JKW-KABUM-23-'A-001-062

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 62, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བོགས་འདོན་བདུད་རྩིའི་ཟེགས་མ། རྫོགས་པ་ཆེན་པོ་རང་གྲོལ་རྣམ་ལྔ་ལས། །བོགས་འདོན་བདུད་རྩིའི་ཟེགས་མ་ཞེས་བྱ་བ། ན་མོ་ཤྲཱི་གུ་ར་བེ། རིག་པ་འདི་ཀ་ཟང་ཐལ་རྗེན་པར་ཤར། །ཤར་དང་མ་ཤར་རྩིས་གདབ་དབྱིངས་སུ་ནུབ། །ནུབ་མེད་རང་གསལ་རྟག་ཏུ་གནས་པའི་ཆོས། །ཆོས་ཉིད་གཤིས་པ་འགྲོ་འོང་མེད་པར་འདུད། །ལམ་གྱི་ངོ་བོ་ལྟ་སྒོམ་སྤྱོད་འབྲས་བཞིར། །ལམ་གྱི་གེགས་སེལ་གཟེར་བཞིས་ཐེབས་པའི་ཚེ། །ལམ་གྱི་བོགས་འདོན་གནད་དུ་ཆེ་བ་ཡིས། །ལམ་འདི་ཐུན་མོང་མིན་པའི་ཁྱད་པར་མཆོག །གདོད་ནས་སྟོང་པའི་ཀ་དག་བློ་བྲལ་དང་། །དེ་ཡི་ཐུགས་རྗེ་མ་འགགས་ལྷུན་གྲུབ་ལམ། །གཉིས་སུ་མེད་པར་ལྷུག་པར་མཐོང་བ་ཡི། །རང་གྲོལ་ལྟ་བའི་བོགས་འདོན་དེ་ལ་མཛོད། །འདི་ལྟར་སྣང་ཞིང་གྲགས་དང་རིག་པའི་རྩལ། །ཐམས་ཅད་དངོས་བཟུང་མེད་པར་གང་དགར་བཏང་། །ཤར་མཁན་རང་གསལ་ངང་དུ་མཉམ་གཞག་པས། །ཡེངས་མེད་སྒོམ་པའི་བོགས་འདོན་དེ་ལ་མཛོད། །བདེ་སྡུག་ཡུལ་ཅན་ཇི་ལྟར་བྱུང་ཡང་རུང་། །དགའ་བྲོད་སྙེམས་བྱེད་ཐམས་ཅད་ཐད་ཀར་བཅད། །དུས་གསུམ་རྟོག་བྲལ་ཡེ་ཤེས་ལམ་དུ་ཁྱེར། །གཏད་མེད་སྤྱོད་པའི་བོགས་འདོན་དེ་ལ་མཛོད། །བཞིན་ལག་མཚན་དཔེའི་རིས་སུ་བཅད་པ་ཡིས། །སངས་རྒྱས་གུད་ན་མེད་དོ་སེམས་ཉིད་དབྱིངས། །འདི་ཀ་རླུང་སེམས་བྲལ་བར་ཐག་བཅད་པས། །རེ་བྲལ་འབྲས་བུའི་བོགས་འདོན་དེ་ལ་མཛོད། །དཔྱིད་ནི་མཐོ་ཞིང་དྭངས་ལ་བསིལ་བ་དང་། །དབྱར་ནི་མཚོ་གླིང་མེ་ཏོག་རྒྱས་པའི་ཚལ། །དགུན་ནི་རི་ཁྲོད་ནགས་ཚལ་བས་མཐའ་སོགས། །ཡིད་མཐུན་ཡུལ་གྱི་བོགས་འདོན་དེ་ལ་མཛོད། །དགྲ་དང་གཉེན་དང་འདུ་བྱེད་རྟོག་ཚོགས་ཀྱིས། །རང་ཡིད་ཆགས་སྡང་རླུང་གིས་བསྐྱོད་པའི་ཚེ། །རྩིས་གདབ་མེད་པ་སྨྱོན་པ་ལྟ་བུར་བྱ། །འཛིན་མེད་ཆོས་ཀྱི་བོགས་འདོན་དེ་ལ་མཛོད། །ཁྱད་པར་སྤྲིན་བྲལ་ནམ་མཁར་འདྲེན་བྱེད་གཏད། །ལུས་དང་རླུང་གི་རྒྱུ་བ་ལྷུག་ པར་བཞག །ཡིད་ནི་ཅི་ཡང་མི་བསམ་ཕྱམ་མེར་བཏང་། །སེམས་བྲལ་རིག་པའི་བོགས་འདོན་དེ་ལ་མཛོད། །ཚུལ་འདི་དད་དང་ངེས་ཤེས་མཆོག་ལྡན་པའི། །དབང་རྣོན་རྣམས་ཀྱི་སྙིང་ལ་དམ་དུ་སྦོས། །དེ་ལས་གཞན་དུ་རྟོགས་པར་མི་འགྱུར་ཞེས། །རིག་སྟོང་གཉུག་མའི་རྡོ་རྗེས་དེ་སྐད་ལོ། །གུ་ཧྱ། ༈ །

[edit]

bogs 'don bdud rtsi'i zegs ma/__ rdzogs pa chen po rang grol rnam lnga las/__/bogs 'don bdud rtsi'i zegs ma zhes bya ba/__na mo shrI gu ra be/__rig pa 'di ka zang thal rjen par shar/__/shar dang ma shar rtsis gdab dbyings su nub/__/nub med rang gsal rtag tu gnas pa'i chos/__/chos nyid gshis pa 'gro 'ong med par 'dud/__/lam gyi ngo bo lta sgom spyod 'bras bzhir/__/lam gyi gegs sel gzer bzhis thebs pa'i tshe/__/lam gyi bogs 'don gnad du che ba yis/__/lam 'di thun mong min pa'i khyad par mchog__/gdod nas stong pa'i ka dag blo bral dang /__/de yi thugs rje ma 'gags lhun grub lam/__/gnyis su med par lhug par mthong ba yi/___/rang grol lta ba'i bogs 'don de la mdzod/__/'di ltar snang zhing grags dang rig pa'i rtsal/__/thams cad dngos bzung med par gang dgar btang /__/shar mkhan rang gsal ngang du mnyam gzhag pas/__/yengs med sgom pa'i bogs 'don de la mdzod/_/bde sdug yul can ji ltar byung yang rung /__/dga' brod snyems byed thams cad thad kar bcad/__/dus gsum rtog bral ye shes lam du khyer/__/gtad med spyod pa'i bogs 'don de la mdzod/__/bzhin lag mtshan dpe'i ris su bcad pa yis/__/sangs rgyas gud na med do sems nyid dbyings/__/'di ka rlung sems bral bar thag bcad pas/__/re bral 'bras bu'i bogs 'don de la mdzod/__/dpyid ni mtho zhing dwangs la bsil ba dang /__/dbyar ni mtsho gling me tog rgyas pa'i tshal/__/dgun ni ri khrod nags tshal bas mtha' sogs/__/yid mthun yul gyi bogs 'don de la mdzod/__/dgra dang gnyen dang 'du byed rtog tshogs kyis/__/rang yid chags sdang rlung gis bskyod pa'i tshe/__/rtsis gdab med pa smyon pa lta bur bya/__/'dzin med chos kyi bogs 'don de la mdzod/__/khyad par sprin bral nam mkhar 'dren byed gtad/__/lus dang rlung gi rgyu ba lhug _par bzhag__/yid ni ci yang mi bsam phyam mer btang /__/sems bral rig pa'i bogs 'don de la mdzod/__/tshul 'di dad dang nges shes mchog ldan pa'i/__/dbang rnon rnams kyi snying la dam du sbos/__/de las gzhan du rtogs par mi 'gyur zhes/__/rig stong gnyug ma'i rdo rjes de skad lo/_/gu h+ya/_!__/