JKW-KABUM-23-'A-004-003-wylie

🚧 This website is under continued development. We appreciate your patience!

jo bo rin po cher gsol smon/__ jo bo rin po cher gsol 'debs smon lam dang bcas pa phan bde'i sgra dbyangs zhes bya ba bzhugs so/__/na mo gu ru shAkya mu na ye/__bla ma mchog gsum dbyer med zhal skyin dngos/__/dran pa tsam gyis dgos 'dod kun stsol ba'i/__/yid bzhin nor bu'i zhabs kyi pad+mo la/__/gus pas phyag 'tshal mchod sprin rgya mtshos mchod/__/stobs bzhis sdig ltung tshogs kun bshags shing bsdam/__/'phags dang so skye'i dge bar rjes yi rangs/__/brjod med chos 'khor rtag tu bskor bzhin du/__/bskal pa rgya mtshor bzhugs par gsol ba 'debs/__/de ltar bsags pa'i dge tshogs ci mchis pa/__/byang chub snying por yongs su bsngos pa'i mthus/__/bdag gzhan skye zhing skye ba thams cad du/__/rnyed dka'i dal 'byor rten bzang thob gyur cig__/khyad par mtshan nyid kun ldan bshes gnyen mchog__/don yod rnam bzhis rtag tu mnyes byas nas/__/so thar byang sems rig pa 'dzin pa yi/__/sdom pa gsum gyi bka' drin nod par shog__/bcos min dad dang nges par 'byung ba dang /__/byams dang snying rje byang chub sems gnyis 'byongs/__/spros pa kun bral zab mo dbu ma'i lam/__/yang dag rgyud la skye bar byin gyis rlobs/__/yo byad kun la ma chags sbyin gtong zhing /__/yon tan gzhir gyur tshul khrims rnam par dag__/gnod pa'i yul la bzod ldan gnyid rmugs dang /__/le lo spangs nas mchod phyir brtson gyur cig__/zhi gnas bsam gtan ngang las ma g.yos bzhin/__/lhag mthong so sor rtog pa'i shes rab kyis/__/ris med mkhas grub rgya mtsho'i gzhung bzang la/__/thos bsam sgom pa'i pha rol phyin par shog__/khyad par dben zhing nyams dga'i nags klung du/__/rgyal ba dgyes pa'i spyod yul rnam dag cing /__/rim gnyis zab mo'i lam gyi thabs mkhas la/__/brten nas zung 'jug go 'phang 'grub gyur cig__/gzhan yang tshe 'dir 'gal rkyen kun zhi zhing /__/mthun rkyen tshe bsod dpal 'byor yon tan rgyas/__/phyi ma bde ba can gyi zhing skyes nas/__/myur du byang chub lung bstan thob par shog___/mdor na ji ltar smon pa'i don rnams kun/__/gegs med myur ba nyid du 'grub pa yis/__/bstan 'gror phan bde'i dga' ston 'gyed pa la/__/bcom ldan khyed dang mnyam par byin gyis rlobs/__/zhes jo bo yid bzhin nor bu'i mdun du gsol 'debs smon lam gyi rim pa'o/__/gzhan yang /__ra mo cher/__mi bskyod rdo rje'i zhabs kyi pad+mo la/__/zhes dang /__bsam yas su/__byang chub chen po'i zhabs kyi pad+mo la/__/zhes dang /__khra 'brug tu/__rnam par snang mdzad zhabs kyi pad+mo la/__/zhes sogs rten gyi gtso bo gang yin dang mthun pa'i kha bsgyur byas pas grub pa nyid do/__/zhes pa'ang don gnyer can gyi ngor shAkya'i dge slong 'jam dbyangs mkhyen brtse'i dbang pos spel ba sarba dA mang+ga laM//__//