JKW-KABUM-08-NYA-013-003

🚧 This website is under continued development. We appreciate your patience!

Previous Text Back to Volume PageNext Text

Wylie title	gshin rje gshed dmar po lhan cig skyes pa'i byin rlabs kyi cho ga ye shes 'char ba
Location	mkhyen brtse'i bka' 'bum Volume 8, sde tshan 13, Text 3, Pages 345-354 (Folios 5a6 to 9b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gshin rje gshed dmar po lhan cig skyes pa'i byin rlabs kyi cho ga ye shes 'char ba. In 'jam dbyangs mkhyen brtse'i dbang po'i bka' 'bum, Vol. 8: 345-354. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Deity	gshin rje gshed dmar
Colophon	།ཅེས་པའང་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་གསུང་རབ་དང་འབྲེལ་བར་བྱིན་རླབས་བྱ་ཚུལ་ཉུང་གསལ་འདིའང་། ཉེ་བར་མཁོ་བའི་ཡན་ལག་ཏུ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བ་སིདྡྷི་རསྟུ།།
	ces pa'ang chos kyi rgyal po 'phags pa rin po che'i gsung rab dang 'brel bar byin rlabs bya tshul nyung gsal 'di'ang /__nye bar mkho ba'i yan lag tu bya bral ba 'jam dbyangs mkhyen brtse'i dbang pos sbyar ba sid+d+hi rastu

1 Texts in this Section (sde tshan or chos tshan)

3 345-354	གཤིན་རྗེ་གཤེད་དམར་པོ་ལྷན་ཅིག་སྐྱེས་པའི་བྱིན་རླབས་ཀྱི་ཆོ་ག་ཡེ་ཤེས་འཆར་བ། gshin rje gshed dmar po lhan cig skyes pa'i byin rlabs kyi cho ga ye shes 'char ba Permission to Invoke (anujñā) - rjes gnang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །གཤིན་རྗེ་གཤེད་དམར་པོ་ལྷན་ཅིག་སྐྱེས་པའི་བྱིན་རླབས་ཀྱི་ཆོ་ག་ཡེ་ཤེས་འཆར་བ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། ཤིན་ཏུ་སྤྲོས་མེད་ལྷན་སྐྱེས་ཀྱི། །ཡེ་ཤེས་མཆོག་གི་རྣམ་རོལ་ནི། །བླ་མ་གཤིན་རྗེ་མཐར་བྱེད་ལ། །བཏུད་ནས་དེ་ཡི་བྱིན་རླབས་བྲི། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་པར་སྟེགས་བུའི་དབུས་སུ་མཎྜལ་ཚོམ་བུ་གཅིག་པ་དང་། མཆོད་གཏོར་བཤམ། སློབ་དཔོན་གྱི་མདུན་ཏུ་བུམ་པ་བཅུད་ལྡན། རྡོ་རྗེ་དྲིལ་བུ། ནང་མཆོད་སོགས་དང་། གཞན་ཡང་རལ་གྲི། གྲི་ཐོད། རྡོ་རྗེའི་དབྱུག་པ་སོགས་ཉེར་མཁོ་ཐམས་ཅད་འདུ་བྱ། མཆོད་པ་བྱིན་རླབས་དང་སྐྱབས་སེམས་སྤྱི་ལྟར་སྔོན་དུ་འགྲོ་བས། སྭ་བྷཱ་བས་རང་དང་ཚོམ་བུ་གཉིས་ཀ་མི་དམིགས་ཏེ་སྟོང་པར་སྦྱང་། སྟོང་པའི་ངང་ལས་བདག་མདུན་ལྷན་ཅིག་ཏུ་ལྷར་བསྐྱེད་པ་ནས། བཟླས་པའི་བར་ཆོས་ཀྱི་རྒྱལ་པོ་འཕགས་པ་རིན་པོ་ཆེས་མཛད་པའི་མངོན་རྟོགས་ལྟར་ཉམས་སུ་བླང་། གཏོར་མ་བསང་སྦྱང་བྱིན་གྱིས་བརླབ། རང་གི་སྙིང་གའི་ཧཱུྃ་ལས་སོགས་ནས། འཇིག་རྟེན་པ་མཁའ་འགྲོའི་ཚོགས་དང་བཅས་པ་ཨོཾ་བཛྲ་ས་མཱ་ཛཿས་གཏོར་མགྲོན་སྤྱན་དྲངས་ལ་སྒྲུབ་ཐབས་ལྟར་གཏོར་མ་འབུལ། ཨོཾ་རཀྟ་ཡ་མཱ་རི་ས་པ་རི་ཝཱ་ར་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་འབུལ། སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་གཙོ་ལ་ཕྱག་འཚལ་ལོ། །གཤིན་རྗེ་གཤེད་པོ་འཁོར་བཅས་རྣམས། །མཆོད་སྦྱིན་གཏོར་མ་སོགས་དང་། །བདག་གི་སོགས་ནས། འགྲུབ་པར་མཛད་དུ་གསོལ། །ཞེས་གསོལ་བ་གདབ། བུམ་པ་ལ་དམིགས་ཏེ་ཧྲཱིཿཥྟཱིཿཅི་ནུས་བཟླས་པས་བྱིན་གྱིས་བརླབ། གཉིས་པ་ནི། དབང་གིས་སྨིན་པའི་སློབ་མ་རྣམས་ཁྲུས་བྱས་གྲལ་དུ་འཁོད་པར་སེམས་བསྐྱེད་གསལ་གདབ་ལ། དེ་ལ་རྣལ་འབྱོར་བླ་མེད་ཞེ་སྡང་ཐབས་རྒྱུད་དཔལ་གཤིན་རྗེ་གཤེད་ཀྱི་སྐོར་ལ་དམར་ནག་འཇིགས་གསུམ་དུ་གྲགས་པའི་ཡ་གྱལ་རྣལ་འབྱོར་དབང་ཕྱུག་ཆེན་པོ་བིཪྺ་པའི་མན་ངག །མཁས་པ་དང་གྲུབ་པའི་སྐྱེས་བུ་བར་མ་ཆད་པ་ལས་རིམ་པར་འོངས་པའི་བཅོམ་ལྡན་འདས་གཤིན་རྗེ་གཤེད་དམར་པོ་ལྷན་ཅིག་སྐྱེས་པའི་བྱིན་རླབས་ཀྱི་རིམ་པ་ཟབ་མོ་སྒྲུབ་པ་ལ། སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས། རྒྱུད་དག་པར་བྱ་བའི་སླད་དུ། མདུན་གྱི་ནམ་མཁར་བླ་མ་དང་གཉིས་སུ་མེད་པའི་བཅོམ་ལྡན་འདས་གཤིན་རྗེ་གཤེད་ལ་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་དུ་བཞུགས་བའི་སྤྱན་སྔར་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་སོགས། སླར་ཡང་རིགས་ལྔ་སྤྱི་དང་བྱེ་བྲག་གིས་བསྡུས་པའི་དམ་ཚིག་དང་སྡོམ་པ་རྣམས་འཛིན་སྙམ་པས་འདིའི་རྗེས་ཟློས་ལན་གསུམ་མཛོད། སངས་རྒྱས་བྱང་ཆུབ་སེམས་དཔའ་ཀུན་སོགས། དེ་ནས་བྱིན་རླབས་ཀྱི་གཞི་དགོད་པའི་སླད་དུ། སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་སྐུ་ལུས་ལ་ཕོག་པས་སྡིག་སྒྲིབ་བག་ཆགས་དང་བཅས་པ་སྦྱངས་ཏེ་ལུས་འོད་ཀྱི་གོང་བུར་གྱུར་པ་སློབ་དཔོན་གཤིན་རྗེ་གཤེད་དམར་པོ་གསལ་བའི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་རྡོ་རྗེ་རོ་ལངས་མའི་མཁའ་གསང་དུ་ལྷུངས་པ་ལས་སྐད་ཅིག་གིས་པདྨ་དང་ཉི་མའི་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྐུ་ཅན་རེ་རེར་ལམ་སྟེ་གྱུར་པ་ལ། ཡབ་ཡུམ་སྙོམས་པར་ཞུགས་པའི་བདེ་བའི་སྒྲས་སངས་རྒྱས་ཐམས་ཅད་སྤྱན་དྲངས་ཏེ་དབང་བསྐུར། སླར་ཡང་མཁའ་གསང་ནས་ཕྱིར་སྤྲོས་ཏེ་རང་རང་གི་གདན་གྱི་སྟེང་དུ་འཁོད་པའི་མོས་པ་དང་བཅས་སློབ་དཔོན་ལ་གུས་འདུད་མཛད་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གཤིན་རྗེ་གཤེད་དམར་པོའི་རྣམ་པར་སྤྱན་དྲངས། ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཧྲཱིཿཥྟཱིཿའི་མཐར། ཨཱ་བེ་ཤ་ཡ་ཨཿཨཱཿ ཞེས་བཏགས་པས་ཡེ་ཤེས་དབབ། ཛཿཧཱུྃ་བྃ་ཧོཿས་དབྱེར་མེད་དུ་བསྟིམ། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་ནམ་མཁའ་གང་བར་ཨོཾ་བཛྲ་ས་མཱ་ཛཿ བུམ་པའི་དབང་བསྐུར་བའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་རང་བཞིན་ཅན་རྣམས་ཀྱིས། །ཁྱེད་ཀྱིས་བདག་ལ་དབང་བསྐུར་སྩོལ། །ཞེས་གསོལ་བ་བཏབ་པས་སློབ་དཔོན་དང་དབང་གི་ལྷ་ལྷན་ཅིག་པས་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་དབང་བསྐུར་བའི་མོས་པ་མཛོད། སངས་རྒྱས་རྣམས་ནི་སོགས་ནས། ཨ་བྷི་ཥིཉྩུ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་རྡོ་རྗེ་སེམས་པ་རེ་རེས་དབུར་བརྒྱན། ཛཿཧཱུྃ་བྃ་ཧོཿ དབང་གི་ལྷ་རྣམས་ཀྱང་ཁྱེད་རང་རྣམས་ལ་ཐིམ་པའི་མོས་པ་མཛོད། དེས་བུམ་པའི་དབང་བསྐུར་བ་བྱིན་རླབས་ཀྱི་ཚུལ་གྱིས་ཐོབ་པའོ། །གསང་བའི་དབང་གི་སླད་དུ། ནང་མཆོད་གཏོར་མ་ལྟར་བྱིན་གྱིས་བརླབ། བདུད་རྩིའི་སྟེང་གི་ནམ་མཁར་སྐད་ཅིག་གི་དཔལ་གཤིན་རྗེ་གཤེད་དམར་པོ་ཡབ་ཡུམ་གསལ་བར་བྱང་ཆུབ་ཀྱི་སེམས་སུ་ཞུ། ཐོད་པའི་བདུད་རྩི་དང་རོ་གཅིག་པ་ལྕེ་ཐོག་ཏུ་བཞག་པའི་མོས་པ་མཛོད། ཅེས་བརྡ་སྤྲད་ལ། ཧྲཱིཿཥྟཱིཿདང་འབྲུ་གསུམ་བཟླ་བཞིན་པར་སློབ་མ་ལ་སྦྱིན། དེས་གསང་བའི་དབང་ཐོབ་པའོ། །ཤེས་རབ་ཡེ་ཤེས་ཀྱི་དབང་གི་སླད་དུ་ཁྱེད་རང་རྣམས་ཀྱི་ལུས་ལྷ་སྐུ་གསལ་དྭང་འཇའ་ཚོན་ལྟ་བུར་སྣང་བ་དང་། སེམས་རྒྱུད་བདུད་རྩིའི་རོ་མྱོང་བས་བརྗོད་བྲལ་དུ་ཤར་བ་ལ་བློ་བཞག་སྟེ་ཅུང་ཟད་རེ་མཉམ་པར་འཇོག་མཛོད། དེས་ཤེས་རབ་ཡེ་ཤེས་ཀྱི་དབང་ཐོབ་པའོ། །དབང་བཞི་པའི་སླད་དུ། གྲུབ་ཆེན་བིཪྺ་པས། འདི་ཉིད་གསལ་ཞིང་སྟོང་པ་སྟེ། །རིག་པའི་དེ་ཉིད་མ་འགགས་པ། །རང་རིག་ཡེ་ཤེས་སྐད་ཅིག་མ། །འདི་ནི་ཐོག་མ་དབུས་མཐའ་མེད། །ཅེས་གསུངས་ཏེ། དེའི་དོན་ཉམས་སུ་ལེན་པ་ལ་ལུས་གནད་རྣམ་སྣང་གི་ཆོས་བདུན་དང་ལྡན་པར་བྱས། ངག་རླུང་རྒྱུ་བ་སོར་བཞག །སེམས་དང་ནམ་མཁའ་རོ་གཅིག་ཏུ་བསྲེས་ཏེ་གསལ་སྟོང་རྣམ་པར་མི་རྟོག་པའི་ངང་དུ་མཉམ་པར་འཇོག་མཛོད། དེ་ལྟར་བཞག་པས་སྐྱེ་འགག་གནས་གསུམ་དང་བྲལ་བའི་གཉུག་མའི་ཡེ་ཤེས་བསམ་བརྗོད་ལས་འདས་པར་ཉམས་སུ་མྱོང་བ་ནི་ཤིན་ཏུ་སྤྲོས་པ་མེད་པའི་དེ་ཁོ་ན་ཉིད་དེ། དབང་བཞི་པའི་ངོ་བོའོ། །མཐའ་རྟེན་སྔགས་ཀྱི་རྗེས་གནང་སྦྱིན་པ་ལ་རྗེས་སུ་བཟླས་པའི་ལུང་གི་སླད་དུ། སློབ་དཔོན་གྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་བྱུང་། ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ས་བོན་གྱི་མཐར་འཁོད་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། ཨོཾ་ཧྲཱིཿཥྟཱིཿསོགས། དམ་བཅའ་བའི་ལུང་གི་སླད་དུ། དུས་ད་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་གཤིན་རྗེ་གཤེད་དམར་པོ་ཡི་དམ་གྱི་ལྷར་བཟུང་བར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས། དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བཅོམ་ལྡན་འདས་གཤིན་རྗེ་གཤེད་དམར་པོ་ཡི་དམ་གྱི་ལྷར་བཟུང་བར་བགྱིའོ། །བྱིན་གྱིས་རླབས་པའི་ལུང་གི་སླད་དུ། སློབ་དཔོན་ལ་མེ་ཏོག་འཐོར་བ་དང་བཅས་ཏེ་འདིའི་རྗེས་ཟློས་མཛོད། བཅོམ་ལྡན་བདག་གིས་སོགས། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་སུ་བྱས་ཏེ་སྤྱི་བོར་བཞག་པས་སྔགས་ཀྱི་དངོས་གྲུབ་བརྟན་ཅིང་ནུས་ལྡན་དུ་བྱིན་གྱིས་བརླབས་པའི་མོས་པ་མཛོད། བཅོམ་ལྡན་འདི་ལ་སོགས། རལ་གྲིའི་རྗེས་གནང་གི་སླད་དུ། ཧཱུྃ་ལས་བྱུང་བའི་བདུད་ཐམས་ཅད་འཇོམས་པར་བྱེད་པའི་རལ་གྲི་ཕྱག་གཡས་སུ་བྱིན་པའི་མོས་པ་མཛོད། སངས་རྒྱས་ཀུན་གྱི་རལ་གྲི་ཆེ། །ཁམས་གསུམ་པ་ཡིས་ཕྱག་བྱས་པ། །ལས་ཀྱི་རལ་གྲི་མཆོག་ལྟ་བུ། །བདུད་ལས་རྒྱལ་བར་བྱ་ཕྱིར་ཟུངས། །མངོན་སྤྱོད་ཀྱི་རྗེས་སུ་གནང་བའི་སླད་དུ་མ་རུངས་པ་ཚར་གཅོད་པའི་གྲི་གུག་ཕྱག་གཡས་སུ་བྱིན་པའི་མོས་པ་མཛོད། ཨེ་མ་ཧོ་གསོད་པ་འདི་ནི་བཟང་། །གསོད་པ་གསོད་པ་མ་ཡིན་ཏེ། །དམ་ཚིག་ལ་སྡང་བསད་པ་ཡིན། །སེམས་ཅན་གནོད་བྱེད་བསད་པར་བྱ། །དཀོན་མཆོག་གསུམ་ལ་གནོད་བྱེད་ལ། །བཟོད་པ་བསྒོམ་པར་མི་བྱའོ། །དམ་ཚིག་ལ་སྡང་དགྲ་ཆེན་པོ། །ངོ་མཐོན་ཁྱོད་ཀྱིས་བསད་པར་བྱོས། །བརྟུལ་ཞུགས་ཀྱི་རྗེས་གནང་གི་སླད་དུ། བདུད་བཞིའི་ཁྲག་གིས་གང་བའི་ཐོད་པ་ཕྱག་གཡོན་ཏུ་བྱིན་པའི་མོས་པ་མཛོད། ཁམས་གསུམ་ཀུན་གྱི་ཁྲག་ཆེན་པོ། །མ་རུངས་སྙིང་ནས་དྲོངས་བྱོས་ལ། །ཁྲག་ཆེན་ཁྱོད་ཀྱིས་བཏུང་བར་གྱིས། །བརྟུལ་ཞུགས་མཐར་ཐུག་བླ་ན་མེད། ཕྱག་མཚན་གྱི་རྗེས་གནང་གི་སླད་དུ། རྡོ་རྗེའི་དབྱུག་པ་ཕྱག་གཡས་དང་ཀ་པཱ་ལ་གཡོན་ཏུ་བྱིན་པའི་མོས་པ་མཛོད། གཤིན་རྗེ་གཤེད་པོའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། རྡོ་རྗེའི་དབྱུག་པ་ཀ་པཱ་ལ། །དཔའ་བོས་ཡང་དག་བཟུང་བར་གྱིས། །དེ་ནས་མདུན་བསྐྱེད་ཀྱི་དཔལ་གཤིན་རྗེ་གཤེད་ཡབ་ཡུམ་ཁྱེད་རང་རྣམས་ལ། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ་པ་ལ་སློབ་དཔོན་གྱིས་མེ་ཏོག་གི་ཆར་འབེབས་ཤིང་རབ་ཏུ་གནས་པས་བརྟན་པར་བྱས་པའི་མོས་པ་མཛོད། སུ་པྲ་ཏིཥྛ་བརྗོད། མེ་ཏོག་ལ་སོགས་པའི་མཆོད་པས་ཀྱང་མཆོད་པའི་མོས་པ་མཛོད། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་བི་དྱེ་ཨཱཿཧཱུྃ། སླར་ཡང་བཀྲ་ཤིས་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། ཕུན་སུམ་ཚོགས་པ་སོགས་ཤིས་བརྗོད་ཇི་ལྟར་རིགས་པ་བྱ། དེས་བྱིན་རླབས་ཀྱི་དངོས་གཞི་མཐའ་རྟེན་བཅས་ལེགས་པར་གྲུབ་ནས། དམ་ཚིག་ཁས་བླང་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་གཏང་། གསུམ་པ་ནི། སློབ་དཔོན་གྱིས་གཏོར་མགྲོན་ལ་མཆོད་བསྟོད། ནོངས་བཤགས། གཤེགས་གསོལ། གནས་གསུམ་བསྲུང་། བསྔོ་སྨོན་ཤིས་བརྗོད་སྤྱི་ལྟར་བྱའོ། །དཔལ་ལྡན་གཤིན་རྗེ་མཐར་བྱེད་ཀྱི། །བྱིན་རླབས་ཤིན་ཏུ་སྤྲོས་མེད་པའི། །ཡེ་ཤེས་འཆར་བའི་རིམ་པ་འདིས། །འགྲོ་ཀུན་ལྷན་ཅིག་སྐྱེས་འགྲུབ་ཤོག །ཅེས་པའང་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་གསུང་རབ་དང་འབྲེལ་བར་བྱིན་རླབས་བྱ་ཚུལ་ཉུང་གསལ་འདིའང་། ཉེ་བར་མཁོ་བའི་ཡན་ལག་ཏུ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བ་སིདྡྷི་རསྟུ།། །། ༈

[edit]

gshin rje gshed dmar po lhan cig skyes pa'i byin rlabs kyi cho ga ye shes 'char ba/ @#/_/gshin rje gshed dmar po lhan cig skyes pa'i byin rlabs kyi cho ga ye shes 'char ba zhes bya ba bzhugs so/__/oM swa sti sid+d+haM/__shin tu spros med lhan skyes kyi/__/ye shes mchog gi rnam rol ni/__/bla ma gshin rje mthar byed la/__/btud nas de yi byin rlabs bri/__/'di la gsum/__sbyor ba/__dngos gzhi/__rjes so/__/dang po ni/__gnas dben par stegs bu'i dbus su maN+Dal tshom bu gcig pa dang /__mchod gtor bsham/__slob dpon gyi mdun tu bum pa bcud ldan/__rdo rje dril bu/__nang mchod sogs dang /__gzhan yang ral gri/__gri thod/__rdo rje'i dbyug pa sogs nyer mkho thams cad 'du bya/__mchod pa byin rlabs dang skyabs sems spyi ltar sngon du 'gro bas/__swa b+hA bas rang dang tshom bu gnyis ka mi dmigs te stong par sbyang /__stong pa'i ngang las bdag mdun lhan cig tu lhar bskyed pa nas/__bzlas pa'i bar chos kyi rgyal po 'phags pa rin po ches mdzad pa'i mngon rtogs ltar nyams su blang /__gtor ma bsang sbyang byin gyis brlab/__rang gi snying ga'i hU~M las sogs nas/__'jig rten pa mkha' 'gro'i tshogs dang bcas pa oM badz+ra sa mA dzaHsa gtor mgron spyan drangs la sgrub thabs ltar gtor ma 'bul/__oM rak+ta ya mA ri sa pa ri wA ra ar+g+haM sogs kyis phyi mchod dang /__oM AHhU~M gis nang mchod 'bul/__sangs rgyas kun gyi rang bzhin khyod/__/sangs rgyas thams cad gcig bsdus pa/__/sangs rgyas kun rab mchog gi mchog__/dkyil 'khor gtso la phyag 'tshal lo/__/gshin rje gshed po 'khor bcas rnams/__/mchod sbyin gtor ma sogs dang /__/bdag gi sogs nas/__'grub par mdzad du gsol/__/zhes gsol ba gdab/__bum pa la dmigs te hrIHSh+tIHci nus bzlas pas byin gyis brlab/__gnyis pa ni/__dbang gis smin pa'i slob ma rnams khrus byas gral du 'khod par sems bskyed gsal gdab la/__de la rnal 'byor bla med zhe sdang thabs rgyud dpal gshin rje gshed kyi skor la dmar nag 'jigs gsum du grags pa'i ya gyal rnal 'byor dbang phyug chen po biR+Wa pa'i man ngag__/mkhas pa dang grub pa'i skyes bu bar ma chad pa las rim par 'ongs pa'i bcom ldan 'das gshin rje gshed dmar po lhan cig skyes pa'i byin rlabs kyi rim pa zab mo sgrub pa la/__slob dpon gyi bya ba rnams grub nas/__khyed rang rnams kyi ngo skal du gyur pa thog mar maN+Dal phul/__gsol ba 'debs pa 'di'i rjes zlos lan gsum mdzod/__kun mkhyen ye shes sogs/__rgyud dag par bya ba'i slad du/__mdun gyi nam mkhar bla ma dang gnyis su med pa'i bcom ldan 'das gshin rje gshed la skyabs yul thams cad kyis bskor ba mngon sum du bzhugs ba'i spyan sngar sdig pa bshags pa la sogs pa yan lag bdun pa bgyid snyam pas 'di'i rjes zlos lan gsum mdzod/__dkon mchog gsum la sogs/__slar yang rigs lnga spyi dang bye brag gis bsdus pa'i dam tshig dang sdom pa rnams 'dzin snyam pas 'di'i rjes zlos lan gsum mdzod/__sangs rgyas byang chub sems dpa' kun sogs/__de nas byin rlabs kyi gzhi dgod pa'i slad du/__slob dpon la gus 'dud mdzad pas/__slob dpon gyi thugs ka nas 'od zer 'phros/__khyed rang rnams kyi sku lus la phog pas sdig sgrib bag chags dang bcas pa sbyangs te lus 'od kyi gong bur gyur pa slob dpon gshin rje gshed dmar po gsal ba'i zhal du zhugs/__sku'i dbyibs brgyud/__yum rdo rje ro langs ma'i mkha' gsang du lhungs pa las skad cig gis pad+ma dang nyi ma'i sogs nas/__ye shes kyi me 'bar ba'i dbus na bzhugs pa'i sku can re rer lam ste gyur pa la/__yab yum snyoms par zhugs pa'i bde ba'i sgras sangs rgyas thams cad spyan drangs te dbang bskur/__slar yang mkha' gsang nas phyir spros te rang rang gi gdan gyi steng du 'khod pa'i mos pa dang bcas slob dpon la gus 'dud mdzad pas/__slob dpon gyi thugs ka nas 'od zer 'phros/__phyogs bcu'i sangs rgyas dang byang chub sems dpa' thams cad gshin rje gshed dmar po'i rnam par spyan drangs/__khyed rang rnams la sib sib thim pas rgyud byin gyis brlabs pa'i mos pa mdzod/__hrIHSh+tIH'i mthar/__A be sha ya aHAH__zhes btags pas ye shes dbab/__dzaHhU~M ba~M hoHsa dbyer med du bstim/__slar yang slob dpon gyi thugs ka nas 'od zer 'phros pas dbang gi lha nam mkha' gang bar oM badz+ra sa mA dzaH__bum pa'i dbang bskur ba'i slad du gsol ba 'debs pa 'di'i rjes zlos mdzod/__bcom ldan de bzhin gshegs pa kun/__/bcom ldan bdag nyid chen po rnams/__/thugs rje'i rang bzhin can rnams kyis/__/khyed kyis bdag la dbang bskur stsol/__/zhes gsol ba btab pas slob dpon dang dbang gi lha lhan cig pas bum pa ye shes kyi bdud rtsis gang ba re thogs te dbang bskur ba'i mos pa mdzod/__sangs rgyas rnams ni sogs nas/__a b+hi Shiny+tsu hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu lhag ma yar lud pa las rdo rje sems pa re res dbur brgyan/__dzaHhU~M ba~M hoH__dbang gi lha rnams kyang khyed rang rnams la thim pa'i mos pa mdzod/__des bum pa'i dbang bskur ba byin rlabs kyi tshul gyis thob pa'o/__/gsang ba'i dbang gi slad du/__nang mchod gtor ma ltar byin gyis brlab/__bdud rtsi'i steng gi nam mkhar skad cig gi dpal gshin rje gshed dmar po yab yum gsal bar byang chub kyi sems su zhu/__thod pa'i bdud rtsi dang ro gcig pa lce thog tu bzhag pa'i mos pa mdzod/__ces brda sprad la/__hrIHSh+tIHdang 'bru gsum bzla bzhin par slob ma la sbyin/__des gsang ba'i dbang thob pa'o/__/shes rab ye shes kyi dbang gi slad du khyed rang rnams kyi lus lha sku gsal dwang 'ja' tshon lta bur snang ba dang /__sems rgyud bdud rtsi'i ro myong bas brjod bral du shar ba la blo bzhag ste cung zad re mnyam par 'jog mdzod/__des shes rab ye shes kyi dbang thob pa'o/__/dbang bzhi pa'i slad du/__grub chen biR+Wa pas/__'di nyid gsal zhing stong pa ste/__/rig pa'i de nyid ma 'gags pa/__/rang rig ye shes skad cig ma/__/'di ni thog ma dbus mtha' med/__/ces gsungs te/__de'i don nyams su len pa la lus gnad rnam snang gi chos bdun dang ldan par byas/__ngag rlung rgyu ba sor bzhag__/sems dang nam mkha' ro gcig tu bsres te gsal stong rnam par mi rtog pa'i ngang du mnyam par 'jog mdzod/__de ltar bzhag pas skye 'gag gnas gsum dang bral ba'i gnyug ma'i ye shes bsam brjod las 'das par nyams su myong ba ni shin tu spros pa med pa'i de kho na nyid de/__dbang bzhi pa'i ngo bo'o/__/mtha' rten sngags kyi rjes gnang sbyin pa la rjes su bzlas pa'i lung gi slad du/__slob dpon gyi thugs ka'i sngags phreng las sngags phreng gnyis pa byung /__zhal nas thon/__khyed rang rnams kyi zhal du zhugs/__thugs ka'i sa bon gyi mthar 'khod pa'i mos pa dang bcas te sngags 'di'i rjes zlos lan gsum mdzod/__oM hrIHSh+tIHsogs/__dam bca' ba'i lung gi slad du/__dus da nas bzung ste/__ji srid byang chub snying po la mchis kyi bar du/__bcom ldan 'das gshin rje gshed dmar po yi dam gyi lhar bzung bar bgyi'o snyam pas 'di'i rjes zlos lan gsum mdzod/__slob dpon dgongs su gsol/__bdag ming 'di zhes bgyi bas/__dus 'di nas bzung ste/__ji srid byang chub snying po la mchis kyi bar du bcom ldan 'das gshin rje gshed dmar po yi dam gyi lhar bzung bar bgyi'o/__/byin gyis rlabs pa'i lung gi slad du/__slob dpon la me tog 'thor ba dang bcas te 'di'i rjes zlos mdzod/__bcom ldan bdag gis sogs/__slob dpon gyis kyang me tog gi phreng ba sngags su byas te spyi bor bzhag pas sngags kyi dngos grub brtan cing nus ldan du byin gyis brlabs pa'i mos pa mdzod/__bcom ldan 'di la sogs/__ral gri'i rjes gnang gi slad du/__hU~M las byung ba'i bdud thams cad 'joms par byed pa'i ral gri phyag g.yas su byin pa'i mos pa mdzod/__sangs rgyas kun gyi ral gri che/__/khams gsum pa yis phyag byas pa/__/las kyi ral gri mchog lta bu/__/bdud las rgyal bar bya phyir zungs/__/mngon spyod kyi rjes su gnang ba'i slad du ma rungs pa tshar gcod pa'i gri gug phyag g.yas su byin pa'i mos pa mdzod/__e ma ho gsod pa 'di ni bzang /__/gsod pa gsod pa ma yin te/__/dam tshig la sdang bsad pa yin/__/sems can gnod byed bsad par bya/__/dkon mchog gsum la gnod byed la/__/bzod pa bsgom par mi bya'o/__/dam tshig la sdang dgra chen po/__/ngo mthon khyod kyis bsad par byos/__/brtul zhugs kyi rjes gnang gi slad du/__bdud bzhi'i khrag gis gang ba'i thod pa phyag g.yon tu byin pa'i mos pa mdzod/__khams gsum kun gyi khrag chen po/__/ma rungs snying nas drongs byos la/__/khrag chen khyod kyis btung bar gyis/__/brtul zhugs mthar thug bla na med/__phyag mtshan gyi rjes gnang gi slad du/__rdo rje'i dbyug pa phyag g.yas dang ka pA la g.yon tu byin pa'i mos pa mdzod/__gshin rje gshed po'i phyag rgya 'di/__/phyi dang nang du yang dag gnas/__rdo rje'i dbyug pa ka pA la/__/dpa' bos yang dag bzung bar gyis/__/de nas mdun bskyed kyi dpal gshin rje gshed yab yum khyed rang rnams la/__dzaHhU~M ba~M hoH__gnyis su med par thim pa la slob dpon gyis me tog gi char 'bebs shing rab tu gnas pas brtan par byas pa'i mos pa mdzod/__su pra tiSh+Tha brjod/__me tog la sogs pa'i mchod pas kyang mchod pa'i mos pa mdzod/__oM badz+ra puSh+pe AHhU~M nas/__nai bi d+ye AHhU~M/__slar yang bkra shis pa'i tshigs su bcad pas kyang mnga' gsol ba'i mos pa mdzod/__phun sum tshogs pa sogs shis brjod ji ltar rigs pa bya/__des byin rlabs kyi dngos gzhi mtha' rten bcas legs par grub nas/__dam tshig khas blang sogs spyi ltar byas la slob ma rnams rang gnas su gtang /__gsum pa ni/__slob dpon gyis gtor mgron la mchod bstod/__nongs bshags/__gshegs gsol/__gnas gsum bsrung /__bsngo smon shis brjod spyi ltar bya'o/__/dpal ldan gshin rje mthar byed kyi/__/byin rlabs shin tu spros med pa'i/__/ye shes 'char ba'i rim pa 'dis/__/'gro kun lhan cig skyes 'grub shog__/ces pa'ang chos kyi rgyal po 'phags pa rin po che'i gsung rab dang 'brel bar byin rlabs bya tshul nyung gsal 'di'ang /__nye bar mkho ba'i yan lag tu bya bral ba 'jam dbyangs mkhyen brtse'i dbang pos sbyar ba sid+d+hi rastu//____//__!_