JKW-KABUM-07-JA-015-012-wylie

🚧 This website is under continued development. We appreciate your patience!

tshogs mchod bsdus pa bsod nams sprin gyi gru char/ rje btsun rdo rje rnal 'byor ma nA ro mkha' spyod ma'i tshogs mchod bya tshul mdor bsdus pa bsod nams sprin gyi gru char zhes bya ba bzhugs so/__/na mo gu ra be/__dran pa tsam gyis mkha' spyod mchog ster ba/__/bla ma rdo rje btsun mo la btud nas/__/gang de tshogs kyi mchod pas mnyes byed tshul/__/bsod nams sprin gyi gru char 'dir 'bebs so/__/de la 'dir rje btsun rdo rje rnal 'byor ma nA ro mkha' spyod ma'i sid+d+hU ra'i dkyil 'khor sgrub mchod sogs dang 'brel bar tshogs kyi mchod pa mdor bsdus bya ba'i tshul la/__sbyor 'jug gi chos rnams gzhan du shes par byas nas/__dngos gzhi'i cho ga la/__thog mar byin gyis brlabs pa ni/__ma dA na dang bA la sogs pa'i yo byad rnams la rdo rje'i rtses nang mchod 'thor zhing /__sum+b+has bsang /__swa b+hA was sbyang /__snod bcud thams cad mi dmigs stong par gyur/__/stong pa'i ngang las a yig yongs gyur las/__/phyi snod bde chen ye shes ka pA la/__/yangs shing rgya che stong gsum khyon dang mnyam/__/de dbus nang bcud sha lnga bdud rtsi lnga/__/'od du zhu las ye shes bdud rtsi'i sprin/__/'dod pa'i yon tan rnam pa thams cad pa/__/zag med 'char ba nam mkha'i mdzod du gyur/__/oM AHhU~M ha ho hrIH__lan gsum/__tshogs zhing spyan drangs pa ni/__pheM pheM/__'og min rdo rje btsun mo'i zhing khams dang /__/sku gsung thugs kyi 'khor lo'i dkyil 'khor nas/__/rgyal kun yum gyur rdo rje rnal 'byor ma/__/rtsa brgyud bla ma sangs rgyas byang sems dang /__/yi dam lha tshogs dpa' bo rnal 'byor ma/__/chos skyong srung ma nor lha'i tshogs dang bcas/___/longs spyod tshogs kyi 'du bar spyan 'dren na/__/tshad med thugs rje'i dbang gis gnas 'dir gshegs/__/oM gu ru bud+d+ha bo d+hi sa twa badz+ra yo gi nI sa pa ri wA ra badz+ra sa mA dzaHzhes pas mkha' khyab tu byon par bsam/__de nas sman phud 'thor la/__oM AHhU~M/__dman pa'i spyod yul dag las rab 'das shing /__/rgyal ba kun gyi bsten bya'i dam tshig mchog__/dngos grub rnam gnyis kun gyi gzhir gyur pa/__/zag med bdud rtsi mchog gi mchod pa 'di/__/phyogs bcu dus gsum rgyal ba sras bcas kyi/__/mkhyen brtse nus gsum gcig tu 'dus pa'i dngos/__/dran pas srid zhi'i rgud pa kun sel ba'i/__/rtsa ba'i bla ma'i zhal du oM AHhU~M/__/rdo rje 'chang chen rdo rje rnal 'byor ma/__/grub chen nA ro ta pa pham mthing pa/___/shes rab brtsegs dang mal gyo sa skya pa/__/rje btsun sku mched zhal du oM AHhU~M/__/sa skya paN chen 'phags pa rin po che/__/dkon mchog dpal dang chos rje bsod nams dpal/_/bsod nams rgyal mtshan dpal ldan tshul khrims zhabs/__/ye shes rgyal mtshan zhal du oM AHhU~M/__/ngor chen rdo rje 'chang dngos kun dga' bzang /__/sems dpa' chen po bdag chen rdo rje 'chang /__/kun spangs chos rje kun dga' legs pa dang /__tshar chen chos rje'i zhal du oM AHhU~M/__/mkhyen brtse'i dbang phyug bslab gsum rgyal mtshan dang /__/dbang phyug rab brtan bsod nams mchog ldan zhabs/__/bsod nams mchog grub mkhyen rab byams pa'i dpal/__/kun dga' lhun grub zhal du=__gnas gsar rdo rje 'chang dbang kun blo'i zhabs/__/nam mkha' 'chi med bstan pa'i nyi ma dang /__/ngag gi dbang po khyab bdag kun dga'i mtshan/__/'jam dpal bzang po'i zhal du=__gzhan yang tshad med thugs rje'i sprin mdzes las/__/dbang bskur rgyud bshad man ngag bdud rtsi yis/__/bdag blo'i thar pa'i myu gu 'phel mdzad pa/__/dngos brgyud bla ma'i zhal du oM AHhU~M/__oM oM oM sarba bud+d+ha DA ki sogs nas pha?T swA hA/__khyad par dran pa tsam gyis lhan skyes kyi/__/ye shes rmad du byung ba sbyin mdzad pa/__/rgyal kun yum gcig rdo rje rnal 'byor ma/__/skyabs gnas kun 'dus zhal du oM AHhU~M/__gzhan yang bya ba spyod pa rnal 'byor dang /__/rnal 'byor bla med rgyud dang rjes 'brel ba'i/__/gang 'dul sgyu 'phrul drwa ba'i rnam rol can/__/yi dam lha tshogs zhal du oM AHhU~M/__oM AHhU~M/__rdo rje'i chos srung nor lha rgya mtsho dang /__/gnas gsum bzhugs pa'i dpa' bo rnal 'byor ma/__/yul lha gzhi bdag rigs drug tshogs bcas rnams/__/lha ru gsal ba'i zhal du oM AHhU~M/__/sgrib pa gnyis kyi dri ma kun bsal nas/__/gzung 'dzin rtogs pa kun las rnam grol ba/__/bla na med pa'i byang chub sems kyi dngos/__/bde ba chen po'i mchod pas mnyes gyur cig__/oM AHhU~M/__zhes brjod/__tshogs phud cha gsum du bsgos la/__phud dang po bla ma dang dkon mchog la 'bul ba ni/__oM AHhU~M/__phyogs bcu dus gsum rgyal ba sras bcas kyi/__/ye shes sgyu 'phrul drwa ba'i rnam rol can/__/bka' drin mnyam med rtsa ba'i bla ma la/__/zag med bdud rtsi'i tshogs kyi mchod pa 'bul/__/zhes pa'i mthar spro na/__khyab bdag dang po'i sangs rgyas rdo rje chos/__/rgyal ba'i yum gyur rdo rje rnal 'byor ma/__/grub pa'i dbang po rdo rje dril bu par/__zag med bdud rtsi'i tshogs kyi mchod pa 'bul/__/zhes sogs kyis phul ba'am/__bsdu na/__khyab bdag rdo rje 'chang dbang nas bzung ste/__/paN grub dbang po nA ro ta pa sogs/__/'phags bod brgyud pa'i bla ma thams cad la/__/zag med bdud rtsi'i tshogs kyi mchod pa 'bul/__/zhes pa'i mthar/__spangs rtogs mthar phyin rgyal ba sras bcas dang /__/yi dam dkyil 'khor 'khor lo rab 'byams sogs/__/skyabs gnas mchod 'os rgya mtsho thams cad la/__/zag med bdud rtsi'i tshogs kyi mchod pa 'bul/__/bzhes nas bdag dang mtha' yas sems can kun/__/bsod nams ye shes tshogs gnyis rab rdzogs shing /__/mchog dang thun mong dngos grub rnam gnyis kyis/__/phan bde'i dga' ston rgyas par byin gyis rlobs/__/oM gu ru bud+d+ha bo d+hi sa twa sa pa ri wA ra oM a kA ro sogs lan gsum gyis phul/__phud bar pa yi dam rdo rje rnal 'byor ma la phul te/__oM AHhU~M/__e dbyings rdo rje btsun mo'i grong khyer du/__/ba~M yig bde ba chen po'i rol rtsed las/__/zung 'jug mtshan dpe'i gzugs su yongs shar ba/__/skyabs gnas kun 'dus rdo rje rnal 'byor ma/__/dran pas lhan cig skyes pa'i ye shes kyi/__/rnam kun mchog ldan lang tsho dar babs shing /__/yid 'ong spyan gyi zur mdas reg pa'i mod/__/sgrub po mkha' spyod grong du 'khrid mdzad pa'i/__/gnas gsum zhing sngags lhan cig skyes pa yi/__/grangs med DA ki rgya mtsho'i 'khor dang bcas/___/mkha' dbyings khyab par bzhugs pa'i tshogs rnams la/__/zhal zas bdud rtsi'i tshogs kyi mchod pa 'bul/__/bzhes nas bdag dang mtha' yas sems can kun/__/sku gsung thugs kyi gsang bas rjes bzung nas/__/gnas skabs mkha' spyod grong du dbugs dbyungs shing /__/mthar thug mchog dngos 'grub par byin gyis rlobs/__/zhes dang /__oM gsum ma'i mthar a kA ro btags pas phul/__phud tha ma mkha' 'gro chos skyong srung ma sogs la 'bul te/__oM AHhU~M/__/rdo rje'i ye shes 'bar ba'i me bo che/__/log 'dren bgegs kyi bud shing kun bsregs nas/__/grub gnyis snang ba rtag tu rgyas mdzad pa'i/__/chos skyong srung ma'i tshogs rnams thams cad dang /__sgrub pa po yi rgyud la lhan skyes kyi/__/ye shes rmad du byung ba'i dpal ster ba/__/gnas yul dur khrod kun na bzhugs pa yi/__/sprul pa'i gar mdzad dpa' bo rnal 'byor ma/__/bsod nams nor bu'i sprin chen rol pa las/__/'dod dgu'i gru char lhug par 'bebs mkhas pas/__/srid zhi'i 'byor pa mtha' dag sbyin mdzad pa'i/__/gnod sbyin nor lha rgya mtsho'i tshogs bcas dang /__/gzhan yang yul lha gzhi bdag rigs drug mgron/__/thams cad ye shes gcig gis byin rlabs pas/__/mkha' spyod dga' ma'i gzugs su yongs shar bar/__/zhal zas bdud rtsi'i tshogs kyi mchod pa 'bul/__/bzhes nas bdag dang sems can thams cad kyi/__/lam gyi 'gal rkyen mtha' dag nyer zhi zhing /__/mthun rkyen ma lus yid bzhin 'grub pa dang /__/mchog thun dngos grub thob pa'i phrin las mdzod/__/zhes dang /__chos skyong so so'i gtor sngags dang /__mkha' 'gro spyi gtor gyi sngags kyis phul/__yan lag brgyad ldan mchod yon rgya mtsho dang /__/dri med gang+ga'i rgyun gyi zhabs bsil sgreng /__/rab mdzes mtshar sdug rdzogs pa'i me tog dang /__/bdug spos sprin gyi dud pas phyogs kun khyab/__/nyi zla nor bu'i sgron me'i snang gsal dang /__/ga bur tsan+dan bgos pa'i dri chab g.yo/__/ro brgya ldan pa'i zhal zas sna tshogs dang /__/dbyangs bdun snyan 'gyur rdzogs pa'i rol mor bcas/__/bla ma yi dam sangs rgyas byang sems dang /__/rgyal kun yum gyur rdo rje rnal 'byor ma'i/__/dkyil 'khor lha tshogs 'khor dang bcas la 'bul/__/bzhes nas dbang dang dngos grub stsal du gsol/__/oM gu ru bud+d+ha bo d+hi sa twa badz+ra yo gi ni sa pa ri wA ra ar+g+haM sogs kyis phyi mchod dang /__oM AHhU~M gis nang mchod 'bul/__byin rlabs rmad byung rtsa brgyud bla ma dang /__/dngos grub mchog stsol yi dam dkyil 'khor lha/__/skyabs gnas dkon mchog rgya mtsho'i tshogs bcas la/_/sgo gsum gus pa chen pos phyag 'tshal lo/__/chos sku'i ngang las lhan skyes longs spyod rdzogs/__/zhing skyes sprul pa'i rnam rol mtha' yas bdag__/sngags skyes dkyil 'khor 'khor lor yongs shar ba'i/__/rdo rje rnal 'byor ma la phyag 'tshal lo/__/zhi dang khro chags rnam 'phrul sna tshogs kyis/__/'gal rkyen sel zhing mthun rkyen bsgrubs mdzad pa/__/chos skyong srung ma nor lha rgya mtsho dang /__/gnas gsum mkha' 'gro'i tshogs la phyag 'tshal lo/__/zhes pas bstod/__/rtsa brgyud bla ma yi dam dkyil 'khor lha/__/rgyal kun yum gyur rdo rje rnal 'byor ma/__/mkha' 'gro chos skyong srung ma'i tshogs rnams dang /__/gzhan yang ye shes gcig gi rnam rol la/__/mchog dang dman pa'i rtog pa ma dmigs phyir/__/yul lha gzhi bdag rigs drug tshogs bcas la/__/'dod pa'i yon tan rnam pa thams cad pa/__/zhal zas tshogs kyi mchod pa phul ba'i mthus/__/'gro la phan bde ma lus 'byung ba'i sgo/__/rgyal ba'i bstan pa yun ring gnas pa dang /__/bstan 'dzin skyes bu thams cad zhabs brtan cing /__/bshad sgrub phrin las 'phel bar mdzad du gsol/__/'jig rten pa kun yang dag lta ba la/__/gus shing rnam dkar las la brtson pa'i mthus/__/snod bcud phun sum tshogs pa'i ngo mtshar gyi/__/dge mtshan nub pa med par mdzad du gsol/__/gzhan yang rnal 'byor bdag cag 'khor bcas la/__/gnas skabs 'jigs chen brgyad dang bcu drug sogs/__/dam chos bsgrub la 'tshe ba'i 'gal rkyen kun/__/zhi ba'i phrin las 'grub par mdzad du gsol/__/tshe bsod dpal 'byor thos bsam shes rab dang /__/khyad par rim pa gnyis kyi ting nge 'dzin/__/gong nas gong du 'phel zhing brtan pa yis/__/grub gnyis dga' ston rgyas par mdzad du gsol/__/brtan g.yo snod bcud thams cad skad cig tsam/__/dran pa'i mod nas dbang du bgyid nus pa'i/__/brtul zhugs zla med sngags rigs grub pa yis/__/phun tshogs mtha' dag 'du bar mdzad du gsol/__/zhi ba'i thabs kyis 'dul du ma 'tshal ba'i/__/nag po'i rtsa lag sder bcas dpung tshogs kun/__/drag po'i phrin las mchog gis tshar bcad nas/__/ming gi lhag mar bgyid par mdzad du gsol/__/tshe yi mthar yang dpal ldan bla ma dang /__/dbyer med rje btsun rdo rje rnal 'byor ma/__/dpa' bo mkha' 'gro'i tshogs kyis mdun bdar nas/__/mkha' spyod gnas su 'khrid par mdzad du gsol/__/mdor na myur du zung 'jug phyag rgya che'i/__/go 'phang mchog de mngon sum brnyes pa dang /__/de ma thob pa'i tshe rabs thams cad du/__/don gnyis yid bzhin 'grub par mdzad du gsol/__/zhes 'dod pa'i don la gsol ba gdab/__de nas tshogs pa mang po yod na zhu 'bul sogs tshul bzhin bya/__gang ltar yang mthar/__'dod pa'i yon tan sna tshogs sprin 'phro ba'i/__/bza' bca' btung ba'i khyad par rnam mang po/__/ting nge 'dzin gyi mig 'phrul las byung ba/__/ye shes bdud rtsi'i rgya mtsho'i mchod sprin 'dis/__/rang sems bla ma yi dam rnal 'byor ma/__/dbyer med sangs rgyas thams cad 'dus pa'i dngos/__/snying dbus ba~M yig thig ler rtag mchod na/__/'du 'bral med pa'i dngos grub stsal du gsol/__/zhes brjod cing bsam la tshim par rol/__mthar lhag ma chu chang gis bran la/__oM AHhU~M/__lhag ma'i gtor ma zhal zas bdud rtsi'i sprin/__/'dod pa'i yon tan rnam pa thams cad pa/__/zad pa med pa nam mkha'i mdzod lta bu/__/dpag yas srid zhi'i khams kun khyab par gyur/__/oM AHhU~M/__gsum gyis brlabs/__phaiM/__zhes pas mgron bkug nas/__oM kha kha khA hi khA hi uSh+tsi Ta ba liM ta b+hak+Sha sI swA hA/__zhes dang /__'byung po lhag ma dbang ba'i tshogs rnams la/__/'dod yon tshogs kyi lhag ma 'di sbyin na/__/zag med bde ba mchog gis lus dang sems/__/ngoms shing tshim pa'i skal pa ldan gyur cig__/ces pas bsngos la phyi rol du dor/__shis pa brjod pa dang /__smon lam gyis mtha' bsdus/__'di ni rang nyid kho na tsam gyis bya ba'i tshul yin la/__tshogs pa mang po yod na bar mtshams rnams su zhu 'bul sogs gzhan nas 'byung ba ltar bya'o/__/smras pa/__bsod nams ye shes tshogs gnyis rdzogs pa dang /__/dam tshig nyams chags nyes ltung kun byang ba'i/__/thabs tshul sprin gyi gru char g.yo ba 'dis/__/phan bde'i pad+mo rtag tu rgyas gyur cig__/zhes pa'ang sgrub brtson dam pa dge slong 'jam dpal bstan 'dzin gyis/__rje btsun rdo rje rnal 'byor ma'i tshogs kyi mchod pa bya tshul tshigs su bcad pa'i dbyangs kyis bsdebs pa rgyas bsdus 'di lta bu zhig sbyar bar 'os so zhes nan tan gyis bskul ba'i ngo ma ldog par/__dam pa snga ma rnams kyis mdzad pa dang mthun par/__dus gsum sangs rgyas thams cad kyi ngo bo mkhan chen chos kyi rgyal po byams pa kun dga' bstan 'dzin sogs yongs 'dzin dam pa du ma'i gsung gi bdud rtsis reg pa'i rmongs brtul gyi na ba gzhon nu mkhyen brtse'i ming can gyis dpal e waM chos ldan gyi bla brang thar pa rtser sbyar ba la/__rang bzo'i nongs pa'i cha shas mchis pa thams cad snying nas bshags shing /_dge bas 'gro kun rje btsun rdo rje btsun mo'i go 'phang thob pa'i rgyur gyur cig__/sarba dA mang+ga laM//___//__!_