JKW-KABUM-23-'A-001-018

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 18, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

ཟབ་མོའི་ལམ་རིམ་གནད་བསྡུས་པའི་གླུ་བདུད་རྩིའི་ཟེགས་མ། ཟབ་མོའི་ལམ་གྱི་རིམ་པའི་གནད་བསྡུས་པའི་རྡོ་རྗེའི་གླུ་བདུད་རྩིའི་ཟེག་མ་ཞེས་བྱ་བ། ཨ་ཧོ། གཞི་དབྱིངས་ཀ་ནས་དག་པའི་འོད་གསལ་གྱི་ཀློང་དུ། །གཞི་སྣང་རིག་གདངས་ལྷུན་གྲུབ་ཆེན་པོ་རུ་ཤར་བའི། ཁ་སྦྱོར་ཡན་ལག་བདུན་ལྡན་ཡེ་ཤེས་ཀྱི་སྣང་བརྙན། །ཨོ་རྒྱན་མཚོ་སྐྱེས་བླ་མས་འབྲལ་མེད་དུ་སྐྱོངས་ཤིག །རྙེད་དཀའི་དལ་འབྱོར་ཐོབ་པ་ལེགས་བྱས་ཀྱི་འབྲས་བུ། །ནམ་འཆི་ཆ་མེད་དྲན་པ་དམ་ཆོས་ཀྱི་བསྐུལ་མ། །ལས་འབྲས་ཚུལ་བཞིན་བླང་དོར་འདུན་མ་ཡི་ཡང་རྩེ། །སྙིང་ནས་འཁོར་བར་སྐྱོ་བ་ཐར་ལམ་གྱི་འཇུག་སྒོ། །གསུམ་ལ་སྐྱབས་སུ་འགྲོ་བ་ཡོན་ཏན་གྱི་ཕྱི་མོ། །བྱང་ཆུབ་སེམས་གཉིས་བསྐྱེད་པ་ཐེག་ཆེན་གྱི་རྩ་བ། །ཚོགས་བསགས་སྒྲིབ་སྦྱོང་བརྩོན་པ་ཉམས་རྟོགས་ཀྱི་ཞིང་ས། །མོས་གུས་བླ་མའི་རྣལ་འབྱོར་ཉམས་ལེན་གྱི་སྲོག་ཤིང་། །ཅིར་སྣང་ལྷ་སྐུར་ཤར་བ་བསྐྱེད་རིམ་གྱི་མཐར་ཐུག །རླུང་སེམས་དབྱེར་མེད་བསྒོམ་པ་རྫོགས་རིམ་གྱི་ཉིང་ཁུ། །དབྱིངས་རིག་ཟུང་འཇུག་བསྐྱང་བ་རྫོགས་ཆེན་གྱི་འཇོག་སོ། །འབྲལ་མེད་གནད་དུ་བསྣུན་པའི་སྐལ་བཟང་ལ་སྦྱར་བས། །འོད་གསལ་པདྨ་དྲྭ་བའི་ཞིང་ཁམས་ཀྱི་དབུས་སུ། །རྩ་རླུང་ཐིག་ལེ་རྣམ་དག་མཚོ་སྐྱེས་ཀྱི་བླ་མ། །མངོན་སུམ་རང་ངོ་འཕྲོད་པའི་ངལ་འཚོ་དང་སྦྲགས་ནས། །ཚེ་གཅིག་འཇའ་ལུས་འགྲུབ་པའི་སྨོན་ལམ་ཞིག་ཞུའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོའི་མགྲིན་པའི་ཆུ་གཏེར་ལས་བྱུང་བའོ། ། ༈

[edit]

zab mo'i lam rim gnad bsdus pa'i glu bdud rtsi'i zegs ma/__ zab mo'i lam gyi rim pa'i gnad bsdus pa'i rdo rje'i glu bdud rtsi'i zeg ma zhes bya ba/__a ho/__gzhi dbyings ka nas dag pa'i 'od gsal gyi klong du/__/gzhi snang rig gdangs lhun grub chen po ru shar ba'i/__kha sbyor yan lag bdun ldan ye shes kyi snang brnyan/__/o rgyan mtsho skyes bla mas 'bral med du skyongs shig__/rnyed dka'i dal 'byor thob pa legs byas kyi 'bras bu/__/nam 'chi cha med dran pa dam chos kyi bskul ma/__/las 'bras tshul bzhin blang dor 'dun ma yi yang rtse/__/snying nas 'khor bar skyo ba thar lam gyi 'jug sgo/__/gsum la skyabs su 'gro ba yon tan gyi phyi mo/__/byang chub sems gnyis bskyed pa theg chen gyi rtsa ba/__/tshogs bsags sgrib sbyong brtson pa nyams rtogs kyi zhing sa/__/mos gus bla ma'i rnal 'byor nyams len gyi srog shing /__/cir snang lha skur shar ba bskyed rim gyi mthar thug__/rlung sems dbyer med bsgom pa rdzogs rim gyi nying khu/__/dbyings rig zung 'jug bskyang ba rdzogs chen gyi 'jog so/__/'bral med gnad du bsnun pa'i skal bzang la sbyar bas/__/'od gsal pad+ma drwa ba'i zhing khams kyi dbus su/__/rtsa rlung thig le rnam dag mtsho skyes kyi bla ma/__/mngon sum rang ngo 'phrod pa'i ngal 'tsho dang sbrags nas/__/tshe gcig 'ja' lus 'grub pa'i smon lam zhig zhu'o/__/zhes pa'ang mtsho skyes bla ma dgyes pa'i 'bangs mkhyen brtse'i dbang po'i mgrin pa'i chu gter las byung ba'o/___/__!_