JKW-KABUM-08-NYA-013-004

🚧 This website is under continued development. We appreciate your patience!

Previous Text Back to Volume PageLast text in section.

Wylie title	'jigs byed dpa' gcig gi rjes gnang
Location	mkhyen brtse'i bka' 'bum Volume 8, sde tshan 13, Text 4, Pages 354-360 (Folios 9b1 to 12b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'jigs byed dpa' gcig gi rjes gnang. In 'jam dbyangs mkhyen brtse'i dbang po'i bka' 'bum, Vol. 8: 354-360. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Deity	'jigs byed
Colophon	།ཅེས་པའང་བྱ་བྲལ་བ་མཉྫུ་གྷོ་ཥས་རང་འདྲའི་བློ་དམན་རྣམས་ལ་ཉེ་བར་མཁོ་བའི་སླད་དུ། གནས་གསར་བ་འཇམ་དབྱངས་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་གསུང་རབ་ཀྱི་དགོངས་དོན་ཇི་ལྟ་བར་ནག་འགྲོས་བཀླག་ཆོག་ཏུ་བྲིས་པ་དགེ་ལེགས་སུ་གྱུར་ཅིག
	ces pa'ang bya bral ba many+dzu g+ho Shas rang 'dra'i blo dman rnams la nye bar mkho ba'i slad du/__gnas gsar ba 'jam dbyangs mkhyen brtse'i dbang phyug bstan pa'i rgyal mtshan dpal bzang po'i gsung rab kyi dgongs don ji lta bar nag 'gros bklag chog tu bris pa dge legs su gyur cig

1 Texts in this Section (sde tshan or chos tshan)

4 354-360	འཇིགས་བྱེད་དཔའ་གཅིག་གི་རྗེས་གནང་། 'jigs byed dpa' gcig gi rjes gnang Permission to Invoke (anujñā) - rjes gnang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་རྗེས་གནང་གི་ཆོ་ག་གྲུབ་པའི་དགོངས་རྒྱན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། །གཉིས་མེད་ཡེ་ཤེས་རྡོ་རྗེ་ཡིས། །གཟུང་འཛིན་བདུད་སྡེ་འཇིགས་བྱེད་པ། །བླ་མ་འཇམ་དཔལ་ཁྲོས་པ་ལ། །བཏུད་ནས་དེ་ཡི་རྗེས་གནང་འབྲི། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་དབུས་སུ་མཎྜལ་གྱི་ཁར་ཚོམ་བུ་གཅིག །དེའི་མདུན་དུ་མཆོད་གཏོར། སློབ་དཔོན་གྱི་མདུན་དུ་རྡོར་དྲིལ་ནང་མཆོད་སོགས་དགོས་པའི་ཡོ་བྱད་རྣམས་འདུ་བྱ། མཆོད་པ་བྱིན་རླབས་སྔོན་དུ་འགྲོ་བས་སྐྱབས་སེམས་ནས་བཟླས་པའི་བར་བདག་གི་རྣལ་འབྱོར་རྨོར་ཆེན་རྡོ་རྗེ་འཆང་གིས་མཛད་པའི་མངོན་རྟོགས་གྲུབ་པའི་ཞལ་ལུང་ལྟར་ཉམས་སུ་བླངས་རྗེས། ཚོམ་བུ་ཧྲཱིཿཥྟཱིཿས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པྃ་ལས་པདྨ་དང་རྃ་ལས་ཉི་མའི་སྟེང་དུ་དྷཱིཿལས་རལ་གྲི་སོགས་ནས། དབུར་བརྒྱན་ཞེས་པའི་བར་ཚིག་གི་ཁ་བསྒྱུར་ཅུང་ཟད་ཙམ་མ་གཏོགས་བདག་བསྐྱེད་ལྟར་གསལ་བཏབ། མཆོད་པ་བསང་སྦྱང་བྱིན་རླབས་མཆོད་བསྟོད་གཏོར་མ་འབུལ་བ་རྣམས་མངོན་རྟོགས་ལྟར་དང་། མདུན་བསྐྱེད་ཀྱི་ཐུགས་རྒྱུད་བསྐུལ་བར་དམིགས་ཏེ་བཟླས་པ་ཅུང་ཟད་བྱའོ། །གཉིས་པ་ནི། སློབ་མ་རྣམས་ཁྲུས་བྱས་གྲལ་དུ་འཁོད་པར། མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་བཏབ་ནས། དེ་ལ་རྣལ་འབྱོར་ཆེན་པོ་བླ་ན་མེད་པ་ཞེ་སྡང་ཐབས་རྒྱུད་དམར་ནག་འཇིགས་གསུམ་དུ་གྲགས་པ་ལས་བྱིན་རླབས་དང་དངོས་གྲུབ་གྱི་གཏེར་དུ་གྱུར་པའི་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་སྐོར་ལ། འཕགས་བོད་དུ་སྒྲུབ་ཐབས་དང་མན་ངག་གི་བཀའ་སྲོལ་མཐའ་ཡས་པར་བྱོན་པ་ལས། འདིར་སློབ་དཔོན་ཆེན་པོ་འཇམ་པའི་དབྱངས་དང་། རྭ་ལོ་ཙཱ་བ་རྡོ་རྗེ་གྲགས་སོགས་ཀྱིས་ལེགས་པར་བཀྲལ་ཞིང་། ལམ་འདི་ལ་མཁས་ཤིང་དངོས་གྲུབ་བརྙེས་པའི་བརྒྱུད་པ་བར་མ་ཆད་པ་ལས་རིམ་པར་འོངས་པའི་བཅོམ་ལྡན་འདས་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པའི་རྗེས་སུ་གནང་བ་སྒྲུབ་པ་ལ་སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ། ཐོག་མར་སློབ་དཔོན་ལ་དཔལ་རྡོ་རྗེ་འཇིགས་བྱེད་དངོས་ཡིན་སྙམ་པའི་མོས་གུས་དང་ལྡན་པས་རྗེས་གནང་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། དེ་ལྟར་མཎྜལ་ཕུལ་ནས་རྡོ་རྗེ་ཐལ་མོ་མེ་ཏོག་དང་བཅས་པ་སྙིང་གར་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། རྡོ་རྗེ་འཛིན་པ་དགོངས་སུ་གསོལ། སོགས། ཞེས་གསོལ་བ་བཏབ་ནས། རྒྱུད་དག་པར་བྱ་བའི་སླད་དུ་མདུན་གྱི་ནམ་མཁར་བླ་མ་དང་གཉིས་སུ་མེད་པའི་བཅོམ་ལྡན་འདས་རྡོ་རྗེ་འཇིགས་བྱེད་ཆེན་པོ་ལ། གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་ཀྱིས་མི་ཁྱབ་པས་བསྐོར་ཏེ་བཞུགས་པའི་སྤྱན་སྔར་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས། སླར་ཡང་ཐུན་མོང་མ་ཡིན་པའི་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། སློབ་དཔོན་དགོངས་སུ་གསོལ། བདག་ལ་དཔལ་རྡོ་རྗེ་འཇིགས་བྱེད་ཀྱི་སྐུ་གསུང་ཐུགས་ཀྱི་རྗེས་སུ་གནང་བ་མ་ལུས་པ་སྩལ་དུ་གསོལ་ཞེས་བྱ་བ་རྣམས་རྗེས་གནང་གི་སྔོན་འགྲོ་ཡིན། དངོས་གཞི་ལ་སྐུ་གསུང་ཐུགས་ཀྱི་རྗེས་སུ་གནང་བ་གསུམ་ལས། ཐོག་མར་སྐུའི་རྗེས་གནང་གི་སླད་དུ། སློབ་དཔོན་རྡོ་རྗེ་འཇིགས་བྱེད་དངོས་སུ་གསལ་བ་ལ་གུས་འདུད་དྲག་པོ་མཛད་པས། སློབ་དཔོན་གྱི་ཐུགས་ཀའི་ཧཱུྃ་ལས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་ལུས་ལ་ཕོག་པས་སྡིག་སྒྲིབ་ཉེས་ལྟུང་ལྷ་འདྲེས་བྱད་དུ་བཅུག་པ་སོགས་སྤང་བྱ་མི་མཐུན་པའི་ཚོགས་དང་། དེར་མ་ཟད་རྣམ་སྨིན་གདོས་བཅས་ཀྱི་ལུས་ཀྱང་མི་དམིགས་པར་སྦྱངས་ཏེ་འོད་ཀྱི་གོང་བུ་རེ་རེར་གྱུར། དེ་ཉིད་ལ་དམིགས་ཏེ་སློབ་དཔོན་གྱིས། ཨོཾ་ཤཱུནྱ་ཏཱ་སོགས། ཞེས་བརྗོད་པས་འོད་ཕུང་བརྟན་གཡོའི་ཆོས་དང་བཅས་པ་འོད་གསལ་སྟོང་ཉིད་ནམ་མཁའི་དབྱིངས་ལྟ་བུར་གྱུར་པའི་མོས་པ་མཛོད། དེའི་ངང་ལས་ཁྱེད་རང་རྣམས་གང་དུ་གནས་པའི་གོ་སར་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་སྟེང་དུ་སེམས་ཉིད་རྣམ་པར་མི་རྟོག་པའི་ངོ་བོ་དྷཱིཿཡིག་གསེར་གྱི་མདོག་ཅན་ལ་རལ་གྲི་དྷཱིཿས་མཚན་པ་སོགས་ནས། ཧཱུྃ་སྔོན་པོ་ཞེས་པའི་བར་རང་ཉིད་ཅེས་པའི་ཚིག་དོར་བ་ཙམ་མ་གཏོགས་མངོན་རྟོགས་ལྟར་གསལ་གདབ། སླར་ཡང་སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་བྱུང་། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་དག་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས། འོག་མིན་དང་། ཨོ་རྒྱན་མཁའ་འགྲོའི་གླིང་ན་བཞུགས་པའི་དཔལ་རྡོ་རྗེ་འཇིག་བྱེད་ཆེན་པོ་དང་། གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་ཐམས་ཅད་ཀྱི་ཐུགས་ཀ་ནས་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་སྐུའི་རྣམ་པ་ཆེ་བ་རི་རབ་ཙམ་ནས། ཆུང་བ་རྡུལ་ཕྲན་ཙམ་གྱི་བར་ཚད་མེད་གྲངས་མེད་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་ལུས་ལ་བྱེ་ཚན་ལ་ཁ་བ་བབས་པ་ལྟར་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། རྩ་སྔགས། སྙིང་པོ། ཉེ་སྙིང་རྣམས་སྦྲེལ་མཐར། ཨོཾ་བཛྲ་ཨཱ་བེ་ཤ་ཡ་ཨཿཨཱཿ ཛཿཧཱུྃ་བྃ་ཧོཿ ཞེས་ཡང་ཡང་བརྗོད་ཅིང་སྤོས་རོལ་དང་བཅས་ཡེ་ཤེས་པ་དབབ་ཅིང་བསྟིམ། གསུང་གི་རྗེས་གནང་གི་སླད་དུ། སློབ་དཔོན་ལྷར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་རྡོ་རྗེའི་ལྟེ་བར་ཧཱུྃ་མཐིང་ནག་གི་མཐར་སྔགས་ཕྲེང་སྐར་མ་ལྟ་བུས་བསྐོར་བ་དང་། ཁྱེད་རང་རྣམས་ཀྱི་ཐུགས་ཀར་ཉི་མ་ལ་རྡོ་རྗེའི་ལྟེ་བར་ཧཱུྃ་མཐིང་ནག་རེ་གསལ་བཏབ་ནས། སློབ་དཔོན་ལ་གུས་འདུད་བྱས་པས། སློབ་དཔོན་གྱི་ཐུགས་ཀའི་སྔགས་ཕྲེང་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་སྔགས་ཕྲེང་གཉིས་པ་ལན་གསུམ་བྱུང་། སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་ཧཱུྃ་གི་མཐར་མར་དང་པོས་འཁོད། གཉིས་པས་བརྟན་པར་བྱས། གསུམ་པས་བྱིན་གྱིས་བརླབས་པའི་མོས་པ་དང་བཅས་ཏེ་སྔགས་འདི་རྣམས་ཀྱི་རྗེས་ཟློས་ལན་གསུམ་མཛོད། ཅེས་བརྡ་སྤྲད་ལ་སྔགས་རྣམས་ལན་གསུམ་བཟླར་གཞུག །སླར་ཡང་སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་འཐོར་བ་དང་བཅས་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་མེ་ཏོག་གི་ཕྲེང་བ་སྔགས་སུ་བྱས་ཏེ་སྤྱི་བོར་བཞག་པས་སྙིང་གའི་སྔགས་ཕྲེང་བརྟན་ཅིང་ནུས་ལྡན་དུ་བྱིན་གྱིས་བརླབས་པའི་མོས་པ་མཛོད། བཅོམ་ལྡན་འདས་འདི་ལ་སོགས། དམ་བཅའ་བའི་སླད་དུ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཡི་དམ་གྱི་ལྷར་བཟུང་བར་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོ་ཡི་དམ་གྱི་ལྷར་བཟུང་བར་བགྱིའོ། །ཐུགས་ཀྱི་རྗེས་གནང་གི་སླད་དུ། སློབ་དཔོན་ལ་གུས་འདུད་མཛད་པས་སོགས་གོང་ལྟར་ལ། དེ་ཐམས་ཅད་ཀྱི་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ། རྡོ་རྗེ་ནག་པོ་རྩེ་ལྔ་པ་རྭ་གདེངས་པའི་རྣམ་པ་ཅན་དཔག་ཏུ་མེད་པ་བྱུང་སྟེ་ཁྱེད་རང་རྣམས་ཀྱི་སྙིང་གའི་རྡོ་རྗེ་ལ་ཐིམ་པས། སངས་རྒྱས་ཐམས་ཅད་ཀྱི་རྡོ་རྗེའི་བདག་ཉིད་ང་ཡིན་སྙམ་དུ་བསྒོམས་ལ་ཅུང་ཟད་རེ་མཉམ་པར་འཇོག་པར་ཞུ། དེས་རྗེས་གནང་གི་དངོས་གཞི་གྲུབ་ནས། མཇུག་གི་ཆོས་དམ་ཚིག་ཁས་བླང་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་གཏང་། གསུམ་པ་ནི། སློབ་དཔོན་གྱིས་མཆོད་པ་ཁ་གསོས་བསང་སྦྱང་བྱིན་རླབས། མཆོད་བསྟོད། གཟོད་གསོལ། ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། རང་གི་མིག་ཏུ་ཀྵིཾ་སོགས་སྐྱེ་མཆེད་དང་གནས་གསུམ་བསྲུང་། བསྔོ་སྨོན་ཤིས་བརྗོད་སྤྱི་ལྟར་བྱའོ། །བཅོམ་ལྡན་རྡོ་རྗེ་འཇིགས་བྱེད་ཀྱི། །རྗེས་སུ་གནང་བའི་ཆོ་ག་ནི། །གྲུབ་པའི་དགོངས་རྒྱན་འདི་སྦྱར་བས། །འགྲོ་ཀུན་འཇམ་དབྱངས་ཉིད་ཐོབ་ཤོག །ཅེས་པའང་བྱ་བྲལ་བ་མཉྫུ་གྷོ་ཥས་རང་འདྲའི་བློ་དམན་རྣམས་ལ་ཉེ་བར་མཁོ་བའི་སླད་དུ། གནས་གསར་བ་འཇམ་དབྱངས་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་གསུང་རབ་ཀྱི་དགོངས་དོན་ཇི་ལྟ་བར་ནག་འགྲོས་བཀླག་ཆོག་ཏུ་བྲིས་པ་དགེ་ལེགས་སུ་གྱུར་ཅིག །

[edit]

'jigs byed dpa' gcig gi rjes gnang / @#/_/dpal rdo rje 'jigs byed zhal gcig phyag gnyis pa'i rjes gnang gi cho ga grub pa'i dgongs rgyan zhes bya ba bzhugs so/__/oM swa sti sid+d+haM/__/gnyis med ye shes rdo rje yis/__/gzung 'dzin bdud sde 'jigs byed pa/__/bla ma 'jam dpal khros pa la/__/btud nas de yi rjes gnang 'bri/__/'di la gsum/__sbyor ba/__dngos gzhi/__rjes so/__/dang po ni/__gnas dben par stegs bu'i dbus su maN+Dal gyi khar tshom bu gcig__/de'i mdun du mchod gtor/__slob dpon gyi mdun du rdor dril nang mchod sogs dgos pa'i yo byad rnams 'du bya/__mchod pa byin rlabs sngon du 'gro bas skyabs sems nas bzlas pa'i bar bdag gi rnal 'byor rmor chen rdo rje 'chang gis mdzad pa'i mngon rtogs grub pa'i zhal lung ltar nyams su blangs rjes/__tshom bu hrIHSh+tIHsa bsang /__swa b+hA was sbyang /__stong pa'i ngang las pa~M las pad+ma dang ra~M las nyi ma'i steng du d+hIHlas ral gri sogs nas/__dbur brgyan zhes pa'i bar tshig gi kha bsgyur cung zad tsam ma gtogs bdag bskyed ltar gsal btab/__mchod pa bsang sbyang byin rlabs mchod bstod gtor ma 'bul ba rnams mngon rtogs ltar dang /__mdun bskyed kyi thugs rgyud bskul bar dmigs te bzlas pa cung zad bya'o/__/gnyis pa ni/__slob ma rnams khrus byas gral du 'khod par/__me tog bkye bsdu grub rjes/__slob dpon gyis sems bskyed gsal btab nas/__de la rnal 'byor chen po bla na med pa zhe sdang thabs rgyud dmar nag 'jigs gsum du grags pa las byin rlabs dang dngos grub gyi gter du gyur pa'i bcom ldan 'das dpal rdo rje 'jigs byed kyi skor la/__'phags bod du sgrub thabs dang man ngag gi bka' srol mtha' yas par byon pa las/__'dir slob dpon chen po 'jam pa'i dbyangs dang /__rwa lo tsA ba rdo rje grags sogs kyis legs par bkral zhing /__lam 'di la mkhas shing dngos grub brnyes pa'i brgyud pa bar ma chad pa las rim par 'ongs pa'i bcom ldan 'das rdo rje 'jigs byed zhal gcig phyag gnyis pa'i rjes su gnang ba sgrub pa la slob dpon gyi bya ba rnams grub nas/__khyed rang rnams kyi ngo skal du gyur pa/__thog mar slob dpon la dpal rdo rje 'jigs byed dngos yin snyam pa'i mos gus dang ldan pas rjes gnang zab mo zhu ba'i yon du dmigs te maN+Dal zhig 'bul bar zhu/__de ltar maN+Dal phul nas rdo rje thal mo me tog dang bcas pa snying gar sbyar te gsol ba 'debs pa 'di'i rjes zlos lan gsum mdzod/__rdo rje 'dzin pa dgongs su gsol/__sogs/__zhes gsol ba btab nas/__rgyud dag par bya ba'i slad du mdun gyi nam mkhar bla ma dang gnyis su med pa'i bcom ldan 'das rdo rje 'jigs byed chen po la/__gzhan yang phyogs bcu'i sangs rgyas dang byang chub sems dpa'i tshogs bsam kyis mi khyab pas bskor te bzhugs pa'i spyan sngar sdig pa bshags pa la sogs pa yan lag bdun pa bgyid snyam pas 'di'i rjes zlos mdzod/__dkon mchog gsum la sogs/__slar yang thun mong ma yin pa'i gsol ba 'debs pa 'di'i rjes zlos lan gsum mdzod/__slob dpon dgongs su gsol/__bdag la dpal rdo rje 'jigs byed kyi sku gsung thugs kyi rjes su gnang ba ma lus pa stsal du gsol zhes bya ba rnams rjes gnang gi sngon 'gro yin/__dngos gzhi la sku gsung thugs kyi rjes su gnang ba gsum las/__thog mar sku'i rjes gnang gi slad du/__slob dpon rdo rje 'jigs byed dngos su gsal ba la gus 'dud drag po mdzad pas/__slob dpon gyi thugs ka'i hU~M las 'od zer 'phros/__mdun bskyed kyi thugs kar phog pas thugs rgyud bskul/__de'i thugs ka nas 'od zer dpag tu med pa byung /__khyed rang rnams kyi lus la phog pas sdig sgrib nyes ltung lha 'dres byad du bcug pa sogs spang bya mi mthun pa'i tshogs dang /__der ma zad rnam smin gdos bcas kyi lus kyang mi dmigs par sbyangs te 'od kyi gong bu re rer gyur/__de nyid la dmigs te slob dpon gyis/__oM shUn+ya tA sogs/__zhes brjod pas 'od phung brtan g.yo'i chos dang bcas pa 'od gsal stong nyid nam mkha'i dbyings lta bur gyur pa'i mos pa mdzod/__de'i ngang las khyed rang rnams gang du gnas pa'i go sar pa~M las pad+ma dang /__ra~M las nyi ma'i dkyil 'khor gyi steng du sems nyid rnam par mi rtog pa'i ngo bo d+hIHyig gser gyi mdog can la ral gri d+hIHsa mtshan pa sogs nas/__hU~M sngon po zhes pa'i bar rang nyid ces pa'i tshig dor ba tsam ma gtogs mngon rtogs ltar gsal gdab/__slar yang slob dpon la gus 'dud mdzad pas/__slob dpon gyi thugs ka nas 'od zer dpag tu med pa byung /__mdun bskyed kyi thugs kar phog pas thugs rgyud bskul/__de dag gi thugs ka nas 'od zer dpag tu med pa 'phros pas/__'og min dang /__o rgyan mkha' 'gro'i gling na bzhugs pa'i dpal rdo rje 'jig byed chen po dang /__gzhan yang phyogs bcu'i sangs rgyas dang byang chub sems dpa' thams cad kyi thugs kar phog pas thugs rgyud bskul/__de thams cad kyi thugs ka nas bcom ldan 'das dpal rdo rje 'jigs byed kyi sku'i rnam pa che ba ri rab tsam nas/__chung ba rdul phran tsam gyi bar tshad med grangs med dpag tu med pa byung /__khyed rang rnams kyi lus la bye tshan la kha ba babs pa ltar sib sib thim pas rgyud byin gyis brlabs pa'i mos pa mdzod/__rtsa sngags/__snying po/__nye snying rnams sbrel mthar/__oM badz+ra A be sha ya aHAH__dzaHhU~M ba~M hoH__zhes yang yang brjod cing spos rol dang bcas ye shes pa dbab cing bstim/__gsung gi rjes gnang gi slad du/__slob dpon lhar gsal ba'i thugs kar nyi ma'i dkyil 'khor gyi steng du rdo rje'i lte bar hU~M mthing nag gi mthar sngags phreng skar ma lta bus bskor ba dang /__khyed rang rnams kyi thugs kar nyi ma la rdo rje'i lte bar hU~M mthing nag re gsal btab nas/__slob dpon la gus 'dud byas pas/__slob dpon gyi thugs ka'i sngags phreng las mar me gcig las gnyis mched kyi tshul du sngags phreng gnyis pa lan gsum byung /__slob dpon gyi zhal nas thon/___khyed rang rnams kyi zhal du zhugs/__snying gar hU~M gi mthar mar dang pos 'khod/__gnyis pas brtan par byas/__gsum pas byin gyis brlabs pa'i mos pa dang bcas te sngags 'di rnams kyi rjes zlos lan gsum mdzod/__ces brda sprad la sngags rnams lan gsum bzlar gzhug__/slar yang slob dpon la drin lan gyi tshul du me tog 'thor ba dang bcas pas 'di'i rjes zlos lan gsum mdzod/__bcom ldan bdag la sogs/__slob dpon gyis me tog gi phreng ba sngags su byas te spyi bor bzhag pas snying ga'i sngags phreng brtan cing nus ldan du byin gyis brlabs pa'i mos pa mdzod/__bcom ldan 'das 'di la sogs/__dam bca' ba'i slad du/__dus 'di nas bzung ste ji srid byang chub snying po la mchis kyi bar du/__bcom ldan 'das dpal rdo rje 'jigs byed yi dam gyi lhar bzung bar bgyi snyam pas 'di'i rjes zlos lan gsum mdzod/__slob dpon dgongs su gsol/__bdag ming 'di zhes bgyi bas/__dus 'di nas bzung ste ji srid byang chub snying po la mchis kyi bar du/__bcom ldan 'das dpal rdo rje 'jigs byed chen po yi dam gyi lhar bzung bar bgyi'o/__/thugs kyi rjes gnang gi slad du/__slob dpon la gus 'dud mdzad pas sogs gong ltar la/__de thams cad kyi thugs ka nas thugs gnyis su med pa'i ye shes kyi ngo bo/__rdo rje nag po rtse lnga pa rwa gdengs pa'i rnam pa can dpag tu med pa byung ste khyed rang rnams kyi snying ga'i rdo rje la thim pas/__sangs rgyas thams cad kyi rdo rje'i bdag nyid nga yin snyam du bsgoms la cung zad re mnyam par 'jog par zhu/__des rjes gnang gi dngos gzhi grub nas/__mjug gi chos dam tshig khas blang sogs spyi ltar byas la slob ma rnams rang gnas su gtang /__gsum pa ni/__slob dpon gyis mchod pa kha gsos bsang sbyang byin rlabs/__mchod bstod/__gzod gsol/__ye shes pa gshegs/__dam tshig pa rang la bstim/__rang gi mig tu k+ShiM sogs skye mched dang gnas gsum bsrung /__bsngo smon shis brjod spyi ltar bya'o/__/bcom ldan rdo rje 'jigs byed kyi/__/rjes su gnang ba'i cho ga ni/__/grub pa'i dgongs rgyan 'di sbyar bas/__/'gro kun 'jam dbyangs nyid thob shog__/ces pa'ang bya bral ba many+dzu g+ho Shas rang 'dra'i blo dman rnams la nye bar mkho ba'i slad du/__gnas gsar ba 'jam dbyangs mkhyen brtse'i dbang phyug bstan pa'i rgyal mtshan dpal bzang po'i gsung rab kyi dgongs don ji lta bar nag 'gros bklag chog tu bris pa dge legs su gyur cig_/