JKW-KABAB-03-GA-005-wylie

🚧 This website is under continued development. We appreciate your patience!

@#//__/rje btsun sgrol ma'i thugs dam gnad nas bskul ba'i gsol 'debs bzhugs so//__/na mo gu ru b+h+yaH__rje btsun sgrol ma la thugs dam gnad nas bskul zhing smre ngag gis gsol ba btab pa ni:__rje btsun 'phags ma'i rten gyi drung du thal sbyar pus btsugs lus ba spu g.yo bas:__gdong mchi ma 'byin cing bu ma la dung nas ngu ba'i tshul du 'di ltar bya'o:__kyi hud 'phags ma byams ldan thugs rje can:__rgyal ba'i yum khyod gnas mchog gang na bzhugs:__skyabs med bdag la dgos pa'i dus byung ngo :__thog med dus nas da ltar thug gi bar:__rigs drug 'khor ba'i g.yang sa dong ring 'dir:__skye ba grangs med sha khrag lus blangs kyang :__byas pa'i las rnams don med chud re zos:__skye ba lan cig tsam zhig thar pa'i lam:__sgrub pa'i 'brel yang bdag gis ma zhogs sam:__'phags ma'i thugs rjes bdag nyid btang srid dam:__thugs rjes zungs dang 'phags ma rgyal ba'i yum:__bdag ni ma rig las ngan sdig sgrib can:__mgon med bdag ni ma yis ma gzigs sam:__gdung ba'i nga ros 'o dod 'bod lags na:__mkhyen dang brtse ba'i thugs rjes mi 'dzin nam:__rigs drug 'khor ba'i dong du lhung lags na:__'phags ma'i thugs rje'i zhags pas mi 'dren nam:__ma rig mun pa'i yul du gtan 'khyams na:__'phags mas thugs rje'i sgron me mi sbor ram:__las kyi yul du dbang med 'khyams lags na:__ma gcig thugs rje'i lcags kyus mi 'dzin nam:__dge ba'i myu gu lo tog bskams lags na:__'phags mas thugs rje'i char rgyun mi 'bebs sam:__zhe sdang dug lnga'i me chen 'bar lags na:__ma khyed thugs rje'i chu yis mi brlan nam:__dug gsum 'khrul pa'i nad kyis gdung lags na:__ma khyed thugs rje'i sman gyis mi gso'am:__dus 'dir ma khyed thugs rjes ma bzung na:__deng nas phyin chad nges pa'i gnas med do:__kye ma ky-i hud 'phags ma thugs rje can:__bdag la re ltos skyabs gnas gzhan na med:__skyid sdug re ltos ci 'gyur khyod shes na:__thugs rje'i dpa' mtshon skyed cig rje btsun ma:__'khor ba'i gnas su yun ring gtan 'khyams na:__nam zhig las zad 'bras bu thob pa'i tshe:__'phags ma'i thugs rjes ci 'tshal don ma mchis:__las dbang btsan zhes bdag nyid bor gyur na:__thugs rje che zhes skyabs gnas su la byed:__'phags ma khyed la thugs rje'i stobs mnga' zhing :__sngon 'brel gsol btab bden pa mi bslu na:__thugs la le lo btang snyoms ma mdzad par:__skad cig nyid la thar par 'dren tu gsol:__tshe 'dir mi mthun rkyen ngan bar gcod dang :__rgyal po me chu lcags sgrog dug dang mtshon:__rims nad sna tshogs chom rkun dus min 'chi:__dgra dang bgegs sogs rmi lam mtshan ltas ngan:__chags che nyam nga 'jigs pa brgyad la sogs:__ma lus zhi zhing bzlog par mdzad du gsol:__tshe dbang longs spyod dpal 'byor phrin las rnams:__gong nas gong du 'phel zhing rgyas par mdzod:__khams gsum srid gsum snang srid thams cad kyi:__snang ba dbang du 'du bar mdzad du gsol:__bdud dang dgra bgegs 'byung po'i tshogs rnams kun:__tshar gcod drag po'i phrin las mdzad du gsol:__bdag ni rtse gcig zol zog med pa yis:__kha tsam ma yin snying nas gsol btab pas:__'gro 'dug las byed gang gi phyogs su yang :__bu gcig ma bzhin brtse bas bskyang du gsol:__'di dang phyi ma bar do'i gnas skabs su:__'bral med rtag tu thugs rjes bzung du gsol:__bdag gi rgyud la mi rtag byams snying rje:__dad dang brtson 'grus nges 'byung skyo shas dang :__zab mo'i don dang stong nyid lta ba'i mchog:__rtag tu nyams len skyo ngal med pa dang :__tshe dang sgrub pa mtha' ru phyin par shog:__ces pa 'di ni gter chen chos kyi rgyal po rig 'dzin rat+na gling pa'i zab gter mtsho rgyal skor gsum gyi nang sgrub sgrol ma'i cho ga las phyung ba'o/__/rje btsun bcom ldan 'das ma thugs rje can/__/bdag dang mtha' yas sems can thams cad kyi/__/sgrib gnyis byang zhing tshogs gnyis myur rdzogs nas/__/rdzogs pa'i sangs rgyas thob par mdzad du gsol/__/de ma thob kyi tshe rabs kun tu yang*/__/lha dang mi yi bde ba mchog thob nas/__/thams cad mkhyen pa sgrub par byed pa la/__/bar chad gdon bgegs rims dang nad la sogs/__/dus min 'chi bar gyur pa sna tshogs dang*/__/rmi lam ngan dang mtshan ma ngan pa dang*/__/'jigs pa brgyad sogs nye bar 'tshe ba rnams/__/myur du zhi zhing med par mdzad du gsol/__/'jig rten 'jig rten las ni 'das pa yi/__/bkra shis bde legs phun sum tshogs pa rnams/__/'phel zhing rgyas pa'i don rnams ma lus pa/__/'bad med lhun gyis grub par mdzad du gsol/__/sgrub la brtson zhing dam chos 'phel ba dang*/__/rtag tu khyed sgrub zhal mchog mthong ba dang*/__/stong nyid don rtogs byang sems rin po che/__/yar ngo'i zla ltar 'phel zhing rgyas par mdzod/__/ces 'dod pa'i don la gsol ba 'debs pa sh+lo ka lnga rje btsun grags pa rgyal mtshan gyis mdzad pa'o/__/'phags pa rin po ches mdzad/ bdag gis tshe rabs kun tu bsgrubs pa'i lha/__/dus gsum sangs rgyas kun gyi phrin las ma/__/sngo ljang zhal gcig phyag gnyis myur zhi dpa'/__/yum gyur ut+pal bsnams pa'i bkra shis shog__/mdo sde las byung ba'i tshig kha bsgyur/ _ _ _rgyal yum sgrol ma khyed sku ci 'dra dang*/__/'khor dang sku tshe'i tshad dang zhing khams dang*/__/khyed kyi mtshan mchog bzang po ci 'dra ba/__/de 'dra kho nar bdag sogs 'gyur bar shog__/chos rgyal khri srong gi gsung du grags par snang*/ khyed la bstod cing gsol ba btab pa'i mthus/__/bdag sogs gang du gnas pa'i sa phyogs su/__/nad gdon dbul phongs 'thab rtsod zhi ba dang*/__/chos dang bkra shis 'phel bar mdzad du gsol/__ces pa rnams kyi sgo nas 'dod pa'i don la rtse gcig tu gsol ba btab pas dge legs kyi don thams cad yongs su 'phel bar 'gyur ro/__/sarba mang+ga laM//__//