JKW-KABUM-23-'A-001-029

🚧 This website is under continued development. We appreciate your patience!

Previous Text Back to Volume PageNext Text

Wylie title	lam rim gyi glu gdod nas rnam dag
Location	mkhyen brtse'i bka' 'bum Volume 23, sde tshan 1, Text 29, Pages 66-68 (Folios 33b5 to 34b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lam rim gyi glu gdod nas rnam dag. In 'jam dbyangs mkhyen brtse'i dbang po'i bka' 'bum, Vol. 23: 66-68. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་པའང་རྒྱལ་དབང་ཀརྨ་པ་ཆེན་པོ་བཅུ་བཞི་པའི་རིགས་ཀྱི་དབོན་མོ་རྗེ་བཙུན་བི་ཛ་ཡས་གནང་སྐྱེས་གྱ་ནོམ་པ་དང་བཅས་བཀའ་སྩལ་གྱི་ཕྲེང་བས་བསྐུལ་བ་ལྟར། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གང་ཤར་བྲིས་པ་ཇི་ལྟར་གསོལ་བའི་ལམ་གྱི་རིམ་པ་རྣམས་ཚུལ་བཞིན་དུ་རྒྱུད་ལ་སྐྱེ་བར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།
	zhes pa'ang rgyal dbang karma pa chen po bcu bzhi pa'i rigs kyi dbon mo rje btsun bi dza yas gnang skyes gya nom pa dang bcas bka' stsal gyi phreng bas bskul ba ltar/__bya bral ba 'jam dbyangs mkhyen brtse'i dbang pos gang shar bris pa ji ltar gsol ba'i lam gyi rim pa rnams tshul bzhin du rgyud la skye bar bla ma rgyal ba sras dang bcas pas byin gyis brlab tu gsol

Tibetan Text

Wylie

[edit]

ན་མོ་གུ་ར་བེ། གདོད་ནས་རྣམ་པར་དག་པ་གཉུག་མ་ཡི་ཡེ་ཤེས། །ཟུང་འཇུག་སྒྱུ་འཕྲུལ་དྲྭ་བའི་རྣམ་རོལ་ཏུ་ཤར་བ། །སྲས་བཅས་རྒྱལ་བ་ཀུན་དངོས་མཚོ་སྐྱེས་ཀྱི་བླ་མས། །དུས་གསུམ་འདུ་འབྲལ་མེད་པར་བྱིན་གྱིས་རང་རློབས་ཤིག །རྙེད་དཀའི་དལ་འབྱོར་ཐོབ་ཀྱང་ངེས་མེད་དུ་འཆི་ཞིང་། །ཤི་ནས་ལས་འབྲས་ཁོ་ནའི་གཞན་དབང་དང་འགྲོགས་ཏེ། །འཁོར་བ་གར་སྐྱེས་སྡུག་བསྔལ་རང་བཞིན་དུ་ཤེས་པའི། །ངེས་འབྱུང་དྲག་པོ་བསྐྱེད་པ་ཉམས་ལེན་གྱི་སྐུལ་འདེབས། །བླ་མ་མཆོག་གསུམ་གཙུག་གི་ནོར་བུ་རུ་བཟུང་ནས། །བྱམས་དང་སྙིང་རྗེ་བྱང་ཆུབ་སེམས་གཉིས་ལ་སྦྱངས་ཤིང་། །ཁས་བླངས་སྡོམ་དང་དམ་ཚིག་སྲོག་ལྟར་དུ་འཆང་བས། །ཚོགས་བསགས་སྒྲིབ་སྦྱོང་བརྩོན་པ་ཉམས་ལེན་གྱི་རྩ་བ། །ཅིར་སྣང་ལྷ་སྐུར་བལྟ་བ་བསྐྱེད་རིམ་གྱི་ལམ་ཁྱེར། །སྒྲ་གྲགས་སྔགས་སུ་ཤེས་པ་བཟླས་བརྗོད་ཀྱི་མདོ་ཆིངས། །རྟོག་ཚོགས་གང་ཤར་རང་གྲོལ་འོད་གསལ་གྱི་དབྱིངས་སུ། །གཟུང་འཛིན་སྤྲོས་པ་ཞི་བ་ཉམས་ལེན་གྱི་སྙིང་པོ། །ཁྱད་པར་མོས་གུས་བླ་མའི་རྣལ་འབྱོར་ལ་བརྟེན་ནས། །ཉམས་སུ་མྱོང་བཞིན་བསམ་བརྗོད་སྤྲོས་པ་ལས་འདས་པའི། །རིག་སྟོང་རྗེན་པའི་ངང་དུ་བསལ་བཞག་དང་བྲལ་བར། །ཡེངས་མེད་དྲན་ཤེས་བསྟེན་པ་ཉམས་ལེན་གྱི་མཐར་ཐུག །ཨ་ཧོ་འཇིག་རྟེན་མགོན་པོའི་ཡེ་ཤེས་ཀྱི་གཟིགས་པས། །རྟག་པར་བྱིན་གྱིས་བརླབས་པའི་སྐལ་བཟང་གི་དུས་འདིར། །སྙིང་ནས་ཆོས་བཞིན་སྤྱོད་པའི་དགེ་མཚན་གྱི་སྣང་བས། །ཕན་བདེའི་པད་ཚལ་རྒྱས་པའི་སྨོན་ལམ་ཞིག་ཞུའོ། །ཞེས་པའང་རྒྱལ་དབང་ཀརྨ་པ་ཆེན་པོ་བཅུ་བཞི་པའི་རིགས་ཀྱི་དབོན་མོ་རྗེ་བཙུན་བི་ཛ་ཡས་གནང་སྐྱེས་གྱ་ནོམ་པ་དང་བཅས་བཀའ་སྩལ་གྱི་ཕྲེང་བས་བསྐུལ་བ་ལྟར། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གང་ཤར་བྲིས་པ་ཇི་ལྟར་གསོལ་བའི་ལམ་གྱི་རིམ་པ་རྣམས་ཚུལ་བཞིན་དུ་རྒྱུད་ལ་སྐྱེ་བར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ། ༈

[edit]

lam rim gyi glu gdod nas rnam dag__ na mo gu ra be/__gdod nas rnam par dag pa gnyug ma yi ye shes/__/zung 'jug sgyu 'phrul drwa ba'i rnam rol tu shar ba/__/sras bcas rgyal ba kun dngos mtsho skyes kyi bla mas/__/dus gsum 'du 'bral med par byin gyis rang rlobs shig__/rnyed dka'i dal 'byor thob kyang nges med du 'chi zhing /__/shi nas las 'bras kho na'i gzhan dbang dang 'grogs te/__/'khor ba gar skyes sdug bsngal rang bzhin du shes pa'i/__/nges 'byung drag po bskyed pa nyams len gyi skul 'debs/__/bla ma mchog gsum gtsug gi nor bu ru bzung nas/__/byams dang snying rje byang chub sems gnyis la sbyangs shing /__/khas blangs sdom dang dam tshig srog ltar du 'chang bas/__/tshogs bsags sgrib sbyong brtson pa nyams len gyi rtsa ba/__/cir snang lha skur blta ba bskyed rim gyi lam khyer/__/sgra grags sngags su shes pa bzlas brjod kyi mdo chings/__/rtog tshogs gang shar rang grol 'od gsal gyi dbyings su/__/gzung 'dzin spros pa zhi ba nyams len gyi snying po/__/khyad par mos gus bla ma'i rnal 'byor la brten nas/__/nyams su myong bzhin bsam brjod spros pa las 'das pa'i/__/rig stong rjen pa'i ngang du bsal bzhag dang bral bar/__/yengs med dran shes bsten pa nyams len gyi mthar thug__/a ho 'jig rten mgon po'i ye shes kyi gzigs pas/__/rtag par byin gyis brlabs pa'i skal bzang gi dus 'dir/__/snying nas chos bzhin spyod pa'i dge mtshan gyi snang bas/__/phan bde'i pad tshal rgyas pa'i smon lam zhig zhu'o/__/zhes pa'ang rgyal dbang karma pa chen po bcu bzhi pa'i rigs kyi dbon mo rje btsun bi dza yas gnang skyes gya nom pa dang bcas bka' stsal gyi phreng bas bskul ba ltar/__bya bral ba 'jam dbyangs mkhyen brtse'i dbang pos gang shar bris pa ji ltar gsol ba'i lam gyi rim pa rnams tshul bzhin du rgyud la skye bar bla ma rgyal ba sras dang bcas pas byin gyis brlab tu gsol/___/__!_