JKCL-KABUM-08-NYA-011-010

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gdams thar lam sgron me
Location	chos kyi blo gros bka' 'bum Volume 8, sde tshan 11, Text 10, Pages 322-325 (Folios 19b1 to 21a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams thar lam sgron me. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 322-325. Bir, H.P.: Khyentse Labrang, 2012.
Genre	Advice - zhal gdams
Colophon	།དེ་སྐད་གདམས་པའི་ཕྲེང་བ་འདི། །ཌཱ་ཀི་ནོར་འཛིན་དབང་མོ་ཡིས། །རྟེན་བཅས་བསྐུལ་བ་མ་ལྡོག་ཙམ། །ཆོས་ཀྱི་བློ་གྲོས་ཞེས་བྱ་བ། །ཚུལ་འཆལ་དེ་ཡིས་གང་དྲན་བྲིས། །དགེ་བས་སེམས་ཅན་གྲོལ་གྱུར་ཅིག། མངྒ་ལཾ་ཤུ་བྷཾ།།
	/de skad gdams pa'i phreng ba 'di/__/DA ki nor 'dzin dbang mo yis/__/rten bcas bskul ba ma ldog tsam/__/chos kyi blo gros zhes bya ba/__/tshul 'chal de yis gang dran bris/__/dge bas sems can grol gyur cig/__mang+ga laM shu b+haM//

1 Texts in this Section (sde tshan or chos tshan)

10 322-325	ཞལ་གདམས་ཐར་ལམ་སྒྲོན་མེ། zhal gdams thar lam sgron me Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཞལ་གདམས་ཐར་ལམ་སྒྲོན་མེ་བཞུགས་སོ། །ལེགས་པའི་ལམ་ནི་སྟོན་མཛད་ཅིང་། །ངན་འགྲོའི་སྒོ་འཕར་གཅོད་མཛད་པ། །བྱང་ཆུབ་ལམ་བཟང་སྟོན་པའི་མགོན། །དཔལ་ལྡན་བླ་མར་ཕྱག་འཚལ་ལོ། །རིགས་ལྡན་ཆོས་མཛད་ཁྱེད་ཉིད་ཀྱིས། །ཞལ་གདམས་དགོས་ཞེས་ནན་དུ་བསྐུལ། །སྔོན་བྱོན་དམ་པའི་གསུང་རབས་ལ། །ལེགས་པར་གཟིགས་པས་ཁྱབ་ན་ཡང་། །མདོར་བསྡུས་ཙམ་ཞིག་འདིར་ཡང་བྲི། །ཀྱེ་མ་དལ་དང་འབྱོར་པ་ཡིས། །བརྒྱན་པའི་ལུས་རྟེན་སྐྱོན་མེད་པ། །འདི་འདྲ་ཐོབ་ཚེ་ཆོས་མ་སྒྲུབ། །རང་གིས་རང་བསླུས་ཕུང་ཚབ་ཆེ། །འདི་འདྲ་ཕྱིས་ནས་རྙེད་པར་དཀའ། །དེ་ཡི་རྒྱུ་མཚན་ཅི་ཞེ་ན། །ཚུལ་ཁྲིམས་སྲུང་དང་བཟོད་པ་སྒོམ། །དེ་ཡི་འབྲས་བུ་ལྷ་མིའི་རྟེན། །ཐོབ་པར་འགྱུར་གསུངས་དེ་སྒྲུབ་དཀོན། །རྟེན་ཐོབ་འདི་ཡང་ཡུན་མི་རྟག། རྩ་རྩེའི་ཟིལ་པ་ཆུ་བུར་སོགས། །དཔེ་ཡི་རྣམ་གྲངས་དུ་མ་ཡིས། །མི་རྟག་འཇིག་པའི་ངང་ཚུལ་བསམ། །ངང་རིང་མ་བྱེད་ཆོས་ལ་རེམ། །སང་བྱེད་གནང་བྱེད་མང་པོ་ཡི། །གྲབས་ཚིས་ངང་ལ་མི་ཚེ་ཟད། །ཉིན་གཅིག་འཆི་བ་ཐོག་བབས་འོང་། །དེ་དུས་འགྱོད་ཀྱང་ཕྱིས་ཏེ་ཐལ། །དེ་བས་རང་དབང་ཡོད་པའི་དུས། །དྲན་རྒྱུ་མ་མང་ཆོས་ལ་འབད། །དེ་ཡང་དགེ་སྡིག་ཕྱེད་འདྲེས་ཀྱིས། །དགེ་བ་སྟོབས་ཆེན་མི་འགྱུར་བས། །དྲན་དང་ཤེས་བཞིན་བསྟེན་གྱིས་ལ། །སྡིག་པ་ཆེ་ཕྲ་ཐམས་ཅད་ཀུན། །ཤིན་ཏུ་འཛེམ་ཞིང་བཤགས་སྡོམ་བྱ། །ལས་ཀྱི་འབྲས་བུ་བསླུ་མི་སྲིད། །རང་བྱས་རང་གི་སྟེང་དུ་སྨིན། །འཁོར་བ་འདི་ནི་སྡུག་བསྔལ་གྱི། །རང་བཞིན་ཉིད་ལས་མ་འདས་པས། །དེ་ལས་རང་གཞན་སེམས་ཅན་རྣམས། །མྱུར་དུ་ཐར་ཕྱིར་སྐྱབས་འགྲོ་དང་། །བསམ་པ་བཟང་པོས་སེམས་བསྐྱེད་མཛོད། །བསམ་ངན་ཕྲག་དོག་ཅན་རྣམས་ནི། །གནས་སྐབས་བསམ་དོན་མི་འགྲུབ་ཅིང་། །འཆི་ཁ་གནད་གཅོད་ཆེ་བ་དང་། །དམྱལ་བའི་མེ་ནི་བཟོད་པར་དཀའ། །དེ་བས་སྒོ་གསུམ་བྱ་བ་རྣམས། །སེམས་ཅན་དོན་དུ་འགྱུར་བ་ཡི། །བསམ་དཀར་སྨོན་ལམ་བཟང་པོ་ཐོབ། །ནོར་ནི་ཇི་ཙམ་འབྱོར་གྱུར་ཀྱང་། །ཆོག་ཤེས་དཀའ་ཞིང་གསོག་སྲུང་སྤེལ། །རྩོལ་བ་བརྒྱ་ཕྲག་བསྐྱེད་བྱས་ཀྱང་། །སྒྲུབ་དཀའ་མནོག་ཆུང་ཕན་པའང་ཕྲ། །ཕལ་ཆེར་དོན་མེད་གྱི་ནར་ཟད། །ཕལ་ཆེར་གཞན་གྱིས་སྤྱོད་པར་འགྱུར། །དེས་ན་ཆོག་ཤེས་བསྟེན་པར་བྱ། །ཅུང་ཟད་འབྱོར་པར་གྱུར་པ་ན། །དཀོན་མཆོག་མཆོད་པ་ལ་སོགས་པའི། །བསོད་ནམས་ཚོགས་བསགས་པ་ལ་འབད། །སྨྲ་བ་མང་བས་རང་གཞན་བརླག། ཚོད་རན་ཙམ་དུ་དགོས་དོན་སྨྲ། །རྟག་ཏུ་མ་ཎི་སིདྡྷི་བགྲང་། །ངག་ནི་རྣམ་ཀུན་དོན་ཡོད་བྱ། །ལུས་ནི་རབ་ཏུ་བསྲུང་བྱ་ཞིང་། །ཉ་སྟོང་ཚེས་བརྒྱད་ལ་སོགས་པར། །བསྙེན་གནས་སྨྱུང་གནས་སྡོམ་པ་བླངས། །སེམས་ཀྱང་དྲན་དང་ཤེས་བཞིན་གྱི། །ཐགས་སྒྲོག་དམ་པོས་རབ་བཏུལ་ཏེ། །འཁྲུལ་རྟོག་རྒྱ་འབྱམས་མ་སོང་བ། །བྱང་ཆུབ་སེམས་དང་ལྟ་བ་ལ། །ཡང་ཡང་བློ་ནི་སྦྱོང་བར་མཛོད། །བདེ་གཤེགས་སྙིང་པོའི་རང་ཞལ་ནི། །མ་རིག་རྡུལ་གྱིས་སྒྲིབ་པས་ན། །བཤགས་སྦྱངས་དག་ལ་ནན་ཏན་དང་། །ཁྱད་པར་རྡོར་སེམས་བསྒོམ་བཟླས་བརྩོན། །རྟོགས་པའི་ཡེ་ཤེས་རང་རྒྱུད་ལ། །སྐྱེ་བའི་རྟེན་འབྲེལ་མོས་གུས་དང་། །བླ་མའི་བྱིན་རླབས་གཙོ་ཆེ་བས། །བླ་མའི་རྣལ་འབྱོར་ཟབ་མོར་བརྩོན། །འཁྲུལ་པའི་སེམས་ཀྱི་གཞི་རྩ་ཆོད། །སེམས་ཉིད་སྐྱེ་མེད་དོན་རྟོགས་ན། །འཁོར་བའི་གྲོང་ཁྱེར་སྟོང་པར་འགྱུར། །ཡེ་ཤེས་རྩལ་ཁ་ཕྱོགས་མེད་རྒྱས། །མ་བཅོས་མ་ཡེངས་ངང་ལྡན་པས། །ངང་བཞག་རྣལ་འབྱོར་ཟབ་མོ་ཡི། །གཟུང་དང་འཛིན་པ་ལས་གྲོལ་བའི། །ཆོས་སྐུའི་བཙན་ས་ཟིན་པ་དང་། །ནམ་མཁའ་མཉམ་པའི་སེམས་ཅན་རྣམས། །སྐུ་གསུམ་ས་ལ་འགོད་པར་འགྱུར། །དེ་སྐད་གདམས་པའི་ཕྲེང་བ་འདི། །ཌཱ་ཀི་ནོར་འཛིན་དབང་མོ་ཡིས། །རྟེན་བཅས་བསྐུལ་བ་མ་ལྡོག་ཙམ། །ཆོས་ཀྱི་བློ་གྲོས་ཞེས་བྱ་བ། །ཚུལ་འཆལ་དེ་ཡིས་གང་དྲན་བྲིས། །དགེ་བས་སེམས་ཅན་གྲོལ་གྱུར་ཅིག། མངྒ་ལཾ་ཤུ་བྷཾ།།

[edit]

zhal gdams thar lam sgron me bzhugs so/__/legs pa'i lam ni ston mdzad cing /__/ngan 'gro'i sgo 'phar gcod mdzad pa/__/byang chub lam bzang ston pa'i mgon/__/dpal ldan bla mar phyag 'tshal lo/__/rigs ldan chos mdzad khyed nyid kyis/__/zhal gdams dgos zhes nan du bskul/__/sngon byon dam pa'i gsung rabs la/__/legs par gzigs pas khyab na yang /__/mdor bsdus tsam zhig 'dir yang bri/__/kye ma dal dang 'byor pa yis/__/brgyan pa'i lus rten skyon med pa/__/'di 'dra thob tshe chos ma sgrub/__/rang gis rang bslus phung tshab che/__/'di 'dra phyis nas rnyed par dka'/__/de yi rgyu mtshan ci zhe na/__/tshul khrims srung dang bzod pa sgom/__/de yi 'bras bu lha mi'i rten/__/thob par 'gyur gsungs de sgrub dkon/__/rten thob 'di yang yun mi rtag/__rtsa rtse'i zil pa chu bur sogs/__/dpe yi rnam grangs du ma yis/__/mi rtag 'jig pa'i ngang tshul bsam/__/ngang ring ma byed chos la rem/__/sang byed gnang byed mang po yi/__/grabs tshis ngang la mi tshe zad/__/nyin gcig 'chi ba thog babs 'ong /__/de dus 'gyod kyang phyis te thal/__/de bas rang dbang yod pa'i dus/__/dran rgyu ma mang chos la 'bad/__/de yang dge sdig phyed 'dres kyis/__/dge ba stobs chen mi 'gyur bas/__/dran dang shes bzhin bsten gyis la/__/sdig pa che phra thams cad kun/__/shin tu 'dzem zhing bshags sdom bya/__/las kyi 'bras bu bslu mi srid/__/rang byas rang gi steng du smin/__/'khor ba 'di ni sdug bsngal gyi/__/rang bzhin nyid las ma 'das pas/__/de las rang gzhan sems can rnams/__/myur du thar phyir skyabs 'gro dang /__/bsam pa bzang pos sems bskyed mdzod/__/bsam ngan phrag dog can rnams ni/__/gnas skabs bsam don mi 'grub cing /__/'chi kha gnad gcod che ba dang /__/dmyal ba'i me ni bzod par dka'/__/de bas sgo gsum bya ba rnams/__/sems can don du 'gyur ba yi/__/bsam dkar smon lam bzang po thob/__/nor ni ji tsam 'byor gyur kyang /__/chog shes dka' zhing gsog srung spel/__/rtsol ba brgya phrag bskyed byas kyang /__/sgrub dka' mnog chung phan pa'ang phra/__/phal cher don med gyi nar zad/__/phal cher gzhan gyis spyod par 'gyur/__/des na chog shes bsten par bya/__/cung zad 'byor par gyur pa na/__/dkon mchog mchod pa la sogs pa'i/__/bsod nams tshogs bsags pa la 'bad/__/smra ba mang bas rang gzhan brlag/__tshod ran tsam du dgos don smra/__/rtag tu ma Ni sid+d+hi bgrang /__/ngag ni rnam kun don yod bya/__/lus ni rab tu bsrung bya zhing /__/nya stong tshes brgyad la sogs par/__/bsnyen gnas smyung gnas sdom pa blangs/__/sems kyang dran dang shes bzhin gyi/__/thags sgrog dam pos rab btul te/__/'khrul rtog rgya 'byams ma song ba/__/byang chub sems dang lta ba la/__/yang yang blo ni sbyong bar mdzod/__/bde gshegs snying po'i rang zhal ni/__/ma rig rdul gyis sgrib pas na/__/bshags sbyangs dag la nan tan dang /__/khyad par rdor sems bsgom bzlas brtson/__/rtogs pa'i ye shes rang rgyud la/__/skye ba'i rten 'brel mos gus dang /__/bla ma'i byin rlabs gtso che bas/__/bla ma'i rnal 'byor zab mor brtson/__/'khrul pa'i sems kyi gzhi rtsa chod/__/sems nyid skye med don rtogs na/__/'khor ba'i grong khyer stong par 'gyur/__/ye shes rtsal kha phyogs med rgyas/__/ma bcos ma yengs ngang ldan pas/__/ngang bzhag rnal 'byor zab mo yi/__/gzung dang 'dzin pa las grol ba'i/__/chos sku'i btsan sa zin pa dang /__/nam mkha' mnyam pa'i sems can rnams/__/sku gsum sa la 'god par 'gyur/__/de skad gdams pa'i phreng ba 'di/__/DA ki nor 'dzin dbang mo yis/__/rten bcas bskul ba ma ldog tsam/__/chos kyi blo gros zhes bya ba/__/tshul 'chal de yis gang dran bris/__/dge bas sems can grol gyur cig/__mang+ga laM shu b+haM//