ་བའི་གདིང་དང་མི་ལྡན། །གཞན་ཕན་བྱང་ཆུབ་སེམས་དང་རྒྱབ་འགལ། །འདུལ་ཁྲིམས་སྡོམ་པ་ཆུ་ལ་ཕོ་ཞིང་། །ཆོས་དང་མི་མཐུན་རང་ལ་སེམས་སྐྱོ། །སྙིགས་མ་ལྔ་བདོའི་སེམས་ཅན་འདི་འདྲ། །མགོན་པོ་འཕགས་མཆོག་ཐུགས་རྗེ་ཆེ་རྣམས། །མཁྱེན་བརྩེ་ནུས་པའི་རྩལ་ཆེན་བསྐྱེད་ནས། །སྡུག་བསྔལ་འཁོར་བའི་འདམ་ནས་དྲངས་མཛོད། །ཀྱེ་མ་ཀྱི་ཧུད་བྱམས་ལྡན་ཁྱེད་རྣམས། །ཐུགས་ལ་ལེ་ལོ་བཏང་སྙོམས་མི་མངའ། །གནས་སྐབས་འདི་དང་འདི་འདྲར་དགོངས་ནས། །ཡེ་ཤེས་སྤྱན་གྱིས་མྱུར་དུ་གཟིགས་ཏེ། །ཐུགས་རྗེའི་ཕྱག་གིས་འདྲེན་པར་མཛོད་ཅིག །ཅེས་པའང་སྡིག་རྒན་ཟོག་པོ་བློ་གྲོས་མིང་ཅན་གྱིས་བྲིས་པའོ།། །།

[edit]

dus la mngon par skyo ba'i gtam mu ku'i mgrin glu zhes bya ba/__na mo gu ru/__dran pa tsam gyis snying gi gdung sel/__/ma rig mun pa sel ba'i sgron me/__/rje btsun dran pas gdung sel khyed rnams/__/bdag gi spyi bo'i rgyan du bzhugs shig/__sems can rnams kyi las ngan bsags pa'i/__/sa bon bag chags rtsub mo smin pas/__/cher snyigs gnas dus bskal pa ngan pa/__/'di 'drar skyes pas sems pa skyo 'o/__/dge sdig blang dor gnas la rmongs shing /__/shes kyang btsan dug 'thung ba dang 'dra/__/nyon mongs shugs drag gnyen po stobs chung /__/mi dge'i las la spyod 'dis sems skyo/__/rang la dbang med gti mug gzhan dbang /__/dug lnga'i me dpung drag tu 'bar bas/__/snyigs dus rang gzhan thams cad bsregs nas/__/ngan song 'bras bu bskyed 'dis sems skyo/__/chos pa rnams kyang dam chos byed zer/__/bdag bstod gzhan smod ngan sems phrag dog/__gcig gis gcig la ngan smras skur 'debs/__/ngan sems 'khor lo bskor 'dis sems skyo/__/skye bo phal cher mi dge'i 'dam du/__/nyin mtshan bar med dog med bya bas/__/mi tshe'i nyi ma nub rir bskyal zhing /__/mi lus chud zos btang 'dis sems skyo/__/mi rtag 'chi bas mdun nas sgug kyang /__/tshe ni nam zad mi shes bzhin du/__/sdig pa'i khur chen btegs nas 'gro dus/__/skyabs med nyam thag gyur pas sems skyo/__/thos pa byas kyang thos don ma sgrub/__/sgo gsum ma zhi ma dul rtsub zing /__/tsher ma dar thum 'dra ba'i gyong po/__/tshul 'di bsam gyin bsam gyin sems skyo/__/chos bzhin spyod pa nyin mo'i skar ma/__/chos min spyod pas sa steng khengs shing /__/sdig pa'i lta ngan mun pa 'thib pas/__/log pa'i lam du 'khyams 'dis sems skyo/__/rgyal ba'i bstan pa snum zad mar me/__/bstan 'dzin skyes rnams dgung du yal nas/__/sa steng mun pa'i smag gis khyab cing /__/kla klo min kyang de 'dras sems skyo/__/chos ldan rgyal po'i dbu 'phang smad cing /__/ya rabs drwa ma'i gral bzang 'thor nas/__/ma rabs skye bos 'dzin ma'i khyon gang /__/snyigs ma'i ngang tshul 'di yis sems skyo/__/zhag re'i nang du gtam gsar re re/__/mi rnams cha lugs phal cher 'gyur nas/__/rgyan gos yo byad mtha' mi'i cha lugs/__/spyod ngan 'di 'dra mthong nas sems skyo/__/bstan la zhugs rnams chos spyod mi brtson/__/dmag jag sgrung dang bud med gtam sogs/__/chags sdang drag pos nyin mtshan dus 'da'/__/thar pa'i lam chen bkag 'dis sems skyo/__/grwa pa rnams la chos gtam med cing /__/khyim pa'i kha nas chos bshad 'ur 'ur/__/gong 'og nor ba'i dus ngan rang rtags/__/'di 'dra mang po mthong bas sems skyo/__/phar la ci tsam byams sems byas kyang /__/je rtsub je rtsub ngan dbang je che/__/lab rgyu mang pos rang gzhan rgyud bsregs/__/'khor ngan skye bo 'di la sems skyo/__/bla ma bsten zer dam chos mang thob/__/ma bsgom ma bsgrub dad dang dag snang /__/cung zad med pa'i bla slob 'di 'dra/__/de yi rang bzhin mthong bas sems skyo/__/rang rgyud ma grol gzhan la chos bshad/__/gsang sngags dbang chos nor dang brje zhing /__/phan sems med la rgyu nor gang thob/__/yid la brnags pa 'di yis sems skyo/__/bskyed rdzogs lta ba'i gding dang mi ldan/__/gzhan phan byang chub sems dang rgyab 'gal/__/'dul khrims sdom pa chu la pho zhing /__/chos dang mi mthun rang la sems skyo/__/snyigs ma lnga bdo'i sems can 'di 'dra/__/mgon po 'phags mchog thugs rje che rnams/__/mkhyen brtse nus pa'i rtsal chen bskyed nas/__/sdug bsngal 'khor ba'i 'dam nas drangs mdzod/__/kye ma kyi hud byams ldan khyed rnams/__/thugs la le lo btang snyoms mi mnga'/__/gnas skabs 'di dang 'di 'drar dgongs nas/__/ye shes spyan gyis myur du gzigs te/__/thugs rje'i phyag gis 'dren par mdzod cig/__ces pa'ang sdig rgan zog po blo gros ming can gyis bris pa'o//___//