JKW-KABUM-21-ZHA-021-002

🚧 This website is under continued development. We appreciate your patience!

Previous Text Back to Volume PageNext Text

Wylie title	gnod sbyin 'khor lo la brten nas gter bum sgrub tshul 'dod dgu'i bum bzang
Location	mkhyen brtse'i bka' 'bum Volume 21, sde tshan 21, Text 2, Pages 551-563 (Folios 6a3 to 12a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gnod sbyin 'khor lo la brten nas gter bum sgrub tshul 'dod dgu'i bum bzang. In 'jam dbyangs mkhyen brtse'i dbang po'i bka' 'bum, Vol. 21: 551-563. Khams sde dge rdzong sar dgon: Rdzong sar blo gros phun tshogs, 2020.
Genre	Vase Consecration - bum sgrub
Colophon	Colophon page 562: །ཅེས་པའང་འཇམ་མགོན་བླ་མ་ངག་གི་དབང་པོས་མཛད་པའི་ཡིག་ཆ་ལུང་རྒྱུན་མ་བཞུགས་པའི་སྟབས་ཀྱིས། གསུང་རབ་དེ་ཉིད་ཀྱི་དགོངས་དོན་ལྟར་བྱ་བྲལ་བ་མཉྫུ་གྷོ་ཥས་བཀླགས་ཆོག་ཏུ་དག་པར་བྲིས་པ་དགེ་ལེགས་མཆོག་ཏུ་གྱུར་ཅིག
	Colophon page 562: ces pa'ang 'jam mgon bla ma ngag gi dbang pos mdzad pa'i yig cha lung rgyun ma bzhugs pa'i stabs kyis/__gsung rab de nyid kyi dgongs don ltar bya bral ba many+dzu g+ho Shas bklags chog tu dag par bris pa dge legs mchog tu gyur cig

1 Texts in this Section (sde tshan or chos tshan)

2 551-563	གནོད་སྦྱིན་འཁོར་ལོ་ལ་བརྟེན་ནས་གཏེར་བུམ་སྒྲུབ་ཚུལ་འདོད་དགུའི་བུམ་བཟང་། gnod sbyin 'khor lo la brten nas gter bum sgrub tshul 'dod dgu'i bum bzang Vase Consecration - bum sgrub	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །གནོད་སྦྱིན་འཁོར་ལོའི་ཆོ་ག་ལ་བརྟེན་ནས་གཏེར་བུམ་སྒྲུབ་པའི་མན་ངག་འདོད་རྒུའི་བུམ་བཟང་ཞེས་བྱ་བ་བཞུགས་སོ།། །། ཨོཾ་སྭ་སྟི། གང་ཞིག་བསྙེན་པས་འདོད་རྒུའི་དཔལ། །ཡིད་བཞིན་སྦྱིན་མཛད་བླ་མ་ལྷར། །བཏུད་ནས་ཕུན་ཚོགས་གཏེར་ཆེན་པོའི། །བུམ་བཟང་སྒྲུབ་པའི་མན་ངག་འབྲི། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྒྲུབ་པ་པོ་རྡོར་ཕྲེང་ནང་གི་ནོར་རྒྱུན་མའི་དཀྱིལ་འཁོར་དུ་དབང་ཐོབ་པའམ། མ་ཐོབ་ཀྱང་རིགས་གསུམ་སྤྱིའམ། ཨ་ར་པ་ཙ་ན་ལྷ་ལྔའི་དཀྱིལ་འཁོར་དུ་དབང་ཐོབ་པ། འདི་ཉིད་ཀྱི་འཁོར་ལོ་ལ་བརྟེན་པའི་རྗེས་གནང་ངམ། སྒྲུབ་ཐབས་རྒྱ་མཚོ་ནས་འབྱུང་བའི་རྗེས་གནང་ལེགས་པར་ཐོབ་ཅིང་། དམ་ཚིག་དང་སྡོམ་པ་རྣམ་པར་དག་པས་སྔོན་དུ་བསྙེན་པ་རྒྱས་བསྡུས་གང་རིགས་དང་། འཁོར་ལོ་སྒྲུབ་པ་སོགས་ཇི་སྐད་བཤད་པ་བཞིན་ཚགས་སུ་ཚུད་པར་བྱས་ནས་ལག་ལེན་དངོས་ནི། རིན་པོ་ཆེའམ་རྫའི་བུམ་པ་གས་ཆག་མེད་པའི་ནང་དུ་ཀེ་ཚེ་དང་བྲ་བོ་མ་གཏོགས་པའི་འབྲུ་སྣ་ཚོགས། ར་གན་ཞ་ཉེ་མཁར་བ་མ་གཏོགས་པའི་རིན་པོ་ཆེ་སྣ་ཚོགས། དུག་རིགས་དང་གླ་རྩི་མ་གཏོགས་པའི་སྨན་སྣ་ཚོགས། ཤ་ཆང་སྒོག་རིགས་མ་གཏོགས་པའི་ཟས་སྣ་ཚོགས། དར་སྣ། གོས་སྣ། སྣམ་རས་རྣམས་རྒྱལ་ཁབ་ཕྱུག་པོའི་ལག་ནས་བྱུང་བ་རབ། མིན་ཀྱང་བཀྲ་ཤིས་པའི་གང་ཟག་ལས་རྙེད་པ་དང་། གཞན་ཡང་གནས་དང་གང་ཟག་བྱིན་རླབས་ཅན་དང་། བསོད་ནམས་ཅན་དང་དཔལ་གཡང་ཅན་གྱི་ཁང་པ་ཞིང་ས་རྟ་ཕྱུགས་ཀྱི་སྤུ་སོགས་དགེ་བའི་རྫས་ཅི་འབྱོར་པ་བླུགས། ཁྱད་པར་རྗེ་བཙུན་རིན་པོ་ཆེས་འཁོར་ལོའི་མན་ངག་ལས། ཟ་མ་ཏོག་ཆེན་པོའི་ནང་དུ་བཞག་ལ། མར་དང་སྦྲང་རྩི་དང་ཤ་ཁ་རས་ནུབ་པར་བྱས་ཏེ། དུས་རྒྱུན་དུ་མེ་ཏོག་ལ་སོགས་པས་མཆོད་པ་བྱས་ན་དངོས་གྲུབ་ཐམས་ཅད་འགྲུབ་པར་འགྱུར་རོ། །ཞེས་གསུངས་པ་ལྟར་ཞུན་མར་དང་སྦྲང་རྩི་ཀ་ར་རྣམས་ཀྱིས་གཏམས། བུམ་པའི་སྟོད་ཀྱི་ཆར་འཁོར་ལོ་རབ་གནས་ཅན་སྟེང་འོག་དང་མདུན་རྒྱབ་མ་ནོར་བར་ན་བཟའ་སེར་པོ་དང་བཅས་ཏེ་གཞུག །སླར་ཡང་འབྲུ་སྣ་དང་སྨན་སྣ་བསྲེས་པས་འཐས་པར་དགང་། སྤྲོ་ན་སྐབས་རྣམས་སུ་བཀྲ་ཤིས་རྟགས་བརྒྱད། རྫས་བརྒྱད། རིན་ཆེན་སྣ་བདུན། འདོད་ཡོན་ཉེར་སྤྱོད་བཅས་བྲིས་པའམ་འཇིམ་པ་ལ་སྤར་བཏབ་པའང་གཞུག །ཁ་སྤྲ་ཚིལ་ལམ་འཇིམ་པ་གཙང་མས་སྲུབ་མེད་པར་བཀག མགྲིན་པ་ཡན་ཆད་རས་གཙང་མས་དཀྲིས་ལ་མདུན་དུ་བཀྲ་ཤིས་རྟགས་བརྒྱད་དམ་ནོར་བུ་བྲི། དེ་ལྟ་བུའི་བུམ་པ་དུ་ཡོད་གཞི་གཙང་མར་པདྨ་འདབ་བརྒྱད་རེ་བྲིས་པའི་སྟེང་དུ་བཞག །མཐར་མཆོད་པ་དང་གཏོར་མ་བཤམ། གཟུངས་ཐག་སེར་པོ་གདགས། གཉིས་པ་ནི། སྐྱབས་འགྲོ་ནས་བཟུང་བདག་བསྐྱེད་བཟླས་པ་དང་དཀྱིལ་འཁོར་བསྡུ་བའི་བར་སྔོན་ཏུ་འགྲོ་བས། བུམ་པ་བསང་སྦྱང་། སྟོང་པའི་ངང་ལས་བུམ་པའི་གྲངས་དང་མཉམ་པའི་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བའི་ནང་དུ་རིན་པོ་ཆེ་དང་། འབྲུ་བཅུད་དང་། ཟས་ནོར་ལོངས་སྤྱོད་ལྷ་མིའི་དཔལ་འབྱོར་ཕུན་སུམ་ཚོགས་པས་ཡོངས་སུ་གང་བར་གྱུར། ཅེས་དང་། རྒྱས་པར་སྤྲོ་ན་ཚིག་ལྷུག་རྣམས་མི་དགོས་པར་སྔགས་དྲུག་ཕྱག་དྲུག་ཙམ་སྤྱི་ལྟར་དང་། མི་ནུས་ན་ནམ་མཁའ་མཛོད་ཀྱི་ཕྱག་རྒྱ་དང་བཅས། ན་མཿསརྦ་ཏ་ཐཱ་ག་ཏེ་བྷྱོ་སོགས་ནས། ཨི་མཾ་ག་ག་ན་ཁཾ་སྭཱ་ཧཱ་ཞེས་ལན་གསུམ་གྱིས། ཡོ་བྱད་ཐམས་ཅད་འདོད་པའི་ཡོན་ཏན་ལྔའི་རང་བཞིན་དགོས་འདོད་ཐམས་ཅད་འབྱུང་བ་ཟད་མི་ཤེས་པའི་གཏེར་དུ་གྱུར་པར་བསམ། དེ་ལྟ་བུའི་བུམ་པའི་སྟོད་ཀྱི་ཆར་པྃ་ལས་པདྨ་འདབ་མ་བརྒྱད་པའི་ལྟེ་བ་དང་འདབ་མ་རྣམས་ལ་ཟླ་བའི་དཀྱིལ་འཁོར་རེ་རེ། དབུས་ཀྱི་གདན་གྱི་སྟེང་དུ་བྃ་དང་འབྲས་ཀྱི་སྙེ་མ་ལས་ནོར་རྒྱུན་མར་གསལ་བའི་བརླ་གཡོན་པའི་སྟེང་དུ། ཛ་དང་བཱི་ཛ་པཱུ་ར་ཀ་ལས་ཛམྦྷ་ལ་དང་འཁོར་རྣམས་སྐད་ཅིག་གིས་ཤར་དུ་ཟླ་འོད་མ་དང་ནོར་བུ་བཟང་པོ། ལྷོར་སྤྱན་མ་དང་གང་བ་བཟང་པོ། ནུབ་ཏུ་རབ་སྦྱིན་མ་དང་ནོར་སྦྱིན། བྱང་དུ་འཕགས་མ་དང་རྣམ་ཐོས་སྲས། ཤར་ལྷོར་རབ་ཏུ་བཟང་མོ་དང་དོལ་པའི་ཕྲེང་བ། ལྷོ་ནུབ་ཏུ་སྦས་མ་དང་འཇམ་པོ་འཁྱིལ་བ། ནུབ་བྱང་དུ་མཛེས་མ་དང་གདོང་གི་དབང་པོ། བྱང་ཤར་དུ་དབྱངས་ཅན་མ་དང་སྤྱོད་པའི་དབང་པོ། ཐམས་ཅད་ཀྱང་སྐུ་མདོག་སེར་པོ་ཞལ་གཅིག་ཕྱག་གཉིས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་གྱི་ན་བཟའ་ཅན། མོ་རྣམས་ཀྱི་ཕྱག་གཡས་པས་ཤིང་ཐོག་བཱི་ཛ་པཱུ་ར་ཀ་དང་བཅས་པའི་མཆོག་སྦྱིན་གྱི་ཕྱག་རྒྱ་ཅན། གཡོན་པ་རྣམས་ཀྱིས་འབྲས་ཀྱི་སྙེ་མ་ཐུགས་ཀར་འཛིན་པ། བུད་མེད་སྒྱུ་མའི་ང་རྒྱལ་གྱིས་འགྱིངས་པ། རིན་པོ་ཆེ་འབར་བ་སྐྱུགས་པར་གྱུར་པའི་པདྨའི་གཏེར་ལ་སོགས་པའི་སྟེང་དུ་སྐྱིལ་ཀྲུང་ཕྱེད་པས་བཞུགས་པའི་བརླ་གཡོན་པ་རྣམས་ཀྱི་སྟེང་དུ། ཕོ་རྣམས་རོལ་པའི་སྟབས་ཀྱིས་བཞུགས་པའི་ཕྱག་གཡས་པ་རྣམས་ཤིང་ཏོག་བཱི་ཛ་པཱུ་ར་ཀཱ་འཛིན་བྱས་མོ་རྣམས་ཀྱི་གཡོན་ནས་འགུལ་བར་འཁྱུད་པ། གཡོན་པ་རྣམས་ཀྱིས་ནེའུ་ལེ་འཛིན་པའོ། །ལྷ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། རང་གི་སྙིང་གའི་པྃ་ཡིག་ལས་འོད་ཟེར་འཕྲོས་པས། རང་བཞིན་གྱི་གནས་ནས་དཔལ་མོ་ནོར་རྒྱུན་མ་ལ་ནོར་ལྷཱའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་པ་ལ། ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། བཛྲ་པདྱཱཾ་པྲ་ཏཱིཙྪ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ་ནས་ཤབྡ་ཨཱཿཧཱུྃ་གི་བར་སྦྱར་བས་མཆོད། ཛཿཧཱུྃ་བྃ་ཧོཿས་མདུན་བསྐྱེད་ལ་གཉིས་སུ་མེད་པར་ཐིམ། སླར་ཡང་རང་གི་སྙིང་གའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་བཅས་ཨོཾ་བཛྲ་ས་མཱ་ཛཿ ཞེས་པས་སྤྱན་དྲངས་ལ། ཨོཾ་སརྦ་ཏ་ཐཱ་ག་ཏ་པཉྩ་ཀུ་ལ་ས་པ་རི་ཝཱ་ར་སྦྱར་བའི་ཨརྒྷཾ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་སོགས་ནས། ཤྲི་ཡེ་ཧཱུྃ་ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་ཐམས་ཅད་ལ་རིན་ཆེན་འབྱུང་ལྡན་གྱིས་དབུར་བརྒྱན། མཆོད་པ་བསང་སྦྱང་བྱིན་གྱིས་བརླབས་ནས། ཐལ་མོ་སྦྱར་ཏེ། འཇིག་རྟེན་ཁམས་འདི་འམ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །འཕགས་མ་འཁོར་དང་བཅས་ལ་འབུལ། །བཞེས་ནས་དཔལ་འབྱོར་རྒྱས་པར་མཛོད། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་དང་། དེ་བཞིན་དུ། ཞབས་བསིལ་དང་། མེ་ཏོག་སོགས་ནས། རོལ་མོའི་བར་འདོན་པ་བསྒྱུར་ལ་དབུལ་ཞིང་། དྷརྨཱ་ར་ཎི་ཏ་སོགས་བརྗོད། སྤྲོ་ན། རྩིབས་སྟོང་ལྡན་པའི་གསེར་གྱི་འཁོར་ལོ་སོགས། །རྒྱ་ཆེན་བསོད་ནམས་དཔལ་ལས་ལེགས་གྲུབ་པ། །མི་ཡི་དབང་པོའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་སཔྟ་རཏྣ་པཱུ་ཛི་ཏེ་ཧཱུྃ། །གཡུལ་ལས་རྒྱལ་བར་བྱེད་པའི་རལ་གྲི་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །ས་བདག་ཉེ་བའི་རིན་ཆེན་སྣ་བདུན་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་སཔྟ་ཨུ་པ་རཏྣ་པཱུ་ཛི་ཏེ་ཧཱུྃ། ཡིད་འོང་གཟུགས་དང་རྣར་སྙན་སྒྲ་ལ་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །མཐོ་རིས་འགྲོ་བའི་འདོད་ཡོན་རྣམ་ལྔ་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ས་པྟ་ཨུ་པ་རཏྣ་པཱུ་ཛི་ཏེ་ཧཱུྃ། །ཡིད་འོང་གཟུགས་དང་རྣར་སྙན་སྒྲ་ལ་སོགས། །བསོད་ནམས་དུ་མའི་མཐུ་ཡིས་ལེགས་བསྐྱེད་པའི། །མཐོ་རིས་འགྲོ་བའི་འདོད་ཡོན་རྣམ་ལྔ་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་པཉྩ་ཀཱ་མ་གུ་ཎ་པཱུ་ཛི་ཏེ་ཧཱུྃ། ཐུབ་པས་བྱིན་བརླབས་མེ་ལོང་སོགས་དང་ནི། །སྐུ་ཡི་ཆ་ཤས་དབྱིབས་མཚོན་དཔལ་བེའུ་སོགས། །བཀྲ་ཤིས་སྒྲུབ་པའི་རྫས་དང་རྟགས་བརྒྱད་འབུལ། །བཞེས་ནས་དཔལ་འབྱོར་རྒྱས་པའི་དངོས་གྲུབ་སྩོལ། །ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་མངྒ་ལ་ཨཥྚ་དྲ་བྱ་ཙིཧྞ་པཱུ་ཛི་ཏེ་ཧཱུྃ་ཞེས་པའི་སྔགས་རྣམས་ལ་ནམ་མཁའ་མཛོད་ཀྱི་ཕྱག་རྒྱ་བྱ་ཞིང་མཆོད། རྡོ་རྗེ་དྲིལ་བུ་འཛིན་པས། ཕུན་ཚོགས་དགེ་ལེགས་ཀུན་འབྱུང་བཅོམ་ལྡན་མ། །དཔལ་དང་འབྱོར་པའི་དབང་ཕྱུག་ནོར་རྒྱུན་མ། །ཡིད་ལ་རེ་བའི་བཀྲ་ཤིས་སྩོལ་མཛད་མ། །བསམ་འཕེལ་དཀྱིལ་འཁོར་དབང་ཕྱུག་མ་ལ་འདུད། །གང་སྔོན་སྦྱིན་པ་རྒྱ་མཚོའི་དགེ་བསགས་པས། །ཚེ་དང་ནོར་དང་མཐུ་ཡི་དཔལ་བརྙེས་ནས། །སྒྲུབ་པ་པོ་ལ་དབྱིག་གི་ཆར་འབེབས་པའི། །ནོར་སྦྱིན་ཡབ་ཡུམ་འཁོར་དང་བཅས་ལ་བསྟོད། །ཅེས་བསྟོད། གཏོར་མ་ཆུ་གཙང་མས་སྦྱང་། ཨོཾ་ཨཱཿཧཱུྃ་ལན་གསུམ་གྱིས་བརླབ། སྔགས་རྣམས་ཀྱི་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་སརྦ་སིདྡྷི་མྨེཔྲ་ཡཙྪ་ནྟུ་ཧཱུྃ་ཕཊ་ཅེས་ལན་གསུམ་སོགས་ཀྱིས་ཕུལ། ཨོཾ་ཤྲཱི་བ་སུ་དྷ་རི་ཎཱི་མཎྜ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་སོགས་ནས། ཤཔྡའི་བར་སྦྱར་བས་མཆོད། ཕུན་ཚོགས་དགེ་ལེགས་ཀུན་འབྱུང་སོགས་ཀྱིས་བསྟོད། བཅོམ་ལྡན་འདས་མ་འཁོར་དང་བཅས་པས་བདག་དང་སྦྱིན་པའི་བདག་པོས་གཙོར་བྱས་སེམས་ཅན་ཐམས་ཅད་ལ་འདོད་རྒུའི་འབྱོར་པའི་དངོས་གྲུབ་ཟད་མི་ཤེས་པ་སྩལ་དུ་གསོལ་ཞེས་འདོད་དོན་གསོལ། གཟུངས་ཐག་ནས་བཟུང་སྟེ། རང་གི་སྙིང་ག་ནས་འོད་ཟེར་སྔགས་ཕྲེང་གི་རྣམ་པ་ཅན་འཕྲོས་པས་ལྷ་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་སྐུ་ལས་འོད་ཟེར་ཕོ་ཉ་ལྟ་བུ་བསམ་གྱིས་མི་ཁྱབ་པ་འཕྲོས། འཇིག་རྟེན་གྱི་ཁམས་ཐམས་ཅད་ཁྱབ། སངས་རྒྱས་བྱང་སེམས་ཉན་རང་འཕགས་པའི་ཚོགས་ཀྱི་བྱིན་རླབས་ནུས་མཐུ་ཐམས་ཅད་འོད་ཟེར་སེར་པོའི་རྣམ་པར་སྤྱན་དྲངས་ཤིང་། དེ་དང་དུས་མཉམ་དུ་སྲིད་པ་གསུམ་གྱི་དཔལ་འབྱོར་ལོངས་སྤྱོད་བཅུད་གཡང་དང་བཅས་པ་ཐམས་ཅད་བཀྲག་མདོངས་གཟི་བརྗིད་ཅན་གྱི་རྣམ་པར་བཀུག་སྟེ། བུམ་པའི་ནང་གི་རྫས་རྣམས་ལ་གཉིས་སུ་མེད་པར་ཐིམ་པས་འདོད་རྒུའི་དཔལ་འབྱོར་ཟད་མི་ཤེས་པའི་གཏེར་གྱི་བུམ་པ་བཟང་པོར་གྱུར། བུམ་པའི་ནང་གི་དཔལ་འབྱོར་ཕུན་སུམ་ཚོགས་པ་རབ་ཏུ་འཕེལ་ཞིང་ཁ་ནས་ལྷུད་ཀྱིས་ལུད། ལྷ་རྣམས་ཀྱི་སྐུ་དང་ཕྱག་མཚན་རྣམས་ལས་ཀྱང་རིན་པོ་ཆེ་དང་འབྲས་སོགས་མཁོ་དགུ་ལོངས་སྤྱོད་ཀྱི་ཆར་ཆེན་པོ་ཆིལ་ཆིལ་བབས་པས་གནས་ཁང་དང་། གཙུག་ལག་ཁང་དང་། བང་མཛོད་ལ་སོགས་པ་མར་གྱིས་ཁེངས་པས་བདག་དང་སྦྱིན་བདག་གིས་མཚོན་པའི་སེམས་ཅན་ཐམས་ཅད་བསམ་པ་རྫོགས་པར་གྱུར་ཅེས་བརྗོད་ཅིང་བསམས་ལ། ཨོཾ་བ་སུ་དྷ་རི་ཎྱཻ་སྭཱ་ཧཱ་ཞེས་གཙོ་བོར་བཟླ། ཐུན་མཚམས་རྣམས་སུ་འཁོར་རྣམས་ལ། ཨོཾ་ཙནྡྲ་ཀཱནྟྱཻ་སྭཱ་ཧཱུ། དེ་བཞིན་དུ། དརྟཱ་ཡཻ། སུ་ད་རྟཱ་ཡཻ། ཨཱཪྻཱ་ཡཻ། སུ་བྷ་དྲཱ་ཡཻ། གུཔྟཱ་ཡཻ། དེ་བྱཻ། ས་ར་སྭཱ་ཏྱཻ་སྭཱ་ཧཱ། ཞེས་པས་ཡུམ་རྣམས་དང་། ཨོཾ་ཛམྦྷ་ལ་ཛ་ལེནྡྲཱ་ཡེ་སྭཱ་ཧཱ། དེ་བཞིན་དུ། མ་ཎི་བྷ་དྲཱ་ཡ། པཱུ་རྞ་བྷ་དྲཱ་ཡ། དྷ་ན་དཱ་ཡ། བཻ་ཤྲ་བ་ཎཱ་ཡ། ཀི་ལི་མཱ་ཡི་ནི། བི་ཙི་ཀུཎྜ་ལི་ནི། མུ་ཁེནྡྲཱ་ཡ། ཨོཾ་ཙ་རེནྡྲཱ་ཡ་སྭཱ་ཧཱ། ཞེས་པ་ཡབ་རྣམས་ཏེ་སོ་སོར་གཙོ་མོའི་བཅུ་ཆ་རེ་བཟླ། ཐུན་བསྡུ་བ་ན། མཆོད་པ་བསང་སྦྱང་བྱིན་གྱིས་བརླབས་ལ། ཨོཾ་ཤྲཱི་བ་སུ་དྷ་རི་ཎཱི་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ནས། ཤཔྡའི་བར་སྦྱར་བས་མཆོད། ཕུན་ཚོགས་དགེ་ལེགས་སོགས་ཀྱིས་བསྟོད། ཡིག་བརྒྱ་ལན་གསུམ། མ་འབྱོར་པ་དང་སོགས་ཀྱིས་བཟོད་པར་གསོལ། དེ་ནས་མེ་ཏོག་སེར་པོ་ཐོགས་ལ། བཅོམ་ལྡན་འདས་མ་འཕགས་མ་ནོར་རྒྱུན་མའི་ལྷ་ཚོགས་འཁོར་དང་བཅས་པ་ཁྱེད་རྣམས་རྟེན་འདི་རྣམས་ལ་བརྟན་པར་བཞུགས་སུ་གསོལ། བརྟན་པར་བཞུགས་ནས་རྟེན་འདི་རྣམས་གང་དུ་བཞུགས་པའི་ཡུལ་ཕྱོགས་དང་གནས་ཁང་ཐམས་ཅད་ལོ་ཕྱུགས་ལེགས་ཤིང་། འབྲུ་བཅུད་དར་བ་དང་། སྲིད་ཞིའི་དཔལ་འབྱོར་ཕུན་སུམ་ཚོགས་པ་ཐམས་ཅད་རྒྱ་མཚོ་ཆེན་པོ་ལ་ཆུ་བོའི་རྒྱུན་བཞིན་དུ་འདུ་བར་མཛད་དུ་གསོལ་ཞེས་དང་། སུ་པྲ་ཏིཥྛ་དང་ཡེ་དྷརྨཱ་མང་དུ་བརྗོད་ཅིང་མེ་ཏོག་འཐོར་རོ། །དེ་ལྟ་བུའི་གསོལ་གདབ་བརྟན་བཞུགས་ལན་གསུམ་མམ་བདུན་ལ་སོགས་པ་གང་མང་བྱ། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་ཞེས་གནས་གསུམ་བསྲུང་། དགེ་བ་འདི་ཡིས་མྱུར་དུ་བདག །ནོར་རྒྱུན་དཔལ་མོ་འགྲུབ་གྱུར་ནས། །སོགས་དང་། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་པ་དང་། །འཇིག་རྟེན་དག་ཀྱང་དར་བར་ཤོག །འབད་དང་རྩོལ་བས་མ་གོས་པ། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཁྱད་པར་བ་དང་། གཞན་ཡང་། ཆེ་བའི་ཆེ་མཆོག་སོགས་མདོ་རྒྱུད་ནས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད། དེ་ལྟ་བུ་ཐུན་དུ་བཅད་ནས་རང་ངམ་སྦྱིན་བདག་ལ་རྨི་ལྟས་དགེ་བ་ལྟ་བུའི་རྟགས་མ་བྱུང་གི་བར་རམ་ཞག་བདུན་སོགས་བསྒྲུབ་བོ། །གསུམ་པ་ནི་དེ་ལྟར་ལེགས་པར་བསྒྲུབས་པའི་མཐར་བང་མཛོད་ཀྱི་ཕུག །ཕྱུགས་ལྷས་ཀྱི་གོང་། ཞིང་ས་བཟང་པོའི་དཀྱིལ་སོགས་གང་དུ་འཇོག་པའི་སར་སྤྱན་དྲངས་ཏེ་སྒྲོམ་བུའི་ནང་དུ་པདྨ་འདབ་བརྒྱད་བྲིས་པའི་སྟེང་དུ་ཞལ་ཕྱི་སྒོ་དང་། ལུང་པའི་མདའ་སོགས་དང་མི་འཕྲོད་པར་བྱས་ཏེ་མཆོད་པའི་བྱེ་བྲག་དང་བཅས་ཏེ་བཞག །བརྟན་བཞུགས་དང་ཤིས་བརྗོད་རྒྱས་པར་བྱ། དུས་དང་དུས་སུ་མེ་ཏོག་སོགས་ཉེར་སྤྱོད་དང་། ཟས་སྣའི་ཕུད་སོགས་ཀྱིས་མཆོད་ན་འདོད་རྒུའི་དངོས་གྲུབ་ངེས་པར་སྟེར་བར་འགྱུར་ལ། གལ་ཏེ་སྔགས་བསྒྲུབས་ནས་ཡུན་རིང་སོང་བ་ཡིན་ན་བཞག་དུས་ཞལ་གསོ་བའི་དོན་དུ་སྔར་བཤད་པ་ལྟར་གྱི་ཆོ་ག་ཚར་གཅིག་བསྐྱར་ནའང་ལེགས་པར་འགྱུར་རོ། །ཚུལ་འདི་རྗེ་ཨེ་ཝྃ་པ་དཀོན་མཆོག་དཔལ་ལྡན་སོགས་ཀྱིས་གསང་འདུས་ཀྱི་ཕྱོགས་སུ་གཏོགས་པར་མཛད་པའང་། ཆོ་གའི་ཡན་ལག་རྣམས་བླ་མེད་ལྟར་བཀྲལ་བའི་དབང་དུ་བྱས་ན་འགལ་བ་མེད་མོད། འོན་ཀྱང་གཞིའི་རྒྱུད་འཇམ་དཔལ་དཔའ་བོ་གྲུབ་པ་ནི་རྒྱུད་སྡེ་འོག་མ་ཡིན་པས། ཆོ་ག་སྤྱི་ཁྱབ་ཙམ་ལའང་བརྟེན་དུ་རུང་བས། དེ་ལྟར་ན་མཆོད་པ་བསང་སྔགས་སོགས་ཨ་མྲྀ་ཏས་བྱ་བ་དང་། རོལ་མོ་བྱིན་གྱིས་བརླབས་པའི་སྔགས་དྷརྨཱ་ར་ཎི་བརྗོད་པ་ཙམ་ཁྱད་པར་རོ། །གང་ལྟར་ཡང་ཁྲུས་དང་གཙང་སྦྲ་སོགས་ཀུན་སྤྱོད་ནི་རྒྱུད་སྡེ་འོག་མ་ལྟར་བྱ་བ་གལ་ཆེའོ། །གནོད་སྦྱིན་འཁོར་ལོ་ལ་བརྟེན་ནས། །འདོད་རྒུའི་མཆོག་སྩོལ་གཏེར་ཆེན་པོའི། །བུམ་བཟང་སྒྲུབ་ཐབས་བགྱིས་པའི་དགེས། །སྲིད་ཞིའི་དགེ་མཚན་རྒྱས་གྱུར་ཅིག །ཅེས་པའང་འཇམ་མགོན་བླ་མ་ངག་གི་དབང་པོས་མཛད་པའི་ཡིག་ཆ་ལུང་རྒྱུན་མ་བཞུགས་པའི་སྟབས་ཀྱིས། གསུང་རབ་དེ་ཉིད་ཀྱི་དགོངས་དོན་ལྟར་བྱ་བྲལ་བ་མཉྫུ་གྷོ་ཥས་བཀླགས་ཆོག་ཏུ་དག་པར་བྲིས་པ་དགེ་ལེགས་མཆོག་ཏུ་གྱུར་ཅིག ། ༈ སྙིང་གཏེར་སྐབས། བདག་བསྐྱེད། ན་མོ། དཀོན་མཆོག་གསུམ་ནས། ཀུ་རུ་ཡེ་སྭཱ་ཧཱ། བར་ལྷན་ཐབས་ལྟར། དེ་ནས་གསེར་སྐྱེམས་ལྷན་ཐབས་ལྟར་བཏང་། བུམ་པ། ཨ་མྲྀ་ཏས་བསང་། སྭ་བྷཱ་བས་སྦྱངས། སྟོང་པའི་ངང་ལས་འབྱུང་བ་རིམ་བརྩེགས་སྟེང་། ནས། བཛྲ་སྥ་ར་ཁཾ། བར་གཞུང་ལྟར། སྔགས་དྲུག་ཕྱག་དྲུག་སྤྱི་ལྟར། གཙོ་བོ་གསུམ་གྱི་ནས། བདེ་སྐྱིད་ལྡན་པའི་དངོས་གྲུབ་སྩོལ། །བར་གཞུང་ལྟར། མཆོད་བསྟོད་བཟླས་པ་འདོད་གསོལ་བར་ལྷན་ཐབས་ལྟར། འབྱུང་བ་ལྔ་ནི། ནས། ཀརྨ་སིདྡྷི་ཧཱུྃ། བར་གཞུང་ལྟར། ཀྱཻ། རིན་ཆེན་གསེར་གྱི་ནས། ལྡན་པར་མཛོད། བར་ལྷན་ཐབས། དེ་ནས། ཡི་གེ་བརྒྱ་པ་གསུམ། མ་འབྱོར་པ་དང་སོགས། འདིར་ནི་རྟེན་དང་སོགས་བརྟན་བཞུགས། སུ་པྲ་ཏིཥྛ་དང་། ཡེ་དྷརྨཱ་མང་དུ་བརྗོད་ཅིང་མེ་ཏོག་འཐོར། དེ་ནས་ཁ་གཅོད་རྒྱབ་ལ། ཧོཿ རྡོ་རྗེ་འབར་བའི་སོགས་གཞུང་ལྟར། མཐར། བཀྲ་ཤིས་རྒྱས་པར་བརྗོད། རྟེན་སྙིང་བཟླས་ཤིང་མེ་ཏོག་འཐོར། བསྔོ་སྨོན་སོགས་བྱའོ། མངྒ་ལཾ། ༈

[edit]

gnod sbyin 'khor lo la brten nas gter bum sgrub tshul 'dod dgu'i bum bzang / @#/__/gnod sbyin 'khor lo'i cho ga la brten nas gter bum sgrub pa'i man ngag 'dod rgu'i bum bzang zhes bya ba bzhugs so//__// oM swa sti/__gang zhig bsnyen pas 'dod rgu'i dpal/__/yid bzhin sbyin mdzad bla ma lhar/__/btud nas phun tshogs gter chen po'i/__/bum bzang sgrub pa'i man ngag 'bri/__/'di la gsum/__sbyor ba/__dngos gzhi/__rjes so/__/dang po ni/__sgrub pa po rdor phreng nang gi nor rgyun ma'i dkyil 'khor du dbang thob pa'am/__ma thob kyang rigs gsum spyi'am/__a ra pa tsa na lha lnga'i dkyil 'khor du dbang thob pa/__'di nyid kyi 'khor lo la brten pa'i rjes gnang ngam/__sgrub thabs rgya mtsho nas 'byung ba'i rjes gnang legs par thob cing /__dam tshig dang sdom pa rnam par dag pas sngon du bsnyen pa rgyas bsdus gang rigs dang /__'khor lo sgrub pa sogs ji skad bshad pa bzhin tshags su tshud par byas nas lag len dngos ni/__rin po che'am rdza'i bum pa gas chag med pa'i nang du ke tshe dang bra bo ma gtogs pa'i 'bru sna tshogs/__ra gan zha nye mkhar ba ma gtogs pa'i rin po che sna tshogs/__dug rigs dang gla rtsi ma gtogs pa'i sman sna tshogs/__sha chang sgog rigs ma gtogs pa'i zas sna tshogs/__dar sna/__gos sna/__snam ras rnams rgyal khab phyug po'i lag nas byung ba rab/__min kyang bkra shis pa'i gang zag las rnyed pa dang /__gzhan yang gnas dang gang zag byin rlabs can dang /__bsod nams can dang dpal g.yang can gyi khang pa zhing sa rta phyugs kyi spu sogs dge ba'i rdzas ci 'byor pa blugs/__khyad par rje btsun rin po ches 'khor lo'i man ngag las/__za ma tog chen po'i nang du bzhag la/__mar dang sbrang rtsi dang sha kha ras nub par byas te/__dus rgyun du me tog la sogs pas mchod pa byas na dngos grub thams cad 'grub par 'gyur ro/__/zhes gsungs pa ltar zhun mar dang sbrang rtsi ka ra rnams kyis gtams/__bum pa'i stod kyi char 'khor lo rab gnas can steng 'og dang mdun rgyab ma nor bar na bza' ser po dang bcas te gzhug__/slar yang 'bru sna dang sman sna bsres pas 'thas par dgang /__spro na skabs rnams su bkra shis rtags brgyad/__rdzas brgyad/__rin chen sna bdun/__'dod yon nyer spyod bcas bris pa'am 'jim pa la spar btab pa'ang gzhug__/kha spra tshil lam 'jim pa gtsang mas srub med par bkag__mgrin pa yan chad ras gtsang mas dkris la mdun du bkra shis rtags brgyad dam nor bu bri/__de lta bu'i bum pa du yod gzhi gtsang mar pad+ma 'dab brgyad re bris pa'i steng du bzhag__/mthar mchod pa dang gtor ma bsham/__gzungs thag ser po gdags/__gnyis pa ni/__skyabs 'gro nas bzung bdag bskyed bzlas pa dang dkyil 'khor bsdu ba'i bar sngon tu 'gro bas/__bum pa bsang sbyang /__stong pa'i ngang las bum pa'i grangs dang mnyam pa'i pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba'i nang du rin po che dang /__'bru bcud dang /__zas nor longs spyod lha mi'i dpal 'byor phun sum tshogs pas yongs su gang bar gyur/__ces dang /__rgyas par spro na tshig lhug rnams mi dgos par sngags drug phyag drug tsam spyi ltar dang /__mi nus na nam mkha' mdzod kyi phyag rgya dang bcas/__na maHsarba ta thA ga te b+h+yo sogs nas/__i maM ga ga na khaM swA hA zhes lan gsum gyis/__yo byad thams cad 'dod pa'i yon tan lnga'i rang bzhin dgos 'dod thams cad 'byung ba zad mi shes pa'i gter du gyur par bsam/__de lta bu'i bum pa'i stod kyi char pa~M las pad+ma 'dab ma brgyad pa'i lte ba dang 'dab ma rnams la zla ba'i dkyil 'khor re re/__dbus kyi gdan gyi steng du ba~M dang 'bras kyi snye ma las nor rgyun mar gsal ba'i brla g.yon pa'i steng du/__dza dang bI dza pU ra ka las dzam+b+ha la dang 'khor rnams skad cig gis shar du zla 'od ma dang nor bu bzang po/__lhor spyan ma dang gang ba bzang po/__nub tu rab sbyin ma dang nor sbyin/__byang du 'phags ma dang rnam thos sras/__shar lhor rab tu bzang mo dang dol pa'i phreng ba/__lho nub tu sbas ma dang 'jam po 'khyil ba/__nub byang du mdzes ma dang gdong gi dbang po/__byang shar du dbyangs can ma dang spyod pa'i dbang po/__thams cad kyang sku mdog ser po zhal gcig phyag gnyis pa/__rin po che'i rgyan thams cad kyis brgyan pa/__dar gyi na bza' can/__mo rnams kyi phyag g.yas pas shing thog bI dza pU ra ka dang bcas pa'i mchog sbyin gyi phyag rgya can/__g.yon pa rnams kyis 'bras kyi snye ma thugs kar 'dzin pa/__bud med sgyu ma'i nga rgyal gyis 'gyings pa/__rin po che 'bar ba skyugs par gyur pa'i pad+ma'i gter la sogs pa'i steng du skyil krung phyed pas bzhugs pa'i brla g.yon pa rnams kyi steng du/__pho rnams rol pa'i stabs kyis bzhugs pa'i phyag g.yas pa rnams shing tog bI dza pU ra kA 'dzin byas mo rnams kyi g.yon nas 'gul bar 'khyud pa/__g.yon pa rnams kyis ne'u le 'dzin pa'o/__/lha thams cad kyi dpral bar oM/__mgrin par AH__thugs kar hU~M/__rang gi snying ga'i pa~M yig las 'od zer 'phros pas/__rang bzhin gyi gnas nas dpal mo nor rgyun ma la nor lhA'i tshogs kyis bskor ba oM badz+ra sa mA dzaH__zhes pas spyan drangs pa la/__oM shrI ba su d+ha ri NI maN+Da la sa pa ri wA ra ar+g+haM pra tIts+tsha swA hA/__badz+ra pad+yAM pra tIts+tsha swA hA/__oM badz+ra puSh+pe AHhU~M nas shab+da AHhU~M gi bar sbyar bas mchod/__dzaHhU~M ba~M hoHsa mdun bskyed la gnyis su med par thim/__slar yang rang gi snying ga'i sa bon las 'od zer 'phros pas dbang gi lha rigs lnga 'khor bcas oM badz+ra sa mA dzaH__zhes pas spyan drangs la/__oM sarba ta thA ga ta pany+tsa ku la sa pa ri wA ra sbyar ba'i ar+g+haM sogs kyis mchod/__de bzhin gshegs pa thams cad kyis 'di la mngon par dbang bskur du gsol/__zhes gsol ba btab pas/__ji ltar bltams pa sogs nas/__shri ye hU~M zhes gsung zhing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las thams cad la rin chen 'byung ldan gyis dbur brgyan/__mchod pa bsang sbyang byin gyis brlabs nas/__thal mo sbyar te/__'jig rten khams 'di 'am dpag med na/__/mchod yon ji snyed yod pa rnams/__/'phags ma 'khor dang bcas la 'bul/__/bzhes nas dpal 'byor rgyas par mdzod/__/oM shrI ba su d+ha ri NI maN+Da la sa pa ri wA ra badz+ra ar+g+haM pra tIts+tsha pU dza me g+ha sa mu dra s+pha ra Na sa ma ye AHhU~M/__zhes dang /__de bzhin du/__zhabs bsil dang /__me tog sogs nas/__rol mo'i bar 'don pa bsgyur la dbul zhing /__d+harmA ra Ni ta sogs brjod/__spro na/__rtsibs stong ldan pa'i gser gyi 'khor lo sogs/__/rgya chen bsod nams dpal las legs grub pa/__/mi yi dbang po'i rin chen sna bdun 'bul/__/bzhes nas dpal 'byor rgyas pa'i dngos grub stsol/__/oM shrI ba su d+ha ri NI maN+Da la sa pa ri wA ra sap+ta rat+na pU dzi te hU~M/__/g.yul las rgyal bar byed pa'i ral gri sogs/__/bsod nams du ma'i mthu yis legs bskyed pa'i/__/sa bdag nye ba'i rin chen sna bdun 'bul/__/bzhes nas dpal 'byor rgyas pa'i dngos grub stsol/__/oM shrI ba su d+ha ri NI maN+Da la sa pa ri wA ra sap+ta u pa rat+na pU dzi te hU~M/__yid 'ong gzugs dang rnar snyan sgra la sogs/__/bsod nams du ma'i mthu yis legs bskyed pa'i/__/mtho ris 'gro ba'i 'dod yon rnam lnga 'bul/__/bzhes nas dpal 'byor rgyas pa'i dngos grub stsol/__/oM shrI ba su d+ha ri NI maN+Da la sa pa ri wA ra sa p+ta u pa rat+na pU dzi te hU~M/__/yid 'ong gzugs dang rnar snyan sgra la sogs/__/bsod nams du ma'i mthu yis legs bskyed pa'i/__/mtho ris 'gro ba'i 'dod yon rnam lnga 'bul/__/bzhes nas dpal 'byor rgyas pa'i dngos grub stsol/__/oM shrI ba su d+ha ri NI maN+Da la sa pa ri wA ra pany+tsa kA ma gu Na pU dzi te hU~M/__thub pas byin brlabs me long sogs dang ni/__/sku yi cha shas dbyibs mtshon dpal be'u sogs/__/bkra shis sgrub pa'i rdzas dang rtags brgyad 'bul/__/bzhes nas dpal 'byor rgyas pa'i dngos grub stsol/__/oM shrI ba su d+ha ri NI maN+Da la sa pa ri wA ra mang+ga la aSh+Ta dra bya tsih+Na pU dzi te hU~M zhes pa'i sngags rnams la nam mkha' mdzod kyi phyag rgya bya zhing mchod/__rdo rje dril bu 'dzin pas/__phun tshogs dge legs kun 'byung bcom ldan ma/__/dpal dang 'byor pa'i dbang phyug nor rgyun ma/__/yid la re ba'i bkra shis stsol mdzad ma/__/bsam 'phel dkyil 'khor dbang phyug ma la 'dud/__/gang sngon sbyin pa rgya mtsho'i dge bsags pas/__/tshe dang nor dang mthu yi dpal brnyes nas/__/sgrub pa po la dbyig gi char 'bebs pa'i/__/nor sbyin yab yum 'khor dang bcas la bstod/__/ces bstod/__gtor ma chu gtsang mas sbyang /__oM AHhU~M lan gsum gyis brlab/__sngags rnams kyi mthar/__i daM ba liM ta kha kha khA hi khA hi sarba sid+d+hi m+mepra yats+tsha n+tu hU~M phaT ces lan gsum sogs kyis phul/__oM shrI ba su d+ha ri NI maN+Da la sa pa ri wA ra ar+g+haM pra tIts+tsha swA hA sogs nas/__shap+da'i bar sbyar bas mchod/__phun tshogs dge legs kun 'byung sogs kyis bstod/__bcom ldan 'das ma 'khor dang bcas pas bdag dang sbyin pa'i bdag pos gtsor byas sems can thams cad la 'dod rgu'i 'byor pa'i dngos grub zad mi shes pa stsal du gsol zhes 'dod don gsol/__gzungs thag nas bzung ste/__rang gi snying ga nas 'od zer sngags phreng gi rnam pa can 'phros pas lha rnams kyi thugs rgyud bskul/__de rnams kyi sku las 'od zer pho nya lta bu bsam gyis mi khyab pa 'phros/__'jig rten gyi khams thams cad khyab/__sangs rgyas byang sems nyan rang 'phags pa'i tshogs kyi byin rlabs nus mthu thams cad 'od zer ser po'i rnam par spyan drangs shing /__de dang dus mnyam du srid pa gsum gyi dpal 'byor longs spyod bcud g.yang dang bcas pa thams cad bkrag mdongs gzi brjid can gyi rnam par bkug ste/__bum pa'i nang gi rdzas rnams la gnyis su med par thim pas 'dod rgu'i dpal 'byor zad mi shes pa'i gter gyi bum pa bzang por gyur/__bum pa'i nang gi dpal 'byor phun sum tshogs pa rab tu 'phel zhing kha nas lhud kyis lud/__lha rnams kyi sku dang phyag mtshan rnams las kyang rin po che dang 'bras sogs mkho dgu longs spyod kyi char chen po chil chil babs pas gnas khang dang /__gtsug lag khang dang /__bang mdzod la sogs pa mar gyis khengs pas bdag dang sbyin bdag gis mtshon pa'i sems can thams cad bsam pa rdzogs par gyur ces brjod cing bsams la/__oM ba su d+ha ri N+yai swA hA zhes gtso bor bzla/__thun mtshams rnams su 'khor rnams la/__oM tsan+d+ra kAn+t+yai swA hU/__de bzhin du/__dartA yai/__su da rtA yai/__AR+YA yai/__su b+ha drA yai/__gup+tA yai/__de byai/__sa ra swA t+yai swA hA/__zhes pas yum rnams dang /__oM dzam+b+ha la dza len+d+rA ye swA hA/__de bzhin du/__ma Ni b+ha drA ya/__pU r+Na b+ha drA ya/__d+ha na dA ya/__bai shra ba NA ya/__ki li mA yi ni/__bi tsi kuN+Da li ni/__mu khen+d+rA ya/__oM tsa ren+d+rA ya swA hA/__zhes pa yab rnams te so sor gtso mo'i bcu cha re bzla/__thun bsdu ba na/__mchod pa bsang sbyang byin gyis brlabs la/__oM shrI ba su d+ha ri NI sa pa ri wA ra ar+g+haM pra tI ts+tsha nas/__shap+da'i bar sbyar bas mchod/__phun tshogs dge legs sogs kyis bstod/__yig brgya lan gsum/__ma 'byor pa dang sogs kyis bzod par gsol/__de nas me tog ser po thogs la/__bcom ldan 'das ma 'phags ma nor rgyun ma'i lha tshogs 'khor dang bcas pa khyed rnams rten 'di rnams la brtan par bzhugs su gsol/__brtan par bzhugs nas rten 'di rnams gang du bzhugs pa'i yul phyogs dang gnas khang thams cad lo phyugs legs shing /__'bru bcud dar ba dang /__srid zhi'i dpal 'byor phun sum tshogs pa thams cad rgya mtsho chen po la chu bo'i rgyun bzhin du 'du bar mdzad du gsol zhes dang /__su pra tiSh+Tha dang ye d+harmA mang du brjod cing me tog 'thor ro/__/de lta bu'i gsol gdab brtan bzhugs lan gsum mam bdun la sogs pa gang mang bya/__rang gi dpral bar oM dkar po/__mgrin par AHdmar po/__thugs kar hU~M sngon po zhes gnas gsum bsrung /__dge ba 'di yis myur du bdag__/nor rgyun dpal mo 'grub gyur nas/__/sogs dang /__thams cad nam mkha'i mdzod bzhin du/__/longs spyod zad pa med par shog__/rtsod pa med cing 'tshe med pa/__/rang dbang du ni spyod par shog__/lha yang dus su char 'bebs shing /__/lo tog phun sum tshogs par shog__/rgyal po chos bzhin byed pa dang /__/'jig rten dag kyang dar bar shog__/'bad dang rtsol bas ma gos pa/__/yid bzhin nor bu dpag bsam bzhin/__/sems can re ba skong mdzad pa/__/bsam pa 'grub pa'i bkra shis shog__/ces sogs bsngo smon shis brjod khyad par ba dang /__gzhan yang /__che ba'i che mchog sogs mdo rgyud nas 'byung ba'i bkra shis kyi tshigs su bcad pa rgya cher brjod/__de lta bu thun du bcad nas rang ngam sbyin bdag la rmi ltas dge ba lta bu'i rtags ma byung gi bar ram zhag bdun sogs bsgrub bo/__/gsum pa ni de ltar legs par bsgrubs pa'i mthar bang mdzod kyi phug__/phyugs lhas kyi gong /__zhing sa bzang po'i dkyil sogs gang du 'jog pa'i sar spyan drangs te sgrom bu'i nang du pad+ma 'dab brgyad bris pa'i steng du zhal phyi sgo dang /__lung pa'i mda' sogs dang mi 'phrod par byas te mchod pa'i bye brag dang bcas te bzhag__/brtan bzhugs dang shis brjod rgyas par bya/__dus dang dus su me tog sogs nyer spyod dang /__zas sna'i phud sogs kyis mchod na 'dod rgu'i dngos grub nges par ster bar 'gyur la/__gal te sngags bsgrubs nas yun ring song ba yin na bzhag dus zhal gso ba'i don du sngar bshad pa ltar gyi cho ga tshar gcig bskyar na'ang legs par 'gyur ro/__/tshul 'di rje e wa~M pa dkon mchog dpal ldan sogs kyis gsang 'dus kyi phyogs su gtogs par mdzad pa'ang /__cho ga'i yan lag rnams bla med ltar bkral ba'i dbang du byas na 'gal ba med mod/__'on kyang gzhi'i rgyud 'jam dpal dpa' bo grub pa ni rgyud sde 'og ma yin pas/__cho ga spyi khyab tsam la'ang brten du rung bas/__de ltar na mchod pa bsang sngags sogs a mr-i tas bya ba dang /__rol mo byin gyis brlabs pa'i sngags d+harmA ra Ni brjod pa tsam khyad par ro/__/gang ltar yang khrus dang gtsang sbra sogs kun spyod ni rgyud sde 'og ma ltar bya ba gal che'o/__/gnod sbyin 'khor lo la brten nas/__/'dod rgu'i mchog stsol gter chen po'i/__/bum bzang sgrub thabs bgyis pa'i dges/__/srid zhi'i dge mtshan rgyas gyur cig__/ces pa'ang 'jam mgon bla ma ngag gi dbang pos mdzad pa'i yig cha lung rgyun ma bzhugs pa'i stabs kyis/__gsung rab de nyid kyi dgongs don ltar bya bral ba many+dzu g+ho Shas bklags chog tu dag par bris pa dge legs mchog tu gyur cig___/___!_snying gter skabs/__bdag bskyed/__na mo/__dkon mchog gsum nas/__ku ru ye swA hA/__bar lhan thabs ltar/__de nas gser skyems lhan thabs ltar btang /__bum pa/__a mr-i tas bsang /__swa b+hA bas sbyangs/__stong pa'i ngang las 'byung ba rim brtsegs steng /__nas/__badz+ra s+pha ra khaM/__bar gzhung ltar/__sngags drug phyag drug spyi ltar/__gtso bo gsum gyi nas/__bde skyid ldan pa'i dngos grub stsol/__/bar gzhung ltar/__mchod bstod bzlas pa 'dod gsol bar lhan thabs ltar/__'byung ba lnga ni/__nas/__karma sid+d+hi hU~M/__bar gzhung ltar/__kyai/__rin chen gser gyi nas/__ldan par mdzod/__bar lhan thabs/__de nas/__yi ge brgya pa gsum/__ma 'byor pa dang sogs/__'dir ni rten dang sogs brtan bzhugs/__su pra tiSh+Tha dang /__ye d+harmA mang du brjod cing me tog 'thor/__de nas kha gcod rgyab la/__hoH__rdo rje 'bar ba'i sogs gzhung ltar/__mthar/__bkra shis rgyas par brjod/__rten snying bzlas shing me tog 'thor/__bsngo smon sogs bya'o/__mang+ga laM/__!_